နကဒိးဘျၢထံအဂီၢ် နအိၣ်ကတဲာ်ကတီၤသးလံဧါ

ခီဖျိလၢ နမၤလိလံာ်စီဆှံအဃိ နသ့ၣ်ညါဘၣ် ယဟိဝၤယွၤအဂ့ၢ် အါမးလံ. ဒီးဒ်သိး နကမၤထွဲတၢ်လၢ နမၤလိဘၣ်တဖၣ်အဂီၢ် နဆီတလဲထီၣ် နတၢ်အိၣ်မူလံ. သနာ်က့ နမ့ၢ်တဟ့ၣ်လုၢ်ထီၣ်နသး ဒီးဒိးဘျၢထံဒံးဘၣ်န့ၣ် ဘၣ်သ့ၣ်သ့ၣ် တၢ်ဂ့ၢ်ကအိၣ်ဝဲ တမံၤမံၤ. အဃိ လၢတၢ်မၤလိ တခါအံၤအပူၤ ပကတဲသကိး တၢ်တြီမၤတံာ်တာ်တနီၤ လၢနကထံၣ်ဘၣ် တချုးလၢနဒိးဘျၢထံဒံးဘၣ် ဒီးနမၤနၢၤကွံာ် တၢ်တြီမၤတံာ်တာ်တဖၣ်အံၤ ကသ့ဒ်လဲၣ်.

၁. တချုးလၢ နဒိးဘျၢထံဒံးဘၣ်န့ၣ် နကဘၣ်သ့ၣ်ညါ တၢ်မ့ၢ်တၢ်တီထဲလဲၣ်.

တချုးလၢ နဒိးဘျၢထံဒံးဘၣ်န့ၣ် နကဘၣ်သ့ၣ်ညါ “တၢ်မ့ၢ်တၢ်တီ လီၤတံၢ်လီၤဆဲး.” (၁ တံၤမသ့း ၂:၄) ဘၣ်ဆၣ် ပသ့ၣ်ညါ တၢ်မ့ၢ်တၢ်တီ လီၤတံၢ်လီၤဆဲးန့ၣ် တအဲၣ်ဒိးတဲဝဲ ဖဲပှၤသံကွၢ်ပှၤ ဘၣ်ဃးဒီး လံာ်စီဆှံအဂ့ၢ်အခါ ပစံးဆၢက့ၤအီၤ ကဘၣ်ဘၣ်ခဲလၢာ်န့ၣ်ဘၣ်. ခရံာ်ဖိတဖၣ်န့ၣ် အဝဲသ့ၣ်ဒိးဘျၢထံဝံၤ ဖးယံာ်လံသနာ်က့ အဝဲသ့ၣ်ဆဲးဃုသ့ၣ်ညါဒံး တၢ်မ့ၢ်တၢ်တီ. (ကလီးစဲ ၁:​၉, ၁၀) ဒီးဒ်သိး နကဒိးဘျၢဘၣ်ထံအဂီၢ် နကဘၣ်သ့ၣ်ညါ လံာ်စီဆှံအတၢ်သိၣ်လိ အခီၣ်ထံးခီၣ်ဘိတဖၣ်. လံာ်စီဆှံအတၢ်သိၣ်လိ အခီၣ်ထံးခီၣ်ဘိတဖၣ်အံၤ နနၢ်ပၢၢ်အီၤဂ့ၤဂ့ၤလံဧါ တဂ့ၤဒံးဘၣ်ဧါန့ၣ် ဒ်သိးနကသ့ၣ်ညါအဂီၢ် နသံကွၢ် တၢ်အိၣ်ဖှိၣ်သးပှၢ်တဖၣ်သ့လီၤ.

၂. တချုးလၢ နဒိးဘျၢထံဒံးဘၣ်န့ၣ် နကဘၣ်မၤဆိ မနုၤလဲၣ်.

တချုးလၢ နဒိးဘျၢထံဒံးဘၣ်န့ၣ် နကဘၣ် ‘ပီၢ်ယၢ်လီၤက့ၤနသး ဒီးဃၣ်ကဒါက့ၤ နသး.’ (ဖး မၤတၢ် ၃:၁၉.) တၢ်ပီၢ်ယၢ်လီၤက့ၤသးန့ၣ် အဲၣ်ဒိးတဲဝဲ နသးအုးလၢ တၢ်ကမၣ်တဖၣ် လၢနမၤတ့ၢ် လၢအပူၤကွံာ် ဒီးနဃ့ယဟိဝၤယွၤ လၢအကပျၢ်ကွံာ် နတၢ်ကမၣ်. တကးဒံးဘၣ် နပာ်တ့ၢ်ကွံာ် လုၢ်လၢ်သကဲာ်ပဝး လၢအတဂ့ၤဘၣ် ဒီးနပာ်လီၤသး ဂၢၢ်ဂၢၢ်ကျၢၤကျၢၤလၢ နကအိၣ်မူက့ၤ ဒ်ကစၢ်ယွၤအတၢ်ဘၣ်သး. နထီၣ်တၢ်အိၣ်ဖှိၣ် ဒီးနကဲထီၣ် ပှၤစံၣ်တဲၤတဲလီၤတၢ်ဖိ လၢအစံၣ်တဲၤတဲလီၤသကိးတၢ် ဃုာ်ဒီးတၢ်အိၣ်ဖှိၣ်ဖိ.

၃. နကဒိးဘျၢထံန့ၣ် ဘၣ်မနုၤအဃိ နတလိၣ်ဘၣ်ယိၣ်တၢ်ဘၣ်လဲၣ်.

ပှၤတနီၤန့ၣ် ဘၣ်ယိၣ်ဝဲလၢ တၢ်လၢအဝဲသ့ၣ်အၢၣ်လီၤ ယဟိဝၤယွၤန့ၣ် အဝဲသ့ၣ်မၤလၢပှဲၤဝဲ တန့ၢ်ဘၣ်. ဒ်ပှၤသးတီ လၢညါတဖၣ်အသိး တဘျီတခီၣ်န့ၣ် ပကမၤကမၣ်ဘၣ်တၢ်. ဒီးပကဲ ပှၤတလၢတပှဲၤဘၣ်အဃိ ယဟိဝၤယွၤ နၢ်ပၢၢ်စၢၤပှၤ. (ဖး စံးထီၣ်ပတြၢၤ ၁၀၃:​၁၃, ၁၄.) ဘၣ်ဆၣ် ပမ့ၢ်ဂုာ်ကျဲးစၢး အဂ့ၤကတၢၢ်လၢ ပကမၤလၢပှဲၤ ပတၢ်အၢၣ်လီၤန့ၣ် ယဟိဝၤယွၤ ကသးခု. ဒီးဒ်သိး ပမၤလၢပှဲၤ ပတၢ်အၢၣ်လီၤ ကန့ၢ်အဂီၢ် အဝဲကမၤစၢၤပှၤ. ယဟိဝၤယွၤ အၢၣ်လီၤဝဲလၢ တၢ်လၢက “မၤလီၤဖးပှၤဒီး . . . အတၢ်အဲၣ်” န့ၣ်တအိၣ်နီတမံၤဘၣ်.​—ဖး ရိမ့ၤ ၈:​၃၈, ၃၉.

ဃုသ့ၣ်ညါအါထီၣ်

၄. ဃုသ့ၣ်ညါအါထီၣ် ယဟိဝၤယွၤအဂ့ၢ်

တချုးလၢ နဒိးဘျၢထံဒံးဘၣ်န့ၣ် နကဘၣ်သ့ၣ်ညါ ယဟိဝၤယွၤအဂ့ၢ် ထဲလဲၣ်. နကဘၣ်သ့ၣ်ညါ ယဟိဝၤယွၤအဂ့ၢ်ဂ့ၤဂ့ၤ တုၤလၢ နအဲၣ်အီၤ ဒီးနအဲၣ်ဒိး မၤသးခုအသး. လၢဟီၣ်ခိၣ်ဒီဘ့ၣ်ညါ ပှၤမၤလိ လံာ်စီဆှံဖိတဖၣ် မၤဝဲဒ်န့ၣ်န့ၣ် ဒ်သိးနကထံၣ်ဘၣ်အဂီၢ် ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.

တၢ်ဂီၤမူ– ခီၣ်ခါလၢ ကမၤစၢၤနၤဒ်သိး နကတုၤထီၣ်ထီၣ်ဘးလၢ တၢ်ဒိးဘျၢထံ (၃:၅၆)

• လၢတၢ်ဂီၤမူအပူၤန့ၣ် ဒ်သိး ပှၤတဂၤ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် တၢ်မနုၤမၤစၢၤအီၤလဲၣ်.

ဖး ရိမ့ၤ ၁၂:၂ ဝံၤဒီး တဲသကိး တၢ်သံကွၢ် လၢလာ် တဖၣ်အံၤ–

• လံာ်စီဆှံအတၢ်သိၣ်လိ ဒီးတၢ်မ့ၢ်တၢ်တီလၢ ယဟိဝၤပှၤအုၣ်အသးတဖၣ် သိၣ်လိဝဲ လၢအမၤဒ့ဒီနသးန့ၣ် အိၣ်တခါခါဧါ.

• နတၢ်သးဒ့ဒီ မ့ၢ်အိၣ်န့ၣ် နမၤလီၤမၢ်ကွံာ်အီၤ ကသ့ဒ်လဲၣ်.

၅. မၤနၢၤကွံာ် တၢ်လၢအတြီမၤတံာ်တာ်နၤ လၢနကဒိးဘျၢထံအဂီၢ်

ပမ့ၢ်ဆၢတဲာ်လီၤပသးလၢ ပကဟ့ၣ်လုၢ်ထီၣ်ပသး လၢယဟိဝၤယွၤအအိၣ် ဒီးဒိးဘျၢထံန့ၣ် ပကထံၣ်ဘၣ်ဒီး တၢ်တြီမၤတံာ်တာ်တနီၤ. ဒ်သိး နကထံၣ်ဘၣ် တၢ်အဒိတခါအဂီၢ် ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.

တၢ်ဂီၤမူ– ခီဖျိအဲၣ် ယဟိဝၤယွၤအဃိ မၤနၢၤကွံာ် တၢ်ကီတၢ်ခဲန့ၢ်ဝဲ (၅:၂၂)

• လၢတၢ်ဂီၤမူအပူၤန့ၣ် ဒ်သိး ဒီပုၢ်ဝဲၢ်မုၣ် နၤရၤကၤရဲ ကဘူၣ်ထီၣ်ဘါထီၣ်ဘၣ် ယဟိဝၤယွၤအဂီၢ် အဘၣ်လဲၤခီဖျိဝဲ တၢ်တြီမၤတံာ်တာ် မနုၤတဖၣ်လဲၣ်.

• ခီဖျိလၢ အအဲၣ်ယဟိဝၤယွၤအဃိ အမၤနၢၤကွံာ် တၢ်တြီမၤတံာ်တာ်တဖၣ် န့ၢ်ဝဲဒ်လဲၣ်.

ဖး ကတိၤဒိ ၂၉:၂၅ ဒီး ၂ တံၤမသ့း ၁:၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဒ်သိး ပကအိၣ်ဒီး တၢ်သးဒူလၢ ပကမၤနၢၤကွံာ် တၢ်တြီမၤတံာ်တာ်တဖၣ်အဂီၢ် တၢ်မနုၤ ကမၤစၢၤပှၤလဲၣ်.

၆. နာ်န့ၢ်ယဟိဝၤယွၤ လၢကမၤစၢၤနၤ

ဒ်သိး နမၤယဟိဝၤယွၤ အတၢ်ဘၣ်သး ကန့ၢ်အဂီၢ် အဝဲကမၤစၢၤနၤ. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.

တၢ်ဂီၤမူ– ယဟိဝၤယွၤ ကမၤစၢၤနၤ (၂:၅၀)

• လၢတၢ်ဂီၤမူအပူၤန့ၣ် ဘၣ်မနုၤအဃိ ပှၤမၤလိလံာ်စီဆှံဖိတဂၤ မၤယံာ်မၤနီၢ်အသးလၢ ကဒိးဘျၢထံလဲၣ်.

• တၢ်လၢအမၤလိဘၣ်ဝဲတဖၣ်န့ၣ် မၤစၢၤအီၤလၢ အကမၤဂၢၢ်ကျၢၤထီၣ် အတၢ်နာ် ယဟိဝၤယွၤ ဒ်လဲၣ်.

ဖး ယၡါယၤ ၄၁:​၁၀, ၁၃ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဖဲနဟ့ၣ်လုၢ်ထီၣ်နသးအခါ နမၤတၢ်အၢၣ်လီၤဒီး ကစၢ်ယွၤလီၤ. ဘၣ်မနုၤအဃိ နနာ်သ့လၢ နမၤလၢပှဲၤ နတၢ်အၢၣ်လီၤအံၤသ့လဲၣ်.

၇. ပာ်လုၢ်ပာ်ပှ့ၤအါထီၣ် ယဟိဝၤယွၤ အတၢ်အဲၣ်

နမ့ၢ်ဆိကမိၣ်အါထီၣ် ဘၣ်ဃးဒီး ယဟိဝၤယွၤ အဲၣ်နၤထဲလဲၣ်န့ၣ် နကပာ်လုၢ်ပာ်ပှ့ၤအါထီၣ် အတၢ်အဲၣ် ဒီးနကအဲၣ်ဒိး ဘူၣ်ထီၣ်ဘါထီၣ်အီၤ လီၤထူလီၤယိာ်. ဖး စံးထီၣ်ပတြၢၤ ၄၀:၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ယဟိဝၤယွၤ အတၢ်ဆိၣ်ဂ့ၤ လၢနပာ်လုၢ်ပာ်ပှ့ၤ အဒိၣ်ကတၢၢ်န့ၣ် မ့ၢ်ဖဲလဲၣ်တခါလဲၣ်.

ဝံယံးရမံယၤ အဲၣ်ယဟိဝၤယွၤဒိၣ်မး ဒီးအအဲၣ် ကစၢ်ယွၤ အကလုၢ်ကထါ. အကဲဘၣ် ယဟိဝၤယွၤ အခ့အပှၤအဃိ အထံၣ်ဝဲ ဒ်တၢ်ခွဲးတၢ်ယာ်လီၤဆီ ဒီးအပာ်လုၢ်ပာ်ပှ့ၤဝဲဒိၣ်မး. ဝံယံးရမံယၤ တဲဝဲလၢ “ကစၢ်ယဟိဝၤယွၤဧၢ, ယဘၣ်တၢ်ကိးယၤလၢ နမံၤလီၤ . . . ဒီးနတၢ်ကတိၤန့ၣ် ကဲထီၣ် တၢ်သးခု ဒီးတၢ်သူၣ်ဖှံသးညီ လၢယဂီၢ်လီၤ.” (ယံးရမံယၤ ၁၅:၁၆) တဲသကိး တၢ်သံကွၢ် လၢလာ်တဖၣ်အံၤ–

• ပကဲဘၣ် ယဟိဝၤပှၤအုၣ်အသးတဂၤန့ၣ် ဘၣ်မနုၤအဃိ အကဲ တၢ်ခွဲးတၢ်ယာ်လီၤဆီလဲၣ်.

• နအဲၣ်ဒိး ဒိးဘျၢထံ ဒ်ယဟိဝၤပှၤအုၣ်အသးတဂၤ အသိးဧါ.

• နကဒိးဘျၢထံန့ၣ် တၢ်တြီမၤတံာ်တာ်နၤ အိၣ်တမံၤမံၤဧါ.

• နဖီတၢၣ်လၢ နကဒိးဘျၢထံန့ၣ် ဒ်သိးနမၤလၢပှဲၤအီၤ ကန့ၢ်အဂီၢ် နဆိကမိၣ် နဘၣ်မၤ မနုၤလဲၣ်.

တၢ်ဂ့ၢ်လၢအရ့ဒိၣ်

ဒ်သိး နကဒိးဘျၢဘၣ်ထံအဂီၢ် ယဟိဝၤယွၤ ကမၤစၢၤနၤလၢ နကမၤနၢၤကွံာ် တၢ်တြီမၤတံာ်တာ်တဖၣ်.

တၢ်ကွၢ်ကဒါက့ၤ

• တချုးလၢ နဒိးဘျၢထံဒံးဘၣ်န့ၣ် နကဘၣ်သ့ၣ်ညါ လံာ်စီဆှံအဂ့ၢ် ထဲလဲၣ်.

• တချုးလၢ နဒိးဘျၢထံဒံးဘၣ်န့ၣ် နကဆီတလဲ နတၢ်အိၣ်မူဒ်လဲၣ်.

• နကဒိးဘျၢထံန့ၣ် ဘၣ်မနုၤအဃိ နတလိၣ်ဘၣ်ယိၣ်တၢ်ဘၣ်လဲၣ်.

ဃုသ့ၣ်ညါ

ဖးကွၢ် ဘၣ်ဃးဒီး နမ့ၢ်ပာ်လီၤနသးလၢ နကဒိးဘျၢထံန့ၣ် တၢ်ဂ့ၢ်အရ့ဒိၣ်ကတၢၢ်လၢနဂီၢ် ကဘၣ်မ့ၢ်မနုၤလဲၣ်.

“မ့ၢ်နတုၤထီၣ်ထီၣ်ဘးလၢ နကဒိးဘျၢထံအဂီၢ်လံဧါ” (တၢးထီခိးတၢ်, လါမၢ်ၡး ၂၀၂၀)

ဖးကွၢ် ဘၣ်ဃးဒီး တၢ်ကီတၢ်ခဲတဖၣ် လၢအထုးဃၢနၤ ဒ်သိး နသုတဒိးဘျၢထံတဂ့ၤအဂီၢ်န့ၣ် နမၤနၢၤကွံာ်အီၤ ကန့ၢ်ဒ်လဲၣ်.

“တၢ်မနုၤထုးဃၢယၤ ဒ်သိးယသုတဒိးဘျၢထံတဂ့ၤအဂီၢ်လဲၣ်” (တၢးထီခိးတၢ်, လါမၢ်ၡး ၂၀၁၉)

ကွၢ်တၢ်ဂီၤမူ လၢအပာ်ဖျါထီၣ်ဝဲ ဒ်သိး ပိာ်ခွါတဂၤ ကဒိးဘျၢဘၣ်ထံအဂီၢ် အဝဲမၤနၢၤကွံာ် တၢ်ကီတၢ်ခဲဖးဒိၣ်တဖၣ် န့ၢ်ဝဲဒ်လဲၣ်.

‘ဘၣ်မနုၤ နမၤယံာ်မၤနီၢ်သးလၢ နကဒိးဘျၢထံအဂီၢ်လဲၣ်’ (၁:၁၀)

ကွၢ်တၢ်ဂီၤမူလၢ အပာ်ဖျါထီၣ်ဝဲ လၢအခီၣ်ထံးခါ ပိာ်ခွါတဂၤ ဒိးဘျၢထံတဘူၣ်ဘၣ်. ဘၣ်ဆၣ် လၢခံ တၢ်မနုၤမၤစၢၤအီၤလၢ အကခါထီၣ်ခီၣ်ခါလၢ အရ့ဒိၣ်အံၤလဲၣ်.

မ့ၢ်ယကြၢးဒီး တၢ်ခွဲးတၢ်ယာ်အံၤဧါ (၇:၂၁)