သိၣ်လိတၢ်လၢပှၤနၢ်ပၢၢ်ဘၣ်အီၤညီ

ယ့ၣ်ၡူးမၤဝဲဒ်လဲၣ်

တၢ်ဂီၤမူ– ယ့ၣ်ၡူးပာ်ဖျါထီၣ်လၢ ယဟိဝၤယွၤသးအိၣ်ပှၤ

၁. ကွၢ် တၢ်ဂီၤမူ ဒီး ဖး မးသဲ ၆:၂၅-၂၇. ဝံၤဒီးတဲသကိး တၢ်သံကွၢ်လၢလာ်တဖၣ်အံၤ–

1. က. ယဟိဝၤယွၤသးအိၣ်ပှၤန့ၣ် ယ့ၣ်ၡူး ပာ်ဖျါထီၣ်ဝဲဒ်လဲၣ်.

2. ခ. ယ့ၣ်ၡူးသ့ၣ်ညါဝဲ ထိၣ်တဖၣ်အဂ့ၢ်အါမး. ဘၣ်ဆၣ် ယ့ၣ်ၡူးတဲဖျါထီၣ်ဝဲ ထိၣ်အဂ့ၢ်ယိယိဖိ ဒ်လဲၣ်. ဘၣ်မနုၤအဃိ အတၢ်သိၣ်လိအံၤ ကဲဘျုးဝဲလဲၣ်.

ပမၤလိန့ၢ်တၢ်လၢ ယ့ၣ်ၡူးအအိၣ်ဒ်လဲၣ်

၂. ပမ့ၢ်သိၣ်လိတၢ်ယိယိဖိန့ၣ် ပှၤဒိကနၣ်တၢ်ဖိ ကနီၣ်ဘၣ်ဝဲ တၢ်လၢပသိၣ်လိအီၤ ဒီးနုာ်လီၤလၢအသးကပူၤညီ.

ကွၢ်လိမၤဒိးယ့ၣ်ၡူး

၃. တဘၣ်တဲတၢ်အါတလၢတဂ့ၤ. ဖဲနသိၣ်လိပှၤဂၤအခါ တဲအီၤတၢ်ဂ့ၢ်လၢ အအိၣ်ဖဲလံာ်တဘ့ၣ်န့ၣ်အပူၤ ဒီးတဘၣ်တဲအါထီၣ် တၢ်ဂ့ၢ်တၢ်ကျိၤလၢ အတအိၣ်လၢ လံာ်တဘ့ၣ်န့ၣ်အပူၤဘၣ်တဂ့ၤ. နသံကွၢ်တၢ်သံကွၢ်မ့ၢ်ဝံၤန့ၣ်, အိၣ်ဒီးတၢ်ဝံသးစူၤ ဒီးအိၣ်ခိးတုၤလၢ နပှၤမၤလိလံာ်စီဆှံဖိ ကစံးဆၢက့ၤနၤ. အက့ၤစံးဆၢနၤမ့ၢ်တဘၣ်ဘၣ် မ့တမ့ၢ် အပာ်ဖျါထီၣ်အတၢ်ထံၣ် မ့ၢ်တဘၣ်လိာ်သးဒီး လံာ်စီဆှံဘၣ်န့ၣ် သံကွၢ်အါထီၣ်အီၤတၢ်သံကွၢ်လၢ အကမၤစၢၤအီၤ ဒ်သိး အကဆိမိၣ်ထံဝဲ ဘၣ်ဃးဒီးတၢ်ဂ့ၢ်အံၤ. နပှၤမၤလိလံာ်စီဆှံဖိ မ့ၢ်နၢ်ပၢၢ်ထီၣ် တၢ်ဂ့ၢ်ခိၣ်သ့ၣ်လံန့ၣ် နဆဲးလဲၤလၢညါသ့လံ.

၄. သူတၢ်ဂ့ၢ်တၢ်ကျိၤလၢ နပှၤမၤလိလံာ်စီဆှံဖိ သ့ၣ်ညါပာ်စၢၤဝဲတဖၣ်ဒ်သိးအကနၢ်ပၢၢ်ထီၣ် တၢ်ဂ့ၢ်လၢအသီအဂီၢ်. အဒိ တချုးလၢ နစးထီၣ်တၢ်မၤလိလၢ အဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤ အဂ့ၢ်ဒံးဘၣ်န့ၣ် နက့ၤတဲသကိးက့ၤ တၢ်ဂ့ၢ်တစဲးဖိလၢ နပှၤမၤလိလံာ်စီဆှံဖိ မၤလိဘၣ်ဝဲ, လၢအဘၣ်ဃးဒီး ဖဲပှၤသံအခါ တၢ်ကမၤအသးဒီးအီၤဒ်လဲၣ်.

၅. သူတၢ်အဒိလၢအကဲဘျုး. တချုးလၢနသူတၢ်အဒိဒံးဘၣ်န့ၣ် သံကွၢ်လီၤနသးလၢ–

1. က. ‘တၢ်အဒိတခါအံၤ ပှၤနၢ်ပၢၢ်ဘၣ်ဝဲညီဧါ.’

2. ခ. ‘ပှၤမၤလိလံာ်စီဆှံဖိ နၢ်ပၢၢ်ဘၣ်ဝဲညီဧါ.’

3. ဂ. ‘တၢ်အဒိလၢယသူအီၤန့ၣ် မ့ၢ်အမၤစၢၤ ယပှၤမၤလိလံာ်စီဆှံဖိ လၢအတိၢ်နီၣ် တၢ်ဂ့ၢ်မိၢ်ပှၢ် ကန့ၢ်ဧါ မ့တမ့ၢ် မ့ၢ်အကနီၣ်ဘၣ်ထဲ တၢ်အဒိလီၤဧါ.’