တၢ်မၤလိ ၂၂
တၢ်သးဝံၣ် ၁၅ စံးပတြၢၤယဟိဝၤယွၤအဖိဝဲၢ်ကိ
ယဟိဝၤယွၤအမံၤန့ၣ် အရ့ဒိၣ်လၢ ယ့ၣ်ၡူးအဂီၢ်ထဲလဲၣ်
“ယဒုးသ့ၣ်ညါ အဝဲသ့ၣ်လၢနမံၤလံ. ဒီးယကဆဲး ဒုးသ့ၣ်ညါအီၤ.”—ယိၤ ၁၇:၂၆.
တၢ်ဂ့ၢ်မိၢ်ပှၢ်
လၢတၢ်မၤလိအံၤ ပကသ့ၣ်ညါဘၣ် ဘၣ်ဃးဒီး ယ့ၣ်ၡူးဒုးသ့ၣ်ညါ ပှၤဂၤလၢ ယဟိဝၤယွၤအမံၤ. အပာ်စီဆှံ ယဟိဝၤယွၤအမံၤ ဒီးအပာ်ဖျါထီၣ်လၢ ယဟိဝၤယွၤအမံၤ ပူၤဖျဲးဒီး တၢ်ဒုၣ်ဒွဲၣ်စံးအၢ.
၁-၂. (က) တချုးလၢ ယ့ၣ်ၡူးကသံအနၤန့ၣ် အမၤမနုၤလဲၣ်. (ခ) လၢတၢ်မၤလိအံၤ ပကတဲသကိး တၢ်သံကွၢ်မနုၤလဲၣ်.
ဖဲ ခ.န ၃၃ လါနံစၣ် ၁၄, မုၢ်လွံၢ်နံၤ ဟါလီၤခီန့ၣ် ယ့ၣ်ၡူးမၤဝဲ ကစၢ်ဟါတၢ်အီၣ်ဒီး အတၢ်မၢဖိလၢ အသးတီတဖၣ်. ယ့ၣ်ၡူးသ့ၣ်ညါဝဲလၢ စီၤယူဒၤ ကဆါလီၤကွံာ်အီၤ, အဒုၣ်အဒါစ့ၢ်ကီး ကမၤအၢမၤနး ဒီးကမၤသံအီၤ. အဃိ ဖဲအမၤ ကစၢ်ဟါတၢ်အီၣ်ဒီး အတၢ်မၢဖိတဖၣ် ဝံၤအလီၢ်ခံ အဟ့ၣ်ဂံၢ်ဟ့ၣ်ဘါ အဝဲသ့ၣ်လၢ တၢ်ဂ့ၢ်အါမံၤ. ဒီးတချုးဖဲ အဝဲသ့ၣ် ဟးထီၣ်လၢ ဟံၣ်ပူၤဒံးဘၣ်န့ၣ် ယ့ၣ်ၡူး ဃ့ထုကဖၣ်ဒီးအဝဲသ့ၣ် တပူၤဃီ ဒီးလၢတၢ်ထုကဖၣ်အံၤ အတဲဖျါထီၣ် တၢ်ဂ့ၢ်အရ့ဒိၣ်တခါ. ယ့ၣ်ၡူး အတၢ်ထုကဖၣ်အံၤ တၢ်မၢဖိယိၤဟၣ် ကွဲးနီၣ်ဃာ်ဝဲအဃိ ပဖးအီၤလၢ ယိၤဟၣ် အဆၢဒိၣ် ၁၇ အပူၤသ့.
၂ လၢတၢ်မၤလိအံၤ ပကမၤလိဘၣ် တၢ်ဂ့ၢ်တနီၤလၢ အဘၣ်ဃးဒီး ယ့ၣ်ၡူး အတၢ်ဃ့ထုကဖၣ်. တချုးလၢ ယ့ၣ်ၡူးသံဒံးဘၣ်န့ၣ် အဘၣ်ယိၣ်တၢ် ဘၣ်ဃးဒီး တၢ်ဂ့ၢ်မနုၤလဲၣ်. ဒီးလၢအတၢ်ဃ့ထုကဖၣ်န့ၣ် အပာ်ဖျါထီၣ် တၢ်ဂ့ၢ်အရ့ဒိၣ် မနုၤလဲၣ်. ပကတဲသကိး တၢ်သံကွၢ်တဖၣ်အံၤ အတၢ်စံးဆၢ.
“ယဒုးသ့ၣ်ညါ အဝဲသ့ၣ်လၢနမံၤလံ”
၃. ဘၣ်ဃးဒီး ယဟိဝၤယွၤ အမံၤန့ၣ် ယ့ၣ်ၡူးတဲဝဲဒ်လဲၣ် ဒီးအအဲၣ်ဒိးတဲဝဲ အခီပညီဒ်လဲၣ်. (ယိၤဟၣ် ၁၇:၆, ၂၆)
၃ ယ့ၣ်ၡူး တဲဝဲခံဘျီလၢ အဒုးသ့ၣ်ညါ အပျဲၢ်အဘီၣ်တဖၣ်လၢ ယဟိဝၤယွၤ အမံၤအဃိ ပသ့ၣ်ညါဘၣ်လၢ ယဟိဝၤယွၤအမံၤန့ၣ် အရ့ဒိၣ်လၢ ယ့ၣ်ၡူးအဂီၢ်ဒိၣ်မး. ဖဲယ့ၣ်ၡူး ဃ့ထုကဖၣ်တၢ်အခါ အတဲဝဲလၢ “ယဒုးသ့ၣ်ညါ အဝဲသ့ၣ်လၢနမံၤလံ.” (ဖး ယိၤဟၣ် ၁၇:၆, ၂၆.) ယ့ၣ်ၡူးအဲၣ်ဒိးတဲဝဲ အခီပညီဒ်လဲၣ်. မ့ၢ်ယ့ၣ်ၡူး အပျဲၢ်အဘီၣ်တဖၣ် တသ့ၣ်ညါ ကစၢ်ယွၤအမံၤဘၣ်အဃိ ယ့ၣ်ၡူးဘၣ်တဲပၠး အဝဲသ့ၣ်လၢ ကစၢ်ယွၤအမံၤဧါ. နီၢ်ကီၢ်န့ၣ် ယ့ၣ်ၡူး အပျဲၢ်အဘီၣ်တဖၣ် ကဲဝဲ ပှၤယူဒၤဖိအဃိ အဝဲသ့ၣ် သ့ၣ်ညါပာ်စၢၤ ကစၢ်ယွၤအမံၤလံ. ဒီးလံာ်စီဆှံလၢ ဧ့ၤဘြံၤကျိာ်တကတြူၢ် အပူၤစ့ၢ်ကီး ပာ်ဖျါထီၣ်ဝဲ ကစၢ်ယွၤအမံၤ ဘူးကအိၣ် အဘျီ ၇,၀၀၀ ညါ. အဃိ ဖဲယ့ၣ်ၡူး တဲဝဲလၢ “ယဒုးသ့ၣ်ညါ အဝဲသ့ၣ်လၢနမံၤလံ” အခါ ယ့ၣ်ၡူး တတဲပၠး အဝဲသ့ၣ်ထဲ ယဟိဝၤယွၤ အမံၤဘၣ်. အသိၣ်လိစ့ၢ်ကီး အဝဲသ့ၣ်လၢ ယဟိဝၤန့ၣ် အကဲကစၢ်ယွၤ ဒ်လဲၣ်တဂၤလဲၣ်အဂ့ၢ်. ပှၤလၢအသ့ၣ်ညါ ယဟိဝၤယွၤအဂ့ၢ် ဂ့ၤဒိၣ်န့ၢ်ဒံး ယ့ၣ်ၡူးန့ၣ် တအိၣ်နီတဂၤဘၣ်. အဃိ ဒ်သိး အပျဲၢ်အဘီၣ်တဖၣ် ကသ့ၣ်ညါထီၣ် ယဟိဝၤယွၤအဂ့ၢ် ဂ့ၤဂ့ၤအဂီၢ် ယ့ၣ်ၡူး မၤစၢၤအဝဲသ့ၣ်ဒ်လဲၣ်. ယ့ၣ်ၡူး မၤစၢၤအဝဲသ့ၣ် ဒ်သိး ကသ့ၣ်ညါထီၣ် ယဟိဝၤယွၤ အတၢ်တိာ်ပာ်လၢ ဟီၣ်ခိၣ်ဒီးပှၤဟီၣ်ခိၣ်ဖိအဂီၢ်, တၢ်လၢ ယဟိဝၤယွၤ မၤတ့ၢ်ဝဲ, တၢ်လၢအကမၤဝဲ လၢခါဆူညါ ဒီးအတၢ်ဂ့ၤတၢ်ဝါတဖၣ်.
၄-၅. (က) ပသ့ၣ်ညါထီၣ် ဒီးပာ်လုၢ်ပာ်ပှ့ၤအါထီၣ် ပှၤတဂၤအမံၤ သ့ဒ်လဲၣ်. တဲဖျါထီၣ်တၢ်အဒိ. (ခ) ယ့ၣ်ၡူး အပျဲၢ်အဘီၣ်တဖၣ် သ့ၣ်ညါထီၣ် ယဟိဝၤယွၤအဂ့ၢ် ဂ့ၤဂ့ၤ လၢကျဲဒ်လဲၣ်.
၄ အဒိ ဆိကမိၣ်ကွၢ် လၢနတၢ်အိၣ်ဖှိၣ်အပူၤ တၢ်အိၣ်ဖှိၣ်သးပှၢ်တဂၤ လၢအမံၤမ့ၢ် ဒ့ဘ့းန့ၣ် အကဲဝဲ ကသံၣ်သရၣ်. ဒီးတၢ်အိၣ်ဖှိၣ်သးပှၢ် တဂၤအံၤ နသ့ၣ်ညါအီၤ ဖးယံာ်လံ. ဘၣ်တနံၤ နသးသမူ အိၣ်လၢ တၢ်လီၤဘၣ်ယိၣ်ဒိၣ်မး ဒီးနလိၣ်ဘၣ် ကသံၣ်သရၣ် အတၢ်မၤစၢၤ. အဃိ နလဲၤလၢ တၢ်ဆါဟံၣ် ဒီးတၢ်အိၣ်ဖှိၣ်သးပှၢ် တဂၤအံၤ အကဲကသံၣ်သရၣ်လၢ အမၤပူၤဖျဲး နသးသမူ. လၢခံ ဖဲနနၢ်ဟူအမံၤ ဒီးဆိကမိၣ်ထီၣ်တၢ်လၢ အမၤလၢနဂီၢ်အခါ နကအဲၣ်အီၤ ဒိၣ်န့ၢ်ဒံးလၢညါ. ဒ့ဘ့းန့ၣ် နသ့ၣ်ညါပာ်စၢၤအီၤ ဖးယံာ်လံ ဒီးခဲအံၤ အကဲစ့ၢ်ကီး ကသံၣ်သရၣ်တဂၤလၢ အမၤပူၤဖျဲး နသးသမူ.
၅ ဒ်န့ၣ်အသိး ယ့ၣ်ၡူးအပျဲၢ်အဘီၣ်တဖၣ်စ့ၢ်ကီး အဝဲသ့ၣ် သ့ၣ်ညါပာ်စၢၤ ယဟိဝၤယွၤအမံၤ ဖးယံာ်လံ. ဘၣ်ဆၣ် ယ့ၣ်ၡူးမၤစၢၤအဝဲသ့ၣ်လၢ ကသ့ၣ်ညါထီၣ် ယဟိဝၤယွၤအဂ့ၢ် ဂ့ၤဂ့ၤအဃိ အဝဲသ့ၣ် ပာ်လုၢ်ပာ်ပှ့ၤအါထီၣ် ယဟိဝၤယွၤအမံၤ. ဘၣ်မနုၤအဃိ ပတဲဒ်န့ၣ်လဲၣ်. မ့ၢ်လၢ ယ့ၣ်ၡူး ကွၢ်လိမၤဒိးဝဲ တၢ်လၢအပါ တဲဝဲဒီးမၤဝဲကိးမံၤဒဲး. အဃိ ဖဲယ့ၣ်ၡူးအပျဲၢ်အဘီၣ်တဖၣ် ကနၣ်ဝဲတၢ်လၢ ယ့ၣ်ၡူးသိၣ်လိဝဲ ဒီးထံၣ်ဘၣ် ယ့ၣ်ၡူးရ့ဒီးပှၤဂၤ ဂ့ၤဂ့ၤအခါ အဝဲသ့ၣ် “သ့ၣ်ညါ” ထီၣ် ယဟိဝၤယွၤအဂ့ၢ် အါန့ၢ်ဒံးလၢညါ.—ယိၤ ၁၄:၉; ၁၇:၃.
“နမံၤလၢ နဟ့ၣ်လီၤယၤ”
၆. ဘၣ်မနုၤအဃိ ယ့ၣ်ၡူးတဲလၢ ယဟိဝၤယွၤ ဟ့ၣ်လီၤအီၤလၢအမံၤလဲၣ်. (ယိၤဟၣ် ၁၇:၁၁, ၁၂)
၆ ဖဲယ့ၣ်ၡူး ဃ့ထုကဖၣ်တၢ်အခါ အဃ့န့ၢ်တၢ်လၢ အပျဲၢ်အဘီၣ်တဖၣ်အဂီၢ် ဒီးတဲဝဲလၢ “ဒီသဒၢ အဝဲသ့ၣ်လၢ နမံၤလၢ နဟ့ၣ်လီၤယၤ အဃိန့ၣ်တက့ၢ်.” (ဖး ယိၤဟၣ် ၁၇:၁၁, ၁၂.) ခီဖျိလၢ ယ့ၣ်ၡူးတဲဝဲ ဒ်န့ၣ်အဃိ မ့ၢ်ပှၤကဘၣ်ကိးက့ၤအီၤလၢ ယဟိဝၤယွၤဧါ. တမ့ၢ်ဒ်န့ၣ်ဘၣ်. ပာ်သူၣ်ပာ်သးလၢ ဖဲယ့ၣ်ၡူးတဲဘၣ်ဃးဒီး ယဟိဝၤယွၤ အမံၤအခါ အတဲဝဲလၢ “နမံၤ.” အဃိ ယဟိဝၤယွၤ အမံၤန့ၣ် တကဲထီၣ် ယ့ၣ်ၡူးအမံၤဘၣ်. ဘၣ်ဆၣ် ဖဲယ့ၣ်ၡူးတဲဝဲလၢ ကစၢ်ယွၤ ဟ့ၣ်လီၤအီၤလၢ အမံၤအခါ အအဲၣ်ဒိးတဲဝဲ အခီပညီဒ်လဲၣ်. အဲၣ်ဒိးတဲဝဲ တၢ, ယ့ၣ်ၡူးန့ၣ် အကဲဝဲ ယဟိဝၤယွၤအပှၤခၢၣ်စး ဒီးအတဲန့ၢ်တၢ်လၢ ယဟိဝၤယွၤအဂီၢ်. အဃိ အဟဲလၢအပါအမံၤ ဒီးအမၤစ့ၢ်ကီး တၢ်လီၤလးအါမံၤ လၢအပါအမံၤ. (ယိၤ ၅:၄၃; ၁၀:၂၅) ခံ, ယ့ၣ်ၡူးအမံၤန့ၣ် အခီပညီမ့ၢ်ဝဲ “ယဟိဝၤ မ့ၢ်တၢ်အုၣ်က့ၤခီၣ်က့ၤ.” အဃိ ယ့ၣ်ၡူးအမံၤ အခီပညီန့ၣ် ဘၣ်ထွဲလိာ်သးဒီး ယဟိဝၤယွၤ အမံၤစ့ၢ်ကီး.
၇. ဘၣ်မနုၤအဃိ ယ့ၣ်ၡူးတဲန့ၢ်တၢ်လၢ ယဟိဝၤယွၤအဂီၢ်လဲၣ်. တဲဖျါထီၣ် တၢ်အဒိ.
၇ ဘၣ်မနုၤအဃိ ယ့ၣ်ၡူးတဲန့ၢ်တၢ်လၢ ယဟိဝၤယွၤ အဂီၢ်လဲၣ်န့ၣ် ပကကွၢ်သကိး တၢ်အဒိတခါ. အဒိ ပဒိၣ်တဂၤ ဆှၢလီၤဝဲ အပှၤခၢၣ်စးတဂၤလၢ ကလဲၤတဲန့ၢ်တၢ်လၢအဂီၢ်. အဃိ ဖဲပဒိၣ် အပှၤခၢၣ်စးတဂၤ တဲတၢ်အခါ အတၢ်ကတိၤန့ၣ် အိၣ်ဒီးတၢ်စိတၢ်ကမီၤ ဒ်သိးဒီး ပဒိၣ်လၢ အဆှၢလီၤအီၤတဂၤန့ၣ်. ဒ်န့ၣ်အသိး ယ့ၣ်ၡူးန့ၣ် အကဲဝဲ ယဟိဝၤယွၤအပှၤခၢၣ်စး ဒီးခီဖျိလၢ အဟဲလၢ ယဟိဝၤယွၤ အမံၤအဃိ ဖဲအတဲတၢ်ဒီး ပှၤဂီၢ်မုၢ်အခါ အတဲန့ၢ်တၢ်လၢ ယဟိဝၤယွၤအဂီၢ်.—မး ၂၁:၉; လူၤ ၁၃:၃၅.
၈. တချုးလၢ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ် ဘၣ်မနုၤအဃိ ယဟိဝၤယွၤ တဲလၢ ယ့ၣ်ၡူး “ဟဲလၢ ယမံၤပူၤ” လဲၣ်. (၂ မိၤၡ့ ၂၃:၂၀, ၂၁)
၈ ယဟိဝၤယွၤ သူယ့ၣ်ၡူးလၢ အကဒုးသ့ၣ်ညါဝဲ မူခိၣ်ကလူး ဒီးပှၤဟီၣ်ခိၣ်ဖိ ဘၣ်ဃးဒီး တၢ်လၢယဟိဝၤယွၤ အဲၣ်ဒိးလၢ အဝဲသ့ၣ် ကသ့ၣ်ညါ ဒီးတၢ်လၢ အဝဲသ့ၣ် ကဘၣ်မၤဝဲ. အဃိ လံာ်စီဆှံကိးဝဲ ယ့ၣ်ၡူးလၢ “တၢ်ကလုၢ်.” (ယိၤ ၁:၁-၃) လၢညါ ဖဲပှၤအံၣ်စရ့လးဖိတဖၣ် လဲၤတၢ်လၢ ပှၢ်မုၢ်ကနၢအခါ ယဟိဝၤယွၤသူဝဲ မူခိၣ်ကလူးတဂၤလၢ ကကွၢ်ထွဲအဝဲသ့ၣ်. မူခိၣ်ကလူးတဂၤအံၤ လီၤဂာ်လၢ အကဲဝဲယ့ၣ်ၡူး. ဒီးယဟိဝၤယွၤ တဲဘၣ် ပှၤအံၣ်စရ့လးဖိလၢ မ့ၢ်လၢ မူခိၣ်ကလူးတဂၤအံၤ “အဟဲလၢ ယမံၤပူၤ”a အဃိ အဝဲသ့ၣ် ကဘၣ်ဒိကနၣ် တၢ်လၢအတဲဝဲ. (ဖး ၂ မိၤၡ့ ၂၃:၂၀, ၂၁.) ယဟိဝၤယွၤ တဲဝဲဒ်အံၤ ခီဖျိလၢ ယ့ၣ်ၡူးန့ၣ် အတဲန့ၢ်တၢ်လၢ ယဟိဝၤယွၤအဂီၢ် ဒီးအကဲ ပှၤအဂ့ၤကတၢၢ် တဂၤလၢ အပာ်စီဆှံ အပၢ်အမံၤ.
“ပၢ်ဧၢ, မၤလၤကပီၤ နမံၤတက့ၢ်”
၉. ယဟိဝၤယွၤ အမံၤန့ၣ် အရ့ဒိၣ်လၢ ယ့ၣ်ၡူးအဂီၢ်ထဲလဲၣ်.
၉ ဒ်ပတဲသကိး ဖဲမကၢာ်အသိး တချုးလၢ ယ့ၣ်ၡူးဟဲလီၤလၢ ဟီၣ်ခိၣ်ချၢ ဒံးဘၣ်အခါ ယဟိဝၤယွၤ အမံၤန့ၣ် အရ့ဒိၣ်ကတၢၢ်လၢ ယ့ၣ်ၡူးအဂီၢ်. ဒီးဖဲအအိၣ်လၢ ဟီၣ်ခိၣ်ချၢအခါစ့ၢ်ကီး တၢ်ကိးမံၤဒဲးလၢ အမၤဝဲန့ၣ် ပာ်ဖျါထီၣ်ဝဲလၢ ယဟိဝၤယွၤအမံၤန့ၣ် အရ့ဒိၣ်လၢ အဂီၢ်ဒိၣ်မး. တကးဒံးဘၣ် ဖဲယ့ၣ်ၡူး အတၢ်စံၣ်တဲၤတဲလီၤတၢ်မၤ လၢဟီၣ်ခိၣ် ဘူးကဝံၤအခါ အတဲယဟိဝၤယွၤလၢ “ပၢ်ဧၢ, မၤလၤကပီၤ နမံၤတက့ၢ်.” တဘျီဃီန့ၣ် အပါကလုၢ်သီၣ်ထီၣ်လၢမူခိၣ် ဒီးတဲဝဲလၢ “ယမၤလၤကပီၤအီၤလံ ဒီးယကမၤလၤကပီၤ ကဒီးအီၤလီၤ.”—ယိၤ ၁၂:၂၈.
၁၀-၁၁. (က) ယ့ၣ်ၡူး မၤလၤကပီၤ ယဟိဝၤယွၤ အမံၤဒ်လဲၣ်. (ကွၢ်စ့ၢ်ကီးတၢ်ဂီၤ.) (ခ) ဘၣ်မနုၤအဃိ ယဟိဝၤယွၤအမံၤ ကဘၣ်ပူၤဖျဲးဒီး တၢ်ဒုၣ်ဒွဲၣ်စံးအၢ ဒီးကဘၣ်တၢ်ပာ်စီဆှံအီၤလဲၣ်.
၁၀ ယ့ၣ်ၡူးစ့ၢ်ကီး အမၤလၤကပီၤအပါအမံၤ ခီဖျိအဒုးသ့ၣ်ညါ ပှၤဂၤလၢ အပါ အတၢ်ဂ့ၤတၢ်ဝါ ဒီးအတၢ်မၤတဖၣ်လၢ အလီၤကမၢကမၣ်ဒိၣ်မး. တကးဒံးဘၣ် ဒ်သိး အပါအမံၤ ကဘၣ်တၢ်ပာ်စီဆှံအီၤအဂီၢ် တၢ်အဂၤလၢ အမၤဝဲန့ၣ်အိၣ်ဒံး. ယ့ၣ်ၡူး အဲၣ်ဒိးပာ်ဖျါထီၣ်ဝဲလၢ တၢ်လၢအပါမၤဝဲ ကိးမံၤဒဲးန့ၣ် အဘၣ်ဝဲ ဒီးအပါအမံၤန့ၣ် စီဆှံဝဲ.b အဃိ အသိၣ်လိ အပျဲၢ်အဘီၣ်တဖၣ်လၢ ကဃ့ထုကဖၣ်တၢ်ဒ်အံၤ. အတဲဝဲလၢ “ပပၢ်အိၣ်လၢမူခိၣ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်.”—မး ၆:၉.
၁၁ ဘၣ်မနုၤအဃိ ယဟိဝၤယွၤအမံၤ ကဘၣ်ပူၤဖျဲးဒီး တၢ်ဒုၣ်ဒွဲၣ်စံးအၢ ဒီးကဘၣ်တၢ်ပာ်စီဆှံအီၤလဲၣ်. လၢညါ လၢဧ့ၤဒ့ၣ်တၤသၣ်လီၢ်န့ၣ် မုၣ်ကီၤလံၢ် တဲလံၣ်တဲလီ ယဟိဝၤယွၤအဂ့ၢ်. မုၣ်ကီၤလံၢ် တဲဝဲလၢ ယဟိဝၤယွၤန့ၣ် အကဲပှၤလၢ အလံၣ်တၢ် ဒီးအတဟ့ၣ် နီၢ်အံၣ်အု ဒီးစီၤအၤဒၣ်လၢ တၢ်လၢအဂ့ၤခဲလၢာ်ဘၣ်. (၁ မိၤ ၃:၁-၅) ခီဖျိလၢ မုၣ်ကီၤလံၢ် မၤဝဲဒ်န့ၣ်အဃိ အပာ်ဖျါထီၣ်လၢ တၢ်လၢ ယဟိဝၤယွၤ မၤဝဲတဖၣ်န့ၣ် အကျိၤအကျဲတဘၣ်ဘၣ်. ဒီးမ့ၢ်လၢမုၣ်ကီၤလံၢ် တဲလံၣ်တဲလီ ယဟိဝၤယွၤအဂ့ၢ်အဃိ ပှၤဆိကမိၣ်ဝဲလၢ ယဟိဝၤန့ၣ် အကဲယွၤလၢ အတဂ့ၤဘၣ်. လၢခံ ဖဲစီၤယိၤဘး အစိၤန့ၣ် မုၣ်ကီၤလံၢ် တဲဝဲလၢ ပှၤဟီၣ်ခိၣ်ဖိ ဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်ဒၣ်ခီဖျိလၢ ယဟိဝၤယွၤ ဆိၣ်ဂ့ၤအဝဲသ့ၣ်အဃိလီၤ. တကးဒံးဘၣ် မုၣ်ကီၤလံၢ် တဲစ့ၢ်ကီးဝဲလၢ ပှၤဟီၣ်ခိၣ်ဖိတအဲၣ် ယဟိဝၤယွၤ နီၢ်ကီၢ်ဘၣ်အဃိ ဖဲအဝဲသ့ၣ် ထံၣ်ဘၣ် တၢ်ကီတၢ်ခဲအခါ အတဘူၣ်ထီၣ်ဘါထီၣ် ယဟိဝၤယွၤလၢၤဘၣ်. (ဘး ၁:၉-၁၁; ၂:၄) အဃိ ပှၤလၢအတဲလံၣ်တၢ်န့ၣ် အကဲယဟိဝၤယွၤဧါ မုၣ်ကီၤလံၢ်ဧါန့ၣ် ဒ်သိးတၢ်စံးဆၢ ကဖျါထီၣ်အဂီၢ် တၢ်ဆၢကတီၢ်ကလိၣ်ဝဲ.
ယ့ၣ်ၡူး သိၣ်လိအပျဲၢ်အဘီၣ်တဖၣ်လၢ အရ့ဒိၣ်ဒိၣ်မးလၢ အဝဲသ့ၣ် ကဘၣ်ပာ်စီဆှံ ကစၢ်ယွၤအမံၤ (ကွၢ်လံာ်အဆၢ ၁၀)
“ယဟ့ၣ်လီၤ ယသးသမူ”
၁၂. ခီဖျိလၢ ယ့ၣ်ၡူးအဲၣ် ယဟိဝၤယွၤ အမံၤအဃိ အသးအိၣ် မၤမနုၤလဲၣ်.
၁၂ ခီဖျိလၢ ယ့ၣ်ၡူးအဲၣ် ယဟိဝၤယွၤ ဒိၣ်မးအဃိ ဒ်သိး ယဟိဝၤယွၤအမံၤ ကပူၤဖျဲးဒီး တၢ်ဒုၣ်ဒွဲၣ်စံးအၢ ဒီးအကပာ်စီဆှံ ယဟိဝၤယွၤအမံၤအဂီၢ် အဂုာ်ကျဲးစၢး မၤတၢ်ခဲလၢာ်လၢ အဂ့ၤကတၢၢ်. တကးဒံးဘၣ် လၢယဟိဝၤယွၤအမံၤအဂီၢ်န့ၣ် ယ့ၣ်ၡူး ‘ဟ့ၣ်လီၤ အသးသမူ.’c (ယိၤ ၁၀:၁၇, ၁၈) ပှၤဟီၣ်ခိၣ်ဖိ အလၢအပှဲၤ အဆိကတၢၢ်ခံဂၤ လၢအမ့ၢ် နီၢ်အံၣ်အု ဒီးစီၤအၤဒၣ်န့ၣ် အဝဲသ့ၣ် တဒိကနၣ် ယဟိဝၤယွၤ အကလုၢ်လၢၤဘၣ် ဒီးပိာ်ထီၣ် မုၣ်ကီၤလံၢ်အခံ. မ့မ့ၢ် ယ့ၣ်ၡူးန့ၣ် အသးအိၣ် ဟဲလီၤလၢ ဟီၣ်ခိၣ်ချၢ ဒ်သိး အကပာ်ဖျါထီၣ်လၢ အအဲၣ်ယဟိဝၤယွၤ. ဒီးတၢ်လၢအတဲဝဲ ဒီးမၤဝဲကိးမံၤဒဲးန့ၣ် ပာ်ဖျါထီၣ်လၢ အဒိကနၣ် ယဟိဝၤယွၤအကလုၢ် ထီဘိ. (ဧ့ၤ ၄:၁၅; ၅:၇-၁၀) ဒီးလၢ အတၢ်အိၣ်မူဒီတစိၤန့ၣ် အဆဲးတီဒီး ယဟိဝၤယွၤ တုၤလၢအသံ လၢတၢ်မၤအၢမၤနး အသ့ၣ်တၢၣ်လိၤ. (ဧ့ၤ ၁၂:၂) အမၤဝဲဒ်အံၤအဃိ အပာ်ဖျါထီၣ်လၢ အအဲၣ်ယဟိဝၤယွၤ ဒီးယဟိဝၤယွၤအမံၤ.
၁၃. ဘၣ်မနုၤအဃိ ယ့ၣ်ၡူးကဲ ပှၤအဂ့ၤကတၢၢ် တဂၤလၢ ကပာ်ဖျါထီၣ်လၢ မုၣ်ကီၤလံၢ် မ့ၢ်ပှၤလံၣ်တၢ်လီတၢ်လဲၣ်. (ကွၢ်စ့ၢ်ကီးတၢ်ဂီၤ.)
၁၃ တၢ်ခဲလၢာ်လၢ ယ့ၣ်ၡူးမၤဝဲန့ၣ် ပာ်ဖျါထီၣ်လၢ မုၣ်ကီၤလံၢ် ကဲပှၤလံၣ်တၢ်လီတၢ် ဒီးတမ့ၢ် ယဟိဝၤယွၤဘၣ်. (ယိၤ ၈:၄၄) ယ့ၣ်ၡူးသ့ၣ်ညါ ယဟိဝၤယွၤအဂ့ၢ် ဂ့ၤန့ၢ်ဒံး ပှၤအဂၤခဲလၢာ်. အဃိ တၢ်လၢမုၣ်ကီၤလံၢ် တဲဝဲဘၣ်ဃးဒီး ယဟိဝၤယွၤအဂ့ၢ် မ့မ့ၢ်ဘၣ်ဖုး တၢ်မ့ၢ်တၢ်တီန့ၣ် ယ့ၣ်ၡူး ကသ့ၣ်ညါဝဲဂ့ၤဂ့ၤ. ဘၣ်ဆၣ် ယ့ၣ်ၡူးဆဲးတီဒီး ယဟိဝၤယွၤ ဒီးဒီသဒၢ ယဟိဝၤယွၤအမံၤဒံး. ဒီးမ့ၢ်ဖျါလီၤဂာ်လၢ ယဟိဝၤယွၤ ပာ်တ့ၢ်ကွံာ် ယ့ၣ်ၡူးသနာ်က့ ယ့ၣ်ၡူးဆဲးတီဒီး ယဟိဝၤယွၤ, ဒိကနၣ်အကလုၢ် ဒီးသးအိၣ် တူၢ်သံအသး.—မး ၂၇:၄၆.d
တၢ်ခဲလၢာ်လၢ ယ့ၣ်ၡူးမၤဝဲန့ၣ် ပာ်ဖျါထီၣ်လၢ မုၣ်ကီၤလံၢ် ကဲပှၤလံၣ်တၢ်လီတၢ် ဒီးတမ့ၢ် ယဟိဝၤယွၤဘၣ် (ကွၢ်လံာ်အဆၢ ၁၃)
“တၢ်မၤလၢ နဟ့ၣ်လီၤယၤန့ၣ် ယမၤအီၤဝံၤလံ”
၁၄. ယ့ၣ်ၡူးတီဒီး ယဟိဝၤယွၤအဃိ ယဟိဝၤယွၤ ဆိၣ်ဂ့ၤက့ၤအီၤဒ်လဲၣ်.
၁၄ တချုးလၢ ယ့ၣ်ၡူးကသံအနၤန့ၣ် အဃ့ထုကဖၣ် လၢယဟိဝၤယွၤအအိၣ် ဒီးအတဲဝဲလၢ “တၢ်မၤလၢ နဟ့ၣ်လီၤယၤန့ၣ် ယမၤအီၤဝံၤလံ.” ယ့ၣ်ၡူးတီဒီး ယဟိဝၤယွၤအဃိ အနာ်ဝဲသပှၢ်တၢၢ်လၢ ယဟိဝၤယွၤ ကဆိၣ်ဂ့ၤက့ၤအီၤ. (ယိၤ ၁၇:၄, ၅) ဒီးယဟိဝၤယွၤ ဆိၣ်ဂ့ၤက့ၤအီၤနီၢ်ကီၢ်. ယဟိဝၤယွၤ တပျဲဝဲလၢ ယ့ၣ်ၡူး ကဆဲးအိၣ်လၢ တၢ်သွၣ်ခိၣ်ဘၣ်. (မၤတၢ် ၂:၂၃, ၂၄) အမၤသမူထီၣ်က့ၤ ယ့ၣ်ၡူး ဒီးဟ့ၣ်အီၤအလီၢ်အလၤ ထီန့ၢ်ဒံးလၢညါ. (ဖံလံး ၂:၈, ၉) လၢခံ ယ့ၣ်ၡူး ကဲထီၣ်စီၤပၤ ဒီးအစးထီၣ်ပၢတၢ်လၢ ယွၤအဘီအမုၢ်အပူၤ. ယွၤအဘီအမုၢ်အံၤ ကမၤဝဲမနုၤလဲၣ်. တၢ်အဒိဘၣ်ဃးဒီး တၢ်ဃ့ထုကဖၣ်လၢ ယ့ၣ်ၡူးသိၣ်လိ အပျဲၢ်အဘီၣ်န့ၣ် တဲဝဲလၢ “နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး ဒ် [ယဟိဝၤယွၤ] တၢ်ဘၣ်သး အိၣ်ဝဲအသိးတက့ၢ်.”—မး ၆:၁၀.
၁၅. ယ့ၣ်ၡူး ကမၤလၢပှဲၤထီၣ် မနုၤလဲၣ်.
၁၅ တယံာ်လၢၤဘၣ်န့ၣ် ယ့ၣ်ၡူးကဒုးတၢ်ဒီး ကစၢ်ယွၤအဒုၣ်အဒါ ဖဲအၢ်မက့းဒိၣ် တၢ်ဒုးအဆၢကတီၢ် ဒီးကမၤဟးဂီၤကွံာ် ပှၤအၢပှၤသီခဲလၢာ်. (လီၣ် ၁၆:၁၄, ၁၆; ၁၉:၁၁-၁၆) ဖဲန့ၣ်ဝံၤအလီၢ်ခံ ယ့ၣ်ၡူးကကွံာ်လီၤ မုၣ်ကီၤလံၢ်လၢ “တၢ်ပူၤယိာ်” ဒီးဖဲန့ၣ်န့ၣ် မုၣ်ကီၤလံၢ် ဘၣ်တၢ်စၢဃာ်အီၤ ဒီးအမၤတၢ်တသ့ နီတမံၤလၢၤဘၣ်. (လီၣ် ၂၀:၁-၃) ဖဲယ့ၣ်ၡူးပၢတၢ် အနံၣ်တကထိအခါ အကဒုးအိၣ်ထီၣ် တၢ်ဃူတၢ်ဖိးလၢ ဟီၣ်ခိၣ်ချၢ ဒီးမၤစၢၤပှၤဟီၣ်ခိၣ်ဖိ ဒ်သိး ကကဲထီၣ် ပှၤလၢပှၤပှဲၤ. ယ့ၣ်ၡူး ကမၤသမူထီၣ်က့ၤပှၤသံ ဒီးကဒုးကဲထီၣ် ဟီၣ်ခိၣ်ဒီဘ့ၣ်လၢ ပၤရဒံစူး. ဖဲန့ၣ်အခါ ယဟိဝၤယွၤ အတၢ်တိာ်ပာ် ကဟဲလၢပှဲၤထီၣ်ဝဲ သပှၢ်တၢၢ်.—လီၣ် ၂၁:၁-၄.
၁၆. ယ့ၣ်ၡူးပၢတၢ် အနံၣ်တကထိ ဝံၤအလီၢ်ခံ တၢ်ကကဲထီၣ်သးဒ်လဲၣ်.
၁၆ ယ့ၣ်ၡူးပၢတၢ် အနံၣ်တကထိ ဝံၤအလီၢ်ခံ တၢ်ကကဲထီၣ်သးဒ်လဲၣ်. တၢ်ဒဲးဘး ဒီးတၢ်တလၢတပှဲၤ တအိၣ်လၢၤဘၣ်. အဃိ ဒ်သိး ပှၤဟီၣ်ခိၣ်ဖိတဖၣ် အတၢ်ရ့လိာ်သးဒီး ယဟိဝၤယွၤ ကဂ့ၤအဂီၢ် အဝဲသ့ၣ် တလိၣ်ဘၣ် ပှၤ ၁၄၄,၀၀၀ လၢကကဲ အပှၤလုၢ်တၢ်ဒိၣ် ဒီးယ့ၣ်ၡူး လၢကကဲ အပှၤလုၢ်တၢ်ခိၣ်အဒိၣ်ကတၢၢ် အတၢ်မၤစၢၤလၢၤဘၣ်. တကးဒံးဘၣ် “တၢ်သံ” လၢအမ့ၢ် “ဒုၣ်ဒါလၢခံကတၢၢ်” န့ၣ် တအိၣ်လၢၤဘၣ်. ဒီးခီဖျိလၢ ပှၤဟီၣ်ခိၣ်ဖိတဖၣ် ကဂဲၤဆၢထၢၣ်သမူထီၣ်က့ၤ အဃိ တၢ်သွၣ်ခိၣ် တအိၣ်လၢၤဘၣ်. ဖဲန့ၣ်အခါ ပှၤဟီၣ်ခိၣ်ဖိခဲလၢာ် ကကဲထီၣ် ပှၤလၢပှၤပှဲၤ.—၁ ကရံၣ် ၁၅:၂၅, ၂၆.
၁၇-၁၈. (က) ယ့ၣ်ၡူးပၢတၢ် အနံၣ်တကထိ ဝံၤအလီၢ်ခံ တၢ်မနုၤ ကကဲထီၣ်အသးဒံးလဲၣ်. (ခ) ယ့ၣ်ၡူးပၢတၢ် အနံၣ်တကထိ ဝံၤအလီၢ်ခံ အကမၤမနုၤလဲၣ်. (၁ ကရံၣ်သူး ၁၅:၂၄, ၂၈) (ကွၢ်စ့ၢ်ကီးတၢ်ဂီၤ.)
၁၇ ယ့ၣ်ၡူးပၢတၢ် အနံၣ်တကထိ ဝံၤအလီၢ်ခံ တၢ်မနုၤ ကကဲထီၣ်အသးဒံးလဲၣ်. ပှၤဟီၣ်ခိၣ်ဖိ တသးဒ့ဒီလၢၤဘၣ် ဒီးကနာ်ဝဲ သပှၢ်တၢၢ်လၢ ယဟိဝၤယွၤ ကဲပှၤလၢအစီဆှံ ဒီးမၤတၢ်လၢအဘၣ်ထီဘိ. ဘၣ်မနုၤအဃိ ပတဲဒ်န့ၣ်လဲၣ်. သ့ၣ်နီၣ်ထီၣ်က့ၤ ဖဲဧ့ၤဒ့ၣ်တၤသၣ်လီၢ်န့ၣ် မုၣ်ကီၤလံၢ် တဲဝဲလၢ ယဟိဝၤယွၤ ကဲပှၤလံၣ်တၢ်လီတၢ် ဒီးအတပၢ ပှၤဟီၣ်ခိၣ်ဖိ လၢတၢ်အဲၣ်တၢ်ကွံဘၣ်. ဘၣ်ဆၣ် ပထံၣ်ဘၣ်လၢ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် အဝဲသ့ၣ် ပာ်ဖျါထီၣ်ဝဲ တဘျီဝံၤတဘျီလၢ ယဟိဝၤယွၤန့ၣ် အကဲပှၤပၢတၢ်လၢ အဂ့ၤကတၢၢ်. အဃိ ဖဲယ့ၣ်ၡူးပၢတၢ် အနံၣ်တကထိ ဝံၤအလီၢ်ခံ ယဟိဝၤယွၤအမံၤန့ၣ် ကပူၤဖျဲးဒီး တၢ်ဒုၣ်ဒွဲၣ်စံးအၢ ဒီးကဘၣ်တၢ်ပာ်စီဆှံအီၤ. ယဟိဝၤယွၤ ကပာ်ဖျါထီၣ်လၢ အကဲပါလၢ အအိၣ်ဒီး တၢ်အဲၣ်တၢ်ကွံ.
၁၈ ယ့ၣ်ၡူးပၢတၢ် အနံၣ်တကထိ ဝံၤအလီၢ်ခံ ပှၤကိးဂၤဒဲး ကသ့ၣ်ညါထီၣ်ဝဲလၢ တၢ်လၢမုၣ်ကီၤလံၢ်တဲဝဲ ဘၣ်ဃးဒီး ယဟိဝၤယွၤအဂ့ၢ်ခဲလၢာ်န့ၣ် အကဲတၢ်လံၣ်တၢ်လီ. ယ့ၣ်ၡူးပၢတၢ် ဝံၤအလီၢ်ခံ အကမၤမနုၤလဲၣ်. မ့ၢ်အကလီၤဂာ်ဒီး မုၣ်ကီၤလံၢ် ဒီးထီဒါက့ၤ ယဟိဝၤယွၤဧါ. အတမၤဝဲဒ်န့ၣ် နီတဘျီဘၣ်. (ဖး ၁ ကရံၣ်သူး ၁၅:၂၄, ၂၈.) ယ့ၣ်ၡူး ကဟ့ၣ်လီၤက့ၤ ဘီမုၢ်လၢ အပါအစုပူၤ ဒီးအကဒိးပၢသးလၢ အပါအဖီလာ်. ခီဖျိလၢ ယ့ၣ်ၡူးအဲၣ်အပါအဃိ အတလီၤဂာ်ဒီး မုၣ်ကီၤလံၢ်ဘၣ် ဒီးအသးအိၣ် ဟ့ၣ်လီၤက့ၤတၢ်ခဲလၢာ်လၢ အပါအစုပူၤ.
ယ့ၣ်ၡူးပၢတၢ် အနံၣ်တကထိဝံၤအလီၢ်ခံ အသးအိၣ် ဟ့ၣ်လီၤက့ၤ ဘီမုၢ်လၢ အပါအစုပူၤ (ကွၢ်လံာ်အဆၢ ၁၈)
၁၉. ယဟိဝၤယွၤအမံၤန့ၣ် အရ့ဒိၣ်လၢ ယ့ၣ်ၡူးအဂီၢ်ထဲလဲၣ်.
၁၉ ယ့ၣ်ၡူးန့ၣ် အကဲယဟိဝၤယွၤ အပှၤခၢၣ်စး လၢအလၢအပှဲၤတဂၤ အဃိ ယဟိဝၤယွၤ ဟ့ၣ်လီၤအီၤလၢ အမံၤန့ၣ် ကြၢးဝဲဘၣ်ဝဲ. ယ့ၣ်ၡူးထံၣ်ဝဲလၢ ယဟိဝၤယွၤအမံၤန့ၣ် အရ့ဒိၣ်ဒိၣ်မး ဒီးတၢ်အဂၤလၢ အရ့ဒိၣ်န့ၢ်ဒံး ယဟိဝၤယွၤအမံၤန့ၣ် တအိၣ်နီတမံၤဘၣ်. အဃိ အဝဲသးအိၣ်တူၢ်သံအသးလၢ ယဟိဝၤယွၤ အမံၤအဂီၢ်. ဒီးဖဲအပၢတၢ် အနံၣ်တကထိဝံၤအလီၢ်ခံ အကဟ့ၣ်လီၤက့ၤ တၢ်ခဲလၢာ်လၢ ယဟိဝၤယွၤ အစုပူၤ. အဃိ ပကွၢ်လိ ယ့ၣ်ၡူးကသ့ဒ်လဲၣ်. ပကတဲသကိး တၢ်သံကွၢ်တဖျၢၣ်အံၤ အတၢ်စံးဆၢ လၢတၢ်မၤလိလၢခံတခါ.
တၢ်သးဝံၣ် ၁၆ ပတြၢၤယဟိဝၤလၢ အဒိးဖှူအဖိခွါအဃိ
a တဘျီတခီၣ် မူခိၣ်ကလူးတဖၣ် လဲၤဆှၢတၢ်ကစီၣ် ဒီးတဲန့ၢ်တၢ်လၢ ယဟိဝၤယွၤအဂီၢ်အဃိ အလီၤဂာ်ဒ်သိးဒီး အဝဲသ့ၣ်ကဲဝဲ ယဟိဝၤယွၤ အပှၤအခၢၣ်စး. အဃိ တဘျီတခီၣ် လံာ်စီဆှံပာ်ဖျါထီၣ်ဝဲလၢ ယဟိဝၤယွၤတဲတၢ် ဘၣ်ဆၣ် နီၢ်ကီၢ်န့ၣ် မူခိၣ်ကလူး တဲန့ၢ်တၢ်လၢအဂီၢ်. (၁ မိၤ ၁၈:၁-၃၃) လံာ်စီဆှံတဲဝဲလၢ ယဟိဝၤယွၤ ဟ့ၣ်လီၤစီၤမိၤၡ့လၢ တၢ်သိၣ်တၢ်သီ ဘၣ်ဆၣ် လံာ်စီဆှံအဆၢအဂၤတဖၣ် ပာ်ဖျါထီၣ်ဝဲလၢ ယဟိဝၤယွၤ သူဝဲမူခိၣ်ကလူးတဖၣ်လၢ ကဟ့ၣ်လီၤဝဲ တၢ်သိၣ်တၢ်သီလၢ စီၤမိၤၡ့အအိၣ်.—၃ မိၤ ၂၇:၃၄; မၤတၢ် ၇:၃၈, ၅၃; ကလၤ ၃:၁၉; ဧ့ၤ ၂:၂-၄.
b တၢ်ကတိၤအခီပညီ– တၢ်ကတိၤ “ပာ်စီဆှံ” န့ၣ် အခီပညီမ့ၢ်ဝဲ တၢ်ပာ်စီဆှံတၢ် ဒီးတၢ်ပာ်ဖျါထီၣ် တၢ်ယူးယီၣ်ပာ်ကဲ. မ့မ့ၢ် တၢ်ကတိၤ “ပူၤဖျဲးဒီး တၢ်ဒုၣ်ဒွဲၣ်စံးအၢ” န့ၣ် အခီပညီမ့ၢ်ဝဲ ဖဲပှၤတဲလံၣ်တဲလီ ဒီးတဲဟးဂီၤ ပှၤတဂၤဂၤအဂ့ၢ်အခါ ပှၤအဂၤတဂၤ တဲန့ၢ်တၢ်လၢအဂီၢ် ဒီးတဲဖျါထီၣ် တၢ်မ့ၢ်တၢ်တီ.
c ခီဖျိလၢ ယ့ၣ်ၡူးတူၢ်သံသးအဃိ ပှၤဟီၣ်ခိၣ်ဖိ ဒိးန့ၢ်ဘၣ် တၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ်.
d ကွၢ် “ပှၤဖးလံာ်ဖိတဖၣ် အတၢ်သံကွၢ်” လၢ တၢးထီခိးတၢ်, လါအ့ဖြ့ၣ် ၂၀၂၁, ကဘျံးပၤ ၃၀-၃၁.