စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါန့ၣ် ပဟံးန့ၢ် တၢ်မၤလိသ့—အကူာ် ၂

၁. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

စီၤယၤကိာ် အဖိခွါတဖၣ် အိၣ်ဝးတရံးအီၤ ဒီးဖဲအဆိၣ်ဂ့ၤ အဖိခွါ တဂၤဘၣ်တဂၤ အခါ အဖိခွါတဖၣ် ဒိကနၣ်အီၤထံထံ. တၢ်မၤလိလၢ အပူၤကွံာ်တခါန့ၣ် ပသ့ၣ်ညါဘၣ် တၢ်ဂ့ၢ်လၢ စီၤယၤကိာ် တဲဘၣ် အဖိခွါ စီၤရူၤဘ့ၣ်, စီၤစူၤမ့းအိၣ်, စီၤလ့ၤဝံ ဒီးစီၤယူဒၤ. ဒီးတၢ်ဂ့ၢ်လၢ အတဲဝဲန့ၣ် အဝဲသ့ၣ် သူၣ်အိၣ်သးအိၣ်ဝဲ ဒီးဘၣ်သ့ၣ်သ့ၣ် အဝဲသ့ၣ် ကမၢကမၣ်စ့ၢ်ကီး. အဃိ အဖိခွါလွံၢ်ဂၤအံၤ ကဆိကမိၣ်ဝဲလၢ အပုၢ်လၢအအိၣ်တ့ၢ်ဒံး ဃိးဂၤန့ၣ် အပါကတဲအဝဲသ့ၣ် တၢ်ဂ့ၢ်မနုၤလဲၣ်. တၢ်ဂ့ၢ်လၢ စီၤယၤကိာ် တဲဘၣ် အဖိခွါ စီၤစဘူလိၣ်, စီၤယံးစၣ်ကၢ်, စီၤဒၣ်, စီၤကး, စီၤအၤၡ့ၢ်, စီၤနးသၤလံ, စီၤယိၤသး ဒီးစီၤဘံၣ်ယၤမံၣ်န့ၣ်a ပဟံးန့ၢ် တၢ်မၤလိ သ့ဒ်လဲၣ်. ပကကွၢ်သကိး.

စီၤစဘူလိၣ်

၂. စီၤယၤကိာ် တဲဘၣ်စီၤစဘူလိၣ် တၢ်ဂ့ၢ်မနုၤလဲၣ် ဒီးအဟဲလၢထီၣ်ပှဲၤထီၣ်ဒ်လဲၣ်. (၁ မိၤၡ့ ၄၉:၁၃) (ကွၢ်စ့ၢ်ကီး တၢ်လွံၢ်နၢၣ်.)

^၂ ဖး ၁ မိၤၡ့ ၄၉:၁၃. စီၤယၤကိာ် တဲဝဲလၢ စီၤစဘူလိၣ် အစၢၤအသွဲၣ်န့ၣ် ကအိၣ်ဝဲလၢ ပီၣ်လဲၣ်ကၢၢ်နံၤ, လၢကီၢ်တၢ်စံးပာ် အကလံၤစိးတခီ. ပူၤကွံာ်အနံၣ် ၂၀၀ ဘျဲၣ် ဝံၤအလီၢ်ခံ စဘူလိၣ်အဒူၣ် ဒိးန့ၢ်ဘၣ်ဝဲ တၢ်လီၢ်တၢ်ကျဲ ဒ်အတၢ်န့ၢ်သါအသိး. တၢ်လီၢ်လၢ အဝဲသ့ၣ် ဒိးန့ၢ်ဘၣ်ဝဲန့ၣ် အအိၣ်လၢ ပီၣ်လဲၣ် ကၤလံၤလါ ဒီးပီၣ်လဲၣ် မဲးဒံးထၢၣ်ရ့နယၢၣ် အဘၢၣ်စၢၤ. တကးဒံးဘၣ် စီၤမိၤၡ့ တဲဆိပာ်ဝဲလၢ “မ်စဘူလိၣ် န့ၢ်ဘၣ်တၢ်သးခု ဖဲအလဲၤပနံာ်တၢ်ကၤတၢ်တက့ၢ်.” (၅ မိၤ ၃၃:၁၈) တၢ်စံးပာ်အံၤ ဘၣ်သ့ၣ်သ့ၣ် အဲၣ်ဒိးတဲဝဲလၢ ခီဖျိလၢ စဘူလိၣ်အဒူၣ် န့ၢ်ဘၣ်တၢ်လီၢ်လၢ ပီၣ်လဲၣ်ခံဘ့ၣ် အဘၢၣ်စၢၤအဃိ အဝဲသ့ၣ် လဲၤဆါတၢ်ပှ့ၤတၢ် သ့ဝဲညီညီ. ဒ်လဲၣ်ဂ့ၤ ဒ်လဲၣ်ဂ့ၤ စဘူလိၣ်အဒူၣ်န့ၣ် အဝဲသ့ၣ် အိၣ်ဒီးတၢ်သးခု.

၃. ဒ်သိး ပကသးမံဒီး တၢ်လၢအအိၣ်ဒီးပှၤအဂီၢ် တၢ်မနုၤကမၤစၢၤပှၤလဲၣ်.

^၃ ပန့ၢ်ဘၣ် တၢ်မၤလိဒ်လဲၣ်. ပမ့ၢ်အိၣ် တၢ်လီၢ်ဖဲလဲၣ် ဒီးပတၢ်အိၣ်သး မ့ၢ်အိၣ်ဒ်လဲၣ် သနာ်က့ ပအိၣ်ဒီးတၢ်သးခုသ့ဒံး. ဘၣ်ဆၣ် ဒ်သိး ပကဆဲးအိၣ်ဒီး တၢ်သးခုအဂီၢ် ပကဘၣ် သးမံဒီး တၢ်လၢအအိၣ်ဒီးပှၤ. (စံး ၁၆:၆; ၂၄:၅) တဘျီတခီၣ် ပမ့ၢ်တသးမံဒီး တၢ်လၢအအိၣ်ဒီးပှၤဘၣ် ဒီးဆိကမိၣ် ဘၣ်ဃးဒီး တၢ်လၢပတဒိးန့ၢ်ဘၣ် အါတလၢန့ၣ် ပတသးခုလၢၤဘၣ်. အဃိ ပတၢ်အိၣ်သး မ့ၢ်အိၣ်ဒ်လဲၣ် သနာ်က့ ပကြၢးဂုာ်ကျဲးစၢး အိၣ်ဒီးတၢ်ထံၣ်လၢအဂ့ၤ.—ကလၤ ၆:၄.

စီၤယံးစၣ်ကၢ်

၄. စီၤယၤကိာ် တဲဘၣ်စီၤယံးစၣ်ကၢ် တၢ်ဂ့ၢ်မနုၤလဲၣ် ဒီးအဟဲလၢထီၣ်ပှဲၤထီၣ်ဒ်လဲၣ်. (၁ မိၤၡ့ ၄၉:၁၄, ၁၅) (ကွၢ်စ့ၢ်ကီး တၢ်လွံၢ်နၢၣ်.)

^၄ ဖး ၁ မိၤၡ့ ၄၉:၁၄, ၁၅. စီၤယၤကိာ် ပတြၢၤဝဲ စီၤယံးစၣ်ကၢ် ခီဖျိလၢ အမၤတၢ်ဆူၣ်အဃိ. ဒီးအထိၣ်သတြီၤအီၤ ဒ်သိးဒီး ကသ့ၣ်ယီၤ တဒုလၢ အဃံကျၢၤ ဒီးအယိး တၢ်လၢအဃၢန့ၢ်ဝဲ. စီၤယၤကိာ် တဲဝဲလၢ စီၤယံးစၣ်ကၢ် ကဒိးန့ၢ်ဘၣ် တၢ်လီၢ်လၢအဂ့ၤ. ဒီးဒ်စီၤယၤကိာ် တဲဆိပာ်ဝဲအသိး ယံးစၣ်ကၢ်အဒူၣ် ဒိးန့ၢ်ဘၣ် တၢ်လီၢ်လၢ အဘူးဒီး ထံကျိယၢ်ဒ့ၣ် ဒီးဟီၣ်ခိၣ်ညၣ်ဂ့ၤမး. (ၡူ ၁၉:၂၂) အဃိ ပထံၣ်ဘၣ်လၢ အဝဲသ့ၣ် သူၣ်အီၣ်ဖျးအီၣ်တၢ် ဒီးမၤတၢ်ဆူၣ်မး ဒီးအဝဲသ့ၣ် မၤစၢၤစ့ၢ်ကီး ပှၤအဂၤ. (၁ စီၤပၤ ၄:၇, ၁၇) အဒိ ဖဲစံၣ်ညီၣ်ကွီၢ် စီၤဘါရး ဒီးဝံမုၣ် နီၢ်ဒဘိရၤ ဃ့တၢ်မၤစၢၤလၢ ပှၤအံၣ်စရ့လးဖိ ကလဲၤဒုးဝဲ စီၤစံစရၤအခါ ယံးစၣ်ကၢ်အဒူၣ် လဲၤမၤစၢၤအဝဲသ့ၣ်. ဒီးဖဲတၢ်ဒုးအဂၤ ကဲထီၣ်အခါစ့ၢ်ကီး အဝဲသ့ၣ် သးအိၣ်လဲၤဒုးစၢၤတၢ်.—စံၣ်ညီၣ် ၅:၁၅.

၅. ဘၣ်မနုၤအဃိ ပကြၢးမၤတၢ်ဆူၣ်ဆူၣ်လဲၣ်.

^၅ ပန့ၢ်ဘၣ် တၢ်မၤလိဒ်လဲၣ်. ပဂုာ်ကျဲးစၢး မၤတၢ်ဆူၣ်ဆူၣ် လၢယဟိဝၤယွၤ အတၢ်မၤန့ၣ် ယဟိဝၤယွၤ ပာ်လုၢ်ပာ်ပှ့ၤဝဲ ဒ်သိးဒီး အပာ်လုၢ်ပာ်ပှ့ၤ ယံးစၣ်ကၢ်အဒူၣ်အသိး. (စံၣ် ၂:၂၄) အဒိ ဆိကမိၣ်ကွၢ် တၢ်အိၣ်ဖှိၣ်သးပှၢ်တဖၣ်လၢ အမၤတၢ်ဆူၣ်ဆူၣ် ဒ်သိးကကွၢ်ထွဲ တၢ်အိၣ်ဖှိၣ်အဂီၢ်. (၁ တံၤ ၃:၁) ဒီပုၢ်ဝဲၢ်ခွါတဖၣ်အံၤ တဒုးတၢ်လၢ နီၢ်ခိတခီဘၣ် သနာ်က့ ဒ်သိးအဝဲသ့ၣ် ကဒီသဒၢ ကစၢ်ယွၤ အပှၤဂီၢ်မုၢ်အဂီၢ် လၢနီၢ်သးတခီန့ၣ် အဝဲသ့ၣ် ဘၣ်ဒုးတၢ်ဆူၣ်ဆူၣ်. (၁ ကရံၣ် ၅:၁, ၅; ယူ ၁၇-၂၃) တကးဒံးဘၣ် ဒ်သိးအဝဲသ့ၣ် ကဟ့ၣ်တၢ်စံၣ်တဲၤတဲလီၤတၢ် လၢကကဲထီၣ် တၢ်ဂံၢ်တၢ်ဘါ လၢတၢ်အိၣ်ဖှိၣ်ဖိအဂီၢ် အဝဲသ့ၣ်ဂုာ်ကျဲးစၢး ကတဲာ်ကတီၤပာ်ဝဲဂ့ၤဂ့ၤ.—၁ တံၤ ၅:၁၇.

စီၤဒၣ်

၆. ဒၣ်အဒူၣ် ဒိးန့ၢ်ဘၣ် မူဒါမနုၤလဲၣ်. (၁ မိၤၡ့ ၄၉:၁၇, ၁၈) (ကွၢ်စ့ၢ်ကီး တၢ်လွံၢ်နၢၣ်.)

^၆ ဖး ၁ မိၤၡ့ ၄၉:၁၇, ၁၈. စီၤယၤကိာ် ထိၣ်သတြီၤ စီၤဒၣ်ဒ်သိးဒီး ဂုၢ်လၢ အအ့ၣ်ဝဲ ဆၣ်ဖိကီၢ်ဖိလၢ အဒိၣ်န့ၢ်ဒံးအီၤ ဒ်သိးဒီး ကသ့ၣ်ဒုးသုး ဒီးအ့ၣ်စ့ၢ်ကီး ပှၤဒိးကသ့ၣ်ဖိ. ဒၣ်အဒူၣ်န့ၣ် အအိၣ်ဒီး တၢ်သးဒူ ဒီးအိၣ်ကတဲာ်ကတီၤ အသးလၢ အကဒုးဝဲ ပှၤအံၣ်စရ့လးဖိ အဒုၣ်အဒါ. ဖဲပှၤအံၣ်စရ့လးဖိ ကလဲၤလၢ ကီၢ်တၢ်စံးပာ်အခါ လၢကျဲန့ၣ် ဒၣ်အဒူၣ် ဒီသဒၢဝဲ အံၣ်စရ့လးအဒူၣ် အဂၤတဖၣ် “လၢတၢ်လီၢ်ခံ.” (၄ မိၤ ၁၀:၂၅) မူဒါလၢ ဒၣ်အဒူၣ်မၤဝဲန့ၣ် အံၣ်စရ့လးအဒူၣ် အဂၤတဖၣ် တထံၣ်ဝဲခဲလၢာ်ဘၣ် သနာ်က့ မူဒါလၢ အဝဲသ့ၣ်မၤဝဲအံၤ အရ့ဒိၣ်ဒိၣ်မး.

၇. မူဒါတမံၤဂ့ၤ တမံၤဂ့ၤလၢ ပဒိးန့ၢ်ဘၣ်လၢ ကစၢ်ယွၤအတၢ်မၤ အပူၤန့ၣ် ပကဘၣ် ထံၣ်အီၤဒ်လဲၣ်.

^၇ ပန့ၢ်ဘၣ် တၢ်မၤလိဒ်လဲၣ်. မ့ၢ်နဘၣ်မၤမူဒါလၢ ပှၤတပာ်သူၣ်ပာ်သးဝဲဘၣ်န့ၣ် အိၣ်တဘျီဘျီဧါ. ဘၣ်သ့ၣ်သ့ၣ် နမၤကဆှီ ဒီးကွၢ်ထွဲကတီၤ တၢ်အိၣ်ဖှိၣ်လီၢ်, နမၤစၢၤတၢ်လၢ ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ် မ့တမ့ၢ် နမၤမူဒါ လၢအဂၤ တမံၤမံၤ. နမၤစၢၤတၢ် ဒ်အံၤန့ၣ် အဂ့ၤဒိၣ်မး. ထီဘိန့ၣ် သ့ၣ်နီၣ်ထီၣ်လၢ ယဟိဝၤယွၤ ထံၣ်ဝဲနတၢ်မၤ ဒီးအပာ်လုၢ်ပာ်ပှ့ၤ တၢ်လၢနမၤ လၢအဂီၢ်. ဒီးနမၤအတၢ်မၤန့ၣ် တမ့ၢ်ဒ်သိး နကဒိးန့ၢ်ဘၣ် ပှၤဂၤအတၢ်စံးပတြၢၤဘၣ်, ဘၣ်ဆၣ် နမၤအတၢ်မၤဒ်သိး နကပာ်ဖျါထီၣ်လၢ နအဲၣ်အီၤအဃိ အပာ်လုၢ်ပာ်ပှ့ၤနၤဒိၣ်မး.—မး ၆:၁-၄.

စီၤကး

၈. ဘၣ်မနုၤအဃိ ဒုၣ်ဒါလဲၤဒုး ကးအဒူၣ်န့ၢ်ဝဲ ညီညီဖိလဲၣ်. (၁ မိၤၡ့ ၄၉:၁၉) (ကွၢ်စ့ၢ်ကီး တၢ်လွံၢ်နၢၣ်.)

^၈ ဖး ၁ မိၤၡ့ ၄၉:၁၉. စီၤယၤကိာ် တဲဆိပာ်ဝဲလၢ တမျာ်တဒူၣ် ကဟဲထီၣ်ဒုးဝဲ စီၤကး. အနံၣ် ၂၀၀ ဘျဲၣ် ဝံၤအလီၢ်ခံ ကးအဒူၣ် ဒိးန့ၢ်ဘၣ်ဝဲ တၢ်လီၢ်လၢ ထံကျိယၢ်ဒ့ၣ် အမုၢ်ထီၣ်တခီ ဒီးတၢ်လီၢ်အံၤ အိၣ်ဘူးဒီး ဒုၣ်ဒါအကီၢ်ဆၢ. အဃိ အဒုၣ်အဒါလဲၤဒုး အဝဲသ့ၣ်န့ၢ်ဝဲ ညီညီဖိလီၤ. သနာ်က့ တၢ်လီၢ်အံၤ ပှၤကးဖိ ထံၣ်ဝဲလၢ အဂ့ၤလၢ ဆၣ်ဖိကီၢ်ဖိတဖၣ် အဂီၢ်အဃိ အဝဲသ့ၣ် အဲၣ်ဒိးအိၣ်ဝဲဖဲန့ၣ်. (၄ မိၤ ၃၂:၁, ၅) ပထံၣ်ဘၣ်လၢ ပှၤကးဖိတဖၣ်အံၤ အိၣ်ဒီးတၢ်သးဒူသပှၢ်တၢၢ်. တကးဒံးဘၣ် အဝဲသ့ၣ် နာ်ဝဲလၢ ယဟိဝၤယွၤ ကမၤစၢၤအီၤ ဒ်သိးအကဒုးဆၢက့ၤ အဒုၣ်အဒါ ဒီးဒီသဒၢ တၢ်လီၢ်လၢ ယဟိဝၤယွၤ ဟ့ၣ်လီၤအဝဲသ့ၣ်. ဒီးဒ်သိး အံၣ်စရ့လးအဒူၣ် လၢအဂၤတဖၣ် ကမၤန့ၢ်ဝဲ တၢ်လီၢ်အဂၤလၢ ကီၢ်တၢ်စံးပာ် အပူၤအဂီၢ် အဝဲသ့ၣ် ဘၣ်ဒုးတၢ် တဘျုးနံၣ်ညါ. ဖဲန့ၣ်အခါ ကးအဒူၣ် ဆှၢလီၤစ့ၢ်ကီး အပှၤသုးဖိတဖၣ်လၢ ကလဲၤဒုးစၢၤတၢ်လၢ ထံကျိယၢ်ဒ့ၣ် အမုၢ်နုာ်တခီ. (၄ မိၤ ၃၂:၁၆-၁၉) ဒီးဖဲအဝဲသ့ၣ် အိၣ်ယံၤဒီး အဖိအမါအခါ အဝဲသ့ၣ် နာ်ဝဲလၢ ယဟိဝၤယွၤ ကဒီသဒၢ အဖိအမါ. ပှၤကးဖိတဖၣ် အိၣ်ဒီးတၢ်သးဒူ ဒီးသးအိၣ် တူၢ်ဆါအသးအဃိ ယဟိဝၤယွၤ ဆိၣ်ဂ့ၤက့ၤအဝဲသ့ၣ်.—ၡူ ၂၂:၁-၄.

၉. ပမ့ၢ်နာ်န့ၢ် ယဟိဝၤယွၤန့ၣ် ပကဆၢတဲာ်တၢ်ဒ်လဲၣ်.

^၉ ပန့ၢ်ဘၣ် တၢ်မၤလိဒ်လဲၣ်. ဖဲပမၤ ယဟိဝၤယွၤ အတၢ်မၤအခါ ပမ့ၢ်ထံၣ်ဘၣ် တၢ်အိၣ်သးကီခဲ သနာ်က့ ဒ်သိးပကဆဲးမၤ အတၢ်မၤအဂီၢ် ပကဘၣ် နာ်န့ၢ်အီၤထီဘိ. (စံး ၃၇:၃) ဆၢကတီၢ်ခဲအံၤ ဒ်သိးဒီပုၢ်ဝဲၢ်မုၣ်ခွါအါဂၤ ကမၤစၢၤဘၣ်တၢ်လၢ တၢ်သူၣ်ထီၣ်ဘှီထီၣ်တၢ်မၤ, လဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ် တၢ်မၤစၢၤ မ့တမ့ၢ် မၤမူဒါလၢအဂၤအဂီၢ် အဝဲသ့ၣ် နာ်န့ၢ် ယဟိဝၤယွၤ ဒီးတူၢ်ဆါအသး. ဒီပုၢ်ဝဲၢ်မုၣ်ခွါ တဖၣ်အံၤ နာ်ဝဲသပှၢ်တၢၢ်လၢ ယဟိဝၤယွၤ ကကွၢ်ထွဲအဝဲသ့ၣ် ထီဘိအဃိ အဝဲသ့ၣ်သးအိၣ် တူၢ်ဆါအသး.—စံး ၂၃:၁.

စီၤအၤၡ့ၢ်

၁၀. ဘၣ်မနုၤအဃိ အၤၡ့ၢ်အဒူၣ် သးတဆူၣ်လၢ တၢ်ဘူၣ်ထီၣ်ဘါထီၣ်စီဆှံ အဂီၢ်လၢၤဘၣ်လဲၣ်. (၁ မိၤၡ့ ၄၉:၂၀) (ကွၢ်စ့ၢ်ကီး တၢ်လွံၢ်နၢၣ်.)

^၁၀ ဖး ၁ မိၤၡ့ ၄၉:၂၀. စီၤယၤကိာ် တဲဆိပာ်ဝဲလၢ အၤၡ့ၢ်အဒူၣ်န့ၣ် ကထူးထီၣ်တီၤထီၣ် ဒီးတၢ်ကဲထီၣ်သးဒ်န့ၣ် သပှၢ်တၢၢ်. တၢ်လီၢ်လၢ အၤၡ့ၢ်အဒူၣ် ဒိးန့ၢ်ဘၣ်ဝဲန့ၣ် ပၣ်ဃုာ်ဒီး ဟီၣ်ခိၣ်ညၣ်အဂ့ၤလၢ တၢ်သူၣ်အီၣ်ဖျးအီၣ်အဂီၢ်. (၅ မိၤ ၃၃:၂၄) အဝဲသ့ၣ် အတၢ်လီၢ်န့ၣ် အိၣ်ဘူးဒီး ပီၣ်လဲၣ် မဲးဒံးထၢၣ်ရ့နယၢၣ် ဒီးအိၣ်ဘူးစ့ၢ်ကီးဒီး စံဒိၣ်လၢအမ့ၢ် ဝ့ၢ်လၢအထူးတီၤတဖျၢၣ် အကဘီသန့. သနာ်က့ ပှၤအၤၡ့ၢ်ဖိ တနီဟးထီၣ်ကွံာ် ပှၤကနၤဧၣ်ဖိ လၢအအိၣ်လၢ ဟီၣ်ကဝီၤအပူၤဘၣ်. (စံၣ်ညီၣ် ၁:၃၁, ၃၂) ခီဖျိလၢ ပှၤကနၤဧၣ်ဖိ အတၢ်ကွဲန့ၢ်လွဲန့ၢ် ဒီးပှၤအၤၡ့ၢ်ဖိ သးစၢၢ်ဆၢအါလၢ တၢ်ထူးတၢ်တီၤအဃိ ဖျါလၢ ပှၤအၤၡ့ၢ်ဖိ သးတဆူၣ်လၢ တၢ်ဘူၣ်ထီၣ်ဘါထီၣ်စီဆှံ အဂီၢ်လၢၤဘၣ်. အဒိ ဖဲစံၣ်ညီၣ်ကွီၢ် စီၤဘါရး ဃ့ပှၤအံၣ်စရ့လးဖိ တၢ်မၤစၢၤလၢ ကလဲၤဒုး ပှၤကနၤဧၣ်ဖိအခါ အၤၡ့ၢ်အဒူၣ် တလဲၤဒုးစၢၤတၢ်ဘၣ်. အဃိ ဖဲယဟိဝၤယွၤ မၤတၢ်လီၤလး ဒီးမၤစၢၤ ပှၤအံၣ်စရ့လးဖိလၢ ကမၤနၢၤတၢ်ဒုး “ဘူးဒီး မကံးဒိၤ အထံကျိဖိ” အခါ အဝဲသ့ၣ် တထံၣ်ဘၣ်ဝဲဘၣ်. (စံၣ်ညီၣ် ၅:၁၉-၂၁) ဒီးဖဲစီၤဘါရး ဒီးနီၢ်ဒဘိရၤ သးဝံၣ်ဝဲ တၢ်မၤနၢၤ အတၢ်သးဝံၣ် လၢအတဲဝဲလၢ “အၤၡ့ၢ်အဒူၣ်န့ၣ် ဆ့ၣ်နီၤအိၣ်ဝဲ ကလီကလီ လၢပီၣ်လဲၣ်ကၢၢ်နံၤ” အခါ အၤၡ့ၢ်အဒူၣ် ကမဲာ်ဆှး ဖးဒိၣ်ညါ.—စံၣ်ညီၣ် ၅:၁၇.

၁၁. ဘၣ်ဃးဒီး ကျိၣ်စ့န့ၣ် ဘၣ်မနုၤအဃိ ပကဘၣ်အိၣ်ဒီး တၢ်ထံၣ်အကြၢးအဘၣ်လဲၣ်.

^၁၁ ပန့ၢ်ဘၣ် တၢ်မၤလိဒ်လဲၣ်. ပအဲၣ်ဒိးဟ့ၣ် ယဟိဝၤယွၤ တၢ်လၢအဂ့ၤကတၢၢ်. ပကမၤဒ်န့ၣ်အဂီၢ် ပကဘၣ် ပလီၢ်သးလၢ ဟီၣ်ခိၣ်အတၢ်ထံၣ် ဒီးပတဘၣ်ပာ်ဆိ တၢ်ဃုကျိၣ်ဃုစ့ လၢနီၣ်ဂံၢ်တၢ လၢပတၢ်အိၣ်မူအပူၤဘၣ်. (ကတိၤ ၁၈:၁၁) ဘၣ်ဃးဒီး ကျိၣ်စ့န့ၣ် ပကဘၣ် ဂုာ်ကျဲးစၢး အိၣ်ဒီး တၢ်ထံၣ်အကြၢးအဘၣ်. (စံၣ် ၇:၁၂; ဧ့ၤ ၁၃:၅) ပတဘၣ်ပျဲလၢ တၢ်လၢအရ့တဒိၣ်ဘၣ်တဖၣ် ကမၤတံာ်တာ်ပှၤလၢ ပကမၤ ယဟိဝၤယွၤ အတၢ်မၤဘၣ်. လၢပကမၤဒ်န့ၣ်အလီၢ် ပကြၢးဂုာ်ကျဲးစၢး ဟ့ၣ်ယဟိဝၤယွၤ ပတၢ်ဆၢကတီၢ် ဒီးပတၢ်ဂံၢ်တၢ်ဘါ လၢအဂ့ၤကတၢၢ်. ပသ့ၣ်ညါလၢ ပမ့ၢ်ဆဲးတီဒီး ယဟိဝၤယွၤန့ၣ် အကဆိၣ်ဂ့ၤပှၤ ဒီးခါဆူညါ လၢဟီၣ်ခိၣ်သီန့ၣ် ပတလိၣ် သူၣ်ကိၢ်သးဂီၤတၢ်လၢၤဘၣ်.—စံး ၄:၈.

စီၤနးသၤလံ

၁၂. တၢ်ဂ့ၢ်လၢ စီၤယၤကိာ် တဲဘၣ် စီၤနးသၤလံန့ၣ် ဘၣ်သ့ၣ်သ့ၣ် အဟဲလၢထီၣ်ပှဲၤထီၣ်ဒ်လဲၣ်. (၁ မိၤၡ့ ၄၉:၂၁) (ကွၢ်စ့ၢ်ကီး တၢ်လွံၢ်နၢၣ်.)

^၁၂ ဖး ၁ မိၤၡ့ ၄၉:၂၁. စီၤယၤကိာ် တဲဝဲလၢ စီၤနးသၤလံန့ၣ် အကတဲ “တၢ်ကတိၤလၢ အဖျါဃံဖျါလၤ.” တၢ်ဂ့ၢ်လၢ စီၤယၤကိာ် တဲဝဲအံၤ ဘၣ်သ့ၣ်သ့ၣ် အဲၣ်ဒိးတဲဝဲ ဘၣ်ဃးဒီး တၢ်ကတိၤလၢ အဖျါဃံဖျါလၤ လၢယ့ၣ်ၡူးတဲဝဲ ဖဲအစံၣ်တဲၤတဲလီၤတၢ်လၢ ဟီၣ်ခိၣ်ချၢအခါ. ယ့ၣ်ၡူး လၢအကဲပှၤလၢ အသိၣ်လိတၢ် သ့ဂ့ၤဂ့ၤန့ၣ် အအိၣ်လၢ ဝ့ၢ်ကပ့းရနီၣ် လၢနးသၤလံ အဟီၣ်ကဝီၤန့ၣ် ဖးယံာ်ညါ. အဃိ လံာ်စီဆှံကိးဝဲ ဝ့ၢ်ကပ့းရနီၣ်လၢ ယ့ၣ်ၡူး “အနီၢ်ကစၢ် အဝ့ၢ်.” (မး ၄:၁၃; ၉:၁; ယိၤ ၇:၄၆) တကးဒံးဘၣ် ဝံယၡါယၤ တဲဆိပာ်စၢၤဝဲလၢ ယ့ၣ်ၡူးန့ၣ် အကကဲဝဲ “တၢ်ကပီၤဖးဒိၣ်” လၢပှၤစဘူလိၣ်ဖိ ဒီးပှၤနးသၤလံဖိ အဂီၢ်. (ၡါ ၉:၁, ၂) ဒီးတၢ်လၢယ့ၣ်ၡူး သိၣ်လိဝဲန့ၣ် ပာ်ဖျါထီၣ်လၢ ယ့ၣ်ၡူးကဲဝဲ “တၢ်ကပီၤနီၢ်ကီၢ်လၢ အဟ့ၣ်ထီၣ် တၢ်ကပီၤလၢ ပှၤအကလုာ်ကလုာ်အဂီၢ်.”—ယိၤ ၁:၉.

၁၃. ဒ်သိးပတၢ်ကတိၤ ကဘၣ် ယဟိဝၤယွၤ အသးအဂီၢ် ပကဘၣ် တဲတၢ်ဒ်လဲၣ်.

^၁၃ ပန့ၢ်ဘၣ် တၢ်မၤလိဒ်လဲၣ်. ပတဲတၢ်ဒ်လဲၣ် ဒီးပတဲတၢ်ဂ့ၢ်မနုၤလဲၣ်န့ၣ် ယဟိဝၤယွၤ ပာ်သူၣ်ပာ်သးဝဲ. ပတဲ “တၢ်ကတိၤလၢ အဖျါဃံဖျါလၤ” လၢအဘၣ် ယဟိဝၤယွၤအသး ကသ့ဒ်လဲၣ်. အဆိကတၢၢ်န့ၣ် ပကဘၣ် တဲတၢ်မ့ၢ်တၢ်တီ. (စံး ၁၅:၁, ၂) ဝံၤဒီး ပကဘၣ် တဲတၢ်ကတိၤလၢ အဟ့ၣ်ဂံၢ်ဟ့ၣ်ဘါပှၤဂၤ. အဒိ ဖဲပှၤဂၤ မၤတၢ်လၢအဂ့ၤ တမံၤမံၤအခါ ပပတြၢၤအဝဲသ့ၣ် ဘၣ်ဆၣ်ပတတဲ ဘၣ်ဃးဒီး အတၢ်လီၤတူာ်လီၤကာ် မ့တမ့ၢ် တဲအါတၢ်ဘၣ်. (အ့း ၄:၂၉) တကးဒံးဘၣ် ဒ်သိး ပစးထီၣ်တဲသကိးတၢ်ဒီးပှၤဂၤ ဒီးတဲပၠးပှၤဂၤ တၢ်သးခုကစီၣ် ကသ့ဂ့ၤဂ့ၤအဂီၢ် ပပာ်လီၤဖီတၢၣ် သ့စ့ၢ်ကီး.

စီၤယိၤသး

၁၄. တၢ်ဂ့ၢ်လၢ စီၤယၤကိာ် တဲဘၣ်ဃးဒီး စီၤယိၤသးန့ၣ် ဟဲလၢထီၣ်ပှဲၤထီၣ်ဒ်လဲၣ်. (၁ မိၤၡ့ ၄၉:၂၂, ၂၆) (ကွၢ်စ့ၢ်ကီး တၢ်လွံၢ်နၢၣ်.)

^၁၄ ဖး ၁ မိၤၡ့ ၄၉:၂၂, ၂၆. စီၤယိၤသးန့ၣ် ယဟိဝၤယွၤ “ပာ်လီၤဆီအီၤ ဒီးအဒီပုၢ်ဝဲၢ်ခွါတဖၣ်” ဒီးသူအီၤလၢ အကမၤ တၢ်မၤလၢအရ့ဒိၣ်အဃိ အပါစီၤယၤကိာ် ကသးခုလၢအဃိ ဒိၣ်မး. စီၤယိၤသးန့ၣ် စီၤယၤကိာ် ကိးအီၤလၢ “သ့ၣ်လၢ . . . အသၣ်ထီၣ်အါမးတထူၣ် အဒ့.” စီၤယၤကိာ်န့ၣ် အလီၤဂာ် ဒ်သိးဒီး သ့ၣ်တထူၣ် ဒီးအဖိခွါ စီၤယိၤသးန့ၣ် အလီၤဂာ်ဒ်သိးဒီး သ့ၣ်အဒ့. စီၤယၤကိာ် တဲဆိပာ်ဝဲလၢ အမါနီၢ်လ့ၤအၤ အဖိဝဲၢ်ကိ စီၤရူၤဘ့ၣ်န့ၣ် တန့ၢ်ဘၣ် ဖိဝဲၢ်ကိအတၢ်န့ၢ်သါဘၣ်. ဘၣ်ဆၣ် အမါသးဘိ နီၢ်ရၤဃ့လး အဖိဝဲၢ်ကိ စီၤယိၤသးန့ၣ် ကန့ၢ်ဘၣ်တၢ်န့ၢ်သါ လၢစီၤရူၤဘ့ၣ်အလီၢ်. (၁ မိၤ ၄၈:၅, ၆; ၁ ကွဲး ၅: ၁, ၂) အဃိ ဖဲစီၤယိၤသး အဖိခွါ စီၤအ့ဖရဲၣ် ဒီးစီၤမနၤၡ့ၤ ကဲထီၣ် ပှၤအဒူၣ်ခံဒူၣ် လၢပှၤအံၣ်စရ့လးဖိ အကျါ ဒီးဒိးန့ၢ်ဘၣ် တၢ်လီၢ်တၢ်ကျဲအခါ တၢ်ဂ့ၢ်လၢ စီၤယၤကိာ် တဲဆိပာ်ဝဲအံၤ ဟဲလၢထီၣ်ပှဲၤထီၣ်ဝဲ.—၁ မိၤ ၄၉:၂၅; ၡူ ၁၄:၄.

၁၅. စီၤယိၤသး ထံၣ်ဘၣ် တၢ်တတီတလိၤ သနာ်က့ အမၤဝဲဒ်လဲၣ်.

^၁၅ စီၤယၤကိာ် တဲစ့ၢ်ကီးဝဲလၢ ပှၤခးချံၣ်ဖိတဖၣ် “သးဟ့ [စီၤယိၤသး] ဒီးဒုးအီၤ ဒီးခးအီၤလီၤ.” (၁ မိၤ ၄၉:၂၃) စီၤယၤကိာ် အတၢ်ကတိၤအံၤ အဲၣ်ဒိးတဲ ဘၣ်ဃးဒီး စီၤယိၤသးအကၠီတဖၣ် လၢအသးက့ၣ်အီၤ, တရ့ဒီးအီၤ ဂ့ၤဂ့ၤဘၣ် ဒီးဒုးအိၣ်ထီၣ် တၢ်ကီတၢ်ခဲအါမးလၢ စီၤယိၤသးအဂီၢ်. တၢ်ကဲထီၣ်သးဒီး စီၤယိၤသး ဒ်အံၤသနာ်က့ စီၤယိၤသး တသးဟ့အကၠီတဖၣ်ဘၣ် ဒီးအတပာ် တၢ်ကမၣ်လၢ ယဟိဝၤယွၤ အလိၤဘၣ်. ဒ်စီၤယၤကိာ် တဲဝဲအသိး “[စီၤယိၤသး] အချံၣ်န့ၣ် အိၣ်ဂၢၢ်ကျၢၤဝဲ ဒီးအစုဆူၣ် ဒီးအစုချ့.” (၁ မိၤ ၄၉:၂၄) ဖဲစီၤယိၤသး လဲၤခီဖျိ တၢ်မၤကွၢ်အခါ အသန့ၤသးလၢ ယဟိဝၤယွၤ, အပျၢ်ကွံာ် အကၠီတဖၣ် အတၢ်ကမၣ် ဒီးရ့ဒီးအဝဲသ့ၣ်ဂ့ၤဂ့ၤ. (၁ မိၤ ၄၇:၁၁, ၁၂) စီၤယိၤသး ပျဲဝဲလၢ တၢ်မၤကွၢ်တဖၣ်အံၤ ကပှံၢ်စီအီၤ ဒီးမၤစၢၤအီၤဒ်သိး အကကဲထီၣ် ပှၤလၢအဂ့ၤ. (စံး ၁၀၅:၁၇-၁၉) အဃိ ယဟိဝၤယွၤ သူအီၤလၢ အကမၤ တၢ်မၤလၢအရ့ဒိၣ်အါမး.

၁၆. ဖဲပထံၣ်ဘၣ် တၢ်မၤကွၢ်အခါ စီၤယိၤသး အဒိအတဲာ် မၤစၢၤပှၤ ကသ့ဒ်လဲၣ်.

^၁၆ ပန့ၢ်ဘၣ် တၢ်မၤလိဒ်လဲၣ်. တၢ်မၤကွၢ်လၢ ပထံၣ်ဘၣ်တဖၣ်န့ၣ် ပတဘၣ်ပျဲလၢ အကမၤယံၤထီၣ်ပှၤဒီး ယဟိဝၤယွၤ ဒီးပဒီပုၢ်ဝဲၢ်မုၣ်ခွါဘၣ်. သ့ၣ်နီၣ်ထီၣ်လၢ ဖဲယဟိဝၤယွၤ ပျဲဝဲလၢ ပကထံၣ်ဘၣ် တၢ်မၤကွၢ်အခါ အလီၤဂာ်ဒ်သိးဒီး ကျဲတဘိလၢ အသိၣ်က့ၤသီက့ၤပှၤ မ့တမ့ၢ် အသိၣ်လိနဲၣ်လိပှၤ. (ဧ့ၤ ၁၂:၇) တၢ်သိၣ်လိနဲၣ်လိ ဒ်အံၤန့ၣ် ကမၤစၢၤပှၤဒ်သိး ပကမၤအါထီၣ် ဒီးမၤဂ့ၤဒိၣ်ထီၣ် ပတၢ်ဂ့ၤတၢ်ဝါ လၢနီၢ်သးတခီ ဒ်သိးဒီး တၢ်သးကညီၤ ဒီးပျၢ်ကွံာ်ပှၤဂၤတၢ်ကမၣ်. (ဧ့ၤ ၁၂:၁၁) ဒီးဒ်ယဟိဝၤယွၤဆိၣ်ဂ့ၤ စီၤယိၤသး အတၢ်တူၢ်န့ၢ်ခီၣ်ကဲအသိး ပနာ်သ့သပှၢ်တၢၢ်လၢ အကဆိၣ်ဂ့ၤပှၤစ့ၢ်ကီး.

စီၤဘံၣ်ယၤမံၣ်

၁၇. တၢ်ဂ့ၢ်လၢ စီၤယၤကိာ် တဲဘၣ်ဃးဒီး စီၤဘံၣ်ယၤမံၣ်န့ၣ် ဟဲလၢထီၣ်ပှဲၤထီၣ်ဒ်လဲၣ်. (၁ မိၤၡ့ ၄၉:၂၇) (ကွၢ်စ့ၢ်ကီး တၢ်လွံၢ်နၢၣ်.)

^၁၇ ဖး ၁ မိၤၡ့ ၄၉:၂၇. စီၤယၤကိာ် တဲဆိပာ်ဝဲလၢ ဘံၣ်ယၤမံၣ်အဒူၣ်န့ၣ် ကလီၤဂာ် ဒ်သိးဒီးထွံၣ်မံၤ ဒီးအဒုးတၢ်ဖၠဲး. (စံၣ်ညီၣ် ၂၀:၁၅, ၁၆; ၁ ကွဲး ၁၂:၂) ဒီးဖဲအတဲဝဲ “လၢဂီၤခီ” အဆၢကတီၢ်န့ၣ် အဲၣ်ဒိးတဲဝဲ အံၣ်စရ့လး အစီၤပၤ အဆိကတၢၢ် တဂၤန့ၣ် ကဟဲလီၤစၢၤလၢ ဘံၣ်ယၤမံၣ် အဒူၣ်အကျါ. ဒီးပထံၣ်ဘၣ်လၢ စီၤပၤတဂၤအံၤ မ့ၢ်ဝဲစီၤစီလူး လၢအဒုးဝဲ ပှၤဖလ့ၡသးဖိဒူဒူ. (၁ မူၤ ၉:၁၅-၁၇, ၂၁) ဖဲစီၤယၤကိာ် တဲဝဲ “လၢမုၢ်ဟါ” အဆၢကတီၢ်န့ၣ် အဲၣ်ဒိးတဲဝဲ ဘၣ်ဃးဒီး ပှၤဘံၣ်ယၤမံၣ်ဖိ နီၢ်ပၤမုၣ်အ့ၤစတၢ် ဒီးပဒိၣ်အခိၣ် စီၤမၢ်ဒကဲၤအဂ့ၢ်. ပှၤခံဂၤအံၤ အိၣ်မူဝဲလၢ စီၤစီလူး အလီၢ်ခံ တဘျုးနံၣ်ညါ. ဒီးပထံၣ်ဘၣ်လၢ အဝဲသ့ၣ် မၤပူၤဖျဲး ပှၤအံၣ်စရ့လးဖိလၢ အဒုၣ်အဒါအစုပူၤ.—အ့ၤ ၂:၅-၇; ၈:၃; ၁၀:၃.

၁၈. ပကွၢ်လိ ဘံၣ်ယၤမံၣ်အဒူၣ် ဒီးပာ်ဖျါထီၣ် ပတၢ်သးတီ ကသ့ဒ်လဲၣ်.

^၁၈ ပန့ၢ်ဘၣ် တၢ်မၤလိဒ်လဲၣ်. စီၤစီလူး လၢအဟဲလီၤစၢၤလၢ ဘံၣ်ယၤမံၣ်အဒူၣ်န့ၣ် ဖဲအကဲထီၣ် စီၤပၤအခါ ပှၤဘံၣ်ယၤမံၣ်ဖိ သးခုဝဲဒိၣ်မး. ဘၣ်ဆၣ် လၢခံန့ၣ် စီၤဒၤဝံး လၢအဟဲလီၤစၢၤလၢ ယူဒၤအဒူၣ်န့ၣ် ကဲထီၣ်က့ၤစီၤပၤ ဒီးဖဲန့ၣ်အခါ ပှၤဘံၣ်ယၤမံၣ်ဖိ ဆီၣ်ထွဲအီၤစ့ၢ်ကီး. (၂ မူၤ ၃:၁၇-၁၉) လၢခံ တဘျုးနံၣ် ဖဲပှၤအံၣ်စရ့လးဖိ အဒူၣ်တဆံ ထီဒါက့ၤ ယူဒၤအဒူၣ်အခါ ဘံၣ်ယၤမံၣ်အဒူၣ် ဆဲးတီဒီး ယူဒၤအဒူၣ် ဒီးအဝဲသ့ၣ်ဆဲးတီဒီး စီၤပၤလၢ ယဟိဝၤယွၤ ဃုထၢထီၣ်ဝဲ. (၁ စီၤပၤ ၁၁:၃၁, ၃၂; ၁၂:၁၉, ၂၁) ဆၢကတီၢ်ခဲအံၤ ပကွၢ်လိ ဘံၣ်ယၤမံၣ်အဒူၣ် ဒီးပာ်ဖျါထီၣ် ပတၢ်သးတီ သ့ခီဖျိ ပဆီၣ်ထွဲ ပှၤလၢ ယဟိဝၤယွၤ ဃုထၢထီၣ်ဝဲလၢ ကတီခိၣ်ရိၤမဲ အပှၤဂီၢ်မုၢ်.—၁ သ့း ၅:၁၂.

၁၉. စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါန့ၣ် ပဒိးန့ၢ်ဘၣ် အဘျုးဒ်လဲၣ်.

^၁၉ စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါန့ၣ် ပဒိးန့ၢ်ဘၣ် အဘျုးအါမး. ဖဲပမၤလိ ဘၣ်ဃးဒီး စီၤယၤကိာ် အတၢ်တဲဆိပာ် ဒီးအဟဲလၢထီၣ်ပှဲၤထီၣ် ဒ်လဲၣ်အခါ အမၤစၢၤပှၤဒ်သိး ပကနာ်သပှၢ်တၢၢ်လၢ ဝံအတၢ်စံးပာ်လၢ အတဟဲလၢထီၣ်ပှဲၤထီၣ်ဒံးဘၣ်န့ၣ် ကဟဲလၢထီၣ်ပှဲၤထီၣ်နီၢ်ကီၢ်. တကးဒံးဘၣ် ဘၣ်ဃးဒီး စီၤယၤကိာ်အဖိခွါတဖၣ် ဒိးန့ၢ်ဘၣ် တၢ်ဆိၣ်ဂ့ၤန့ၣ် ပာ်ဖျါထီၣ်န့ၢ်ပှၤလၢ ပကဘၣ် မၤယဟိဝၤယွၤ အတၢ်ဘၣ်သးဒ်လဲၣ်အဂ့ၢ်.