စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါန့ၣ် ပဟံးန့ၢ် တၢ်မၤလိသ့—အကူာ် ၁

၁-၂. ဖဲစီၤယၤကိာ် ဘူးထီၣ်ကသံအခါ အမၤမနုၤလဲၣ် ဒီးဘၣ်မနုၤအဃိလဲၣ်. (ကွၢ်စ့ၢ်ကီးတၢ်ဂီၤ.)

ဖဲစီၤယၤကိာ် အသးပှၢ်ထီၣ် ဒိၣ်မးအခါ အီၤဒီးအဟံၣ်ဖိဃီဖိ ဟးထီၣ်လၢ ကီၢ်ကနၤဧၣ် ဒီးလဲၤအိၣ်လၢ ကီၢ်အဲၤကူပတူး. ဖဲအအိၣ်လၢ ကီၢ်အဲၤကူပတူးအပူၤ ၁၇ နံၣ်အခါ အဆဲးတီဒီး ယဟိဝၤယွၤဒံး. (၁ မိၤ ၄၇:၂၈) ဒီးဖဲန့ၣ် အထံၣ်ဘၣ်က့ၤ အဖိခွါစီၤယိၤသး ဒီးအဟံၣ်ဖိဃီဖိ ခဲလၢာ် အိၣ်ဘၣ်က့ၤ တပူၤဃီအဃိ အသးခုဒိၣ်မး. ဘၣ်ဆၣ် စီၤယၤကိာ် သ့ၣ်ညါလီၤအသးလၢ အကသံဘူးထီၣ်အဃိ အကိးဖှိၣ်အဖိခွါတဖၣ် ဒီးတဲဘၣ်အဝဲသ့ၣ် တၢ်ဂ့ၢ်လၢအရ့ဒိၣ်.—၁ မိၤ ၄၉:၂၈.

^၂ ဖဲစီၤယၤကိာ်အစိၤန့ၣ် တချုးဟံၣ်ခိၣ်တဂၤ သံဒံးဘၣ်အခါ ညီနုၢ်န့ၣ် အကိးဖှိၣ် အဟံၣ်ဖိဃီဖိ ဒီးရဲၣ်လီၤကျဲၤလီၤတၢ်ဒီး အဝဲသ့ၣ်. (ၡါ ၃၈:၁) ဘၣ်သ့ၣ်သ့ၣ် ဟံၣ်ခိၣ်အံၤ ကဃုထၢထီၣ်ဝဲ ပှၤတဂၤဂၤလၢ ကကဲထီၣ်က့ၤ ဟံၣ်ခိၣ်လၢအလီၢ် ဖဲအသံဝံၤအလီၢ်ခံ.

၃. ဖဲ ၁ မိၤၡ့ ၄၉:၁, ၂ န့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်.

^၃ ဖး ၁ မိၤၡ့ ၄၉:၁, ၂. မ့မ့ၢ် စီၤယၤကိာ်န့ၣ် ဖဲအကိးဖှိၣ် အဖိခွါတဖၣ် ဒီးတဲတၢ်ဒီး အဝဲသ့ၣ်အခါ အလီၤဆီန့ၢ်ဒံး ဟံၣ်ခိၣ်အဂၤတဖၣ်. စီၤယၤကိာ်န့ၣ် အကဲဝဲဝံတဂၤ. ဒီးခီဖျိလၢ ယဟိဝၤယွၤ အတၢ်မၤစၢၤအဃိ စီၤယၤကိာ် တဲဘၣ်အဖိခွါတဖၣ် ဘၣ်ဃးဒီး တၢ်ကကဲထီၣ်သး ဒီးအဝဲသ့ၣ် ဒီးအစၢၤအသွဲၣ် လၢခါဆူညါဒ်လဲၣ်အဂ့ၢ်. အဃိ တၢ်ဂ့ၢ်လၢ စီၤယၤကိာ်တဲဘၣ် အဖိခွါတဖၣ်န့ၣ် တဘျီတခီၣ် ပှၤကိးဝဲလၢ စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါ.

၄. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “စီၤယၤကိာ် အဟံၣ်ဖိဃီဖိ.”)

^၄ လၢတၢ်မၤလိအံၤ ပကတဲသကိး တၢ်ဂ့ၢ်လၢ စီၤယၤကိာ် တဲဘၣ်အဖိခွါလွံၢ်ဂၤ လၢအမ့ၢ် စီၤရူၤဘ့ၣ်, စီၤစူၤမ့းအိၣ်, စီၤလ့ၤဝံ ဒီးစီၤယူဒၤ. ဒီးလၢတၢ်မၤလိ လၢခံတခါန့ၣ် ပကတဲသကိး တၢ်ဂ့ၢ်လၢ စီၤယၤကိာ် တဲဘၣ်အဖိခွါ အဂၤဃိးဂၤ. ပကထံၣ်ဘၣ်လၢ တၢ်ဂ့ၢ်လၢ စီၤယၤကိာ်တဲဝဲန့ၣ် အဘၣ်ဃးဒီး အဖိခွါတဖၣ် တကးဒံးဘၣ် အဘၣ်ဃးဒီး အဝဲသ့ၣ် အစၢၤအသွဲၣ်လၢ ကကဲထီၣ် ပှၤအံၣ်စရ့လးဖိ ဖးဒိၣ်တကလုာ်. အဃိ ဖဲပကွၢ်ကဒါက့ၤ တၢ်ကဲထီၣ်သးဒီး ပှၤအံၣ်စရ့လးဖိ လၢညါတဖၣ်အခါ ပကသ့ၣ်ညါဘၣ်လၢ တၢ်ဂ့ၢ်လၢ စီၤယၤကိာ်တဲဝဲန့ၣ် ဟဲလၢထီၣ်ပှဲၤထီၣ်နီၢ်ကီၢ်. တကးဒံးဘၣ် ဖဲပမၤလိသကိး တၢ်ဂ့ၢ်လၢ စီၤယၤကိာ် တဲဝဲအခါ ပကသ့ၣ်ညါဘၣ် တၢ်မၤလိ အရ့ဒိၣ်လၢ ကမၤစၢၤပှၤ ဒ်သိး ပကမၤ တၢ်လၢအဘၣ် ပပၢ်အိၣ်လၢမူခိၣ် ယဟိဝၤယွၤအသး.

စီၤရူၤဘ့ၣ်

၅. ဘၣ်သ့ၣ်သ့ၣ် စီၤရူၤဘ့ၣ် ဆိကမိၣ်ဝဲလၢ အကဒိးန့ၢ်ဘၣ် မနုၤလဲၣ်.

^၅ စီၤယၤကိာ် တဲဘၣ်အဖိခွါ စီၤရူၤဘ့ၣ်လၢ “နမ့ၢ် ယဖိဝဲၢ်ကိ.” (၁ မိၤ ၄၉:၃) ဘၣ်သ့ၣ်သ့ၣ် စီၤရူၤဘ့ၣ် ဆိကမိၣ်ဝဲလၢ အကဲဖိဝဲၢ်ကိအဃိ အကဒိးန့ၢ်ဘၣ် တၢ်န့ၢ်သါ အါန့ၢ်ဒံး အပုၢ်အဂၤတဖၣ်. ဒီးဘၣ်သ့ၣ်သ့ၣ် အကဆိကမိၣ်စ့ၢ်ကီးလၢ အပါသံဝံၤအလီၢ်ခံ အကကဲထီၣ်ဘၣ်ဟံၣ်ခိၣ် ဒီးလၢခံ ပှၤလၢအစၢၤအသွဲၣ် အကျါတဂၤဂၤ ကဒိးန့ၢ်ဘၣ် တၢ်ခွဲးတၢ်ယာ်အံၤ.

၆. ဘၣ်မနုၤအဃိ စီၤရူၤဘ့ၣ် တဒိးန့ၢ်ဘၣ် ဖိဝဲၢ်ကိအတၢ်ခွဲးတၢ်ယာ်ဘၣ်လဲၣ်. (၁ မိၤၡ့ ၄၉:၃, ၄)

^၆ သနာ်က့ စီၤရူၤဘ့ၣ် တဒိးန့ၢ်ဘၣ် ဖိဝဲၢ်ကိအတၢ်ခွဲးတၢ်ယာ်ဘၣ်. (၁ ကွဲး ၅:၁) ဘၣ်မနုၤအဃိလဲၣ်. ဖဲနီၢ်ရၤဃ့လး သံဝံၤအလီၢ်ခံ တတီၤဖိန့ၣ် စီၤရူၤဘ့ၣ် မံဃုာ်ဒီး အပါအသံၣ်မါ နီၢ်ဘံၤလဟၤ လၢအကဲနီၢ်ရၤဃ့လး အကုၢ်မုၣ်တဂၤလၢ အဟ့ၣ်ဒုးအိၣ်ဃုာ်ဝဲဒီး စီၤယၤကိာ်. (၁ မိၤ ၃၅:၁၉, ၂၂) ဘၣ်ဆၣ် ဘၣ်မနုၤအဃိ စီၤရူၤဘ့ၣ် မံဃုာ်ဒီး နီၢ်ဘံၤလဟၤလဲၣ်. ဘၣ်သ့ၣ်သ့ၣ် ကမ့ၢ်ခီဖျိလၢ အအဲၣ်ဒိးလၢ စီၤယၤကိာ် ကဆိကမိၣ်ဆံး နီၢ်ဘံၤလဟၤ ဒီးစီၤယၤကိာ် ကအဲၣ်အါလၢ အမိနီၢ်လ့ၤအၤ. မ့တမ့ၢ်ဘၣ်န့ၣ် ဘၣ်သ့ၣ်သ့ၣ် ကမ့ၢ်ခီဖျိလၢ စီၤရူၤဘ့ၣ် လီကီဝဲ နီၢ်ဘံၤလဟၤ ဒီးပၢၤအသး တန့ၢ်ဘၣ်အဃိ. ဒ်လဲၣ်ဂ့ၤ ဒ်လဲၣ်ဂ့ၤ တၢ်လၢ စီၤရူၤဘ့ၣ် မၤဝဲန့ၣ် အပါ ဒီးယဟိဝၤယွၤ တဘၣ်သးဝဲ နီတစဲးဘၣ်.—ဖး ၁ မိၤၡ့ ၄၉:၃, ၄.

၇. တၢ်ကဲထီၣ်သးဒီး စီၤရူၤဘ့ၣ် ဒီးအစၢၤအသွဲၣ်ဒ်လဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါ.”)

^၇ စီၤယၤကိာ် တဲဘၣ် စီၤရူၤဘ့ၣ်လၢ “တမ့ၢ်လၢ နကဒိၣ်န့ၢ်ဒံး နဒီပုၢ်ဝဲၢ်ခွါတဖၣ်ဘၣ်.” တၢ်လၢ စီၤယၤကိာ် တဲဝဲအံၤ ဟဲလၢထီၣ်ပှဲၤထီၣ် နီၢ်ကီၢ်. စီၤရူၤဘ့ၣ် အစၢၤအသွဲၣ် ကဲထီၣ် စီၤပၤ, ပှၤလုၢ်တၢ်ဒိၣ် မ့တမ့ၢ် ဝံတဂၤဂၤဧါန့ၣ် လံာ်စီဆှံ တပာ်ဖျါထီၣ်ဝဲ နီတဘျီဘၣ်. သနာ်က့ စီၤယၤကိာ်ဟ့ၣ် စီၤရူၤဘ့ၣ်လၢ တၢ်န့ၢ်သါဒံး ဒီးလၢပှၤအံၣ်စရ့လးဖိ အဒူၣ်အကျါန့ၣ် စီၤရူၤဘ့ၣ် အစၢၤအသွဲၣ် ကဲထီၣ်ဝဲ ကလုာ်ဒူၣ်တဒူၣ်. (ၡူ ၁၂:၆) စီၤရူၤဘ့ၣ် ပာ်ဖျါထီၣ်စ့ၢ်ကီး အတၢ်ဂ့ၤတၢ်ဝါ လၢအဂၤတဖၣ် ဒီးဖျါလီၤဂာ်လၢ အတမၤကမၣ်မုၣ်ကမၣ်ခွါ နီတဘျီလၢၤဘၣ်.—၁ မိၤ ၃၇:၂၀-၂၂; ၄၂:၃၇.

၈. လၢစီၤရူၤဘ့ၣ် အဒိအတဲာ်န့ၣ် ပန့ၢ်ဘၣ် တၢ်မၤလိဒ်လဲၣ်.

^၈ ပန့ၢ်ဘၣ် တၢ်မၤလိဒ်လဲၣ်. ပကဘၣ် ဂုာ်ကျဲးစၢး မၤအါထီၣ် တၢ်ပၢၤသး ဒီးပာ်လီၤသး ဂၢၢ်ဂၢၢ်ကျၢၤကျၢၤလၢ ပကဟးဆှဲး တၢ်မၤကမၣ်မုၣ်ကမၣ်ခွါ. ပမ့ၢ်ထံၣ်ဘၣ် တၢ်လ့ပစီလၢ ပကမၤကမၣ်တၢ်န့ၣ် ပကဘၣ် ဆိကမိၣ်ကွၢ်လၢ တၢ်လၢပကမၤန့ၣ် ကမၤဘၣ်ဒိ ယဟိဝၤယွၤ, ပဟံၣ်ဖိဃီဖိ ဒီးပှၤအဂၤဒ်လဲၣ်. ပကြၢး သ့ၣ်နီၣ်ထီၣ်စ့ၢ်ကီးလၢ “ပှၤတဂၤ ကကူးဘၣ်က့ၤတၢ်လၢ အဖှံဝဲ.” (ကလၤ ၆:၇) တၢ်ကဲထီၣ်သးဒီး စီၤရူၤဘ့ၣ်န့ၣ် ဒုးသ့ၣ်နီၣ်ထီၣ် စ့ၢ်ကီးပှၤလၢ ယဟိဝၤယွၤ အတၢ်သးကညီၤအဂ့ၢ်. ပမ့ၢ်မၤကမၣ်တၢ်န့ၣ် ပကထံၣ်ဘၣ် တၢ်ကီတၢ်ခဲဒံး ဘၣ်ဆၣ် ပမ့ၢ်ပီၢ်ယၢ်လီၤက့ၤသး ဒီးဂုာ်ကျဲးစၢး မၤတၢ်လၢအဘၣ်န့ၣ် ယဟိဝၤယွၤ ကပျၢ်ကွံာ်ပတၢ်ကမၣ် ဒီးအကဆိၣ်ဂ့ၤပှၤ.

စီၤစူၤမ့းအိၣ် ဒီးစီၤလ့ၤဝံ

၉. တၢ်ဂ့ၢ်လၢ စီၤယၤကိာ်တဲဘၣ် စီၤစူၤမ့းအိၣ် ဒီးစီၤလ့ၤဝံန့ၣ် ဘၣ်မနုၤအဃိ ဖျါလၢ အတဘၣ်သူၣ်ဘၣ်သး အဝဲသ့ၣ်ဘၣ်လဲၣ်. (၁ မိၤၡ့ ၄၉:၅-၇)

^၉ ဖး ၁ မိၤၡ့ ၄၉:၅-၇. လၢခံ စီၤယၤကိာ် တဲတၢ်ဒီး စီၤစူၤမ့းအိၣ် ဒီးစီၤလ့ၤဝံ. ဒီးတၢ်လၢအတဲဝဲန့ၣ် ပာ်ဖျါထီၣ်လၢ အတဘၣ်သူၣ်ဘၣ်သး အဖိခွါ ခံဂၤအံၤဘၣ်. လၢညါပူၤကွံာ် တဘျုးနံၣ်န့ၣ် ပှၤကနၤဧၣ်ဖိ စီၤၡက့ၣ် မၤတရီတပါဝဲ စီၤယၤကိာ် အဖိမုၣ်နီၢ်ဒံနၤ. တၢ်ကဲထီၣ်သးဒီး နီၢ်ဒံနၤဒ်အံၤအဃိ အဒီပုၢ်ဝဲၢ်ခွါတဖၣ် သးဒိၣ်ထီၣ်တၢ်န့ၣ် ပနၢ်ပၢၢ်သ့. သနာ်က့ မ့မ့ၢ် စီၤစူၤမ့းအိၣ် ဒီးစီၤလ့ၤဝံန့ၣ် အဝဲသ့ၣ် သးဒိၣ်ထီၣ်တၢ်ဒိၣ်မး ဒီးပၢၤအသးတန့ၢ်ဘၣ်. စီၤစူၤမ့းအိၣ် ဒီးစီၤလ့ၤဝံ လံၣ်န့ၢ် ပှၤပိာ်ခွါလၢ အအိၣ်လၢ ဝ့ၢ်ၡက့ၣ် ဒီးတဲပိာ်ခွါတဖၣ်န့ၣ်လၢ အဝဲသ့ၣ် မ့ၢ်မၤတၢ်ကူးတရံးန့ၣ် တၢ်ဃူတၢ်ဖိး ကအိၣ်လၢ အဝဲသ့ၣ်ခံဖု အဘၢၣ်စၢၤ. ပှၤပိာ်ခွါတဖၣ်အံၤ တူၢ်လိာ်ဝဲ ဒီးမၤတၢ်ကူးတရံး. ဘၣ်ဆၣ် ဖဲအဝဲသ့ၣ် တူၢ်ဘၣ်လၢအဆါဒံးအခါ စီၤစူၤမ့းအိၣ် ဒီးစီၤလ့ၤဝံ “ဟံးန့ၢ်ဝဲအနး ဒီးလဲၤနုာ်လီၤဝဲလၢ ဝ့ၢ်ပူၤ ဖဲပှၤတပာ်သူၣ်ပာ်သးဝဲ အဆၢကတီၢ် ဒီးမၤသံဝဲ ပှၤပိာ်ခွါ ကိးဂၤဒဲး.”—၁ မိၤ ၃၄:၂၅-၂၉.

၁၀. တၢ်ဂ့ၢ်လၢ စီၤယၤကိာ် တဲဆိပာ်ဝဲ ဘၣ်ဃးဒီး စီၤစူၤမ့းအိၣ် ဒီးစီၤလ့ၤဝံန့ၣ် ဟဲလၢထီၣ်ပှဲၤထီၣ် ဒ်လဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါ.”)

^၁၀ စီၤယၤကိာ် အဖိခွါခံဂၤအံၤ မၤသံဘၣ် ပှၤအါဂၤအဃိ စီၤယၤကိာ် သးဒိၣ်ထီၣ် အဝဲသ့ၣ်ဒိၣ်မး. စီၤယၤကိာ် တဲဆိပာ်ဝဲလၢ အဖိခွါခံဂၤအံၤ အစၢၤအသွဲၣ်န့ၣ် ကလီၤပြံလီၤပြါလၢ ကီၢ်အံၣ်စရ့လးအပူၤဝးဝး. ပူၤကွံာ်အနံၣ် ၂၀၀ ဘျဲၣ် ဝံၤအလီၢ်ခံ ဖဲပှၤအံၣ်စရ့လးဖိတဖၣ် နုာ်လီၤလၢ ကီၢ်တၢ်စံးပာ်အခါ တၢ်လၢစီၤယၤကိာ် တဲဆိပာ်ဝဲန့ၣ် ဟဲလၢထီၣ်ပှဲၤထီၣ်ဝဲ. စီၤစူၤမ့းအိၣ် အဒူၣ်န့ၣ် ဒိးန့ၢ်ဘၣ်ဝဲ တၢ်လီၢ်တၢ်ကျဲတနီၤလၢ ယူဒၤအဟီၣ်ကဝီၤအပူၤ. (ၡူ ၁၉:၁) မ့မ့ၢ် စီၤလ့ၤဝံ အစၢၤအသွဲၣ်န့ၣ် ဒိးန့ၢ်ဘၣ်ဝဲ ဝ့ၢ် ၄၈ ဖျၢၣ် လၢကီၢ်အံၣ်စရ့လးအပူၤ.—ၡူ ၂၁:၄၁.

၁၁. တၢ်အဂ့ၤလၢ စူၤမ့းအိၣ်အဒူၣ် ဒီးပှၤလ့ၤဝံဖိအဒူၣ် မၤဝဲန့ၣ် မနုၤလဲၣ်.

^၁၁ စီၤစူၤမ့းအိၣ် ဒီးစီၤလ့ၤဝံ အစၢၤအသွဲၣ် တမၤကမၣ်တၢ် ဒ်သိးဒီး အမိၢ်ပၢ်ဖံဖု လၢပျၢၤတဖၣ်ဘၣ်. ပထံၣ်ဘၣ်လၢ ပှၤလ့ၤဝံဖိအါဂၤန့ၣ် ဘူၣ်ထီၣ်ဘါထီၣ် ယဟိဝၤယွၤ လၢတၢ်သးတီ. အဒိ ဖဲစီၤမိၤၡ့ လဲၤထီၣ်လၢ ကစၢၢ်စံၤနါ ဒ်သိးကဒိးန့ၢ်ဘၣ် တၢ်သိၣ်တၢ်သီလၢ ယဟိဝၤယွၤ အအိၣ်အခါ ပှၤအံၣ်စရ့လးဖိအါဂၤ ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ် ဒ်သိးဒီး ကျီၢ်ထူဖိ. ဘၣ်ဆၣ် ဖဲန့ၣ်အခါ ပှၤလ့ၤဝံဖိတဖၣ် တဘူၣ်ထီၣ်ဘါထီၣ် ယွၤလၢအကမၣ် နီတစဲးဘၣ်. ဒီးဖဲစီၤမိၤၡ့ မၤဟးဂီၤကွံာ် ပှၤလၢအဘူၣ်ထီၣ်ဘါထီၣ် တၢ်ဂီၤတၢ်ဖှီၣ်အခါ ပှၤလ့ၤဝံဖိတဖၣ် မၤစၢၤအီၤ. (၂ မိၤ ၃၂:၂၆-၂၉) တကးဒံးဘၣ် ယဟိဝၤယွၤ ဃုထၢထီၣ် ပှၤပိာ်ခွါလၢ ပှၤလ့ၤဝံဖိအဒူၣ်ကျါ ဒ်သိးအဝဲသ့ၣ် ကမၤတၢ်ဒ် ပှၤလုၢ်တၢ်ဒိၣ်တဖၣ်အသိး. (၂ မိၤ ၄၀:၁၂-၁၅; ၄ မိၤ ၃:၁၁, ၁၂) ဒီးလၢခံ ဖဲယူဒၤအဒူၣ် ကဒုးတၢ်ဒီး ပှၤကနၤဧၣ်ဖိ ဒ်သိးကမၤန့ၢ်ဝဲ ဟီၣ်ကဝီၤ လၢကီၢ်တၢ်စံးပာ် အပူၤအခါ စူၤမ့းအိၣ်အဒူၣ် ဒုးစၢၤအဝဲသ့ၣ်. ဒီးအဝဲသ့ၣ် တၢ်ဆၢတဲာ်န့ၣ် အဘၣ် ယဟိဝၤယွၤအသး.—စံၣ်ညီၣ် ၁:၃, ၁၇.

၁၂. လၢစီၤစူၤမ့းအိၣ် ဒီးစီၤလ့ၤဝံ အဒိအတဲာ်န့ၣ် ပန့ၢ်ဘၣ် တၢ်မၤလိဒ်လဲၣ်.

^၁၂ ပန့ၢ်ဘၣ် တၢ်မၤလိဒ်လဲၣ်. ပကဘၣ် ပၢၤပသးထီဘိ. ပှၤမ့ၢ်တရ့ပှၤ ဂ့ၤဂ့ၤဘၣ် မ့တမ့ၢ် တရ့ပှၤလၢပအဲၣ် တဂၤဂၤ ဂ့ၤဂ့ၤဘၣ်န့ၣ် ညီနုၢ် ပကသးထီၣ်တၢ်. (စံး ၄:၄) သနာ်က့ ပကဘၣ် သ့ၣ်နီၣ်ထီၣ်လၢ ပမ့ၢ်တဲတၢ် မ့တမ့ၢ် မၤတၢ်တမံၤမံၤလၢ အမၤဘၣ်ဒိ ပှၤလၢအတရ့ပှၤ ဂ့ၤဂ့ၤဘၣ်န့ၣ် ယဟိဝၤယွၤ တဘၣ်သးဝဲဘၣ်. (ယၤ ၁:၂၀) ပဒီပုၢ်ဝဲၢ်မုၣ်ခွါမ့ၢ်ဂ့ၤ, ပှၤတၢ်ချၢမ့ၢ်ဂ့ၤ မ့ၢ်တရ့ပှၤ တီတီလိၤလိၤဘၣ် သနာ်က့ ပကဘၣ် ရ့ဒီးအဝဲသ့ၣ် ဒ်ယဟိဝၤယွၤ အတၢ်ဘၣ်သး. ပမ့ၢ်ရ့ဒီးအဝဲသ့ၣ် ဂ့ၤဂ့ၤန့ၣ် ကမၤစၢၤပှၤဒ်သိး ပတတဲတၢ် ဒီးမၤတၢ်လၢ ကမၤဘၣ်ဒိ အဝဲသ့ၣ်အသးဘၣ်. (ရိ ၁၂:၁၇, ၁၉; ၁ ပ့း ၃:၉) အဒိ ပမိပပါ မ့ၢ်တမၤတၢ်လၢ အဘၣ်ယဟိဝၤယွၤအသးဘၣ် သနာ်က့ ပတလိၣ် မၤဒ်သိးဒီး အဝဲသ့ၣ်ဘၣ်. ဒီးခီဖျိလၢ ပမိပပါ တမၤတၢ်လၢ အဘၣ်ယဟိဝၤယွၤအသးဘၣ် အဃိ ပတဘၣ် ဆိကမိၣ်လၢ ပဝဲစ့ၢ်ကီး ပဒိးန့ၢ်ဘၣ် ယဟိဝၤယွၤ အတၢ်ဘၣ်သး တသ့လၢၤဘၣ်န့ၣ်ဘၣ်. ယဟိဝၤယွၤ ကမၤစၢၤပှၤဒ်သိး ပကမၤတၢ်လၢအဘၣ် ဒီးအကဆိၣ်ဂ့ၤ ပတၢ်ဂုာ်ကျဲးစၢး.

စီၤယူဒၤ

၁၃. စီၤယူဒၤန့ၣ် ဖဲအပါကတဲတၢ်ဒီးအီၤအခါ ဘၣ်မနုၤအဃိ အကဘၣ်ယိၣ်တၢ်လဲၣ်.

^၁၃ ဝံၤဒီး စီၤယၤကိာ် တဲတၢ်ဒီး အဖိခွါစီၤယူဒၤ. စီၤယူဒၤ မၤဘၣ် တၢ်ကမၣ်ဖးဒိၣ် စ့ၢ်ကီးအဃိ အနၢ်ဟူဝဲ တၢ်ဂ့ၢ်လၢ အပါတဲဘၣ် အကၠီတဖၣ် ဝံၤအလီၢ်ခံ ဘၣ်သ့ၣ်သ့ၣ် အကဘၣ်ယိၣ်တၢ်. အဒိ ဖဲစီၤစူၤမ့းအိၣ် ဒီးစီၤလ့ၤဝံ မၤသံပှၤပိာ်ခွါလၢ အအိၣ်လၢ ဝ့ၢ်ၡက့ၣ် ဝံၤအလီၢ်ခံ စီၤယူဒၤ ဒီးအဒီပုၢ်ဝဲၢ်ခွါ လၢအဂၤတဖၣ် လဲၤဟံးန့ၢ်ဝဲ ပှၤဝ့ၢ်ဖိ အတၢ်ဖိတၢ်လံၤခဲလၢာ်. (၁ မိၤ ၃၄:၂၇) တကးဒံးဘၣ် ဖဲအဒီပုၢ်ဝဲၢ်ခွါ ဆါလီၤကွံာ် စီၤယိၤသး ဒ်ကုၢ်တဂၤအသိး ဒီးလံၣ်န့ၢ်အပါအခါ အပၣ်ဃုာ် လၢပှၤကျါစ့ၢ်ကီး. (၁ မိၤ ၃၇:၃၁-၃၃) လၢခံ အမံဃုာ်ဒီး အဒဲၣ်မုၣ် နီၢ်တၤမၢ် ခီဖျိလၢ အဆိကမိၣ်ဝဲလၢ အကဲပိာ်မုၣ်လၢ အဆါလီၤအီၣ်အသး.—၁ မိၤ ၃၈:၁၅-၁၈.

၁၄. စီၤယၤကိာ်တဲဘၣ် စီၤယူဒၤ တၢ်ဂ့ၢ်မနုၤလဲၣ် ဒီးစီၤယူဒၤ ပာ်ဖျါထီၣ် တၢ်ဂ့ၤတၢ်ဝါ မနုၤလဲၣ်. (၁ မိၤၡ့ ၄၉:၈, ၉)

^၁၄ သနာ်က့ စီၤယၤကိာ် ပတြၢၤဝဲ စီၤယူဒၤ ဒီးအၢၣ်လီၤအီၤလၢ စီၤယူဒၤ ဒီးအစၢၤအသွဲၣ် ကဒိးန့ၢ်ဘၣ် တၢ်ဆိၣ်ဂ့ၤ. (ဖး ၁ မိၤၡ့ ၄၉:၈, ၉.) ပထံၣ်ဘၣ်စ့ၢ်ကီးလၢ စီၤယူဒၤ ပာ်ဖျါထီၣ်လၢ အသးအိၣ်အပါ ဒီးဆိကမိၣ်န့ၢ်တၢ် လၢအပါအဂီၢ်. တကးဒံးဘၣ် အပာ်ဖျါထီၣ် တၢ်အဲၣ် ဒီးတၢ်ကဟုကယာ်လၢ အပုၢ်သဒါ စီၤဘံၣ်ယၤမံၣ် အဖီခိၣ် ဒီးအသးအိၣ် ကဲကုၢ်လၢအလီၢ်.—၁ မိၤ ၄၄:၁၈, ၃၀-၃၄.

၁၅. စီၤယူဒၤ ဒိးန့ၢ်ဘၣ် တၢ်ဆိၣ်ဂ့ၤဒ်လဲၣ်.

^၁၅ စီၤယၤကိာ် တဲဆိပာ်ဝဲလၢ စီၤယူဒၤန့ၣ် အကတီခိၣ်ရိၤမဲတၢ် လၢအဒီပုၢ်ဝဲၢ်ခွါတဖၣ်အကျါ. ဘၣ်ဆၣ် ကအိၣ်အနံၣ် ၂၀၀ ဝံၤအလီၢ်ခံမး တၢ်ဂ့ၢ်လၢ စီၤယၤကိာ် တဲဆိပာ်ဝဲအံၤ ဟဲလၢထီၣ်ပှဲၤထီၣ်ဝဲ. ဖဲပှၤအံၣ်စရ့လးဖိ ဟးထီၣ်လၢ ကီၢ်အဲၤကူပတူး ဒီးလဲၤတၢ်လၢ ပှၢ်မုၢ်ကနၢ ဒ်သိးကလဲၤလၢ ကီၢ်တၢ်စံးပာ်အခါ ယူဒၤအဒူၣ် ဟးထီၣ်အဆိကတၢၢ် ဒီးလၢခံ အံၣ်စရ့လးအဒူၣ် လၢအဂၤတဖၣ် ပိာ်ထီၣ်အခံ. (၄ မိၤ ၁၀:၁၄) လၢခံ တဘျုးနံၣ်န့ၣ် ဒ်သိး ပှၤအံၣ်စရ့လးဖိ ကမၤန့ၢ် ကီၢ်တၢ်စံးပာ်အဂီၢ် ယဟိဝၤယွၤမၢ ယူဒၤအဒူၣ် လဲၤထီၣ်ဒုးဆိ ပှၤကနၤဧၣ်ဖိတဖၣ်. (စံၣ်ညီၣ် ၁:၁, ၂) တကးဒံးဘၣ် စီၤပၤလၢ အဟဲလီၤစၢၤလၢ ယူဒၤအဒူၣ်န့ၣ် အိၣ်ဝဲအါမး. စီၤပၤ အဆိကတၢၢ်တဂၤန့ၣ် ကဲဝဲစီၤဒၤဝံး. တၢ်ဂ့ၢ်လၢ စီၤယၤကိာ် တဲဆိပာ်ဝဲအံၤ ဟဲလၢထီၣ်ပှဲၤထီၣ် လၢအဂၤအိၣ်ဒံး.

၁၆. ဝံအတၢ်စံးပာ်ဖဲ ၁ မိၤၡ့ ၄၉:၁၀ န့ၣ် ဟဲလၢထီၣ်ပှဲၤထီၣ်ဒ်လဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါ.”)

^၁၆ စီၤယၤကိာ် ဆဲးတဲဝဲလၢ ပှၤလၢကပၢ ပှၤဟီၣ်ခိၣ်ဖိခဲလၢာ်န့ၣ် ကဟဲလီၤစၢၤလၢ ယူဒၤအဒူၣ် ဒီးအကပၢတၢ် လီၤထူလီၤယိာ်. (ဖး ၁ မိၤၡ့ ၄၉:၁၀ ဒီးတၢ်ဂ့ၢ်အဘျဲၣ်.) ပှၤလၢကပၢတၢ် တဂၤအံၤ အကဲဝဲ ယ့ၣ်ၡူးခရံာ် လၢစီၤယၤကိာ် ကိးအီၤလၢ ၡံလိၤ. ဘၣ်ဃးဒီး ယ့ၣ်ၡူးန့ၣ် မူခိၣ်ကလူးတဂၤ တဲဝဲလၢ “ယဟိဝၤယွၤ ကဟ့ၣ်လီၤအီၤလၢ အပၢ်စီၤဒၤဝံး အလီၢ်ပစိာ်.” (လူၤ ၁:၃၂, ၃၃) ဒီးယ့ၣ်ၡူးန့ၣ် လံာ်စီဆှံ ကိးစ့ၢ်ကီးအီၤလၢ “ခ့ယုၢ်လၢအဘၣ်ဃးဒီး ယူဒၤအဒူၣ်.”—လီၣ် ၅:၅.

၁၇. ဘၣ်ဃးဒီး ပတၢ်ထံၣ်လၢ ပှၤဂၤအဖီခိၣ်န့ၣ် ပကွၢ်လိ ယဟိဝၤယွၤ အဒိအတဲာ် ကသ့ဒ်လဲၣ်.

^၁၇ ပန့ၢ်ဘၣ် တၢ်မၤလိဒ်လဲၣ်. စီၤယူဒၤ မၤဘၣ်တၢ်ကမၣ် ဖးဒိၣ်သနာ်က့ ယဟိဝၤယွၤ ဆိၣ်ဂ့ၤအီၤဒံး. ဘၣ်ဆၣ် ဘၣ်သ့ၣ်သ့ၣ် စီၤယူဒၤ အဒီပုၢ်ဝဲၢ်ခွါတဖၣ် ကဆိကမိၣ်ဝဲလၢ ဘၣ်မနုၤအဃိ ယဟိဝၤယွၤ ဆိၣ်ဂ့ၤအီၤလဲၣ်. ပတသ့ၣ်ညါ တၢ်လၢ အဝဲသ့ၣ် ဆိကမိၣ်ဝဲဘၣ် သနာ်က့ ပသ့ၣ်ညါလၢ ယဟိဝၤယွၤ ထံၣ်ဝဲ စီၤယူဒၤ အတၢ်ဂ့ၤတၢ်ဝါ အဃိအဆိၣ်ဂ့ၤအီၤ. ပကွၢ်လိ ယဟိဝၤယွၤ အဒိအတဲာ် ကသ့ဒ်လဲၣ်. ဖဲဒီပုၢ်ဝဲၢ်မုၣ်ခွါ တဂၤဂၤ ဒိးန့ၢ်ဘၣ် မူဒါလီၤဆီအခါ ခီၣ်ထံးခါန့ၣ် ဘၣ်သ့ၣ်သ့ၣ် ပကသးစၢၢ်ဆၢလၢ အတၢ်လီၤတူာ်လီၤကာ်. ဘၣ်ဆၣ် ပကြၢးသ့ၣ်နီၣ်ထီၣ်လၢ ယဟိဝၤယွၤန့ၣ် အဃုကွၢ်ဝဲ ပှၤလၢ အဘူၣ်ထီၣ်ဘါထီၣ်အီၤတဖၣ် အတၢ်ဂ့ၤတၢ်ဝါ ဒီးအဘၣ်သူၣ်ဘၣ်သး အဝဲသ့ၣ်. အဃိ မ်ပဂုာ်ကျဲးစၢး ကွၢ်လိယဟိဝၤယွၤ ထီဘိ.

၁၈. ပကွၢ်လိ ယူဒၤအဒူၣ် ကသ့ဒ်လဲၣ်.

^၁၈ တၢ်မၤလိ အဂၤတခါလၢ ပဒိးန့ၢ်ဘၣ်လၢ စီၤယူၤဒၤ အတၢ်လဲၤခီဖျိန့ၣ် မ့ၢ်ဝဲ ပကဘၣ်အိၣ်ဒီး တၢ်ဝံသးစူၤ. ယဟိဝၤယွၤန့ၣ် အမၤလၢပှဲၤ အတၢ်အၢၣ်လီၤထီဘိ ဘၣ်ဆၣ် အမၤလၢပှဲၤဝဲဒ်လဲၣ် ဒီးလၢအဆၢကတီၢ်ဖဲလဲၣ်န့ၣ် တမ့ၢ်ဒ်သိးဒီး ပဆိကမိၣ် ထီဘိဘၣ်. ပမ့ၢ်ကွၢ် ပှၤအဆိကတၢၢ်တဒူၣ်လၢ အတီခိၣ်ရိၤမဲ ပှၤအံၣ်စရ့လးဖိန့ၣ် တမ့ၢ်ယူဒၤအဒူၣ်ဘၣ်. ဘၣ်ဆၣ် အဝဲသ့ၣ်အိၣ်ဒီး တၢ်ဝံသးစူၤ ဒီးဆီၣ်ထွဲမၤစၢၤဝဲ ပှၤလၢယဟိဝၤယွၤ ဃုထၢထီၣ်ဝဲ ဒ်သိးဒီး စီၤမိၤၡ့ လၢအကဲ ပှၤလ့ၤဝံဖိ, စီၤယိၤၡူ လၢအကဲ ပှၤအ့ဖရဲၣ်ဖိ ဒီးစီၤပၤစီလူး လၢအကဲ ပှၤဘံၣ်ယၤမံၣ်ဖိ. ဆၢကတီၢ်ခဲအံၤ ပှၤတဂၤဂ့ၤ တဂၤဂ့ၤလၢ ယဟိဝၤယွၤ ဃုထၢထီၣ်ဝဲလၢ ကတီခိၣ်ရိၤမဲတၢ် လၢပကျါန့ၣ် ပကြၢးဆီၣ်ထွဲမၤစၢၤ အဝဲသ့ၣ်စ့ၢ်ကီး.—ဧ့ၤ ၆:၁၂.

၁၉. တၢ်ဂ့ၢ်လၢ ပတဲသကိး ဘၣ်ဃးဒီး စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါန့ၣ် သိၣ်လိပှၤ ယဟိဝၤယွၤ အဂ့ၢ်ဒ်လဲၣ်.

^၁၉ တၢ်ဂ့ၢ်လၢ ပတဲသကိး ဘၣ်ဃးဒီး စီၤယၤကိာ် အတၢ်တဲဆိပာ် ဖဲအဘူးထီၣ်ကသံအခါန့ၣ် ပန့ၢ်ဘၣ် တၢ်မၤလိဒ်လဲၣ်. ပထံၣ်ဘၣ်ၡဲၡဲလၢ “ပှၤကညီအတၢ်ထံၣ်န့ၣ် တဒ်သိးဒီး ကစၢ်ယွၤအတၢ်ထံၣ်ဘၣ်.” (၁ မူၤ ၁၆:၇) ယဟိဝၤယွၤန့ၣ် အအိၣ်ဒီး တၢ်ဝံသးစူၤ ဒီးအပျၢ်ကွံာ်တၢ်ကမၣ်. ဘၣ်ဆၣ် ပမ့ၢ်မၤတၢ်ကမၣ်န့ၣ် အတဘၣ်သးဝဲဘၣ် ဒီးပဒိကနၣ် အကလုၢ် လၢလၢပှဲၤပှဲၤ တန့ၢ်ဘၣ်န့ၣ် အသ့ၣ်ညါဝဲ. တကးဒံးဘၣ် ပှၤတဂၤမ့ၢ်မၤဘၣ် တၢ်ကမၣ်ဖးဒိၣ် သနာ်က့ အမ့ၢ်ပီၢ်ယၢ်လီၤက့ၤသးနီၢ်ကီၢ် ဒီးဂုာ်ကျဲးစၢးမၤက့ၤ တၢ်လၢအဘၣ်န့ၣ် ယဟိဝၤယွၤ ဆိၣ်ဂ့ၤအီၤ သ့စ့ၢ်ကီး. တၢ်မၤလိ လၢခံတခါန့ၣ် ပကတဲသကိး ဘၣ်ဃးဒီး တၢ်ဂ့ၢ်လၢ စီၤယၤကိာ် တဲဘၣ်အဖိခွါ အဂၤဃိးဂၤ.