ဒီပုၢ်ဝဲၢ်မုၣ်ခွါသးပှၢ်တဖၣ် သုကဲပှၤလၢ အလုၢ်ဒိၣ်ပှ့ၤဒိၣ်ဒိၣ်မး

ဘၣ်သ့ၣ်သ့ၣ် နၤစ့ၢ်ကီး ခီဖျိလၢ နသးပှၢ်ထီၣ်လံအဃိ နမၤတၢ် တန့ၢ်အါအါ ဒ်သိးလၢညါလၢၤဘၣ်. နမၤယဟိဝၤယွၤ အတၢ်မၤ လၢတၢ်သးတီအပူၤ န့ၢ်ဝဲအနံၣ်အါမးလံ သနာ်က့ ခဲအံၤန့ၣ် နမၤတန့ၢ် ဒ်သိးလၢညါ လၢၤဘၣ်အဃိ နကဆိမိၣ်လၢ နလုၢ်နပှ့ၤတအိၣ် အါအါလၢၤဘၣ်. အဒိ နမ့ၢ်ထိၣ်သတြီၤ တၢ်လၢနမၤလၢ အပူၤကွံာ် ဒီးခဲအံၤန့ၣ် နသးကဟးဂီၤ. ဘၣ်ဆၣ် ဒ်သိးနဆဲးအိၣ်ဒီး တၢ်သးခုကသ့အဂီၢ် တၢ်မနုၤ ကမၤစၢၤနၤလဲၣ်.

ယဟိဝၤယွၤမုၢ်လၢ် တၢ်မနုၤလၢ နအိၣ်လဲၣ်

သံကွၢ်လီၤနသးလၢ ‘ယဟိဝၤယွၤမုၢ်လၢ် တၢ်မနုၤလၢ ယအိၣ်လဲၣ်.’ ၅ မိၤၡ့ ၆:၅ တဲဘၣ်ပှၤလၢ “နကဘၣ် အဲၣ်နကစၢ် ယဟိဝၤယွၤ လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ ဒီးလၢနဂံၢ်နဘါ ခဲလၢာ်လီၤ.”

လံာ်စီဆှံ တဆၢအံၤ ပာ်ဖျါထီၣ်န့ၢ်ပှၤလၢ ယဟိဝၤယွၤ အဲၣ်ဒိးလၢ ပကဟ့ၣ်အီၤ တၢ်အဂ့ၤကတၢၢ် လၢအအိၣ်ဒီးပှၤ. တမ့ၢ်လၢ ပကဘၣ် ထိၣ်သတြီၤ ပသးဒီးပှၤဂၤ မ့တမ့ၢ် တၢ်လၢပမၤ လၢအပူၤကွံာ်ဘၣ်.

ဆိကမိၣ်ကွၢ် ဖဲနသးစၢ်အခါ နဟ့ၣ်ယဟိဝၤယွၤ တၢ်မနုၤလဲၣ်. ယဟိဝၤယွၤ အခ့အပှၤအါတက့ၢ်န့ၣ် ကတဲဝဲလၢ ဖဲအသးစၢ်ဒံးအခါ အဝဲသ့ၣ် ဟ့ၣ်ယဟိဝၤယွၤ တၢ်လၢအဂ့ၤကတၢၢ်. နၤစ့ၢ်ကီး ဖဲနသးစၢ်ဒံးအခါ ဘၣ်သ့ၣ်သ့ၣ် နဟ့ၣ်အီၤ တၢ်လၢအဂ့ၤကတၢၢ်. ခဲအံၤန့ၣ် နသးပှၢ်ထီၣ်သနာ်က့ နဂုာ်ကျဲးစၢး ဆဲးဟ့ၣ်ယဟိဝၤယွၤ တၢ်လၢအဂ့ၤကတၢၢ်ဒံး. အဃိ တၢ်လၢနဟ့ၣ်အီၤ ခဲအံၤန့ၣ် အလုၢ်အပှ့ၤအိၣ် ဒ်သိးဒီး နဟ့ၣ်အီၤလၢ အပူၤကွံာ်လီၤ.

နတၢ်လဲၤခီဖျိန့ၣ် ကဲဘျုးလၢပှၤဂၤအဂီၢ်

နသးပှၢ်ထီၣ် သနာ်က့ တဘၣ်ဆိကမိၣ်လၢ နမၤတၢ် တသ့လၢၤဘၣ် န့ၣ်တဂ့ၤ. ဆိကမိၣ် တၢ်လၢနမၤသ့ ဒီးထံၣ်အီၤ ဒ်သိးဒီး တၢ်ခွဲးတၢ်ယာ်လၢ နကမၤစၢၤပှၤဂၤ. ဖဲနသးစၢ်အခါ တၢ်လၢနမၤ တသ့ဘၣ်န့ၣ် ကအိၣ်ဝဲ. ဘၣ်ဆၣ် ခဲအံၤ ခီဖျိလၢ နသးပှၢ်ထီၣ်အဃိ နမၤထွဲ တၢ်ဟ့ၣ်ကူၣ်တဖၣ်အံၤသ့.

တဲဘၣ်ပှၤဂၤ နတၢ်လဲၤခီဖျိ. ဆိကမိၣ်ကွၢ် လံာ်စီဆှံ အဆၢတဖၣ်အံၤ–

စီၤပၤဒၤဝံး တဲဝဲလၢ– “လၢညါ ယမ့ၢ်ပှၤသးစၢ် ဒီးခဲအံၤယသးပှၢ်လံ. ဘၣ်ဆၣ် ပှၤတီပှၤလိၤ ဘၣ်တၢ်ပာ်တ့ၢ်ကွံာ်အီၤ မ့တမ့ၢ် အဖိတဖၣ် ဘၣ်ဟးဃ့အီၣ်တၢ်န့ၣ် ယတထံၣ်ဘၣ် နီတဂၤဘၣ်.”—စံး ၃၇:၂၅.

စီၤယိၤၡူ တဲဝဲလၢ– “တယံာ်လၢၤဘၣ်ဒု ယကသံလီၤ. သုသ့ၣ်ညါဂ့ၤဂ့ၤလၢ တၢ်အၢၣ်လီၤအီလီၤလၢအဂ့ၤ လၢသုကစၢ်ယဟိဝၤယွၤ အၢၣ်လီၤသုလၢ အတဟဲ လၢထီၣ်ပှဲၤထီၣ်ဘၣ်န့ၣ် တအိၣ်နီတထံၣ်ဘၣ်. အတၢ်အၢၣ်လီၤတဖၣ် ဟဲလၢထီၣ်ပှဲၤထီၣ်ဝဲလၢ သုဂီၢ်ကိးထံၣ်ဒဲးလီၤ. အတၢ်ကတိၤလၢ အတဟဲ လၢထီၣ်ပှဲၤထီၣ်ဘၣ်န့ၣ် တအိၣ်နီတထံၣ်ဘၣ်.”—ၡူ ၂၃:၁၄.

နၤမီၤ, မ့ၢ်နတဲဘၣ် တၢ်ကတိၤ ဒ်သိးဒီး အဝဲသ့ၣ် တဘျီဘျီဧါ. တၢ်လၢ စီၤဒၤဝံး ဒီးစီၤယိၤၡူ တဲဝဲန့ၣ် ကဲဝဲအနီၢ်ကစၢ် အတၢ်လဲၤခီဖျိအဃိ အဝဲသ့ၣ် အတၢ်ကတိၤန့ၣ် န့ၢ်ဂံၢ်န့ၢ်ဘါဒိၣ်မး. ယဟိဝၤယွၤ အခ့အပှၤ လၢအသးတီ ခံဂၤအံၤ တဲဖျါထီၣ်ဝဲ တၢ်လၢ အဝဲသ့ၣ်ထံၣ်ဝဲ ဒီးနၢ်ဟူဘၣ်ဝဲလၢ အနံၣ်အါမး အတီၢ်ပူၤအဃိ တၢ်လၢ အဝဲသ့ၣ်တဲဝဲန့ၣ် အိၣ်ဒီးအခီပညီ.

နမ့ၢ်မၤဘၣ် ယဟိဝၤယွၤအတၢ်မၤ လၢအနံၣ်အါမးန့ၣ် နတၢ်လဲၤခီဖျိ ဘၣ်ဃးဒီး ယဟိဝၤယွၤ မၤစၢၤနၤဒီးပှၤဂၤ အဂ့ၢ်န့ၣ် နတဲဘၣ်ပှၤဂၤသ့. နနီၣ်ဘၣ်က့ၤ တၢ်လဲၤခီဖျိလၢ ယဟိဝၤယွၤ မၤစၢၤအခ့အပှၤ လီၤလီၤဆီဆီန့ၣ် အိၣ်ဧါ. မ့ၢ်အိၣ်န့ၣ် တဲပၠးက့ၤပှၤဂၤ နတၢ်လဲၤခီဖျိ. ဒီပုၢ်ဝဲၢ်မုၣ်ခွါတဖၣ် မ့ၢ်နၢ်ဟူဘၣ် နတၢ်လဲၤခီဖျိ ဘၣ်ဃးဒီး နမၤယဟိဝၤယွၤ အတၢ်မၤ လၢအပူၤကွံာ်န့ၣ် အဝဲသ့ၣ် ကဒိးန့ၢ်ဘၣ် တၢ်ဂံၢ်တၢ်ဘါဒိၣ်မး.—ရိ ၁:၁၁, ၁၂.

ကျဲအဂၤတဘိလၢ နဟ့ၣ်ဂံၢ်ဟ့ၣ်ဘါ ပှၤဂၤသ့န့ၣ်မ့ၢ်ဝဲ တသ့ဖဲအသ့ နဂုာ်ကျဲးစၢး လဲၤထီၣ်တၢ်အိၣ်ဖှိၣ်လၢ တၢ်အိၣ်ဖှိၣ်အလီၢ်. နမ့ၢ်မၤဒ်န့ၣ်န့ၣ် နၤဒီးဒီပုၢ်ဝဲၢ်မုၣ်ခွါတဖၣ် ကဒိးန့ၢ်ဘၣ် တၢ်ဂံၢ်တၢ်ဘါ. ဒီပုၢ်ဝဲၢ်မုၣ် ခီနံၤ လၢပဖးဘၣ်အဂ့ၢ် လၢအခီၣ်ထံးန့ၣ် အတဲဝဲလၢ “ယလဲၤထီၣ်တၢ်အိၣ်ဖှိၣ်လၢ တၢ်အိၣ်ဖှိၣ်အလီၢ်န့ၣ် မၤစၢၤယၤဒ်သိး ယသးတဟးဂီၤ တဂ့ၤအဂီၢ်. လၢတၢ်အိၣ်ဖှိၣ်လီၢ်န့ၣ် ယဒိးန့ၢ်ဘၣ် ဒီပုၢ်ဝဲၢ်မုၣ်ခွါတဖၣ် အတၢ်အဲၣ် အါမးအဃိ ယသးတလီၤစၢ်ဘၣ်. ယပာ်ဖျါထီၣ်လၢ ယပာ်လုၢ်ပာ်ပှ့ၤ အဝဲသ့ၣ် ခီဖျိ ယဟ့ၣ်အဝဲသ့ၣ် တၢ်ဟ့ၣ်ဆံးဆံးဖိ. ဒီးယပာ်လီၤသးလၢ ယကဂုာ်ကျဲးစၢး ဆဲးမၤ နီၢ်သးအတၢ်မၤတဖၣ်အံၤ ဃုာ်ဒီးဒီပုၢ်ဝဲၢ်မုၣ်ခွါတဖၣ်.”

ယဟိဝၤယွၤ ပာ်လုၢ်ပာ်ပှ့ၤ တၢ်လၢနမၤတ့ၢ်တဖၣ်

လံာ်စီဆှံ ပာ်ဖျါထီၣ်န့ၢ်ပှၤ ဘၣ်ဃးဒီး ပှၤလၢအမၤ ယဟိဝၤယွၤ အတၢ်မၤ တန့ၢ်ဒ်သိး လၢညါလၢၤဘၣ် သနာ်က့ ယဟိဝၤယွၤ ပာ်လုၢ်ပာ်ပှ့ၤ အဝဲသ့ၣ်ဒံး. အဒိ စီၤစူၤမ့းအိၣ်န့ၣ် အကဲဝဲ ပှၤအံၣ်စရ့လးဖိတဂၤ ဒီးအသးပှၢ်ထီၣ်လံ. ဖဲယ့ၣ်ၡူး အိၣ်ဖျဲၣ်ထီၣ်အခါန့ၣ် အအိၣ်မူဒံး. ဒီးဖဲအလဲၤလၢ တၢ်လုၢ်ဟံၣ်အခါ အကထံၣ်ဘၣ်ဝဲ ပှၤသးစၢ်တဖၣ်လၢ အမၤတၢ်မၤ အရ့ဒိၣ်လၢ တၢ်လုၢ်ဟံၣ်. မ့မ့ၢ် စီၤစူၤမ့းအိၣ် ဟီမီၤ. ပမ့ၢ်ကွၢ်လၢ ပှၤဟီၣ်ခိၣ်ဖိ အတၢ်ထံၣ်န့ၣ် ခီဖျိလၢ အသးပှၢ်ထီၣ်လံအဃိ အလုၢ်အပှ့ၤ တအိၣ်အါအါလၢၤဘၣ်. ဘၣ်ဆၣ် ယဟိဝၤယွၤ တထံၣ် စီၤစူၤမ့းအိၣ် ဒ်န့ၣ်ဘၣ်. ယဟိဝၤယွၤ ထံၣ်အီၤ ဒ်အမ့ၢ် “ပှၤအတီအလိၤ, အပျံၤကစၢ်ယွၤ” အဃိ ယဟိဝၤယွၤ ဆိၣ်ဂ့ၤအီၤခီဖျိ အဒုးထံၣ်အီၤ ဖိသၣ်ယ့ၣ်ၡူး. ယဟိဝၤယွၤ သူဝဲ စီၤစူၤမ့းအိၣ် လၢကတဲဆိပာ်စၢၤ ဘၣ်ဃးဒီး ဖိသၣ်ယ့ၣ်ၡူးအံၤ ကကဲထီၣ်ဝဲ မ့းၡံအၤ. (လူၤ ၂:၂၅-၃၅) အဃိ ပသ့ၣ်ညါဘၣ်လၢ ယဟိဝၤယွၤ တသးစၢၢ်ဆၢလၢ စီၤစူၤမ့းအိၣ် အနီၢ်ခိဂံၢ်ဘါဘၣ်. အထံၣ်ဝဲလၢ စီၤစူၤမ့းအိၣ်န့ၣ် အိၣ်ဒီး တၢ်နာ်ဂၢၢ်ကျၢၤ “ဒီးသးစီဆှံ အိၣ်ဝဲလၢအလိၤ.”

နၤစ့ၢ်ကီး နမၤယဟိဝၤယွၤ အတၢ်မၤ မ့ၢ်တန့ၢ်ဒ်သိး လၢညါလၢၤဘၣ်န့ၣ် နာ်သပှၢ်တၢၢ်လၢ ယဟိဝၤယွၤ ဆဲးပာ်လုၢ်ပာ်ပှ့ၤနၤဒံး. ယဟိဝၤယွၤ မုၢ်လၢ်ဝဲလၢ “ပှၤကဟ့ၣ်တၢ် ဒ်တၢ်လၢအအိၣ်ဒီး အဝဲသ့ၣ်အသိးလီၤ. အတမုၢ်လၢ်ဝဲလၢ ပှၤကဟ့ၣ်တၢ် အါန့ၢ်ဒံး တၢ်လၢအအိၣ်ဒီး အဝဲသ့ၣ်ဘၣ်.”—၂ ကရံၣ် ၈:၁၂.

အဃိ ဂုာ်ကျဲးစၢးမၤ တၢ်လၢနမၤသ့. အဒိ တၢ်စံၣ်တဲၤတဲလီၤတၢ်မၤ အကျိၤအကျဲန့ၣ် အိၣ်ဝဲ အကလုာ်ကလုာ်. နမၤမ့ၢ်န့ၢ် ထဲတစဲးဖိသနာ်က့ ဂုာ်ကျဲးစၢးမၤလၢ နမၤသ့တခါခါ. နကိးအိၣ်သကိး ဒီပုၢ်ဝဲၢ်မုၣ်ခွါ တဂၤဂၤလၢ လီတဲစိ မ့တမ့ၢ် ကွဲးအိၣ်သကိးအီၤလံာ်သ့. ဖဲဒီပုၢ်ဝဲၢ်မုၣ်ခွါ ဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ လၢအဟဲလၢ ပှၤလၢအမၤတ့ၢ် ယဟိဝၤယွၤ အတၢ်မၤလၢ အနံၣ်အါမး အအိၣ်အခါ အဝဲသ့ၣ် ဒိးန့ၢ်ဘၣ် အဘျုးအါမး. အဃိ နမ့ၢ်မၤ တၢ်ယိယိဖိ ဒ်အံၤန့ၣ် ဒီပုၢ်ဝဲၢ်မုၣ်ခွါတဖၣ် ကန့ၢ်ဂံၢ်န့ၢ်ဘါဒိၣ်မး.

ပှၤတနီၤန့ၣ် အနီၢ်ခိဂံၢ်ဘါ တအိၣ်လၢလၢပှဲၤပှဲၤဘၣ်. ဖးကွၢ် တၢ်လဲၤခီဖျိ တခါလၢ ကီၢ်အၤဖြံၤကၤမုၢ်ထီၣ် လၢအအိၣ်လၢ တၢ်လွံၢ်နၢၣ် လၢအခိၣ်တီမ့ၢ် “လံာ်စီဆှံမၤစၢၤဝဲ ပှၤတဂၤအတၢ်အိၣ်မူ.”

လံာ်စီဆှံ တဲဝဲလၢ “ကစၢ်ယွၤန့ၣ် မ့ၢ်ပှၤတီပှၤလိၤလီၤ. လၢတၢ်န့ၣ်အဃိ အဝဲတသးပ့ၤနီၣ် သုတၢ်မၤဒီးတၢ်အဲၣ်လၢ သုပာ်ဖျါထီၣ်လၢ အမံၤအဖီခိၣ် ခီဖျိလၢ သုမၤစၢၤတ့ၢ် ပှၤစီဆှံတဖၣ် ဒီးသုဆဲးမၤစၢၤ အဝဲသ့ၣ်အဃိဘၣ်.” (ဧ့ၤ ၆:၁၀) အဃိ သ့ၣ်နီၣ်ထီၣ်လၢ နတၢ်နာ်, နတၢ်သးတီ ဒီးနတၢ်တူၢ်န့ၢ်ခီၣ်ကဲန့ၣ် ကဲထီၣ်တၢ်ဂံၢ်တၢ်ဘါလၢ ပှၤဂၤအဂီၢ်ဒိၣ်မး.

ဆဲးမၤစၢၤပှၤဂၤ တသ့ဖဲအသ့

ပှၤဃုသ့ၣ်ညါတၢ်တဖၣ် တဲဝဲလၢ ပှၤသးပှၢ်တဖၣ်လၢ အမၤစၢၤ ပှၤဂၤန့ၣ် ကကဲဘျုးလၢ အတၢ်အိၣ်ဆူၣ်အိၣ်ချ့, အတၢ်ဆိကမိၣ် ဒီးအသးသမူအဂီၢ်.

နဂုာ်ကျဲးစၢး မၤစၢၤပှၤဂၤ သနာ်က့ နသးကပှၢ်ထီၣ် ဒီးနကအိၣ်ဒီး တၢ်ကီတၢ်ခဲလၢ ပှၤသးပှၢ်တဖၣ် ထံၣ်ဘၣ်ဝဲဒံး. ဘၣ်ဆၣ် ကစၢ်ယွၤ အဘီမုၢ် ကမၤလီၤမၢ်ကွံၢ်ဝဲ တၢ်ဒဲးဘး ဒီးတၢ်သံတၢ်ပှၢ်လၢ ပန့ၢ်သါဘၣ်အံၤ သပှၢ်တၢၢ်.—ရိ ၅:၁၂.

ခဲအံၤ တၢ်လၢနမၤ လၢယဟိဝၤယွၤအဂီၢ် လၢအပၣ်ဃုာ်ဒီး နမၤစၢၤပှၤဂၤလၢ ကသ့ၣ်ညါထီၣ် ယဟိဝၤယွၤန့ၣ် မၤစၢၤနၤဒ်သိး နကဆဲး မၤဂၢၢ်ကျၢၤဒိၣ်ထီၣ် နတၢ်မုၢ်လၢ် ဒီးအကဲဘျုးလၢ နတၢ်အိၣ်ဆူၣ်အိၣ်ချ့ အဂီၢ်စ့ၢ်ကီး. ဒီပုၢ်ဝဲၢ်မုၣ်ခွါသးပှၢ်တဖၣ် ပအဲၣ်ဒိးလၢ သုကသ့ၣ်ညါလၢ တၢ်လၢသုမၤလၢ ယဟိဝၤယွၤ အဂီၢ်န့ၣ် အပာ်လုၢ်ပာ်ပှ့ၤဝဲဒိၣ်မး. ဒီးသုတၢ်နာ်လၢ အလီၤကွၢ်လိန့ၣ် ပပာ်လုၢ်ပာ်ပှ့ၤအီၤဒိၣ်မး.