မိၢ်ပၢ်သ့ၣ်ဧၢ ဒ်သိးနဖိတဖၣ် ကတုၤထီၣ်ထီၣ်ဘးလၢ ကဒိးဘျၢထံအဂီၢ် မ့ၢ်နမၤစၢၤအဝဲသ့ၣ်ဧါ
“ခဲကနံၣ်အံၤဘၣ်မနုၤအဃိ နမၤယံာ်မၤနီၢ်နသးလဲၣ်. ဂဲၤဆၢထၢၣ်ဒီးဒိးဘျၢနသးလၢထံ” တက့ၢ်.—မၤတၢ် ၂၂:၁၆, ခ့ခါစှီၤကျိာ်.
၁. တချုးလၢဖိတဖၣ် ဒိးဘျၢထံဒံးဘၣ်န့ၣ် ခရံာ်ဖိမိၢ်ပၢ်တဖၣ် အဲၣ်ဒိးသ့ၣ်ညါလီၤတံၢ်ဝဲ တၢ်ဂ့ၢ်မနုၤလဲၣ်.
ဖဲ ဘျါစၢၤ ဘြဲ ပာ်လီၤအသးလၢ ကဒိးဘျၢထံအခါ အဝဲတဲဝဲဒ်အံၤလီၤ. “ယအဲၣ်ဒိးဒိးဘျၢထံန့ၣ် ယတဲပၠးယမိယပါ တဘျုးလါညါ. အဝဲသ့ၣ်တဲသကိး တၢ်ဒိးဘျၢထံအဂ့ၢ်ဒီးယၤလီၤ. ဘၣ်ဆၣ် အဝဲသ့ၣ်အဲၣ်ဒိးလၢ ယကနၢ်ပၢၢ်လၢ တၢ်ဒိးဘျၢထံ မ့ၢ်တၢ်လၢအရ့ဒိၣ်ထဲလဲၣ်အဂ့ၢ်န့ၣ်လီၤ. လၢခံဖဲ ၁၉၃၄ လါဒံၣ်စ့ဘၢၣ် ၃၁ သီန့ၣ် မ့ၢ်မုၢ်နံၤလၢ အရ့ဒိၣ်ကတၢၢ်လၢယဂီၢ်လီၤ.” မုၢ်မဆါတနံၤအံၤစ့ၢ်ကီး မိၢ်ပၢ်တဖၣ်အဲၣ်ဒိး မၤစၢၤအဖိတဖၣ် ဒ်သိးကမၤတၢ်ဆၢတဲာ်လၢအဂ့ၤကတၢၢ်လီၤ. တၢ်ဂ့ၢ်အဂ့ၤလၢ အဖိကဘၣ်အိၣ်ခိးဝဲလၢ ကဒိးဘျၢထံအဂီၢ် မ့ၢ်တအိၣ်ဘၣ် ဒီးဖိတဖၣ်မ့ၢ်မၤယံာ်မၤနီၢ်အသးလၢ ကဒိးဘျၢထံအဂီၢ်န့ၣ် အတၢ်ရ့လိာ်သးဒီး ယဟိဝၤယွၤဘၣ်ဒိဝဲသ့လီၤ. (ယၤကိာ် ၄:၁၇) မိၢ်ပၢ်လၢအအိၣ်ဒီး တၢ်ကူၣ်သ့န့ၣ် တချုးလၢအဖိဒိးဘျၢထံဒံးဘၣ်အခါ အဝဲသ့ၣ်အဲၣ်ဒိးသ့ၣ်ညါလီၤတံၢ်ဝဲလၢ မ့ၢ်အဖိတဖၣ်ကတဲာ်ကတီၤအသးလၢ ကကဲထီၣ်ခရံာ် အပျဲၢ်အဘီၣ်လံဧါ.
၂. (က) ကဝီၤအပှၤကွၢ်တၢ်တနီၤ ပာ်သူၣ်ပာ်သးဝဲ တၢ်ကီတၢ်ခဲမနုၤတဖၣ်လဲၣ်. (ခ) တၢ်မၤလိအံၤအပူၤ ပကတဲသကိးတၢ်ဂ့ၢ်မနုၤတဖၣ်လဲၣ်.
၂ ကဝီၤအပှၤကွၢ်တၢ်တနီၤ ပာ်သူၣ်ပာ်သးဝဲလၢ ပှၤသးစၢ်လၢအသးအိၣ် တဆံနွံနံၣ်တုၤလၢခံဆံဘျဲၣ်ဃၣ်ဃၣ် လၢအဒိၣ်ထီၣ်လၢ တၢ်မ့ၢ်တၢ်တီအပူၤ ဘၣ်ဆၣ်တဒိးဘျၢဘၣ်ထံဒံးဘၣ်န့ၣ် အိၣ်ဝဲအါမးလီၤ. ပှၤသးစၢ်တဖၣ်အံၤ အဝဲသ့ၣ်လဲၤထီၣ်တၢ်အိၣ်ဖှိၣ်ရိဖှိၣ်, လဲၤစံၣ်တဲၤတဲလီၤတၢ် ဒီးတဲလီၤအသးလၢ အကဲယဟိဝၤပှၤအုၣ်အသးလီၤ. ဘၣ်ဆၣ် လၢတၢ်ဂ့ၢ်တမံၤမံၤအဃိ အဝဲသ့ၣ် တဟ့ၣ်လုၢ်ထီၣ်အသးလၢ ယဟိဝၤယွၤအအိၣ် ဒီးဒိးဘျၢထံဒံးဘၣ်. ဒီးအဝဲသ့ၣ်တနီၤန့ၣ် တဒိးဘျၢထံဒံးဘၣ် မ့ၢ်လၢအမိၢ်အပၢ် ဆိကမိၣ်လၢ အတတုၤထီၣ်ထီၣ်ဘးလၢ ကဒိးဘျၢထံဒံးဘၣ်အဃိလီၤ. လၢတၢ်မၤလိအံၤအပူၤ ပကတဲသကိးတၢ်ဂ့ၢ်လွံၢ်ခါလၢ အတြီဝဲမိၢ်ပၢ်တဖၣ်လၢ ကဟ့ၣ်ဂံၢ်ဟ့ၣ်ဘါအဖိတဖၣ်လၢ ကဒိးဘျၢထံအဂီၢ်န့ၣ်လီၤ.
မ့ၢ်ယဖိအသးစၢ်တလၢဒံးဧါ
၃. ဘျါစၢၤ အမိၢ်အပၢ် ဘၣ်ယိၣ်တၢ်မနုၤလဲၣ်.
၃ ဒ်ပတဲတ့ၢ်လၢထးအသိး ဘျါစၢၤအမိၢ်အပၢ်န့ၣ် ဘၣ်ယိၣ်ဝဲလၢ မ့ၢ်အဖိမုၣ်န့ၣ်အသးစၢ်တလၢ လၢကနၢ်ပၢၢ်ဝဲတၢ်ဒိးဘျၢထံအဂ့ၢ်ဧါ. ဒီးတၢ်ဆၢတဲာ်အံၤ မ့ၢ်တၢ်လၢအရ့ဒိၣ်ဒိၣ်မးန့ၣ် မ့ၢ်အဖိမုၣ်နၢ်ပၢၢ်ဝဲစ့ၢ်ကီးဧါ. ဖိတဖၣ် ဟ့ၣ်လုၢ်ထီၣ်အသးလၢ ယဟိဝၤယွၤအအိၣ်န့ၢ်လံဧါ တန့ၢ်ဒံးဘၣ်ဧါန့ၣ် မိၢ်ပၢ်သ့ၣ်တဖၣ် သ့ၣ်ညါဝဲကသ့ဒ်လဲၣ်.
၄. ယ့ၣ်ၡူး အတၢ်မၤလိာ်လၢ မးသဲ ၂၈:၁၉, ၂၀ န့ၣ် မၤစၢၤမိၢ်ပၢ်လၢ မုၢ်မဆါတနံၤအံၤကသ့ဒ်လဲၣ်.
၄ ဖး မးသဲ ၂၈:၁၉, ၂၀ တက့ၢ်. ပှၤတဂၤကြၢးဘျၢထံလၢ အသးနံၣ်အိၣ်ထဲလဲၣ်န့ၣ် လံာ်စီဆှံတပာ်ပနီၣ်ဝဲဘၣ်. ဘၣ်ဆၣ် မိၢ်ပၢ်တဖၣ် မ့ၢ်ဆိကမိၣ်ထံဝဲ တၢ်ကဲထီၣ်ခရံာ်အပျဲၢ်ဘီၣ်အခီပညီ လီၤတံၢ်လီၤဆဲးန့ၣ် ကကဲဘျုးဝဲလီၤ. လၢ မးသဲ ၂၈:၁၉ အပူၤ တၢ်ကတိၤလၢ ကြံးအကျိာ်လၢ ဘၣ်တၢ်ကွဲးကျိာ်ထံက့ၤအီၤလၢ “ဒုးကဲထီၣ် . . . ယပျဲၢ်ယဘီၣ်” န့ၣ်အခီပညီ မ့ၢ်ဝဲဖဲပသိၣ်လိပှၤတဂၤဂၤအခါ ပအိၣ်ဒီးဖီတၢၣ်လၢ ကမၤစၢၤအီၤဒ်သိး ကကဲထီၣ်ပှၤမၤလိတၢ်ဖိ မ့တမ့ၢ် ပျဲၢ်ဘီၣ်တဂၤလီၤ. ပျဲၢ်ဘီၣ်တဂၤန့ၣ် မ့ၢ်ပှၤတဂၤလၢ အမၤလိတၢ် ဒီးနၢ်ပၢၢ်တၢ်လၢ ယ့ၣ်ၡူးသိၣ်လိဝဲတဖၣ် ဒီးအဲၣ်ဒိးဒိကနၣ်ဝဲအကလုၢ်လီၤ. လၢတၢ်န့ၣ်အဃိ မိၢ်ပၢ်တဖၣ် စးထီၣ်လၢအဖိအိၣ်ဖျဲၣ်ထီၣ်လံၤလံၤန့ၣ် အဝဲသ့ၣ်ကြၢးသိၣ်လိအဖိ ဒီးကြၢးအိၣ်ဒီးဖီတၢၣ်လၢ ကမၤစၢၤအဖိတဖၣ် ဒ်သိးကဟ့ၣ်လုၢ်ထီၣ်အသးလၢ ယဟိဝၤယွၤအအိၣ် ဒီးကဲထီၣ်ခရံာ်အပျဲၢ်အဘီၣ်အဂီၢ်န့ၣ်လီၤ. မ့မ့ၢ်ဖိသၣ်အီနုၢ်တဖၣ်န့ၣ် တတုၤထီၣ်ထီၣ်ဘးလၢ ကဒိးဘျၢထံအဂီၢ်ဒံးဘၣ်. ဘၣ်ဆၣ် လံာ်စီဆှံပာ်ဖျါထီၣ်ဝဲလၢ ဖိသၣ်ဆံးဆံးဖိတဖၣ်ဒၣ်လဲာ် အဝဲသ့ၣ် နၢ်ပၢၢ်ဒီးအဲၣ် လံာ်စီဆှံတၢ်မ့ၢ်တၢ်တီသ့လီၤ.
၅, ၆. (က) လံာ်စီဆှံပာ်ဖျါထီၣ်ဝဲ စီၤတံၤမသ့းအဂ့ၢ်န့ၣ် သိၣ်လိပှၤဘၣ်ဃးဒီး တၢ်ဒိးဘျၢထံအဂ့ၢ်ဒ်လဲၣ်. (ခ) ကျဲအဂ့ၤကတၢၢ်တဘိလၢ မိၢ်ပၢ်တဖၣ် ကမၤစၢၤအဖိန့ၣ် မ့ၢ်မနုၤလဲၣ်.
၅ စီၤတံၤမသ့း မ့ၢ်ပှၤတဂၤလၢ မၤယဟိဝၤယွၤအတၢ်မၤ ဖဲအသးစၢ်အခါလီၤ. တၢ်မၢဖိပီလူးတဲဝဲလၢ စီၤတံၤမသ့း စးထီၣ်မၤလိဝဲ ယွၤအကလုၢ်ကထါ တၢ်မ့ၢ်တၢ်တီလၢ “မ့ၢ်ဖိဒံဖိသၣ်လံၤလံၤ” လီၤ. စီၤတံၤမသ့းအပၢ်န့ၣ် တဘူၣ်ထီၣ်ဘါထီၣ် ယဟိဝၤယွၤဘၣ်ဆၣ် အမိၢ်ဒီးအဖံန့ၣ် မၤစၢၤအီၤဒ်သိး အဝဲကအဲၣ်ယွၤအကလုၢ်ကထါလီၤ. လၢတၢ်န့ၣ်အဃိ အဝဲအိၣ်ဒီး တၢ်နာ်လၢအဂၢၢ်အကျၢၤလီၤ. (၂ တံၤမသ့း ၁:၅; ၃:၁၄, ၁၅) ဖဲအဝဲတုၤထီၣ်ထီၣ်ဘးလၢ ကဟံးထီၣ်ဖီၣ်ထီၣ်မူဒါလီၤဆီလၢ တၢ်အိၣ်ဖှိၣ်ပူၤအခါ ဘၣ်သ့ၣ်သ့ၣ် ကဘၣ်ဖဲအဝဲဒိၣ်ထီၣ်သီ မ့တမ့ၢ် အဝဲကအိၣ် ၂၀ ဘျဲၣ်အခါလီၤ.—မၤတၢ် ၁၆:၁-၃.
၆ ဖိသၣ်တဂၤဒီးတဂၤန့ၣ် တလီၤဂာ်လိာ်အသးဘၣ်. တနီၤန့ၣ်အသးဆးချ့ ဒီးတနီၤန့ၣ်အသးဆးတချ့ဘၣ်. လၢတၢ်န့ၣ်အဃိ တနီၤန့ၣ် နၢ်ပၢၢ်တၢ်မ့ၢ်တၢ်တီ, မၤတၢ်ဆၢတဲာ်လၢအဘၣ် ဒီးအဲၣ်ဒိးဒိးဘျၢထံ ဖဲအဝဲသ့ၣ်အသးစၢ်ဒံးအခါန့ၣ်လီၤ. ဘၣ်ဆၣ်တနီၤနီၤန့ၣ် တုၤလၢအဝဲသ့ၣ်အနီၢ်ဒိၣ်ထီၣ်တစဲးမး တုၤထီၣ်ထီၣ်ဘးလၢ ကဒိးဘျၢထံလီၤ. မိၢ်ပၢ်လၢအအိၣ်ဒီးတၢ်ကူၣ်သ့န့ၣ် တမၢဆူၣ်အဖိတဖၣ်လၢ ကဒိးဘျၢထံအဂီၢ်ဘၣ်. လၢတၢ်န့ၣ်အလီၢ် အဝဲသ့ၣ်ကကွၢ်အဖိအတၢ်အိၣ်သး ဒီးဒ်အဖိတဖၣ် အတၢ်သ့တၢ်ဘၣ်အိၣ်ဝဲအသိး အဝဲသ့ၣ်ကမၤစၢၤဝဲဒ်သိး အဖိတဂၤစုာ်စုာ် ကလဲၤထီၣ်လဲၤထီလၢ နီၢ်သးတကပၤအဂီၢ်လီၤ. ဖဲဖိတဖၣ်မၤထွဲဝဲဒ် ကတိၤဒိ ၂၇:၁၁ (ဖးတက့ၢ်.) အခါမိၢ်ပၢ်တဖၣ် သးခုဝဲဒိၣ်မးလီၤ. ဘၣ်ဆၣ် မိၢ်ပၢ်တဖၣ်ကဘၣ်သ့ၣ်နီၣ်ထီၣ်လၢ ဖဲအဝဲသ့ၣ်မၤစၢၤအဖိအခါန့ၣ် အတၢ်တိာ်ပာ်ကဘၣ်မ့ၢ် ဒ်သိးအဖိတဖၣ် ကကဲထီၣ်ခရံာ်အပျဲၢ်အဘီၣ်အဂီၢ်လီၤ. လၢတၢ်န့ၣ်အဃိ အဝဲသ့ၣ်ကြၢးသံကွၢ်လီၤအသးလၢ ‘ယဖိန့ၣ် ဒ်သိးကဒိးဘျၢထံအဂီၢ် မ့ၢ်အဝဲနၢ်ပၢၢ်လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိလံဧါ.’
မ့ၢ်ယဖိအတၢ်သ့ၣ်ညါနၢ်ပၢၢ် လံာ်စီဆှံအိၣ်ထဲလဲၣ်
၇. ပှၤတဂၤကဒိးဘျၢထံအဂီၢ် ကဘၣ်သ့ၣ်ညါနၢ်ပၢၢ် လံာ်စီဆှံအဂ့ၢ်လၢ အကဆူးကတံာ်ခဲလၢာ်ဧါ. တဲပၠးတက့ၢ်.
ခရံာ်အပျဲၢ်အဘီၣ် ကိးဂၤဒဲးန့ၣ် အဝဲသ့ၣ်ဒိးဘျၢထံမ့ၢ်ဝံၤဘၣ်ဆၣ် ကဘၣ်ဆဲးမၤလိဒံးတၢ်လီၤ
၇ မိၢ်ပၢ်တဖၣ် ဖဲအသိၣ်လိအဖိတဖၣ်အခါ အဝဲသ့ၣ်မၤစၢၤ အဖိတဖၣ်ဒ်သိးကသ့ၣ်ညါထီၣ် တၢ်မ့ၢ်တၢ်တီဂ့ၤဂ့ၤလီၤ. ဒီးတၢ်လၢအဖိမၤလိဘၣ်ဝဲတဖၣ်န့ၣ် ကထိၣ်ဟူးထိၣ်ဂဲၤအသး ဒ်သိးကဟ့ၣ်လုၢ်ထီၣ်အသးဆူ ကစၢ်ယွၤအအိၣ်လီၤ. ဘၣ်ဆၣ်ဒ်သိးအဝဲသ့ၣ် ကဒိးဘျၢထံအဂီၢ်တလိၣ်လၢ အဝဲသ့ၣ်ကဘၣ် သ့ၣ်ညါနၢ်ပၢၢ်လံာ်စီဆှံ အဂ့ၢ်အကျိၤလၢအကဆူးကတံာ် ကိးခါဒဲးဘၣ်. ခရံာ်အပျဲၢ်အဘီၣ်တဖၣ် ဒိးဘျၢထံဝံၤဒၣ်လဲာ် ကဘၣ်ဆဲးမၤလိဒံးတၢ်ကိးဂၤဒဲးလီၤ. (ဖး ကလီးစဲ ၁:၉, ၁၀ တက့ၢ်.) မ့မ့ၢ်ဒ်န့ၣ်န့ၣ် ဒ်သိးပှၤတဂၤ ဒိးဘျၢထံကန့ၢ်အဂီၢ် ကဘၣ်သ့ၣ်ညါနၢ်ပၢၢ် လံာ်စီဆှံအဂ့ၢ်ထဲလဲၣ်.
၈, ၉. တၢ်ကဲထီၣ်အသးဒီး ပှၤပၢၤဃိာ်ဖိ လၢအအိၣ်လၢ ဝ့ၢ်ဖံလံးပံၤဒ်လဲၣ် ဒီးပမၤလိန့ၢ်တၢ်လၢအအိၣ်ကသ့ဒ်လဲၣ်.
၈ မိၢ်ပၢ်တဖၣ်ဟံးန့ၢ် တၢ်မၤလိလၢ ဟံၣ်ဖိဃီဖိလၢပျၢၤတဒူၣ် အဒိအတဲာ်သ့ဝဲလီၤ. (မၤတၢ် ၁၆:၂၅-၃၃) ဖဲ ခ.န ၅၀ န့ၣ် စီၤပီလူးလဲၤဝဲ မံးၡ့ၣ်နရ့ၣ် အတၢ်လဲၤခံဘျီတဘျီလၢ ဝ့ၢ်ဖံလံးပံၤလီၤ. ဖဲအဝဲဒီးစီၤစံလၤ အိၣ်ဖဲန့ၣ်အခါ ပှၤပာ်ဒ့ၣ်ပာ်ကမၣ် အဝဲသ့ၣ်, ပှၤဖီၣ်အီၤဒီးပၢနုာ်အဝဲသ့ၣ် လၢဃိာ်ပူၤလီၤ. လၢမုၢ်နၤအဆၢကတီၢ်န့ၣ် ဟီၣ်ခိၣ်ဟူးဖးဒိၣ် ဒီးဃိာ်အပဲတြီ အိးထီၣ်အသးခဲလၢာ်လီၤ. ပှၤပၢၤဃိာ်ဖိတဂၤ ဆိကမိၣ်ဝဲလၢ ပှၤဃိာ်ဖိတဖၣ် ဃ့ၢ်ဟးထီၣ်ကွံာ်ဝဲခဲလၢာ်အဃိ အဝဲကမၤသံလီၤအသးလီၤ. ဘၣ်ဆၣ် စီၤပီလူးတြီအီၤလီၤ. စီၤပီလူးဒီးစီၤစံလၤန့ၣ် သိၣ်လိဝဲပှၤပၢၤဃိာ်ဖိ ဒီးအဟံၣ်ဖိဃီဖိတဖၣ် လၢယ့ၣ်ၡူးအဂ့ၢ်လီၤ. အဝဲသ့ၣ်နာ်ဝဲ ယ့ၣ်ၡူးအဂ့ၢ်လၢ အမၤလိဘၣ်ဝဲတဖၣ် ဒီးသ့ၣ်ညါဝဲလၢ ကဘၣ်ဒိကနၣ် ယ့ၣ်ၡူးအကလုၢ်လီၤ. လၢတၢ်န့ၣ်အဃိ အဝဲသ့ၣ်ဒိးဘျၢထံတဘျီဃီလီၤ. ပဟံးန့ၢ်တၢ်မၤလိလၢ တၢ်လဲၤခီဖျိအံၤ ကသ့ဒ်လဲၣ်.
၉ ပှၤပၢၤဃိာ်န့ၣ် ဘၣ်သ့ၣ်သ့ၣ် အဝဲကမ့ၢ်တ့ၢ် ရိမ့ၤအသုးဖိတဂၤလီၤ. အဝဲတသ့ၣ်ညါ ယွၤအကလုၢ်ကထါဘၣ်. လၢတၢ်န့ၣ်အဃိ ဒ်သိးအဝဲကကဲထီၣ်ခရံာ်ဖိတဂၤအဂီၢ် ကဘၣ်မၤလိ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိတဖၣ်လီၤ. တကးဒံးဘၣ်အဝဲ ကဘၣ်နၢ်ပၢၢ်တၢ်လၢ ယဟိဝၤယွၤမၢအခ့အပှၤမၤဝဲတဖၣ် ဒီးကဘၣ်သးအိၣ်ဒိကနၣ် ယ့ၣ်ၡူးအတၢ်သိၣ်လိနဲၣ်လိလီၤ. ဖဲတၢ်ဆၢကတီၢ်ဖုၣ်ကိာ်အတီၢ်ပူၤ တၢ်လၢအဝဲမၤလိဘၣ်ဝဲတဖၣ်န့ၣ် ထိၣ်ဟူးထိၣ်ဂဲၤထီၣ်အီၤလၢ အကဒိးဘျၢထံလီၤ. အဝဲဒိးဘျၢထံဝံၤဘၣ်ဆၣ် အကဘၣ်ဆဲးမၤလိအါထီၣ်ဒံးတၢ်လီၤ. လၢတၢ်န့ၣ်အဃိ ဖဲနဖိတဲနၤလၢ အဝဲအဲၣ်ဒိးဒိဘျၢထံ ခီဖျိလၢအအဲၣ်ယဟိဝၤယွၤ ဒီးအဲၣ်ဒိးဒိကနၣ်ယွၤအကလုၢ်အခါ နကမၤဒ်လဲၣ်. ဘၣ်သ့ၣ်သ့ၣ် နကမၢအဝဲလဲၤတဲတၢ်ဒီး တၢ်အိၣ်ဖှိၣ်သးပှၢ်တဖၣ် ဒ်သိးအဝဲသ့ၣ်ကဆၢတဲာ်လၢ မ့ၢ်အဝဲတုၤထီၣ်ထီၣ်ဘးလၢ ကဒိးဘျၢထံလံဧါန့ၣ်လီၤ.a (ကွၢ်တၢ်ဂ့ၢ်အဘျဲၣ်တက့ၢ်.) ဒ်ခရံာ်ဖိအဂၤလၢ အဒိးဘျၢထံဝံၤတဖၣ်အသိး အဝဲကဘၣ်ဆဲးမၤလိအါထီၣ် ယဟိဝၤယွၤအဂ့ၢ်လၢ အတၢ်အိၣ်မူအပူၤထီဘိလီၤ.—ရိမ့ၤ ၁၁:၃၃, ၃၄.
တၢ်ကူၣ်ဘၣ်ကူၣ်သ့လၢအဂ့ၤကတၢၢ်လၢ ယဖိအဂီၢ်န့ၣ်မ့ၢ်မနုၤလဲၣ်
၁၀, ၁၁. (က) မိၢ်ပၢ်တနီၤ ဆိကမိၣ်ဝဲဒ်လဲၣ်. (ခ) တၢ်လၢကဒီသဒၢ ဖိတဖၣ်န့ၣ် မ့ၢ်မနုၤလဲၣ်.
၁၀ မိၢ်ပၢ်တနီၤန့ၣ် ဆိကမိၣ်ဝဲလၢ အဖိမ့ၢ်အိၣ်ဒီး တၢ်ကူၣ်ဘၣ်ကူၣ်သ့ ဒီးမ့ၢ်အိၣ်ဒီး တၢ်မၤလၢအဂ့ၤမး ကြၢးဒိးဘျၢထံလီၤ. ဘၣ်သ့ၣ်သ့ၣ် အဝဲသ့ၣ် ကဆိကမိၣ်ဝဲလၢ အမၤဝဲဒ်အံၤန့ၣ် မ့ၢ်တၢ်လၢအဘၣ်လီၤ. ဘၣ်ဆၣ် အဝဲသ့ၣ် ကြၢးသံကွၢ် လီၤအသးလၢ ‘ယဖိမ့ၢ်မၤဝဲဒ်န့ၣ်န့ၣ် ကကဲဘျုးလၢ အတၢ်အိၣ်မူပူၤ နီၢ်နီၢ်ဧါ. မ့ၢ်တၢ်ဆၢတဲာ်အံၤ လီၤပလိာ်လိာ်အသးဒီး လံာ်စီဆှံဧါ. ယဟိဝၤယွၤအဲၣ်ဒိးလၢ ပကသူ ပတၢ်အိၣ်မူဒ်လဲၣ်.’—ဖး စံၣ်တဲၤတဲလီၤတၢ် ၁၂:၁ တက့ၢ်.
၁၁ တၢ်လၢအရ့ဒိၣ်ကတၢၢ်န့ၣ် နကဘၣ်သ့ၣ်နီၣ်ထီၣ်လၢ ဟီၣ်ခိၣ်ဒီးတၢ်အိၣ်လၢအပူၤတဖၣ်န့ၣ် ထီဒါလိာ်အသးဒီး ယဟိဝၤယွၤအတၢ်ဘၣ်သး ဒီးအတၢ်ဆိကမိၣ်လီၤ. (ယၤကိာ် ၄:၇, ၈; ၁ ယိၤဟၣ် ၂:၁၅-၁၇; ၅:၁၉) တၢ်ရ့လိာ်သးဒီးယဟိဝၤယွၤ ဘူးဘူးတံၢ်တံၢ်န့ၣ် မ့ၢ်ဝဲတၢ်ဒီသဒၢအဂ့ၤကတၢၢ်လၢ ကဒီသဒၢနဖိလၢ မုၣ်ကီၤလံၢ် ဒီးအတၢ်ရဲၣ်တၢ်ကျဲၤ ဒီးဟီၣ်ခိၣ်အတၢ်ဆိကမိၣ်လၢ အတဂ့ၤတဖၣ်န့ၣ်လီၤ. မိၢ်ပၢ်တဖၣ်မ့ၢ်ပာ်ဒိၣ်ဝဲ တၢ်ကူၣ်ဘၣ်ကူၣ်သ့ ဒီးတၢ်ဖံးတၢ်မၤလၢအဂ့ၤန့ၣ် အဖိတဖၣ်ကဆိကမိၣ်ဝဲလၢ တၢ်သ့ၣ်တဖၣ်အံၤ အရ့ဒိၣ်န့ၢ်ဒံး အဝဲသ့ၣ်ကအိၣ်ဒီး တၢ်ရ့လိာ်သးဒီးယဟိဝၤယွၤ ဘူးဘူးတံၢ်တံၢ်လီၤ. အဝဲသ့ၣ် မ့ၢ်ဆိကမိၣ်ဝဲဒ်န့ၣ်န့ၣ် ကဲထီၣ်တၢ်ဘၣ်ယိၣ်ဒိၣ်မးလီၤ. ဒ်မိၢ်ပၢ်လၢအိၣ်ဒီးတၢ်အဲၣ်တၢ်ကွံတဂၤအသိး မ့ၢ်နအဲၣ်ဒိးလၢနဖိတဖၣ် ကဆိကမိၣ်ဝဲလၢ ဟီၣ်ခိၣ်အတၢ်ကူၣ်ဘၣ်ကူၣ်သ့တဖၣ် ကဟ့ၣ်အဝဲသ့ၣ် တၢ်သူၣ်ခုသးခုနီၢ်နီၢ်န့ၣ်ဧါ. ကျဲထဲတဘိလၢ ပကအိၣ်ဒီးတၢ်သူၣ်မံသးမုာ် ဒီးပကအိၣ်ဒီးတၢ်သူၣ်ခုသးခုနီၢ်နီၢ်န့ၣ် မ့ၢ်ဝဲပပာ်ယဟိဝၤယွၤလၢနီၣ်ဂံၢ်တၢလၢ ပတၢ်အိၣ်မူအပူၤန့ၣ်လီၤ.—ဖး စံးထီၣ်ပတြၢၤ ၁:၂, ၃ တက့ၢ်.
ယဖိမ့ၢ်မၤဘၣ် တၢ်ကမၣ်မီၤ
၁၂. ဘၣ်မနုၤအဃိ မိၢ်ပၢ်တနီၤဆိကမိၣ်ဝဲလၢ အဖိကြၢးဒိးဘျၢထံဖဲ အနီၢ်ဒိၣ်ထီၣ်တစဲးမးလဲၣ်.
၁၂ မိၢ်တဂၤတဲဝဲ ဘၣ်ဃးဒီးဘၣ်မနုၤအဃိ အဝဲတအဲၣ်ဒိးလၢ အဖိမုၣ်ဒိးဘျၢထံဘၣ်လဲၣ်န့ၣ်လီၤ. အဝဲတဲဝဲလၢ “ယကတဲဖျါထီၣ် တၢ်ဂ့ၢ်တခါအံၤဒုလီၤမဲာ်ဆှးဒိၣ်မး. ခီဖျိလၢ ယဘၣ်ယိၣ်တၢ်လၢ အဝဲကဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်ပူၤအဃိ ယတအဲၣ်ဒိးလၢ အဝဲကဘျၢထံဘၣ်.” ဒ်ဒီပုၢ်ဝဲၢ်မုၣ်တဂၤအံၤအသိး မိၢ်ပၢ်အါဂၤဆိကမိၣ်ဝဲလၢ အဖိတဖၣ်မ့ၢ်ဒိးဘျၢထံလၢ အနီၢ်ဒိၣ်ထီၣ်တစဲးမး အဝဲသ့ၣ်တမၤဘၣ် တၢ်ကမၣ်ဒိၣ်ဒိၣ်မုၢ်မုၢ်တဖၣ်ဘၣ်. (၁ မိၤၡ့ ၈:၂၁; ကတိၤဒိ ၂၂:၁၅) မိၢ်ပၢ်တဖၣ်အံၤ ကဆိကမိၣ်ဘၣ်ဝဲလၢ အဖိမ့ၢ်မၤကမၣ်တၢ်ဘၣ်ဆၣ် မ့ၢ်တဒိးဘျၢထံဒံးဘၣ်န့ၣ် ပှၤဟီထီၣ်ကွံာ်အီၤလၢ တၢ်အိၣ်ဖှိၣ်အပူၤတသ့ဘၣ်. ဘၣ်ဆၣ် တၢ်ဆိကမိၣ်ဒ်အံၤန့ၣ် ကမၣ်ဝဲလၢကျဲဒ်လဲၣ်.—ယၤကိာ် ၁:၂၂.
၁၃. ပှၤတဂၤမ့ၢ်တဒိးဘျၢထံဒံးဘၣ်န့ၣ် မ့ၢ်အဝဲကဘၣ်ဟ့ၣ်တၢ်စံးဆၢလၢ ယဟိဝၤယွၤအအိၣ်ဧါ. တဲပၠးတက့ၢ်.
၁၃ ဖိတဖၣ် မ့ၢ်တတုၤထီၣ်ထီၣ်ဘးလၢ ကဟ့ၣ်လုၢ်ထီၣ်အသးလၢ ယဟိဝၤယွၤအအိၣ်ဒံးဘၣ်န့ၣ် မိၢ်ပၢ်တဖၣ် တအဲၣ်ဒိးလၢအဖိတဖၣ် ကဒိးဘျၢထံဘၣ်. ဘၣ်ဆၣ် အဝဲသ့ၣ် မ့ၢ်ဆိကမိၣ်ဝဲလၢ အဖိတဒိးဘျၢထံဒံးဘၣ်အဃိ တလိၣ်လၢအဖိကဘၣ်ဟ့ၣ်တၢ်စံးဆၢလၢ ယဟိဝၤယွၤ အအိၣ်ဘၣ်န့ၣ် ကမၣ်ဝဲလီၤ. ဘၣ်မနုၤအဃိလဲၣ်. မ့ၢ်လၢဖိသၣ်တဖၣ် မ့ၢ်သ့ၣ်ညါဝဲ တၢ်လၢယဟိဝၤယွၤ တဲဝဲလၢအဘၣ်ဒီးအကမၣ်န့ၣ် အဝဲသ့ၣ်ကဘၣ်ဟ့ၣ်က့ၤတၢ်စံးဆၢလၢ ကစၢ်ယွၤအအိၣ်လီၤ. (ဖး ယၤကိာ် ၄:၁၇ တက့ၢ်.) မိၢ်ပၢ်လၢ အအိၣ်ဒီးတၢ်ကူၣ်သ့န့ၣ် အဝဲတတြီအဖိလၢ ကဒိးဘျၢထံအဂီၢ်ဘၣ်. ဖဲအဖိအနီၢ်ဆံးခါလံၤလံၤ အဝဲသ့ၣ်ပာ်ဖျါထီၣ်ဝဲ တၢ်ဒိဂ့ၤတဲာ်ဘၣ်လီၤ. တကးဒံးဘၣ် အဝဲသ့ၣ်ကသိၣ်လိအဖိလၢ ကအဲၣ်တၢ်လၢ ယဟိဝၤယွၤတဲဝဲလၢအဘၣ် ဒီးကသးဟ့တၢ်လၢ ယဟိဝၤယွၤ တဲဝဲလၢအကမၣ်လီၤ. (လူၤကၣ် ၆:၄၀) နဖိအတၢ်အဲၣ်ယဟိဝၤယွၤန့ၣ် ကမၤစၢၤအီၤဒ်သိး အဝဲကသးအိၣ်မၤ တၢ်ဘၣ်ယဟိဝၤယွၤအသး ဒီးဒီသဒၢအီၤဒ်သိး အသုတမၤတၢ်ကမၣ်ဖးဒိၣ်တဂ့ၤအဂီၢ်လီၤ.—ယၡါယၤ ၃၅:၈.
ပှၤအဂၤတဖၣ် မၤစၢၤသ့
၁၄. တၢ်အိၣ်ဖှိၣ်သးပှၢ်တဖၣ် မၤစၢၤဝဲမိၢ်ပၢ်တဖၣ် ကသ့ဒ်လဲၣ်.
၁၄ တၢ်အိၣ်ဖှိၣ်သးပှၢ်တဖၣ်မၤစၢၤဝဲ မိၢ်ပၢ်တဖၣ်သ့ခီဖျိ တဲသကိးတၢ်ဒီးအဝဲသ့ၣ် ဘၣ်ဃးဒီးဖီတၢၣ်လၢ ကမၤယဟိဝၤယွၤအတၢ်မၤအဂီၢ်လီၤ. ဒီပုၢ်ဝဲၢ်မုၣ်တဂၤ သ့ၣ်နီၣ်ထီၣ်က့ၤဝဲလၢ ဖဲအသးအိၣ်ဃုနံၣ်အခါ ဒီပုၢ်ဝဲၢ်ခွါရးစၢၤ တဲတၢ်ဒီးအီၤလီၤ. အဝဲတဲဝဲလၢ ‘ဒီပုၢ်ဝဲၢ်ခွါရးစၢၤ ဟံးန့ၢ်တၢ်ဆၢကတီၢ် ၁၅ မံးနံး ဒီးတဲသကိးတၢ်ဒီးယၤ ဘၣ်ဃးဒီးယနီၢ်သးအဖီတၢၣ်လီၤ.’ အဝဲမၤဝဲဒ်န့ၣ်အဃိ ကဲဘျုးဝဲဒ်လဲၣ်. လၢခံဒီပုၢ်ဝဲၢ်မုၣ်အံၤ ကဲထီၣ်ပှၤလဲၤလၢညါ ဒီးအဝဲမၤပှၤလဲၤလၢညါန့ၢ်ဝဲအနံၣ် ၇၀ ဘျဲၣ်. ဖဲအံၤ ပသ့ၣ်ညါဘၣ်လီၤတံၢ်လီၤဆဲးလၢ တၢ်ကတိၤဟ့ၣ်ဂံၢ်ဟ့ၣ်ဘါန့ၣ် ကဲဘျုးလၢပှၤတဂၤ အတၢ်အိၣ်မူဒီတစိၤသ့ဝဲလီၤ. (ကတိၤဒိ ၂၅:၁၁) တၢ်အိၣ်ဖှိၣ်သးပှၢ်တဖၣ် ကွဲမုာ်ဝဲမိၢ်ပၢ်ဒီးဖိသၣ်တဖၣ်လၢ ကမၤစၢၤတၢ်လၢ ဘီမုၢ်ဘျီၣ်ဒိၣ်အဂီၢ်သ့စ့ၢ်ကီးလီၤ. အဝဲသ့ၣ်ဟ့ၣ်လီၤဝဲ တၢ်မၤတမံၤမံၤလၢ အကြၢးဒီးဖိသၣ် အသးအနံၣ်အလါ ဒီးအတၢ်သ့တၢ်ဘၣ်သ့လီၤ.
၁၅. တၢ်အိၣ်ဖှိၣ်ဖိတဖၣ် မၤစၢၤပှၤသးစၢ်တဖၣ် ကသ့ဒ်လဲၣ်.
၁၅ တၢ်အိၣ်ဖှိၣ်ဖိတဖၣ် မၤစၢၤဝဲကသ့ဒ်လဲၣ်. မၤစၢၤဝဲသ့ခီဖျိ ပာ်ဖျါထီၣ်တၢ်သူၣ်အိၣ်သးအိၣ်လၢ ပှၤသးစၢ်တဖၣ်အဖီခိၣ်လီၤ. အဒိ, ပာ်သူၣ်ပာ်သး ဖဲပှၤသးစၢ်တဖၣ်ဂုာ်ကျဲးစၢး ဒိၣ်ထီၣ်ထီထီၣ်လၢ နီၢ်သးတကပၤအခါတက့ၢ်. လၢတၢ်အိၣ်ဖှိၣ်ပူၤန့ၣ် နမ့ၢ်ထံၣ်ပှၤသးစၢ်တဖၣ် ဟ့ၣ်တၢ်စံးဆၢမ့ၢ်ဂ့ၤ, မၤဝဲမူဒါလၢ နွံဖးဖီတၢ်အိၣ်ဖှိၣ်အဂီၢ်မ့ၢ်ဂ့ၤ ဒီးမ့ၢ်စံၣ်တဲၤတဲလီၤပှၤဂၤလၢ အကၠိ မ့တမ့ၢ် အဝဲသ့ၣ်အိၣ်ဒီးတၢ်သးတီဖဲ ထံၣ်ဘၣ်တၢ်မၤကွၢ်အခါ စံးပတြၢၤအဝဲသ့ၣ်တက့ၢ်. တဘၣ်ထုးယံာ်တၢ်ဆၢကတီၢ်တဂ့ၤ. ပပာ်လီၤဖီတၢၣ်သ့လၢ တချုးလၢတၢ်အိၣ်ဖှိၣ်ထီၣ် မ့တမ့ၢ် တၢ်အိၣ်ဖှိၣ်ဝံၤအခါ ပကတဲတၢ်ဒီးပှၤသးစၢ်တဖၣ်လီၤ. ပမ့ၢ်မၤဒ်န့ၣ်န့ၣ် အဝဲသ့ၣ်ကတူၢ်ဘၣ်လၢ အအိၣ်ဘၣ်လၢ “တၢ်အိၣ်ဖှိၣ်ဖးဒိၣ်” အပူၤလီၤ.—စံးထီၣ်ပတြၢၤ ၃၅:၁၈.
မၤစၢၤနဖိတဖၣ် ဒ်သိးကတုၤထီၣ်ထီၣ်ဘးလၢ ကဒိးဘျၢထံအဂီၢ်တက့ၢ်
၁၆, ၁၇. (က) ဖိတဖၣ်ကဒိးဘျၢထံအဂီၢ် ဘၣ်မနုၤအဃိ မ့ၢ်တၢ်လၢအရ့ဒိၣ်လဲၣ်. (ခ) မိၢ်ပၢ်လၢအမ့ၢ်ခရံာ်ဖိတဖၣ် အိၣ်ဒီးတၢ်သူၣ်ခုသးခု ကသ့ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၆ တၢ်ခွဲးတၢ်ယာ် အဒိၣ်ကတၢၢ်လၢ မိၢ်ပၢ်တဖၣ်အဂီၢ်န့ၣ် မ့ၢ်ဝဲကသိၣ်လိအဖိတဖၣ် ဒ်သိးကအဲၣ် ယဟိဝၤယွၤအဂီၢ်လီၤ. (စံးထီၣ်ပတြၢၤ ၁၂၇:၃; အ့းဖ့းစူး ၆:၄) လၢပှၤအံၣ်စရ့လးဖိအစိၤ ဖိသၣ်တဖၣ်န့ၣ် လၢအိၣ်ဖျဲၣ်ထီၣ်လံၤလံၤ မ့ၢ်ပှၤလၢအဟ့ၣ်လုၢ်ထီၣ်ပာ်စၢၤအသးလၢ ယဟိဝၤယွၤအအိၣ်ဝံၤလံန့ၣ်လီၤ. ဘၣ်ဆၣ် ပဖိတဖၣ် တမ့ၢ်ဒ်န့ၣ်ဘၣ်. မိၢ်ပၢ်တဖၣ်မ့ၢ်အဲၣ်ယဟိဝၤယွၤ ဒီးတၢ်မ့ၢ်တၢ်တီဘၣ်ဆၣ် တမ့ၢ်လၢဖိတဖၣ်စ့ၢ်ကီး ကမၤဝဲဒ်အဝဲသ့ၣ်အသိး တဘျီဃီဘၣ်. စးထီၣ်လၢ ဖိသၣ်အိၣ်ဖျဲၣ်ထီၣ်အနံၤန့ၣ် မိၢ်ပၢ်သ့ၣ်တဖၣ် ကဘၣ်ပာ်လီၤအဖီတၢၣ်လၢ ကမၤစၢၤအီၤ ဒ်သိးကကဲထီၣ် ခရံာ်အပျဲၢ်အဘီၣ် ဒီးကဟ့ၣ်လုၢ်ထီၣ်အသးလၢ ယွၤအအိၣ်ဒီးဒိးဘျၢထံန့ၣ်လီၤ. တၢ်မၤလၢ အရ့ဒိၣ်န့ၢ်ဒံးတၢ်မၤအံၤ တအိၣ်နီတခါဘၣ်. ပှၤတဂၤမ့ၢ်ဟ့ၣ်လုၢ်ထီၣ်အသး, ဒိးဘျၢထံ ဒီးမၤယဟိဝၤယွၤအတၢ်မၤလၢ တၢ်သးတီအပူၤန့ၣ် ဖဲတၢ်နးတၢ်ဖှီၣ်ဖးဒိၣ်အဆၢကတီၢ် အဝဲပူၤဖျဲးဝဲသ့လီၤ.—မးသဲ ၂၄:၁၃.
မိၢ်ပၢ်တဖၣ် ကဘၣ်ပာ်လီၤဖီတၢၣ်လၢ ကမၤစၢၤအဖိတဖၣ် ဒ်သိးကကဲထီၣ်ခရံာ်အပျဲၢ်အဘီၣ်အဂီၢ်လီၤ (ကွၢ်လံာ်အဆၢ ၁၆, ၁၇)
၁၇ ဖဲ ဘျါစၢၤ ဘြဲ အဲၣ်ဒိးဒိးဘျၢထံအခါ အမိၢ်အပၢ် အဲၣ်ဒိးသ့ၣ်ညါလီၤတံၢ်ဝဲလၢ မ့ၢ်အဖိမုၣ်တုၤထီၣ်ထီၣ်ဘးလၢ ကဒိးဘျၢထံအဂီၢ်လံဧါ. ဖဲအဝဲသ့ၣ်သ့ၣ်ညါဝဲလၢ အဖိမုၣ်တုၤထီၣ်ထီၣ်ဘးလၢ ကဒိးဘျၢထံအခါ အဝဲသ့ၣ်ဆီၣ်ထွဲဝဲ အဖိမုၣ်အတၢ်ဆၢတဲာ်န့ၣ်လီၤ. ဘျါစၢၤတဲဝဲလၢ တချုးလၢအဝဲဒိးဘျၢထံအနၤန့ၣ် အပၢ်မၤဝဲတၢ်တမံၤလီၤ. “အဝဲမၢပဝဲခဲလၢာ် ချံးလီၤပခီၣ် ဒီးအဝဲဃ့ဘါထုကဖၣ်န့ၢ်တၢ်လၢပဂီၢ်လီၤ. အဝဲတဲဝဲ ယဟိဝၤယွၤလၢ အဝဲသးခုဒိၣ်မးမ့ၢ်လၢ အဖိမုၣ်ဖိဆၢတဲာ်လီၤအသးလၢ ကဟ့ၣ်လုၢ်ထီၣ်အသးလၢ ယဟိဝၤယွၤအအိၣ်အဃိလီၤ.” ပူၤကွံာ်အနံၣ် ၆၀ ဘျဲၣ်ဝံၤအလီၢ်ခံ ဘျါစၢၤတဲဝဲလၢ “နၤအဝဲန့ၣ် ယသးပ့ၤနီၣ်တန့ၢ်နီတဘျီဘၣ်.” မိၢ်ပၢ်သ့ၣ်ဧၢ, နၤစ့ၢ်ကီး ဖဲနထံၣ်ဘၣ်လၢ နဖိတဖၣ် ဟ့ၣ်လုၢ်ထီၣ်အသးလၢ ယဟိဝၤယွၤအအိၣ် ဒီးဒိးဘျၢထံအခါ မ်နအိၣ်ဒီးတၢ်သူၣ်ခုသးခု ဒီးတၢ်သူၣ်မံသးမုာ်ဒ်န့ၣ်အသိးတက့ၢ်.
a မိၢ်ပၢ်တဖၣ် တဲသကိးဝဲ တၢ်ဂ့ၢ်လၢကကဲဘျုးလၢ အဖိတဖၣ်အဂီၢ် လၢလံာ်လၢအမ့ၢ် Questions Young People Ask—Answers That Work, Volume 2, pages 304-310 အပူၤသ့ဝဲလီၤ. ကွၢ်စ့ၢ်ကီးလၢ “Question Box” in Our Kingdom Ministry, April 2011, page 2 တက့ၢ်.