စံၣ်ညီၣ်ကွီၢ်
၂၀ လၢတၢ်န့ၣ်အဃိ ပှၤအံၣ်စရ့လးဖိခဲလၢာ် လၢအအိၣ်လၢ ဝ့ၢ်ဒၣ်+ တုၤလီၤလၢ ဝ့ၢ်ဘ့ၢ်ၡဘၤ ဒီးလၢကံးလဧးအဟီၣ်ကဝီၤန့ၣ်+ ဟဲပာ်ဖှိၣ်ထီၣ်အသး လၢဝ့ၢ်မံးစပၤ+ ဃူဃူဖိးဖိး လၢယဟိဝၤယွၤ အမဲာ်ညါလီၤ. ၂ ဒီးပှၤဂီၢ်မုၢ် အခိၣ်အနၢ်တဖၣ် လၢအမ့ၢ် အံၣ်စရ့လးအဒူၣ်ခဲလၢာ် အခိၣ်အနၢ်တဖၣ်န့ၣ် လဲၤဆၢထၢၣ် လၢအလီၢ်လၢ ကစၢ်ယွၤအပှၤဂီၢ်မုၢ် အတၢ်အိၣ်ဖှိၣ်အကျါလီၤ. ဒီးပှၤသုးဖိလၢ အအိၣ်ဒီးနးန့ၣ် အိၣ်ဝဲ အဂၤ ၄၀၀,၀၀၀ လီၤ.+
၃ ပှၤဘံၣ်ယၤမံၣ်ဖိ နၢ်ဟူဝဲလၢ ပှၤအံၣ်စရ့လးဖိ လဲၤထီၣ်လၢ လၢဝ့ၢ်မံးစပၤလီၤ.
ဒီးပှၤအံၣ်စရ့လးဖိ တဲဝဲလၢ “တၢ်အၢတၢ်သီ ဖးဒိၣ်တမံၤအံၤ ကဲထီၣ်အသးဒ်လဲၣ်. တဲပှၤတက့ၢ်.”+ ၄ ဒီးပှၤလ့ၤဝံဖိတဂၤလၢ+ အသံၣ်မါ* ဘၣ်တၢ်မၤသံအီၤန့ၣ် တဲဆၢဝဲလၢ “ယၤဒီး ယသံၣ်မါ လဲၤလၢ ပှၤဘံၣ်ယၤမံၣ်ဖိ အဝ့ၢ်ကံဘဧၤ+ ဒ်သိးပက မံတ့ၢ်ဖဲန့ၣ် တနၤအဂီၢ်လီၤ. ၅ ဒီးပှၤကံဘဧၤဖိတဖၣ် ပာ်ဖှိၣ်ထီၣ်အသး ဒ်သိး အကမၤအၢယၤအဂီၢ် ဒီးဟဲကဝီၤဃာ် ဟံၣ်လၢ မုၢ်နၤခီလီၤ. အဝဲသ့ၣ် ကမၤသံယၤ ဘၣ်ဆၣ် လၢတၢ်န့ၣ်အလီၢ် အဝဲသ့ၣ် ဖီၣ်ဆူၣ် ယသံၣ်မါဒီး အသံဝဲလီၤ.+ ၆ မ့ၢ်လၢ အဝဲသ့ၣ် မၤတၢ်လၢအလီၤမဲာ်ဆှး ဒီးမၤတၢ်အၢတၢ်သီ လၢအံၣ်စရ့လးအပူၤ အဃိ ယဟံးထီၣ် ယသံၣ်မါအစိၣ်, ဒီၣ်တဲာ်အီၤ ဒီးဆှၢလီၤအကူာ်တဖၣ် လၢအံၣ်စရ့လး အဟီၣ်ကဝီၤ ကိးဘ့ၣ်ဒဲးအပူၤလီၤ.+ ၇ သုဝဲပှၤအံၣ်စရ့လးဖိ ခဲလၢာ်သ့ၣ်ဧၢ, တၢၣ်ပီၣ်သကိး ဒီးပာ်ဖျါထီၣ် သုတၢ်ဟ့ၣ်ကူၣ်+ ခဲအံၤတက့ၢ်.”
၈ ဝံၤဒီး ပှၤအံၣ်စရ့လးဖိ ခဲလၢာ် ဆၢထၢၣ် သကိးဃူဃူ ဒီးတဲဝဲလၢ “ပတက့ၤ လၢပဒဲ, ပတက့ၤလၢ ပဟံၣ် နီတဂၤဘၣ်. ၉ ပကမၤဒ်အံၤ, ပကဖးတၢ်ဝံၤဒီး+ ပကလဲၤထီၣ်ဒုး ဝ့ၢ်ကံဘဧၤလီၤ. ၁၀ မ့ၢ်လၢ ပှၤဘံၣ်ယၤမံၣ်ဖိ လၢအအိၣ်လၢ ဝ့ၢ်ကံဘဧၤန့ၣ် မၤတၢ်လၢအလီၤမဲာ်ဆှး ဒီးမၤတၢ်အၢတၢ်သီ လၢအံၣ်စရ့လးအပူၤ အဃိ ပကဒုး အဝဲသ့ၣ်လီၤ. ဒီးပှၤပိာ်ခွါ အဂၤ ၁၀၀ လၢအံၣ်စရ့လးအဒူၣ် ခဲလၢာ်အကျါန့ၣ် ပကကိးန့ၢ်အဂၤ ၁၀, ဒီးလၢအဂၤ ၁,၀၀၀ အကျါန့ၣ် ပကကိးန့ၢ် အဂၤ ၁၀၀, ဒီးလၢ အဂၤ ၁၀,၀၀၀ အကျါန့ၣ် ပကကိးန့ၢ် အဂၤ ၁,၀၀၀ ဒ်သိး အဝဲသ့ၣ် ကထၢဖှိၣ် တၢ်အီၣ်တၢ်အီ လၢပှၤသုးဖိတဖၣ် အဂီၢ်လီၤ.” ၁၁ ဒီးပှၤအံၣ်စရ့လးဖိ ပာ်ဖှိၣ်ထီၣ်အသး ဒီးဖီၣ်လိာ်သးစု ဒ်သိးကလဲၤဒုးသကိးဝဲ ဝ့ၢ်တဖျၢၣ်န့ၣ် ဃူဃူဖိးဖိးလီၤ.
၁၂ ဒီးအံၣ်စရ့လး အဒူၣ်တဖၣ် ဆှၢလီၤ ပှၤတနီၤဆူ ပိာ်ခွါခဲလၢာ်လၢ ဘံၣ်ယၤမံၣ်အဒူၣ်ကျါ ဒ်သိးကတဲဝဲလၢ “တၢ်အၢတၢ်သီ ဖးဒိၣ်တမံၤ ဟဲကဲထီၣ် အသးလၢ သုကျါဒ်လဲၣ်. ၁၃ ပှၤပိာ်ခွါအၢအၢသီသီ လၢအအိၣ်လၢ ဝ့ၢ်ကံဘဧၤအပူၤန့ၣ်+ ဟ့ၣ်လီၤကွံာ် အဝဲသ့ၣ် လၢပစုပူၤတက့ၢ်. ဒီးပကမၤသံအဝဲသ့ၣ် ဒီးမၤလီၤမၢ်ကွံာ် တၢ်အၢတၢ်သီလၢ အံၣ်စရ့လးအပူၤလီၤ.”+ ဘၣ်ဆၣ် ပှၤဘံၣ်ယၤမံၣ်ဖိ တဒိကနၣ် အဝဲသ့ၣ် အဒီပုၢ်ဝဲၢ် လၢအမ့ၢ် ပှၤအံၣ်စရ့လးဖိဘၣ်.
၁၄ ဒီးပှၤဘံၣ်ယၤမံၣ်ဖိ လၢအအိၣ်လၢ ဝ့ၢ်တဖၣ်အပူၤန့ၣ် ပာ်ဖှိၣ်ထီၣ်အသး တပူၤဃီလၢ ဝ့ၢ်ကံဘဧၤ ဒ်သိး ကလဲၤဒုးဝဲ ပှၤအံၣ်စရ့လးဖိ အဂီၢ်လီၤ. ၁၅ တၢ်တနံၤန့ၣ် ပှၤဘံၣ်ယၤမံၣ်ဖိ ကိးဖှိၣ်ထီၣ် ပှၤပိာ်ခွါလၢ အအိၣ်ဒီးနးတဖၣ် လၢအဝ့ၢ်တဖၣ်အပူၤန့ၣ် အိၣ်ဝဲ အဂၤ ၂၆,၀၀၀ လီၤ. တကးဒံးဘၣ် ပှၤကံဘဧၤ သုးဖိတဖၣ် လၢအဘၣ်တၢ်ဃုထၢထီၣ်အီၤ လီၤလီၤဆီဆီန့ၣ် ပၣ်ဃုာ်ဝဲ အဂၤ ၇၀၀ စ့ၢ်ကီးလီၤ. ၁၆ ဒီးလၢသုးမုၢ် တဒူၣ်အံၤအကျါန့ၣ် ပှၤလၢ အစုဆူၣ်လၢ အစ့ၣ်တခီ လၢအဘၣ် တၢ်ဃုထၢထီၣ်အီၤ လီၤလီၤဆီဆီန့ၣ် အိၣ်ဝဲအဂၤ ၇၀၀ လီၤ. အဝဲသ့ၣ် ကိးဂၤဒဲးန့ၣ် ကွံာ်လၢၢ်လၢ နီၣ်ဘျုး* ဘၣ်ဝဲလီၤတံၢ်လီၤဆဲးလီၤ.*
၁၇ ပှၤအံၣ်စရ့လးဖိအဒူၣ် လၢအဂၤခဲလၢာ်န့ၣ် ကိးဖှိၣ်ထီၣ် စ့ၢ်ကီးဝဲ ပှၤပိာ်ခွါ အဂၤ ၄၀၀,၀၀၀ လၢအအိၣ်ဒီး နးတဖၣ်လီၤ.+ ဒီးပှၤပိာ်ခွါ တဂၤစုာ်စုာ်န့ၣ် မ့ၢ်ပှၤလၢအအိၣ်ဒီး တၢ်လဲၤခီဖျိ လၢတၢ်ဒုးအပူၤလီၤ. ၁၈ ဒီးအဝဲသ့ၣ် လဲၤထီၣ်လၢ ဝ့ၢ်ဘ့ၤသ့လး ဒ်သိးကဃ့ တၢ်ဟ့ၣ်ကူၣ် လၢကစၢ်ယွၤအအိၣ် အဂီၢ်လီၤ.+ ဝံၤဒီး ပှၤအံၣ်စရ့လးဖိ တဲဝဲလၢ “လၢပကလဲၤထီၣ်ဒုး ပှၤဘံၣ်ယၤမံၣ်ဖိအဂီၢ် လၢပကျါန့ၣ် မတၤအဒူၣ် ကဘၣ် တီခိၣ်ရိၤမဲတၢ်လဲၣ်.” ယဟိဝၤယွၤ တဲဆၢက့ၤလၢ “ယူဒၤအဒူၣ် ကဘၣ် တီခိၣ်ရိၤမဲတၢ်လီၤ.”
၁၉ ဒီးပှၤအံၣ်စရ့လးဖိ ဂဲၤဆၢထၢၣ်ဂီၤဂီၤ ဒီးဒ်သိးကဒုး ပှၤကံဘဧၤဖိအဂီၢ် အဝဲသ့ၣ် လဲၤဆီလီၤအသး ဘူးဒီးဝ့ၢ်ကံဘဧၤလီၤ.
၂၀ ဒီးပှၤအံၣ်စရ့လးဖိ လဲၤထီၣ် အိၣ်ကတဲာ်ကတီၤအသး လၢတၢ်ဒုးအဂီၢ် လၢဝ့ၢ်ကံဘဧၤ ဒ်သိးကဒုးဝဲ ပှၤဘံၣ်ယၤမံၣ်ဖိ အဂီၢ်လီၤ. ၂၁ အဃိ ပှၤဘံၣ်ယၤမံၣ်ဖိ ဟဲထီၣ်လၢ ဝ့ၢ်ကံဘဧၤအပူၤ ဒီးဖဲတၢ်တနံၤန့ၣ် အဝဲသ့ၣ် မၤသံကွံာ်ဝဲ ပှၤအံၣ်စရ့လးဖိ အဂၤ ၂၂,၀၀၀ လီၤ. ၂၂ ဘၣ်ဆၣ် အံၣ်စရ့လး အသုးဖိတဖၣ် ပာ်ဖျါထီၣ် တၢ်သူၣ်ဒူသးဒူ ဒီးအဝဲသ့ၣ် လဲၤထီၣ် အိၣ်ကတဲာ်ကတီၤကဒီး အသး လၢတၢ်ဒုးအဂီၢ် ဖဲတၢ်လီၢ် အလီၢ်လီၢ် ဒ်အဆိကတၢၢ်တသီ အသိးန့ၣ်လီၤ. ၂၃ ဒီးပှၤအံၣ်စရ့လးဖိ လဲၤစ့ၢ်ကီးလၢ ဝ့ၢ်ဘ့ၤသ့လး ဒီးအဝဲသ့ၣ် ဟီၣ်ဝဲလၢ ယဟိဝၤယွၤအမဲာ်ညါ တုၤလီၤလၢ မုၢ်ဟါလီၤန့ၣ်လီၤ. ဒီးအဝဲသ့ၣ် သံကွၢ် ယဟိဝၤယွၤလၢ “မ့ၢ်ပကဘၣ် လဲၤထီၣ်ဒုးကဒီး ပဒီပုၢ်ဝဲၢ် ပှၤဘံၣ်ယၤမံၣ်ဖိတဖၣ်ဒံးဧါ.”+ ဒီးယဟိဝၤယွၤ တဲဆၢက့ၤလၢ “လဲၤထီၣ်ဒုးအဝဲသ့ၣ် တက့ၢ်.”
၂၄ အဃိ လၢခံသီတသီန့ၣ် ပှၤအံၣ်စရ့လးဖိ လဲၤသုးဘူးထီၣ် အသးလၢ ပှၤဘံၣ်ယၤမံၣ်ဖိ အအိၣ်လီၤ. ၂၅ ဒီးဖဲခံသီတသီန့ၣ် ပှၤဘံၣ်ယၤမံၣ်ဖိ စ့ၢ်ကီး ဟဲထီၣ်လၢ ဝ့ၢ်ကံဘဧၤအပူၤလီၤ. ဒီးအဝဲသ့ၣ် မၤသံကဒီးဝဲ ပှၤအံၣ်စရ့လးဖိ လၢအအိၣ်ဒီးနးန့ၣ် အဂၤ ၁၈,၀၀၀ လီၤ.+ ၂၆ အဃိ ပှၤအံၣ်စရ့လးဖိ ခဲလၢာ် လဲၤထီၣ်လၢ ဝ့ၢ်ဘ့ၤသ့လးလီၤ. ဒီးအဝဲသ့ၣ် ဆ့ၣ်နီၤဟီၣ်ဝဲလၢ ယဟိဝၤယွၤ အမဲာ်ညါလီၤ.+ ဒီးအဝဲသ့ၣ် ဒုၣ်တၢ်အီၣ်+ တုၤလၢ မုၢ်ဟါလီၤ ဒီးလုၢ်ထီၣ်ဝဲ တၢ်လုၢ်ဒွဲၣ်အူ+ ဒီးတၢ်လုၢ်အိၣ်ဃူအိၣ်ဖိးတဖၣ်+ လၢယဟိဝၤယွၤ အမဲာ်ညါလီၤ. ၂၇ ဝံၤဒီး ပှၤအံၣ်စရ့လးဖိ ဃ့တၢ်ဟ့ၣ်ကူၣ် လၢယဟိဝၤယွၤ+ အအိၣ် မ့ၢ်လၢ ယွၤလၢအမ့ၢ်အတီတဂၤ အတၢ်အၢၣ်လီၤအီလီၤ အတလါ အိၣ်ဖဲန့ၣ်အဃိလီၤ. ၂၈ ဒီးဖဲန့ၣ်အခါ စီၤဖံၤနဃၣ်+ မၤတၢ်လၢ တၢ်အၢၣ်လီၤအီလီၤ အတလါ အမဲာ်ညါလီၤ. စီၤဖံၤနဃၣ် မ့ၢ်ဝဲ စီၤအလၤဧစၢ်အဖိခွါ ဒီးစီၤအလၤဧစၢ် မ့ၢ်ဝဲ စီၤအၤဟရိၣ်အဖိခွါလီၤ. ဒီးပှၤအံၣ်စရ့လးဖိတဖၣ် သံကွၢ်ဝဲလၢ “မ့ၢ်ပဘၣ် လဲၤထီၣ်ဒုးကဒီး ပဒီပုၢ်ဝဲၢ် ပှၤဘံၣ်ယၤမံၣ်ဖိတဖၣ်ဒံးဧါ, တဘၣ်လဲၤလၢၤဘၣ်ဧါ.”+ ယဟိဝၤယွၤ တဲဆၢဝဲလၢ “လဲၤထီၣ်တက့ၢ်. ခဲမုၢ်ဆ့ၣ် ယကဟ့ၣ်လီၤ အဝဲသ့ၣ်လၢ သုစုပူၤလီၤ.” ၂၉ ဒီးပှၤအံၣ်စရ့လးဖိ ဆှၢလီၤ ပှၤခိးခူသူၣ်တၢ်+ လၢဝ့ၢ်ကံဘဧၤ အဃၢၤဝးဝးလီၤ.
၃၀ ဒီးလၢသၢသီတသီန့ၣ် ပှၤအံၣ်စရ့လးဖိ လဲၤထီၣ်ဒုး ပှၤဘံၣ်ယၤမံၣ်ဖိလီၤ. ဒီးအဝဲသ့ၣ် လဲၤထီၣ် အိၣ်ကတဲာ်ကတီၤအသး လၢတၢ်ဒုးအဂီၢ် လၢဝ့ၢ်ကံဘဧၤ ဒ်အမၤတ့ၢ်ဝဲ လၢညါအသိးလီၤ.+ ၃၁ ဖဲပှၤဘံၣ်ယၤမံၣ်ဖိ လဲၤထီၣ်သဂၢၢ် အံၣ်စရ့လး အသုးတဖၣ်အခါ အံၣ်စရ့လး အသုးတဖၣ် ဃ့ၢ်ကွံာ်ဝဲ ဒ်သိး ပှၤဘံၣ်ယၤမံၣ်ဖိ ကလူၤအဝဲသ့ၣ် ဒီးကယံၤထီၣ်ဒီး ဝ့ၢ်အဂီၢ်လီၤ.+ ဒီးဒ်လၢညါအသိး ပှၤဘံၣ်ယၤမံၣ်ဖိ မၤသံ အံၣ်စရ့လး သုးဖိတနီၤလၢ ကျဲမုၢ်လၢ အလဲၤထီၣ်ဆူ ဝ့ၢ်ဘ့ၤသ့လး ဒီးလၢကျဲမုၢ်အဝဲတဘိလၢ အလဲၤဝဲဆူ ဝ့ၢ်ကံဘဧၤလီၤ. အဃိ အံၣ်စရ့လးသုးဖိလၢ အသံဝဲလၢပျီပူၤန့ၣ် အိၣ်ဝဲအဂၤ ၃၀ လီၤ.+ ၃၂ အဃိ ပှၤဘံၣ်ယၤမံၣ်ဖိတဖၣ် တဲဝဲလၢ “အဝဲသ့ၣ် ကၡူဝဲ ဒ်လၢညါအသိးလီၤ.”+ ဘၣ်ဆၣ် ပှၤအံၣ်စရ့လးဖိ တဲပာ်စၢၤလိာ်အသးလၢ “ပကဃ့ၢ်န့ၢ် အဝဲသ့ၣ်တုၤလၢ ကျဲမုၢ်တဖၣ်လၢ အယံၤဒီးဝ့ၢ်လီၤ.” ၃၃ အဃိ အံၣ်စရ့လးအသုးဖိ ခဲလၢာ် လဲၤလၢဘဧၤလးတၤမၢ် ဒီးဆီလီၤအသး လၢကဒုးတၢ် အဂီၢ်လီၤ. ဖဲန့ၣ်အခါ အံၣ်စရ့လး အသုးဖိတဖၣ်လၢ အခိးခူသူၣ်တၢ် လၢဝ့ၢ်ကံဘဧၤ အကပိာ်ကပၤန့ၣ် ဃ့ၢ်သဖှိထီၣ်ဝဲ သတူၢ်ကလာ်လၢ အတၢ်အိၣ်ခူသူၣ် အလီၢ်တဖၣ်လီၤ. ၃၄ အဃိ အံၣ်စရ့လး သုးဖိလၢ အဘၣ်တၢ်ဃုထၢထီၣ်အီၤ လီၤလီၤဆီဆီ အဂၤ ၁၀,၀၀၀ န့ၣ်လဲၤထီၣ်လၢ ဝ့ၢ်ကံဘဧၤအမဲာ်ညါ ဒီးတၢ်ဒုးန့ၣ်ဆူၣ်ဝဲလီၤ. ဘၣ်ဆၣ် ပှၤဘံၣ်ယၤမံၣ်ဖိ တသ့ၣ်ညါလီၤအသးလၢ တယံာ်တမီၢ်န့ၣ် တၢ်ကီတၢ်ခဲဖးဒိၣ် ကဟဲဘၣ် အဝဲသ့ၣ်ဘၣ်.
၃၅ ယဟိဝၤယွၤ မၤနၢၤကွံာ်ဝဲ ပှၤဘံၣ်ယၤမံၣ်ဖိ+ လၢပှၤအံၣ်စရ့လးဖိ အဂီၢ်လီၤ. ဒီးဖဲနံၤအဝဲန့ၣ် ပှၤအံၣ်စရ့လးဖိ မၤသံကွံာ်ဝဲ ပှၤဘံၣ်ယၤမံၣ်ဖိ လၢအအိၣ်ဒီးအနး ခဲလၢာ် အဂၤ ၂၅,၁၀၀ လီၤ.+
၃၆ ဒီးဖဲပှၤအံၣ်စရ့လးဖိ ဃ့ၢ်ကွံာ်ဝဲအခါ ပှၤဘံၣ်ယၤမံၣ်ဖိ+ ဆိကမိၣ်ဝဲလၢ အဝဲသ့ၣ် ကမၤနၢၤတၢ်လီၤ. အနီၢ်ကီၢ်န့ၣ် ပှၤအံၣ်စရ့လးဖိ ဃ့ၢ်ကွံာ်ဝဲ ခီဖျိလၢ အဝဲသ့ၣ်နာ်အီၣ် သုးဖိလၢ အခိးခူသူၣ်တၢ် ဒ်သိးကဒုး ဝ့ၢ်ကံဘဧၤအဂီၢ် အဃိလီၤ.+ ၃၇ ဒီးပှၤခိးခူသူၣ်တၢ်တဖၣ် ဃ့ၢ်သဖှိဝဲချ့ချ့ဆူ ဝ့ၢ်ကံဘဧၤ ဒီးရၤလီၤအသး ဒီးပှၤကိးဂၤဒဲးလၢ အအိၣ်လၢဝ့ၢ်ပူၤန့ၣ် အဝဲသ့ၣ်မၤသံဝဲလၢနးလီၤ.
၃၈ ဒီးအံၣ်စရ့လးသုးဖိတဖၣ် ရဲၣ်ကျဲၤပာ်စၢၤဝဲလၢ ပှၤလၢအခိး ခူသူၣ်တၢ်တဖၣ် လၢအကလဲၤဒုးဝ့ၢ်န့ၣ် ကဟ့ၣ်လီၤ တၢ်ပနီၣ်တခါ လၢအမ့ၢ် မ့ၣ်အူကခုၣ်ထီၣ်ဝဲ ဖဲဝ့ၢ်န့ၣ်လီၤ.
၃၉ ဖဲပှၤအံၣ်စရ့လးဖိ ဃ့ၢ်ထီၣ်ကွံာ်လၢ တၢ်ဒုးအပူၤအခါ ပှၤဘံၣ်ယၤမံၣ်ဖိ လူၤအဝဲသ့ၣ် ဒီးမၤသံဝဲ ပှၤအံၣ်စရ့လးဖိ အဂၤ ၃၀ လီၤ.+ ဒီးပှၤဘံၣ်ယၤမံၣ်ဖိ တဲဝဲလၢ “အဝဲသ့ၣ်ကၡူကဒီး လၢပမဲာ်ညါ ဒ်လၢညါ တဘျီအသိးလီၤ.”+ ၄၀ ဘၣ်ဆၣ် ဖဲန့ၣ်အခါ မ့ၣ်အူခုၣ်ထီၣ်ဝဲ ဖးဒိၣ် လၢဝ့ၢ်အဖီခိၣ် ဒ်တၢ်ပနီၣ်အသိးလီၤ. ဖဲပှၤဘံၣ်ယၤမံၣ်ဖိ ကွၢ်က့ၤလၢ အလီၢ်ခံအခါ အဝဲသ့ၣ်ထံၣ်ဝဲလၢ ဝ့ၢ်အူအီၣ်ကွံာ်ဝဲ ဒီဖျၢၣ်ညါ ဒီးခုၣ်ထီၣ်ဝဲတုၤလၢ မူခိၣ်လီၤ. ၄၁ ဖဲန့ၣ်န့ၣ် ပှၤအံၣ်စရ့လးဖိ ဃၣ်တရံးက့ၤအသး ဒီးပှၤဘံၣ်ယၤမံၣ်ဖိ ထံၣ်ဘၣ်ဝဲလၢ တၢ်ကီတၢ်ခဲဖးဒိၣ် ဟဲဘၣ်အဝဲသ့ၣ်လံ အဃိ အဝဲသ့ၣ် သးဟးဂီၤဝဲလီၤ. ၄၂ ဒီးအဝဲသ့ၣ် ဂုၤက့ၤအလီၢ်ခံ ဒီးဃ့ၢ်ကွံာ်ဝဲလၢ ပှၢ်မုၢ်ကနၢလီၤ. ဘၣ်ဆၣ် ပှၤအံၣ်စရ့လးဖိ လူၤဒုးအဝဲသ့ၣ် ဒီးပှၤလၢအဟးထီၣ် လၢဝ့ၢ်တဖၣ်အပူၤန့ၣ် ကျီသံကွံာ် ပှၤဘံၣ်ယၤမံၣ်ဖိ စ့ၢ်ကီးလီၤ. ၄၃ ဒီးပှၤအံၣ်စရ့လးဖိတဖၣ် လူၤဝဲ ပှၤဘံၣ်ယၤမံၣ်ဖိ လၢတၢ်လီၢ်ကိးကပၤဒဲး ဒီးတပာ်အိၣ်ဘှံး အဝဲသ့ၣ်ဘၣ်. ဒီးပှၤအံၣ်စရ့လးဖိ မၤနၢၤကွံာ်အဝဲသ့ၣ် လၢဝ့ၢ်ကံဘဧၤ အမဲာ်ညါလိၤလိၤ လၢမုၢ်ထီၣ်တခီလီၤ. ၄၄ ဒီးပှၤဘံၣ်ယၤမံၣ်ဖိ အပှၤသုးဖိ သံကွံာ်ဝဲ အဂၤ ၁၈,၀၀၀ လီၤ. ဒီးအဝဲသ့ၣ်ခဲလၢာ် မ့ၢ်ပှၤသုးဖိလၢ အဂံၢ်ဆူၣ်ဘါဆူၣ်လီၤ.+
၄၅ ဒီးပှၤဘံၣ်ယၤမံၣ်ဖိ အဂၤတဖၣ် ဃ့ၢ်ကွံာ်ဝဲလၢ ပှၢ်မုၢ်ကနၢတခီ လၢလ့ရံးမိၣ်+ ဒီးပှၤအံၣ်စရ့လးဖိ မၤသံကွံာ် အဝဲသ့ၣ် အဂၤ ၅,၀၀၀ လၢကျဲမုၢ်တဖၣ် အဖီခိၣ်လီၤ. ဒီးပှၤအံၣ်စရ့လးဖိ ဆဲးလူၤအဝဲသ့ၣ် ပၢၢ်တုၤလၢ ကံဒိၣ် ဒီးမၤသံ အါထီၣ်ဝဲ ပှၤဘံၣ်ယၤမံၣ်ဖိ အဂၤ ၂,၀၀၀ လီၤ. ၄၆ ဖဲနံၤအဝဲန့ၣ် ပှၤဘံၣ်ယၤမံၣ်ဖိ လၢအသံဝဲန့ၣ် ခဲလၢာ်ခဲဆ့အိၣ်ဝဲ အဂၤ ၂၅,၀၀၀ လီၤ. ဒီးအဝဲသ့ၣ်ခဲလၢာ် မ့ၢ်ပှၤသုးဖိလၢ အအိၣ်ဒီးနး+ ဒီးအဂံၢ်ဆူၣ်ဘါဆူၣ်လီၤ. ၄၇ ဘၣ်ဆၣ် ပှၤဘံၣ်ယၤမံၣ်ဖိ အဂၤ ၆၀၀ န့ၣ်ဃ့ၢ်ကွံာ်ဝဲလၢ ပှၢ်မုၢ်ကနၢတခီ လၢလ့ရံးမိၣ် ဒီးအဝဲသ့ၣ်အိၣ်ဝဲဖဲ လ့ရံးမိၣ်န့ၣ် လွံၢ်လါလီၤ.
၄၈ ဒီးပှၤအံၣ်စရ့လးဖိ ဃၣ်ကဒါအသး ဒီးဒုးဝဲ ပှၤဘံၣ်ယၤမံၣ်ဖိလီၤ. ဒီးတၢ်ခဲလၢာ်လၢ အအိၣ်တ့ၢ်လၢဝ့ၢ်ပူၤ စးထီၣ်လၢ ပှၤကညီ တုၤလီၤလၢ ဆၣ်ဖိကီၢ်ဖိန့ၣ် အဝဲသ့ၣ် မၤဟးဂီၤကွံာ်ဝဲ လၢနးလီၤ. ဒီးကယဲၢ်ဝ့ၢ်တဖၣ် လၢအဝဲသ့ၣ် လဲၤနုာ်ဝဲလၢအပူၤန့ၣ် အဝဲသ့ၣ် ဒွဲၣ်အူထီၣ်စ့ၢ်ကီးဝဲ လၢမ့ၣ်အူလီၤ.