၂ ကွဲးနီၣ်တၢ်
၃၀ စီၤဃံးစကံယၤ ဆှၢလီၤဝဲ တၢ်ကစီၣ်ဆူ အံၣ်စရ့လး+ ဒီးယူဒၤ ခဲလၢာ်အအိၣ်လီၤ. တကးဒံးဘၣ် အဝဲကွဲးစ့ၢ်ကီး လံာ်ပရၢလၢ အ့ဖရဲၣ် ဒီးမနၤၡ့ၤအဒူၣ်အအိၣ်+ ဒ်သိး ပှၤကဟဲလၢ ယဟိဝၤယွၤအဟံၣ်လၢ ဝ့ၢ်ယရူၤၡလ့ၣ်အပူၤ ဒီးကမၤဝဲ ဘူၣ်လဲၤကပာ် လၢအံၣ်စရ့လး အကစၢ် ယဟိဝၤယွၤအဂီၢ်လီၤ.+ ၂ ဘၣ်ဆၣ် စီၤပၤ, အပဒိၣ်ဖးဒိၣ်တဖၣ် ဒီးတၢ်အိၣ်ဖှိၣ်ဒီတဖုလၢ ဝ့ၢ်ယရူၤၡလ့ၣ် အပူၤန့ၣ် ဆၢတဲာ်ဝဲလၢ အဝဲသ့ၣ်ကမၤဝဲ ဘူၣ်လဲၤကပာ်ဖဲ လါခံလါတလါလီၤ.+ ၃ အဝဲသ့ၣ် မၤဘူၣ်လဲၤကပာ် ဖဲညီနုၢ်ပှၤဘၣ်မၤအီၤအဆၢကတီၢ် တန့ၢ်ဘၣ်,+ မ့ၢ်လၢ ပှၤလုၢ်တၢ်ဒိၣ်လၢ အမၤစီဆှံထီၣ်အသးဝံၤဝဲတဖၣ် အိၣ်စှၤတလၢ+ ဒီးပှၤဂီၢ်မုၢ် တပာ်ဖှိၣ်ထီၣ်အသးလၢ ဝ့ၢ်ယရူၤၡလ့ၣ် အပူၤဘၣ်အဃိလီၤ. ၄ စီၤပၤ ဒီးတၢ်အိၣ်ဖှိၣ်ဒီတဖု ဘၣ်သူၣ်ဘၣ်သးဝဲ တၢ်ရဲၣ်တၢ်ကျဲၤအံၤလီၤ. ၅ အဃိ အဝဲသ့ၣ် ဆၢတဲာ်လီၤအသးလၢ ကဘိးဘၣ်သ့ၣ်ညါ တၢ်ဂ့ၢ်အံၤလၢ ကီၢ်အံၣ်စရ့လးဒီဘ့ၣ်အပူၤ စးထီၣ်လၢ ဝ့ၢ်ဘ့ၢ်ၡဘၤ တုၤလၢဝ့ၢ်ဒၣ်+ ဒ်သိးပှၤကဟဲမၤ ဘူၣ်လဲၤကပာ်လၢ ဝ့ၢ်ယရူၤၡလ့ၣ် အပူၤလၢ အံၣ်စရ့လးအကစၢ် ယဟိဝၤယွၤအဂီၢ်လီၤ. မ့မ့ၢ် လၢအပူၤကွံာ်န့ၣ် အဝဲသ့ၣ်တမၤ ဘူၣ်လဲၤကပာ် ဒီတဒူၣ် ဒ်တၢ်ကွဲးအသး အိၣ်ဝဲအသိးဘၣ်.+
၆ အဃိ ဒ်စီၤပၤမၤလိာ်ဝဲအသိး ပှၤစိာ်တၢ်ကစီၣ်ဖိတဖၣ် လဲၤဝဲလၢ အံၣ်စရ့လး ဒီးယူဒၤ အဟီၣ်ကဝီၤခဲလၢာ် ဒီးလဲၤစိာ်ဃုာ်ဒီး လံာ်ပရၢတဖၣ်လၢ အဟဲလၢ စီၤပၤဒီးအပဒိၣ်ဖးဒိၣ်တဖၣ် အအိၣ်လီၤ. ဒီးအဝဲသ့ၣ် တဲဝဲလၢ “ကီၢ်အံၣ်စရ့လး အပှၤဂီၢ်မုၢ်သ့ၣ်ဧၢ, သုဝဲလၢ အပူၤဖျဲးလၢ ကီၢ်အၤၡူၢ်အစီၤပၤတဖၣ် အစုပူၤ+ ဒီးအိၣ်ဝဲတုၤခဲအံၤန့ၣ် ဟဲက့ၤကဒါက့ၤလၢ စီၤအၤဘြၤဟၣ်, စီၤအံၤစဲး ဒီးစီၤအံၣ်စရ့လး အကစၢ် ယဟိဝၤယွၤအအိၣ် ဒ်သိး အကဟဲက့ၤကဒါက့ၤလၢ သုအိၣ်အဂီၢ်တက့ၢ်. ၇ တဘၣ်လီၤဂာ်ဒ် သုမိၢ်ပၢ်ဖံဖု လၢပျၢၤတဖၣ် ဒီးသုဒီပုၢ်ဝဲၢ်တဖၣ်လၢ အတတီဒီး အဝဲသ့ၣ် အကစၢ်ယဟိဝၤယွၤန့ၣ်တဂ့ၤ. အဝဲသ့ၣ် မၤဝဲဒ်န့ၣ်အဃိ ကစၢ်ယွၤ ဒုးလီၤဘၣ် တၢ်နးတၢ်ဖှီၣ်လၢ အဝဲသ့ၣ်အလိၤ ဒ်သုထံၣ်ဘၣ်လၢ သုမဲာ်အသိးလီၤ.+ ၈ တဘၣ်မၤကိၤသုခိၣ်ဒ် သုမိၢ်ပၢ်ဖံဖု လၢပျၢၤတဖၣ် အသိးတဂ့ၤ.+ ဆီၣ်လီၤသုသးလၢ ယဟိဝၤယွၤအမဲာ်ညါ ဒီးဟဲလၢ ကစၢ်ယွၤအဟံၣ်လၢ အပာ်စီဆှံပာ်စၢၤဝဲ+ လီၤထူလီၤယိာ်န့ၣ်တက့ၢ်. ဒီးဒ်သိး သုကစၢ် ယဟိဝၤယွၤ သုတသးပှံၢ်ထီၣ် သုလၢၤတဂ့ၤအဂီၢ် ဘူၣ်ထီၣ်ဘါထီၣ်က့ၤအီၤတက့ၢ်.+ ၉ သုကစၢ် ယဟိဝၤယွၤန့ၣ် အသးအိၣ်တၢ် ဒီးသးကညီၤတၢ်+ ဒီးသုမ့ၢ်ဟဲက့ၤကဒါက့ၤလၢ အအိၣ်န့ၣ် အဝဲကတူၢ်လိာ်သုလီၤ.*+ အဃိ ဖဲသုဟဲက့ၤကဒါက့ၤလၢ ယဟိဝၤယွၤ အအိၣ်အခါ ပှၤလၢအက့ၤဖီၣ် သုဒီပုၢ်ဝဲၢ်တဖၣ် ဒီးသုဖိခွါတဖၣ်န့ၣ် ကသးကညီၤက့ၤအဝဲသ့ၣ်+ ဒီးကပျဲဝဲလၢ အဝဲသ့ၣ် ကဟဲက့ၤအိၣ်လၢ ကီၢ်တဘ့ၣ်အံၤအပူၤလီၤ.”+
၁၀ အဃိ ပှၤစိာ်တၢ်ကစီၣ်ဖိတဖၣ်န့ၣ် လဲၤဝဲလၢ ဝ့ၢ်တဝ့ၢ်ဘၣ်တဝ့ၢ် လၢအ့ဖရဲၣ် ဒီးမနၤၡ့ၤ+ အတၢ်လီၢ် ကိးတီၤဒဲး ဒီးလဲၤစ့ၢ်ကီးဝဲလၢ စဘူလိၣ်အဟီၣ်ကဝီၤလီၤ. ဘၣ်ဆၣ် ပှၤဂီၢ်မုၢ်တဖၣ် နံၤဆဲးအဲးအဝဲသ့ၣ် ဒီးဒုၣ်ဒွဲၣ်စံးအၢ အဝဲသ့ၣ်လီၤ.+ ၁၁ ဘၣ်ဆၣ် ပှၤတနီၤလၢ အအိၣ်လၢ အၤၡ့ၢ်, မနၤၡ့ၤ ဒီးစဘူလိၣ် အတၢ်လီၢ်န့ၣ် ဆီၣ်လီၤအသး ဒီးဟဲဝဲလၢ ဝ့ၢ်ယရူၤၡလ့ၣ်လီၤ.+ ၁၂ ယွၤလၢအမ့ၢ်အတီတဂၤအစု အိၣ်ဝဲဒီး ယူဒၤအပှၤဂီၢ်မုၢ် ဒ်သိးအဝဲသ့ၣ်ကအိၣ်ဒီး တၢ်သးတဖျၢၣ်ဃီလၢ ကမၤထွဲ တၢ်လၢစီၤပၤ ဒီးပဒိၣ်ဖးဒိၣ်တဖၣ် မၤလိာ်ဝဲ ဒ်ယဟိဝၤယွၤ အကလုၢ်ကထါ မၤလိာ်ဝဲအသိးလီၤ.
၁၃ ပှၤဂီၢ်မုၢ် ဟဲပာ်ဖှိၣ်ထီၣ်အသး အါအါဂီၢ်ဂီၢ်လၢ ဝ့ၢ်ယရူၤၡလ့ၣ် ဒ်သိးကမၤ ဘူၣ်ကိၣ်လၢ အတပၣ်ဒီး ကိၣ်မံၣ်ဘၣ်+ ဖဲလါခံလါတလါန့ၣ်လီၤ.+ ပှၤဂီၢ်မုၢ်တဒူၣ်အံၤ အိၣ်ဝဲဖးအါညါလီၤ. ၁၄ ဒီးအဝဲသ့ၣ် လဲၤထုးထီၣ်ကွံာ်ဝဲ တၢ်လုၢ်လီၢ်တဖၣ်လၢ အအိၣ်လၢ ဝ့ၢ်ယရူၤၡလ့ၣ်+ ဒီးတၢ်လုၢ်လီၢ်လၢ တၢ်ဒွဲၣ်ထီၣ် တၢ်နၢမူအဂီၢ်ခဲလၢာ်+ ဒီးလဲၤတၢၤကွံာ်ဝဲလၢ ကံဒြိၣ် အတၢ်တြီၤပူၤလီၤ. ၁၅ ဖဲလါခံလါတလါ လါထီၣ် ၁၄ သီတသီန့ၣ် အဝဲသ့ၣ်မၤသံဝဲ ဆၣ်ဖိကီၢ်ဖိလၢ ဘူၣ်လဲၤကပာ် အတၢ်လုၢ်အဂီၢ်လီၤ. ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် မဲာ်ဆှးအဃိ အဝဲသ့ၣ် မၤစီဆှံထီၣ်အသး ဒီးဟဲစိာ်ဝဲ တၢ်လုၢ်ဒွဲၣ်အူတဖၣ် လၢယဟိဝၤယွၤ အဟံၣ်လီၤ. ၁၆ ဒ်ယွၤလၢအမ့ၢ်အတီ အခ့အပှၤ စီၤမိၤၡ့ အတၢ်သိၣ်တၢ်သီ အိၣ်ဝဲအသိး အဝဲသ့ၣ် ဆၢထၢၣ်ဝဲလၢ အလီၢ် ဝံၤဒီး ပှၤလုၢ်တၢ်ဒိၣ်တဖၣ် ဖှံလီၤဝဲ တၢ်သွံၣ်လၢ+ ပှၤလ့ၤဝံဖိတဖၣ် ဟ့ၣ်လီၤအဝဲသ့ၣ်လီၤ. ၁၇ လၢပှၤဂီၢ်မုၢ်လၢ အပာ်ဖှိၣ်ထီၣ်အသး အကျါန့ၣ် ပှၤလၢအတမၤစီဆှံထီၣ်ဘၣ် အသးဘၣ်န့ၣ် အိၣ်ဝဲအါဂၤလီၤ. ဒီးပှၤလ့ၤဝံဖိတဖၣ် တီခိၣ်ရိၤမဲဝဲ တၢ်မၤသံ ဆၣ်ဖိကီၢ်ဖိလၢ ဘူၣ်လဲၤကပာ် အတၢ်လုၢ်တဖၣ်အဂီၢ် ဒ်သိး ကမၤကဆှီထီၣ် ပှၤလၢအတမၤစီဆှံထီၣ်ဘၣ် အသးဘၣ်တဖၣ်န့ၣ်လၢ+ ယဟိဝၤယွၤ အမဲာ်ညါအဂီၢ်လီၤ. ၁၈ ပှၤလၢအတမၤကဆှီထီၣ် က့ၤအသးဘၣ်န့ၣ် အိၣ်ဝဲအါအါဂီၢ်ဂီၢ် လီၤဆီဒၣ်တၢ် ပှၤလၢအအိၣ်ဟဲလၢ အ့ဖရဲၣ်, မနၤၡ့ၤ,+ ယံးစၣ်ကၢ် ဒီးစဘူလိၣ်အဒူၣ်တဖၣ်အကျါလီၤ. ဒ်တၢ်ကွဲးအသး အိၣ်ဝဲအသိး ခီဖျိလၢ အဝဲသ့ၣ် တကဆှီဘၣ်အဃိ အဝဲသ့ၣ်တဘၣ်အီၣ် ဘူၣ်လဲၤကပာ်ဘၣ်. ဘၣ်ဆၣ် အဝဲသ့ၣ်အီၣ်ဒံးဝဲလီၤ. သနာ်က့ စီၤပၤဃံးစကံယၤ ဃ့ထုကဖၣ်တၢ်လၢ အဝဲသ့ၣ်အဂီၢ်လၢ “ယဟိဝၤယွၤဧၢ, နမ့ၢ်ပှၤအဂ့ၤလီၤ.+ ၁၉ ပှၤလၢအတမၤကဆှီထီၣ်အသး ဒ်တၢ်စီဆှံအတၢ်ဘျၢ+ အိၣ်ဝဲအသိးဘၣ်န့ၣ် အိၣ်ဝဲဖဲအံၤ အါဂၤလီၤ. ဘၣ်ဆၣ် အဝဲသ့ၣ် ကိးဂၤဒဲးလၢ အအိၣ်ကတဲာ်ကတီၤအသးလၢ ကဃုနၤ, ယွၤလၢအမ့ၢ်အတီတဂၤ+ လၢအမ့ၢ် အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤန့ၣ် မ်နပျၢ်ကွံာ် အဝဲသ့ၣ် အတၢ်ကမၣ်တက့ၢ်.” ၂၀ ဒီးယဟိဝၤယွၤ ဒိကနၣ် စီၤဃံးစကံယၤ ဒီးပျၢ်ကွံာ် ပှၤဂီၢ်မုၢ် အတၢ်ကမၣ်လီၤ.
၂၁ အဃိ ပှၤအံၣ်စရ့လးဖိလၢ အအိၣ်လၢ ဝ့ၢ်ယရူၤၡလ့ၣ်အပူၤန့ၣ် မၤဝဲဘူၣ်ကိၣ်လၢ အတပၣ်ဒီးကိၣ်မံၣ်ဘၣ်+ လၢတၢ်သူၣ်ဖှံသးညီ ဖးဒိၣ်အပူၤ နွံသီလီၤ. ဒီးပှၤလ့ၤဝံဖိတဖၣ် ဒီးပှၤလုၢ်တၢ်ဒိၣ်တဖၣ် စံးထီၣ်ပတြၢၤ ယဟိဝၤယွၤ+ တနံၤဘၣ်တနံၤ ဒီးအဝဲသ့ၣ် ဒ့ဝဲ အတၢ်ဒ့တၢ်အူတဖၣ် လၢယဟိဝၤယွၤအအိၣ် ဖးဒိၣ်လီၤ.+ ၂၂ ဒီးပှၤလ့ၤဝံဖိတဖၣ်လၢ အမၤယဟိဝၤယွၤအတၢ် လၢတၢ်ကူၣ်သ့အပူၤန့ၣ် စီၤဃံးစကံယၤ တဲတၢ်ဒီးအဝဲသ့ၣ် ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လီၤ. ဒီးပှၤအီၣ်တၢ်လၢ ဘူၣ်နွံသီအတီၢ်ပူၤ,+ လုၢ်ထီၣ်တၢ်လုၢ်အိၣ်ဃူအိၣ်ဖိးတဖၣ်+ ဒီးစံးဘျုးစံးဖှိၣ် အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤလီၤ.
၂၃ ဒီးတၢ်အိၣ်ဖှိၣ် ဒီတဖု ဆၢတဲာ်ဝဲလၢ ကမၤကဒီးဘူၣ်နွံသီလီၤ. အဃိ အဝဲသ့ၣ် မၤကဒီးဝဲဘူၣ်လၢ တၢ်သူၣ်ခုသးခုအပူၤ နွံသီလီၤ.+ ၂၄ ဒီးစီၤပၤဃံးစကံယၤ ဟ့ၣ်မၤဘူၣ်လီၤ ကျီၢ်ဖါအဒု ၁,၀၀၀ ဒီးသိအဒု ၇,၀၀၀ လၢတၢ်အိၣ်ဖှိၣ်အဂီၢ်လီၤ. ပဒိၣ်ဖးဒိၣ်တဖၣ် ဟ့ၣ်မၤဘူၣ်လီၤ ကျီၢ်ဖါအဒု ၁,၀၀၀ ဒီးသိအဒု ၁၀,၀၀၀ လၢတၢ်အိၣ်ဖှိၣ်အဂီၢ်လီၤ.+ ဒီးပှၤလုၢ်တၢ်ဒိၣ်တဖၣ် မၤစီဆှံထီၣ်အသး အါဂၤလီၤ.+ ၂၅ ဒီးယူဒၤအတၢ်အိၣ်ဖှိၣ်ဒီတဖု, ပှၤလုၢ်တၢ်ဒိၣ်တဖၣ်, ပှၤလ့ၤဝံဖိတဖၣ်, တၢ်အိၣ်ဖှိၣ်ဒီတဖုလၢ အအိၣ်ဟဲလၢ အံၣ်စရ့လးအဘီမုၢ်+ ဒီးပှၤထံဂၤကီၢ်ဂၤဖိတဖၣ်လၢ+ အအိၣ်ဟဲလၢ အံၣ်စရ့လးအဘီမုၢ် အဟီၣ်ကဝီၤမ့ၢ်ဂ့ၤ, လၢအအိၣ်လၢ ယူဒၤဘီမုၢ် အဟီၣ်ကဝီၤအပူၤမ့ၢ်ဂ့ၤ သးခုဝဲကိးဂၤဒဲးလီၤ. ၂၆ စးထီၣ်လၢ အံၣ်စရ့လး အစီၤပၤဒၤဝံး အဖိခွါ စီၤၡလိၤမိၤ ပၢတၢ်အခါ တုၤလၢခဲအံၤန့ၣ် တၢ်တကဲထီၣ်အသးဒ်အံၤလၢ ဝ့ၢ်ယရူၤၡလ့ၣ်အပူၤ နီတဘျီဘၣ်. အဃိ တၢ်သးခုဖးဒိၣ် အိၣ်ထီၣ်ဝဲလၢ ဝ့ၢ်ယရူၤၡလ့ၣ်အပူၤလီၤ.+ ၂၇ လၢခံကတၢၢ်န့ၣ် ပှၤလုၢ်တၢ်ဒိၣ်တဖၣ်* ဂဲၤဆၢထၢၣ်ဆိၣ်ဂ့ၤ ပှၤဂီၢ်မုၢ်တဖၣ်လီၤ.+ ကစၢ်ယွၤနၢ်ဟူအဝဲသ့ၣ် အကလုၢ် ဒီးအဝဲသ့ၣ် အတၢ်ထုကဖၣ်န့ၣ် ဟူထီၣ်လၢ မူခိၣ်လၢအမ့ၢ် ကစၢ်ယွၤ အတၢ်အိၣ်တၢ်ဆိးအလီၢ်စီဆှံလီၤ.