၂ ကွဲးနီၣ်တၢ်
၁၇ ဒီးစီၤအၤစါ အဖိခွါ စီၤယဟိၤၡၤဖး+ ကဲထီၣ်စီၤပၤလၢ အလီၢ်လီၤ. ဒီးစီၤယဟိၤၡၤဖး မၤဂၢၢ်ကျၢၤထီၣ် အတၢ်ပၢတၢ်ပြးလၢ အံၣ်စရ့လး အဖီခိၣ်လီၤ. ၂ အဝဲဆီလီၤဝဲ သုးဖိတဖၣ်လၢ ယူဒၤအဝ့ၢ်တဖၣ် လၢအအိၣ်ဒီး အဒူၣ်လၢအကျၢၤ ခဲလၢာ်အပူၤ ဒီးဆီလီၤဝဲ သုးခိးတၢ်လီၢ်တဖၣ် လၢယူဒၤအဟီၣ်ကဝီၤပူၤ ဒီးလၢအ့ဖရဲၣ် အဝ့ၢ်တဖၣ်လၢ အပၢ်စီၤအၤစါ မၤန့ၢ်တ့ၢ်ဝဲန့ၣ်လီၤ.+ ၃ ဒီးစီၤယဟိၤၡၤဖး အိၣ်မူမၤထွဲ ဒ်အဖုဖးဒိၣ် စီၤဒၤဝံး+ အိၣ်မူဝဲ အသိး ဒီးတဘူၣ်ထီၣ်ဘါထီၣ် ဘဧၤလးဘၣ်အဃိ ယဟိဝၤယွၤ အိၣ်ဒီးအီၤ ထီဘိလီၤ. ၄ အဝဲဃုအပၢ် အကစၢ်ယွၤ+ ဒီးအိၣ်မူပိာ်ထွဲ အတၢ်မၤလိာ် ဒီးအတမၤဝဲ လုၢ်လၢ်တဖၣ်လၢ ပှၤအံၣ်စရ့လးဖိ မၤဝဲန့ၣ်ဘၣ်.+ ၅ ယဟိဝၤယွၤ ဒုးအိၣ်ဂၢၢ်ဆိးကျၢၤ ဘီမုၢ်လၢ စီၤယဟိၤၡၤဖး အစုပူၤ+ ဒီးယူဒၤ အပှၤဂီၢ်မုၢ်ခဲလၢာ် ဟဲစိာ်န့ၢ်အီၤ တၢ်ဟ့ၣ်တဖၣ် ထီဘိအဃိ အဝဲထူးထီၣ်တီၤထီၣ်ဝဲ ဒိၣ်မး ဒီးအိၣ်ဝဲဒီး အလၤကပီၤ အါမးလီၤ.+ ၆ ဒီးအသးဒူထီၣ်လၢ အကအိၣ်မူမၤထွဲ ဒ်ယဟိဝၤယွၤ အတၢ်ဘၣ်သးအသိး တုၤဒၣ်လဲာ် အဝဲမၤဟးဂီၤကွံာ် တၢ်လီၢ်ထီၣ်ထီတဖၣ်+ ဒီးတၢ်စီဆှံအထူၣ်တဖၣ်*+ လၢယူဒၤဘီမုၢ်အပူၤလီၤ.
၇ ဖဲစီၤယဟိၤၡၤဖး ပၢတၢ်သၢနံၣ်တနံၣ်န့ၣ် အဝဲဆှၢလီၤဝဲ အပဒိၣ်တဖၣ်လၢအမ့ၢ် စီၤဘ့ၣ်ဃၤယံလး, စီၤဧိၤဘါဒယၤ, စီၤစကၤရယၤ, စီၤနၤသန့လး ဒီးစီၤမံၤကါယၤ ဒ်သိး အဝဲသ့ၣ်ကသိၣ်လိတၢ်လၢ ယူဒၤအဝ့ၢ်တဖၣ်အပူၤလီၤ. ၈ လၢအဝဲသ့ၣ်အကျါန့ၣ် ပၣ်ဃုာ်ဒီး ပှၤလ့ၤဝံဖိ လၢလာ်တဖၣ်အံၤလီၤ. စီၤၡမါယၤ, စီၤနသၤနံယၤ, စီၤစဘၤဒယၤ, စီၤဧစၤအ့လး, စီၤၡမံၤရမိး, စီၤယိနာ်သၣ်, စီၤအဒိနံၤယၤ, စီၤတိၤဘံယာ် ဒီးစီၤတိအဒိၤနံယၤလီၤ. ဒီးပၣ်ဃုာ်စ့ၢ်ကီးဒီး ပှၤလုၢ်တၢ်ဒိၣ်တဖၣ် လၢအမ့ၢ် စီၤအလံၡမၤ ဒီးစီၤယဟိရၣ်လီၤ.+ ၉ အဝဲသ့ၣ်လဲၤစိာ်ဃုာ်ဒီး ယဟိဝၤယွၤ အလံာ်တၢ်သိၣ်တၢ်သီ+ ဒီးဟးသိၣ်လိတၢ် လၢယူဒၤဘီမုၢ်အပူၤလီၤ. ဒီးအဝဲသ့ၣ် လဲၤဝဲလၢ ယူဒၤအဝ့ၢ်တဖၣ်အပူၤ ဝးဝးဒီး သိၣ်လိတၢ်လၢ ပှၤဂီၢ်မုၢ်အကျါလီၤ.
၁၀ ဘီမုၢ်တဖၣ်လၢ အအိၣ်ဝးတရံး ယူဒၤဘီမုၢ်န့ၣ် အဝဲသ့ၣ်ပျံၤဝဲ ယဟိဝၤယွၤအဃိ အဝဲသ့ၣ်ဒုး စီၤယဟိၤၡၤဖး တဘူၣ်ဘၣ်. ၁၁ ဒီးပှၤဖလ့ၡသးဖိ ဟဲစိာ်န့ၢ်စီၤယဟိၤၡၤဖး တၢ်ဟ့ၣ်တဖၣ် ဒီးစ့ဒ် တၢ်ခိတၢ်သွဲအသိးလီၤ. ဒီးပှၤဧ့ရ့းဖိ ဟဲစိာ်န့ၢ်အီၤ သိဖါအဒု ၇,၇၀၀ ဒီးမဲာ်တဲးလဲးဖါ အဒု ၇,၇၀၀ လၢအဝဲသ့ၣ် ဆၣ်ဖိကီၢ်ဖိအကျါလီၤ.
၁၂ စီၤယဟိၤၡၤဖး အစိကမီၤ ဒံးယံာ်ဒံးဒိၣ်ထီၣ်+ ဒီးအဝဲဆဲးသူၣ်ထီၣ် တၢ်လီၢ်တဖၣ်လၢ အအိၣ်ဒီး အဒူၣ်လၢအကျၢၤ+ ဒီးဝ့ၢ်တဖၣ်လၢ တၢ်ပာ်ဖှိၣ် တၢ်ဖိတၢ်လံၤတဖၣ်အဂီၢ်+ လၢယူဒၤ ဘီမုၢ်အပူၤလီၤ. ၁၃ ဒီးလၢယူဒၤ အဝ့ၢ်တဖၣ် အပူၤန့ၣ် အဝဲမၤတၢ်မၤ အကလုာ်ကလုာ် ဒီးအဝဲအိၣ်ဒီး သုးဖိတဖၣ်လၢ အဂံၢ်ဆူၣ်ဘါဆူၣ် လၢဝ့ၢ်ယရူၤၡလ့ၣ် အပူၤလီၤ. ၁၄ သုးဖိတဖၣ်အံၤ ဘၣ်တၢ်ကရၢကရိထီၣ်အီၤ ဒ်အဝဲသ့ၣ် အဒူၣ်ဖိထၢဖိ* အိၣ်ဝဲအသိးလီၤ. လၢယူဒၤအဒူၣ်ကျါန့ၣ် ပှၤအကထိတဖၣ်အခိၣ် အဆိကတၢၢ်တဂၤန့ၣ် မ့ၢ်ဝဲ စီၤဧၤဒနနၤ ဒီးသုးဖိလၢ အဂံၢ်ဆူၣ်ဘါဆူၣ်လၢ အအိၣ်ဒီးအီၤန့ၣ် အိၣ်ဝဲအဂၤ ၃၀၀,၀၀၀ လီၤ.+ ၁၅ လၢအတၢ်တီခိၣ်ရိၤမဲ အဖီလာ်န့ၣ် မ့ၢ်ဝဲ သုးခိၣ် စီၤယိဃၤနာ် ဒီးပှၤလၢအအိၣ်ဒီးအီၤ အိၣ်ဝဲအဂၤ ၂၈၀,၀၀၀ လီၤ. ၁၆ ဒီးလၢအတၢ်တီခိၣ်ရိၤမဲ အဖီလာ်န့ၣ် ပၣ်ဃုာ်စ့ၢ်ကီးဒီး စီၤစံးကရံ အဖိခွါ လၢအမ့ၢ် သုးခိၣ် စီၤဧမၤစယၤန့ၣ်လီၤ. စီၤဧမၤစယၤ ဟ့ၣ်လီၤအသးလၢ ယဟိဝၤယွၤ အတၢ်မၤအဂီၢ် ထီဘိ ဒီးသုးဖိလၢ အဂံၢ်ဆူၣ်ဘါဆူၣ် လၢအအိၣ်ဒီးအီၤန့ၣ် အိၣ်ဝဲအဂၤ ၂၀၀,၀၀၀ လီၤ. ၁၇ ဒီးလၢဘံၣ်ယၤမံၣ်အဒူၣ်ကျါန့ၣ်+ မ့ၢ်ဝဲ စီၤအလံဒၤ လၢအမ့ၢ် ပှၤသုးဖိလၢ အဂံၢ်ဆူၣ်ဘါဆူၣ် ဒီးအဝဲအိၣ်ဒီး အပှၤသုးဖိ အဂၤ ၂၀၀,၀၀၀ လၢအအိၣ်ကတဲာ်ကတီၤ ပာ်စၢၤအသးဒီး ချံၣ်ဒီးကတီၤန့ၣ်လီၤ.+ ၁၈ ဒီးလၢ အတၢ်တီခိၣ်ရိၤမဲ အဖီလာ်န့ၣ် ပၣ်ဃုာ်ဒီး စီၤယဟိစဘး ဒီးပှၤသုးဖိ လၢအအိၣ်ဒီးအီၤန့ၣ် အိၣ်ဝဲအဂၤ ၁၈၀,၀၀၀ လၢအအိၣ်ကတဲာ်ကတီၤ ပာ်စၢၤအသးလၢ ကဒုးတၢ်အဂီၢ်လီၤ. ၁၉ ပှၤတဖၣ်န့ၣ် မ့ၢ်ပှၤလၢအမၤစၢၤစီၤပၤလီၤ. တကးဒံးဘၣ် စီၤပၤဆီလီၤ ပှၤသုးဖိ အဂၤတဖၣ်လၢ ယူဒၤအဝ့ၢ်တဖၣ် လၢအအိၣ်ဒီး အဒူၣ်လၢအကျၢၤ ခဲလၢာ်အပူၤလီၤ.+