ဖဲပသံအခါ ပကလဲၤဖဲလဲၣ်

၁-၃. ဘၣ်ဃးဒီးတၢ်သံန့ၣ်​ ပှၤအါဂၤသံကွၢ်ဝဲ တၢ်သံကွၢ်မနုၤတဖၣ်လဲၣ်, ဒီးတၢ်ဘူၣ်တၢ်ဘါခိၣ်နၢ်တဖၣ်​ ဟ့ၣ်ထီၣ်ဝဲတၢ်စံးဆၢဒ်လဲၣ်.

လံာ်စီဆှံအၢၣ်လီၤပှၤလၢမုၢ်ကအိၣ်ဝဲတနံၤန့ၣ်​ “တၢ်သံတအိၣ်လၢၤဘၣ်.” (လီၣ်ဖျါ ၂၁:၄) လၢတၢ်မၤလိ ၅ အပူၤန့ၣ်​ ပမၤလိဘၣ်လၢတၢ်ပှ့ၤက့ၤန့ၣ်​ ဒုးအိၣ်ထီၣ်ကျဲလၢပကဒိးန့ၢ်ဘၣ်​ တၢ်မူလီၤထူလီၤယိာ်န့ၣ်လီၤ. ဘၣ်ဆၣ်​ မုၢ်မဆါတနံၤအံၤ ပှၤဟီၣ်ခိၣ်ဖိတဖၣ်​ ဘၣ်သံဒံးဝဲလီၤ. (စံၣ်တဲၤတဲလီၤတၢ် ၉:၅) လၢတၢ်န့ၣ်အဃိ ပကသံကွၢ်ဘၣ်တၢ်သံကွၢ်အရ့ဒိၣ်တဖျၢၣ်လီၤ. ဖဲပသံအခါ တၢ်ကမၤအသးဒီးပှၤဒ်လဲၣ်န့ၣ်လီၤ.

^၂ တၢ်သံကွၢ်တဖျၢၣ်အံၤအတၢ်စံးဆၢန့ၣ်​ မ့ၢ်တၢ်လၢအရ့ဒိၣ်လၢပဂီၢ် လီၤဆီဒၣ်တၢ်ဖဲ ပှၤလၢပအဲၣ်ဘၣ်အီၤတဂၤသံဝဲအခါန့ၣ်လီၤ. ပကဆိကမိၣ်ဘၣ်လၢ– ‘မ့ၢ်အဝဲကလဲၤဖဲလဲၣ်, မ့ၢ်အဝဲအံးထွဲကွၢ်ထွဲပှၤဧါ, မ့ၢ်အဝဲမၤစၢၤပှၤကသ့စ့ၢ်ကီးဧါ ဒီးမ့ၢ်ပကထံၣ်ဘၣ်က့ၤအီၤ တဘျီဘျီဒံးဧါ.’

^၃ တၢ်ဘူၣ်တၢ်ဘါခိၣ်နၢ်တဖၣ်န့ၣ်​ ဟ့ၣ်ထီၣ်ဝဲတၢ်သံကွၢ်တဖၣ်အံၤ အတၢ်စံးဆၢအကလုာ်ကလုာ်လီၤ. ပှၤတနီၤနီၤသိၣ်လိဝဲလၢ နမ့မ့ၢ်ပှၤအဂ့ၤတဂၤန့ၣ်​ နကက့ၤအိၣ်ဘၣ်လၢမူခိၣ်​ ဒီးနမ့မ့ၢ်ပှၤအၢပှၤသီတဂၤန့ၣ်​ နကတူၢ်ဘၣ်တၢ်နးတၢ်ဖှီၣ်လၢလရာ်မ့ၣ်အူအပူၤလီၤ. ဒီးအဂၤတနီၤန့ၣ်​ စံးဝဲလၢဖဲနသံအခါ နကလၤဟးထီၣ်ကွံာ်ဝဲဒီး နကက့ၤအိၣ်ဘၣ်ဒီးနဟံၣ်ဖိဃီဖိ လၢအသံတ့ၢ်တဖၣ်န့ၣ်လီၤ. မ့မ့ၢ်ပှၤလၢအဂၤတနီၤစံးဝဲလၢ နသံဝံၤအလီၢ်ခံန့ၣ်​ ပှၤကစံၣ်ညီၣ်နၤ, နကဟဲက့ၤအိၣ်ဖျဲၣ်ထီၣ်လၢ အသီတဘျီ ဒီးနကဟဲလိၣ်ထီၣ်က့ၤလၢပှၤတဂၤဂၤ မ့တမ့ၢ် ဒ်ဆၣ်ဖိကီၢ်ဖိအသိးလီၤ.

၄. ဘၣ်ဃးဒီးတၢ်သံန့ၣ်​ တၢ်ဘူၣ်တၢ်ဘါခိၣ်နၢ်အါတက့ၢ် သိၣ်လိဝဲဒ်လဲၣ်.

^၄ တၢ်ဘူၣ်တၢ်ဘါခိၣ်နၢ်တဖၣ်​ အတၢ်သိၣ်လိလၢ အဘၣ်ဃးဒီးတၢ်သံန့ၣ်​ လီၤဆီလိာ်အသးဒိၣ်မးလီၤ. ဘၣ်ဆၣ်အဝဲသ့ၣ်အတၢ်သိၣ်လိန့ၣ်​ အတၢ်ဂ့ၢ်ခိၣ်သ့ၣ်​ မ့ၢ်တၢ်တမံၤဃီလီၤ. အဝဲသ့ၣ်သိၣ်လိဝဲလၢ ဖဲပှၤတဂၤသံဝဲအခါ တၢ်အိၣ်လၢအပူၤတမံၤမံၤန့ၣ်​ မူဒံးဝဲလီၤ. တၢ်သိၣ်လိတခါအံၤ မ့ၢ်အဘၣ်စ့ၢ်ကီးဧါ.

ဖဲပသံအခါ ပကလဲၤဖဲလဲၣ်

၅, ၆. ဖဲပသံအခါန့ၣ်​ တၢ်ကမၤအသးဒီးပှၤဒ်လဲၣ်.

^၅ ဖဲပသံအခါ တၢ်ကမၤအသးဒီးပှၤဒ်လဲၣ်န့ၣ်​ ယဟိဝၤယွၤသ့ၣ်ညါဝဲလီၤ. ဒီးအဝဲစံးဘၣ်ပှၤလၢ ဖဲပှၤတဂၤသံအခါန့ၣ်, အတၢ်အိၣ်မူကတၢၢ်ကွံာ်ဝဲလီၤ. တၢ်သံန့ၣ်ထီဒါလိာ်သးဒီးတၢ်မူလီၤ. လၢတၢ်န့ၣ်အဃိ ဖဲပှၤတဂၤဂၤသံဝဲအခါန့ၣ်​ အတၢ်တူၢ်ဘၣ်ဒီး အတၢ်ဆိကမိၣ်တဖၣ်​ တအိၣ်ဝဲလၢၤဘၣ်.a ဖဲပသံအခါန့ၣ်​ ပတထံၣ်တၢ်လၢၤဘၣ်, ပတနၢ်ဟူတၢ်လၢၤဘၣ်ဒီး ပဆိကမိၣ်တၢ် တသ့စ့ၢ်ကီးလၢၤဘၣ်.

^၆ စီၤပၤၡလိၤမိၤ ကွဲးဝဲလၢ “ပှၤသံန့ၣ်​ တသ့ၣ်ညါဘၣ်​ တၢ်နီတမံၤဘၣ်.” ပှၤသံန့ၣ်​ အဲၣ်တၢ်တသ့ ဒီးသးဟ့တၢ်တသ့စ့ၢ်ကီးဘၣ်. ဒီး “တၢ်မၤမ့ၢ်ဂ့ၤ, တၢ်ကူၣ်မ့ၢ်ဂ့ၤ, တၢ်သ့ၣ်ညါမ့ၢ်ဂ့ၤ, တၢ်ကူၣ်သ့မ့ၢ်ဂ့ၤ, တအိၣ်ဘၣ်လၢပျုၤပူၤ ဖဲနလဲၤတၢ်န့ၣ်ဘၣ်လီၤ.” (ဖး စံၣ်တဲၤတဲလီၤတၢ် ၉:၅, ၆, ၁၀ တက့ၢ်.) စံးထီၣ်ပတြၢၤ ၁၄၆:၄ စံးဘၣ်ပှၤလၢ ဖဲပှၤတဂၤဂၤသံဝဲအခါန့ၣ်​ “အတၢ်ကူၣ်တၢ်ဖး” တအိၣ်လၢၤဘၣ်.

ဘၣ်ဃးဒီးတၢ်သံန့ၣ်​ ယ့ၣ်ၡူးစံးဝဲဒ်လဲၣ်

၇. ဘၣ်ဃးဒီးတၢ်သံန့ၣ်​ ယ့ၣ်ၡူးစံးဝဲဒ်လဲၣ်.

^၇ ဖဲယ့ၣ်ၡူးအတံၤသကိး စီၤလါစရူးသံဝဲအခါ အဝဲစံးဘၣ်အပျဲၢ်အဘီၣ်တဖၣ်လၢ “ပတခွါစီၤလါစရူးမံသပ့ၤဝဲ” လီၤ. ဘၣ်ဆၣ်​ ယ့ၣ်ၡူးတအဲၣ်ဒိးစံးဝဲလၢ စီၤလါစရူးမံသပ့ၤဝဲဘၣ်. ဒီးအဝဲတဲနၢ်ပၢၢ် အပျဲၢ်အဘီၣ်တဖၣ်လၢ “စီၤလါစရူး သံလံဝဲလံ.” (ယိၤဟၣ်​ ၁၁:၁၁-၁၄) လၢတၢ်န့ၣ်အဃိ ယ့ၣ်ၡူးဒိလီၤဝဲတၢ်သံလၢ တၢ်မံလီၤ. ယ့ၣ်ၡူးတတဲဝဲလၢ စီၤလါစရူးန့ၣ်​ လဲၤထီၣ်ဘၣ်ဆူမူခိၣ်​ မ့တမ့ၢ် အဝဲက့ၤအိၣ်ဘၣ်ဒီးအဘူးအတံၢ်လၢအသံတ့ၢ်တဖၣ်ဘၣ်. အဝဲတတဲဝဲလၢ စီၤလါစရူးန့ၣ်​ တၢ်မၤနးမၤဖှီၣ်အီၤလၢ လရာ်မ့ၣ်အူအပူၤဘၣ်. ဒီးယ့ၣ်ၡူးတတဲစ့ၢ်ကီးဝဲလၢ အဝဲဟဲက့ၤလိၣ်ထီၣ်အသးဒ်ပှၤတဂၤ မ့တမ့ၢ် ဆၣ်ဖိကီၢ်ဖိတဒုအသိးဘၣ်. မ့ၢ်ဒၣ်စီၤလါစရူးမံသပ့ၤလၢ တၢ်မံဖးယိာ်အပူၤန့ၣ်လီၤ. လံာ်စီဆှံအဆၢတနီၤန့ၣ်​ ဒိလီၤဝဲတၢ်သံလၢ တၢ်မံလီၤ. ဖဲစီၤစတ့းဖၣ်​ ဘၣ်တၢ်မၤသံအီၤအခါ လံာ်စီဆှံစံးဝဲလၢအဝဲ “မံသပ့ၤဝဲလီၤ.” (မၤတၢ် ၇:၆၀) ဘၣ်ဃးဒီး ခရံာ်ဖိတနီၤလၢအသံတ့ၢ်ဝဲန့ၣ်​ တၢ်မၢဖိပီလူးကွဲးဝဲလၢအဝဲသ့ၣ်​ “မံသပ့ၤလံ” န့ၣ်လီၤ.—၁ ကရံၣ်သူး ၁၅:၆.

၈. ကစၢ်ယွၤတတ့လီၤဝဲ ပှၤဟီၣ်ခိၣ်ဖိတဖၣ်ဒ်သိး ကသံဝဲအဂီၢ်န့ၣ်​ ပသ့ၣ်ညါဘၣ်ဒ်လဲၣ်.

^၈ မ့ၢ်ကစၢ်ယွၤတ့လီၤနီၢ်အံၣ်အုဒီး စီၤအၤဒၣ်လၢအဝဲသ့ၣ်ကသံအဂီၢ်ဧါ. တမ့ၢ်ဘၣ်. ယဟိဝၤယွၤတ့လီၤအဝဲသ့ၣ်လၢ ကအိၣ်မူဘၣ်ဝဲလီၤထူလီၤယိာ် ပှဲၤဒီးတၢ်သူၣ်ဖှံသးညီ ဒီးတၢ်အိၣ်ဆူၣ်အိၣ်ချ့လၢ အလၢအပှဲၤန့ၣ်လီၤ. ဖဲယဟိဝၤယွၤတ့လီၤပှၤဟီၣ်ခိၣ်ဖိတဖၣ်အခါန့ၣ်​ တ့လီၤဃုာ်ဝဲဒီးအတၢ်မိၣ်န့ၢ်သးလီလၢ ကအိၣ်မူဘၣ်ဝဲလီၤထူလီၤယိာ်န့ၣ်လီၤ. (စံၣ်တဲၤတဲလီၤတၢ် ၃:၁၁) မိၢ်ပၢ်တဖၣ်န့ၣ်​ တအဲၣ်ဒိးထံၣ်ဝဲလၢ အဖိတဖၣ်ပှၢ်ထီၣ်ဒီးသံဝဲဘၣ်. ဒ်န့ၣ်အသိးယဟိဝၤယွၤစ့ၢ်ကီး တအဲၣ်ဒိးဝဲလၢအဖိတဖၣ်​ ပှၢ်ထီၣ်ဒီးသံဝဲဘၣ်. ကစၢ်ယွၤန့ၣ်​ တ့လီၤပှၤလၢပကအိၣ်မူဘၣ်လီၤထူလီၤယိာ်လီၤ. မ့မ့ၢ်ဒ်န့ၣ်န့ၣ်​ ဘၣ်မနုၤအဃိလၢ ပှၤဟီၣ်ခိၣ်ဖိတဖၣ်​ ဘၣ်သံဝဲလဲၣ်.

ဘၣ်မနုၤအဃိ ပဘၣ်သံလဲၣ်

၉. တၢ်မၤလိာ်လၢ ယဟိဝၤယွၤဟ့ၣ်လီၤနီၢ်အံၣ်အုဒီး စီၤအၤဒၣ်န့ၣ်​ ဘၣ်မနုၤအဃိ တမ့ၢ်တၢ်လၢအကီတလၢ လၢအဝဲသ့ၣ်အဂီၢ်န့ၣ်လဲၣ်.

^၉ လၢဧ့ၤဒ့ၣ်ကရၢၢ်အပူၤန့ၣ်​ ယဟိဝၤယွၤတဲဘၣ်ဝဲ စီၤအၤဒၣ်လၢ– “ကယဲၢ်သ့ၣ်လၢ တၤသၣ်အလီၢ်ပူၤအံၤ, နအီၣ်ဒီးနအီၣ်ဘၣ်သၢၣ်. မ့မ့ၢ်တၢ်သ့ၣ်ညါတၢ်ဂ့ၤဒီး တၢ်အၢအသ့ၣ်တထံးန့ၣ်​ အီၣ်အသၣ်တဂ့ၤ. အဂ့ၢ်ဒ်အံၤ, မုၢ်တနံၤလၢနအီၣ်အီၤန့ၣ်​ သံဒီးနကသံလီၤ.” (၁ မိၤၡ့ ၂:၉, ၁၆, ၁၇) တၢ်မၤလိာ်လၢကစၢ်ယွၤဟ့ၣ်လီၤဝဲန့ၣ်​ တကီလၢနီၢ်အံၣ်အု ဒီးစီၤအၤဒၣ်ကဒိကနၣ်ဝဲအဂီၢ်ဘၣ်. ဒီးအဝဲသ့ၣ်​ မ့ၢ်ဒိကနၣ်ယွၤအကလုၢ်န့ၣ်​ မ့ၢ်ဒၣ်အဝဲသ့ၣ်ပာ်ဖျါထီၣ်ဝဲ တၢ်ပာ်ကဲကစၢ်ယွၤအတၢ်န့ၢ်စိန့ၢ်ကမီၤလီၤ. တကးဒံးဘၣ်မ့ၢ်စ့ၢ်ကီးကျဲတဘိလၢ အဝဲသ့ၣ်ကပာ်ဖျါထီၣ်ဝဲ တၢ်စံးဘျုးစံးဖှိၣ်လၢ ကစၢ်ယွၤအတၢ်ဟ့ၣ်တဖၣ်အဃိန့ၣ်လီၤ.

၁၀, ၁၁. (က) မုၣ်ကီၤလံၢ်ကွဲန့ၢ်လွဲန့ၢ် နီၢ်အံၣ်အုဒီးစီၤအၤဒၣ်လၢ ကျဲဒ်လဲၣ်. (ခ) တၢ်လၢနီၢ်အံၣ်အုဒီးစီၤအၤဒၣ်မၤဝဲန့ၣ်​ ဘၣ်မနုၤအဃိ အဝဲသ့ၣ်တဲပူၤဖျဲးအသးအလီၢ်တအိၣ်ဘၣ်လဲၣ်.

^၁၀ နီၢ်အံၣ်အုဒီးစီၤအၤဒၣ်န့ၣ်​ ဃုထၢဝဲလၢတဒိကနၣ်​ ယဟိဝၤယွၤအကလုၢ်အဃိ မ့ၢ်တၢ်လၢ အလီၤသးအုးဒိၣ်မးလီၤ. မုၣ်ကီၤလံၢ်စံးဘၣ်နီၢ်အံၣ်အုလၢ– “ကယဲၢ်သ့ၣ်အိၣ်လၢ တၤသၣ်အလီၢ်ပူၤတထံးလၢ်လၢ်န့ၣ်​ ယွၤမၤလိာ်သု, အီၣ်အီၤတဂ့ၤန့ၣ်, သပှၢ်တၢၢ်ဧါ.” ဒီးနီၢ်အံၣ်အုစံးဆၢက့ၤအီၤလၢ– “သ့ၣ်အသၣ်လၢ တၤသၣ်အလီၢ်ပူၤန့ၣ်, ပအီၣ်ဘၣ်သၢၣ်. မ့မ့ၢ်သ့ၣ်အိၣ်လၢတၤသၣ်အလီၢ်အသးကံၢ်ပူၤတထံးန့ၣ်, ယွၤစံးဝဲဒၣ်, အီၣ်အီၤတဂ့ၤ, ထိးအီၤတဂ့ၤ, သုကသံဘၣ်ဖုးလီၤ.”—၁ မိၤၡ့ ၃:၁-၃.

^၁၁ ဒီးမုၣ်ကီၤလံၢ်စံးဘၣ်အီၤလၢ– “သုတသံဒီးသုတသံဘၣ်ဘၣ်လီၤ. မ့ၢ်ယွၤသ့ၣ်ညါလၢ မုၢ်တနံၤလၢ သုအီၣ်အီၤန့ၣ်​ သုမဲာ်ကအိးထီၣ်အသး, ဒီးသုကလီၤဂာ်ယွၤ, ဒီးကသ့ၣ်ညါတၢ်ဂ့ၤဒီးတၢ်အၢန့ၣ်လီၤ.” (၁ မိၤၡ့ ၃:၄-၆) မုၣ်ကီၤလံၢ်အဲၣ်ဒိးလၢ နီၢ်အံၣ်အုကဆိကမိၣ်ဝဲလၢ တၢ်ဂ့ၤဒီးတၢ်အၢန့ၣ်​ အဝဲဆၢတဲာ်ဝဲလၢအနီၢ်ကစၢ်ဒၣ်ဝဲ သ့ဝဲလီၤ. အဂၤတမံၤန့ၣ်​ မုၣ်ကီၤလံၢ်လီန့ၢ်အီၤဒီးစံးဝဲလၢ အဝဲမ့ၢ်တဒိကနၣ်ယွၤအကလုၢ်န့ၣ်​ အဝဲကဒိးန့ၢ်ဘၣ်​ တၢ်အဘျုးဒ်လဲၣ်အဂ့ၢ်န့ၣ်လီၤ. ဒီးမုၣ်ကီၤလံၢ်စံးဘၣ်အီၤလၢ နတသံဘၣ်. လၢတၢ်န့ၣ်အဃိ နီၢ်အံၣ်အုအီၣ်ဝဲသ့ၣ်သၣ်ဒီး ဟ့ၣ်ဒုးအီၣ်ဝဲအဝၤစ့ၢ်ကီးလီၤ. ယဟိဝၤယွၤတဲဘၣ်အဝဲသ့ၣ်လၢ တဘၣ်အီၣ်​ သ့ၣ်သၣ်တဂ့ၤန့ၣ်​ နီၢ်အံၣ်အုဒီးစီၤအၤဒၣ်​ သ့ၣ်ညါဝဲလီၤ. ဖဲအဝဲသ့ၣ်အီၣ်ဝဲသ့ၣ်သၣ်အဆၢကတီၢ်န့ၣ်​ မ့ၢ်ဒၣ်အဝဲသ့ၣ်ဆၢတဲာ်လီၤအသးလၢ အတဒိကနၣ်ကစၢ်ယွၤအတၢ်မၤလိာ်လၢ အကြၢးအဘၣ်တခါအံၤန့ၣ်လီၤ. တကတီၢ်ဃီန့ၣ်​ ပာ်ဖျါထီၣ်စ့ၢ်ကီးဝဲလၢ အဝဲသ့ၣ်တပာ်ကဲဝဲအပၢ်အိၣ်လၢမူခိၣ်လၢ အအိၣ်ဒီးတၢ်အဲၣ်တၢ်ကွံတဂၤအံၤဘၣ်. လၢတၢ်န့ၣ်အဃိ အဝဲသ့ၣ်တဲပူၤဖျဲးအသးအလီၢ်တအိၣ်ဘၣ်.

၁၂. နီၢ်အံၣ်အုဒီး စီၤအၤဒၣ်​ တဒိကနၣ်​ ယဟိဝၤယွၤအကလုၢ်အဃိ ကစၢ်ယွၤအသးကဘၣ်ဒိထဲလဲၣ်.

^၁၂ ပမိၢ်ပပၢ်ခံဂၤအံၤ မ့ၢ်လၢအဝဲသ့ၣ်တပာ်ကဲဝဲ တၢ်ဘၣ်တ့ကစၢ်အဃိ ကစၢ်ယွၤအသးကဘၣ်ဒိဝဲထဲလဲၣ်. အဒိ ဒ်သိးနလုၢ်ဒိၣ်ထီၣ်နဖိခွါဒီး နဖိမုၣ်ကသ့အဂီၢ်နဘၣ်ဂုာ်ကျဲးစၢးမၤတၢ် ဆူၣ်ဆူၣ်လီၤ. ဘၣ်ဆၣ်အဝဲသ့ၣ်​ မ့ၢ်ထီဒါနၤဒီးတမၤတၢ်လၢအဘၣ်နသးဘၣ်န့ၣ်​ နကတူၢ်ဘၣ်ဒ်လဲၣ်. နသးကဘၣ်ဒိဝဲဒိၣ်မးလီၤ.

၁၃. ဖဲယဟိဝၤယွၤစံးဘၣ်စီၤအၤဒၣ်လၢ “နကက့ၤက့ၤဆူဟီၣ်ခိၣ်ကမူၣ်” န့ၣ်​ အခီပညီအဲၣ်ဒိးစံးဝဲဒ်လဲၣ်.

^၁၃ ဖဲနီၢ်အံၣ်အုဒီးစီၤအၤဒၣ်​ တဒိကနၣ်ကစၢ်ယွၤအကလုၢ်အခါ အဝဲသ့ၣ်ဘၣ်တူၢ်ၡူကွံာ်ဝဲ တၢ်ခွဲးတၢ်ယာ်လၢ ကအိၣ်မူဘၣ်လီၤထူလီၤယိာ်န့ၣ်လီၤ. ယဟိဝၤယွၤစံးဘၣ်​ စီၤအၤဒၣ်လၢ– “နမ့ၢ်ဟီၣ်ခိၣ်ကမူၣ်, ဒီးနကက့ၤက့ၤဆူဟီၣ်ခိၣ်ကမူၣ်လီၤ.” (ဖး ၁ မိၤၡ့ ၃:၁၉ တက့ၢ်.) တၢ်န့ၣ်အခီပညီမ့ၢ်ဝဲ စီၤအၤဒၣ်ကကဲထီၣ်က့ၤဟီၣ်ခိၣ်ကမူၣ်လၢ အသီတဘျီ ဒ်လၢညါအသိးလီၤ. (၁ မိၤၡ့ ၂:၇) ဖဲစီၤအၤဒၣ်မၤတၢ်ဒဲးဘးဝံၤအလီၢ်ခံ အဝဲသံဝဲဒီး ဟါမၢ်ကွံာ်ဝဲလီၤ.

၁၄. ဘၣ်မနုၤအဃိ ပဘၣ်သံလဲၣ်.

^၁၄ နီၢ်အံၣ်အုဒီး စီၤအၤဒၣ်မ့ၢ်ဒိကနၣ်​ ကစၢ်ယွၤအကလုၢ်န့ၣ်​ အဝဲသ့ၣ်ကအိၣ်မူဘၣ်​ တုၤလၢမုၢ်မဆါတနံၤအံၤလီၤ. ဘၣ်ဆၣ်​ အဝဲသ့ၣ်မၤတၢ်ဒဲးဘးခီဖျိ တဒိကနၣ်ကစၢ်ယွၤအကလုၢ် ဒီးလၢခံန့ၣ်အဝဲသ့ၣ်ဘၣ်သံဝဲလီၤ. တၢ်သံန့ၣ်လီၤဂာ်ဒ် တၢ်ဆါအၢတခါလၢပဒိးန့ၢ်ဘၣ်လၢ ပမိၢ်ပၢ်အဆိကတၢၢ်ခံဂၤအအိၣ်န့ၣ်လီၤ. ပဝဲဒၣ်ကိးဂၤဒဲးန့ၣ်​ မ့ၢ်လၢပဟဲအိၣ်ဖျဲၣ်ထီၣ်ဒ် ပှၤတၢ်ဒဲးဘးဖိအဃိ ပဘၣ်သံလီၤ. (ရိမ့ၤ ၅:၁၂) ဘၣ်ဆၣ်တၢ်မၤအသးသ့ၣ်တဖၣ်အံၤန့ၣ်​ တမ့ၢ်ကစၢ်ယွၤအတၢ်တိာ်ပာ်လၢ ပှၤဟီၣ်ခိၣ်ဖိတဖၣ်အဂီၢ်ဘၣ်. ကစၢ်ယွၤတဘၣ်အသးလၢ ပှၤဟီၣ်ခိၣ်ဖိကသံဝဲဘၣ်. ဒီးလံာ်စီဆှံကိးစ့ၢ်ကီးဝဲတၢ်သံလၢ “ဒုၣ်ဒါ” န့ၣ်လီၤ.—၁ ကရံၣ်သူး ၁၅:၂၆.

တၢ်မ့ၢ်တၢ်တီကမၤထူၣ်ဖျဲးပှၤ

၁၅. ခီဖျိလၢ ပသ့ၣ်ညါထီၣ်တၢ်မ့ၢ်တၢ်တီလၢ အဘၣ်ဃးဒီး တၢ်သံန့ၣ်ပထူၣ်ဖျဲးထီၣ်လၢ တၢ်မနုၤလဲၣ်.

^၁၅ တၢ်မ့ၢ်တၢ်တီလၢဘၣ်ဃးဒီး တၢ်သံန့ၣ်​ ကမၤထူၣ်ဖျဲးပှၤလၢ တၢ်စူၢ်ကမၣ်နာ်ကမၣ်တၢ်အါမံၤလီၤ. လံာ်စီဆှံသိၣ်လိပှၤလၢ ပှၤသံန့ၣ်တတူၢ်ဘၣ်တၢ်ဆါ ဒီးတၢ်သူၣ်အုးသးအုးလၢၤဘၣ်. ပကတိၤတၢ်ဒီးအဝဲသ့ၣ်တသ့လၢၤဘၣ်. ဒီးအဝဲသ့ၣ်ကတိၤတၢ်ဒီးပှၤ တသ့စ့ၢ်ကီးဘၣ်. ပှၤသံသ့ၣ်တဖၣ်န့ၣ်​ ပမၤစၢၤအီၤတသ့ဘၣ်. ဒီးအဝဲသ့ၣ်မၤစၢၤပှၤ တသ့စ့ၢ်ကီးဘၣ်. ပှၤသံတဖၣ်န့ၣ်​ မၤဘၣ်ဒိပှၤတသ့အဃိ တလိၣ်လၢပပျံၤအဝဲသ့ၣ်ဘၣ်. ဘၣ်ဆၣ်တၢ်ဘူၣ်တၢ်ဘါခိၣ်နၢ်တဖၣ်​ တဲဝဲလၢပှၤသံန့ၣ်အိၣ်မူဒံးဝဲလၢ တၢ်လီၢ်တတီၤတီၤလီၤ. ဒီးပှၤသ့ၣ်တဖၣ်အံၤတဲစ့ၢ်ကီးဝဲလၢ ပမ့ၢ်ဟ့ၣ်လီၤကျိၣ်စ့လၢသရၣ်​ မ့တမ့ၢ် စီၤသီအအိၣ်န့ၣ်​ အဝဲသ့ၣ်မၤစၢၤပှၤသံတဖၣ်သ့ဝဲလီၤ. ဘၣ်ဆၣ်​ ဆၢကတီၢ်ဖဲပသ့ၣ်ညါထီၣ်တၢ်မ့ၢ်တၢ်တီလၢ အဘၣ်ဃးဒီးတၢ်သံန့ၣ်​ တၢ်သိၣ်တၢ်သီအကမၣ်တဖၣ်အံၤ လီန့ၢ်ပှၤတသ့လၢၤဘၣ်.

၁၆. ဘၣ်ဃးဒီးတၢ်သံန့ၣ်​ တၢ်ဘူၣ်တၢ်ဘါအါဖု သိၣ်လိကမၣ်ဝဲဒ်လဲၣ်.

^၁၆ မုၣ်ကီၤလံၢ်သူဝဲ တၢ်ဘူၣ်တၢ်ဘါအကမၣ်တဖၣ်​ ဒ်သိးကလီန့ၢ်ပှၤဒီး ကဒုးဆိကမိၣ်ပှၤလၢ ပှၤသံန့ၣ်​ အိၣ်မူဒံးဝဲလီၤ. အဒိ တၢ်ဘူၣ်တၢ်ဘါအကမၣ်တနီၤသိၣ်လိဝဲလၢ ဖဲပသံအခါတၢ်အိၣ်လၢပပူၤ တမံၤမံၤအိၣ်မူဒံးဝဲလီၤ. မ့ၢ်နတၢ်ဘူၣ်တၢ်ဘါခိၣ်နၢ်တဖၣ်​ သိၣ်လိနၤဒ်န့ၣ်ဧါ. မ့တမ့ၢ် ဘၣ်ဃးဒီးတၢ်သံန့ၣ်​ မ့ၢ်အသိၣ်လိနၤ ဒ်လံာ်စီဆှံတဲဝဲအသိးစ့ၢ်ကီးဧါ. မုၣ်ကီၤလံၢ်သူဝဲတၢ်လံၣ်တၢ်လီလၢ အကမၤယံၤထီၣ်ပှၤဟီၣ်ခိၣ်ဖိဒီး ယဟိဝၤယွၤန့ၣ်လီၤ.

၁၇. တၢ်သိၣ်လိလၢ ပှၤကတူၢ်ဘၣ်တၢ်နးတၢ်ဖှီၣ်လၢ လရာ်မ့ၣ်အူအပူၤန့ၣ်​ ဘၣ်မနုၤအဃိ မၤဘၣ်ဒိယဟိဝၤယွၤ အလၤကပီၤလဲၣ်.

^၁၇ တၢ်ဘူၣ်တၢ်ဘါအါဖု အတၢ်သိၣ်လိန့ၣ်​ မၤပျံၤမၤဖုးဝဲပှၤအါဂၤအသးန့ၣ်လီၤ. အဒိ အဝဲသ့ၣ်တနီၤနီၤန့ၣ်​ သိၣ်လိဝဲလၢပှၤလၢအတတီတလိၤတဖၣ်​ မ့ၢ်သံန့ၣ်ကတူၢ်ဘၣ်ဝဲ တၢ်နးတၢ်ဖှီၣ်လၢ လရာ်မ့ၣ်အူအပူၤလီၤထူလီၤယိာ်လီၤ. တၢ်လံၣ်တၢ်လီတခါအံၤ မ့ၢ်တၢ်လၢအမၤဘၣ်ဒိ ကစၢ်ယွၤအလၤကပီၤန့ၣ်လီၤ. ကစၢ်ယွၤတမၤနးမၤဖှီၣ်ပှၤဟီၣ်ခိၣ်ဖိလၢ ကျဲဒ်အံၤနီတဘျီဘၣ်. (ဖး ၁ ယိၤဟၣ်​ ၄:၈ တက့ၢ်.) ပှၤတဂၤဂၤမ့ၢ်သိၣ်ဃီၣ်အဖိ ဒီးဒွဲၣ်အဖိအစုလၢမ့ၣ်အူန့ၣ်​ မ့ၢ်နကတူၢ်ဘၣ်ဒ်လဲၣ်. နကဆိကမိၣ်လၢ အဝဲမ့ၢ်ပှၤလၢအအၢအသီဒိၣ်မး ဒီးနတအဲၣ်ဒိးရ့အီၤဘၣ်. မုၣ်ကီၤလံၢ်စ့ၢ်ကီးအဲၣ်ဒိးဝဲလၢ ပကဆိကမိၣ်ကမၣ်ယဟိဝၤယွၤလၢ အမ့ၢ်ပှၤဒ်န့ၣ်အသိးတဂၤလီၤ.

၁၈. ဘၣ်မနုၤအဃိ ပတလိၣ်ပျံၤပှၤသံလဲၣ်.

^၁၈ တၢ်ဘူၣ်တၢ်ဘါတနီၤ သိၣ်လိဝဲလၢ ဖဲပှၤဟီၣ်ခိၣ်ဖိသံအခါန့ၣ် အဝဲသ့ၣ်ကဲထီၣ်ဝဲ တၢ်ဝံတၢ်ကလၤလီၤ. ဒီးတၢ်ဘူၣ်တၢ်ဘါတဖၣ်အံၤသိၣ်လိဝဲလၢ ပှၤသံအကလၤန့ၣ်​ ကဲထီၣ်ဝဲတံၤသကိးလၢ အမၤစၢၤပှၤသ့ မ့တမ့ၢ် ကဲထီၣ်ဝဲ ပဒုၣ်ပဒါလၢအလီၤပျံၤလီၤဖုးသ့ဝဲအဃိ ပကဘၣ်ပာ်ကဲအဝဲသ့ၣ်​ တကးဒံးဘၣ်ပကဘၣ်ပျံၤအီၤလီၤ. ဒီးပှၤအါဂၤန့ၣ်နာ်ဝဲ တၢ်လံၣ်တၢ်လီတခါအံၤလီၤ. မ့ၢ်လၢအဝဲသ့ၣ်ပျံၤဝဲ ပှၤသံတဖၣ်အံၤအဃိ လၢကဘူၣ်ထီၣ်ဘါထီၣ်​ ယဟိဝၤယွၤအလီၢ်န့ၣ်​ ဘါထီၣ်ဝဲပှၤသံန့ၣ်လီၤ. သ့ၣ်နီၣ်ထီၣ်က့ၤလၢ ပှၤသံတဖၣ်န့ၣ်​ တတူၢ်ဘၣ်တၢ်ဒီး တသ့ၣ်ညါတၢ်နီတမံၤဘၣ်အဃိ ပတလိၣ်ပျံၤအဝဲသ့ၣ်ဘၣ်. ယဟိဝၤယွၤမ့ၢ်ပတၢ်ဘၣ်တ့ကစၢ် ဒီးအဝဲမ့ၢ်ယွၤလၢ အမ့ၢ်အတီထဲတဂၤဧိၤအဃိ ကြၢးလၢပကဘူၣ်ထီၣ်ဘါထီၣ်ထဲအီၤတဂၤလီၤ.—လီၣ်ဖျါ ၄:၁၁.

၁၉. တၢ်သ့ၣ်ညါတၢ်မ့ၢ်တၢ်တီလၢ ဘၣ်ဃးဒီးတၢ်သံန့ၣ်​ မၤစၢၤပှၤဒ်လဲၣ်.

^၁၉ ဖဲပသ့ၣ်ညါထီၣ်​ တၢ်မ့ၢ်တၢ်တီဘၣ်ဃးဒီးတၢ်သံန့ၣ်​ ပထူၣ်ဖျဲးထီၣ်လၢ တၢ်ဘူၣ်တၢ်ဘါတဖၣ်​ အတၢ်လံၣ်တၢ်လီန့ၣ်လီၤ. တၢ်မ့ၢ်တၢ်တီတခါအံၤ မၤစၢၤပှၤလၢပကနၢ်ပၢၢ်ထီၣ်ယဟိဝၤယွၤအတၢ်အၢၣ်လီၤအီလီၤလၢ အလီၤသူၣ်ပိၢ်သးဝး ဘၣ်ဃးဒီးပတၢ်အိၣ်မူလၢခါဆူညါန့ၣ်လီၤ.

၂၀. တၢ်မၤလိလၢခံတခါန့ၣ် ပကမၤလိဘၣ်တၢ်ဂ့ၢ်မနုၤလဲၣ်.

^၂၀ လၢပျၢၤန့ၣ်​ ကစၢ်ယွၤအခ့အပှၤ စီၤယိၤဘးသံကွၢ်ကစၢ်ယွၤလၢ– “ပှၤကညီမ့ၢ်သံဒီး, ကမူထီၣ်ဒံးစ့ၢ်ကီးဧါ.” (ယိၤဘး ၁၄:၁၄) ပှၤလၢအသံတ့ၢ်တဂၤ ကအိၣ်မူဘၣ်က့ၤလၢ အသီတဘျီဒံးဧါ. တၢ်လၢ လံာ်စီဆှံပာ်ဖျါထီၣ်န့ၢ်ပှၤန့ၣ်​ မ့ၢ်တၢ်လၢအလီၤသးခုဒိၣ်မးလီၤ. ဘၣ်ဃးဒီး တၢ်ဂ့ၢ်တခါအံၤပကမၤလိဘၣ်လၢ တၢ်မၤလိလၢခံတခါအပူၤလီၤ.