တၢ်မၤလိ ၇
ယဟိဝၤယွၤန့ၣ် အကဲပှၤဒ်လဲၣ်တဂၤလဲၣ်
ဖဲနဆိကမိၣ်ထီၣ် ယဟိဝၤယွၤ အဂ့ၢ်အခါ နထံၣ်အီၤလၢ အကဲပှၤဒ်လဲၣ်တဂၤလဲၣ်. မ့ၢ်နထံၣ်အီၤ ဒ်သိးဒီး ပှၤတဂၤလၢ အစိအကမီၤဖးဒိၣ် ဘၣ်ဆၣ် အအိၣ်ယံၤဒီးပှၤ စၢၢ်တလၢၢ် ဒ်ဆၣ်တဖၣ်အသိးဧါ. မ့တမ့ၢ်ဘၣ်န့ၣ် မ့ၢ်နထံၣ်အီၤ ဒ်ပှၤတဂၤလၢ အဂံၢ်ဆူၣ်ဘါဆူၣ် လီၤဂာ်ဒ်သိးဒီး ကလံၤမုၢ် ဘၣ်ဆၣ် အတၢ်တူၢ်ဘၣ် တအိၣ်ဘၣ်န့ၣ်ဧါ. နီၢ်ကီၢ်န့ၣ် ယဟိဝၤယွၤ ကဲပှၤဒ်လဲၣ်တဂၤလဲၣ်. လံာ်စီဆှံ ပာ်ဖျါထီၣ်န့ၢ်ပှၤ ယဟိဝၤယွၤ အတၢ်ဂ့ၤတၢ်ဝါတဖၣ် ဒီးအပာ်ဖျါထီၣ်စ့ၢ်ကီးလၢ ကစၢ်ယွၤန့ၣ် အသူၣ်အိၣ်သးအိၣ်ပှၤ.
၁. ကစၢ်ယွၤန့ၣ် ဘၣ်မနုၤအဃိ ပထံၣ်အီၤတသ့ဘၣ်လဲၣ်.
“ကစၢ်ယွၤ မ့ၢ်ပှၤနီၢ်သး” လီၤ. (ယိၤဟၣ် ၄:၂၄) ယဟိဝၤယွၤန့ၣ် တအိၣ်ဒီး နီၢ်ခိက့ၢ်ဂီၤ ဒ်သိးဒီး ပှၤဟီၣ်ခိၣ်ဖိဘၣ်. ကစၢ်ယွၤန့ၣ် အကဲပှၤနီၢ်သး လၢပထံၣ်အီၤတသ့ဘၣ် ဒီးအအိၣ်လၢမူခိၣ် လၢတၢ်လီၢ်လၢ ပထံၣ်အီၤတသ့ဘၣ်.
၂. ယဟိဝၤယွၤ အတၢ်ဂ့ၤတၢ်ဝါတနီၤန့ၣ် မ့ၢ်မနုၤလဲၣ်.
ပထံၣ်ယဟိဝၤယွၤ တသ့ဘၣ်, ဘၣ်ဆၣ် ဖဲပသ့ၣ်ညါထီၣ် အဂ့ၢ်အခါ ပအဲၣ်အီၤ မ့ၢ်လၢ အဝဲကဲပှၤနီၢ်ကီၢ်တဂၤ ဒီးအအိၣ်ဒီး တၢ်ဂ့ၤတၢ်ဝါအါမး. လံာ်စီဆှံ တဲဝဲလၢ “ယဟိဝၤယွၤ အဲၣ်တၢ်စံၣ်ညီၣ်တီ အဃိ အဝဲတပာ်တ့ၢ်ကွံာ် ပှၤလၢအသးတီဒီးအီၤတဖၣ်ဘၣ်.” (စံးထီၣ်ပတြၢၤ ၃၇:၂၈) ကစၢ်ယွၤန့ၣ် “ပှဲၤဝဲဒီးတၢ်အဲၣ် တၢ်ကဟုကယာ် ဒီးတၢ်သးကညီၤ” လီၤဆီဒၣ်တၢ် လၢပှၤလၢ အတူၢ်ဘၣ် တၢ်ကီတၢ်ခဲတဖၣ် အဖီခိၣ်. (ယၤကိာ် ၅:၁၁) လံာ်စီဆှံ တဲဝဲလၢ “ယဟိဝၤယွၤ အိၣ်ဘူးဒီး ပှၤလၢအသးသ့ၣ်ဖး ဒီးအဝဲမၤပူၤဖျဲးပှၤလၢ အသးဂံၢ်ဘါလီၤစၢ်” လီၤ. (စံးထီၣ်ပတြၢၤ ၃၄:၁၈ ကွၢ်တၢ်ဂ့ၢ်အဘျဲၣ်) ဒီးတၢ်လၢပမၤတဖၣ်န့ၣ် အမၤသးခု မ့တမ့ၢ် အမၤသးအုး ယဟိဝၤယွၤအသးသ့န့ၣ် မ့ၢ်နသ့ၣ်ညါဧါ. ပှၤတဂၤ မ့ၢ်ဆၢတဲာ်လီၤအသး လၢအကမၤ တၢ်လၢအတဂ့ၤဘၣ်န့ၣ် အမၤဘၣ်ဒိ ဒီးအမၤသးအုး ကစၢ်ယွၤအသး. (စံးထီၣ်ပတြၢၤ ၇၈:၄၀, ၄၁) ဘၣ်ဆၣ် ပှၤတဂၤ မ့ၢ်မၤတၢ်လၢအဘၣ်န့ၣ် အမၤသးခု ကစၢ်ယွၤအသး.—ဖး ကတိၤဒိ ၂၇:၁၁.
၃. ယဟိဝၤယွၤ အဲၣ်ပှၤန့ၣ် အပာ်ဖျါထီၣ်ဝဲဒ်လဲၣ်.
တၢ်အဲၣ်တၢ်ကွံန့ၣ် မ့ၢ်ဝဲ ယဟိဝၤယွၤ အတၢ်ဂ့ၤတၢ်ဝါ အဒိၣ်ကတၢၢ်တခါ. ဒီးလံာ်စီဆှံ တဲဝဲလၢ “ကစၢ်ယွၤန့ၣ် မ့ၢ်တၢ်အဲၣ်တၢ်ကွံလီၤ.” (၁ ယိၤဟၣ် ၄:၈) ယဟိဝၤယွၤ အဲၣ်ပှၤဟီၣ်ခိၣ်ဖိန့ၣ် အပာ်ဖျါထီၣ်ဝဲ လၢလံာ်စီဆှံအပူၤ တကးဒံးဘၣ် အပာ်ဖျါထီၣ်စ့ၢ်ကီးဝဲ ခီဖျိအတၢ်ဘၣ်တ့. (ဖး မၤတၢ် ၁၄:၁၇.) အဒိ ကစၢ်ယွၤ တ့လီၤပှၤဒ်လဲၣ်န့ၣ် ပကတဲသကိး. ကစၢ်ယွၤ တ့လီၤပှၤဃုာ်ဒီး တၢ်သ့တၢ်ဘၣ် လၢပကထံၣ် တၢ်အလွဲၢ်လၢ အဃံအလၤတဖၣ်, နၢ်ဟူတၢ်ဒ့တၢ်အူဒီး တၢ်သူၣ်ဝံၣ်သးဆၢ ဒီးပကသ့ၣ်ညါ တၢ်အီၣ်အဝံၣ်အဘဲတဖၣ်လီၤ. ကစၢ်ယွၤ အဲၣ်ဒိးလၢ ပတၢ်အိၣ်မူန့ၣ် ကပှဲၤဒီးတၢ်သးခု.
ဃုသ့ၣ်ညါအါထီၣ်
ပကမၤလိကွၢ် ဘၣ်ဃးဒီး ဖဲကစၢ်ယွၤ တ့လီၤတၢ်လၢ အလီၤကမၢကမၣ်တဖၣ်အခါ အသူဝဲမနုၤလဲၣ်. ဝံၤဒီး ကစၢ်ယွၤ ပာ်ဖျါထီၣ်န့ၢ်ပှၤ အတၢ်ဂ့ၤတၢ်ဝါ လၢအဂ့ၤဒိၣ်မးတဖၣ်ဒ်လဲၣ်.
၄. သးစီဆှံန့ၣ် မ့ၢ်ဝဲ ကစၢ်ယွၤ အတၢ်စိတၢ်ကမီၤ
ဒ်ပသူပစု လၢပကမၤတၢ်အသိး ယဟိဝၤယွၤ သူအသးစီဆှံ လၢအကမၤတၢ်အဂီၢ်. လံာ်စီဆှံ ပာ်ဖျါထီၣ်ဝဲလၢ သးစီဆှံန့ၣ် တမ့ၢ်ပှၤတဂၤဘၣ်, ဘၣ်ဆၣ် အမ့ၢ်ဝဲ ကစၢ်ယွၤ အတၢ်စိတၢ်ကမီၤ လၢအသူဝဲ ဒ်သိးအကမၤ တၢ်တမံၤမံၤအဂီၢ်လီၤ. ဖး လူၤကၣ် ၁၁:၁၃ ဒီး မၤတၢ် ၂:၁၇ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ပှၤလၢအဃ့ဝဲ ဒ်သိးအကန့ၢ်ဘၣ် သးစီဆှံန့ၣ် ကစၢ်ယွၤက “လူလီၤ” န့ၢ်အီၤသးစီဆှံ လၢအလိၤလီၤ. အဃိ နဆိကမိၣ် သးစီဆှံန့ၣ် အကဲပှၤတဂၤဧါ မ့တမ့ၢ် အကဲကစၢ်ယွၤ အတၢ်စိတၢ်ကမီၤဧါ. ဘၣ်မနုၤအဃိ နတဲဒ်န့ၣ်လဲၣ်.
ဖဲယဟိဝၤယွၤ တ့လီၤဝဲတၢ်လၢ အလီၤကမၢကမၣ်တဖၣ်အခါ အသူဝဲ အသးစီဆှံ. ဖး စံးထီၣ်ပတြၢၤ ၃၃:၆ ဒီး ၂ ပ့းတရူး ၁:၂၀, ၂၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ယဟိဝၤယွၤ သူတ့ၢ်ဝဲ အသးစီဆှံ လၢအကမၤ တၢ်မနုၤလဲၣ်.
၅. ယဟိဝၤယွၤ အိၣ်ဒီး တၢ်ဂ့ၤတၢ်ဝါ လၢအဂ့ၤဒိၣ်မးတဖၣ်
စီၤမိၤၡ့န့ၣ် အကဲဝဲ ကစၢ်ယွၤ အခ့အပှၤတဂၤလၢ အသးတီလၢ အနံၣ်အါမးလံ, ဘၣ်ဆၣ် အဝဲအဲၣ်ဒိး သ့ၣ်ညါအါထီၣ် အတၢ်ဘၣ်တ့ကစၢ်အဂ့ၢ်ဒံး. အဃိ စီၤမိၤၡ့ တဲဘၣ်ကစၢ်ယွၤလၢ “ဒုးသ့ၣ်ညါယၤ တၢ်လၢနမၤတဖၣ် ဒ်သိး ယကသ့ၣ်ညါ အါထီၣ်နၤ” တက့ၢ်. (၂ မိၤၡ့ ၃၃:၁၃) အဃိ ယဟိဝၤယွၤ အတၢ်ဂ့ၤတၢ်ဝါအိၣ်ဒ်လဲၣ်န့ၣ် အပာ်ဖျါထီၣ်န့ၢ်ဝဲ စီၤမိၤၡ့. ဖး ၂ မိၤၡ့ ၃၄:၄-၆ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ယဟိဝၤယွၤ ပာ်ဖျါထီၣ်န့ၢ် စီၤမိၤၡ့လၢ အနီၢ်ကစၢ် အတၢ်ဂ့ၤတၢ်ဝါ မနုၤတဖၣ်လဲၣ်.
ယဟိဝၤယွၤ အတၢ်ဂ့ၤတၢ်ဝါတဖၣ်အံၤ နဘၣ်သူၣ်ဘၣ်သး ဒိၣ်ကတၢၢ် ဖဲလဲၣ်တခါလဲၣ်.
၆. ယဟိဝၤယွၤ သူၣ်အိၣ်သးအိၣ် ပှၤဟီၣ်ခိၣ်ဖိ
ပှၤဧ့ၤဘြံၤဖိ လၢအမ့ၢ် ကစၢ်ယွၤ အပှၤဂီၢ်မုၢ်န့ၣ် ကဲတ့ၢ်ကုၢ် လၢကီၢ်အဲၤကူပတူး အပူၤ. ဖဲယဟိဝၤယွၤ အပှၤဂီၢ်မုၢ် တူၢ်ဘၣ်တၢ်ကီတၢ်ခဲအခါ အဝဲတူၢ်ဘၣ်ဝဲဒ်လဲၣ်. အိးထီၣ်ကနၣ် တၢ်ကလုၢ် ဒီးဖဲနကနၣ် တၢ်ကလုၢ်အခါ ကွၢ်ပိာ်အခံ လၢနလံာ်စီဆှံအပူၤ မ့တမ့ၢ် ဖး ၂ မိၤၡ့ ၃:၁-၁၀. ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
လံာ်စီဆှံအဆၢတဖၣ်အံၤ ပာ်ဖျါထီၣ်ဝဲလၢ ဖဲပှၤဟီၣ်ခိၣ်ဖိ တူၢ်ဘၣ်တၢ်ကီတၢ်ခဲအခါ ယဟိဝၤယွၤ တူၢ်ဘၣ်ဝဲဒ်လဲၣ်.—ကွၢ် အဆၢဖိ ၇ ဒီး ၈.
နဆိကမိၣ် ယဟိဝၤယွၤ အဲၣ်ဒိးမၤစၢၤ ပှၤဟီၣ်ခိၣ်ဖိ နီၢ်ကီၢ်ဧါ ဒီးအမၤစၢၤဝဲသ့ဧါ. ဘၣ်မနုၤအဃိ နဆိကမိၣ် ဒ်န့ၣ်လဲၣ်.
၇. ယဟိဝၤယွၤ အတၢ်ဘၣ်တ့တဖၣ်န့ၣ် ပာ်ဖျါထီၣ်ဝဲ အတၢ်ဂ့ၤတၢ်ဝါတဖၣ်
ယဟိဝၤယွၤ ပာ်ဖျါထီၣ် အတၢ်ဂ့ၤတၢ်ဝါတဖၣ် ခီဖျိ တၢ်လၢအတ့လီၤဝဲတဖၣ်. ကွၢ်တၢ်ဂီၤမူ. ဝံၤဒီး ဖး ရိမ့ၤ ၁:၂၀ ဒီးတဲသကိး တၢ်သံကွၢ် လၢလာ်တဖျၢၣ်အံၤ.
နမ့ၢ်ကွၢ် ယဟိဝၤယွၤ အတၢ်ဘၣ်တ့တဖၣ်န့ၣ် နကထံၣ်ဘၣ် ယဟိဝၤယွၤ အတၢ်ဂ့ၤတၢ်ဝါ မနုၤတဖၣ်လဲၣ်.
ပှၤတနီၤတဲဝဲလၢ– “ကစၢ်ယွၤန့ၣ် တမ့ၢ်ပှၤတဂၤဘၣ်. အကဲဝဲ တၢ်စိတၢ်ကမီၤတခါ လၢအအိၣ်လၢ တၢ်လီၢ်ကိးပူၤဒဲးလီၤ.”
နၤမီၤ နဆိကမိၣ်ဒ်လဲၣ်.
ဘၣ်မနုၤအဃိ နဆိကမိၣ် ဒ်န့ၣ်လဲၣ်.
တၢ်ဂ့ၢ်လၢအရ့ဒိၣ်
ကစၢ်ယွၤန့ၣ် အကဲပှၤနီၢ်သး လၢပထံၣ်အီၤတသ့ဘၣ်, ဘၣ်ဆၣ် အအိၣ်ဒီး တၢ်ဂ့ၤတၢ်ဝါအါမး. ဒီးအတၢ်ဂ့ၤတၢ်ဝါ အဒိၣ်ကတၢၢ်တခါန့ၣ် မ့ၢ်ဝဲ တၢ်အဲၣ်တၢ်ကွံ.
တၢ်ကွၢ်ကဒါက့ၤ
ယဟိဝၤယွၤန့ၣ် ဘၣ်မနုၤအဃိ ပထံၣ်အီၤ တသ့ဘၣ်လဲၣ်.
သးစီဆှံန့ၣ် မ့ၢ်မနုၤလဲၣ်.
ယဟိဝၤယွၤ အတၢ်ဂ့ၤတၢ်ဝါတနီၤန့ၣ် မ့ၢ်မနုၤလဲၣ်.
ဃုသ့ၣ်ညါ
မၤလိအါထီၣ် ဘၣ်ဃးဒီး ယဟိဝၤယွၤ အတၢ်ဂ့ၤတၢ်ဝါ လၢအရ့ဒိၣ်ကတၢၢ်လွံၢ်ခါ.
ဖးကွၢ် တၢ်အုၣ်သး လၢအပာ်ဖျါထီၣ်ဝဲလၢ ကစၢ်ယွၤ တအိၣ်လၢ တၢ်လီၢ်ကိးပူၤဒဲးဘၣ် ဒီးအတအိၣ်လၢ တၢ်ကိးမံၤဒဲးအကျါဘၣ်.
“မ့ၢ်ကစၢ်ယွၤ အိၣ်လၢ တၢ်လီၢ် ကိးပူၤဒဲးဧါ” (တၢ်မၤလိလၢ အအိၣ်လၢ online အဖီခိၣ်)
ဘၣ်မနုၤအဃိ လံာ်စီဆှံ ထိၣ်သတြီၤဝဲ သးစီဆှံဒီး ကစၢ်ယွၤအစုလဲၣ်.
“သးစီဆှံန့ၣ် မ့ၢ်မနုၤလဲၣ်” (တၢ်မၤလိလၢ အအိၣ်လၢ online အဖီခိၣ်)
ပှၤပိာ်ခွါတဂၤ လၢအမဲာ်တထံၣ်တၢ်ဘၣ်န့ၣ် တနာ်ဝဲလၢ ကစၢ်ယွၤ အဲၣ်အီၤဘၣ်. ဘၣ်ဆၣ် ဘၣ်မနုၤအဃိ အတၢ်ဆိကမိၣ် ဆီတလဲဝဲလဲၣ်.
“ခဲအံၤ ယတူၢ်ဘၣ်လၢ ယမၤစၢၤပှၤဂၤ သ့ဝဲလီၤ” (တၢးထီခိးတၢ်, လါအီးကထိဘၢၣ် ၁, ၂၀၁၅)