ယဟိဝၤယွၤ ဟံးစုနဲၣ်ကျဲဝဲ တၢ်အိၣ်ဖှိၣ် ခီဖျိယ့ၣ်ၡူး

ယဟိဝၤယွၤန့ၣ် အမ့ၢ်ကစၢ်ယွၤ လၢအမၤတၢ်ဒီး အရဲၣ်လီၤကျဲၤလီၤတၢ် လီၤတံၢ်လီၤဆဲး. (၁ ကရံၣ်သူး ၁၄:၃၃) အဃိ ပသ့ၣ်ညါဘၣ်လၢ ယဟိဝၤယွၤ ကဟံးစုနဲၣ်ကျဲဝဲ အပှၤဂီၢ်မုၢ် သပှၢ်တၢၢ်. ယဟိဝၤယွၤ ဟံးစုနဲၣ်ကျဲ အပှၤဂီၢ်မုၢ် ခီဖျိ ယ့ၣ်ၡူးဒ်လဲၣ်. ဒ်သိး တၢ်ဟံးစုနဲၣ်ကျဲအံၤ ကကဲဘျုးအဂီၢ် ပဆီၣ်ထွဲမၤစၢၤ ကသ့ဒ်လဲၣ်.

၁. မတဂၤကဲ တၢ်အိၣ်ဖှိၣ်အခိၣ်လဲၣ်.

လံာ်စီဆှံတဲဝဲလၢ “ခရံာ်မ့ၢ်တၢ်အိၣ်ဖှိၣ်အခိၣ်.” (အ့းဖ့းစူး ၅:၂၃) ယ့ၣ်ၡူးအိၣ်လၢမူခိၣ် ဒီးအတီခိၣ်ရိၤမဲဝဲ ယဟိဝၤယွၤ အပှၤဂီၢ်မုၢ် လၢဟီၣ်ခိၣ်ဒီဘ့ၣ်ညါ. ယ့ၣ်ၡူး ပာ်ထီၣ်ဝဲ “ကုၢ်လၢအတီ ဒီးအကူၣ်တၢ်သ့” လၢအမ့ၢ်ဝဲ တၢ်အိၣ်ဖှိၣ်သးပှၢ်တကရူၢ် လၢအဒိၣ်တုၤခိၣ်ပှဲၤ ဒီးအဝဲသ့ၣ်မ့ၢ်ဝဲ ပှၤပၢဆှၢတၢ်ကမံးတံာ်. (ဖး မးသဲ ၂၄:​၄၅-၄၇.) ပှၤပၢဆှၢတၢ်ကမံးတံာ်န့ၣ် ဟံးစုနဲၣ်ကျဲဝဲ တၢ်အိၣ်ဖှိၣ်တဖၣ် လၢဟီၣ်ခိၣ်ဒီဘ့ၣ်ညါ ဒ်သိးဒီး တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ်လၢ ဝ့ၢ်ယရူၤၡလ့ၣ် လၢအအိၣ်လၢ တၢ်မၢဖိအစိၤ မၤဝဲအသိးလီၤ. (မၤတၢ် ၁၅:၂) ဘၣ်ဆၣ် ပှၤပၢဆှၢတၢ်ကမံးတံာ်န့ၣ် တကဲဝဲ ပတၢ်ကရၢကရိအခိၣ်ဘၣ်. အဝဲသ့ၣ် ဖးလံာ်စီဆှံ ဒ်သိးကသ့ၣ်ညါဘၣ်လၢ ယဟိဝၤယွၤ အဲၣ်ဒိးလၢ အဝဲသ့ၣ်မၤမနုၤလဲၣ် ဒီးအဝဲသ့ၣ် မၤပိာ်ထွဲဝဲ ယ့ၣ်ၡူးအတၢ်ဟံးစုနဲၣ်ကျဲ လၢတၢ်သးအိၣ်အပူၤ.

၂. တၢ်အိၣ်ဖှိၣ်သးပှၢ်တဖၣ်န့ၣ် အမူဒါအိၣ်ဒ်လဲၣ်.

တၢ်အိၣ်ဖှိၣ်သးပှၢ်တဖၣ်န့ၣ် မ့ၢ်ဝဲ ပိာ်ခွါလၢ အကဲဝဲ ခရံာ်ဖိလၢအသးတီ လၢအနံၣ်အါမး. အဝဲသ့ၣ်သိၣ်လိ ယဟိဝၤယွၤ အပှၤဂီၢ်မုၢ် လၢလံာ်စီဆှံ, မၤစၢၤအဝဲသ့ၣ် ဒီးဟ့ၣ်ဂံၢ်ဟ့ၣ်ဘါအဝဲသ့ၣ်. ဒီးမူဒါလၢ တၢ်အိၣ်ဖှိၣ်သးပှၢ်တဖၣ် မၤဝဲန့ၣ် အဝဲသ့ၣ် တဒိးန့ၢ်ဘၣ်ဝဲ လါလဲဘၣ်. ဘၣ်ဆၣ် အဝဲသ့ၣ် မၤအမူဒါလၢ “တၢ်သူၣ်အိၣ်သးအိၣ်လၢ ကစၢ်ယွၤအမဲာ်ညါ” ဒီးတမၤဝဲလၢ တၢ်သးကွံလၢ ကမၤန့ၢ်တၢ်လၢ အနီၢ်ကစၢ်အဂီၢ်ဘၣ်. အဝဲသ့ၣ် မၤဝဲလၢ တၢ်သူၣ်ဆူၣ်သးဆူၣ်အပူၤလီၤ. (၁ ပ့းတရူး ၅:​၁, ၂) တၢ်အိၣ်ဖှိၣ်သးပှၢ်တဖၣ်န့ၣ် အိၣ်ဒီး တၢ်အိၣ်ဖှိၣ် အပှၤမၤစၢၤတၢ်တဖၣ် လၢအမၤစၢၤအဝဲသ့ၣ်. လၢခံ တၢ်အိၣ်ဖှိၣ် အပှၤမၤစၢၤတၢ်တဖၣ်န့ၣ် တုၤထီၣ်ထီၣ်ဘးလၢ ကကဲထီၣ် တၢ်အိၣ်ဖှိၣ်သးပှၢ်သ့.

ပှၤပၢဆှၢတၢ်ကမံးတံာ်န့ၣ် ပာ်ထီၣ်ဝဲ တၢ်အိၣ်ဖှိၣ်သးပှၢ်တနီၤ လၢကကဲထီၣ် ကဝီၤအပှၤကွၢ်တၢ်. ကဝီၤအပှၤကွၢ်တၢ်တဖၣ်အံၤ လဲၤဟးအိၣ်သကိး တၢ်အိၣ်ဖှိၣ်အါဖျၢၣ် ဒ်သိး ကဟံးစုနဲၣ်ကျဲ ဒီးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်. တကးဒံးဘၣ် ကဝီၤအပှၤကွၢ်တၢ်တဖၣ် ကွၢ်ဝဲလံာ်စီဆှံ အတၢ်ဘျၢဒီးတၢ်ဟံးစုနဲၣ်ကျဲ ဒ်သိးကဆၢတဲာ်ဝဲလၢ မ့ၢ်ဒီပုၢ်ဝဲၢ်ခွါတဂၤဂၤ တုၤထီၣ်ထီၣ်ဘးလၢ အကကဲထီၣ် တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ် အပှၤမၤစၢၤတၢ်လံဧါ တတုၤထီၣ်ထီၣ်ဘးဒံးဘၣ်ဧါအဂီၢ်လီၤ.​—၁ တံၤမသ့း ၃:​၁-၁၀, ၁၂; တံတူး ၁:​၅-၉.

၃. ယဟိဝၤပှၤအုၣ်အသး ကိးဂၤဒဲးန့ၣ် အိၣ်ဒီး မူဒါမနုၤလဲၣ်.

ပှၤလၢ တၢ်အိၣ်ဖှိၣ်ပူၤ ကိးဂၤဒဲးန့ၣ် “စံးထီၣ်ပတြၢၤ ‘ယဟိဝၤယွၤ’ အမံၤ.” ဒီးအဝဲသ့ၣ် မၤဝဲဒ်န့ၣ် ခီဖျိ ဟ့ၣ်ထီၣ်ဝဲတၢ်စံးဆၢ လၢတၢ်အိၣ်ဖှိၣ်, ဟ့ၣ်တၢ်စံၣ်တဲၤတဲလီၤတၢ် မ့တမ့ၢ် မၤကၠိဖိမူဒါ ဒီးသးဝံၣ်တၢ်လၢ တၢ်အိၣ်ဖှိၣ်ပူၤ. တကးဒံးဘၣ် အဝဲသ့ၣ် ဂုာ်ကျဲးစၢးဝဲ လၢအဂ့ၤကတၢၢ် ဒ်သိးကစံၣ်တဲၤတဲလီၤတၢ်.​—ဖး စံးထီၣ်ပတြၢၤ ၁၄၈:​၁၂, ၁၃.

ဃုသ့ၣ်ညါအါထီၣ်

၄. ယ့ၣ်ၡူး ကဲဝဲခိၣ်နၢ် လၢအသး ဂ့ၤတဂၤ

ယ့ၣ်ၡူး အဲၣ်ဒိးဝဲလၢ ပကတူၢ်လိာ်အီၤ ဒ်သိးဒီး ပခိၣ်ပနၢ်တဂၤ. ဖး မးသဲ ၁၁:​၂၈-၃၀ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ယ့ၣ်ၡူးန့ၣ် အကဲဝဲ ခိၣ်နၢ်ဒ်လဲၣ်တဂၤလဲၣ် ဒီးပှၤလၢအအိၣ်လၢ အတၢ်တီခိၣ်ရိၤမဲ အဖီလာ်န့ၣ် အဝဲသ့ၣ် အသးကမၤအသးဒ်လဲၣ်.

တၢ်ဂီၤမူ– တၢ်အိၣ်ဖှိၣ်သးပှၢ်တဖၣ် မၤစၢၤတၢ်ဖဲ ဟီၣ်ခိၣ်ဟူးလၢ နံၤဖီ(လ်) အတၢ်လီၢ် (၄:၅၆)

ဖဲတၢ်အိၣ်ဖှိၣ်သးပှၢ်တဖၣ် မၤအမူဒါအခါ အကဘၣ်မၤဝဲဒ်လဲၣ်န့ၣ် လံာ်စီဆှံ ပာ်ဖျါထီၣ်ဝဲ လီၤတံၢ်လီၤဆဲး.

ဖး ယၡါယၤ ၃၂:၂ ဒီး ၁ ပ့းတရူး ၅:​၁-၃ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• တၢ်အိၣ်ဖှိၣ်သးပှၢ်တဖၣ် ဂုာ်ကျဲးစၢး မၤမုာ်ထီၣ်ပှၤဂၤအသး ဒ်ယ့ၣ်ၡူးမၤဝဲအသိးလီၤ. နသ့ၣ်ညါဘၣ် ဒ်အံၤအဃိ နသးမၤသးဒ်လဲၣ်.

• တၢ်အိၣ်ဖှိၣ်သးပှၢ်တဖၣ် ကွၢ်လိဝဲ ယ့ၣ်ၡူးအဒိအတဲာ် လၢကျဲလၢအဂၤ ဒ်လဲၣ်.

၅. တၢ်အိၣ်ဖှိၣ်သးပှၢ်တဖၣ် သိၣ်လိပှၤခီဖျိ ပာ်လီၤဝဲ တၢ်အဒိလၢအဂ့ၤ

တၢ်ဂီၤမူ– တၢ်အိၣ်ဖှိၣ်သးပှၢ်တဖၣ် တီခိၣ်ရိၤမဲတၢ် (၇:၃၉)

ယ့ၣ်ၡူးပာ်လီၤဝဲ တၢ်ဘျၢလၢ ပှၤလၢ အတီခိၣ်ရိၤမဲတၢ် လၢတၢ်အိၣ်ဖှိၣ်ပူၤအဂီၢ်. ဖး မးသဲ ၂၃:​၈-၁၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• လံာ်စီဆှံအတၢ်ဘျၢလၢ တၢ်အိၣ်ဖှိၣ်သးပှၢ်တဖၣ်အဂီၢ်န့ၣ် အိၣ်ဒ်လဲၣ်. နဆိကမိၣ် တၢ်ဘူၣ်တၢ်ဘါခိၣ်နၢ်တဖၣ်န့ၣ် မၤထွဲဝဲတၢ်လၢ လံာ်စီဆှံတဲဝဲဧါ.

1. ၁. တၢ်အိၣ်ဖှိၣ်သးပှၢ်တဖၣ် ဆဲးမၤဂၢၢ်ကျၢၤထီၣ် အတၢ်ရ့လိာ်သးဒီး ယဟိဝၤယွၤ ဒီးအဝဲသ့ၣ် မၤစၢၤ အဟံၣ်ဖိဃီဖိ လၢကမၤဂၢၢ်ကျၢၤထီၣ် အတၢ် ရ့လိာ်သးဒီး ယဟိဝၤယွၤ

2. ၂. တၢ်အိၣ်ဖှိၣ်သးပှၢ်တဖၣ် သးအိၣ် ပှၤခဲလၢာ် လၢတၢ်အိၣ်ဖှိၣ်ပူၤ

3. ၃. တၢ်အိၣ်ဖှိၣ်သးပှၢ်တဖၣ် စံၣ်တဲၤတဲလီၤတၢ်ထီဘိ

4. ၄. တၢ်အိၣ်ဖှိၣ်သးပှၢ်တဖၣ် ကဲဝဲပှၤလၢအသိၣ်လိတၢ်, အဝဲသ့ၣ် မၤကဆှဲကဆှီစၢၤတၢ် ဒီးမၤဝဲမူဒါ လၢအဂၤတဖၣ်စ့ၢ်ကီး

၆. ဒိကနၣ် တၢ်အိၣ်ဖှိၣ်သးပှၢ်တဖၣ် အကလုၢ်

လံာ်စီဆှံ ပာ်ဖျါထီၣ်န့ၢ်ပှၤ တၢ်ဂ့ၢ်အရ့ဒိၣ်တခါ လၢအမၤစၢၤပှၤဒ်သိး ပကဒိကနၣ် တၢ်အိၣ်ဖှိၣ်သးပှၢ်တဖၣ် အကလုၢ်. ဖး ဧ့ၤဘြံၤ ၁၃:၁၇ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဘၣ်မနုၤအဃိ လံာ်စီဆှံတဲဝဲလၢ ပကဘၣ်သးအိၣ် ဒိကနၣ် ပှၤလၢ အတီခိၣ်ရိၤမဲတၢ် အကလုၢ်လဲၣ်. ဘၣ်ဃးဒီး လံာ်စီဆှံတၢ်ဘျၢအံၤ နဆိကမိၣ်ဒ်လဲၣ်.

ဖး လူၤကၣ် ၁၆:၁၀ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• တၢ်ဂ့ၢ်တခါခါလၢ ပမ့ၢ်ဆိကမိၣ်လၢ အရ့တဒိၣ်ဘၣ်သနာ်က့ ဘၣ်မနုၤအဃိ ပဘၣ်ဒိကနၣ် တၢ်အိၣ်ဖှိၣ်သးပှၢ်တဖၣ် အကလုၢ်ထီဘိလဲၣ်.

တၢ်ဂ့ၢ်လၢအရ့ဒိၣ်

ယ့ၣ်ၡူးန့ၣ် ကဲဝဲ တၢ်အိၣ်ဖှိၣ်အခိၣ်. ဒီးတၢ်အိၣ်ဖှိၣ်သးပှၢ်တဖၣ် အိၣ်လၢယ့ၣ်ၡူး အတၢ်ဟံးစုနဲၣ်ကျဲအဖီလာ်. တၢ်အိၣ်ဖှိၣ်သးပှၢ်တဖၣ်န့ၣ် မၤမုာ်ထီၣ်ပှၤဂၤ ဒီးပာ်လီၤတၢ်အဒိလၢအဂ့ၤ အဃိ ပဒိကနၣ်အဝဲသ့ၣ်အကလုၢ်ညီ.

တၢ်ကွၢ်ကဒါက့ၤ

• မတဂၤကဲ တၢ်အိၣ်ဖှိၣ်အခိၣ်လဲၣ်.

• တၢ်အိၣ်ဖှိၣ်သးပှၢ်တဖၣ် မၤစၢၤတၢ် အိၣ်ဖှိၣ်ဒ်လဲၣ်.

• ယဟိဝၤပှၤအုၣ်အသး ကိးဂၤဒဲး အိၣ်ဒီးမူဒါဒ်လဲၣ်.

ဃုသ့ၣ်ညါ

ကွၢ်တၢ်ဂီၤမူ လၢအပာ်ဖျါထီၣ်ဝဲ ပှၤပၢဆှၢတၢ်ကမံးတံာ် ဒီးတၢ်အိၣ်ဖှိၣ်သးပှၢ်တဖၣ် သူၣ်အိၣ်သးအိၣ်ဝဲ ဒီပုၢ်ဝဲၢ်မုၣ်ခွါတဖၣ်ဒိၣ်မး.

မၤဆူၣ်ထီၣ် ဒီပုၢ်ဝဲၢ်တဖၣ်အဂံၢ်ဘါ ဖဲပှၤတြီပတၢ်မၤအခါ (၄:၂၂)

ကွၢ်တၢ်ဂီၤမူ လၢအပာ်ဖျါထီၣ်ဝဲ ကဝီၤအပှၤကွၢ်တၢ်တဖၣ် အမူဒါ.

ကဝီၤအပှၤကွၢ်တၢ်လၢ အအိၣ်လၢဒူသဝီပူၤတဂၤ အတၢ်အိၣ်မူ (၄:၅၁)

ဖးကွၢ် တၢ်ဂ့ၢ်ဘၣ်ဃးဒီး ဒီပုၢ်ဝဲၢ်မုၣ်တဖၣ်အမူဒါ လၢတၢ်အိၣ်ဖှိၣ်ပူၤ.

“ယဟိဝၤပှၤအုၣ်အသး ပိာ်မုၣ်တဖၣ်လၢ အစံၣ်တဲၤတဲလီၤတၢ်န့ၣ်အိၣ်ဧါ” (တၢးထီခိးတၢ်, လါစဲးပတ့ဘၢၣ် ၁, ၂၀၁၂)

ဖးကွၢ် တၢ်ဂ့ၢ်ဘၣ်ဃးဒီး တၢ်အိၣ်ဖှိၣ်သးပှၢ်တဖၣ် ဂုာ်ကျဲးစၢး ဟ့ၣ်ဂံၢ်ဟ့ၣ်ဘါ အဒီပုၢ်ဝဲၢ် ခရံာ်ဖိတဖၣ်ဒ်လဲၣ်.

“ခရံာ်ဖိ တၢ်အိၣ်ဖှိၣ်သးပှၢ်တဖၣ် ‘မၤသကိးတၢ်ဒီးပှၤ ဒ်သိး ပကအိၣ် ဒီးတၢ်သးခု’” (တၢးထီခိးတၢ်, လါယနူၤအါရံၤ ၁၅, ၂၀၁၃)