တၢ်မၤလိ ၅၆
ဂုာ်ကျဲးစၢးဒ်သိး တၢ်အိၣ်ဖှိၣ်ကအိၣ်ဒီး တၢ်ဃူတၢ်ဖိးထီဘိ
စီၤပၤဒၤဝံးတဲဝဲလၢ “ဒီပုၢ်ဝဲၢ်တဖၣ် အိၣ်ဝဲဒ်သိးသိးလၢ တၢ်ဃူတၢ်ဖိးအပူၤန့ၣ် ဂ့ၤဝဲဒိၣ်မး ဒီးမုာ်ဝဲဒိၣ်မးလီၤ.” ဖဲပအိၣ်ဘၣ်လၢ ပဒီပုၢ်ဝဲၢ်ခရံာ်ဖိတဖၣ် အကျါအခါ ပတူၢ်ဘၣ်ဒ်သိးဒီး စီၤဒၤဝံးလီၤ. (စံးထီၣ်ပတြၢၤ ၁၃၃:၁) ပအိၣ်ဒီး တၢ်ဃူတၢ်ဖိး သနာ်က့ ပတၢ်ဃူတၢ်ဖိးန့ၣ် တဟဲကဲထီၣ်သး အနီၢ်ကစၢ်ဒၣ်ဝဲဘၣ်. ပဝဲကိးဂၤဒဲး ပအိၣ်ဒီးမူဒါလၢ ပကဒုးအိၣ်ထီၣ် တၢ်ဃူတၢ်ဖိးလီၤ.
၁. ကစၢ်ယွၤ အပှၤဂီၢ်မုၢ်န့ၣ် အလီၤဆီဒီးပှၤဂၤဒ်လဲၣ်.
နမ့ၢ်ထီၣ်ဘၣ် တၢ်အိၣ်ဖှိၣ်လၢထံကီၢ်အဂၤန့ၣ် ဘၣ်သ့ၣ်သ့ၣ် နတဲအဝဲသ့ၣ်အကျိာ် တဘၣ်ဘၣ်, ဘၣ်ဆၣ် နတတူၢ်ဘၣ်လၢ နကဲပှၤတမှံၤဘၣ်. ဘၣ်မနုၤအဃိ ပတဲဒ်န့ၣ်သ့လဲၣ်. မ့ၢ်လၢ ပမ့ၢ်အိၣ်လၢတၢ်လီၢ် တတီၤဂ့ၤတတီၤဂ့ၤ ပသူလံာ်လဲၢ်တမံၤဃီ လၢကမၤလိလံာ်စီဆှံအဂီၢ်. ဒီးပဂုာ်ကျဲးစၢး ပာ်ဖျါထီၣ်တၢ်အဲၣ်လၢ တဂၤဒီးတဂၤအဖီခိၣ်လီၤ. ဒီးပအိၣ်တၢ်လီၢ် တပူၤဂ့ၤတပူၤဂ့ၤ ပဝဲခဲလၢာ်ပ ‘ကိးထီၣ် . . . ယဟိဝၤယွၤအမံၤ ဒီးဘူၣ်ထီၣ်ဘါထီၣ်အီၤ ဃူဃူဖိးဖိးလီၤ.’—စဖါနယၤ ၃:၉.
၂. နဒုးအိၣ်ထီၣ် တၢ်ဃူတၢ်ဖိးသ့ဒ်လဲၣ်.
လံာ်စီဆှံ တဲဝဲလၢ “အဲၣ်လိာ်ကွံလိာ်သုသးဒိၣ်ဒိၣ် လၢသူၣ်ဒီဖျၢၣ်သးဒီဖျၢၣ်တက့ၢ်.” (၁ ပ့းတရူး ၁:၂၂) နမၤထွဲ လံာ်စီဆှံအတၢ်ဟ့ၣ်ကူၣ်အံၤ ကသ့ဒ်လဲၣ်. နမၤထွဲ တၢ်ဟ့ၣ်ကူၣ်အံၤ သ့ခီဖျိ နတကွၢ်ထဲ ပှၤဂၤအတၢ်ဂံၢ်စၢ်ဘါစၢ်ဘၣ် ဒီးနကွၢ်လၢ အဝဲသ့ၣ် အတၢ်ဂ့ၤတၢ်ဝါတခီ. နတဘၣ်ရ့ထဲ ပှၤလၢအတၢ်အိၣ်သး လီၤဂာ်ဒီးနၤတဖၣ်ဘၣ်. နဘၣ်ဂုာ်ကျဲးစၢးရ့အါထီၣ် နဒီပုၢ်ဝဲၢ်မုၣ်ခွါ လၢအတၢ်အိၣ်သး လီၤဆီဒီးနၤတဖၣ်လီၤ. နမ့ၢ်ထံၣ်ဆံး ဒီးကွၢ်ဒိၣ်ဆံးအါစှၤ ပှၤဂၤန့ၣ် ဂုာ်ကျဲးစၢး မၤလီၤမၢ်ကွံာ် တၢ်ပာ်သူၣ်ပာ်သးအံၤ.—ဖး ၁ ပ့းတရူး ၂:၁၇.a
၃. နၤဒီး ဒီပုၢ်ဝဲၢ်တဂၤ အတၢ်ထံၣ် မ့ၢ်တဒ်သိးလိာ်သးဘၣ်န့ၣ် နကမၤဒ်လဲၣ်.
ပအိၣ်ဒီးတၢ်ဃူတၢ်ဖိး သနာ်က့ ပတမ့ၢ်ပှၤလၢပှၤပှဲၤဘၣ် အဃိ တဘျီတခီၣ် ပမၤဘၣ်ဒိပှၤဂၤအသး. အဃိ ကစၢ်ယွၤအကလုၢ်ကထါ တဲပှၤလၢ “ဆဲး . . . ပျၢ်လိာ်သးတၢ်ကမၣ် တဂၤဒီးတဂၤ လၢာ်လၢာ်ဆ့ဆ့” ဒီးတဲကဒီးဝဲလၢ “ဒ်ယဟိဝၤယွၤ ပျၢ်သုတၢ်ကမၣ် လၢာ်လၢာ်ဆ့ဆ့အသိးန့ၣ် သုကဘၣ်မၤ ဒ်န့ၣ်အသိး စ့ၢ်ကီးလီၤ.” (ဖး ကလီးစဲ ၃:၁၃.) ပမၤဘၣ်ဒိ ယဟိဝၤယွၤအသး အဘျီအါမး သနာ်က့ အဝဲပျၢ်ကွံာ်ပတၢ်ကမၣ်. အဃိ အဝဲမုၢ်လၢ်ဝဲလၢ ပကပျၢ်ကွံာ် ပဒီပုၢ်ဝဲၢ်တဖၣ် အတၢ်ကမၣ်. နမ့ၢ်သ့ၣ်ညါလီၤနသးလၢ နမၤဘၣ်ဒိ ပှၤတဂၤအသးန့ၣ် လဲၤဆိလၢအအိၣ် ဒီးမၤဘၣ်ဂီၢ်က့ၤ သုတၢ်ဂ့ၢ်တက့ၢ်.—ဖး မးသဲ ၅:၂၃, ၂၄.b
ဃုသ့ၣ်ညါအါထီၣ်
ဆိကမိၣ်ကွၢ် ဒ်သိး တၢ်အိၣ်ဖှိၣ်ကအိၣ်ဒီး တၢ်ဃူတၢ်ဖိးအဂီၢ် နမၤစၢၤ ကသ့ဒ်လဲၣ်.
နမၤဃူမၤဖိးတၢ် ကသ့ဒ်လဲၣ်
၄. မၤလီၤမၢ်ကွံာ် တၢ်ပာ်သူၣ်ပာ်သး လၢအမ့ၢ် တၢ်ကွၢ်ဒိၣ်ဆံးအါစှၤပှၤဂၤ
ပအဲၣ်ဒိး ပာ်ဖျါထီၣ် တၢ်အဲၣ်လၢ ပဒီပုၢ်ဝဲၢ် ကိးဂၤဒဲး အဖီခိၣ်. ဘၣ်ဆၣ် ပှၤတဂၤအတၢ်အိၣ်သး မ့ၢ်တဒ်သိးဒီးပှၤဘၣ်န့ၣ် ပကတူၢ်လိာ်အီၤ ဒီးအဲၣ်အီၤအဂီၢ် ဘၣ်သ့ၣ်သ့ၣ် ကကီဝဲလၢပဂီၢ်. ဘၣ်ဆၣ် တၢ်မနုၤ ကမၤစၢၤပှၤလဲၣ်. ဖး မၤတၢ် ၁၀:၃၄, ၃၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ယဟိဝၤယွၤ တူၢ်လိာ်ဝဲလၢ ပှၤကိးကလုာ်ဒဲး ကကဲထီၣ် အပှၤအုၣ်အသးတဖၣ်. ဖဲနရ့ဒီး ပှၤလၢအတၢ်အိၣ်သး လီၤဆီဒီးနၤတဖၣ်အခါ နကွၢ်လိ ယဟိဝၤယွၤ ကသ့ဒ်လဲၣ်.
လၢနအိၣ်တၢ်လီၢ်န့ၣ် အါတက့ၢ် ပှၤထံၣ်ဆံး ပှၤဒ်လဲၣ်တဖၣ်လဲၣ်. ဘၣ်မနုၤအဃိ နအဲၣ်ဒိးဟးဆှဲး တၢ်ပာ်သူၣ်ပာ်သးဒ်အံၤလဲၣ်.
ဖး ၂ ကရံၣ်သူး ၆:၁၁-၁၃ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
နဒီပုၢ်ဝဲၢ်လၢ အတၢ်အိၣ်သး လီၤဆီဒီးနၤတဖၣ်န့ၣ် နမၤအါထီၣ် နတၢ်အဲၣ်လၢ အဝဲသ့ၣ် အဖီခိၣ်ကသ့ဒ်လဲၣ်.
၅. ပျၢ်လိာ်သးတၢ်ကမၣ် လၢာ်လၢာ်ဆ့ဆ့ ဒီးမၤဃူမၤဖိးတၢ်
ယဟိဝၤယွၤ တမၤတၢ်ကမၣ်နီတဘျီဘၣ်, အဃိ အဝဲတလိၣ်လၢ ပကပျၢ်ကွံာ် အတၢ်ကမၣ်နီတဘျီဘၣ်. ဘၣ်ဆၣ် အဝဲပျၢ်ကွံာ် ပတၢ်ကမၣ် လၢာ်လၢာ်ဆ့ဆ့. ဖး စံးထီၣ်ပတြၢၤ ၈၆:၅ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
ဘၣ်ဃးဒီ ယဟိဝၤယွၤ ပျၢ်ကွံာ်ပတၢ်ကမၣ်န့ၣ် လံာ်စီဆှံတဆၢအံၤ သိၣ်လိပှၤဒ်လဲၣ်.
ယဟိဝၤယွၤ ပျၢ်ကွံာ်နတၢ်ကမၣ်န့ၣ် ဘၣ်မနုၤအဃိ နသးခုလဲၣ်.
တဘျီတခီၣ်န့ၣ် နကအိၣ်ဃူအိၣ်ဖိးဒီး ပှၤဂၤအဂီၢ် ဘၣ်မနုၤအဃိ ကီဝဲလဲၣ်.
ပကွၢ်လိ ယဟိဝၤယွၤ ဒီးအိၣ်ဃူအိၣ်ဖိးဒီး ပဒီပုၢ်ဝဲၢ်တဖၣ် ထီဘိကသ့ဒ်လဲၣ်. ဖး ကတိၤဒိ ၁၉:၁၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ဖဲပှၤတဂၤ မၤအ့န့နသး မ့တမ့ၢ် မၤဆါနသးအဆၢကတီၢ် ဒ်သိး တၢ်အိၣ်သး ကဂ့ၤထီၣ်က့ၤအဂီၢ် နမၤကသ့ဒ်လဲၣ်.
တဘျီတခီၣ် ပမၤသးထီၣ်ဘၣ်ပှၤဂၤ. တၢ်မ့ၢ်ကဲထီၣ်အသး ဒ်န့ၣ်န့ၣ် ပကြၢးမၤမနုၤလဲၣ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
လၢတၢ်ဂီၤမူအပူၤ ဒ်သိး ဒီပုၢ်ဝဲၢ်မုၣ်တဂၤ ကအိၣ်ဃူအိၣ်ဖိးက့ၤ ဒီးဒီပုၢ်ဝဲၢ်မုၣ်အဂၤတဂၤအဂီၢ် အမၤဝဲဒ်လဲၣ်.
၆. ကွၢ်လၢ နဒီပုၢ်ဝဲၢ်တဖၣ် အတၢ်ဂ့ၤတခီ
ပရ့ဒီး ပဒီပုၢ်ဝဲၢ်တဖၣ် မ့ၢ်အါန့ၣ် ပသ့ၣ်ညါအါထီၣ် အဝဲသ့ၣ် အတၢ်ဂ့ၤတၢ်ဝါ တကးဒံးဘၣ် ပသ့ၣ်ညါစ့ၢ်ကီး အဝဲသ့ၣ် အတၢ်ဂံၢ်စၢ်ဘါစၢ်တဖၣ်. အဃိ ဒ်သိးပကကွၢ်လၢ အဝဲသ့ၣ် အတၢ်ဂ့ၤတခီအဂီၢ် ပကဘၣ်မၤဒ်လဲၣ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
ဒ်သိးနကထံၣ် နဒီပုၢ်ဝဲၢ်တဖၣ် အတၢ်ဂ့ၤတၢ်ဝါအဂီၢ် တၢ်မနုၤ ကမၤစၢၤနၤလဲၣ်.
ယဟိဝၤယွၤ ကွၢ်လၢ ပတၢ်ဂ့ၤတခီ. ဖး ၂ ကွဲးနီၣ်တၢ် ၁၆:၉ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
နသ့ၣ်ညါဘၣ်လၢ ယဟိဝၤယွၤ ကွၢ်လၢနတၢ်ဂ့ၤတခီအဃိ နသးခုဧါ.
တၢ်မျၢ်ပလဲတဖျၢၣ် အမ့ၢ်တဂ့ၤဘၣ်တစဲး သနာ်က့ အလုၢ်အပှ့ၤအိၣ်ဒံး. ဒ်န့ၣ်အသိး ပဒီပုၢ်ဝဲၢ်မုၣ်ခွါတဖၣ် ကဲဝဲ ပှၤတလၢတပှဲၤဘၣ် သနာ်က့ ယဟိဝၤယွၤ ပာ်လုၢ်ပာ်ပှ့ၤအဝဲသ့ၣ်
ပှၤတနီၤတဲဝဲလၢ– “ယပျၢ်အတၢ်ကမၣ်ကဲ. ဘၣ်ဆၣ် တၢ်လၢအမၤယၤန့ၣ် ယသးပ့ၤနီၣ်တန့ၢ်ဘၣ်.”
ဘၣ်မနုၤအဃိ ပကဘၣ်သးအိၣ် ပျၢ်ပှၤဂၤအတၢ်ကမၣ် လၢအဆိအချ့လဲၣ်.
တၢ်ဂ့ၢ်လၢအရ့ဒိၣ်
ဒ်သိး တၢ်အိၣ်ဖှိၣ် ကအိၣ်ဒီး တၢ်ဃူတၢ်ဖိးအဂီၢ် နမၤစၢၤသ့ ခီဖျိ နပျၢ်ကွံာ် ပှၤဂၤအတၢ်ကမၣ် ဒီးပာ်ဖျါထီၣ် တၢ်အဲၣ်လၢ နဒီပုၢ်ဝဲၢ်ခဲလၢာ်အဖီခိၣ်.
တၢ်ကွၢ်ကဒါက့ၤ
တၢ်ပာ်သူၣ်ပာ်သး လၢအမ့ၢ် တၢ်ထံၣ်ဆံးဒီးကွၢ်ဒိၣ်ဆံးအါစှၤ ပှၤဂၤန့ၣ် နမၤလီၤမၢ်ကွံာ်အီၤ ကသ့ဒ်လဲၣ်.
နၤဒီးနဒီပုၢ်ဝဲၢ်တဂၤ အတၢ်ထံၣ် မ့ၢ်တဒ်သိးလိာ်အသးဘၣ်န့ၣ် နကမၤဒ်လဲၣ်.
ယဟိဝၤယွၤ ပျၢ်ကွံာ်ပှၤဂၤ အတၢ်ကမၣ်န့ၣ် ဘၣ်မနုၤအဃိ နအဲၣ်ဒိးကွၢ်လိအီၤလဲၣ်.
ဃုသ့ၣ်ညါ
ဒ်သိးပသုတစံၣ်ညီၣ် ပှၤဂၤတဂ့ၤအဂီၢ် တၢ်အဒိတခါလၢ ယ့ၣ်ၡူးတဲဝဲန့ၣ် မၤစၢၤပှၤဒ်လဲၣ်. ကွၢ်တၢ်ဂီၤမူ လၢလာ်အံၤ.
ပမ့ၢ်ဆိကမိၣ်လၢ ပတမၤကမၣ်တၢ် နီတမံၤဘၣ် သနာ်က့ ပဘၣ်ဃ့ဝံသးစူၤ ပှၤဂၤဒံးဧါ.
“ပမ့ၢ်ဃ့ဝံသးစူၤတၢ်န့ၣ် ကဒုးအိၣ်ထီၣ် တၢ်ဃူတၢ်ဖိး” (တၢးထီခိးတၢ်, လါနိၣ်ဝ့ဘၢၣ် ၁, ၂၀၀၂)
ပှၤတနီၤပာ်ဖျါထီၣ်ဝဲလၢ အတကွၢ်ဒိၣ်ဆံးအါစှၤပှၤဂၤလၢၤဘၣ် ဒ်လဲၣ်.
ဖးတၢ်ဂ့ၢ် ဘၣ်ဃးဒီး နၤဒီးပှၤအဂၤတဂၤ မ့ၢ်အိၣ်ဒီး တၢ်ဂ့ၢ်ကီတမံၤမံၤန့ၣ် တချုးလၢ အမၤဘၣ်ဒိ တၢ်အိၣ်ဖှိၣ် အတၢ်ဃူတၢ်ဖိး ဒံးဘၣ်အခါ နကဘၣ်မၤဒ်လဲၣ်.
“မၤဘၣ်လိာ်က့ၤ တၢ်သဘံၣ်သဘုၣ်လၢ တၢ်အဲၣ်တၢ်ကွံအပူၤတက့ၢ်” (တၢးထီခိးတၢ်, လါမ့ၤ ၂၀၁၆)
a တၢ်ဂ့ၢ်လၢလံာ်အကတၢၢ် ၆ တဲဝဲဘၣ်ဃးဒီး ခရံာ်ဖိတဂၤ လၢအအိၣ်ဒီး တၢ်အဲၣ်တၢ်ကွံန့ၣ် အကပလီၢ်အသး ဒ်သိး အတၢ်ဆါလၢ အဘၣ်ကူဘၣ်ဂာ်တၢ်သ့န့ၣ် သုတဘၣ်ကူပှၤဂၤတဂ့ၤ.
b တၢ်ဂ့ၢ်လၢလံာ်အကတၢၢ် ၇ တဲဝဲဘၣ်ဃးဒီး ပကဘၣ်မၤဘၣ်ဂီၢ်က့ၤ တၢ်ဂ့ၢ်ကီလၢ အဘၣ်ထွဲဒီး တၢ်ဖံးတၢ်မၤ ဒီးတၢ်မူးတၢ်ရၢ်အဂ့ၢ်ဒ်လဲၣ်.