ဆဲး “ဒိကနၣ်အကလုၢ်”

၁-၂. (က) ယ့ၣ်ၡူးအတၢ်မၢဖိသၢဂၤ ကဘၣ်မၤဝဲတၢ်မနုၤလဲၣ်​ ဒီးအဝဲသ့ၣ်​ မၤဝဲဒ်လဲၣ်. (ခ) လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.

ဖဲ ခ.န ၃၂ ဘူၣ်လဲၤကပာ်ဝံၤအလီၢ်ခံ တၢ်မၢဖိပ့းတရူး, ယၤကိာ် ဒီးယိၤဟၣ်​ ထံၣ်ဘၣ်ဝဲ တၢ်ထံၣ်လၢညါခီလၢ အလီၤကမၢကမၣ်တခါလီၤ. လၢကစၢၢ်ဖးထီတဖျၢၣ်​ အလိၤန့ၣ်​ အဝဲသ့ၣ်ထံၣ်ဘၣ်ဝဲ ယ့ၣ်ၡူးလဲလိာ်အသးလီၤ. ဘၣ်သ့ၣ်သ့ၣ်​ ကစၢၢ်တဖျၢၣ်အံၤ ကအိၣ်လၢ ကစၢၢ်ဃ့ၤရမိၣ်​ အလိၤလီၤ. ဖဲန့ၣ်​ ယ့ၣ်ၡူး “အမဲာ်သၣ်​ ကပီၤထီၣ်ဒ်မုၢ်အသိး ဒီးအတၢ်ကူတၢ်ကၤ ကပြုၢ်ကပြီၤ ဒ်တၢ်ကပီၤအသိးလီၤ.” (မးသဲ ၁၇:၁-၄) ဖဲအဝဲသ့ၣ်​ ထံၣ်တၢ်ထံၣ်လၢညါခီ ဘူးကဝံၤအခါ တၢ်မၢဖိတဖၣ်​ နၢ်ဟူဘၣ်ဝဲ ကစၢ်ယွၤ တဲဝဲလၢ “အဝဲအံၤ မ့ၢ်ယဖိခွါလၢယအဲၣ်​ ဒီးယဘၣ်သူၣ်ဘၣ်သးအီၤလီၤ. ဒိကနၣ်အကလုၢ်တက့ၢ်.” (မးသဲ ၁၇:၅) တၢ်မၢဖိသၢဂၤအံၤ ဒိကနၣ်ယ့ၣ်ၡူး အကလုၢ်န့ၣ်​ အဝဲသ့ၣ်​ ပာ်ဖျါထီၣ်ဝဲ ခီဖျိ တၢ်လၢအမၤဝဲလၢ အတၢ်အိၣ်မူအပူၤလီၤ. အဃိ ပဝဲသ့ၣ်စ့ၢ်ကီး ပအဲၣ်ဒိးကွၢ်လိမၤဒိး အဝဲသ့ၣ်လီၤ.

^၂ တၢ်မၤလိလၢအပူၤကွံာ်တခါန့ၣ်​ ပမၤလိဘၣ်လၢ ပမ့ၢ်အဲၣ်ဒိး ဒိကနၣ်ယ့ၣ်ၡူး အကလုၢ်န့ၣ်​ တၢ်လၢပကဘၣ်ပတုာ်မၤအီၤ အိၣ်ဝဲ. လၢတၢ်မၤလိတခါအံၤအပူၤ ပကတဲသကိး တၢ်ဂ့ၢ်ခံမံၤလၢ ယ့ၣ်ၡူးတဲဝဲလၢ ပကြၢးမၤအီၤလီၤ.

“လဲၤနုာ်လီၤလၢ တြဲၤလၢအအံၣ်”

၃. ဒ် မးသဲ ၇:၁၃, ၁၄ ပာ်ဖျါထီၣ်ဝဲအသိး ပကြၢးမၤတၢ်မနုၤလဲၣ်.

^၃ ဖး မးသဲ ၇:၁၃, ၁၄. ဖဲအံၤန့ၣ်ယ့ၣ်ၡူးတဲဝဲ တြဲၤခံခါ လၢအလီၤဆီလိာ်သး လၢအကဆှၢပှၤလၢ ကျဲခံဘိလၢအမ့ၢ် ကျဲလၢအ “လဲၢ်” ဒီးကျဲလၢအ “အံၣ်” လီၤ. ပာ်သူၣ်ပာ်သးလၢ ကျဲအိၣ်ထဲခံဘိလီၤ, တအိၣ်သၢဘိဘၣ်. ဒီးပကလဲၤလၢ ကျဲဖဲလဲၣ်တဘိလဲၣ်န့ၣ်​ ပကဘၣ်ဃုထၢလၢ ပနီၢ်ကစၢ်လီၤ. ပတၢ်ဆၢတဲာ်တခါအံၤန့ၣ်​ မ့ၢ်ဝဲတၢ်ဆၢတဲာ်လၢ အရ့ဒိၣ်ကတၢၢ်, မ့ၢ်လၢ ပကဒိးန့ၢ်ဘၣ်​ တၢ်မူအထူအယိာ်န့ၣ်​ ဒိးသန့ၤထီၣ်အသးလၢ ပတၢ်ဆၢတဲာ်တခါအံၤ အဖီခိၣ်အဃိလီၤ.

၄. ကျဲလၢအလဲၢ်တဘိန့ၣ်​ မၤအသးဒ်လဲၣ်, တဲဖျါထီၣ်တက့ၢ်.

^၄ ပကဘၣ်သ့ၣ်ညါ ကျဲခံဘိ အတၢ်လီၤဆီလိာ်သးလီၤ. ကျဲလၢအ “လဲၢ်” န့ၣ်ပှၤလဲၤဘၣ်အီၤညီအဃိ ပှၤအါဂၤ ဘၣ်သူၣ်ဘၣ်သးဝဲ. ပှၤအါဂၤန့ၣ်​ ဆဲးပိာ်ဝဲကျဲလၢအလဲၢ် ဒီးမၤပိာ်ဝဲ ပှၤဂၤအခံအဃိ လီၤသးအုးဒိၣ်မး. ကျဲတဘိအံၤ ကဆှၢပှၤဆူတၢ်သံ, ဒီးမုၣ်ကီၤလံၢ် ဂုာ်ကျဲးစၢးဝဲဒ်သိး ပှၤကလဲၤလၢ ကျဲတဘိအံၤန့ၣ်​ အဝဲသ့ၣ်တသ့ၣ်ညါဝဲဘၣ်.—၁ ကရံၣ်သူး ၆:၉, ၁၀; ၁ ယိၤဟၣ်​ ၅:၁၉.

၅. ပှၤတနီၤ ဃုထံၣ်န့ၢ်ကျဲလၢအ “အံၣ်” ဒီးဂုာ်ကျဲးစၢးလဲၤတၢ်လၢအပူၤ ဒ်လဲၣ်.

^၅ ကျဲလၢအ “အံၣ်” တဘိန့ၣ်​ တဒ်သိးဒီး ကျဲလၢအ “လဲၢ်” တဘိဘၣ်. ယ့ၣ်ၡူးတဲဝဲလၢ ထဲဒၣ်ပှၤစှၤဂၤန့ၣ်​ ထံၣ်န့ၢ်ဝဲ ကျဲတဘိအံၤလီၤ. ဘၣ်မနုၤအဃိလဲၣ်န့ၣ်​ ပကကွၢ်သကိး အဆၢဖိလၢခံတဆၢ. ဖဲန့ၣ်န့ၣ်​ ယ့ၣ်ၡူးဟ့ၣ်ပလီၢ်ဝဲ ပှၤလၢအပိာ်အခံတဖၣ်​ ဘၣ်ဃးဒီး ဝံအဘျၣ်တဖၣ်လီၤ. (မးသဲ ၇:၁၅) ပှၤအါဂၤန့ၣ်​ တဲဝဲလၢ တၢ်ဘူၣ်တၢ်ဘါအိၣ်အါမး ဒီးအဝဲသ့ၣ်​ အါတက့ၢ်န့ၣ်​ တဲဝဲလၢ အသိၣ်လိတၢ်မ့ၢ်တၢ်တီ. မ့ၢ်လၢတၢ်ဘူၣ်တၢ်ဘါ အိၣ်ဝဲအါမးအဃိ ပှၤအါဂၤန့ၣ်​ အသးဟးဂီၤ ဒီးအခိၣ်နူာ်ဘံဘူဝဲ ဒီးတဃုဝဲ ကျဲလၢအကဆှၢအီၤဆူ တၢ်မူလၢၤဘၣ်. ဘၣ်ဆၣ်​ တၢ်မူအကျဲန့ၣ်​ ပဃုထံၣ်န့ၢ်အီၤသ့. ယ့ၣ်ၡူးတဲဝဲလၢ “သုမ့ၢ်အိၣ်ဂၢၢ်ဆိးကျၢၤလၢ ယကလုၢ်ကထါအပူၤန့ၣ်​ သုမ့ၢ်ယပျဲၢ်ယဘီၣ်တဖၣ်​ အနီၢ်ကီၢ်လီၤ. ဒီးသုကသ့ၣ်ညါ တၢ်မ့ၢ်တၢ်တီ ဒီးတၢ်မ့ၢ်တၢ်တီ ကမၤထူၣ်ဖျဲးထီၣ်သုလီၤ.” (ယိၤဟၣ်​ ၈:၃၁, ၃၂) နမၤလိကစၢ်ယွၤ အကလုၢ်ကထါ မူာ်မူာ်နီၢ်နီၢ် ဒ်သိး နကသ့ၣ်ညါ ကစၢ်ယွၤအတၢ်ဘၣ်သးအဂီၢ်, ဒီးနဒိကနၣ်​ ယ့ၣ်ၡူးအတၢ်သိၣ်လိတဖၣ်လံ. တကးဒံးဘၣ်​ ပသ့ၣ်ညါဘၣ်လၢ ယဟိဝၤယွၤ အဲၣ်ဒိးလၢ ပကပာ်တ့ၢ်ကွံာ် တၢ်ဘူၣ်တၢ်ဘါကမၣ်​ အတၢ်သိၣ်လိ ဒီးအဝဲတအဲၣ်ဒိး ပမၤနံၤသဘျ့ အမူးပွဲလၢ အဟဲလီၤစၢၤလီၤသွဲၣ်လၢ တၢ်ဘူၣ်တၢ်ဘါကမၣ်​ မ့တမ့ၢ် အဘၣ်ထွဲဒီး တၢ်ဘူၣ်တၢ်ဘါကမၣ်​ အလုၢ်အလၢ်ဘၣ်. ဒီးနသ့ၣ်ညါလၢ နဘၣ်မၤဒ်ယဟိဝၤယွၤ အတၢ်ဘၣ်သး ဒီးနဘၣ်ပာ်တ့ၢ်ကွံာ် လုၢ်လၢ်လၢ အတဘၣ်ကစၢ်ယွၤအသးန့ၣ်​ တမ့ၢ်တၢ်ညီ လၢနဂီၢ်ဘၣ်. (မးသဲ ၁၀:၃၄-၃၆) ဘၣ်သ့ၣ်သ့ၣ်​ ဖဲနမၤတၢ်ဆီတလဲအခါ တညီလၢနဂီၢ်ဘၣ်. ဘၣ်ဆၣ်​ မ့ၢ်လၢနအဲၣ်ကစၢ်ယွၤ ဒီးနအဲၣ်ဒိးမၤ အတၢ်ဘၣ်သးအဃိ နတပျၢ်စုပျၢ်ခီၣ်ဘၣ်, နဆဲးဂုာ်ကျဲးစၢး သပှၢ်ကတၢၢ်လီၤ. နတမၤပိာ်ပှၤဂၤအခံဘၣ်​ ဒီးနဃုတၢ်မ့ၢ်တၢ်တီ ဒ်အံၤအဃိ ဖးဂ့ၤညါ. ဒီးကစၢ်ယွၤ ကသးခုလၢနဃိဒိၣ်မး.—ကတိၤဒိ ၂၇:၁၁.

နဆဲးလဲၤတၢ်လၢ ကျဲလၢအအံၣ်အပူၤ ကသ့ဒ်လဲၣ်

၆. ဒ် စံးထီၣ်ပတြၢၤ ၁၁၉:၉, ၁၀, ၄၅, ၁၃၃ တဲဝဲအသိး တၢ်မနုၤကမၤစၢၤပှၤ ဒ်သိးပကဆဲးအိၣ်လၢ ကျဲလၢအအံၣ်ပူၤအဂီၢ်လဲၣ်.

^၆ ဖဲပလဲၤတၢ်လၢ ကျဲလၢအအံၣ်အခါ တၢ်မနုၤကမၤစၢၤပှၤ ဒ်သိးပကဆဲးအိၣ်လၢ ကျဲပူၤလဲၣ်. ဆိကမိၣ်ကွၢ် တၢ်အဒိလၢဘၣ်ဃးဒီး ကါကျဲအတီၤလၢ အအိၣ်လၢ ကါကျဲကပၤ. ကါကျဲတဘိအံၤန့ၣ်​ အိၣ်လၢကစၢၢ်ကပၤ ဒီးအံၣ်ဝဲအဃိ ကါကျဲအတီၤတခါအံၤ ကဒီသဒၢဝဲ ပှၤနီကါဖိဒီးအကါ. ကါကျဲတီၤတခါအံၤန့ၣ်​ ပှၤတ့ထီၣ်အီၤဒ်သိး ပှၤနီကါဖိ သုတလဲၤတုၤလၢ တၢ်ကပၤ ဒီးတလီၤတဲာ်လၢ တၢ်တြီၤပူၤတဂ့ၤအဂီၢ်လီၤ. အဃိ ပှၤနီကါဖိအါဂၤန့ၣ်​ တမ့ၢ်လၢ အကဆိကမိၣ်ဝဲလၢ တၢ်တီၤတခါအံၤ ကဲထီၣ်တၢ်နိးတၢ်ဘျးလၢ အဂီၢ်ဘၣ်. ယဟိဝၤယွၤ အတၢ်ဘျၢလၢ လံာ်စီဆှံပူၤစ့ၢ်ကီး လီၤဂာ်ဒ်သိး ကါကျဲအတီၤတခါအံၤလီၤ. ကစၢ်ယွၤ အတၢ်ဘျၢတဖၣ်န့ၣ်​ မၤစၢၤပှၤဒ်သိး ပကဆဲးအိၣ်လၢ ကျဲလၢအအံၣ်ပူၤအဂီၢ်လီၤ.—ဖး စံးထီၣ်ပတြၢၤ ၁၁၉:၉, ၁၀, ၄၅, ၁၃၃.

၇. ပှၤသးစၢ်တဖၣ်​ ကြၢးထံၣ်ဝဲ ကျဲလၢအအံၣ်တဘိဒ်လဲၣ်.

^၇ နမ့မ့ၢ် ပှၤသးစၢ်န့ၣ်​ တဘျီတခီၣ်​ မ့ၢ်နတူၢ်ဘၣ်လၢ ယဟိဝၤယွၤ အတၢ်ဘျၢန့ၣ်​ အဃံးတလၢဧါ. မုၣ်ကီၤလံၢ် အဲၣ်ဒိးလၢ နကတူၢ်ဘၣ်ဒ်န့ၣ်လီၤ. မုၣ်ကီၤလံၢ် အဲၣ်ဒိးလၢ နကဆိမိၣ်​ ပှၤလၢအလဲၤလၢ ကျဲအလဲၢ်တဖၣ်န့ၣ်​ အတၢ်အိၣ်မူမုာ်ထဲလဲၣ်​ ဒီးအဝဲသ့ၣ်​ မၤတၢ်မနုၤလဲၣ်လီၤ. အဝဲအဲၣ်ဒိးလၢ နကတူၢ်ဘၣ်လၢ နတၢ်အိၣ်မူန့ၣ်​ တလီၤသးခု ဒ်နသကိးလၢကၠိ မ့တမ့ၢ် ပှၤလၢနထံၣ်ဘၣ်အီၤလၢ အ့ထၢၣ်နဲးအပူၤဘၣ်. မုၣ်ကီၤလံၢ် အဲၣ်ဒိးလၢ နကဆိကမိၣ်လၢ ယဟိဝၤယွၤ အတၢ်ဘျၢန့ၣ်​ တဟ့ၣ်နၤတၢ်သးခု လၢလၢပှဲၤပှဲၤဘၣ်.b ဘၣ်ဆၣ်​ သ့ၣ်နီၣ်ထီၣ်လၢ ပှၤလဲၤတၢ်ဖိလၢ အလဲၤတၢ်လၢ မုၣ်ကီၤလံၢ်အကျဲတဂၤန့ၣ်​ အကျဲကကတၢၢ်ဝဲ ဒ်လဲၣ်န့ၣ်​ မုၣ်ကီၤလံၢ် တအဲၣ်ဒိးလၢ အဝဲကသ့ၣ်ညါဝဲဘၣ်. ဘၣ်ဆၣ်​ ပမ့ၢ်လဲၤတၢ်လၢ တၢ်မူအကျဲန့ၣ်​ ပတၢ်အိၣ်မူကမုာ်ဝဲ ထဲလဲၣ်န့ၣ်​ ယဟိဝၤယွၤ ဒုးသ့ၣ်ညါပှၤ လီၤတံၢ်လီၤဆဲးလီၤ.—စံးထီၣ်ပတြၢၤ ၃၇:၂၉; ယၡါယၤ ၃၅:၅, ၆; ၆၅:၂၁-၂၃.

၈. ပမၤလိန့ၢ်တၢ်မနုၤလၢ ဒီပုၢ်ဝဲၢ်ခွါအိလၢ် အတၢ်လဲၤခီဖျိလဲၣ်.

^၈ ပကကွၢ်သကိး ဒီပုၢ်ဝဲၢ်ခွါ အိလၢ်c လၢအမ့ၢ် ပှၤသးစၢ်တဂၤ အတၢ်လဲၤခီဖျိ. အသကိးလၢ အတီၤဒၢးပူၤတနီၤန့ၣ်​ ဆီၣ်သနံးအီၤလၢ ကမၤကမၣ်မုၣ်ကမၣ်ခွါအဂီၢ်လီၤ. ဒီးဖဲအတဲဝဲလၢ အမ့ၢ်ယဟိဝၤပှၤအုၣ်အသး ဒီးအအိၣ်မူဒ် လံာ်စီဆှံ အတၢ်ဘျၢအသိးအခါ ပိာ်မုၣ်တနီၤ လၢအတီၤဒၢးပူၤန့ၣ်​ ဂုာ်ကျဲးစၢး ကွဲန့ၢ်လွဲန့ၢ်အါထီၣ်အီၤ လၢအကမံဃုာ်ဒီး အဝဲသ့ၣ်အဂီၢ်လီၤ. ဘၣ်ဆၣ်​ အိလၢ်တကနၣ်ဃုာ် အဝဲသ့ၣ်ဘၣ်​ ဒီးဆဲးမၤတၢ်လၢအဘၣ်လီၤ. ဒီးအဝဲထံၣ်ဘၣ်ဒီး တၢ်ဆီၣ်သနံးလၢ အဂၤတခါဒံး. အိလၢ်တဲဝဲလၢ “ယကၠိသရၣ်တဖၣ်​ ဆီၣ်သနံးယၤလၢ ယကလဲၤထီၣ်ဘၣ်​ ဖၠၣ်စိမိၤကၠိ ဒ်သိးပှၤကပာ်ကဲယၤ ဒီးဆိကမိၣ်ဒိၣ်ယၤအဂီၢ်. အဝဲသ့ၣ်တဲယၤလၢ ယမ့ၢ်တဃု တၢ်ကူၣ်ဘၣ်ကူၣ်သ့ လၢအပတီၢ်ထီဘၣ်န့ၣ်​ တမ့ၢ်လၢ ယကန့ၢ်ဘၣ်​ တၢ်မၤဘၣ်​ ဒီးတမ့ၢ်လၢ ယတၢ်သးခုကအိၣ်လၢ ယတၢ်အိၣ်မူပူၤဘၣ်.” ဒီပုၢ်ဝဲၢ်ခွါအိလၢ် ဂ့ၢ်လိာ်ကွံာ် တၢ်ဆီၣ်သနံးတဖၣ်အံၤ န့ၢ်ဒ်လဲၣ်. အဝဲတဲဝဲလၢ “ယရ့အါထီၣ်​ ယဒီပုၢ်ဝဲၢ်မုၣ်ခွါ လၢယတၢ်အိၣ်ဖှိၣ်ပူၤ ဒီးအဝဲသ့ၣ်​ ကဲထီၣ်ဒ် ယဟံၣ်ဖိဃီဖိအသိး. တကးဒံးဘၣ်​ ယဃုသ့ၣ်ညါအါထီၣ်​ လံာ်စီဆှံ မူာ်မူာ်နီၢ်နီၢ်. ယဒံးမၤလိလံာ်စီဆှံ ဒီးယတၢ်နာ် ဘၣ်ဃးဒီးတၢ်မ့ၢ်တၢ်တီန့ၣ်​ ဒံးအါထီၣ်. ယမၤတၢ်သ့ၣ်တဖၣ်အံၤအဃိ ယပာ်လီၤသးလၢ ယကမၤ ယဟိဝၤယွၤ အတၢ်မၤအဂီၢ်” လီၤ.

၉. ပမ့ၢ်အဲၣ်ဒိး ဆဲးအိၣ်လၢ ကျဲလၢအအံၣ်ပူၤန့ၣ်​ ပကဘၣ်​ မၤတၢ်မနုၤလဲၣ်.

^၉ မုၣ်ကီၤလံၢ်အဲၣ်ဒိးလၢ ပကဟးထီၣ်လၢ ကျဲလၢကဆှၢပှၤလၢ တၢ်မူအပူၤလီၤ. အဝဲအဲၣ်ဒိးလၢ ပကပိာ်ပှၤအါဂၤအခံ လၢကျဲလၢအလဲၢ် လၢအက “ဆှၢပှၤဆူတၢ်ဟးဂီၤ” လီၤ. (မးသဲ ၇:၁၃) ဘၣ်ဆၣ်​ ပဆဲးအိၣ်လၢ ကျဲလၢအအံၣ်ပူၤသ့ ခီဖျိ ပဆဲးဒိကနၣ်​ ယ့ၣ်ၡူးအကလုၢ် ဒီးပထံၣ်ကျဲအံၤဒ် တၢ်ဒီသဒၢလၢပဂီၢ်အသိး. ခဲအံၤ ပကကွၢ်သကိး တၢ်အဂၤတခါ လၢယ့ၣ်ၡူးမၢပမၤအီၤလီၤ.

မၤဃူမၤဖိးလိာ်နသးဒီး နဒီပုၢ်ဝဲၢ်

၁၀. ဖဲ မးသဲ ၅:၂၃, ၂၄ န့ၣ်​ ယ့ၣ်ၡူးတဲဝဲလၢ ပကဘၣ်မၤ တၢ်မနုၤလဲၣ်.

^၁၀ ဖး မးသဲ ၅:၂၃, ၂၄. ယ့ၣ်ၡူးတဲဘၣ်​ ပှၤယူဒၤဖိလၢ အဒိကနၣ်အီၤတဖၣ်​ လၢတၢ်ဂ့ၢ်လၢ အရ့ဒိၣ်တခါလီၤ. ထံၣ်တမှံကွၢ် ပှၤတဂၤအိၣ်လၢ တၢ်လုၢ်ဟံၣ်​ ဒီးအကဟ့ၣ်လီၤဝဲ အဆၣ်ဖိကီၢ်ဖိ တဒုလၢ ပှၤလုၢ်တၢ်ဒိၣ်အစုပူၤ ဒ်သိးကဟ့ၣ်လုၢ်ထီၣ်တၢ်အဂီၢ်. ဖဲန့ၣ်အခါ အဝဲမ့ၢ်နီၣ်ဘၣ်လၢ အဒီပုၢ်ဝဲၢ်တဂၤဂၤ မၤကမၣ်ဘၣ်အီၤန့ၣ်​ အဝဲကဘၣ်​ ပာ်တ့ၢ်ကွံာ် အတၢ်လုၢ်ဒီး “ဟးထီၣ်ကွံာ် ဖဲန့ၣ်.” ဘၣ်မနုၤအဃိလဲၣ်န့ၣ်​ တၢ်လၢအရ့ဒိၣ်န့ၢ်ဒံး ပကဘၣ်လုၢ်ထီၣ်တၢ်လၢ ယဟိဝၤယွၤအအိၣ်န့ၣ်​ အိၣ်ဒံးဝဲ. ယ့ၣ်ၡူးတဲဝဲလၢ အဝဲကဘၣ်​ ‘က့ၤမၤဃူမၤဖိးဆိတၢ် ဒီးအဒီပုၢ်ဝဲၢ်’ လီၤ.

၁၁. စီၤယၤကိာ် မၤဃူမၤဖိးတၢ်ဒီးအကၠီ စီၤဧ့ၡီၤ ဒ်လဲၣ်န့ၣ်​ တဲဖျါထီၣ်တက့ၢ်.

^၁၁ ဘၣ်ဃးဒီး တၢ်မၤဃူမၤဖိးတၢ်န့ၣ်​ ပမၤလိန့ၢ်ဘၣ်​ တၢ်မၤလိလၢ အရ့ဒိၣ်ဒိၣ်မး လၢစီၤယၤကိာ်အအိၣ်သ့လီၤ. ဖဲစီၤယၤကိာ် ဟးထီၣ်လၢ အအိၣ်ဖျဲၣ်ထီၣ်အလီၢ် အနံၣ်​ ၂၀ ဝံၤအလီၢ်ခံ ကစၢ်ယွၤ အမူခိၣ်ကလူး မၢအက့ၤလၢ တၢ်လီၢ်ဖဲန့ၣ်လီၤ. (၁ မိၤၡ့ ၃၁:၁၁, ၁၃, ၃၈) ဘၣ်ဆၣ်​ တညီလၢအဂီၢ်ဘၣ်, မ့ၢ်လၢ လၢညါန့ၣ်​ အကၠီစီၤဧ့ၡီၤ အဲၣ်ဒိးမၤသံအီၤ အဃိလီၤ. (၁ မိၤၡ့ ၂၇:၄၁) ဒီးဘၣ်သ့ၣ်သ့ၣ်​ အဝဲကဆိကမိၣ်ဘၣ်ဝဲလၢ အကၠီတဂၤအံၤ ကသးဒိၣ်အီၤဒံးအဃိ အဝဲ “ပျံၤတၢ်ဒိၣ်မး, ဒီးအသူၣ်ကိၢ်အသးဂီၤလီၤ.” (၁ မိၤၡ့ ၃၂:၇) ဒ်သိး စီၤယၤကိာ် ကမၤဃူမၤဖိးတၢ်ဒီးအကၠီအဂီၢ် အဝဲမၤဝဲ တၢ်မနုၤလဲၣ်. အဆိကတၢၢ်န့ၣ်​ အဝဲဃ့ဘါထုကဖၣ်လၢ ယဟိဝၤယွၤအအိၣ်​ ဘၣ်ဃးဒီးအတၢ်ဂ့ၢ်အံၤ. ဝံၤဒီးအဝဲ ဆှၢလီၤန့ၢ်အကၠီ တၢ်ဟ့ၣ်အါမးလီၤ. (၁ မိၤၡ့ ၃၂:၉-၁၅) လၢခံကတၢၢ်န့ၣ်​ စီၤယၤကိာ်ထံၣ်လိာ်အသးဒီး အကၠီလၢအသးထီၣ်အီၤတဂၤအံၤ ဒီးဖဲန့ၣ်​ အဝဲပာ်ဖျါထီၣ်ဆိ တၢ်ပာ်ကဲအကၠီ ခီဖျိ ထိၣ်လီၤပှီၤအသးလၢ အကၠီအမဲာ်ညါ. ဒီးအဝဲ ထိၣ်လီၤပှီၤအသး ဒ်န့ၣ်​ တဘျီခံဘျီတမ့ၢ်ဘၣ်, အဝဲမၤဝဲဒ်န့ၣ်​ နွံဘျီညါ. မ့ၢ်လၢစီၤယၤကိာ် ဆီၣ်လီၤသး ဒီးပာ်ဖျါထီၣ်​ တၢ်ပာ်ကဲအဃိ အမၤဃူမၤဖိးတၢ်ဒီးအကၠီ န့ၢ်ဝဲလီၤ.—၁ မိၤၡ့ ၃၃:၃, ၄.

၁၂. ပမၤလိန့ၢ် တၢ်မနုၤလၢ စီၤယၤကိာ်အအိၣ်လဲၣ်.

^၁၂ ဘၣ်ဃးဒီး စီၤယၤကိာ် အိၣ်ကတဲာ်ကတီၤအသးလၢ ကလဲၤထံၣ်လိာ်အသးဒီး အကၠီဒ်လဲၣ်​ ဒီးအဝဲ လဲၤထံၣ်လိာ်အသးဒီး အကၠီဒ်လဲၣ်န့ၣ်​ ပဟံးန့ၢ်တၢ်မၤလိလၢအအိၣ်သ့လီၤ. အဆိကတၢၢ်န့ၣ်​ စီၤယၤကိာ်ဃ့ဝဲ ယဟိဝၤယွၤ အတၢ်မၤစၢၤ. ဒီးအမၤဝဲဒ် အဃ့ထုကဖၣ်ဝဲအသိး ခီဖျိ တသ့ဖဲအသ့ အမၤဝဲဒ်သိး အကက့ၤအိၣ်ဃူအိၣ်ဖိးဘၣ်ဒီး အကၠီအဂီၢ်လီၤ. ဖဲအဝဲသ့ၣ်တိလိာ်အသးအခါ စီၤယၤကိာ်န့ၣ်​ တတဲအါလိာ်အသးဒီး အကၠီလၢ နတၢ်ဘၣ်ယတၢ်ဘၣ်, နတၢ်ကမၣ်ယတၢ်ကမၣ်ဘၣ်. စီၤယၤကိာ် ထံၣ်လိာ်အသးဒီးအကၠီန့ၣ်​ အတၢ်တိာ်ပာ်မ့ၢ်ဝဲ အကမၤဃူမၤဖိးတၢ်ဒီး အကၠီလီၤ. အဃိ ပကွၢ်လိမၤဒိး စီၤယၤကိာ် ကသ့ဒ်လဲၣ်.

ပမၤဃူမၤဖိးတၢ်ဒီးပှၤဂၤ ကသ့ဒ်လဲၣ်

၁၃-၁၄. ပမ့ၢ်မၤဘၣ်ဒိဘၣ်​ ပဒီပုၢ်ဝဲၢ်တဂၤဂၤန့ၣ်​ ပကြၢးမၤတၢ်မနုၤလဲၣ်.

^၁၃ ပမ့ၢ်အဲၣ်ဒိး ဆဲးလဲၤတၢ်လၢ တၢ်မူအကျဲန့ၣ်​ ပကဘၣ်ပၢၤဃာ် တၢ်ဃူတၢ်ဖိးဒီး ပဒီပုၢ်ဝဲၢ်တဖၣ်လီၤ. (ရိမ့ၤ ၁၂:၁၈) ဖဲပသ့ၣ်ညါလၢ ပမၤဘၣ်ဒိဘၣ်​ ပဒီပုၢ်ဝဲၢ် တဂၤဂၤအခါ ပကြၢးမၤ တၢ်မနုၤလဲၣ်. ပကဘၣ်မၤဒ် စီၤယၤကိာ်အသိး ဒီးဃ့ဘါထုကဖၣ်လၢ ယဟိဝၤယွၤအအိၣ်​ ဆူၣ်ဆူၣ်. ပဃ့ယဟိဝၤယွၤ ဒ်သိး ကမၤစၢၤပှၤလၢ ပမၤဃူမၤဖိးတၢ်ဒီး ပဒီပုၢ်ဝဲၢ်ကန့ၢ်အဂီၢ် သ့လီၤ.

^၁၄ ပကဘၣ်ဟံးန့ၢ် တၢ်ဆၢကတီၢ်လၢ ပကသမံသမိးလီၤပသးအဂီၢ်. ဒီးပသံကွၢ်လီၤပသးဒ်အံၤသ့. ‘မ့ၢ်ယသးအိၣ်​ အၢၣ်လီၤယတၢ်ကမၣ်, ဃ့ဝံသးစူၤတၢ် လၢတၢ်ဆီၣ်လီၤသးအပူၤ ဒီးသးအိၣ်​ မၤဃူမၤဖိးတၢ်ဧါ. ဖဲယဟိဝၤယွၤ ဒီးယ့ၣ်ၡူးထံၣ်ဝဲလၢ ပလဲၤမၤဃူမၤဖိးဆိတၢ်ဒီး ပဒီပုၢ်ဝဲၢ်မုၣ်ခွါတဖၣ်အခါ မ့ၢ်အဝဲသ့ၣ်​ အသးကမၤသးဒ်လဲၣ်.’ ပမ့ၢ်သံကွၢ်လီၤပသး တီတီလိၤလိၤ ဒီးသ့ၣ်ညါလီၤပသးန့ၣ်​ ဘၣ်သ့ၣ်သ့ၣ်​ ကထိၣ်ဟူးထိၣ်ဂဲၤထီၣ်ပှၤလၢ ပကဒိကနၣ်​ ယ့ၣ်ၡူးအကလုၢ် ဒီးမၤဃူမၤဖိးတၢ်ဒီး ပဒီပုၢ်ဝဲၢ်လၢ တၢ်ဆီၣ်လီၤသးအပူၤလီၤ. ဘၣ်ဃးဒီး တၢ်ဂ့ၢ်အံၤန့ၣ်​ ပကွၢ်လိမၤဒိး စီၤယၤကိာ် အဒိအတဲာ် သ့ဝဲလီၤ.

၁၅. ပမ့ၢ်မၤထွဲ တၢ်ဟံးစုနဲၣ်ကျဲလၢ အ့းဖ့းစူး ၄:၂, ၃ န့ၣ်​ ကမၤစၢၤပှၤလၢ ပကမၤဃူမၤဖိးတၢ်ဒီး ပဒီပုၢ်ဝဲၢ်တဖၣ်​ ဒ်လဲၣ်.

^၁၅ ထံၣ်တမှံကွၢ် ဖဲစီၤယၤကိာ် လဲၤထံၣ်လိာ်အသးဒီး အကၠီစီၤဧ့ၡီၤအခါ အမ့ၢ်ပာ်ထီၣ်ထီအသး ဒီးတဲအါလိာ်အသးန့ၣ်​ တၢ်ကမၤအသးဒ်လဲၣ်. ဘၣ်သ့ၣ်သ့ၣ်​ တမ့ၢ်လၢအဝဲသ့ၣ်​ ကက့ၤအိၣ်ဃူလိာ်ဖိးလိာ်ဘၣ်အသးဘၣ်. ပဝဲသ့ၣ်စ့ၢ်ကီး ဖဲပလဲၤမၤဃူမၤဖိးတၢ်ဒီး ပဒီပုၢ်ဝဲၢ်အခါ ပကဘၣ်အိၣ်ဒီး တၢ်ဆီၣ်လီၤသးလီၤ. (ဖး အ့းဖ့းစူး ၄:၂, ၃.) ကတိၤဒိ ၁၈:၁၉ တဲဝဲလၢ “ဒီပုၢ်ဝဲၢ်လၢ အဘၣ်တၢ်မၤဆါအသးန့ၣ်​ ဆူၣ်န့ၢ်ဝ့ၢ်ခၢၣ်သနၢၣ်တက့ၢ်လီၤ. ဒီးအတၢ်အ့ၣ်လိာ်ဆိးက့လိာ်န့ၣ်​ မၤသးဒ်တိာ်ဧိၤတာ်ဧိၤ အနီၣ်ဘိအသိးန့ၣ်လီၤ.” ပမ့ၢ်လဲၤဃ့ဝံသးစူၤတၢ် လၢတၢ်ဆီၣ်လီၤသးအပူၤန့ၣ်​ ဘၣ်သ့ၣ်သ့ၣ်​ အဝဲကဟ့ၣ်ပှၤအခွဲးလၢ ပကလဲၤနုာ်လီၤလၢ “တိာ်ဧိၤတာ်ဧိၤ” လၢအမ့ၢ် ဝ့ၢ်ပူၤ, အအဲၣ်ဒိးတဲဝဲ အဝဲကအိၣ်ဃူအိၣ်ဖိးက့ၤဒီးပှၤလီၤ.

၁၆. တချုးလၢ ပလဲၤမၤဃူလိာ်ဖိးလိာ်သးဒီး ပဒီပုၢ်ဝဲၢ်အခါ ပကဘၣ်ဆိကမိၣ်​ တၢ်မနုၤလဲၣ်​ ဒီးဘၣ်မနုၤအဃိလဲၣ်.

^၁၆ ပကတဲ ပဒီပုၢ်ဝဲၢ် တၢ်မနုၤလဲၣ်​ ဒီးပကတဲအီၤ ဒ်လဲၣ်န့ၣ်​ ပကဘၣ်ဆိကမိၣ်​ ပာ်စၢၤအီၤ လီၤတံၢ်လီၤဆဲးလီၤ. ဖဲပလဲၤတဲတၢ်ဒီး အဝဲသ့ၣ်အခါ ပကဘၣ်အိၣ်ဒီး တၢ်တိာ်ပာ်လၢ ပကမၤဂ့ၤထီၣ်​ ပတၢ်ရ့လိာ်သးဒီး အဝဲသ့ၣ်အဂီၢ်, တမ့ၢ်လၢ ပကတဲအါတဲစှၤလိာ်သး အဂီၢ်ဘၣ်. ဘၣ်သ့ၣ်သ့ၣ်​ အခီၣ်ထံးခါန့ၣ်​ အကတဲဘၣ်တၢ်လၢ ပကနၣ်အီၤ တမုာ်ဘၣ်. အဃိ ညီဒိၣ်မးလၢ ပကသးထီၣ်တၢ် မ့တမ့ၢ် တဲဘၣ်ထီၣ်က့ၤ အတၢ်ထံၣ်. တၢ်မ့ၢ်ကဲထီၣ်အသး ဒ်န့ၣ်န့ၣ်​ တမ့ၢ်လၢ ပမၤဃူမၤဖိးလိာ်သး ကန့ၢ်ဘၣ်. ဖဲပလဲၤမၤဃူ လိာ်ဖိးလိာ်သးဒီး ပဒီပုၢ်ဝဲၢ်အခါ ပကဘၣ်သ့ၣ်နီၣ်ထီၣ်လၢ မတဂၤဘၣ်လဲၣ်, ကမၣ်လဲၣ်န့ၣ်​ တမ့ၢ်တၢ်လၢ အရ့ဒိၣ်ဘၣ်. တၢ်လၢအရ့ဒိၣ်န့ၣ်​ ကဘၣ်မ့ၢ်ဝဲ လၢပကက့ၤအိၣ်ဃူ လိာ်ဖိးလိာ်သးဒီး အဝဲသ့ၣ်လီၤ.—၁ ကရံၣ်သူး ၆:၇.

၁၇. ပမၤလိန့ၢ် တၢ်မနုၤလၢ ဒီပုၢ်ဝဲၢ်ခွါ က့(လ်)ဘၢၤ အဒိအတဲာ်လဲၣ်.

^၁၇ ဒီပုၢ်ဝဲၢ်ခွါ က့(လ်)ဘၢၤ လၢအဂုာ်ကျဲးစၢး မၤဃူမၤဖိးတၢ်ဒီး ပှၤဂၤန့ၣ်​ တဲဝဲလၢ “ယတတဲးလိာ်သးဒီး ယဖိမုၣ်ဘၣ်. လၢခံနံၣ်ဘျဲၣ်​ အတီၢ်ပူၤန့ၣ်​ ယဂုာ်ကျဲးစၢး တဲတၢ်ဒီးအီၤမုာ်မုာ် ဒီးယပာ်ယသးမုာ်မုာ်ခုၣ်ခုၣ်​ ဒ်သိး ယကမၤဂ့ၤထီၣ်​ ယတၢ်ရ့လိာ်သးဒီးအီၤအဂီၢ်.” ဒီးက့(လ်)ဘၢၤ မၤဝဲတၢ်မနုၤဒံးလဲၣ်. အဝဲတဲဝဲလၢ “တချုးလၢ ယတဲတၢ်ဒီးအီၤ တဘျီဂ့ၤတဘျီဂ့ၤန့ၣ်​ ယဃ့ဘါထုကဖၣ်​ ဒီးယအိၣ်ကတဲာ်ကတီၤပာ်စၢၤယသး ဒ်သိး အဝဲမ့ၢ်တဲယၤတၢ် ဆူၣ်ဆူၣ်ကိၤကိၤန့ၣ်​ ယသးသုတဘၣ်ဒိတဂ့ၤအဂီၢ်. ဒီးယအိၣ်ကတဲာ်ကတီၤယသးလၢ ယကပျၢ်အတၢ်ကမၣ်ထီဘိ. ယသ့ၣ်ညါထီၣ်လၢ ယတကြၢးဂုာ်ကျဲးစၢး ပာ်ဖျါထီၣ်လၢ ယတၢ်ဘၣ်ဘၣ်, ယတၢ်တိာ်ပာ်န့ၣ်​ မ့ၢ်ဝဲ ယကမၤဃူမၤဖိးတၢ်.” အဃိ တၢ်ကဲထီၣ်အသးဒ်လဲၣ်. အဝဲတဲဝဲလၢ “ခဲအံၤန့ၣ်​ ယတၢ်ရ့လိာ်သးဒီး ယဟံၣ်ဖိဃီဖိ ခဲလၢာ်န့ၣ်​ ဂ့ၤဝဲအဃိ ယသးမုာ်ထီၣ်လံ.”

၁၈-၁၉. ပမ့ၢ်မၤဘၣ်ဒိဘၣ်​ ပှၤတဂၤဂၤန့ၣ်​ ပကြၢးမၤ တၢ်မနုၤလဲၣ်​ ဒီးဘၣ်မနုၤအဃိလဲၣ်.

^၁၈ နမ့ၢ်သ့ၣ်ညါလီၤနသးလၢ နမၤဘၣ်ဒိဘၣ်​ ဒီပုၢ်ဝဲၢ်မုၣ်ခွါတဂၤဂၤန့ၣ်​ နကြၢးမၤ တၢ်မနုၤလဲၣ်. မၤထွဲယ့ၣ်ၡူး အတၢ်ဟံးစုနဲၣ်ကျဲလၢ နကမၤဃူမၤဖိးက့ၤနသးဒီး ပှၤဂၤအဂီၢ်. ဘၣ်ဃးဒီး နတၢ်ကီတၢ်ခဲန့ၣ်​ ဃ့ဘါထုကဖၣ်လၢ ယဟိဝၤယွၤအအိၣ်​ ဒီးသန့ၤနသးလၢ အသးစီဆှံ ဒ်သိး နကဲထီၣ်​ ပှၤမၤဃူမၤဖိးတၢ် ကသ့အဂီၢ်. နမ့ၢ်မၤဒ်န့ၣ်န့ၣ်​ နကဒိးန့ၢ်ဘၣ်​ တၢ်သးခု ဒီးတကးဒံးဘၣ်မ့ၢ်ဝဲ နပာ်ဖျါထီၣ်လၢ နဒိကနၣ်​ ယ့ၣ်ၡူးအကလုၢ်လီၤ.—မးသဲ ၅:၉.

^၁၉ ပသးခုစံးဘျုးဘၣ်​ ယဟိဝၤယွၤဒိၣ်မး, မ့ၢ်လၢအဟံးစုနဲၣ်ကျဲပှၤ ခီဖျိယ့ၣ်ၡူးခရံာ်လၢအမ့ၢ် “တၢ်အိၣ်ဖှိၣ်အခိၣ်” လီၤ. (အ့းဖ့းစူး ၅:၂၃) ဒ်တၢ်မၢဖိ ပ့းတရူး, ယၤကိာ် ဒီးယိၤဟၣ်အသိး မ်ပပာ်လီၤပသးလၢ ပက “ဒိကနၣ်အကလုၢ်” တက့ၢ်. (မးသဲ ၁၇:၅) ပမၤအီၤဒ်န့ၣ်​ သ့ခီဖျိ ပမၤဃူမၤဖိးလိာ်က့ၤပသးဒီး ဒီပုၢ်ဝဲၢ်မုၣ်ခွါလၢ ပမၤဘၣ်ဒိတ့ၢ်ဘၣ်အီၤတဖၣ်လီၤ. ပမ့ၢ်မၤထွဲ တၢ်သ့ၣ်တဖၣ်အံၤ ဒီးဆဲးအိၣ်လၢ ကျဲလၢအအံၣ်​ လၢကဆှၢပှၤဆူတၢ်မူန့ၣ်​ ခဲအံၤ ပကဒိးန့ၢ်ဘၣ်​ တၢ်ဆိၣ်ဂ့ၤအါမး ဒီးခါဆူညါစ့ၢ်ကီး ပကအိၣ်ဒီး တၢ်သးခု လီၤထူလီၤယိာ်လီၤ.