နဟံၣ်ဖိဃီဖိ အိၣ်ဒီးတၢ်သးခု ကသ့ဒ်လဲၣ်​—အကူာ် ၁

ပှၤလၢအထီၣ်ပှၢ်သီသီတဖၣ်န့ၣ် အဝဲသ့ၣ် အဲၣ်ဒိးဆဲးအိၣ်ဒီး တၢ်သးခု ဒ်သိးဒီး ဖဲအဝဲသ့ၣ် ဖျီသးတနံၤန့ၣ်ထီဘိ. အဝဲသ့ၣ်ဆဲးအိၣ်ဒီး တၢ်သးခုဒ်န့ၣ် ထီဘိသ့. တကးဒံးဘၣ် ခရံာ်ဖိလၢ အထီၣ်ပှၢ်န့ၢ်ဖးယံာ် ဒီးအဂုာ်ကျဲးစၢးမၤထွဲ လံာ်စီဆှံ အတၢ်ဟ့ၣ်ကူၣ်တဖၣ်န့ၣ် သ့ၣ်ညါဝဲလၢ အဝဲသ့ၣ် ဆဲးအိၣ်ဒီး တၢ်သးခုဒ်န့ၣ် ထီဘိသ့.

၁. လံာ်စီဆှံ ဟ့ၣ်ကူၣ်ဝဲ ဝၤတဖၣ်ဒ်လဲၣ်.

ယဟိဝၤယွၤ ဟ့ၣ်လီၤဝဲ ဝၤတဖၣ်မူဒါ လၢအဝဲသ့ၣ် ကကဲဟံၣ်ခိၣ်. (ဖး အ့းဖ့းစူး ၅:၂၃.) အဃိ ယဟိဝၤယွၤ အဲၣ်ဒိးဝဲလၢ ဝၤတဖၣ် ကဆၢတဲာ်တၢ်လၢ အကဲဘျုးလၢ အဟံၣ်ဖိဃီဖိအဂီၢ်. လံာ်စီဆှံ ဟ့ၣ်ကူၣ်ဝဲ ဝၤတဖၣ်လၢ “ဆဲးအဲၣ်သုမါ.” (အ့းဖ့းစူး ၅:၂၅) လံာ်စီဆှံ အတၢ်ဟ့ၣ်ကူၣ်အံၤ အဲၣ်ဒိးတဲဝဲ အခီပညီဒ်လဲၣ်. အဲၣ်ဒိးတဲဝဲ လၢဟံၣ်မ့ၢ်ဂ့ၤ လၢပှၤဂၤအမဲာ်ညါမ့ၢ်ဂ့ၤ ဝၤတဂၤ ကရ့ဒီးအမါ လၢတၢ်အဲၣ်တၢ်ကွံအပူၤ. အဝဲကဂုာ်ကျဲးစၢး လၢအဂ့ၤကတၢၢ် ဒ်သိးကဒီသဒၢအမါ, ကမၤသးခုအမါအသး ဒီးကမၤလၢပှဲၤန့ၢ်အမါ အတၢ်လိၣ်ဘၣ်တဖၣ်. (၁ တံၤမသ့း ၅:၈) တကးဒံးဘၣ် တၢ်လၢအရ့ဒိၣ်ကတၢၢ်န့ၣ် အဝဲကမၤစၢၤအမါ ဒ်သိး အမါကအိၣ်ဒီး တၢ်ရ့လိာ်သးဒီး ယဟိဝၤယွၤလၢအဂ့ၤ. (မးသဲ ၄:၄) အဒိ အကဃ့ထုကဖၣ် ဒီးအကဖးလံာ်စီဆှံ တပူၤဃီဒီးအမါ. အဃိ ဝၤတဂၤ မ့ၢ်ဆဲးရ့ဒီးအမါလၢ တၢ်အဲၣ်တၢ်ကွံအပူၤန့ၣ် အဝဲကဆဲးအိၣ်ဒီး တၢ်ရ့လိာ်သးဒီး ယဟိဝၤယွၤလၢအဂ့ၤ.​—ဖး ၁ ပ့းတရူး ၃:၇.

၂. လံာ်စီဆှံ ဟ့ၣ်ကူၣ်ဝဲ မါတဖၣ်ဒ်လဲၣ်.

လံာ်စီဆှံ တဲဝဲလၢ မါတဂၤ “ကဘၣ်ပာ်ကဲအဝၤ ဒိၣ်မး.” (အ့းဖ့းစူး ၅:၃၃) မါတဂၤ ပာ်ကဲအဝၤ ကသ့ဒ်လဲၣ်. အပာ်ကဲအဝၤ သ့ခီဖျိ အဃုထံၣ်န့ၢ် အဝၤအတၢ်ဂ့ၤတၢ်ဝါတဖၣ် ဒီးပာ်လုၢ်ပာ်ပှ့ၤ အဝၤအတၢ်ဂုာ်ကျဲးစၢး လၢအကကွၢ်ထွဲ အီၤဒီးအဖိတဖၣ်. ဒီးအဝၤ မ့ၢ်တကဲ ပှၤလၢအဘူၣ်ထီၣ်ဘါထီၣ် ယဟိဝၤယွၤဘၣ် သနာ်က့ အပာ်ဖျါထီၣ် လၢအပာ်ကဲအဝၤ ခီဖျိ အတူၢ်လိာ် ဒီးဆီၣ်ထွဲ အဝၤ အတၢ်ဆၢတဲာ်တဖၣ်, အတဲတၢ်ဒီးအဝၤမုာ်မုာ် ဒီးဖဲအတဲတၢ်ဒီး ပှၤဂၤအခါ အတဲအဝၤအဂ့ၢ်လၢ အဂ့ၤတကပၤ.

၃. ပှၤဒီမိၢ်ဝၤခံဂၤ မၤဂၢၢ်ကျၢၤဒိၣ်ထီၣ် အတၢ်ဆီဟံၣ်ဆီဃီ ကသ့ဒ်လဲၣ်.

ဘၣ်ဃးဒီး ပှၤဒီမိၢ်ဝၤန့ၣ် လံာ်စီဆှံတဲဝဲလၢ “အဝဲသ့ၣ်ခံဂၤန့ၣ် ကကဲထီၣ် တၢ်တမံၤဃီလီၤ.” (မးသဲ ၁၉:၅) လံာ်စီဆှံတဆၢအံၤ အဲၣ်ဒိးတဲဝဲလၢ ပှၤဒီမိၢ်ဝၤခံဂၤ ကဘၣ်ဂုာ်ကျဲးစၢး မၤနၢၤကွံာ်ဝဲ တၢ်တမံၤဂ့ၤတမံၤဂ့ၤလၢ အကမၤလီၤစှၤ အဝဲသ့ၣ်ခံဂၤ အတၢ်အဲၣ်လိာ်သး. အဝဲသ့ၣ် ကဘၣ်ဟ့ၣ်လိာ်သး တၢ်ဆၢကတီၢ်လၢ ကရ့လိာ်သးထီဘိ, တဲသကိးတၢ်လၢ တၢ်အဲၣ်တၢ်ကွံအပူၤ ဒီးတဲဖျါထီၣ်လိာ်သး အတၢ်တူၢ်ဘၣ်ပျီပျီ. လၢအဝဲသ့ၣ် တၢ်အိၣ်မူအပူၤန့ၣ် ယဟိဝၤယွၤ ကဲပှၤလၢအရ့ဒိၣ်ကတၢၢ် ဒီးပှၤလၢအရ့ဒိၣ် ခံဂၤတဂၤန့ၣ် ကဲဝဲ အသးသမူတံၤသကိး. အဃိ အဝဲသ့ၣ် ပလီၢ်အသးဒ်သိး ပှၤလၢအတမ့ၢ် အသးသမူတံၤသကိးဘၣ်တဖၣ်န့ၣ် အဝဲသ့ၣ် တရ့ဝဲဘူးဘူးဘၣ်.

ဃုသ့ၣ်ညါအါထီၣ်

၄. ဝၤသ့ၣ်ဧၢ အဲၣ်သုမါ ဒီးကွၢ်ထွဲအဝဲသ့ၣ်ဂ့ၤဂ့ၤ

တၢ်ဂီၤမူ– ဝၤသ့ၣ်ဧၢ, အဲၣ်သုမါဒ်သုအဲၣ်လီၤသုသး (၉:၅၃)

• ဝၤတဂၤ အအဲၣ်အမါ ဒီးအသးအိၣ်အမါန့ၣ် အပာ်ဖျါထီၣ်ဝဲ သ့ဒ်လဲၣ်.

ဖး ကလီးစဲ ၃:၁၂ ဝံၤဒီး တဲသကိး တၢ်သံကွၢ် လၢလာ် တဖျၢၣ်အံၤ–

• ဝၤတဂၤ ပာ်ဖျါထီၣ် တၢ်ဂ့ၤတၢ်ဝါတဖၣ်အံၤလၢ အမါအဖီခိၣ် ကသ့ဒ်လဲၣ်.

၅. မါသ့ၣ်ဧၢ အဲၣ်သုဝၤ ဒီးပာ်ကဲအဝဲသ့ၣ်

မါတဖၣ်န့ၣ် အဝၤမ့ၢ်ဘူၣ်ထီၣ်ဘါထီၣ် ယဟိဝၤယွၤမ့ၢ်ဂ့ၤ မ့ၢ်တဘူၣ်ထီၣ်ဘါထီၣ် ယဟိဝၤယွၤဘၣ်မ့ၢ်ဂ့ၤ လံာ်စီဆှံ ဟ့ၣ်ကူၣ်အဝဲသ့ၣ်လၢ ကပာ်ကဲအဝၤ. ဖး ၁ ပ့းတရူး ၃:​၁, ၂ ဝံၤဒီး တဲသကိး တၢ်သံကွၢ်လၢလာ်တဖၣ်အံၤ–

• နဝၤမ့ၢ်ကဲ ပှၤလၢအတဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် နကအဲၣ်ဒိးလၢ အဘူၣ်ထီၣ်ဘါထီၣ် ယဟိဝၤယွၤ. အဃိ နမၤစၢၤအီၤ လၢအဂ့ၤကတၢၢ် ကသ့ဒ်လဲၣ်. နမ့ၢ်တဲပၠးအီၤ လံာ်စီဆှံထီဘိန့ၣ် ကဂ့ၤဒိၣ်ဧါ မ့တမ့ၢ် နမ့ၢ်ပာ်ဖျါထီၣ် သကဲာ်ပဝးလၢအဂ့ၤန့ၣ် ကဂ့ၤဒိၣ်ဧါ. ဘၣ်မနုၤအဃိ နဆိကမိၣ်ဒ်န့ၣ်လဲၣ်.

ပှၤဒီမိၢ်ဝၤခံဂၤ ဆၢတဲာ်သကိးတၢ်သ့ ဘၣ်ဆၣ် တဘျီတခီၣ်န့ၣ် မါတဂၤ အသးတလီၤပလိာ်ဒီး အဝၤအတၢ်ဆၢတဲဘၣ်. အသးမ့ၢ်တလီၤပလိာ်ဒီး အဝၤဘၣ်န့ၣ် အတဲဖျါထီၣ်အတၢ်ထံၣ် သ့သ့ဘၣ်ဘၣ် ဒီးတဲဝဲလၢ တၢ်ပာ်ကဲအပူၤသ့. ဘၣ်ဆၣ် အကဘၣ်သ့ၣ်နီၣ်ထီၣ်လၢ ယဟိဝၤယွၤ ဟ့ၣ်လီၤ အဝၤမူဒါလၢ ကဆၢတဲာ်တၢ်လၢ အဂ့ၤကတၢၢ် လၢအဟံၣ်ဖိဃီဖိအဂီၢ်. အဃိ အဝဲကြၢးဂုာ်ကျဲးစၢး လၢအဂ့ၤကတၢၢ် ဒ်သိး အကဆီၣ်ထွဲ အဝၤအတၢ်ဆၢတဲာ်. အမ့ၢ်ဆီၣ်ထွဲအဝၤန့ၣ် အကကဲထီၣ်တၢ်မၤစၢၤ ဒ်သိး အဟံၣ်ဖိဃီဖိ ဒီတဒူၣ်ညါ ကအိၣ်ဒီးတၢ်သးခု. ဖး ၁ ပ့းတရူး ၃:​၃-၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• မါတဂၤ မ့ၢ်ပာ်ဖျါထီၣ်လၢ အပာ်ကဲအဝၤန့ၣ် ယဟိဝၤယွၤ ကသးခုဧါ.

၆. တၢ်ကီတၢ်ခဲ မ့ၢ်အိၣ်ထီၣ်လၢ မါဒီးဝၤအဘၢၣ်စၢၤ သနာ်က့ အဝဲသ့ၣ် မၤဘၣ်ဂီၢ်က့ၤဝဲသ့

တၢ်ဂီၤမူ– နမၤဂၢၢ်ကျၢၤထီၣ် နတၢ်ဆီဟံၣ်ဆီဃီ ကသ့ဒ်လဲၣ် (၅:၄၄)

• လၢတၢ်ဂီၤမူအပူၤ ပှၤဒီမိၢ်ဝၤခံဂၤ အတၢ်ရ့လိာ်သး တဂ့ၤဒ်သိးဒီး လၢညါလၢၤဘၣ်န့ၣ် ပသ့ၣ်ညါဘၣ်ဒ်လဲၣ်.

• ဒ်သိး အဝဲသ့ၣ် ကမၤဂၢၢ်ကျၢၤထီၣ် အတၢ်ရ့လိာ်သးအဂီၢ် အဝဲသ့ၣ်မၤမနုၤလဲၣ်.

ဖး ၁ ကရံၣ်သူး ၁၀:၂၄ ဒီး ကလီးစဲ ၃:၁၃. ဖးလံာ်စီဆှံတဆၢဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ. ဝံၤဒီး ဖးလံာ်စီဆှံလၢခံတဆၢ ဒီးတဲသကိးကဒီး တၢ်သံကွၢ် လၢလာ်တဖၣ်အံၤ–

• ပှၤဒီမိၢ်ဝၤခံဂၤ မ့ၢ်မၤထွဲဝဲ တၢ်ဟ့ၣ်ကူၣ်တခါအံၤန့ၣ် အဝဲသ့ၣ် ကမၤဂၢၢ်ကျၢၤထီၣ် အတၢ်ရ့လိာ်သးဒ်လဲၣ်.

လံာ်စီဆှံ တဲဝဲလၢ ပကဘၣ်ပာ်ကဲလိာ်သး တဂၤဒီးတဂၤ. ဒီးပပာ်ကဲလိာ်သးန့ၣ် အဲၣ်ဒိးတဲစ့ၢ်ကီးဝဲ ပရ့လိာ်သးလၢ တၢ်အဲၣ်တၢ်ကွံ ဒီးတၢ်ပာ်ကဲအပူၤ. ဖး ရိမ့ၤ ၁၂:၁၀ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• မါမ့တမ့ၢ်ဝၤ ကဘၣ်အိၣ်ခိးလၢ အသးသမူတံၤသကိး ကပာ်ကဲဆိအီၤဧါ. ဘၣ်မနုၤအဃိ နတဲဒ်န့ၣ်လဲၣ်.

တၢ်ဂ့ၢ်လၢအရ့ဒိၣ်

ပှၤဒီမိၢ်ဝၤခံဂၤ မ့ၢ်အဲၣ်လိာ်သး, ပာ်ကဲလိာ်သး ဒီးမၤထွဲ လံာ်စီဆှံ အတၢ်ဟံးစုနဲၣ်ကျဲန့ၣ် အဝဲသ့ၣ် ကအိၣ်ဒီးတၢ်သးခု.

တၢ်ကွၢ်ကဒါက့ၤ

• ဒ်သိး ပှၤဒီမိၢ်ဝၤခံဂၤ ကအိၣ်ဒီး တၢ်သးခုအဂီၢ် ဝၤတဂၤ ကဘၣ်မၤဒ်လဲၣ်.

• ဒ်သိး ပှၤဒီမိၢ်ဝၤခံဂၤ ကအိၣ်ဒီး တၢ်သးခုအဂီၢ် မါတဂၤ ကဘၣ်မၤဒ်လဲၣ်.

• နဆီဟံၣ်ဆီဃီ မ့ၢ်ဝံၤလံန့ၣ် ဒ်သိး နတၢ်ဆီဟံၣ်ဆီဃီ ကဂၢၢ်ကျၢၤအဂီၢ် လံာ်စီဆှံ အတၢ်ဟံးစုနဲၣ်ကျဲလၢ ကမၤစၢၤနၤန့ၣ် မ့ၢ်ဖဲလဲၣ်တခါလဲၣ်.

ဃုသ့ၣ်ညါ

ဖးကွၢ် တၢ်ဟ့ၣ်ကူၣ်တဖၣ်လၢ အကမၤစၢၤနၤ ဒ်သိးနဟံၣ်ဖိဃီဖိ ကအိၣ်ဒီး တၢ်သးခု.

နအိၣ်ဒီးဟံၣ်မုာ်ဃီပၢၤ ကသ့ဒ်လဲၣ် (ဘရိၣ်ခၠၣ်)

ကွၢ်တၢ်သးဝံၣ်တဖျၢၣ်အံၤ အတၢ်ဂီၤမူလၢ အပာ်ဖျါထီၣ်ဝဲ ဖဲပှၤဒီမိၢ်ဝၤခံဂၤ မၤထွဲဝဲ ကစၢ်ယွၤ အတၢ်ဟ့ၣ်ကူၣ်အခါ အဝဲသ့ၣ် ဒိးန့ၢ်ဘၣ်တၢ်သးခု.

အဲၣ်ဘၣ်အီၤနီၢ်ကီၢ် (၄:၂၆)

ဖးကွၢ်ဘၣ်ဃးဒီး မါတဂၤ ကဘၣ်အိၣ်လၢအဝၤ အတၢ်တီခိၣ်ရိၤမဲ အဖီလာ်န့ၣ် အဲၣ်ဒိးတဲဝဲ အခီပညီဒ်လဲၣ်.

“ဘၣ်မနုၤအဃိ ပိာ်မုၣ်တဖၣ် ကဘၣ်အိၣ်လၢ ပိာ်ခွါ အတၢ်တီခိၣ်ရိၤမဲ အဖီလာ်လဲၣ်” (တၢးထီခိးတၢ်, လါမ့ၤ ၁၅, ၂၀၁၀)

ပှၤဒီမိၢ်ဝၤခံဂၤ အဝဲသ့ၣ်အိၣ်ဒီး တၢ်ကီတၢ်ခဲဖးဒိၣ် တုၤဒၣ်လဲာ် အဝဲသ့ၣ်လီၤဖး. သနာ်က့ ဒ်သိးအတၢ်ဆီဟံၣ်ဆီဃီကဂ့ၤထီၣ်က့ၤအဂီၢ် တၢ်မနုၤမၤစၢၤအဝဲသ့ၣ်လဲၣ်.

ကစၢ်ယွၤ တၢ်မၤစၢၤအဃိ ပတၢ်ဆီဟံၣ်ဆီဃီ က့ၤဂ့ၤထီၣ်က့ၤ (၅:၁၄)