ပှၤမ့ၢ်မၤအၢမၤနးနၤ သနာ်က့ နဆဲးအိၣ်ဒီး တၢ်သးတီသ့

ပဝဲခရံာ်ဖိ ကိးဂၤဒဲး ပကထံၣ်ဘၣ် တၢ်ထီဒုၣ်ထီဒါ. ပှၤဂၤကဂုာ်ကျဲးစၢး မၤပတုာ်ပှၤဒ်သိး ပသုတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤ. ဒီးပမ့ၢ်တပတုာ် ဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် အဝဲသ့ၣ် ကမၤအၢမၤနးပှၤ. ဘၣ်ဆၣ် ပကြၢးဘၣ်ယိၣ်တၢ်ဧါ.

၁. ပှၤကမၤအၢမၤနးပှၤန့ၣ် ပသ့ၣ်ညါပာ်စၢၤဒ်လဲၣ်.

လံာ်စီဆှံ တဲဖျါထီၣ်န့ၢ်ပှၤ လီၤတံၢ်လီၤဆဲးလၢ “ပှၤလၢအအဲၣ်ဒိး တီဒီးကစၢ်ယွၤ ဒ်ယ့ၣ်ၡူးခရံာ်အပျဲၢ်တဂၤအသိးန့ၣ် ကဘၣ်တၢ်မၤနးမၤဖှီၣ် အဝဲသ့ၣ်ကိးဂၤဒဲးလီၤ.” (၂ တံၤမသ့း ၃:၁၂) ယ့ၣ်ၡူးန့ၣ် ခီဖျိလၢ အတဘၣ်ဃးဒီး ဟီၣ်ခိၣ်ဘၣ်အဃိ ပှၤမၤအၢမၤနးအီၤ. ပဝဲစ့ၢ်ကီး ခီဖျိလၢ ပတမၤဘၣ်ဃးလိာ်ပသးဒီး ဟီၣ်ခိၣ်တၢ်ပၢတၢ်ပြး ဒီးတၢ်ဘူၣ်တၢ်ဘါကမၣ် နီတခါဘၣ်အဃိ ပှၤမ့ၢ်မၤအၢမၤနးပှၤ သနာ်က့ ပတကမၢကမၣ်ဘၣ်.​—ယိၤဟၣ် ၁၅:​၁၈, ၁၉.

၂. ပအိၣ်ကတဲာ်ကတီၤဆိပာ်စၢၤပသး လၢတၢ်မၤအၢမၤနးအဂီၢ် ကသ့ဒ်လဲၣ်.

ပကဘၣ် မၤဂၢၢ်ကျၢၤထီၣ် ပတၢ်နာ်ယဟိဝၤယွၤ လၢဆၢကတီၢ်ခဲအံၤ. အဃိ ကိးနံၤဒဲးန့ၣ် ဟံးန့ၢ်တၢ်ဆၢကတီၢ် လၢနကဃ့ထုကဖၣ် ဒီးဖးလံာ်စီဆှံ. တကးဒံးဘၣ် နကဘၣ် ထီၣ်တၢ်အိၣ်ဖှိၣ်ထီဘိ. ပမ့ၢ်မၤဒ်အံၤန့ၣ် ပဟံၣ်ဖိဃီဖိ မ့ၢ်ထီဒါပှၤ မ့တမ့ၢ် ပမ့ၢ်ထံၣ်ဘၣ်ဒီး တၢ်မၤအၢမၤနး တမံၤဂ့ၤတမံၤဂ့ၤ သနာ်က့ ပလဲၤခီဖျိ တၢ်မၤအၢမၤနးတဖၣ်အံၤ လၢတၢ်သးဒူအပူၤသ့. တၢ်မၢဖိပီလူး လၢအကဲပှၤတဂၤလၢ အထံၣ်ဘၣ်ဒီး တၢ်မၤအၢမၤနး တလီၢ်လီၢ်န့ၣ် ကွဲးဝဲလၢ “ယဟိဝၤယွၤ မ့ၢ်ပှၤလၢ အမၤစၢၤယၤအဃိ ယတပျံၤတၢ်ဘၣ်.”​—ဧ့ၤဘြံၤ ၁၃:၆.

ပမၤအါထီၣ် ပတၢ်သးဒူ သ့ခီဖျိ ပဟးစံၣ်တဲၤတဲလီၤတၢ်ထီဘိ. ဖဲပဟးစံၣ်တဲၤတဲလီၤတၢ်အခါ အမၤစၢၤပှၤဒ်သိး ပကသန့ၤပသး လၢယဟိဝၤယွၤ ဒီးပသုတပျံၤပှၤကညီ လၢၤတဂ့ၤ. (ကတိၤဒိ ၂၉:၂၅) ခါဆူညါန့ၣ် ပဒိၣ်ပပှၢ်မ့ၢ်ဂုာ်ကျဲးစၢး မၤပတုာ်ပှၤ ဒ်သိး ပသုတဟးစံၣ်တဲၤတဲလီၤတၢ် လၢၤတဂ့ၤ သနာ်က့ ပမ့ၢ်မၤအါထီၣ် ပတၢ်သးဒူ ခီဖျိပစံၣ်တဲၤတဲလီၤတၢ် လၢဆၢကတီၢ်ခဲအံၤန့ၣ် မ့ၢ်ဝဲ ပအိၣ်ကတဲာ်ကတီၤ ဆိပာ်စၢၤပသး ဒ်သိးပကဆဲး စံၣ်တဲၤတဲလီၤတၢ် လၢခါဆူညါ.​—၁ သ့းစၤလနံ ၂:၂.

၃. ဖဲပထံၣ်ဘၣ် တၢ်မၤအၢမၤနးအခါ ပမ့ၢ်ဆဲးတီဒီး ယဟိဝၤယွၤန့ၣ် ကကဲဘျုးဒ်လဲၣ်.

ပမ့ၢ်ထံၣ်ဘၣ် တၢ်မၤအၢမၤနးန့ၣ် ပတူၢ်ဘၣ်တမုာ်ဘၣ်. ဘၣ်ဆၣ် ဖဲပလဲၤခီဖျိ တၢ်မၤအၢမၤနးန့ၢ်အခါ ပတၢ်နာ် ဂၢၢ်ကျၢၤဒိၣ်ထီၣ်ဝဲ. ဒီးတဘျီတခီၣ်န့ၣ် ပဆိကမိၣ်လၢ ပလဲၤခီဖျိတၢ် တန့ၢ်လၢၤဘၣ်. သနာ်က့ ဖဲပဆိကမိၣ်ဒ်န့ၣ်အခါ ပထံၣ်ဘၣ် ယဟိဝၤယွၤ အတၢ်မၤစၢၤ လၢကျဲတဘိဘိအဃိ ပတၢ်ရ့လိာ်သးဒီးအီၤ ဂၢၢ်ကျၢၤဒိၣ်ထီၣ်ဝဲ. (ဖး ယၤကိာ် ၁:​၂-၄.) ဖဲယဟိဝၤယွၤ ထံၣ်ဝဲလၢ ပဘၣ်တူၢ်တၢ်အခါ အသးတမုာ်ဘၣ်. ဘၣ်ဆၣ် ဖဲအထံၣ်ဝဲလၢ ပတဟ့ၣ်အၡူဘၣ်အခါ အဝဲသးခုဒိၣ်မး. လံာ်စီဆှံ တဲဝဲလၢ “သုမ့ၢ်တူၢ်တၢ်နးတၢ်ဖှီၣ် မ့ၢ်လၢ သုမၤတၢ်ဂ့ၤအဃိန့ၣ် ကစၢ်ယွၤ ဘၣ်သူၣ်ဘၣ်သးဝဲလီၤ.” (၁ ပ့းတရူး ၂:၂၀) အဃိ ပမ့ၢ်တီဒီး ယဟိဝၤယွၤန့ၣ် ယဟိဝၤယွၤ ကဆိၣ်ဂ့ၤပှၤ ဒီးအကဟ့ၣ်ပှၤ တၢ်မူအထူအယိာ် လၢဟီၣ်ခိၣ်သီအပူၤ. ဒီးပှၤလၢအအိၣ်လၢ ဟီၣ်ခိၣ်သီအပူၤန့ၣ် ကဘူၣ်ထီၣ်ဘါထီၣ် ယဟိဝၤယွၤ ကိးဂၤဒဲး ဒီးပှၤတြီအဝဲသ့ၣ် တအိၣ်နီတဂၤလၢၤဘၣ်.​—မးသဲ ၂၄:၁၃.

ဃုသ့ၣ်ညါအါထီၣ်

၄. နဟံၣ်ဖိဃီဖိ မ့ၢ်ထီဒါနၤ သနာ်က့ နလဲၤခီဖျိအီၤန့ၢ်

ယ့ၣ်ၡူး သ့ၣ်ညါဝဲဂ့ၤဂ့ၤလၢ ပှၤလၢပဟံၣ်ဖိဃီဖိအကျါ တနီၤန့ၣ် ဘၣ်သ့ၣ်သ့ၣ် အဝဲသ့ၣ် တအဲၣ်ဒိးလၢ ပကဘူၣ်ထီၣ်ဘါထီၣ် ယဟိဝၤယွၤဘၣ်. ဖး မးသဲ ၁၀:​၃၄-၃၆ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပှၤတဂၤမ့ၢ် ဆၢတဲာ်လီၤအသးလၢ အကဘူၣ်ထီၣ်ဘါထီၣ် ယဟိဝၤယွၤန့ၣ် ဘၣ်သ့ၣ်သ့ၣ် ပှၤလၢအဟံၣ်ဖိဃီဖိ အကျါတဂၤဂၤ ကတဲအီၤ မ့တမ့ၢ် ကမၤကီမၤခဲအီၤဒ်လဲၣ်.

တၢ်ဂီၤမူ– ယဟိဝၤယွၤဟံးန့ၢ်က့ၤပှၤ (၅:၁၃)

• နဟံၣ်ဖိဃီဖိ မ့တမ့ၢ် နသကိးတဂၤဂၤ မ့ၢ်ဂုာ်ကျဲးစၢး တြီနၤဒ်သိး နသုတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤန့ၣ် နကမၤဒ်လဲၣ်.

ဖး စံးထီၣ်ပတြၢၤ ၂၇:၁၀ ဒီး မၢ်ကူး ၁၀:​၂၉, ၃၀. ဖးလံာ်စီဆှံတဆၢ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ. ဝံၤဒီး ဖးလံာ်စီဆှံလၢခံတဆၢ ဒီးတဲသကိးကဒီး တၢ်သံကွၢ် လၢလာ်တဖျၢၣ်အံၤ–

• နဟံၣ်ဖိဃီဖိ မ့တမ့ၢ် နသကိးတဂၤဂၤ မ့ၢ်ဂုာ်ကျဲးစၢး တြီနၤဒ်သိး နသုတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤန့ၣ် တၢ်အၢၣ်လီၤလၢ လံာ်စီဆှံတဆၢအံၤအပူၤန့ၣ် ကမၤစၢၤနၤဒ်လဲၣ်.

၅. ပှၤမ့ၢ်မၤအၢမၤနးနၤ သနာ်က့ ဆဲးဘူၣ်ထီၣ်ဘါထီၣ် ယဟိဝၤယွၤ

တၢ်ဂီၤမူ– ထံၣ်ဘၣ်ဒီး တၢ်မၤအၢမၤနးဘၣ်ဆၣ် ဆဲးပာ်ဖျါထီၣ်တၢ်သးဒူ (၆:၂၇)

• ဒ်သိး နတၢ်သးဒူ ကအါထီၣ်အဂီၢ် တၢ်လဲၤခီဖျိလၢ တၢ်ဂီၤမူအပူၤအံၤ မၤစၢၤနၤဒ်လဲၣ်.

ဖး မၤတၢ် ၅:​၂၇-၂၉ ဒီး ဧ့ၤဘြံၤ ၁၀:​၂၄, ၂၅. ဖးလံာ်စီဆှံတဆၢ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ. ဝံၤဒီး ဖးလံာ်စီဆှံ လၢခံတဆၢ ဒီးတဲသကိးကဒီး တၢ်သံကွၢ် လၢလာ်တဖျၢၣ်အံၤ–

• ပဒိၣ်ပပှၢ် မ့ၢ်တဲပှၤလၢ ပတဘၣ်ဟးစံၣ်တဲၤတဲလီၤတၢ် မ့တမ့ၢ် တဘၣ်ထီၣ်တၢ်အိၣ်ဖှိၣ် လၢၤဘၣ်န့ၣ် ဘၣ်မနုၤအဃိ အရ့ဒိၣ်လၢ ပကဘၣ် ဆဲးဘူၣ်ထီၣ်ဘါထီၣ် ယဟိဝၤယွၤလဲၣ်.

၆. ဒ်သိး နတူၢ်တၢ်ကန့ၢ်အဂီၢ် ယဟိဝၤယွၤ ကမၤစၢၤနၤ

တၢ်ဂီၤမူ– ယဟိဝၤယွၤ ကဟ့ၣ်ယၤဂံၢ်ဘါ (၃:၄၀)

• လၢတၢ်ဂီၤမူအပူၤန့ၣ် ဒ်သိး ယဟိဝၤပှၤအုၣ်အသးတဖၣ် ဆဲးတူၢ်တၢ်ကန့ၢ်အဂီၢ် တၢ်မနုၤမၤစၢၤ အဝဲသ့ၣ်လဲၣ်.

ဖး ရိမ့ၤ ၈:​၃၅, ၃၇-၃၉ ဒီး ဖံလံးပံၤ ၄:၁၃. ဖးလံာ်စီဆှံတဆၢ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ. ဝံၤဒီး ဖးလံာ်စီဆှံ လၢခံတဆၢ ဒီးတဲသကိးကဒီး တၢ်သံကွၢ် လၢလာ်တဖျၢၣ်အံၤ–

• ဒ်လံာ်စီဆှံတဆၢအံၤ ပာ်ဖျါထီၣ်ဝဲအသိး ဘၣ်မနုၤအဃိ နနာ်သ့လၢ နလဲၤခီဖျိ တၢ်မၤကွၢ် တမံၤဂ့ၤတမံၤဂ့ၤ န့ၢ်ဝဲလဲၣ်.

ဖး မးသဲ ၅:​၁၀-၁၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• နမ့ၢ်ထံၣ်ဘၣ်ဒီး တၢ်မၤအၢမၤနး သနာ်က့ ဘၣ်မနုၤအဃိ နသးခုသ့ဒံးလဲၣ်.

တၢ်ဂ့ၢ်လၢအရ့ဒိၣ်

ဖဲပထံၣ်ဘၣ်ဒီး တၢ်မၤအၢမၤနးအခါ ပမ့ၢ်ဆဲးဘူၣ်ထီၣ်ဘါထီၣ် ယဟိဝၤယွၤန့ၣ် ယဟိဝၤယွၤ ပာ်လုၢ်ပာ်ပှ့ၤဝဲ ပတၢ်ဂုာ်ကျဲးစၢး. ဒီးခီဖျိလၢ ယဟိဝၤယွၤ အတၢ်မၤစၢၤအဃိ ပတူၢ်တၢ်ကန့ၢ်ထီဘိ.

တၢ်ကွၢ်ကဒါက့ၤ

• ပှၤကမၤအၢမၤနးပှၤန့ၣ် ပသ့ၣ်ညါပာ်စၢၤဒ်လဲၣ်.

• ပအိၣ်ကတဲာ်ကတီၤ ဆိပာ်စၢၤပသး လၢတၢ်မၤအၢမၤနးအဂီၢ် ကသ့ဒ်လဲၣ်.

• ပမ့ၢ်ထံၣ်ဘၣ်ဒီး တၢ်မၤအၢမၤနး တမံၤဂ့ၤတမံၤဂ့ၤ သနာ်က့ ဘၣ်မနုၤအဃိ ပနာ်သ့သပှၢ်တၢၢ်လၢ ပဆဲးဘူၣ်ထီၣ်ဘါထီၣ် ယဟိဝၤယွၤ သ့ဒံးလဲၣ်.

ဃုသ့ၣ်ညါ

ကွၢ်တၢ်ဂီၤမူလၢ အပာ်ဖျါထီၣ်ဝဲ ဒီပုၢ်ဝဲၢ်ခွါသးစၢ်တဂၤ တဲဖျါထီၣ်ဝဲလၢ ခီဖျိလၢ အတမၤဘၣ်ဃးအသးဒီး ထံဂ့ၢ်ကီၢ်ဂ့ၢ်ဘၣ်အဃိ အဘၣ်အိၣ်လၢဃိာ်ပူၤ. ဘၣ်ဆၣ် ဒ်သိး အတူၢ်တၢ်ကန့ၢ်အဂီၢ် ယဟိဝၤယွၤ မၤစၢၤအီၤဒ်လဲၣ်.

ထံၣ်ဘၣ်ဒီး တၢ်မၤအၢမၤနးဘၣ်ဆၣ် ဆဲးအိၣ်ဒီးတၢ်တူၢ်န့ၢ်ခီၣ်ကဲ (၂:၃၄)

ကွၢ်တၢ်ဂီၤမူလၢ အပာ်ဖျါထီၣ်ဝဲ ပှၤဒီမိၢ်ဝၤခံဂၤ ထံၣ်ဘၣ်ဒီး တၢ်မၤကွၢ်လၢ အနံၣ်အါမး သနာ်က့ ဒ်သိး အဝဲသ့ၣ် ကဆဲးဘူၣ်ထီၣ်ဘါထီၣ် ယဟိဝၤယွၤ လၢတၢ်သးတီအပူၤန့ၣ် တၢ်မနုၤမၤစၢၤ အဝဲသ့ၣ်လဲၣ်.

တၢ်အိၣ်သးမ့ၢ်ဆီတလဲဘၣ်ဆၣ် ဆဲးဘူၣ်ထီၣ်ဘါထီၣ် ယဟိဝၤယွၤ (၇:၁၁)

ဖးကွၢ် တၢ်ဂ့ၢ်လၢ အပာ်ဖျါထီၣ်ဝဲ ဖဲနထံၣ်ဘၣ်ဒီး တၢ်မၤအၢမၤနးအခါ နအိၣ်ဒီးတၢ်သးဒူ ကသ့ဒ်လဲၣ်.

“ဆၢကတီၢ်ခဲအံၤ အိၣ်ကတဲာ်ကတီၤပာ်စၢၤနသး လၢတၢ်မၤအၢမၤနးအဂီၢ်” (တၢးထီခိးတၢ်, လါယူၤလံ ၂၀၁၉)

ပဟံၣ်ဖိဃီဖိ မ့ၢ်ထီဒါပှၤန့ၣ် ပကြၢးအိၣ်ဒီးတၢ်ထံၣ်ဒ်လဲၣ်. ဒီးဒ်သိး ပကပာ်ပသး မုာ်မုာ်ခုၣ်ခုၣ် ဒီးဆဲးသးတီဒီး ယဟိဝၤယွၤအဂီၢ် ပကဘၣ်မၤဒ်လဲၣ်.

“တၢ်မ့ၢ်တၢ်တီန့ၣ် တဒုးအိၣ်ထီၣ် “တၢ်ဃူတၢ်ဖိးဘၣ်, မ့ၢ်နးတဘ့ၣ်”” (တၢးထီခိးတၢ်, လါအီးကထိဘၢၣ် ၂၀၁၇)