ယဟိဝၤယွၤ အတၢ်လုၢ်အီၣ်လုၢ်အီပှၤ လၢနီၢ်သးတခီန့ၣ် ဟံးန့ၢ်အီၤလၢလၢပှဲၤပှဲၤတက့ၢ်
“ယဲဒၣ်အံၤ, ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်” လီၤ. —ယၡါယၤ ၄၈:၁၇.
၁, ၂. (က) လံာ်စီဆှံန့ၣ် ယဟိဝၤပှၤအုၣ်အသးတဖၣ် ထံၣ်ဝဲဒ်လဲၣ်. (ခ) လံာ်စီဆှံတတီၤလၢ နဘၣ်သးအီၤဒိၣ်ကတၢၢ်န့ၣ် မ့ၢ်ဖဲလဲၣ်တတီၤလဲၣ်.
ဒ်ပမ့ၢ် ယဟိဝၤပှၤအုၣ်အသးတဖၣ်အသိး ပပာ်ဒိၣ်လံာ်စီဆှံဒိၣ်မးလီၤ. လံာ်စီဆှံန့ၣ် မၤမုာ်ထီၣ်ပသး, ဟ့ၣ်ပှၤတၢ်မုၢ်လၢ်, ဒီးတၢ်ဟံးစုနဲၣ်ကျဲလၢ ပနာ်န့ၢ်အီၤသ့န့ၣ်လီၤ. (ရိမ့ၤ ၁၅:၄) လံာ်စီဆှံန့ၣ် တမ့ၢ်ပှၤဟီၣ်ခိၣ်ဖိကွဲးဝဲလၢ အဝဲသ့ၣ်အတၢ်ဆိကမိၣ်ဘၣ်. လံာ်စီဆှံမ့ၢ်ဝဲ “ယွၤအကလုၢ်အကထါ” လီၤ.—၁ သ့းစၤလနံ ၂:၁၃.
၂ ပဝဲဒၣ်အါတက့ၢ်န့ၣ် လံာ်စီဆှံ အတၢ်ဂ့ၢ်တၢ်ကျိၤတခါခါ လၢပဘၣ်သးအီၤဒိၣ်ကတၢၢ်န့ၣ် အိၣ်ဝဲလီၤ. ပှၤတနီၤနီၤ ဖးဝဲလံာ်တၢ်သးခုကစီၣ်မုာ် မ့ၢ်လၢအဝဲသ့ၣ်ထံၣ်ဘၣ်ဝဲ ယဟိဝၤယွၤအတၢ်ဂ့ၤတၢ်ဝါ ခီဖျိယ့ၣ်ၡူးအဃိန့ၣ်လီၤ. (ယိၤဟၣ် ၁၄:၉) မ့မ့ၢ်ပှၤဂၤတနီၤန့ၣ် သးအိၣ်ဖးဝဲ လံာ်လၢဘၣ်ဃးဒီး ဝံအတၢ်စံးပာ်တဖၣ် ဒ်သိးဒီး လံာ်လီၣ်ဖျါလၢ အပာ်ဖျါထီၣ်န့ၢ်ပှၤ “တၢ်လၢ အဘၣ်မၤအသးချ့ချ့တဖၣ်န့ၣ်လီၤ.” (လီၣ်ဖျါ ၁:၁) ပှၤတနီၤ ဒိးန့ၢ်ဘၣ်ဝဲ တၢ်သူၣ်မံသးမုာ်ဖဲ ဖးဝဲလံာ်စံးထီၣ်ပတြၢၤအခါလီၤ. ဒီးမ့မ့ၢ် ပှၤဂၤတနီၤန့ၣ် ဘၣ်သူၣ်ဘၣ်သးဝဲ တၢ်ဟ့ၣ်ကူၣ်လၢ လံာ်ကတိၤဒိအပူၤလီၤ. လၢတၢ်န့ၣ်အဃိ ပသ့ၣ်ညါဘၣ်လၢ လံာ်စီဆှံန့ၣ် မ့ၢ်လံာ်လၢပှၤခဲလၢာ်အဂီၢ်လီၤ.
၃, ၄. (က) ဘၣ်ဃးဒီး ပလံာ်လဲၢ်တဖၣ်န့ၣ် မ့ၢ်ပထံၣ်အီၤဒ်လဲၣ်. (ခ) ပလံာ်လဲၢ်တနီၤန့ၣ် ဘၣ်တၢ်ထုးထီၣ်အီၤလၢ မတၤသ့ၣ်တဖၣ်အဂီၢ်လဲၣ်.
၃ ခီဖျိလၢ ပပာ်ဒိၣ်လံာ်စီဆှံအဃိ ပပာ်ဒိၣ်စ့ၢ်ကီး ပလံာ်လဲၢ်အဂၤလၢ အဒိးသန့ၤထီၣ်အသးလၢ လံာ်စီဆှံန့ၣ်လီၤ. ကယဲၢ်လံာ်, ဘရိၣ်ခၠၣ်, မဲးကစံဒီး လံာ်လဲၢ်အဂၤတဖၣ်န့ၣ် ပဒိးန့ၢ်ဘၣ်အီၤလၢ ယဟိဝၤယွၤအအိၣ်န့ၣ်လီၤ. ဒီးလံာ်သ့ၣ်တဖၣ်အံၤ မၤစၢၤပှၤဒ်သိး ပကသုးဘူးပသးဆူ ယဟိဝၤယွၤအအိၣ်ဒီး မၤဆူၣ်ထီၣ်ပတၢ်နာ်န့ၣ်လီၤ.—တံတူး ၂:၂.
၄ ပလံာ်လဲၢ်အါဒၣ်တက့ၢ်န့ၣ် ဘၣ်တၢ်ထုးထီၣ်အီၤလၢ ယဟိဝၤပှၤအုၣ်အသးခဲလၢာ် အဂီၢ်လီၤ. ဘၣ်ဆၣ် လံာ်လဲၢ်တနီၤန့ၣ် ဘၣ်တၢ်ထုးထီၣ်အီၤ လီၤဆီဒၣ်တၢ်လၢ ပှၤသးစၢ်အဂီၢ် မ့တမ့ၢ် မိၢ်ပၢ်အဂီၢ်န့ၣ်လီၤ. လံာ်လဲၢ်ဒီး တၢ်ဂီၤမူအါတက့ၢ်လၢ ပပှာ်ယဲၤသန့အပူၤန့ၣ် ဘၣ်တၢ်ထုးထီၣ်အီၤလၢ ပှၤလၢတမ့ၢ်ယဟိဝၤပှၤအုၣ်အသးတဖၣ်အဂီၢ်လီၤ. နီၢ်သးတၢ်အီၣ်တၢ်အီအါထဲထဲအံၤန့ၣ် ပာ်ဖျါထီၣ်ဝဲလၢ ယဟိဝၤယွၤ မၤလၢထီၣ်ပှဲၤထီၣ် အတၢ်အၢၣ်လီၤအီလီၤလၢ ကလုၢ်အီၣ်လုၢ်အီ အပှၤဂီၢ်မုၢ်လၢ နီၢ်သးတခီလီၤ.—ယၡါယၤ ၂၅:၆.
၅. ပနာ်သ့လၢ ယဟိဝၤယွၤကပာ်လုၢ်ပာ်ပှ့ၤဝဲ တၢ်မနုၤလဲၣ်.
၅ ပဝဲဒၣ်အါတက့ၢ်န့ၣ် ပအဲၣ်ဒိးဟံးန့ၢ်အါထီၣ် တၢ်ဆၢကတီၢ်လၢ ပကဖးလံာ်စီဆှံဒီး ပလံာ်လဲၢ်တဖၣ်အဂီၢ်လီၤ. လံာ်တဘ့ၣ်ဒီး တဘ့ၣ်လၢ ပဖးအီၤန့ၣ် ပဟ့ၣ်တၢ်ဆၢကတီၢ် တမ့ၢ်ကဒ်သိးလိာ်အသးဘၣ်. ဖဲပသူတၢ်ဆၢကတီၢ်လၢ ပကဖးလံာ်စီဆှံဒီး ပလံာ်ပလဲၢ်တဖၣ်အခါ ပနာ်သ့သပှၢ်ကတၢၢ်လၢ ယဟိဝၤယွၤကသးခုလီၤ. (အ့းဖ့းစူး ၅:၁၅, ၁၆) ဘၣ်ဆၣ် တၢ်လီၤဘၣ်ယိၣ်လၢ ပကဘၣ်ဟးဆှဲးန့ၣ်အိၣ်ဝဲလီၤ. တၢ်လၢပကဘၣ် ဟးဆှဲးန့ၣ် မ့ၢ်မနုၤလဲၣ်.
၆. နီၢ်သးတၢ်အီၣ်လၢ ယဟိဝၤယွၤ ကတဲာ်ကတီၤန့ၢ်ပှၤန့ၣ် ဒ်သိးပတဒိးန့ၢ်ဘၣ်အဂီၢ် တၢ်မနုၤမၤတံာ်တာ်ပှၤလဲၣ်.
၆ ပမ့ၢ်တပလီၢ်ပသးန့ၣ် ဘၣ်သ့ၣ်သ့ၣ် ပကဆိကမိၣ်ဘၣ်လၢ လံာ်စီဆှံအဆၢတနီၤ မ့တမ့ၢ် ပလံာ်လဲၢ်တနီၤန့ၣ် အဘျုးတအိၣ်လၢပဂီၢ်ဘၣ်. အဒိ ပမ့ၢ်ဆိကမိၣ်လၢ လံာ်စီဆှံအဆၢတနီၤ အတကဲဘျုးလၢ ပဂီၢ်ဘၣ်န့ၣ် ပကမၤဒ်လဲၣ်. ဒီးလံာ်လဲၢ်တနီၤ မ့ၢ်တဘၣ်တၢ်ထုးထီၣ်အီၤလၢ ပဂီၢ်ဘၣ်န့ၣ် ပကမၤဒ်လဲၣ်. မ့ၢ်ပကဖးဝံၤတၢ်မံၤ မ့တမ့ၢ် ပတဖးအီၤနီတစဲးဘၣ်ဧါ. ပမ့ၢ်မၤဒ်န့ၣ်န့ၣ် တမ့ၢ်ပကဒိးန့ၢ်ဘၣ် နီၢ်သးတၢ်အီၣ်လၢ အလုၢ်ဒိၣ်ပှ့ၤဒိၣ်တဖၣ်အံၤဘၣ်. လၢတၢ်န့ၣ်အဃိ ပဟးဆှဲးတၢ်လီၤဘၣ်ယိၣ်အံၤ ကသ့ဒ်လဲၣ်. ပဘၣ်သ့ၣ်နီၣ်ထီၣ်လၢ လံာ်လဲၢ်ဒီး တၢ်အဂၤတဖၣ်လၢ ပဒိးန့ၢ်ဘၣ်အီၤန့ၣ် ဟဲလၢယဟိဝၤယွၤအအိၣ်လီၤ. လၢလံာ်စီဆှံအပူၤန့ၣ် ပဖးဘၣ်လၢ “ယဲဒၣ်အံၤ, ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်” လီၤ. (ယၡါယၤ ၄၈:၁၇) လၢတၢ်မၤလိအံၤအပူၤ ပကတဲသကိး တၢ်ဟ့ၣ်ကူၣ်သၢခါလၢ ကမၤစၢၤပှၤ ဒ်သိးပကဒိးန့ၢ်ဘၣ် နီၢ်သးတၢ်အီၣ်လၢလၢပှဲၤပှဲၤလၢ ယဟိဝၤယွၤအအိၣ်န့ၣ်လီၤ.
တၢ်ဟ့ၣ်ကူၣ်လၢ ကကဲဘျုးကဲဖှိၣ် လၢပတၢ်ဖးလံာ်စီဆှံအဂီၢ်
၇. ဖဲပဖးလံာ်စီဆှံအခါ ဘၣ်မနုၤအဃိ ပဘၣ်အိၣ်ဒီး တၢ်ထံၣ်လၢအလဲၢ်လဲၣ်.
၇ ဖဲနဖးလံာ်စီဆှံအခါ အိၣ်ဒီးတၢ်ထံၣ်လၢအလဲၢ်. လံာ်စီဆှံအဆၢတနီၤန့ၣ် ဘၣ်ထွဲလိာ်အသးဒီးပှၤတဂၤ မ့တမ့ၢ် ပှၤတဖုလီၤ. ဘၣ်ဆၣ် လံာ်စီဆှံစံးဝဲလၢ “ကယဲၢ်တၢ်ကွဲးအသးခဲလၢာ်န့ၣ်, ကွဲးအသးလၢယွၤအသးစီဆှံ, ဒီးဂ့ၤ” ဝဲလီၤ. (၂ တံၤမသ့း ၃:၁၆) လၢတၢ်န့ၣ်အဃိ ဖဲပဖးလံာ်စီဆှံအခါ ပကဘၣ်အိၣ်ဒီး တၢ်ထံၣ်လၢအလဲၢ်လီၤ. ဒီပုၢ်ဝဲၢ်ခွါတဂၤ စံးဝဲလၢ– “ဖဲယဖးလံာ်စီဆှံအခါ ယဆိကမိၣ်ထီၣ်က့ၤလၢ လံာ်စီဆှံတဆၢအံၤအပူၤန့ၣ် ယမၤလိန့ၢ်ဘၣ်တၢ်ဂ့ၢ်အါမံၤသ့ဝဲလီၤ. ခီဖျိလၢ ယမၤဒ်အံၤအဃိ တၢ်မၤလိလၢ အတအိၣ်ဖျါဂ့ၤဂ့ၤတဖၣ်န့ၣ် ယသ့ၣ်ညါဘၣ်လီၤ.” လၢတၢ်န့ၣ်အဃိ ဖဲပဖးလံာ်စီဆှံအခါ ပဘၣ်ဃ့တၢ်မၤစၢၤလၢ ယဟိဝၤယွၤအအိၣ် ဒ်သိးကဟ့ၣ်ပှၤ တၢ်ထံၣ်လၢအလဲၢ် ဒီးပကနၢ်ပၢၢ်ထီၣ် တၢ်လၢယဟိဝၤယွၤ အဲၣ်ဒိးမၢပသ့ၣ်ညါအဂီၢ်န့ၣ်လီၤ.—ဧ့စြၤ ၇:၁၀; ဖး ယၤကိာ် ၁:၅ တက့ၢ်.
ဖဲနဖးလံာ်စီဆှံအခါ ဒ်သိးနကဒိးန့ၢ်ဘၣ်အဘျုး လၢလၢပှဲၤပှဲၤအဂီၢ် နကဘၣ်မၤဒ်လဲၣ် (ကွၢ်လံာ်အဆၢ ၇)
၈, ၉. (က) ဖဲပဖးလံာ်စီဆှံအခါ ပကြၢးသံကွၢ်လီၤက့ၤပသးဒ်လဲၣ်. (ခ) တၢ်ဂ့ၤတၢ်ဝါလၢ တၢ်အိၣ်ဖှိၣ်သးပှၢ်တဖၣ် ကဘၣ်တုၤထီၣ်ထီၣ်ဘးဝဲန့ၣ် ဒုးသ့ၣ်ညါပှၤလၢ ကစၢ်ယဟိဝၤယွၤ မ့ၢ်ပှၤဒ်လဲၣ်တဂၤလဲၣ်.
၈ သံကွၢ်တၢ်သံကွၢ်တဖၣ်. ဖဲနဖးလံာ်စီဆှံအခါ အိၣ်ပတုာ်ဒီး သံကွၢ်လီၤနသးလၢ– ‘ဘၣ်ဃးဒီး ယဟိဝၤယွၤန့ၣ် လံာ်စီဆှံအဆၢအံၤ သိၣ်လိယၤ တၢ်မနုၤလဲၣ်. ယမၤထွဲလံာ်စီဆှံအဆၢအံၤလၢ ယတၢ်အိၣ်မူပူၤ ကသ့ဒ်လဲၣ်. ဒ်သိးယကမၤစၢၤပှၤဂၤအဂီၢ် ယသူလံာ်စီဆှံအဆၢအံၤ ကသ့ဒ်လဲၣ်.’ ဖဲပဆိကမိၣ်ထံ တၢ်သံကွၢ်တဖၣ်အံၤအခါ ပတၢ်ဖးလံာ်စီဆှံန့ၣ် အဘျုးကအိၣ်အါန့ၢ်အလီၢ်လီၤ. ပကကွၢ်တၢ်အဒိတခါလီၤ. လံာ်စီဆှံပာ်ဖျါထီၣ်ဝဲ တၢ်ဂ့ၤတၢ်ဝါတဖၣ်လၢ ခရံာ်ဖိတၢ်အိၣ်ဖှိၣ်သးပှၢ်တဖၣ် ကဘၣ်တူၤထီၣ်ထီၣ်ဘးဝဲန့ၣ်လီၤ. (ဖး ၁ တံၤမသ့း ၃:၂–၇ တက့ၢ်.) ပဝဲအါတက့ၢ်န့ၣ် ပတမ့ၢ် တၢ်အိၣ်ဖှိၣ်သးပှၢ်ဘၣ်. လၢတၢ်န့ၣ်အဃိ ပကဆိကမိၣ်ဘၣ်လၢ တၢ်ဂ့ၢ်တၢ်ကျိၤတဖၣ်အံၤ တကဲတၢ်မၤစၢၤလၢပဂီၢ်ဘၣ်. ဘၣ်ဆၣ် ပမ့ၢ်သမံသမိး တၢ်သံကွၢ်သၢဖျၢၣ်လၢထးအံၤန့ၣ် ပကထံၣ်ဘၣ်လၢ တၢ်သ့တၢ်ဘၣ်လၢ ခရံာ်ဖိတၢ်အိၣ်ဖှိၣ်သးပှၢ်တဖၣ် လိၣ်ဘၣ်ဝဲန့ၣ် အဘျုးအိၣ်ဝဲလၢပဂီၢ်သ့ လၢကျဲအါဘိလီၤ.
၉ “ဘၣ်ဃးဒီး ယဟိဝၤယွၤန့ၣ် လံာ်စီဆှံအဆၢအံၤ တဲဘၣ်ယၤ တၢ်မနုၤလဲၣ်.” တၢ်သ့တၢ်ဘၣ် လၢတၢ်အိၣ်ဖှိၣ်သးပှၢ်တဖၣ် ကဘၣ်တုၤထီၣ်ထီၣ်ဘးဝဲန့ၣ် ယဟိဝၤယွၤ ဒုးသ့ၣ်ညါပှၤလီၤ. ဒ်သိးတၢ်အိၣ်ဖှိၣ်သးပှၢ်တဖၣ်ကွၢ်ထွဲဝဲ တၢ်အိၣ်ဖှိၣ်ကသ့ဂ့ၤဂ့ၤအဂီၢ် ယဟိဝၤယွၤပာ်လီၤ တၢ်သိၣ်တၢ်သီလၢ အကဘၣ်လူၤပိာ်ထွဲဝဲန့ၣ်လီၤ. လၢတၢ်န့ၣ်အဃိ ပသ့ၣ်ညါဘၣ်လၢ တၢ်အိၣ်ဖှိၣ်မ့ၢ်ဝဲ တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်လီၤ. လံာ်စီဆှံစံးဝဲလၢ ကစၢ်ယွၤပှ့ၤက့ၤတၢ်အိၣ်ဖှိၣ်လၢ အဖိခွါ “အသွံၣ်” လီၤ. (မၤတၢ် ၂၀:၂၈) လၢတၢ်န့ၣ်အဃိ ယဟိဝၤယွၤ အဲၣ်ဒိးဝဲလၢ တၢ်အိၣ်ဖှိၣ်သးပှၢ်တဖၣ် ကဲထီၣ်ဒိဂ့ၤတဲာ်ဘၣ်ဒီး အဝဲသ့ၣ်ရ့လိာ်အသးဒီး တၢ်အိၣ်ဖှိၣ်ဖိဒ်လဲၣ်ဒ်လဲၣ်န့ၣ် ကဘၣ်ဟ့ၣ် တၢ်စံးဆၢလၢယွၤအအိၣ်လီၤ. ကစၢ်ယွၤအဲၣ်ဒိးလၢ ပအိၣ်ဒီးတၢ်သူၣ်မံသးမုာ်လၢ အဝဲသ့ၣ်အတၢ်ကဟုကယာ်အဖီလာ်လီၤ. (ယၡါယၤ ၃၂:၁, ၂) ဖဲပဖးဘၣ် တၢ်သ့တၢ်ဘၣ်လၢ တၢ်အိၣ်ဖှိၣ်သးပှၢ် ကဘၣ်တုၤထီၣ်ထီၣ်ဘးဝဲတဖၣ်အခါ ပသ့ၣ်ညါလၢ ယဟိဝၤယွၤ အသးအိၣ်ပှၤနီၢ်နီၢ်လီၤ.
၁၀, ၁၁. (က) ဖဲပဖး တၢ်သ့တၢ်ဘၣ်လၢ တၢ်အိၣ်ဖှိၣ်သးပှၢ်တဖၣ် ကဘၣ်တုၤထီၣ်ထီၣ်ဘးအခါ ပမၤထွဲအီၤလၢ ပတၢ်အိၣ်မူပူၤကသ့ဒ်လဲၣ်. (ခ) ပသူတၢ်ဂ့ၢ်တၢ်ကျိၤတဖၣ်အံၤလၢ ပကမၤစၢၤပှၤဂၤအဂီၢ်ကသ့ဒ်လဲၣ်.
၁၀ “ယမၤထွဲ လံာ်စီဆှံအဆၢအံၤလၢ ယတၢ်အိၣ်မူပူၤ ကသ့ဒ်လဲၣ်.” နမ့မ့ၢ်တ့ၢ် တၢ်အိၣ်ဖှိၣ်သးပှၢ်န့ၣ် နကြၢးသမံသမိးလီၤက့ၤ တၢ်သ့တၢ်ဘၣ်လၢ တၢ်အိၣ်ဖှိၣ်သးပှၢ်တဖၣ် ကဘၣ်တုၤထီၣ်ထီၣ်ဘးဝဲ ထီဘိန့ၣ်လီၤ. နမ့ၢ် “ဆၢကဲထီၣ်လၢ ပှၤကွၢ်တၢ်” န့ၣ်နကဘၣ် ဂုၤကျဲးစၢးမၤလၢအဂ့ၤကတၢၢ် ဒ်သိးနကတုၤထီၣ်ထီၣ်ဘး လၢတၢ်သ့တၢ်ဘၣ်တဖၣ်အံၤအဂီၢ်န့ၣ်လီၤ. (၁ တံၤမသ့း ၃:၁) ဘၣ်ဆၣ် ခရံာ်ဖိခဲလၢာ် ဟံးန့ၢ်တၢ်မၤလိလၢ တၢ်ဟ့ၣ်ကူၣ်တဖၣ်အံၤသ့ဝဲလီၤ. အဒိ ယဟိဝၤယွၤ မုၢ်လၢ်ဝဲလၢ ပဝဲတဂၤစုာ်စုာ် ပကဘၣ်အိၣ်ဒီး တၢ်ထံၣ်လၢအကြၢးအဘၣ် ဘၣ်ဃးဒီးကျိၣ်ဧိၤစ့ဧိၤ ဒီးတၢ်စုလီၢ်ခီၣ်ခိၣ် ဒီးပကဘၣ်အဲၣ်ပှၤတမှံၤန့ၣ်လီၤ. (၁ တံၤမသ့း ၆:၉, ၁၀: ရိမ့ၤ ၁၂:၁၃) ဖဲတၢ်အိၣ်ဖှိၣ်သးပှၢ်တဖၣ် ကဲထီၣ် “သိတဖုအဒိအတဲာ်” အခါ ပမၤလိန့ၢ်တၢ်လၢ အဝဲသ့ၣ်အအိၣ်ဒီး “မၤထွဲအတၢ်နာ်အခံ” သ့ဝဲလီၤ.—၁ ပ့းတရူး ၅:၃; ဧ့ၤဘြံၤ ၁၃:၇.
၁၁ “ယကမၤစၢၤပှၤဂၤအဂီၢ် ယသူလံာ်စီဆှံအဆၢအံၤ ကသ့ဒ်လဲၣ်.” တၢ်သ့တၢ်ဘၣ်လၢ တၢ်အိၣ်ဖှိၣ်သးပှၢ်တဖၣ် ကဘၣ်တုၤထီၣ်ထီၣ်ဘးဝဲတဖၣ်အံၤ ပတဲနၢ်ပၢၢ် ပှၤမၤလိလံာ်စီဆှံဖိ ဒီးပှၤလၢအသးအိၣ် တၢ်မ့ၢ်တၢ်တီတဖၣ် ဒ်သိးအဝဲသ့ၣ် ကသ့ၣ်ညါဝဲလၢ တၢ်အိၣ်ဖှိၣ်သးပှၢ်တဖၣ် လီၤဆီဒီး တၢ်ဘူၣ်တၢ်ဘါ ခိၣ်နၢ်အဂၤတဖၣ်အဂီၢ်လီၤ. တကးဒံးဘၣ် ကဒုးသ့ၣ်နီၣ်ထီၣ်ပှၤလၢ တၢ်အိၣ်ဖှိၣ်သးပှၢ်တဖၣ် အတၢ်မၤအိၣ်အါလၢ တၢ်အိၣ်ဖှိၣ်အပူၤန့ၣ်လီၤ. ဒီးကမၤစၢၤစ့ၢ်ကီးပှၤလၢ ပကအိၣ်ဒီး တၢ်ပာ်ကဲ ဒီပုၢ်ဝဲၢ်ခွါသ့ၣ်တဖၣ်အံၤအဂီၢ်လီၤ. (၁ သ့းစၤလနံ ၅:၁၂) ပမ့ၢ်အိၣ်ဒီးတၢ်ပာ်ကဲ တၢ်အိၣ်ဖှိၣ်သးပှၢ်တဖၣ် ဒံးယံာ်ဒံးအါထီၣ်န့ၣ် အဝဲသ့ၣ် ကမၤကစၢ်ယွၤ အတၢ်မၤလၢ တၢ်သးခုအပူၤ ကဒံးယံာ်ဒံးအါထီၣ်စ့ၢ်ကီးလီၤ.—ဧ့ၤဘြံၤ ၁၃:၁၇.
၁၂, ၁၃. (က) လံာ်လဲၢ်လၢ အိၣ်ဒီးပှၤတဖၣ်န့ၣ် ပသူအီၤဒ်သိး ပကဃုသ့ၣ်ညါ တၢ်ဂ့ၢ်မနုၤတဖၣ်သ့လဲၣ်. (ခ) ခီဖျိလၢ ပဃုသ့ၣ်ညါတၢ် လီၤတံၢ်လီၤဆဲးအဃိ ပကသ့ၣ်ညါအါထီၣ်ဘၣ် တၢ်ဂ့ၢ်မနုၤလဲၣ်.
၁၂ ဃုသ့ၣ်ညါအါထီၣ်တက့ၢ်. ဖဲပဖးလံာ်စီဆှံအခါ ပကဘၣ်ဃုကွၢ် တၢ်သံကွၢ်လၢ လာ်တဖၣ်အံၤ အတၢ်စံးဆၢလီၤ.
လံာ်စီဆှံတကတြူၢ်အံၤ မတၤကွဲးအီၤလဲၣ်.
လံာ်စီဆှံတကတြူၢ်အံၤ ဘၣ်တၢ်ကွဲးအီၤလၢတၢ်လီၢ်ဖဲလဲၣ် ဒီးအခါဖဲလဲၣ်.
ဖဲလံာ်စီဆှံတကတြူၢ်အံၤ ဘၣ်တၢ်ကွဲးအီၤအခါ တၢ်မနုၤမၤအသးလဲၣ်.
တၢ်ဂ့ၢ်တၢ်ကျိၤတဖၣ်န့ၣ် ကဲထီၣ်တၢ်မၤစၢၤလၢပဂီၢ် ဒ်သိးပကနၢ်ပၢၢ်ထီၣ် တၢ်မၤလိ လၢအတအိၣ်ဖျါထီၣ် တဘျီဃီဘၣ်န့ၣ်လီၤ.
၁၃ အဒိ ဝံယဃ့းစက့လး ၁၄:၁၃, ၁၄ စံးဝဲလၢ– “ပှၤကညီဖိခွါဧၢ, တုၤကီၢ်တဘ့ၣ်မၤတၢ်ဒဲးဘး ဒီးမၤကမၣ်ဘၣ်ယၤနးမး, ဒီးယယူာ်ထီၣ်ယစုလၢ အဖီခိၣ်, ဒီးမၤကၢ်အကိၣ်အနီၣ်ထိးဘိ, ဒီးမၢလီၤတၢ်သၣ်ဝံၤလီၤဒိဆူအအိၣ်, ဒီးဒီၣ်တဲာ်ကွံာ်ပှၤကညီ ဒီးဆၣ်ဖိကီၢ်ဖိလၢ အပူၤဒီး, စီၤနိအၤ, စီၤဒၤနံးယ့လး, ဒီးစီၤယိၤဘးသၢဂၤန့ၣ် မ့ၢ်အိၣ်လၢအပူၤ ဘၣ်ဆၣ်ဒီး, ကမၤပူၤမၤဖျဲးထဲ အသးဒၣ်ဝဲလၢ အတၢ်တီတၢ်လိၤလီၤ. ကစၢ်ယွၤစံးဝဲဒၣ်.” ပမ့ၢ်ဃုသ့ၣ်ညါ လံာ်စီဆှံအဆၢအံၤန့ၣ် ပသ့ၣ်ညါဘၣ်လၢ ဝံယဃ့းစက့လး ကွဲးဝဲတၢ်ကတိၤအံၤဖဲ ချ.ခ.န ၆၁၂ ဃၣ်ဃၣ်န့ၣ်လီၤ. စီၤနိအၤဒီးစီၤယိၤဘးန့ၣ် သံတ့ၢ်ဖးယံာ်လံ ဘၣ်ဆၣ် ယဟိဝၤယွၤ သ့ၣ်နီၣ်ထီၣ်က့ၤ အဝဲသ့ၣ်အတၢ်သးတီလီၤ. ဖဲန့ၣ်အဆၢကတီၢ် စီၤဒၤနံးယ့လး အိၣ်မူဒံးဝဲလီၤ. ဖဲယဟိဝၤယွၤ တဲဘၣ် စီၤဒၤနံးယ့လးလၢ အမ့ၢ်ပှၤတီပှၤလိၤဒ် စီၤနိအၤ ဒီးစီၤယိၤဘးအခါန့ၣ် အဝဲအသးကအိၣ်အနံၣ် ၂၀ လီၤ. ပမၤလိန့ၢ် တၢ်မနုၤလဲၣ်. ယဟိဝၤယွၤ ပာ်လုၢ်ပာ်ပှ့ၤ အခ့အပှၤလၢ အသးတီတဖၣ် ဃုာ်ဒီးပှၤသးစၢ်တဖၣ်စ့ၢ်ကီးလီၤ.—စံးထီၣ်ပတြၢၤ ၁၄၈:၁၂-၁၄.
ဟံးန့ၢ်တၢ်အဘျုးလၢ လံာ်လဲၢ်တဖၣ်အအိၣ်တက့ၢ်
၁၄. လံာ်လဲၢ်လၢ ပှၤသးစၢ်တဖၣ်အဂီၢ်န့ၣ် မၤစၢၤအဝဲသ့ၣ်ဒ်လဲၣ်, ဒီးအဘျုးအဖှိၣ်အိၣ်စ့ၢ်ကီးလၢ ပှၤဂၤအဂီၢ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၄ လံာ်လဲၢ်လၢ ပှၤသးစၢ်တဖၣ်အဂီၢ်. ပသ့ၣ်ညါဘၣ်လၢ လံာ်စီဆှံဒီတဘ့ၣ်န့ၣ် ကဲဘျုးကဲဖှိၣ်လၢပဂီၢ်လီၤ. ဒ်န့ၣ်အသိး ပလံာ်လဲၢ်ခဲလၢာ်န့ၣ် ကဲဘျုးကဲဖှိၣ်လၢပဂီၢ်စ့ၢ်ကီးလီၤ. ဆိကမိၣ်ကွၢ် တၢ်အဒိတနီၤတက့ၢ်. ပူၤကွံာ်တယံာ်ဒံးဘၣ်န့ၣ် ယဟိဝၤယွၤ ကတဲာ်ကတီၤန့ၢ်ပှၤ လံာ်လဲၢ်အါမးလၢ ပှၤသးစၢ်တဖၣ်အဂီၢ်လီၤ.[၁] (ကွၢ်တၢ်ဂ့ၢ်လၢ တၢ်မၤလိအကတၢၢ်တက့ၢ်.) လံာ်လဲၢ်တဖၣ်အံၤ မၤစၢၤပှၤသးစၢ်တဖၣ်ဒ်သိး ကတြီဆၢ တၢ်ဆီၣ်သနံးလၢကၠိ ဒီးတၢ်ကီတၢ်ခဲလၢ အဝဲသ့ၣ်ကွၢ်ဆၢၣ်မဲာ်ဘၣ်ဝဲတဖၣ်အဂီၢ်လီၤ. ဘၣ်ဆၣ် ပဝဲခဲလၢာ် ပကဒိးန့ၢ်ဘၣ် တၢ်အဘျုးလၢ တၢ်ဖးလံာ်လဲၢ်တဖၣ်အံၤဒ်လဲၣ်. ဖဲပဖးတၢ်ဂ့ၢ်တၢ်ကျိၤတဖၣ်အံၤအခါ ပသ့ၣ်ညါဘၣ်လၢ ပှၤသးစၢ်တဖၣ် ကွၢ်ဆၢၣ်မဲာ်ဘၣ် တၢ်ကီတၢ်ခဲအဃိ ပမၤစၢၤအဝဲသ့ၣ် ဒီးဟ့ၣ်ဂံၢ်ဟ့ၣ်ဘါအီၤသ့လီၤ.
၁၅. ဘၣ်မနုၤအဃိ ခရံာ်ဖိလၢ အသးပှၢ်တဖၣ် ကြၢးသးအိၣ်ဖး လံာ်လဲၢ်လၢ ပှၤသးစၢ်တဖၣ်အဂီၢ်လဲၣ်.
၁၅ ခရံာ်ဖိလၢ အသးပှၢ်တဖၣ် တဘၣ်ဆိကမိၣ်ဝဲလၢ တၢ်ဂ့ၢ်တၢ်ကျိၤလၢ ပှၤသးစၢ်အဂီၢ်န့ၣ် တဘၣ်ဃးဒီးအဝဲသ့ၣ်ဘၣ်. တၢ်ကီတၢ်ခဲ အါတက့ၢ်လၢ ဘၣ်တၢ်ပာ်ဖျါထီၣ်လၢ လံာ်လဲၢ်တဖၣ်အံၤအပူၤန့ၣ် မၤဘၣ်ဒိပဝဲခရံာ်ဖိခဲလၢာ်သ့လီၤ. အဒိ, ပဝဲခဲလၢာ် အလီၢ်အိၣ်လၢ ပကဘၣ်ဒီသဒၢ ပတၢ်နာ်, ပၢၤဃာ်ပသးအတၢ်တူၢ်ဘၣ်, တြီဆၢ တံၤသကိး အတၢ်ဆီၣ်သနံး ဒီးဟးဆှဲး တၢ်မၤမုာ်မၤဖှံသးလၢ အတဂ့ၤတဖၣ်န့ၣ်လီၤ. လၢတၢ်န့ၣ်အဃိ လံာ်လဲၢ်တဖၣ်အံၤ ဘၣ်တၢ်ထုးထီၣ်အီၤလၢ ပှၤသးစၢ်အဂီၢ် သနာ်က့ ခရံာ်ဖိခဲလၢာ် ဒိးန့ၢ်ဘၣ်အဘျုးအဖှိၣ်သ့ဝဲ မ့ၢ်လၢလံာ်လဲၢ်တဖၣ်အံၤ ဒိးသန့ၤထီၣ်အသးလၢ လံာ်စီဆှံအဃိန့ၣ်လီၤ.
၁၆. ပလံာ်လဲၢ်တဖၣ်အံၤ မၤစၢၤဒံးပှၤသးစၢ်တဖၣ်လၢကျဲဒ်လဲၣ်.
၁၆ လံာ်လဲၢ်လၢ ဘၣ်တၢ်ထုးထီၣ်အီၤလၢ ပှၤသးစၢ်တဖၣ်အဂီၢ်န့ၣ် မၤစၢၤအဝဲသ့ၣ် လၢအတၢ်ရ့လိာ်သးဒီး ယဟိဝၤယွၤကဂ့ၤထီၣ်အဂီၢ်န့ၣ်လီၤ. (ဖး စံၣ်တဲၤတဲလီၤတၢ် ၁၂:၁, ၁၃ တက့ၢ်.) ပှၤသးပှၢ်တဖၣ်စ့ၢ်ကီး ဒိးန့ၢ်ဘၣ်အဘျုးသ့လီၤ. အဒိ လါအ့ဖြ့ၣ် ၂၀၀၉ ပၢၢ်ထီၣ် (Awake) မဲးကစံန့ၣ် ပၣ်ဃုာ်ဒီးတၢ်ဂ့ၢ်လၢအမ့ၢ် “Young People Ask . . . How Can I Make Bible Reading Enjoyable?” န့ၣ်လီၤ. တၢ်မၤလိတခါအံၤန့ၣ် အိၣ်ဒီးတၢ်ဟ့ၣ်ကူၣ်လၢ အကဲဘျုးအါမး ဒီးပၣ်ဃုာ်ဒီး တၢ်လွံၢ်နၢၣ်လၢ နတံာ်ဒီးဟံးန့ၢ်အီၤသ့ ဒီးနသူအီၤလၢ တၢ်မၤလိလံာ်စီဆှံအဂီၢ်သ့လီၤ. ပှၤသးပှၢ်တဖၣ်စ့ၢ်ကီး ဒိးန့ၢ်ဘၣ်အဘျုးလၢ တၢ်မၤလိတခါအံၤသ့ဧါ. မိၢ်တဂၤ စံးဝဲလၢ တၢ်ဖးလံာ်စီဆှံန့ၣ် ကီလၢအဝဲအဂီၢ်လီၤ. ဘၣ်ဆၣ် အဝဲမၤထွဲဝဲ တၢ်ဟ့ၣ်ကူၣ်လၢ တၢ်မၤလိအံၤအပူၤအဃိ အဝဲစံးဝဲလၢ အခဲအံၤ အသးအိၣ်ဖးလံာ်စီဆှံ ဒီးသ့ၣ်ညါဘၣ်ဝဲ လံာ်စီဆှံ တကတြူၢ်ဒီး တကတြူၢ် ဘၣ်ထွဲလိာ်အသးဒ်လဲၣ်န့ၣ်လီၤ. စံးကဒီးဝဲလၢ– “ခဲအံၤယသးအိၣ် ဖးလံာ်စီဆှံမုာ်မး, ယတသးခု ဒ်အံၤနီတဘျီဘၣ်.”
၁၇, ၁၈. လံာ်လဲၢ်လၢ ဘၣ်တၢ်ထုးထီၣ်အီၤလၢ ကမျၢၢ်အဂီၢ်န့ၣ် ပဒိးန့ၢ်ဘၣ်အဘျုးအဖှိၣ်သ့ဒ်လဲၣ်. ဟ့ၣ်တၢ်အဒိတက့ၢ်.
၁၇ လံာ်လဲၢ်လၢ ကမျၢၢ်အဂီၢ်. စးထီၣ်လၢ ၂၀၀၈ န့ၣ်ပဒိးန့ၢ်ဘၣ် တၢးထီခိးတၢ် လံာ်တၢ်မၤလိလီၤ. လံာ်အံၤ ဘၣ်တၢ်ထုးထီၣ်အီၤလၢ ယဟိဝၤပှၤအုၣ်အသးတဖၣ်အဂီၢ်လီၤ. ဘၣ်ဆၣ် ပအိၣ်ဒီး မဲးကစံလၢ ကမျၢၢ်အဂီၢ်စ့ၢ်ကီးန့ၣ်လီၤ. ပဒိးန့ၢ်ဘၣ် တၢ်အဘျုးလၢ မဲးကစံ လၢကမျၢၢ်အဂီၢ်အံၤ ကသ့ဒ်လဲၣ်. ပကကွၢ် တၢ်အဒိတခါလီၤ. ဖဲနကွဲမုာ်ပှၤတဂၤ လၢကဟဲထီၣ်တၢ်အိၣ်ဖှိၣ် ဒီးအဟဲဝဲအခါ နကသးခုလီၤ. ဖဲပှၤဟ့ၣ်တၢ်စံၣ်တဲၤတဲလီၤတၢ် လၢကမျၢၢ်အဂီၢ်အခါ နကဆိကမိၣ်တၢ်လၢ နပှၤတမှံၤအဂီၢ်လီၤ. နကဆိကမိၣ်ဘၣ်လၢ တၢ်ဂ့ၢ်လၢအနၢ်ဟူဘၣ်ဝဲန့ၣ် အဝဲကတူၢ်ဘၣ်ဝဲဒ်လဲၣ် ဒီးတၢ်ဂ့ၢ်တဖၣ်အံၤ ကကဲဘျုးလၢ အတၢ်အိၣ်မူဒ်လဲၣ်န့ၣ်လီၤ. လၢတၢ်န့ၣ်အဃိ တၢ်ဂ့ၢ်တဖၣ်အံၤ ကထုးန့ၢ်နသးဒီး နတၢ်စံးဘျုးကအါထီၣ်ဝဲလီၤ.
၁၈ ဖဲပဖးလံာ်လဲၢ်လၢ ဘၣ်တၢ်ထုးထီၣ်လၢ ကမျၢၢ်အဂီၢ်အခါန့ၣ် တၢ်မၤအသးဒီးပှၤ ဒ်န့ၣ်အသိးသ့ဝဲစ့ၢ်ကီးလီၤ. အဒိ တၢးထီခိးတၢ် လၢကမျၢ်အဂီၢ် ဒီးတၢ်ဂ့ၢ်တၢ်ကျိၤလၢ jw.org အပူၤန့ၣ် သူဝဲတၢ်ကတိၤယိယိဖိ ဒ်သိးပှၤနၢ်ပၢၢ် လံာ်စီဆှံကညီအဂီၢ်န့ၣ်လီၤ. ဖဲပဖးတၢ်ဂ့ၢ်တၢ်ကျိၤတဖၣ်န့ၣ်အခါ ပကနၢ်ပၢၢ်အါထီၣ် လံာ်စီဆှံ တၢ်မ့ၢ်တၢ်တီလီၤ. ပကသ့ၣ်ညါဘၣ် ကျဲအသီလၢ ပကတဲနၢ်ပၢၢ်ပှၤ ပတၢ်နာ်လၢ တၢ်သးခုကစီၣ်တၢ်မၤအပူၤန့ၣ်လီၤ. ပၢၢ်ထီၣ် (Awake) စ့ၢ်ကီး မၤဂၢၢ်ကျၢၤထီၣ် ပတၢ်နာ်လၢ တၢ်ဘၣ်တ့ကစၢ်အိၣ်ဝဲအဂ့ၢ်န့ၣ်လီၤ. တကးဒံးဘၣ် မၤစၢၤစ့ၢ်ကီးပှၤလၢ ပကသ့ၣ်ညါလၢ ပကဘၣ်ဒီသဒၢ ပတၢ်နာ်ဒ်လဲၣ်န့ၣ်လီၤ.—ဖး ၁ ပ့းတရူး ၃:၁၅ တက့ၢ်.
၁၉. ပပာ်ဖျါထီၣ် တၢ်စံးဘျုးစံးဖှိၣ်လၢ ယဟိဝၤယွၤ အတၢ်လုၢ်အီၣ်လုၢ်အီပှၤလၢ နီၢ်သးတခီကသ့ဒ်လဲၣ်.
၁၉ ပထံၣ်ဘၣ်လၢ ယဟိဝၤယွၤ ကတဲာ်ကတီၤန့ၢ်ပှၤ တၢ်ဟ့ၣ်ကူၣ် ဒီးတၢ်ဟံးစုနဲၣ်ကျဲ လၢလၢပှဲၤပှဲၤ လၢကကဲဘျုးလၢပဂီၢ်န့ၣ်လီၤ. (မးသဲ ၅:၃) ကယဲၢ်တၢ်ဂ့ၢ်တၢ်ကျိၤလၢ ယဟိဝၤယွၤ ဟ့ၣ်လီၤပှၤန့ၣ် မ်ပဖးအီၤဒီးမၤထွဲအီၤတက့ၢ်. ပမ့ၢ်မၤပိာ်ထွဲ တၢ်ဟ့ၣ်ကူၣ်တဖၣ်န့ၣ် ပကဒိးန့ၢ်ဘၣ် တၢ်အဘျုး ဒီးတၢ်အံၤကပာ်ဖျါထီၣ်ဝဲလၢ ပပာ်လုၢ်ပာ်ပှ့ၤ ယဟိဝၤယွၤ အတၢ်လုၢ်အီၣ်လုၢ်အီပှၤလၢ နီၢ်သးတခီန့ၣ်လီၤ.—ယၡါယၤ ၄၈:၁၇.
^ [၁] (လံာ်အဆၢ ၁၄) လံာ်လဲၢ်တဖၣ်လၢ ပှၤသးစၢ်အဂီၢ်န့ၣ် ပၣ်ဃုာ်ဒီး Questions Young People Ask—Answers That Work Volumes 1 and 2 ဒီး “Young People Ask” လၢအိၣ်လၢ online အဖီခိၣ်န့ၣ်လီၤ.