ဘၣ်မနုၤအဃိ ပဘၣ်ဟ့ၣ်လုၢ်ထီၣ်ပသး ဒီးဒိးဘျၢထံလဲၣ်

ဖဲနဃ့ထုကဖၣ်လၢ ယဟိဝၤယွၤအအိၣ် ဒီးအၢၣ်လီၤအီၤလၢ နကဘူၣ်ထီၣ်ဘါထီၣ် ထဲအီၤတဂၤ ဒီးအၢၣ်လီၤအီၤလၢ နကပာ်ဆိ အတၢ်ဘၣ်သး လၢနတၢ်အိၣ်မူအပူၤအခါ မ့ၢ်ဒၣ် နဟ့ၣ်လုၢ်ထီၣ်နသး လၢအအိၣ်. (စံးထီၣ်ပတြၢၤ ၄၀:၈) နဟ့ၣ်လုၢ်ထီၣ်နသးဝံၤဒီး လၢခံနဒိးဘျၢထံ. ဒီးခီဖျိလၢ နဒိးဘျၢထံအဃိ နပာ်ဖျါထီၣ်န့ၢ်ပှၤဂၤလၢ နဟ့ၣ်လုၢ်ထီၣ်နသးဝံၤလံ. ဖဲနဆၢတဲာ်လီၤနသးလၢ နကဟ့ၣ်လုၢ်ထီၣ်နသး လၢယဟိဝၤယွၤ အအိၣ်အခါ မ့ၢ်ဒၣ် နဆၢတဲာ်တၢ်လၢ အရ့ဒိၣ်ကတၢၢ်တခါ လၢနတၢ်အိၣ်မူအပူၤလီၤ. နတၢ်ဆၢတဲာ် တခါအံၤ အရ့ဒိၣ်ဒိၣ်မး ဒီးအကဆီတလဲ နတၢ်အိၣ်မူ. အဃိ ဒ်သိး နကဆၢတဲာ်တၢ်ဒ်အံၤအဂီၢ် တၢ်မနုၤ ကထိၣ်ဟူးထိၣ်ဂဲၤထီၣ်နၤလဲၣ်.

၁. ဒ်သိးပှၤတဂၤ ကဟ့ၣ်လုၢ်ထီၣ်အသးအဂီၢ် တၢ်မနုၤ ကထိၣ်ဟူးထိၣ်ဂဲၤထီၣ်အီၤလဲၣ်.

ခီဖျိလၢ ပအဲၣ်ယဟိဝၤယွၤအဃိ ပဟ့ၣ်လုၢ်ထီၣ်ပသး လၢအအိၣ်. (၁ ယိၤဟၣ် ၄:​၁၀, ၁၉) လံာ်စီဆှံ တဲဘၣ်ပှၤလၢ “နကဘၣ်အဲၣ် နကစၢ် ယဟိဝၤယွၤ လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ, လၢနတၢ်ကူၣ်တၢ်ဆး ခဲလၢာ် ဒီးလၢနဂံၢ်နဘါ ခဲလၢာ်လီၤ.” (မၢ်ကူး ၁၂:၃၀) ပအဲၣ်ကစၢ်ယွၤန့ၣ် ပပာ်ဖျါထီၣ်လၢ ပတၢ်ကတိၤ ဒီးပတၢ်မၤ. အဒိ ပှၤဒီတၢ်အဲၣ်တီခံဂၤ အဲၣ်လိာ်သး ဒိၣ်မးအဃိ အဝဲသ့ၣ်ဖျီသး. ဒ်န့ၣ်အသိး ခီဖျိလၢ ပအဲၣ်ယဟိဝၤယွၤ ဒိၣ်မးအဃိ ပဟ့ၣ်လုၢ်ထီၣ်ပသး လၢအအိၣ် ဒီးပဒိးဘျၢထံ.

၂. ပှၤအုၣ်အသး လၢအဒိးဘျၢထံဝံၤတဖၣ်န့ၣ် ယဟိဝၤယွၤ အၢၣ်လီၤဝဲလၢ အကဟ့ၣ်အဝဲသ့ၣ် တၢ်မနုၤလဲၣ်.

ဖဲနဒိးဘျၢထံအခါ နကကဲထီၣ်ဘၣ် ယဟိဝၤယွၤ အဒူၣ်ဖိထၢဖိတဂၤ. နကထံၣ်ဘၣ် ယဟိဝၤယွၤ အတၢ်အဲၣ်လၢကျဲအါဘိ ဒီးနတၢ်ရ့လိာ်သးဒီးအီၤ ကဂၢၢ်ကျၢၤ ဒိၣ်န့ၢ်ဒံးခဲအံၤ. (ဖး မၤလကံ ၃:​၁၆-၁၈.) ယဟိဝၤယွၤ ကကဲထီၣ်နပါ ဒီးဒီပုၢ်ဝဲၢ်မုၣ်ခွါ လၢဟီၣ်ခိၣ်ဒီဘ့ၣ်ညါ လၢအအဲၣ်နၤ ဒီးအအဲၣ်ယဟိဝၤယွၤန့ၣ် ကကဲထီၣ်ဝဲ နဟံၣ်ဖိဃီဖိလၢနီၢ်သးတခီ. (ဖး မၢ်ကူး ၁၀:​၂၉, ၃၀.) ဘၣ်ဆၣ် တချုးလၢ နဒိးဘျၢထံဒံးဘၣ်န့ၣ် တၢ်လၢနကဘၣ်မၤအီၤ အိၣ်ဝဲလီၤ. နကဘၣ်မၤလိ ဘၣ်ဃးဒီး ယဟိဝၤယွၤအဂ့ၢ်, အဲၣ်အီၤ ဒီးနာ်အဖိခွါ. ဒီးလၢခံကတၢၢ်န့ၣ် နကဘၣ် ဟ့ၣ်လုၢ်ထီၣ်နသး လၢယဟိဝၤယွၤအအိၣ်. နမ့ၢ်မၤတၢ်သ့ၣ်တဖၣ်အံၤ ဒီးဒိးဘျၢထံန့ၣ် နကဒိးန့ၢ်ဘၣ် တၢ်ခွဲးတၢ်ယာ်လၢ နကအိၣ်မူဘၣ် လီၤထူလီၤယိာ်. အဃိ လံာ်စီဆှံ တဲဝဲလၢ ‘တၢ်ဒိးဘျၢထံ . . . မၤပူၤဖျဲးနၤလၢ ဆၢကတီၢ်ခဲအံၤ.’​—၁ ပ့းတရူး ၃:၂၁.

ဃုသ့ၣ်ညါအါထီၣ်

၃. ပကဘူၣ်ထီၣ်ဘါထီၣ် မတဂၤလဲၣ်န့ၣ် ပကဘၣ်ဃုထၢ

လၢညါ ပှၤအံၣ်စရ့လးဖိတနီၤ ဆိကမိၣ်ဝဲလၢ အဝဲသ့ၣ် မ့ၢ်ဘူၣ်ထီၣ်ဘါထီၣ် ယဟိဝၤယွၤ ဒီးတကတီၢ်ဃီန့ၣ် အဝဲသ့ၣ် မ့ၢ်ဘူၣ်ထီၣ်ဘါထီၣ် ယွၤလၢအကမၣ် ဘဧၤလး သနာ်က့ အတဘၣ်နီတမံၤဘၣ်. ဘၣ်ဆၣ် အဝဲသ့ၣ် အတၢ်ဆိကမိၣ်အံၤ ကမၣ်အဃိ ယဟိဝၤယွၤ ဆှၢလီၤဝဲ ဝံအ့ၤလံယၤလၢ အကဘှီဘၣ်ထီၣ်က့ၤ အဝဲသ့ၣ် အတၢ်ဆိကမိၣ်. ဖး ၁ စီၤပၤ ၁၈:၂၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပှၤအံၣ်စရ့လးဖိတဖၣ် အတၢ်ဃုထၢ အိၣ်ဒ်လဲၣ်.

ဒ်ပှၤအံၣ်စရ့လးဖိတဖၣ်အသိး ပဝဲစ့ၢ်ကီး ပကဘူၣ်ထီၣ်ဘါထီၣ် မတဂၤလဲၣ်န့ၣ် ပကဘၣ်ဃုထၢ. ဖး လူၤကၣ် ၁၆:၁၃ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ပမ့ၢ်ဘူၣ်ထီၣ်ဘါထီၣ် ယဟိဝၤယွၤန့ၣ် ဘၣ်မနုၤအဃိ ပဘူၣ်ထီၣ်ဘါထီၣ် ပှၤအဂၤတဂၤ မ့တမ့ၢ် တၢ်အဂၤတမံၤမံၤ တသ့ဘၣ်လဲၣ်.

• ပဃုထၢလၢ ပကဘူၣ်ထီၣ်ဘါထီၣ် ယဟိဝၤယွၤန့ၣ် ပပာ်ဖျါထီၣ်န့ၢ်အီၤ ကသ့ဒ်လဲၣ်.

၄. ဆိကမိၣ်ထံ ယဟိဝၤယွၤ အတၢ်အဲၣ်လၢနဖီခိၣ်

ယဟိဝၤယွၤ ဟ့ၣ်တ့ၢ်ပှၤ တၢ်ဟ့ၣ်လၢ အလုၢ်ဒိၣ်ပှ့ၤဒိၣ်အါမး. အဃိ ပဟ့ၣ်ဆၢက့ၤအီၤ တၢ်မနုၤသ့လဲၣ်. ကွၢ်တၢ်ဂီၤမူ.

တၢ်ဂီၤမူ– ဟ့ၣ်လီၤနတၢ်ဟ့ၣ်တဖၣ် လၢယွၤအအိၣ် (၃:၀၄)

ယဟိဝၤယွၤ ပာ်ဖျါထီၣ် အတၢ်အဲၣ်လၢ နဖီခိၣ်ဒ်လဲၣ်. ဖး စံးထီၣ်ပတြၢၤ ၁၀၄:​၁၄, ၁၅ ဒီး ၁ ယိၤဟၣ် ၄:​၉, ၁၀ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ယဟိဝၤယွၤ အတၢ်ဟ့ၣ်လၢ နပာ်လုၢ်ပာ်ပှ့ၤအီၤ အဒိၣ်ကတၢၢ်န့ၣ် မ့ၢ်မနုၤတဖၣ်လဲၣ်.

• ယဟိဝၤယွၤ ဟ့ၣ်နၤတၢ်ဟ့ၣ်တဖၣ်အံၤအဃိ နထံၣ်အီၤလၢ အကဲပှၤဒ်လဲၣ်တဂၤလဲၣ်.

ပှၤတဂၤ မ့ၢ်ဟ့ၣ်ပှၤတၢ်ဟ့ၣ်တခါ လၢပဘၣ်သူၣ်ဘၣ်သးအီၤဒိၣ်မးန့ၣ် ပအဲၣ်ဒိးပာ်ဖျါထီၣ် တၢ်စံးဘျုးစံးဖှိၣ် လၢအဖီခိၣ်. ဖး ၅ မိၤၡ့ ၁၆:၁၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• နမ့ၢ်ဆိကမိၣ်ထံ ဘၣ်ဃးဒီး တၢ်ခဲလၢာ်လၢ ယဟိဝၤယွၤ မၤန့ၢ်နၤန့ၣ် နအဲၣ်ဒိး ဟ့ၣ်ဆၢက့ၤအီၤ တၢ်မနုၤလဲၣ်.

၅. နမ့ၢ်ဟ့ၣ်လုၢ်ထီၣ်နသးလၢ ယဟိဝၤယွၤအအိၣ်န့ၣ် နကဒိးန့ၢ်ဘၣ် တၢ်ဆိၣ်ဂ့ၤအါမး

တၢ်ဂီၤမူ– တၢ်လိာ်ကွဲဖျၢၣ်ထူန့ၣ် မ့ၢ်တၢ်အရ့ဒိၣ်ကတၢၢ်လၢယဂီၢ် (၅:၄၅)

• လၢတၢ်ဂီၤမူအပူၤ ပိာ်ခွါလၢ အလိာ်ကွဲပြၢဖျၢၣ်ထူမုာ်တဂၤ ဘၣ်မနုၤအဃိ အတမၤဝဲလၢၤဘၣ်လဲၣ်.

• လၢခံပိာ်ခွါတဂၤအံၤ ဆၢတဲာ်လီၤအသးလၢ အကဟ့ၣ်လုၢ်ထီၣ်အသး လၢယဟိဝၤယွၤအအိၣ် ဒီးအတလိာ်ကွဲပြၢ ဖျၢၣ်ထူလၢၤဘၣ်. နဆိကမိၣ် အတၢ်ဆၢတဲာ်အံၤ အဘၣ်ဧါ. ဘၣ်မနုၤအဃိ နဆိကမိၣ် ဒ်န့ၣ်လဲၣ်.

တချုးလၢ စီၤပီလူးကဲထီၣ် ခရံာ်ဖိတဂၤဒံးဘၣ်န့ၣ် အဝဲဂုာ်ကျဲးစၢး မၤန့ၢ်တၢ်မၤလၢ အပတီၢ်ထီ. အမၤလိဘၣ် ပှၤယူဒၤဖိ အတၢ်သိၣ်တၢ်သီလၢ သရၣ်လၢအမံၤဒိၣ်တဂၤအအိၣ်. ဘၣ်ဆၣ် ဒ်သိးအကကဲထီၣ် ခရံာ်ဖိတဂၤအဂီၢ် အဝဲပာ်တ့ၢ်ကွံာ် တၢ်သ့ၣ်တဖၣ်န့ၣ်ခဲလၢာ်. လၢခံန့ၣ် စီၤပီလူး လီကီထွဲက့ၤ တၢ်သ့ၣ်တဖၣ်န့ၣ်ဧါ. ဖး ဖံလံးပံၤ ၃:၈ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• တၢ်လၢ စီၤပီလူးမၤတ့ၢ်ဝဲ ဖဲအတချုးကဲထီၣ် ခရံာ်ဖိတဂၤဒံးဘၣ်အခါန့ၣ် လၢခံ ဘၣ်မနုၤအဃိ အတဲဝဲလၢ အကဲ “ဒ်တၢ်ကမှံၤအသိး” လဲၣ်.

• စီၤပီလူး ဒိးန့ၢ်ဘၣ်က့ၤ တၢ်မနုၤလဲၣ်.

• နမၤ ယဟိဝၤယွၤအတၢ်မၤ မ့တမ့ၢ် နမၤတၢ်လၢအဂၤ တမံၤမံၤန့ၣ် နဆိကမိၣ် အကကဲဘျုးဒိၣ်လၢနဂီၢ် ဖဲလဲၣ်တခါလဲၣ်. ဘၣ်မနုၤအဃိ နဆိကမိၣ်ဒ်န့ၣ်လဲၣ်.

တၢ်ဂ့ၢ်လၢအရ့ဒိၣ်

ပအဲၣ်ယဟိဝၤယွၤအဃိ ပဟ့ၣ်လုၢ်ထီၣ်ပသး လၢယဟိဝၤယွၤအအိၣ် ဒီးဒိဘျၢထံ.

တၢ်ကွၢ်ကဒါက့ၤ

• ဘၣ်မနုၤအဃိ ပကြၢးဘူၣ်ထီၣ်ဘါထီၣ် ယဟိဝၤယွၤ ဒီးအဲၣ်အီၤလၢ ပသးဒီဖျၢၣ်လဲၣ်.

• ပှၤအုၣ်အသးလၢ အဒိးဘျၢထံဝံၤတဖၣ်န့ၣ် ယဟိဝၤယွၤ ဆိၣ်ဂ့ၤအဝဲသ့ၣ် ဒ်လဲၣ်.

• နအဲၣ်ဒိး ဟ့ၣ်လုၢ်ထီၣ်နသးလၢ ယဟိဝၤယွၤ အအိၣ်ဧါ.

ဃုသ့ၣ်ညါ

ကွၢ်တၢ်ဂီၤမူ လၢအပာ်ဖျါထီၣ်ဝဲ ဘၣ်မနုၤအဃိ ပှၤသးဝံၣ်တၢ်ဖိတဂၤ ဒီးပှၤလိာ်ကွဲပြၢတၢ်ဖိတဂၤ ဆၢတဲာ်လီၤအသးလၢ အကဟ့ၣ်လုၢ်ထီၣ်အသးလၢ ယဟိဝၤယွၤအအိၣ်လဲၣ်.

ပှၤသးစၢ်တဖၣ် အတၢ်သံကွၢ်​—လၢယတၢ်အိၣ်မူအပူၤ ယကမၤတၢ်မနုၤလဲၣ်​—ကွၢ်က့ၤတၢ်အိၣ်မူလၢအပူၤကွံာ် (၆:၅၄)

ဖးကွၢ် တၢ်ဂ့ၢ်အဂၤတခါ လၢအပာ်ဖျါထီၣ်ဝဲ ဘၣ်မနုၤအဃိ ပကြၢးဟ့ၣ်လုၢ်ထီၣ်ပသးလၢ ယဟိဝၤယွၤအအိၣ်လဲၣ်.

“ဘၣ်မနုၤအဃိ နကြၢးဟ့ၣ်လုၢ်ထီၣ်နသးလၢ ယဟိဝၤယွၤအအိၣ်လဲၣ်” (တၢးထီခိးတၢ်, လါယနူၤအါရံၤ ၁၅, ၂၀၁၀)

ဖဲနကွၢ် တၢ်သးဝံၣ်တဖျၢၣ်အံၤ အတၢ်ဂီၤမူအခါ နကထံၣ်ဘၣ်လၢ ပှၤလၢအဟ့ၣ်လုၢ်ထီၣ်အသးလၢ ယဟိဝၤယွၤအအိၣ်တဖၣ်န့ၣ် အဝဲသ့ၣ် သးခုဝဲဒိၣ်မး.

ဟ့ၣ်လီၤသးလၢနစုပူၤ (၄:၃၀)

ဖးကွၢ် တၢ်အိၣ်မူအတၢ်လဲၤခီဖျိ လၢအခိၣ်တီမ့ၢ်ဝဲ “လၢအနံၣ်အါမးန့ၣ် ယဆိကမိၣ်လၢ ‘ဘၣ်မနုၤအဃိ ပအိၣ်မူဘၣ်လၢ ဟီၣ်ခိၣ်ချၢလဲၣ်.’” ဖဲန့ၣ် အပာ်ဖျါထီၣ်ဝဲ ပိာ်မုၣ်တဂၤ ဆိကမိၣ်ထီၣ်က့ၤ တၢ်လၢအရ့ဒိၣ်ကတၢၢ်လၢအဂီၢ် မ့ၢ်မနုၤလဲၣ်.

“လံာ်စီဆှံဆီတလဲ ပတၢ်အိၣ်မူ” (တၢးထီခိးတၢ်, လါနိၣ်ဝ့ဘၢၣ် ၁, ၂၀၁၂)