တၢ်မၤလိ ၃
နီၢ်အံၣ်အုဒီးစီၤအၤဒၣ် တဒိကနၣ် ကစၢ်ယွၤအကလုၢ်ဘၣ်
ဘၣ်တနံၤ ဖဲနီၢ်အံၣ်အု အိၣ်ထဲတဂၤအခါ ဂုၢ်တဘိဟဲတဲတၢ်ဒီးအီၤ. ဒီးဂုၢ်သံကွၢ်အီၤလၢ ‘ကစၢ်ယွၤတဟ့ၣ်နၤအခွဲးလၢ နကအီၣ်သ့ၣ်ကိးထူၣ်ဒဲးအသၣ်န့ၣ် အနီၢ်ကီၢ်ဧါ.’ နီၢ်အံၣ်အုစံးဆၢက့ၤအီၤလၢ ‘ကယဲၢ်သ့ၣ်အသၣ်န့ၣ် ပအီၣ်အီၤသ့ခဲလၢာ်, ဘၣ်ဆၣ် သ့ၣ်အိၣ်ဝဲတထူၣ်န့ၣ် ပအီၣ်အသၣ်တန့ၢ်ဘၣ်. ပမ့ၢ်အီၣ်န့ၣ် ပကသံလီၤ.’ ဂုၢ်တဲဆၢက့ၤအီၤလၢ ‘သုမ့ၢ်အီၣ်န့ၣ် သုတသံဘၣ်. သုမ့ၢ်အီၣ် သ့ၣ်တထူၣ်အံၤအသၣ်န့ၣ် သုကလီၤဂာ်ယွၤလီၤ.’ ဂုၢ်အတၢ်ကတိၤအံၤဘၣ်ဝဲဧါ. တဘၣ်ဘၣ်, အဝဲလံၣ်တၢ်. ဘၣ်ဆၣ် နီၢ်အံၣ်အုနာ်ဝဲ ဂုၢ်အတၢ်ကတိၤ. နီၢ်အံၣ်အု ကွၢ်ဝဲသ့ၣ်သၣ်အံၤ ဒံးယံာ်ဒံးအါထီၣ်ဝဲအဃိ အဝဲအဲၣ်ဒိးအီၣ်ဝဲသပှၢ်ကတၢၢ်. လၢခံန့ၣ် အဝဲဟံးန့ၢ်အီၣ်ဝဲသ့ၣ်သၣ် ဒီးဒုးအီၣ်ဝဲအဝၤစ့ၢ်ကီး. စီၤအၤဒၣ်သ့ၣ်ညါဝဲလၢ အဝဲသ့ၣ် မ့ၢ်တဒိကနၣ် ကစၢ်ယွၤအကလုၢ်န့ၣ် ကဘၣ်သံဝဲ. ဘၣ်ဆၣ် စီၤအၤဒၣ်အီၣ်ဝဲသ့ၣ်သၣ်.
လၢဟါလီၤခီန့ၣ် ယဟိဝၤယွၤတဲတၢ်ဒီး နီၢ်အံၣ်အုဒီးစီၤအၤဒၣ်. ကစၢ်ယွၤ သံကွၢ်အဝဲသ့ၣ်လၢ ဘၣ်မနုၤအဃိ သုတဒိကနၣ်ယကလုၢ်လဲၣ်. ဝံၤဒီးနီၢ်အံၣ်အု ပာ်တၢ်ကမၣ်လၢ ဂုၢ်အလိၤ, မ့မ့ၢ်စီၤအၤဒၣ်တခီ ပာ်တၢ်ကမၣ်လၢနီၢ်အံၣ်အုအလိၤ. ခီဖျိလၢ နီၢ်အံၣ်အုဒီးစီၤအၤဒၣ် တဒိကနၣ် ယဟိဝၤယွၤ အကလုၢ်အဃိ ကစၢ်ယွၤနီဟးထီၣ်ကွံာ် အဝဲသ့ၣ်လၢ တၤသၣ်အလီၢ်ပူၤ. ကစၢ်ယွၤပာ်လီၤဝဲ မူခိၣ်ကလူး ဒီးနးမ့ၣ်အူလၢ တၤသၣ်အလီၢ် မုၢ်ထီၣ်တခီ. အဃိ နီၢ်အံၣ်အုဒီးစီၤအၤဒၣ် က့ၤနုာ်လီၤကဒါက့ၤ တန့ၢ်လၢၤဘၣ်.
ယဟိဝၤယွၤ တဲဝဲလၢ ပှၤလၢအလီန့ၢ် နီၢ်အံၣ်အုန့ၣ် ကဘၣ်တၢ်စံၣ်ညီၣ်အီၤစ့ၢ်ကီး. ပှၤလၢ အကဘၣ်တၢ်စံၣ်ညီၣ်န့ၣ် တမ့ၢ်ဂုၢ်နီၢ်ကီၢ်တဘိလၢ အကတိၤတၢ်ဒီးနီၢ်အံၣ်အုန့ၣ်ဘၣ်. ယဟိဝၤယွၤ တ့လီၤဝဲဂုၢ် ဒီးတၢ်လၢဂုၢ်န့ၣ်တဲတၢ်တသ့ဘၣ်. မူခိၣ်ကလူး အအၢအသီတဂၤ သူဝဲဂုၢ်လၢ ကကတိၤတၢ်အဂီၢ်. အဝဲသူဝဲဂုၢ်ဒ်သိး ကလီန့ၢ် နီၢ်အံၣ်အုအဂီၢ်. မူခိၣ်ကလူးတဂၤအံၤ တၢ်ကိးန့ၢ်အမံၤလၢ စၤတၣ်မုၣ်ကီၤလံၢ်. ခါဆူညါန့ၣ် ဒ်သိးမုၣ်ကီၤလံၢ် သုတလီန့ၢ်ပှၤဟီၣ်ခိၣ်ဖိလၢၤတဂ့ၤအဂီၢ် ယဟိဝၤယွၤ ကမၤဟးဂီၤကွံာ်အီၤ.
“မုၣ်ကီၤလံၢ် . . . လၢအခီၣ်ထံးလံၤလံၤန့ၣ် အဝဲမ့ၢ်ပှၤလၢ အမၤသံပှၤကညီ ဒီးမ့ၢ်လၢ တၢ်မ့ၢ်တၢ်တီ တအိၣ်လၢ အပူၤဘၣ်အဃိ အဝဲတအိၣ်ဂၢၢ်ဆိးကျၢၤလၢ တၢ်မ့ၢ်တၢ်တီအပူၤဘၣ်.”—ယိၤဟၣ် ၈:၄၄