ပာ်ဖျါထီၣ် တၢ်သူၣ်ဂ့ၤသးဝါ ဒီးတဲတၢ်မုာ်မုာ်

ယ့ၣ်ၡူးမၤဝဲဒ်လဲၣ်

တၢ်ဂီၤမူ– ယ့ၣ်ၡူးမၤဘျါက့ၤ ပှၤပိာ်ခွါလၢ အမဲာ်တထံၣ်တၢ်ဘၣ်တဂၤ

၁. ကွၢ် တၢ်ဂီၤမူ ဒီး ဖး ယိၤဟၣ် ၉:၁-၇. ဝံၤဒီးတဲသကိး တၢ်သံကွၢ်လၢလာ်တဖၣ်အံၤ–

1. က. တချုးလၢ ယ့ၣ်ၡူးမၤဘျါက့ၤ ပှၤပိာ်ခွါလၢ အမဲာ်တထံၣ်တၢ်ဘၣ်တဂၤန့ၣ်အခါ အဆိကတၢၢ်န့ၣ် ယ့ၣ်ၡူးမၤဝဲမနုၤလဲၣ်. မ့ၢ်ယ့ၣ်ၡူးတဲဘၣ်အီၤ တၢ်သးခုကစီၣ်ဧါ.—ကွၢ် ယိၤဟၣ် ၉:၃၅-၃၈.

2. ခ. ယ့ၣ်ၡူးပာ်ဖျါထီၣ် တၢ်သူၣ်ဂ့ၤသးဝါလၢ ပိာ်ခွါတဂၤအံၤအဖီခိၣ်အဃိ ထိၣ်ဟူးထိၣ်ဂဲၤထီၣ် ပိာ်ခွါတဂၤအံၤလၢ အကမၤတၢ်မနုၤလဲၣ်.

ပမၤလိန့ၢ်တၢ်လၢ ယ့ၣ်ၡူးအအိၣ်ဒ်လဲၣ်

၂. ပှၤဂၤတဖၣ်မ့ၢ်သ့ၣ်ညါလၢ ပသးအိၣ် အဝဲသ့ၣ်န့ၣ် အဝဲသ့ၣ် ကဘၣ်သးကနၣ် တၢ်လၢပတဲအဝဲသ့ၣ်.

ကွၢ်လိမၤဒိးယ့ၣ်ၡူး

၃. ပာ်ဖျါထီၣ် တၢ်ဒိသူၣ်ဒိသး. ဂုာ်ကျဲးစၢး နၢ်ပၢၢ်စၢၤ ပှၤဂၤအတၢ်တူၢ်ဘၣ်.

1. က. သံကွၢ်လီၤနသးလၢ ‘ပှၤတဂၤအံၤ အတၢ်သူၣ်ကိၢ်သးဂီၤ အိၣ်မနုၤလဲၣ်. တၢ်လၢကမၤစၢၤအီၤ ဒီးထုးန့ၢ်အသးန့ၣ် မ့ၢ်မနုၤလဲၣ်.’ နမ့ၢ်ဆိကမိၣ်ထံ အတၢ်အိၣ်သးန့ၣ် ကမၤစၢၤနၤဒ်သိး နကပာ်ဖျါထီၣ် တၢ်သူၣ်အိၣ်သးအိၣ်အီၤ ဒီးဘၣ်သးမၤစၢၤအီၤနီၢ်ကီၢ်.

2. ခ. ပာ်ဖျါထီၣ်လၢ နသူၣ်အိၣ်သးအိၣ်ပှၤဂၤ ခီဖျိဒိကနၣ်တၢ်လၢ အတဲဝဲ. ပှၤတဂၤ မ့ၢ်တဲဘၣ်နၤ အတၢ်တူၢ်ဘၣ် ဒီးတၢ်ကီတၢ်ခဲလၢ အထံၣ်ဘၣ်ဝဲန့ၣ် တဘၣ်မၤပတုာ်အီၤ ဒီးဆီတလဲ တၢ်ဂ့ၢ်လၢအတဲဝဲတဂ့ၤ.

၄. တဲတၢ်မုာ်မုာ် ဒီးပာ်ဖျါထီၣ်တၢ်ပာ်ကဲ. တၢ်လၢနတဲန့ၣ် ကပာ်ဖျါထီၣ်လၢ နအိၣ်ဒီးတၢ်သးကညီၤ ဒီးဘၣ်သးမၤစၢၤ ပှၤဂၤနီၢ်ကီၢ်. အဃိ ပလီၢ်နသးဖဲ နတဲတၢ်အခါ ဒီးတဲတၢ်လၢကလုၢ်မုာ်မုာ်. တဘၣ်တဲတၢ်လၢ ကမၤဘၣ်ဒိပှၤသးတဂ့ၤ.

၅. သးအိၣ်မၤစၢၤပှၤဂၤ. ပှၤတဂၤမ့ၢ်ထံၣ်ဘၣ် တၢ်ကီတၢ်ခဲတခါခါန့ၣ် ဃုထံၣ်န့ၢ်တၢ်ခွဲးတၢ်ယာ်လၢ နကမၤစၢၤအီၤ. နမ့ၢ်ပာ်ဖျါထီၣ် တၢ်သူၣ်ဂ့ၤသးဝါန့ၣ် ပှၤဂၤကဘၣ်သးတဲတၢ်ဒီးနၤ.