တၢ်မၤလိ ၆
ပှၤဃိးဂၤပူၤဖျဲးအဂ့ၢ်
စီၤနိအၤ, အဟံၣ်ဖိဃီဖိ ဒီးဆၣ်ဖိကီၢ်ဖိတဖၣ် လဲၤနုာ်လီၤဝဲလၢ ကဘီအပူၤ. ဒီးယဟိဝၤယွၤ ကးတံာ်ဃာ်ပဲတရီ ဒီးမူခိၣ်စးထီၣ်စူၤလီၤဝဲ. တၢ်စူၤလီၤဖးဒိၣ်အဃိ ကဘီစးထီၣ်ထီၣ်ဖီလၢ ထံအဖီခိၣ်. လၢခံန့ၣ် ထံလုၢ်ဘၢဝဲ ဟီၣ်ခိၣ်ဒီဘ့ၣ်ညါ. ဒီးလၢကဘီအချၢန့ၣ် ပှၤအၢပှၤသီသံကွံာ်ဝဲခဲလၢာ်. ဘၣ်ဆၣ် စီၤနိအၤဒီးအဟံၣ်ဖိဃီဖိ အိၣ်လၢကဘီပူၤအဃိ ပူၤဖျဲးဝဲ. မ့ၢ်လၢစီၤနိအၤ ဒီးအဟံၣ်ဖိဃီဖိ ဒိကနၣ်ယဟိဝၤယွၤ အကလုၢ်အဃိ အဝဲသ့ၣ်ပူၤဖျဲးဝဲ. ဒီးအဝဲသ့ၣ် ကပှဲၤဝဲဒီးတၢ်သူၣ်ခုသးခု.
မူခိၣ်စူၤလီၤဝဲ အနံၤ ၄၀ ဒီးအနၤ ၄၀. ဖဲမူခိၣ်စူၤ ပတုာ်ကွံာ်အလီၢ်ခံန့ၣ် ထံလီၤသံးကွံာ်ဝဲ ကယီကယီ. ဒီးလၢခံန့ၣ် ကဘီအိၣ်ကတီၢ်ဝဲလၢ ကစၢၢ်ခိၣ်. ဘၣ်ဆၣ် ထံအိၣ်တ့ၢ်ဒံးဝဲလၢ တၢ်လီၢ်ကိးပူၤဒဲး. လၢတၢ်န့ၣ်အဃိ စီၤနိအၤဒီးအဟံၣ်ဖိဃီဖိန့ၣ် ဟးထီၣ်လၢကဘီအချၢ တသ့ဒံးဘၣ်.
စီၤနိအၤဒီးအဟံၣ်ဖိဃီဖိ ဘၣ်အိၣ်ဝဲလၢကဘီအပူၤ ယံာ်ဝဲတနံၣ်ဘျဲၣ်. ထံလီၤသံးကွံာ်ဝဲ ကယီကယီ တုၤလီၤလၢ ယဟိဝၤယွၤ တဲဘၣ်အဝဲသ့ၣ်လၢ သုဟးထီၣ်လၢကဘီချၢသ့လံ. ဖဲစီၤနိအၤ ဒီးအဟံၣ်ဖိဃီဖိဟးထီၣ်လၢ ကဘီချၢအခါ အဝဲသ့ၣ်တထံၣ်ဘၣ် တၢ်အၢတၢ်သီ ဒ်သိးလၢညါလၢၤဘၣ်. ခီဖျိလၢ ယဟိဝၤယွၤမၤပူၤဖျဲး အဝဲသ့ၣ်အဃိ စီၤနိအၤ ဒီးအဟံၣ်ဖိဃီဖိ စံးဘျုးစံးဖှိၣ်က့ၤ ယဟိဝၤယွၤ ဒီးဟ့ၣ်လုၢ်ထီၣ်တၢ်ဆူအအိၣ်.
ယဟိဝၤယွၤ ဘၣ်သူၣ်ဘၣ်သးဝဲ အဝဲသ့ၣ် အတၢ်ဟ့ၣ်လုၢ်ထီၣ်အံၤ. ကစၢ်ယွၤအၢၣ်လီၤဝဲလၢ အတမၤဟးဂီၤ ကယဲၢ်တၢ်အိၣ်လၢ ဟီၣ်ခိၣ်ချၢလၢထံလၢၤဘၣ်. ဝံၤဒီး ကစၢ်ယွၤ မၤဖျါထီၣ်ဝဲ တၢၢ်ကွဲၤလၢ မူခိၣ်အဆိကတၢၢ်တဘျီ. ဒီးတၢၢ်ကွဲၤန့ၣ် မ့ၢ်ဝဲတၢ်ပနီၣ်တခါလၢ ယွၤအတၢ်အၢၣ်လီၤအီလီၤ အဂီၢ်လီၤ. မ့ၢ်နထံၣ်ဘၣ်တၢၢ်ကွဲၤ တဘျီဘျီဧါ.
ဝံၤဒီး ယဟိဝၤယွၤ တဲဘၣ်စီၤနိအၤ ဒီးအဟံၣ်ဖိဃီဖိလၢ အဝဲသ့ၣ် ကဘၣ်မၤပှဲၤထီၣ် ဟီၣ်ခိၣ်ဒီဘ့ၣ် လၢအဖိအလံၤ.
“စီၤနိအၤ လဲၤနုာ်လီၤလၢ ကဘီအပူၤလီၤ. အဝဲသ့ၣ်န့ၣ် တပာ်သူၣ်ပာ်သးဝဲ တၢ်ကဲထီၣ်အသးတဖၣ်ဘၣ် တုၤလီၤလၢ ထံလုၢ်ဘၢတၢ်ဟဲ ဒီးစိာ်ကွံာ် အဝဲသ့ၣ်ခဲလၢာ်.”—မးသဲ ၂၄:၃၈, ၃၉