၁၉၂၂ ပူၤကွံာ်အနံၣ်​ တကယၤ

“တၢ်ထံၣ်တခါအံၤ ဖၣ်ဂ့ၤညါ”

ဒီပုၢ်ဝဲၢ်မုၣ်ခွါတဖၣ်​ စံၣ်တဲၤတဲလီၤတၢ် အါထီၣ်အဃိ ပလိၣ်ဘၣ်အါထီၣ်​ လံာ်လဲၢ်တဖၣ်. လၢဘရိးကလ့ၣ်​ ဘ့ၤသ့လးန့ၣ်​ ပဒီပုၢ်ဝဲၢ်တဖၣ်​ စဲကျံးထုးထီၣ်ဒံးဝဲ လံာ်မဲးကစံ နာ်က့ လံာ်လၢအတီၣ်ဟီန့ၣ်​ ပဒီပုၢ်ဝဲၢ်တဖၣ်​ ဘၣ်ငါဝဲ ပှၤတၢ်ချၢအခီပနံာ် လၢကစဲကျံးထုးထီၣ်န့ၢ် အဝဲသ့ၣ်. ဘၣ်ဆၣ်​ ခီပနံာ်လၢ ဒီပုၢ်ဝဲၢ်ငါဝဲအံၤ စဲကျံးထုးထီၣ်န့ၢ် အဝဲသ့ၣ်လံာ်လဲၢ် တန့ၢ်အါအါလၢၤဘၣ်န့ၣ်​ အိၣ်ဝဲတဘျုးလါညါ. အဃိ ဒီပုၢ်ဝဲၢ်ခွါ ရၢၤသဖၢၤန့ၣ်​ တဲသကီးတၢ်ဒီး ဒီပုၢ်ဝဲၢ်ခွါ ရီဘၢၤ မၤတ့ၤ လၢအကဲ ပှၤလၢ အကွၢ်ထွဲတၢ်လၢ တၢ်စဲကျံးထုးထီၣ်လံာ်လဲၢ် တကပၤ. ဒီးအဝဲသ့ၣ်​ တဲသကီးဝဲလၢ အဝဲသ့ၣ်​ ကစဲကျံးထုးထီၣ်က့ၤ လံာ်လဲၢ်လၢ အနီၢ်ကစၢ်.

ဒီပုၢ်ဝဲၢ်ခွါ ရီဘၢၤ မၤတ့ၤ တဲဝဲလၢ “တၢ်ထံၣ်တခါအံၤ ဖၣ်ဂ့ၤညါ. မ့ၢ်ကၠဲန့ၣ်​ ပကဘၣ်ဃု တၢ်သူၣ်ထီၣ်တဖျၢၣ်လၢ ပကစဲကျံးလံာ်လဲၢ်အဂီၢ်.” အဃိ ဒီပုၢ်ဝဲၢ်တဖၣ်​ ငါန့ၢ်တၢ်လီၢ်တခါလၢ ၁၈ ခီခီးကျဲ လၢဘရိးကလ့ၣ်​ ဒီးအဝဲသ့ၣ်ပှ့ၤန့ၢ်ဝဲ တၢ်ဖိတၢ်လံၤလၢ အလိၣ်ဘၣ်ဝဲခဲလၢာ်.

ဒီပုၢ်ဝဲၢ်တဖၣ်​ ကစဲကျံးထုးထီၣ်က့ၤလံာ်လဲၢ် လၢအနီၢ်ကစၢ်န့ၣ်​ ပှၤကီးဂၤဒဲးတသးခုဘၣ်. ခီပနံာ်ကစၢ်လၢ ဒီပုၢ်ဝဲၢ်ငါတ့ၢ်ဝဲလၢ ကစဲကျံးထုးထီၣ်န့ၢ်ပလံာ်လဲၢ်န့ၣ်​ အဟဲဟးလၢပတၢ်မၤလီၢ်. ခီပနံာ်ကစၢ်တဂၤန့ၣ်​ တဲဝဲလၢ “ခဲအံၤဒု သုအိၣ်ဒီးစဲးစဲကျံးတၢ် လၢအဂ့ၤကတၢၢ်လံ ဘၣ်ဆၣ်​ သုသူမၣ်တဘၣ်​ နီဂၤဘၣ်. အဃိ နီၢ်ဃုလါဒီးန့ၣ်​ သုစဲးတခါအံၤ ကဟးဂီၤကွံာ်ဝဲ.”

ဒီပုၢ်ဝဲၢ်ခွါ ရီဘၢၤ မၤတ့ၤ တဲက့ၤအီၤလၢ “နတဲတၢ်န့ၣ်​ အဘၣ်မၢၤ. ဘၣ်ဆၣ်​ ကစၢ်ယွၤန့ၣ်​ အမၤစၢၤပှၤထီဘိ အဃိ ပသ့ၣ်ညါလၢ အကမၤစၢၤပှၤဒံး.” လၢခံတယံာ်ဘၣ်န့ၣ်​ ပသူစဲးတဖျၢၣ်အံၤ ဒီးတနံၤန့ၣ်​ ပထုးထီၣ်လံာ်လဲၢ်န့ၢ်ဝဲ အဘ့ၣ်​ ၂,၀၀၀ ညါ.

ပှၤလၢအကထိတဖၣ်​ နၢ်ဟူဘၣ်​ တၢ်သးခုကစီၣ်​ လၢကလံၤဒၢအပူၤ

ယဟိဝၤယွၤ အပှၤဂီၢ်မုၢ်တဖၣ်​ စဲကျံးထုးထီၣ်ဝဲ လံာ်လဲၢ်လၢ အနီၢ်ကစၢ်. တကးဒံးဘၣ်​ စးထီၣ်သူဝဲ ကလံၤဒၢသန့ လၢကရၤလီၤ ဘီမုၢ်တၢ်သးခုကစီၣ်အဂီၢ်. ဖဲ ၁၉၂၂ လါဖ့ၤဘြူၤအါရံၤ ၂၆ သီ, အိၣ်ဘှံးနံၤ ဟါလီၤခီန့ၣ်​ ဒီပုၢ်ဝဲၢ်ခွါ ရၢၤသဖၢၤ တဲလီၤတၢ်လၢ ကလံၤဒၢပူၤ အဆိကတၢၢ်တဘျီ. ဒီပုၢ်ဝဲၢ်ခွါအံၤ ဟ့ၣ်ဝဲတၢ်စံၣ်တဲၤတဲလီၤတၢ် လၢအခိၣ်တီမ့ၢ်ဝဲ “ပှၤအကကွဲၢ် လၢအအိၣ်မူခဲအံၤန့ၣ်​ တသံနီတဘျီလၢၤဘၣ်.” ဒီးအဟ့ၣ်ဝဲ တၢ်စံၣ်တဲၤတဲလီၤတၢ်တခါအံၤ လၢ KOG အကလံၤဒၢသန့ လၢအအိၣ်လၢ လီၣ်အဲကၠလဲး, ခဲၤလံၤဖိနံယါ, ကီၢ်အမဲရကၤအပူၤ.

ဘၣ်သ့ၣ်သ့ၣ်​ တၢ်စံၣ်တဲၤတဲလီၤတၢ်အံၤ ပှၤနၢ်ဟူဘၣ်ကအိၣ်လၢ အဂၤ ၃၅,၀၀၀ ညါ. ပှၤလၢအနၢ်ဟူဘၣ်​ တၢ်စံၣ်တဲၤတဲလီၤတၢ်တနီၤန့ၣ်​ ကွဲးစံးဘျုးက့ၤဝဲ ဒီပုၢ်ဝဲၢ်ခွါ ရၢၤသဖၢၤ. ပှၤတဂၤလၢအမံၤမ့ၢ် ဝ့လၣ်​ အဲၣ်ဖီၣ်​ လၢအအိၣ်လၢ စဲထၤအဲ, ခဲၤလံၤဖိနံယါန့ၣ်​ အကွဲးစံးဘျုးက့ၤဝဲ ဒီပုၢ်ဝဲၢ်ခွါ ရၢၤသဖၢၤ ဒီးအတဲဝဲလၢ “တၢ်စံၣ်တဲၤတဲလီၤတၢ်တခါအံၤ အလီၤသးအိၣ်​ ဒီးကနၣ်အီၤမုာ်မး.” တကးဒံးဘၣ်​ အတဲစ့ၢ်ကီးလၢ “လၢယဟံၣ်န့ၣ်​ ပှၤဆိးက့အိၣ်သၢဂၤလၢအဟးထီၣ်လၢ တၢ်ချၢတသ့ဘၣ်. အဃိ နမ့ၢ်ဟဲဟ့ၣ်တၢ်စံၣ်တဲၤတဲလီၤတၢ် ဘူးဒီးပတၢ်လီၢ်နာ်က့ တမ့ၢ်လၢ ပကနၢ်ဟူဘၣ်ဘၣ်.”

ပဆဲးရၤလီၤ တၢ်စံၣ်တဲၤတဲလီၤတၢ်လၢ ကလံၤဒၢပူၤ လၢနွံလၢအဂၤစ့ၢ်ကီး. ဒီးဖဲ ၁၉၂၂ နံၣ်ဘူးကလၢာ်န့ၣ်​ တၢးထီခိးတၢ် ပာ်ဖျါထီၣ်ဝဲလၢ “ပှၤလၢအနၢ်ဟူဘၣ်​ တၢ်စံၣ်တဲၤတဲလီၤတၢ်လၢ ကလံၤဒၢပူၤန့ၣ်​ အစှၤကတၢၢ် ကအိၣ်လၢ ၃၀၀,၀၀၀ ညါ.”

ပှၤအါဂၤ ဒိကနၣ်ဝဲ တၢ်စံၣ်တဲၤတဲလီၤတၢ်လၢ ကလံၤဒၢပူၤ မုာ်မးအဃိ လံာ်စီဆှံကၠိဖိတဖၣ်​ ဒုးအိၣ်ထီၣ်ဝဲ အနီၢ်ကစၢ်ကလံၤဒၢ သန့ လၢအအိၣ်လၢ စတ့ၣ်ထၢၤ အါလဲ ဒီးအဘူးဒီး ဘရိးကလ့ၣ်​ ဘ့ၤသ့လး. ဒီးနံၣ်လၢအဂၤစ့ၢ်ကီး လံာ်စီဆှံကၠိဖိတဖၣ်​ သူဝဲ ကလံၤဒၢအသန့ WBBR လၢကရၤလီၤ ဘီမုၢ်တၢ်သးခုကစီၣ်လၢ ပှၤအါဂၤအအိၣ်​ လၢတၢ်လီၢ်အါတီၤ.

“ADV”

လံာ် တၢးထီခိးတၢ် လါယူၤ ၁၅, ၁၉၂၂ န့ၣ်​ တဲဝဲလၢ ပှၤကမၤတၢ်အိၣ်ဖှိၣ်ဖးဒိၣ်​ လၢစံဒၢၤဖွဲၣ်, အိၤဟါအိၤ, စးထီၣ်လၢ လါစဲးပတ့ဘၢၣ်​ ၅ သီ တုၤလၢ ၁၃ သီ, ၁၉၂၂. လံာ်စီဆှံကၠိဖိတဖၣ်န့ၣ်​ ဖဲအဝဲသ့ၣ်လဲၤတုၤလၢ စံဒၢၤဖွဲၣ်​ အခါ အဝဲသ့ၣ်သးခုညါ.

တၢ်စံၣ်တဲၤတဲလီၤတၢ် အဆိကတၢၢ်တခါလၢ ဒီပုၢ်ဝဲၢ်ခွါ ရၢၤသဖၢၤ ဟ့ၣ်လီၤဝဲန့ၣ်​ အတဲဘၣ်​ ပှၤကမျၢၢ်တဖၣ်လၢ “ယနာ်သပှၢ်တၢၢ်လၢ ကစၢ်ယွၤကဆိၣ်ဂ့ၤ တၢ်အိၣ်ဖှိၣ်ဖးဒိၣ်တခါအံၤ ဒီးတၢ်အိၣ်ဖှိၣ်ဖးဒိၣ်တခါအံၤ ကကဲထီၣ်​ တၢ်အုၣ်သးဖးဒိၣ်တခါ လၢအတကဲထီၣ်အသး နီတဘျီဒံးဘၣ်.” ဒီးပှၤဟ့ၣ်တၢ်စံၣ်တဲၤတဲလီၤ လၢအဂၤတဖၣ်စ့ၢ်ကီး ဆဲးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါလၢ ကဆဲးစံၣ်တဲၤတဲလီၤတၢ်.

ဖဲလါစဲးပတ့ဘၢၣ်​ ၈ သီ, မုၢ်ယဲၢ်နံၤန့ၣ်​ ပှၤကမျၢၢ်လၢ အလဲၤနုာ်လီၤလၢ တၢ်သူၣ်ထီၣ်အပူၤ လၢကဒိကနၣ်​ ဒီပုၢ်ဝဲၢ်ခွါ ရၢၤသဖၢၤ အတၢ်စံၣ်တဲၤတဲလီၤတၢ်န့ၣ်​ ကအိၣ်ဝဲလၢ ၈,၀၀၀ ညါ. လၢအဝဲသ့ၣ်လံာ်ကွဲမုာ်အလိၤ လံာ်မဲာ်ဖျၢၣ်​ လၢအမ့ၢ် “ADV” အခီပညီဒ်လဲၣ်န့ၣ်​ အဝဲသ့ၣ်အဲၣ်ဒီးသ့ၣ်ညါဝဲ. ဒီးအဝဲသ့ၣ်အိၣ်ခီး ဒိကနၣ်ဝဲလၢ ဒီပုၢ်ဝဲၢ်ခွါ ရၢၤသဖၢၤ ကတဲပၠးဝဲ လံာ်မဲာ်ဖျၢၣ်န့ၣ်​ အခီပညီ. ဖဲပှၤကမျၢၢ် လဲၤဆ့ၣ်နီၤအခါန့ၣ်​ အဝဲသ့ၣ်​ ကထံၣ်ဘၣ်ဝဲ တၢ်ကံးညာ်ဖးဒိၣ်​ လၢအထူတလံာ်ဃာ်သးန့ၣ်​ ဘျးလီၤအသး လၢပျဲၢ်စီၢ်ခိၣ်အဖီခိၣ်. ဒီပုၢ်ဝဲၢ်ခွါ အါသၢၤ ချီၤ လၢအအိၣ်လၢ ထိစာ်, အိၤကလၤအိမၤ, ကီၢ်အမဲရကၤန့ၣ်​ ဟဲထီၣ်ဝဲ တၢ်အိၣ်ဖှိၣ်ဖးဒိၣ်အံၤ. ဒီးဒ်သိးအကနၢ်ဟူဘၣ်​ တၢ်စံၣ်တဲၤတဲလီၤတၢ် ဂ့ၤဂ့ၤအဂီၢ် အလဲၤဆ့ၣ်နီၤလၢ တၢ်မဲာ်ညါတစဲး. ဖဲစိၤအဝဲန့ၣ်​ စဲးလၢကမၤဒိၣ်ထီၣ်​ မၤဆံးလီၤတၢ်ကလုၢ် တအိၣ်ဒံးဘၣ်အဃိ နကနၢ်ဟူ တၢ်စံၣ်တဲၤတဲလီၤတၢ် ဂ့ၤဂ့ၤအဂီၢ်န့ၣ်​ ကီတစဲး.

ပှၤပၢၤလီၢ်ဆ့ၣ်နီၤတဂၤ တဲလီၤဝဲလၢ ဖဲ ၉:၃၀ န့ၣ်​ ဒီပုၢ်ဝဲၢ်ခွါ ရၢၤသဖၢၤ ကဟ့ၣ်တၢ်စံၣ်တဲၤတဲလီၤတၢ်အဃိ ဒ်သိးဒီး ပှၤတဂၤမၣ်​ တမၤတံာ်တာ်တၢ်တဂ့ၤအဂီၢ် ပှၤတဟ့ၣ်အခွဲးလၢ ပှၤလၢအဟဲစဲၤခံတဖၣ်​ ကနုာ်လီၤလၢ တၢ်သူၣ်ထီၣ်အပူၤဘၣ်. ဒီပုၢ်ဝဲၢ်ခွါ ရၢၤသဖၢၤ စးထီၣ်ဝဲ အတၢ်စံၣ်တဲၤတဲလီၤတၢ်လၢ ယ့ၣ်ၡူးအတၢ်ကတိၤ လၢအအိၣ်ဖဲ မးသဲ ၄:၁၇. ဖဲန့ၣ်တဲဝဲလၢ “မူခိၣ်အဘီအမုၢ် ဟဲဘူးထီၣ်လံ.” ဖဲဒီပုၢ်ဝဲၢ်ခွါ ရၢၤသဖၢၤ တဲဘၣ်ဃးဒီး ပှၤကဘၣ်နၢ်ဟူဝဲ ဘီမုၢ်အဂ့ၢ်အခါ အတဲဝဲလၢ “ယ့ၣ်ၡူးအနီၢ်ကစၢ် တဲဝဲလၢ ဖဲအတၢ်ဟဲက့ၤအိၣ်ဒီးပှၤ အဆၢကတီၢ်န့ၣ်​ အဝဲကပာ်ဖှိၣ်ထီၣ်ဝဲ အပှၤဂီၢ်မုၢ်. ဒီးဖဲန့ၣ်အခါန့ၣ်​ အကပာ်ဖှိၣ်ထီၣ်​ ပှၤလၢအသးတီတဖၣ်.”

ဒီပုၢ်ဝဲၢ်ခွါ အါသၢၤ လၢအဆ့ၣ်နီၤလၢ တၢ်မဲာ်ညါန့ၣ်​ တဲဝဲလၢ “တၢ်လၢ ဒီပုၢ်ဝဲၢ်ခွါ ရၢၤသဖၢၤ တဲဝဲန့ၣ်​ ပကနၣ်အီၤ ထံထံလီၤ.” ဘၣ်ဆၣ်​ သတူၢ်ကလာ်န့ၣ်​ ဒီပုၢ်ဝဲၢ်ခွါ အါသၢၤ တူၢ်ဘၣ်ဝဲလၢ အအိၣ်တဆူၣ်ဘၣ်. ဒီးအသ့ၣ်ညါဝဲလၢ အမ့ၢ်ဟးထီၣ်လၢတၢ်ချၢန့ၣ်​ အဟဲက့ၤနုာ်လီၤ တန့ၢ်ဘၣ်အဃိ အတဘၣ်သး ဟးထီၣ်ဘၣ်​ သနာ်က့ အဘၣ်ဟးထီၣ်.

ဒီပုၢ်ဝဲၢ်ခွါ အါသၢၤ ဟးထီၣ်လၢတၢ်ချၢ တစိၢ်ဖိဘျီ အအိၣ်မုာ်ထီၣ်က့ၤ. အဟဲက့ၤကဒါလၢ တၢ်သူၣ်ထီၣ်အခီၣ်ထံးဘျီ အနၢ်ဟူ ပှၤဒဲစုသီၣ်ဖးဒိၣ်. အဃိ တၢ်ကဲထီၣ်သးဒ်လဲၣ်န့ၣ်​ အဘၣ်သးသ့ၣ်ညါဝဲကၠ့ၤ. အဆိကမိၣ်ဝဲလၢ ဒ်သိး အကဆဲးနၢ်ဟူဘၣ်​ တၢ်စံၣ်တဲၤတဲလီၤတၢ်အဂီၢ်န့ၣ်​ အမ့ၢ်ဘၣ်ထီၣ်လၢ တၢ်သူၣ်ထီၣ်ခိၣ်ဒုး သနာ်က့ အကလဲၤထီၣ်ဝဲ. ဖဲန့ၣ်အခါန့ၣ်​ ဒီပုၢ်ဝဲၢ်ခွါ အါသၢၤ အသးနံၣ်အိၣ်ဝဲ ၂၃ နံၣ်ဒံးလီၤ. အဃိ အဝဲလဲၤထီၣ်လၢ တၢ်သူၣ်ထီၣ်အဒူၣ်လိၤ. တကးဒံးဘၣ်​ တၢ်သူၣ်ထီၣ်အခိၣ်ဒုးအတြဲၤတဖၣ်န့ၣ်​ အီးထီၣ်ပာ်စၢၤသး အဃိ ဖဲအလဲၤဘူးထီၣ်အခါ အတဲဝဲလၢ အနၢ်ဟူဘၣ်​ တၢ်စံၣ်တဲၤတဲလီၤဂ့ၤမး.

ပှၤလၢအလဲၤထီၣ်လၢ တၢ်သူၣ်ထီၣ်​ အခိၣ်ဒုးန့ၣ်​ တမ့ၢ်ထဲ ဒီပုၢ်ဝဲၢ်ခွါ အါသၢၤ တဂၤဘၣ်. အသကီးတနီၤန့ၣ်​ အိၣ်ပာ်စၢၤလၢ တၢ်သူၣ်ထီၣ်အခိၣ်ဒုးလံ. လၢအသကီးအကျါတဂၤန့ၣ်​ အကဲဝဲ ဒီပုၢ်ဝဲၢ်ခွါဖြဲၣ်​ ကၠါစဲၤ ဒီးအဟဲကၠံၣ်လၢ ဒီပုၢ်ဝဲၢ်ခွါ အါသၢၤ အအိၣ်ဒီး ကၠးအီၤလၢ “နဒီဆံးဆံးဖိ ပၣ်တဘ့ၣ်ဘ့ၣ်ကၠ့ၤဧါ.”

ဒီပုၢ်ဝဲၢ်ခွါ အါသၢၤ တဲဝဲလၢ “အၢၤ, အပၣ်ဝဲ.”

ဒီပုၢ်ဝဲၢ်ခွါဖြဲၣ်​ တဲဘၣ်​ အါသၢၤလၢ “ပဃ့ဘါထုကဖၣ်​ ဒ်သိး ပကတိလိာ်သးဒီး ပှၤလၢအအိၣ်ဒီး ဒီဆံးဆံးဖိတဂၤ. နထံၣ်တၢ်ကံးညာ် ထူတလံာ်ဃာ်သး ဖးဒိၣ်တခါန့ၣ်ဧါ. လၢတၢ်ကံးညာ်အလိၤန့ၣ်​ အိၣ်ဒီးတၢ်ကတိၤလၢ ပှၤကွဲးလီၤပာ်စၢၤအီၤ. ခဲအံၤန့ၣ်​ ကနၣ်​ စံၣ်ညီၣ်ကွီၢ်a တဲတၢ်မ့ၢ်ထံ. ဒီးအမ့ၢ်တဲထီၣ်ဝဲ ‘ဒီးသုကဘၣ်​ စံၣ်တဲၤတဲလီၤ, စံၣ်တဲၤတဲလီၤ’ န့ၣ်ကူးတဲာ်ကွံာ် ပျံၤလွံၢ်ဘိအံၤ.”

အဃိ ဒီပုၢ်ဝဲၢ်ခွါ အါသၢၤ စိာ်ဃာ်ဝဲဒီး ဒီဆံးဆံးဖိတဘ့ၣ်. ဒီးအီၤဒီး အသကီးန့ၣ်​ ဒ်သိးကသ့ၣ်ညါဝဲလၢ ကဘၣ်ကူးတဲာ် ပျံၤလၢအခါဖဲလဲၣ်အဂီၢ် အဝဲသ့ၣ်ခီးကနၣ်ဝဲ တၢ်လၢ ဒီပုၢ်ဝဲၢ်ခွါ ရၢၤသဖၢၤကတဲဝဲ. တစိၢ်ဖိဘျီ ဒီပုၢ်ဝဲၢ်ခွါ ရၢၤသဖၢၤ တဲဖျါထီၣ်ဝဲ တၢ်ဂ့ၢ်ခိၣ်သ့ၣ်​ လၢအဘၣ်ဃးဒီး အတၢ်စံၣ်တဲၤတဲလီၤတၢ်. ဒီပုၢ်ဝဲၢ်ခွါ ရၢၤသဖၢၤန့ၣ်​ အသးဆူၣ်ဒိၣ်မး ဒီးလၢတၢ်သးခုန့ၣ်​ အတဲထီၣ်ဝဲလၢ အကလုၢ်ဒိၣ်ဒိၣ်လၢ “ကဲထီၣ်​ ပှၤအုၣ်သးလၢ အသးတီတဂၤ လၢကစၢ်အဂီၢ် ဒီးဆဲးဒုးတၢ်ဆူၣ်ဆူၣ်​ တုၤလၢ ဘၤဘူၤလိၣ်​ လၢအမ့ၢ် တၢ်ဘူၣ်တၢ်ဘါကမၣ်​ ဟးဂီၤကွံာ် လၢာ်လၢာ်ဆ့ဆ့. ပှၤဟီၣ်ခိၣ်ဖိ ကဘၣ်သ့ၣ်ညါဝဲလၢ ယဟိဝၤန့ၣ်​ အကဲကစၢ်ယွၤ ဒီးယ့ၣ်ၡူးခရံာ်န့ၣ်​ အကဲဝဲ စီၤပၤတဖၣ်အစီၤပၤ ဒီးကစၢ်တဖၣ်အကစၢ်. စံၣ်တဲၤတဲလီၤ တၢ်ကစီၣ်အံၤလၢ တၢ်လီၢ်ကိးတီၤဒဲး. တနံၤညါအံၤ အကဲဝဲမုၢ်နံၤလၢ အရ့ဒိၣ်ကတၢၢ်တနံၤ. ကွၢ်မီၤ, စီၤပၤ ပၢတၢ်လံ. သုဝဲခဲလၢာ်န့ၣ်​ သုအိၣ်ဒီးမူဒါလၢ သုကတဲဘၣ်​ ပှၤကီးဂၤဒဲး လၢတၢ်ဂ့ၢ်အံၤ. အဃိန့ၣ်​ စံၣ်တဲၤတဲလီၤ, စံၣ်တဲၤတဲလီၤ, စံၣ်တဲၤတဲလီၤ စီၤပၤ ဒီးအဘီမုၢ်အဂ့ၢ်.”

ဒီပုၢ်ဝဲၢ်ခွါ အါသၢၤတဲဝဲလၢ အီၤဒီးအသကီးတဖၣ်​ ကူးတဲာ်ပျံၤ ဝံၤဘျီ တၢ်ကံးညာ်လၢ အထူတလံာ်ဃာ်သးန့ၣ်​ သလၣ်လီၤအသးဂ့ၤဂ့ၤ. အဃိ လံာ်မဲာ်ဖျၢၣ်​ “ADV” န့ၣ်အဘၣ်ဃးလိာ်သးဒီး တၢ်ကတိၤ လၢအမ့ၢ် “စံၣ်တဲၤတဲလီၤ စီၤပၤ ဒီးအဘီမုၢ်အဂ့ၢ်” လၢအအိၣ်လၢ တၢ်ကံးညာ် လၢအသလၣ်လီၤအသး တဘ့ၣ်န့ၣ်အလိၤ.

တၢ်မၤလၢအရ့ဒိၣ်တခါ

တၢ်အိၣ်ဖှိၣ်ဖးဒိၣ်​ လၢပှၤမၤအီၤဖဲ စံဒၢၤဖွဲၣ်န့ၣ်​ မၤစၢၤဝဲ ဒီပုၢ်ဝဲၢ်မုၣ်ခွါလၢ ကမၤဝဲ တၢ်မၤလၢအရ့ဒိၣ်တခါ လၢအမ့ၢ် ဘီမုၢ်တၢ်စံၣ်တဲၤတဲလီၤတၢ်မၤ. ဒီးဒီပုၢ်ဝဲၢ်မုၣ်ခွါအါတက့ၢ်န့ၣ်​ သးဆူၣ်လၢ ကစံၣ်တဲၤတဲလီၤတၢ်. ဒီပုၢ်ဝဲၢ်ခွါ လၢအမၤ ပှၤလဲၤလၢညါ လၢအအိၣ်လၢ အိၤကလၤအိမၤ လၢကီၢ်အမဲရကၤန့ၣ်​ အကွဲးဝဲလၢ “တၢ်လီၢ်လၢ ပလဲၤစံၣ်တဲၤတဲလီၤတၢ်န့ၣ်​ အါတက့ၢ် ပှၤမၤတၢ်လၢ တၢ်ခူၣ်သွဲၣ်လး ဒီးပှၤသ့ၣ်တဖၣ်န့ၣ်​ ဖှီၣ်ဒိၣ်မး.” ဒီပုၢ်ဝဲၢ်ခွါတဂၤအံၤ တဲဝဲလၢ ညီနုၢ်ပှၤမ့ၢ်ဖးဘၣ်​ မဲးကစံ Golden Age န့ၣ်​ “အဝဲသ့ၣ်​ မဲာ်ထံထီၣ်တအၢၣ်ညါ.” ဒီးဒီပုၢ်ဝဲၢ်ခွါအံၤ တဲဝဲလၢ “ပမၤမုာ်ထီၣ်ဘၣ်​ ပှၤသ့ၣ်တဖၣ်အံၤ အသးအဃိ ပသးခုညါ.”

လံာ်စီဆှံကၠိဖိတဖၣ်အံၤ သ့ၣ်ညါဝဲလၢ ယ့ၣ်ၡူးအတၢ်ကတိၤဖဲ လူၤကၣ်​ ၁၀:၂ လၢအတဲဝဲလၢ “တၢ်လၢပှၤကဘၣ်ကူးအီၤန့ၣ်​ အိၣ်ဝဲအါမး ဘၣ်ဆၣ်​ ပှၤမၤတၢ်ဖိန့ၣ်​ အိၣ်ထဲစှၤဂၤ” န့ၣ်အရ့ဒိၣ်ဖးဒိၣ်ညါ. ဒီးဖဲ ၁၉၂၂ နံၣ်ဘူးထီၣ်ကလၢာ်န့ၣ်​ လံာ်စီဆှံကၠိဖိတဖၣ်အံၤ အသးဆူၣ်ဒိၣ်ထီၣ်လၢ ကစံၣ်တဲၤတဲလီၤ ဘီမုၢ်တၢ်သးခုကစီၣ်​ လၢတၢ်လီၢ်အါတီၤ အါန့ၢ်ဒံးလၢညါ.