တၢ်စူၢ်တၢ်နာ် တၢ်ဂ့ၤတၢ်ဝါတခါလၢ အကမၤစၢၤပှၤဒ်သိး ပကအိၣ်ဒီး တၢ်ဂံၢ်တၢ်ဘါ
ပမ့ၢ်အိၣ်ဒီး တၢ်နာ်န့ၣ် ပကအိၣ်ဒီးတၢ်ဂံၢ်တၢ်ဘါ အါမးလီၤ. အဒိ, မုၣ်ကီၤလံၢ်အဲၣ်ဒိး မၤဟးဂီၤကွံာ်ပတၢ်ရ့လိာ်သးဒီး ယဟိဝၤယွၤသနာ်က့ တၢ်နာ်မၤစၢၤပှၤ ဒ်သိးပက “မၤလီၤပံာ် မုၣ်ကီၤလံၢ် အပျၢ်မ့ၣ်အူခဲလၢာ်” လီၤ. (အ့းဖ့းစူး ၆:၁၆) ပမ့ၢ်အိၣ်ဒီးတၢ်နာ်န့ၣ် ပလဲၤခီဖျိ တၢ်ကီတၢ်ခဲတဖၣ် လၢအဖျါဖးဒိၣ်ဖးထီ ဒ်သိးဒီးကစၢၢ်ကလိတဖၣ်သ့လီၤ. ယ့ၣ်ၡူးတဲအပျဲၢ်အဘီၣ်တဖၣ်လၢ “သုတၢ်နာ် မ့ၢ်အိၣ်ထဲသိးဒီး သဘၣ်အချံတဖျၢၣ်ဒီး, သုကစံးဘၣ် ကစၢၢ်တဖျၢၣ်အံၤ, သုးကွံာ်နသးဖဲအံၤ ဆူဘးန့ၣ်တက့ၢ်. ဒီးကသုးကွံာ်အသးလီၤ.” (မးသဲ ၁၇:၂၀) ပသ့ၣ်ညါလၢတၢ်နာ် မၤဂၢၢ်ကျၢၤထီၣ် ပတၢ်ရ့လိာ်သးဒီး ယဟိဝၤယွၤသ့အဃိ ပကြၢးဆိကမိၣ်ကွၢ် တၢ်သံကွၢ်တဖၣ်အံၤလီၤ. တၢ်နာ်န့ၣ် မ့ၢ်မနုၤလဲၣ်. ပတၢ်ပာ်သူၣ်ပာ်သးန့ၣ် ဘၣ်ထွဲလိာ်အသးဒီး ပတၢ်နာ်ဒ်လဲၣ်. ပမၤဂၢၢ်ကျၢၤထီၣ် ပတၢ်နာ်ကသ့ဒ်လဲၣ်. ဒီးပကြၢး နာ်မတၤလဲၣ်.—ရိမ့ၤ ၄:၃.
တၢ်နာ်န့ၣ် မ့ၢ်မနုၤလဲၣ်
တၢ်နာ်န့ၣ် တမ့ၢ်ထဲပနာ် တၢ်လၢလံာ်စီဆှံ တဲဝဲတဖၣ်န့ၣ်ဘၣ်. ဘၣ်မနုၤအဃိလဲၣ်. မ့ၢ်လၢ “တၢ်နါတဖၣ် နာ်စ့ၢ်ကီးတၢ် [လၢကစၢ်ယွၤအိၣ်], ဒီးကနိးကစုာ်” အဃိလီၤ. (ယၤကိာ် ၂:၁၉) မ့မ့ၢ်ဒ်န့ၣ်န့ၣ် တၢ်နာ်န့ၣ် မ့ၢ်မနုၤလဲၣ်.
ဒ်ပနာ်လၢ မုၢ်နံၤဒီးမုၢ်နၤ ကအိၣ်ဝဲထီဘိအသိး ပနာ်လၢ ကစၢ်ယွၤ အတၢ်ဘၣ်သးစ့ၢ်ကီး ကဟဲကဲထီၣ် အနီၢ်ကီၢ်ထီဘိ
လံာ်စီဆှံ ပာ်ဖျါထီၣ်ဝဲလၢ တၢ်နာ်န့ၣ် အဒိးသန့ၤထီၣ်အသးလၢ တၢ်ဂ့ၢ်ခံမံၤ အဖီခိၣ်လီၤ. တၢ်ဂ့ၢ်တၢတမံၤန့ၣ် မ့ၢ်ဝဲ “တၢ်စူၢ်တၢ်နာ်မ့ၢ် တၢ်မုၢ်လၢ်န့ၣ် အတၢ်သန့ၤပသး” လီၤ. (ဧ့ၤဘြံၤ ၁၁:၁က) နမ့ၢ်အိၣ်ဒီးတၢ်နာ်န့ၣ် နကနာ်လၢ တၢ်လၢယဟိဝၤယွၤတဲဝဲ ကိးမံၤဒဲးန့ၣ် မ့ၢ်ဝဲတၢ်မ့ၢ်တၢ်တီ ကဟဲလၢထီၣ်ပှဲၤထီၣ်ဝဲ အနီၢ်ကီၢ်လီၤ. အဒိ ယဟိဝၤယွၤတဲဘၣ် ပှၤအံၣ်စရ့လးဖိတဖၣ်လၢ “သုမၤဟးဂီၤ ယတၢ်အၢၣ်လီၤအီလီၤဒီးမုၢ်နံၤ, ဒီးယတၢ်အၢၣ်လီၤအီလီၤဒီးမုၢ်နၤ တုၤမုၢ်နံၤဒီးမုၢ်နၤ တအိၣ်ဘၣ်လၢ အဆၢအကတီၢ်န့ၣ် မ့ၢ်သ့ဒီး, . . . ယတၢ်အၢၣ်လီၤအီလီၤဒီး ယခ့ယပှၤစီၤဒၤဝံး . . . ဟးဂီၤကသ့လီၤ.” (ယံးရမံယၤ ၃၃:၂၀, ၂၁) မ့ၢ်နဘၣ်ယိၣ်တၢ်လၢ မုၢ်တဟဲထီၣ်လၢမူခိၣ် ဒီးမုၢ်နံၤမုၢ်နၤ တအိၣ်လၢၤဘၣ် တဘျီဘျီဧါ. တမ့ၢ်လၢ နကသးဒ့ဒီလၢ ဟီၣ်ခိၣ်ကလဲၤတရံး ဒ်န့ဆၢၣ်အတၢ်သိၣ်တၢ်သီ အိၣ်ဝဲအသိးဘၣ်. မ့မ့ၢ်ဒ်န့ၣ်န့ၣ် ပှၤလၢအတ့လီၤ တၢ်သိၣ်တၢ်သီတဂၤအံၤ မၤလၢပှဲၤ အတၢ်အၢၣ်လီၤအီလီၤ သ့ဝဲန့ၣ် နတလိၣ်သးဒ့ဒီဘၣ်.—ယၡါယၤ ၅၅:၁၀, ၁၁; မးသဲ ၅:၁၈.
ခံခါတခါန့ၣ် တၢ်နာ်မ့ၢ် “တၢ်လၢပတထံၣ်ဘၣ်တဖၣ် အတၢ်သ့ၣ်ညါလီၤ.” တၢ်နာ်န့ၣ်မ့ၢ် “တၢ်သ့ၣ်ညါ” မ့တမ့ၢ် တၢ်အုၣ်အသးလၢ တၢ်လၢပထံၣ်အီၤလၢ ပမဲာ်ချံတသ့ဘၣ်တဖၣ်န့ၣ် အိၣ်ဝဲအနီၢ်ကီၢ်လီၤ. (ဧ့ၤဘြံၤ ၁၁:၁ခ) တၢ်လၢပတထံၣ်အီၤဒီး ပနာ်လၢအအိၣ်အနီၢ်ကီၢ်န့ၣ် မ့ၢ်မနုၤလဲၣ်. အဒိ ဆိကမိၣ်ကွၢ်လၢ ပှၤဖိသၣ်တဂၤ သံကွၢ်နၤလၢ ‘ကလံၤအိၣ်န့ၣ် နသ့ၣ်ညါအီၤသ့ဒ်လဲၣ်.’ နတထံၣ်ဘၣ် ကလံၤနီတဘျီသနာ်က့ နကတဲဘၣ် ဖိသၣ်လၢ တၢ်အုၣ်အသးလၢ အပာ်ဖျါထီၣ်ဝဲလၢ ကလံၤအိၣ်ဝဲအနီၢ်ကီၢ် ဒ်သိးဒီး ပကသါထီၣ်ကသါလီၤကလံၤ, ကလံၤဟဲအခါ တၢ်မၤအသးဒ်လဲၣ် ဒီးတၢ်အဂၤတဖၣ်န့ၣ်လီၤ. တၢ်အုၣ်အသးအံၤ မၤစၢၤဖိသၣ်လၢ အကတူၢ်လိာ်ဝဲလၢ ကလံၤလၢ အတထံၣ်ဘၣ်ဝဲလၢ အမဲာ်ချံန့ၣ် အိၣ်အနီၢ်ကီၢ်လီၤ. ဒ်န့ၣ်အသိး တၢ်နာ်န့ၣ် ဒိးသန့ၤထီၣ်အသးလၢ တၢ်အုၣ်အသးလၢ ပနာ်န့ၢ်အီၤသ့ အဖီခိၣ်လီၤ.—ရိမ့ၤ ၁:၂၀.
ဒ်သိးပကအိၣ်ဒီး တၢ်နာ်အဂီၢ် ပကဘၣ်ပာ်လုၢ်ပာ်ပှ့ၤ တၢ်မ့ၢ်တၢ်တီ
တၢ်နာ်န့ၣ် ဒိးသန့ၤထီၣ်အသးလၢ တၢ်အုၣ်အသးအဃိ ပှၤတဂၤကအိၣ်ဒီးတၢ်နာ်အဂီၢ် အဆိကတၢၢ်န့ၣ် အဝဲကဘၣ် “သ့ၣ်ညါထီၣ် တၢ်မ့ၢ်တၢ်တီ” လီၤတံၢ်လီၤဆဲးလီၤ. (၁ တံၤမသ့း ၂:၄) ဘၣ်ဆၣ် ထဲဒၣ်ပအိၣ်ဒီးတၢ်သ့ၣ်ညါန့ၣ် တလၢပှဲၤဒံးဘၣ်. တၢ်မၢဖိပီလူး ကွဲးဝဲလၢ “လၢပသးန့ၣ် ပစူၢ်က့ၤနာ်က့ၤတၢ်” လီၤ. (ရိမ့ၤ ၁၀:၁၀) ပကဘၣ်နာ် တၢ်မ့ၢ်တၢ်တီ တကးဒံးဘၣ် ပကဘၣ်ပာ်လုၢ်ပာ်ပှ့ၤအီၤလီၤ. ပမ့ၢ်ပာ်လုၢ်ပာ်ပှ့ၤ တၢ်မ့ၢ်တၢ်တီမး ပကအဲၣ်ဒိးပာ်ဖျါထီၣ် ပတၢ်နာ် ခီဖျိအိၣ်မူ ဒ်တၢ်မ့ၢ်တၢ်တီအသိးလီၤ. (ယၤကိာ် ၂:၂၀) ပှၤလၢအတပာ်လုၢ်ပာ်ပှ့ၤ တၢ်မ့ၢ်တၢ်တီန့ၣ် တၢ်အုၣ်အသး မ့ၢ်အိၣ်ဒၣ်လဲာ် ဘၣ်သ့ၣ်သ့ၣ် အဝဲတဆီတလဲ အတၢ်နာ်ဘၣ် မ့တမ့ၢ် ကဃုကျဲလၢ ကတဲပူၤဖျဲးအသး ဒ်သိးကမၤဝဲ ဖဲအသး ဒီးတတူၢ်လိာ်ဝဲဘၣ်လီၤ. (၂ ပ့းတရူး ၃:၃, ၄; ယူဒၤ ၁၈) ပှၤလၢအအိၣ်မူ လၢပျၢၤတဖၣ်န့ၣ် ခီဖျိလၢ အတပာ်လုၢ်ပာ်ပှ့ၤ တၢ်မ့ၢ်တၢ်တီဘၣ်အဃိ အဝဲသ့ၣ် ထံၣ်ဘၣ်တၢ်လီၤလး သနာ်က့ အဝဲသ့ၣ် တအိၣ်ဒီးတၢ်နာ် ကိးဂၤဒဲးဘၣ်. (၄ မိၤၡ့ ၁၄:၁၁; ယိၤဟၣ် ၁၂:၃၇) ကစၢ်ယွၤအသးစီဆှံ ကမၤစၢၤထဲပှၤလၢ အပာ်လုၢ်ပာ်ပှ့ၤ တၢ်မ့ၢ်တၢ်တီတဖၣ် ဒ်သိးအဝဲသ့ၣ် ကအိၣ်ဒီးတၢ်နာ်အဂီၢ်လီၤ.—ကလၤတံ ၅:၂၂; ၂ သ့းစၤလနံ ၂:၁၀, ၁၁.
စီၤဒၤဝံး မၤဂၢၢ်ကျၢၤထီၣ်အတၢ်နာ် ဒ်လဲၣ်
စီၤဒၤဝံးမ့ၢ် ပှၤလၢအတၢ်နာ်ဂၢၢ်ကျၢၤ တဂၤလီၤ. (ဧ့ၤဘြံၤ ၁၁:၃၂, ၃၃) ဘၣ်ဆၣ် စီၤဒၤဝံး အဟံၣ်ဖိဃီဖိန့ၣ် တအိၣ်ဒီး တၢ်နာ်ကိးဂၤဒဲးဘၣ်. အဒိ ဆိကမိၣ်ကွၢ် စီၤဒၤဝံးအကၠီလၢ အဒိၣ်ကတၢၢ် စီၤအ့လံအာ် အဂ့ၢ်န့ၣ်တက့ၢ်. ဖဲစီၤကၤလယး ထီဒုၣ်ထီဒါ ပှၤအံၣ်စရ့လးဖိတဖၣ်အခါ စီၤဒၤဝံး အသးတမုာ်ဘၣ်. ဖဲန့ၣ်အဆၢကတီၢ် ခီဖျိလၢ စီၤဒၤဝံးအကၠီ စီၤအ့လံအာ် ပာ်ဒ့ၣ်ပာ်ကမၣ်အီၤအဃိ အဝဲပာ်ဖျါထီၣ်ဝဲလၢ အတၢ်နာ်တအိၣ်ဘၣ်. (၁ ၡမူၤအ့လး ၁၇:၂၆-၂၈) ပှၤတအိၣ်ဖျဲၣ်ထီၣ်ဃုာ်ဒီး တၢ်နာ်ဒီး တန့ၢ်သါဘၣ် တၢ်နာ်လၢ မိၢ်ပၢ်အအိၣ်နီတဂၤဘၣ်. လၢတၢ်န့ၣ်အဃိ စီၤဒၤဝံးအတၢ်နာ်န့ၣ် ဟဲကဲထီၣ်အသးခီဖျိလၢ အတၢ်ရ့လိာ်သးဒီး ကစၢ်ယွၤအဃိလီၤ.
ဖဲ စံးထီၣ်ပတြၢၤ အဆၢဒိၣ် ၂၇ အပူၤန့ၣ် စီၤဒၤဝံး ပာ်ဖျါထီၣ်ဝဲလၢ အတၢ်နာ်ဟဲဂၢၢ်ကျၢၤထီၣ် လၢကျဲဒ်လဲၣ်န့ၣ်လီၤ. (အဆၢဖိ ၁) စီၤဒၤဝံး ဆိကမိၣ်ထံ အတၢ်လဲၤခီဖျိ လၢအပူၤကွံာ်တဖၣ် ဒီးယဟိဝၤယွၤ မၤစၢၤအီၤဒ်သိး အကလဲၤခီဖျိ အတၢ်ကီတၢ်ခဲတဖၣ် ဒ်လဲၣ်န့ၣ်လီၤ. (အဆၢဖိ ၂, ၃) အဝဲပာ်လုၢ်ပာ်ပှ့ၤဝဲ ဒဲစီဆှံလီၤ. (အဆၢဖိ ၄) စီၤဒၤဝံး ဘူၣ်ထီၣ်ဘါထီၣ်တၢ် ဒီးပှၤလၢအစူၢ်တၢ်နာ်တၢ် ဒ်သိးဒီးအီၤ ဖဲဒဲစီဆှံလီၤ. (အဆၢဖိ ၆) အဝဲ ဃ့ဘါထုကဖၣ်တၢ် ဆူယဟိဝၤယွၤအအိၣ် လၢတၢ်သူၣ်ဆူၣ်သးဆူၣ်အပူၤလီၤ. (အဆၢဖိ ၇, ၈) အဝဲအဲၣ်ဒိး လၢကစၢ်ယွၤ ကဟံးစုနဲၣ်ကျဲအီၤလီၤ. (အဆၢဖိ ၁၁) တၢ်နာ်န့ၣ် မ့ၢ်တၢ်လၢ အရ့ဒိၣ်ဒိၣ်မး လၢစီၤဒၤဝံးအဂီၢ်အဃိ အဝဲတဲဝဲလၢ “ယမ့ၢ်တနာ်ဘၣ် . . . ဒီး, ယအိၣ်တကဲဘၣ်” လီၤ.—အဆၢဖိ ၁၃.
နမၤဂၢၢ်ကျၢၤထီၣ် နတၢ်နာ် ကသ့ဒ်လဲၣ်
နမ့ၢ်အိၣ်ဒီး တၢ်ပာ်သူၣ်ပာ်သး ဒီးလုၢ်လၢ်သကဲာ်ပဝးလၢ ဘၣ်တၢ်ပာ်ဖျါထီၣ်အီၤဖဲ စံးထီၣ်ပတြၢၤ ၂၇ န့ၣ်နအိၣ်ဒီးတၢ်နာ် ဒ်စီၤဒၤဝံးအသိး သ့ဝဲလီၤ. တၢ်နာ်န့ၣ် ဒိးသန့ၤထီၣ်အသးလၢ တၢ်သ့ၣ်ညါ လီၤတံၢ်လီၤဆဲးအဃိ နမ့ၢ်မၤလိ လံာ်စီဆှံ ဒီးလံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံန့ၣ် ကညီလၢ နကမၤအါထီၣ် တၢ်ဂ့ၤတၢ်ဝါလၢ အဟဲခီဖျိလၢ ကစၢ်ယွၤ အသးစီဆှံအံၤန့ၣ်လီၤ. (စံးထီၣ်ပတြၢၤ ၁:၂, ၃) ဖဲနမၤလိတၢ်အခါ ဟံးန့ၢ်တၢ်ဆၢကတီၢ် လၢနကဆိကမိၣ်ထံတၢ် အဂီၢ်န့ၣ်တက့ၢ်. နမ့ၢ်ဆိကမိၣ်ထံ တၢ်လၢနမၤလိဘၣ်အီၤတဖၣ်န့ၣ် နတၢ်စံးဘျုးစံးဖှိၣ် ယဟိဝၤယွၤ ကဒိၣ်ထီၣ်လီၤ. နတၢ်စံးဘျုးစံးဖှိၣ် ယဟိဝၤယွၤ မ့ၢ်ဒိၣ်ထီၣ်န့ၣ် နကအဲၣ်ဒိး ပာ်ဖျါထီၣ်နတၢ်နာ် ခီဖျိနလဲၤဘူၣ်ထီၣ်ဘါထီၣ်အီၤလၢ တၢ်အိၣ်ဖှိၣ်ရိဖှိၣ် ဒီးစံၣ်တဲၤတဲလီၤ ပှၤဂၤလၢ နတၢ်မုၢ်လၢ်အဂ့ၢ်န့ၣ်လီၤ. (ဧ့ၤဘြံၤ ၁၀:၂၃-၂၅) ဒီးပမ့ၢ်ဆဲး “ဘါထုကဖၣ်တၢ်” ဒီးပမ့ၢ် “တလီၤဘှါ” ဘၣ်န့ၣ် မ့ၢ်ဒၣ်ပပာ်ဖျါထီၣ်လၢ ပအိၣ်ဒီးတၢ်နာ်လီၤ. (လူၤကၣ် ၁၈:၁-၈) လၢတၢ်န့ၣ်အဃိ “ဘါထုကဖၣ်တၢ်” ဆူယဟိဝၤယွၤအအိၣ် “တထံၣ်ဃီ” ဒီးနာ်လၢ ‘အသးအိၣ်နၤ’ န့ၣ်တက့ၢ်. (၁ သ့းစၤလနံ ၅:၁၇; ၁ ပ့းတရူး ၅:၇) တၢ်နာ်ကမၤစၢၤပှၤ ဒ်သိးပကမၤတၢ်လၢအဘၣ် ဒီးဖဲပမၤတၢ်အဘၣ်အခါ ပတၢ်နာ် ကဂၢၢ်ကျၢၤထီၣ်ဝဲလီၤ.—ယၤကိာ် ၂:၂၂.
ပာ်ဖျါထီၣ် နတၢ်နာ်ယ့ၣ်ၡူး
ဖဲယ့ၣ်ၡူး တချုးသံအဟါန့ၣ် အဝဲတဲဝဲ အပျဲၢ်အဘီၣ်တဖၣ်လၢ “စူၢ်က့ၤနာ်က့ၤယွၤဒီး စူၢ်က့ၤနာ်က့ၤယၤ စ့ၢ်ကီးတက့ၢ်.” (ယိၤဟၣ် ၁၄:၁) အဃိ ပကဘၣ်ပာ်ဖျါထီၣ် ပတၢ်နာ်လၢ ယဟိဝၤယွၤအဖီခိၣ် တကးဒံးဘၣ် ပကဘၣ်ပာ်ဖျါထီၣ် ပတၢ်နာ်လၢ ယ့ၣ်ၡူးအဖီခိၣ်လီၤ. ပပာ်ဖျါထီၣ် ပတၢ်နာ် လၢယ့ၣ်ၡူးအဖီခိၣ် ကသ့ဒ်လဲၣ်. ပကဆိကမိၣ်ကွၢ် တၢ်ဂ့ၢ်သၢမံၤလီၤ.
ပကဘၣ် ပာ်ဖျါထီၣ် တၢ်နာ်ယ့ၣ်ၡူးန့ၣ် အဲၣ်ဒိးတဲဝဲ တၢ်မနုၤလဲၣ်.
တၢ်ဂ့ၢ်အဆိကတၢၢ်တမံၤန့ၣ် တၢ်ပှ့ၤက့ၤန့ၣ် ထံၣ်အီၤဒ် တၢ်ဟ့ၣ်လၢ ယဟိဝၤယွၤ ဟ့ၣ်နၤန့ၣ်တက့ၢ်. တၢ်မၢဖိပီလူး တဲဝဲလၢ “ယမူလၢ တၢ်နာ်ဘၣ်ဃးဒီး ယွၤအဖိခွါတဂၤ, လၢအအဲၣ်ယၤ ဒီးဟ့ၣ်လီၤကွံာ်အသး လၢယဂီၢ်လီၤ.” (ကလၤတံ ၂:၂၀) နမ့ၢ်ပာ်ဖျါထီၣ် နတၢ်နာ် လၢယ့ၣ်ၡူးအဖီခိၣ်န့ၣ် နကနာ်လၢ တၢ်ပှ့ၤက့ၤန့ၣ် အမၤစၢၤနၤ ဒ်သိးနတၢ်ဒဲးဘး ကဘၣ်တၢ်ပျၢ်ကွံာ်အီၤ ဒီးဟ့ၣ်နၤတၢ်မုၢ်လၢ် လၢနကအိၣ်မူဘၣ် လီၤထူလီၤယိာ် တကးဒံးဘၣ် မ့ၢ်ဝဲတၢ်အုၣ်အသး အဒိၣ်ကတၢၢ်တခါလၢ ကစၢ်ယွၤ အဲၣ်နၤန့ၣ်လီၤ. (ရိမ့ၤ ၈:၃၂, ၃၈, ၃၉; အ့းဖ့းစူး ၁:၇) နမ့ၢ်နာ်တၢ်ပှ့ၤက့ၤ သပှၢ်ကတၢၢ်န့ၣ် ကမၤစၢၤနၤလၢ နကမၤလီၤမၢ်ကွံာ် နတၢ်တူၢ်ဘၣ်လၢအတဂ့ၤ လၢနနီၢ်ကစၢ်အဖီခိၣ် အဂီၢ်လီၤ.—၂ သ့းစၤလနံ ၂:၁၆, ၁၇.
တၢ်ဂ့ၢ်ခံမံၤတမံၤန့ၣ် ဃ့ထုကဖၣ် ဒီးသုးဘူးနသး ဆူယဟိဝၤယွၤအအိၣ် ခီဖျိလၢ ယ့ၣ်ၡူးအတၢ်ပှ့ၤက့ၤ အဃိန့ၣ်တက့ၢ်. ခီဖျိလၢတၢ်ပှ့ၤက့ၤအဃိ ပဃ့ထုကဖၣ်လၢ ယဟိဝၤယွၤအအိၣ်လၢ “ပသးခူတလ့ၢ် [“တၢ်သဘျ့,” NWT]” အပူၤ ဒ်သိးပက “ဒိးန့ၢ်တၢ်သးကညီၤ, ဒီးထံၣ်န့ၢ်တၢ်ဘျုးတၢ်ဖှိၣ် ဖဲတၢ်မၤစၢၤ အဆၢအကတီၢ်အပူၤ” သ့လီၤ. (ဧ့ၤဘြံၤ ၄:၁၅, ၁၆; ၁၀:၁၉-၂၂) တၢ်ထုကဖၣ် ကမၤစၢၤပှၤဒ်သိး ပကပာ်လီၤပသး ဂၢၢ်ဂၢၢ်ကျၢၤကျၢၤ လၢပကတြီဆၢကွံာ် တၢ်လ့ပစီ လၢပကမၤတၢ်ဒဲးဘး အဂီၢ်န့ၣ်လီၤ.—လူၤကၣ် ၂၂:၄၀.
တၢ်ဂ့ၢ်သၢမံၤတမံၤန့ၣ် ဒိကနၣ် ယ့ၣ်ၡူးအကလုၢ်တက့ၢ်. တၢ်မၢဖိယိၤဟၣ် တဲဝဲလၢ “ပှၤလၢအစူၢ်က့ၤနာ်က့ၤ ဖိခွါန့ၣ်, အိၣ်ဒီးတၢ်မူအထူအယိာ်လီၤ. မ့မ့ၢ်ပှၤလၢ အတစူၢ်တနာ် [“တဒိကနၣ်,” NWT] ဘၣ်န့ၣ်, တထံၣ်ဘၣ်တၢ်မူဘၣ်. မ့ၢ်ယွၤအတၢ်သးဒိၣ်န့ၣ် အိၣ်ဝဲဆိးဝဲလၢ အလိၤလီၤ.” (ယိၤဟၣ် ၃:၃၆) ပာ်သူၣ်ပာ်သးလၢ စီၤယိၤဟၣ် ကွဲးဝဲလၢ တၢ်နာ်ဒီးတၢ်တဒိကနၣ်တၢ်န့ၣ် လီၤဆီလိာ်အသး ဒ်လဲၣ်န့ၣ်တက့ၢ်. ပမ့ၢ်ဒိကနၣ်ယ့ၣ်ၡူးန့ၣ် မ့ၢ်ဒၣ်ပပာ်ဖျါထီၣ်လၢ ပနာ်အီၤလီၤ. ဒီးနဒိကနၣ်ယ့ၣ်ၡူးအကလုၢ် ခီဖျိနမၤထွဲ “ခရံာ်အတၢ်သိၣ်တၢ်သီ” လၢအမ့ၢ် တၢ်ခဲလၢာ်လၢ အဝဲသိၣ်လိဝဲ ဒီးမၤလိာ်ဝဲတဖၣ်န့ၣ်လီၤ. (ကလၤတံ ၆:၂) နဒိကနၣ်ယ့ၣ်ၡူးသ့ ခီဖျိလၢနမၤထွဲ တၢ်ဟံးစုနဲၣ်ကျဲ လၢအဟ့ၣ်ဝဲ ခီဖျိလၢ “အကုၢ်အပှၤလၢ အကလုၢ်တီ, ဒီးအကူၣ်တၢ်သ့” အအိၣ်စ့ၢ်ကီးလီၤ. (မးသဲ ၂၄:၄၅) ဒီးမ့ၢ်လၢ နဒိကနၣ်ယ့ၣ်ၡူး အကလုၢ်အဃိ နကအိၣ်ဒီး တၢ်ဂံၢ်တၢ်ဘါလၢ နကလဲၤခီဖျိ တၢ်ကီတၢ်ခဲလၢ အလီၤဂာ်ဒ် ကလံၤမုၢ်တဖၣ်အသိးန့ၣ်လီၤ.—လူၤကၣ် ၆:၄၇, ၄၈.
“သူၣ်လီၤသုသးလၢ သုတၢ်နာ်စီဆှံကတၢၢ်အဖီခိၣ်”
ဘၣ်တဘျီ ပိာ်ခွါတဂၤ တဲယ့ၣ်ၡူးလၢ “ယနာ်လီၤ, ယတၢ်တနာ်ဘၣ်အံၤ မၤစၢၤလၢ်တက့ၢ်.” (မၢ်ကူး ၉:၂၄) ပှၤတဂၤအံၤ အတၢ်နာ်အိၣ်တစဲး ဘၣ်ဆၣ် အဝဲသ့ၣ်ညါဝဲလၢ အကဘၣ်မၤဒိၣ်ထီၣ် အတၢ်နာ်လီၤ. ဒ်ပှၤတဂၤအံၤအသိး ပဝဲခဲလၢာ်န့ၣ် ပကထံၣ်ဘၣ်ဒီး တၢ်အိၣ်သးလၢ ပလိၣ်ဘၣ်အါထီၣ် တၢ်နာ်န့ၣ်လီၤ. ဒီးခဲအံၤန့ၣ် ပမၤဂၢၢ်ကျၢၤထီၣ် ပတၢ်နာ် သ့စ့ၢ်ကီးလီၤ. ဖဲပဖးကစၢ်ယွၤ အကလုၢ်ကထါ ဒီးဆိကမိၣ်ထံအီၤအခါ ပတၢ်နာ်ဂၢၢ်ကျၢၤထီၣ် ဒီးပတၢ်စံးဘျုးစံးဖှိၣ် ယဟိဝၤယွၤ အါထီၣ်ဝဲလီၤ. ပမ့ၢ်ဘူၣ်ထီၣ်ဘါထီၣ် ယဟိဝၤယွၤ ဃုာ်ဒီးပဒီပုၢ်ဝဲၢ်မုၣ်ခွါတဖၣ်, တဲဘၣ်ပှၤဂၤလၢ ပတၢ်မုၢ်လၢ် ဒီးဃ့ထုကဖၣ်တၢ်ဆူၣ်ဆူၣ်န့ၣ် ပတၢ်နာ် ကဂၢၢ်ကျၢၤဒိၣ်ထီၣ်ဝဲလီၤ. ကစၢ်ယွၤ အကလုၢ်ကထါ ဟ့ၣ်ဂံၢ်ဟ့ၣ်ဘါပှၤလၢ “ပှၤလၢတၢ်အဲၣ်အီၤ သုဝဲသ့ၣ်ဧၢ, သူၣ်လီၤသုသးလၢ သုတၢ်နာ်စီဆှံကတၢၢ်အဖီခိၣ်, ဒီး . . . ဟံးဃာ်သုသးလၢ ယွၤအတၢ်အဲၣ်တၢ်ကွံအပူၤ” လီၤ. လၢတၢ်န့ၣ်အဃိ ပမ့ၢ်မၤဒိၣ်ထီၣ်ပတၢ်နာ်န့ၣ် ပကဒိးန့ၢ်ဘၣ် တၢ်ဆိၣ်ဂ့ၤအဒိၣ်ကတၢၢ်တခါ လၢအမ့ၢ် ပကအိၣ်ကဆိးလၢ ယွၤအတၢ်အဲၣ်တၢ်ကွံအပူၤလီၤ.—ယူဒၤ ၂၀, ၂၁.