တၢ်မၤလိ ၈၂
ယ့ၣ်ၡူးသိၣ်လိအပျဲၢ်အဘီၣ်တဖၣ် ဘၣ်ဃးဒီးတၢ်ထုကဖၣ်အဂ့ၢ်
တၢ်လၢပှၤဖၤရံၤၡဲ မၤဝဲကိးမံၤန့ၣ် အဝဲသ့ၣ် မၤဝဲဒ်သိး ပှၤဂၤကထံၣ်ဒိၣ် အဝဲသ့ၣ်အဂီၢ်. ဒီးအဝဲသ့ၣ် မ့ၢ်မၤတၢ်လၢအဂ့ၤ တမံၤမံၤန့ၣ် အဲၣ်ဒိးဝဲလၢ ပှၤဂၤထံၣ်ဝဲ. အဝဲသ့ၣ် ဃ့ထုကဖၣ်တၢ်လၢ ကမျၢၢ်အမဲာ်ညါဒ်သိး ပှၤကိးဂၤဒဲး ကထံၣ်ဝဲအဂီၢ်. ပှၤဖၤရံၤၡဲတဖၣ် တိၢ်ရူးဃာ်ဝဲ တၢ်ထုကဖၣ် ဒီးဖဲအဝဲသ့ၣ် ဃ့ထုကဖၣ်တၢ်လၢ ဘူၣ်ဘျီၣ်ပူၤ ဒီးလၢကျဲဖီခိၣ်အခါ တဲဝံၤတဲက့ၤဝဲ အတၢ်ကတိၤ ဒ်သိး ပှၤဂၤကနၢ်ဟူဝဲအဂီၢ်. အဃိ ယ့ၣ်ၡူး အတၢ်ကတိၤန့ၣ် ဒုးကမၢကမၣ်ဝဲ ပှၤကမျၢၢ်တဖၣ်. ယ့ၣ်ၡူး တဲဝဲလၢ ‘တဘၣ်ဃ့ထုကဖၣ်တၢ် ဒ်ပှၤဖၤရံၤၡဲတဖၣ်အသိးတဂ့ၤ. အဝဲသ့ၣ် ဆိကမိၣ်ဝဲလၢ ကစၢ်ယွၤ ဘၣ်သူၣ်ဘၣ်သး အဝဲသ့ၣ် အတၢ်ကတိၤ. ဘၣ်ဆၣ် ကစၢ်ယွၤ တဘၣ်သူၣ်ဘၣ်သးဝဲဘၣ်. တၢ်ဃ့ထုကဖၣ်န့ၣ် မ့ၢ်ဝဲလၢ နၤဒီးယဟိဝၤယွၤ ခံဂၤအဘၢၣ်စၢၤ. အဃိ ဖဲနဃ့ထုကဖၣ်တၢ်အခါ တဘၣ် တဲဝံၤတဲက့ၤတၢ်တဂ့ၤ. ယဟိဝၤယွၤ အဲၣ်ဒိးလၢ နကတဲဖျါထီၣ် တၢ်အိၣ်လၢနသးပူၤ.
‘နကဘၣ်ဃ့ထုကဖၣ် တၢ်ဒ်အံၤ “ပပၢ်အိၣ်လၢမူခိၣ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်. နဘီနမုၢ်န့ၣ် မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး ဒ်နတၢ်ဘၣ်သး အိၣ်ဝဲအသိးတက့ၢ်.”’ ယ့ၣ်ၡူး တဲစ့ၢ်ကီးဝဲလၢ အဝဲသ့ၣ် ကဘၣ်ဃ့ထုကဖၣ်တၢ် ဘၣ်ဃးဒီး တၢ်အီၣ်လၢ တနံၤအဂီၢ် တနံၤအဂီၢ်, လၢအတၢ်ဒဲးဘးကပျၢ် ဒီးလၢအနီၢ်ကစၢ် တၢ်လိၣ်ဘၣ် အဂၤတဖၣ်အဂီၢ်.
ယ့ၣ်ၡူး ဆဲးတဲဝဲလၢ ‘ဃ့ထုကဖၣ်တၢ် ထီဘိ. ဆဲးဃ့တၢ်လၢ နပၢ်ယဟိဝၤယွၤအအိၣ် ဒ်သိး အကဟ့ၣ်လီၤနၤ တၢ်လၢအဂ့ၤ. မိၢ်ပၢ်တဖၣ်န့ၣ် အဲၣ်ဒိးဟ့ၣ်လီၤဝဲ တၢ်အဂ့ၤလၢ အဖိတဖၣ်အအိၣ်. နဖိ မ့ၢ်ဃ့အီၣ်ကိၣ်န့ၣ် နကဟ့ၣ်လီၤအီၤလၢ လၢၢ်တဖျၢၣ်ဧါ. ဒီးအဝဲသ့ၣ် မ့ၢ်ဃ့နၤလၢ ညၣ်တဘ့ၣ်န့ၣ် နကဟ့ၣ်လီၤအီၤလၢ ဂုၢ်တဘိဧါ.’
ဝံၤဒီး ယ့ၣ်ၡူး တဲနၢ်ပၢၢ် အဝဲသ့ၣ်လၢ ‘သုမ့ၢ်သးအိၣ်ဟ့ၣ် သုဖိတၢ်ဟ့ၣ်လၢအဂ့ၤန့ၣ် သုပၢ်ယဟိဝၤယွၤ သးအိၣ်ဟ့ၣ်သုလၢ သးစီဆှံအါန့ၢ်အန့ၣ်. အဃိ ဃ့အီၤလၢ အကဟ့ၣ်နၤ သးစီဆှံ.’ နၤမီၤ နမၤထွဲ ယ့ၣ်ၡူး အတၢ်ဟ့ၣ်ကူၣ်ဧါ. ဖဲနဃ့ထုကဖၣ်တၢ်အခါ နဃ့ဘၣ်ဃးဒီး တၢ်ဂ့ၢ်မနုၤလဲၣ်.
“ဆဲးဃ့တၢ် ဒီးတၢ်ကဟ့ၣ်လီၤသုလီၤ. ဆဲးဃုတၢ် ဒီးသုကထံၣ်န့ၢ်တၢ်လီၤ. ဆဲးဒိတကျိာ်တၢ် ဒီးတၢ်ကအိးထီၣ်န့ၢ်သုလီၤ.”—မးသဲ ၇:၇