ပှၤဖးလံာ်ဖိတဖၣ် အတၢ်သံကွၢ်
ဖဲ စံးထီၣ်ပတြၢၤ ၆၁:၈ န့ၣ်စီၤဒၤဝံး တဲဝဲလၢ အကစံးထီၣ်ပတြၢၤ ကစၢ်ယွၤအမံၤ “လီၤထူလီၤယိာ်.” အတဲဝဲကၠဲအံၤအဃိ အဆိမိၣ်ဝဲလၢ အတသံ နီတဘျီဘၣ်ဟီဧါ.
▪ စီၤဒၤဝံး တဘၣ်သးတဲဝဲကၠဲန့ၣ်ဘၣ် ဒီးတၢ်လၢအကွဲးဝဲန့ၣ် အကဲတၢ်မ့ၢ်တၢ်တီ.
ပကကွၢ်သကီး တၢ်လၢ စီၤဒၤဝံးကွဲးဝဲဖဲ အဆၢဖိတဆၢန့ၣ် ဒီးအဆၢဖိလၢ အလီၤဂာ်လိာ်သးတနီၤ. စီၤဒၤဝံး ကွဲးဝဲလၢ “ဖဲယမၤလၢပှဲၤထီၣ် ယတၢ်အၢၣ်လီၤတဖၣ် တနံၤဘၣ်တနံၤအခါ ယကသးဝံၣ် စံးထီၣ်ပတြၢၤနမံၤ လီၤထူလီၤယိာ်.” “အိ ယကစၢ် ယဟိဝၤယွၤဧၢ, ယစံးထီၣ်ပတြၢၤနၤ လၢယသးဒီဖျၢၣ်ညါ ဒီးယကမၤလၤကပီၤ နမံၤလီၤထူလီၤယိာ်.” “ယကစံးထီၣ်ပတြၢၤနမံၤ လီၤထူလီၤယိာ်.”—စံးထီၣ်ပတြၢၤ ၆၁:၈; ၈၆:၁၂; ၁၄၅:၁, ၂.
ဖဲစီၤဒၤဝံး ကွဲးဝဲတၢ်ကတိၤ တဖၣ်အံၤခါန့ၣ် အတတဲပိၣ်တၢ်ဘၣ်. စီၤဒၤဝံး သ့ၣ်ညါပာ်စၢၤဝဲလၢ ပှၤဟီၣ်ခိၣ်ဖိန့ၣ် မၤတၢ်ဒဲးဘးအဃိ အဝဲသ့ၣ် ကဘၣ်သံ ဒီးစီၤဒၤဝံး သ့ၣ်ညါလီၤအသးလၢ အကဲပှၤတၢ်ဒဲးဘးဖိ အဃိအဘၣ်သံကၠ့ၤ. (၁ မိၤၡ့ ၃:၃, ၁၇-၁၉; စံးထီၣ်ပတြၢၤ ၅၁:၄, ၅) စီၤဒၤဝံး သ့ၣ်ညါဝဲလၢ ပှၤတီပှၤလိၤ ဒ်သိးဒီး စီၤအၤဘြၤဟၣ်, စီၤအံၤစဲး ဒီးစီၤယၤကိာ်နာ်က့ ဘၣ်သံကၠ့ၤ. အဃိ အသ့ၣ်ညါလၢ ခါဆူညါန့ၣ် အကဘၣ်သံ. (စံးထီၣ်ပတြၢၤ ၃၇:၂၅; ၃၉:၄) နာ်က့ တၢ်လၢ စီၤဒၤဝံးတဲဝဲ ဖဲစံးထီၣ်ပတြၢၤ ၆၁:၈ န့ၣ်ပာ်ဖျါထီၣ်ဝဲလၢ ဖဲအအိၣ်မူဒံး အဆၢကတီၢ်န့ၣ် အဘၣ်သး စံးထီၣ်ပတြၢၤ ကစၢ်ယွၤ လီၤထူလီၤယိာ်.—၂ ၡမူၤအ့လး ၇:၁၂.
ပမ့ၢ်ကွၢ် တၢ်ကတိၤအိးထီၣ်လၢ စံးထီၣ်ပတြၢၤ အဆၢဒိၣ် ၁၈, ၅၁, ၅၂ န့ၣ်ပသ့ၣ်ညါဘၣ်လၢ စီၤဒၤဝံး ကွဲးဝဲဘၣ်ဃးဒီး အတၢ်လဲၤခီဖျိတနီၤ. ဒီးဖဲစံးထီၣ်ပတြၢၤ အဆၢဒိၣ် ၂၃ န့ၣ်စီၤဒၤဝံး တဲဝဲလၢ ယဟိဝၤယွၤန့ၣ် အလီၤဂာ်ဒ်သိးဒီး ပှၤကွၢ်သိတဂၤလၢ အကဟုကယာ်, ဒုးအီၣ်ဒုးအီ ဒီးဒီသဒၢအသိ. စီၤဒၤဝံးစ့ၢ်ကီး အကဲပှၤကွၢ်သိ ဒီးအဘၣ်သး စံးထီၣ်ပတြၢၤ ကစၢ်ယွၤလၢ ‘အတၢ်အိၣ်မူ ဒီတစိၤညါ.’—စံးထီၣ်ပတြၢၤ ၂၃:၆.
ပကဘၣ်နီၣ်ဘၣ်လၢ တၢ်လၢစီၤဒၤဝံးကွဲးဝဲ ခဲလၢာ်န့ၣ် ယဟိဝၤယွၤ မၢအကွဲးဝဲ. စီၤဒၤဝံး ကွဲးစ့ၢ်ကီးဝဲ ဝံအတၢ်စံးပာ် လၢကလၢပှဲၤထီၣ် လၢခါဆူညါ. အဒိ ဖဲစံးထီၣ်ပတြၢၤ အဆၢဒိၣ် ၁၁၀ န့ၣ်စီၤဒၤဝံး ကွဲးဝဲဘၣ်ဃးဒီး ယ့ၣ်ၡူး ကန့ၢ်ဘၣ် တၢ်စိကမီၤ ဒီးက “ဆ့ၣ်နီၤလၢ [ကစၢ်ယွၤ] စုထွဲ” လၢမူခိၣ်. ယ့ၣ်ၡူး ကမၤနၢၤကွံာ် ကစၢ်ယွၤ အဒုၣ်ဒါဒီး “ကစံၣ်ညီၣ် ပှၤကလုာ်တဖၣ်” လၢဟီၣ်ခိၣ်ချၢ. ပသ့ၣ်ညါဘၣ်လၢ ယ့ၣ်ၡူး လၢအမ့ၢ် မ့းၡံအၤန့ၣ် အဟဲလီၤစၢၤလၢ စီၤဒၤဝံး. အကအိၣ်လၢမူခိၣ် ဒီးကပၢစိတၢ် လၢဟီၣ်ခိၣ်ချၢ ဒီးအကကဲ “ပှၤလုၢ်တၢ်ဒိၣ် . . . လီၤထူလီၤယိာ်.” (စံးထီၣ်ပတြၢၤ ၁၁၀:၁-၆) ယ့ၣ်ၡူး တဲဝဲလၢ ဝံအတၢ်စံးပာ် ဖဲစံးထီၣ်ပတြၢၤ အဆၢဒိၣ် ၁၁၀ န့ၣ်အဘၣ်ဃးဒီးအီၤ ဒီးဝံအတၢ်စံးပာ်အံၤ ကလၢပှဲၤထီၣ် လၢခါဆူညါ.—မးသဲ ၂၂:၄၁-၄၅.
ယဟိဝၤယွၤ မၢစီၤဒၤဝံး ကွဲးဘၣ်ဃးဒီး တၢ်ကဲထီၣ်သး ဖဲအအိၣ်မူဒံး အဆၢကတီၢ် ဒီးတၢ်လၢ ကကဲထီၣ်သး လၢခါဆူညါ ဖဲအကဂဲၤဆၢထၢၣ်သမူထီၣ်က့ၤ ဒီးအကစံးထီၣ်ပတြၢၤဘၣ် ယဟိဝၤယွၤ လီၤထူလီၤယိာ်. အဃိ ပသ့ၣ်ညါဘၣ်လၢ စံးထီၣ်ပတြၢၤ ၃၇:၁၀, ၁၁, ၂၉ န့ၣ်လၢညါ အလၢပှဲၤထီၣ် လၢကီၢ်အံၣ်စရ့လံ ဒီးခါဆူညါ ဖဲကစၢ်ယွၤ မၤလၢပှဲၤထီၣ် အတၢ်အၢၣ်လီၤခါန့ၣ် အကလၢပှဲၤထီၣ်ဒံး.—ကွၢ်လံာ်အဆၢ ၈ လၢတၢ်မၤလိ လၢအခိၣ်တီမ့ၢ်ဝဲ “နကအိၣ်ဒီးယၤလၢ ပၤရဒံစူးအပူၤ” လၢလံာ်တဘ့ၣ်အံၤအပူၤ.
ပထံၣ်ဘၣ်လၢ စံးထီၣ်ပတြၢၤ ၆၁:၈ ဒီးအဆၢဖိလၢ အလီၤဂာ်လိာ်သးန့ၣ် ပာ်ဖျါထီၣ်ဝဲလၢ ဖဲစီၤဒၤဝံး အိၣ်မူအဆၢကတီၢ်န့ၣ် အဘၣ်သး စံးထီၣ်ပတြၢၤ ယဟိဝၤယွၤ ထီဘိ. တကးဒံးဘၣ် လံာ်စီဆှံအဆၢတဖၣ်အံၤ ပာ်ဖျါထီၣ်စ့ၢ်ကီးလၢ ခါဆူညါ ဖဲယဟိဝၤယွၤ မၤသမူထီၣ်က့ၤ စီၤဒၤဝံးခါန့ၣ် စီၤဒၤဝံး ကဆဲးစံးထီၣ်ပတြၢၤ ယဟိဝၤယွၤ.