ပှၤဖးလံာ်ဖိတဖၣ် အတၢ်သံကွၢ်

တၢ်စံၣ်တဲၤတဲလီၤ တၢ်သးခုကစီၣ် အတၢ်မၤ ကကတၢၢ်ကွံာ် လၢအခါဖဲလဲၣ်

ယ့ၣ်ၡူး တဲဝဲလၢ “ဘီမုၢ်တၢ်သးခုကစီၣ်န့ၣ် ကဘၣ် တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ ဒ်သိး ကကဲထီၣ် တၢ်အုၣ်အသးလၢ ပှၤကလုာ်ခဲလၢာ် အဂီၢ်လီၤ. ဝံၤဒီး တၢ်အကတၢၢ်န့ၣ် ကတုၤဝဲလီၤ.” (မး ၂၄:၁၄) ကြံးအတၢ်ကတိၤလၢ လံာ်စီဆှံတဆၢအံၤ ဒီးအဆၢဖိ ၆ န့ၣ် ပှၤကွဲးကျိာ်ထံက့ၤလၢ “တၢ်အကတၢၢ်” လၢအဲၣ်ဒိးတဲဝဲ မုၣ်ကီၤလံၢ် အတၢ်ရဲၣ်တၢ်ကျဲၤလၢ အကကတၢၢ်ကွံာ်ဝဲ ဖဲအၢ်မက့းဒိၣ် အဆၢကတီၢ်. (လီၣ် ၁၆:၁၄, ၁၆) အဃိ တချုးလၢ တၢ်အကတၢၢ် တုၤဒံးဘၣ်န့ၣ် ပကဆဲးစံၣ်တဲၤတဲလီၤဒံး ဘီမုၢ်တၢ်သးခုကစီၣ်. တၢ်ဂ့ၢ်အံၤ အကဲဝဲ တၢ်နၢ်ပၢၢ်အသီလၢ ပမၤဘၣ်ထီၣ်က့ၤအီၤ.

လၢညါန့ၣ် ပနၢ်ပၢၢ်လၢ ဖဲတၢ်နးတၢ်ဖှီၣ်ဖးဒိၣ် လၢအကဲဝဲ တၢ်ဆၢကတီၢ်ဖဲ ပှၤမၤဟးဂီၤ ဘၤဘူၤလိၣ်ဖးဒိၣ် စးထီၣ်သးအခါ ပတစံၣ်တဲၤတဲလီၤ တၢ်သးခုကစီၣ်လၢၤဘၣ်. (လီၣ် ၁၇:၃, ၅, ၁၅, ၁၆) တကးဒံးဘၣ် ပနၢ်ပၢၢ်လၢ ဖဲတၢ်နးတၢ်ဖှီၣ်ဖးဒိၣ် စးထီၣ်သးအခါ ယဟိဝၤယွၤ တဟ့ၣ်ပှၤဂၤ တၢ်ခွဲးတၢ်ယာ်လၢ အဝဲသ့ၣ် ကနၢ်ဟူဘၣ် တၢ်သးခုကစီၣ်လၢၤဘၣ်. (ၡါ ၆၁:၂) ပဆိကမိၣ်စ့ၢ်ကီးလၢ ဒ်သိး ပှၤကပူၤဖျဲးလၢ တၢ်နးတၢ်ဖှီၣ်ဖးဒိၣ်အဂီၢ် တချုးလၢ တၢ်နးတၢ်ဖှီၣ်ဖးဒိၣ် စးထီၣ်ဒံးဘၣ်န့ၣ် အကဘၣ် ပာ်ဖျါထီၣ်လၢ အတီဒီးယဟိဝၤယွၤလံ. ပဆိကမိၣ်ဒ်န့ၣ် ခီဖျိလၢ ပထိၣ်သတြီၤ ပှၤတဖၣ်န့ၣ် အတၢ်အိၣ်သးဒီး ပှၤယူဒၤဖိ အတၢ်အိၣ်သးဖဲ ချ.ခ.န ၆၀၇ လၢအမ့ၢ် တၢ်ဆၢကတီၢ်ဖဲ ပှၤမၤဟးဂီၤ ဝ့ၢ်ယရူၤၡလ့ၣ်. ပှၤယူဒၤဖိတဖၣ်န့ၣ် ခီဖျိလၢ အဝဲသ့ၣ် ဘူၣ်ထီၣ်ဘါထီၣ် ယဟိဝၤယွၤ ဒီးသးဟ့ တၢ်အၢတၢ်သီအဃိ ပှၤပာ်ပနီၣ်ဃာ် အဝဲသ့ၣ်လၢ အကဲပှၤလၢအပူၤဖျဲး. (ဃ့း ၅:၁၁; ၉:၄) ဘၣ်ဆၣ် တၢ်ဂ့ၢ်ခံခါလၢ ပထိၣ်သတြီၤန့ၣ် တဘၣ်လိာ်သးဒီး ယ့ၣ်ၡူး အတၢ်ကတိၤဖဲ မးသဲ ၂၄:၁၄ ဘၣ်. တၢ်ဂ့ၢ်လၢ ယ့ၣ်ၡူးတဲဝဲန့ၣ် အဲၣ်ဒိးပာ်ဖျါထီၣ်ဝဲလၢ တချုးလၢ တၢ်အကတၢၢ် လၢအမ့ၢ် အၢ်မက့းဒိၣ် စးထီၣ်သးဒံးဘၣ်န့ၣ် ဘၣ်သ့ၣ်သ့ၣ် ပှၤကဒိးန့ၢ်ဘၣ် တၢ်ခွဲးတၢ်ယာ်လၢ ကနၢ်ဟူဘၣ် တၢ်သးခုကစီၣ်ဒံး.

ပတၢ်နၢ်ပၢၢ်လၢ ပမၤဘၣ်ထီၣ်က့ၤအီၤ ဖဲ မးသဲ ၂၄:၁၄ န့ၣ် မၤစၢၤစ့ၢ်ကီးပှၤလၢ ပကမၤဘၣ်ထီၣ်က့ၤ ပတၢ်နၢ်ပၢၢ် ဘၣ်ဃးဒီး တၢ်ကစီၣ်လၢ အလီၤဂာ်ဒ်သိးဒီး သူၣ်ဖးဒိၣ် လၢပဖးဘၣ်အဂ့ၢ်ဖဲ လီၣ်ဖျါ ၁၆:၂၁. ပဃုသ့ၣ်ညါအါထီၣ် တၢ်ဂ့ၢ်ဝံၤအလီၢ်ခံ ပထံၣ်ဘၣ်လၢ လံာ်စီဆှံခံဆၢအံၤ အဘၣ်ထွဲလိာ်သး. ဘၣ်မနုၤအဃိ ပတဲဒ်န့ၣ်လဲၣ်. လံာ်စီဆှံ ပာ်ဖျါထီၣ်န့ၢ်ပှၤ ဘၣ်ဃးဒီး ပှၤလၢအတူၢ်လိာ် ဘီမုၢ်တၢ်ကစီၣ်တဖၣ် အတၢ်ပာ်သူၣ်ပာ်သး. တၢ်မၢဖိပီလူး တဲဝဲလၢ “ပှၤလၢ အကတုၤလၢ တၢ်အုၣ်က့ၤခီၣ်က့ၤ” န့ၣ် အဝဲသ့ၣ်ထံၣ်ဝဲ ဘီမုၢ်တၢ်ကစီၣ် ဒ်တၢ်သးခုကစီၣ် လၢအဒ်သိးဒီး တၢ်နၢလၢအ “လီၤဂာ်ဒ် တၢ်မူအစိ.” မ့မ့ၢ်လၢ ကစၢ်ယွၤ အဒုၣ်အဒါတဖၣ်န့ၣ် အဝဲသ့ၣ်ထံၣ်ဝဲ ဘီမုၢ်တၢ်ကစီၣ် ဒ်တၢ်ကစီၣ်လၢ အတဂ့ၤဘၣ် လၢအဒ်သိးဒီး တၢ်နၢလၢအ “လီၤဂာ်ဒ် တၢ်သံအစိ.” (၂ ကရံၣ် ၂:၁၅, ၁၆) ဘီမုၢ်တၢ်ကစီၣ်န့ၣ် ပာ်ဖျါထီၣ်ဝဲလၢ ဟီၣ်ခိၣ်လၢ မုၣ်ကီၤလံၢ်ပၢဝဲအံၤ ကကတၢၢ်ကွံာ်အဃိ ကစၢ်ယွၤ အဒုၣ်အဒါတဖၣ် သးဟ့ဝဲ တၢ်ကစီၣ်အံၤ.—ယိၤ ၇:၇; ၁ ယိၤ ၂:၁၇; ၅:၁၉.

ပာ်သူၣ်ပာ်သးစ့ၢ်ကီးလၢ သူၣ်ဖးဒိၣ်တဖၣ်လၢ ပဖးဘၣ်ဖဲ လီၣ်ဖျါ ၁၆:၂၁ န့ၣ် ကမၤဟးဂီၤတၢ် “နးဝဲဒိၣ်မး.” ဘၣ်သ့ၣ်သ့ၣ် အဲၣ်ဒိးတဲဝဲလၢ ဖဲတၢ်နးတၢ်ဖှီၣ်ဖးဒိၣ် အဆၢကတီၢ် တၢ်ကစီၣ်လၢပတဲန့ၣ် ကဆူၣ်ထီၣ်ဝဲ. ပမ့ၢ်တဲလၢ အဂၤတမံၤန့ၣ် ပှၤကသ့ၣ်ညါ ယဟိဝၤယွၤအမံၤ အါန့ၢ်ဒံးလၢညါ. (ဃ့း ၃၉:၇) ဖဲပှၤမၤဟးဂီၤ ဘၤဘူၤလိၣ်ဖးဒိၣ် ဝံၤအလီၢ်ခံ ဘၣ်သ့ၣ်သ့ၣ် ပှၤတနီၤ ကဘၣ်သူၣ်ဘၣ်သးဝဲ တၢ်သးခုကစီၣ် ဒီးတၢ်ကစီၣ်န့ၣ် ကလီၤဂာ်ဘၣ် အဝဲသ့ၣ်ဒ် တၢ်နၢမူအစိ. ဘၣ်သ့ၣ်သ့ၣ် အဝဲသ့ၣ် ကသ့ၣ်နီၣ်ထီၣ်က့ၤဝဲ တၢ်ဂ့ၢ်လၢ ယဟိဝၤပှၤအုၣ်အသး စံၣ်တဲၤတဲလီၤဝဲ တဘျုးနံၣ် ဘၣ်ဃးဒီး ဘၤဘူၤလိၣ်ဖးဒိၣ် ကဟးဂီၤအဂ့ၢ် ဒီးအဝဲသ့ၣ် ထံၣ်ဘၣ်ဝဲလၢ အဟဲလၢပှဲၤထီၣ်နီၢ်ကီၢ်.

တၢ်အိၣ်သးအံၤ အလီၤဂာ်ဒ်သိးဒီး တၢ်ကဲထီၣ်သးလၢ ကီၢ်အဲၤကူပတူးအပူၤ ဖဲတၢ်နးတၢ်ဖှီၣ် အခါတဆံ ဝံၤဝဲအလီၢ်ခံ. လၢညါ ဖဲယဟိဝၤယွၤ “စံၣ်ညီၣ် ကီၢ်အဲၤကူပတူး အယွၤခဲလၢာ်” ဝံၤအလီၢ်ခံ “ပှၤအကလုာ်ကလုာ်ဂီၢ်မုၢ်” လၢအတကဲ ပှၤအံၣ်စရ့လးဖိဘၣ်န့ၣ် ပိာ်ထီၣ် ပှၤအံၣ်စရ့လးဖိအခံ. (၂ မိၤ ၁၂:၁၂, ၃၇, ၃၈) ပှၤတဖၣ်အံၤ ထံၣ်ဘၣ်ဝဲလၢ တၢ်နးတၢ်ဖှီၣ် အခါတဆံလၢ စီၤမိၤၡ့ တဲဝဲလၢ ကကဲထီၣ်သးန့ၣ် ဟဲလၢပှဲၤထီၣ်အဃိ ဘၣ်သ့ၣ်သ့ၣ် အဝဲသ့ၣ် ဆၢတဲာ်လီၤသးလၢ ကပိာ်ထီၣ် ပှၤအံၣ်စရ့လးဖိအခံ.

ဖဲဘၤဘူၤလိၣ်ဖးဒိၣ် ဟးဂီၤဝံၤအလီၢ်ခံ ပှၤဘၣ်တၢ်ဒိးဖှူအီၤတနီၤ ကအိၣ်ဒံးလၢ ဟီၣ်ခိၣ်ချၢအဃိ ပှၤတဂၤဂ့ၤ တဂၤဂ့ၤလၢ အဆၢတဲာ်လီၤသးလၢ ကဘူၣ်ထီၣ်ဘါထီၣ် ယဟိဝၤယွၤန့ၣ် ကအိၣ်ဒီး တၢ်ခွဲးတၢ်ယာ်လၢ ကဆီၣ်ထွဲမၤစၢၤ ပှၤဘၣ်တၢ်ဒိးဖှူအီၤ. (မး ၂၅:၃၄-၃၆, ၄၀) ဘၣ်ဆၣ် ပသ့ၣ်ညါစ့ၢ်ကီးလၢ တချုးဖဲ အၢ်မက့းဒိၣ် စးထီၣ်ဒံးဘၣ် ဒီးဖဲပှၤဘၣ်တၢ်ဒိးဖှူအီၤ လၢအအိၣ်တ့ၢ်ဒံးလၢ ဟီၣ်ခိၣ်ချၢ ဘၣ်တၢ်ဟံးထီၣ်အီၤ ဆူမူခိၣ်အခါ တၢ်ခွဲးတၢ်ယာ်လၢ ပှၤဟီၣ်ခိၣ်ဖိ ကဘၣ် တၢ်ပာ်ပနီၣ်အီၤ ဒ်သိဖိအသိးန့ၣ် ကကတၢၢ်ဝဲ.

တၢ်နၢ်ပၢၢ်အသီအံၤ ပာ်ဖျါထီၣ်န့ၢ်ပှၤ ယဟိဝၤယွၤ အတၢ်အဲၣ် ဒီးအတၢ်သးကညီၤ ဒိၣ်ဒိၣ်မုၢ်မုၢ်. ပသ့ၣ်ညါဘၣ်လၢ ယဟိဝၤယွၤ “တအဲၣ်ဒိးလၢ ပှၤကတုၤလၢတၢ်ဟးဂီၤ နီတဂၤဘၣ်. ဒီးအအဲၣ်ဒိးဝဲလၢ ပှၤခဲလၢာ် ကပီၢ်ယၢ်လီၤက့ၤအသး.”—၂ ပ့း ၃:၉.