Landa kifuani ya Yehova mpe ya Yesu na diambu metadila mutindu na nge ya kukanisa

1-2. Nzola na beto samu na Yehova mesangisa yinki mambu, mpe yinki mutindu Yesu monisaka ti yandi zolaka Yehova na makanisi na yandi nionso?

YESU sasilaka diambu yina meluta nene na bantumu ya Nzambi ntangu yandi tubaka: “Nge fueti zola Yehova Nzambi na nge na ntima na nge ya mvimba, na muela na nge ya mvimba, na ngolo na nge nionso mpe na makanisi na nge nionso.” (Luka 10:27) Na yau, beto kezolaka Yehova na bima nionso yina beto kele na yau mpe na kimuntu na beto nionso. Yamesangisa bansatu, banguilu, mpe ngolo na beto. Yamesangisa diaka mutindu na beto ya kukanisa. Ya kedika beto lenda bakusa ata fioti ve na mutindu ya kukoka makanisi nionso ya Yehova. Kasi beto lenda bakusa mbote kuluta makanisi ya Nzambi na kulongukaka “makanisi ya Klisto” samu Yesu monisaka na mutindu ya kukoka makanisi ya Tata na yandi.​—1 Ko. 2:16.

² Yesu vuandaka zola Yehova na makanisi na yandi nionso. Yandi zabaka luzolo ya Nzambi samu na yandi mpe yandi vuandaka na nzengolo ya kukokisa yau, atako kusala yau lombaka yandi niokuama. Na kutulaka makanisi na yandi nionso na kusala luzolo ya Tata na yandi, Yesu bikaka ve kima mosi katula dikebi na yandi na lukanu yango.

3. Yinki malongi ntumua Petelo longukaka na Yesu, mpe yinki Petelo kindisaka bampangi na yandi Baklisto basala? (1 Petro 4:1)

³ Petelo mpe bantumua yankaka bakaka lokumu ya kulutisa ntangu kintuadi na Yesu mpe ya kulonguka mutindu na yandi ya kukanisa. Ntangu Petelo sonikaka letre na yandi ya ntete na nzila ya mpeve ya nlongo, yandi kindisaka Baklisto bavuanda na makanisi mutindu mosi na Klisto.a (Tanga 1 Petro 4:1.) Na ndinga yina basonikinaka verse yango, ntangu Petelo sonikaka: “Beno vuanda,” yandi sadilaka mpova mosi yina vuandaka tubila basoda yina mevuata binuanunu samu na kunuana mvita. Na yau kana Baklisto kena kulanda mutindu ya Yesu ya kukanisa, bakevuanda na kinuanunu mosi ya kilendo yina kesadisa bau samu banuanisa konso nsatu ya kusala mambu ya yimbi mpe bupusi ya yimbi ya yinza yayi Satana kena kuyadila.​—2 Ko. 10:3-5; Ef. 6:12.

4. Yinki beto ketadila na disolo yayi?

⁴ Beto ketadila mutindu ya Yesu ya kukanisa mpe beto kemona mutindu beto lenda landa kifuani na yandi. Beto kemona mutindu beto lenda (1) landa mutindu ya Yehova ya kukanisa, yina kesadisa beto nionso beto vuanda na makanisi mosi, (2) mutindu beto lenda vuanda na kumikitisa, mpe (3) mutindu beto lenda vuanda na makanisi ya mbote na kutudilaka Yehova ntima na kisambu.

LANDA MUTINDU YA YEHOVA YA KUKANISA

5. Yinki mutindu na diluaku mosi Petelo monisaka ve makanisi ya Yehova?

⁵ Beto tadila diluaku mosi yina Petelo landaka ve makanisi ya Yehova na mambu yina yandi kutanaka na yau. Yesu tubilaka bantumua na yandi ti yandi fueti kuenda na Yerusaleme, kuna bamfumu ya mabundu kekanga yandi, bakeniokola yandi, mpe bakekufua yandi. (Mat. 16:21) Yavuandaka mpasi samu na Petelo kundima ti Yehova kebika bakufua Yesu, yina vuandaka kivuvu ya Yisaele mpe Masiya yina lakamaka. (Mat. 16:16) Na yau Petelo bendaka Yesu na pembeni, mpe yandi tubaka: “Vuanda na kimpombo na nge mosi, Mfumu; diambu yina kekumina nge ve.” (Mat. 16:22) Lokola Petelo monisaka ve makanisi ya Yehova samu na diambu yango, makanisi na yandi vuandaka ve na nguizani na ya Yesu.

6. Na yinki mutindu Yesu monisaka ti makanisi na yandi vuandaka mpenza na nguizani na makanisi ya Yehova?

⁶ Makanisi ya Yesu vuandaka mpenza na nguizani na makanisi ya Tata na yandi ya dizulu. Yesu tubilaka Petelo: “Luta na manima na munu, Satana! Nge kele kima yina kena kubudisa munu dibaku samu mutindu na nge ya kukanisa kele ya Nzambi ve, kasi ya bantu.” (Mat. 16:23) Mbala yankaka Petelo vuandaka na makanisi ya mbote, kasi Yesu mangaka nduengoso na yandi. Yakele dilongi samu na beto. Yesu zabaka ti yalombaka yandi niokuama mpe yandi kufua samu na kusala luzolo ya Yehova. Na diluaku yango, Petelo bakaka dilongi mosi ya mfunu na diambu metadila kuwizanisa makanisi ya Nzambi na ya yandi.

7. Yinki mutindu Petelo monisaka na manima ti yandi vuandaka na nsatu ya kusoba makanisi na yandi samu yawizana na makanisi ya Yehova? (Tala foto ya kuvertire.)

⁷ Na manima, Petelo monisaka ti yandi vuandaka na nsatu ya kuwizanisa makanisi na yandi na ya Yehova. Yakumaka ntangu samu Bantu ya makanda yina zengamaka ve masutu kota na dibuta ya bisadi ya Nzambi. Petelo bakaka kiyekua ya kusamunina Korneyi, yina vuandaka na kati ya bantu ya ntete ya grupe yango ya yimpa ya bisadi ya Yehova. Bayuda vuandaka ve na mumeseno ya kusangana na Bantu ya makanda, na yau beto lenda kamua ve mutindu Petelo vuandaka na nsatu ya lusadusu samu yandi kokisa kiyekua yango. Ntangu Petelo bakusaka luzolo ya Nzambi samu na diambu yango, yandi sobaka makanisi na yandi. Yasalaka ti, yandi kuenda “kondua kutula ntembe” ntangu yandi tindamaka. (Mis. 10:28, 29) Yandi samuninaka Korneyi, bantu ya yinzo na yandi, mpe babakaka mbotama.​—Mis. 10:21-23, 34, 35, 44-48.

8. Yinki mutindu beto lenda monisa ti makanisi na beto kele na nguizani na makanisi ya Yehova? (1 Petro 3:8 mpe noti na yinsi ya paje)

⁸ Bamvula mingi na manima, Petelo kindisaka bampangi na yandi Baklisto ti bavuanda na “bumosi na makanisi.” (Tanga 1 Petro 3:8 mpe noti na yinsi ya paje.) Lokola beto kele bisadi ya Yehova, beto lenda vuanda na bumosi na makanisi na kulandaka makanisi ya Yehova yina kele na Mpova na yandi. Na kifuani, Yesu kindisaka banlonguki na yandi batula Kimfumu na kisika ya ntete na luzingu na bau. (Mat. 6:33) Na yau, nsamuni mosi ya kimvuka na beno lenda baka nzengolo ya kusala mutindu mosi ya kisalu ya ntangu nionso. Na kisika ya kutubila yandi ti yandi lenda sadila Yehova kondua kusala kisalu ya ntangu nionso, beto fueti tuba mambu ya mbote samu na lukanu na yandi mpe kusadisa yandi.

VUANDA NA KUMIKITISA

9-10. Yinki mutindu Yesu monisaka kumikitisa mosi ya kukamua?

⁹ Na mpipa ya nsuka tekila lufua na yandi, Yesu longaka Petelo mpe bantumua yankaka dilongi mosi ya mfunu na diambu metadila kumikitisa. Mua ntangu fioti na ntuala, Yesu tindika Petelo mpe Yoane na kubongisa mambu samu na madia ya nsuka yina Yesu kekudia kintuadi na bau tekila yandi kufua. Kondua ntembe mosi ya mambu yango vuandaka kukindimisa ti basen mpe basumen vuanda vana samu bavuanda na dikoki ya kusukula makulu ya banzenza tekila ya kudia. Kasi nani kevuanda na kumikisa samu na kusukula makulu ya bantu yankaka?

¹⁰ Kondua kukakatana, Yesu monisaka kumikitisa mosi ya kukamua. Bantumua kamuaka mpenza kumona Yesu kena kusala diambu yina bisadi nde kesalaka. Yesu katulaka bilele na yandi ya zulu, yandi kangaka sumen na luketo na yandi, yandi tulaka maza na basen, mpe yandi bandaka kusukula makulu na bau. (Yoa. 13:4, 5) Yalenda vuanda ti yabakaka mua ntangu samu yandi sukula makulu ya bantumua na yandi nionso 12​—yavuanda mpe makulu ya Yudasi, muntu yina tekaka yandi. Kasi, Yesu kokisaka kiyekua yango na kumikitisa nionso. Na manima, Yesu tubaka na ntima yinda nionso: “Beno mekanga mfunu ya diambu yayi munu mesadila beno? Beno kebokidilaka munu, ‘Nlongi’ mpe ‘Mfumu,’ mpe beno ketubaka kedika, samu munu kele Nlongi mpe Mfumu. Na yau, kana munu, Mfumu mpe Nlongi, mesukula beno makulu, beno mpe beno fueti sukulanaka makulu.”​—Yoa. 13:12-14.

11. Yinki mutindu Petelo monisaka ti yandi longukaka kuvuanda na kumikitisa? (1 Petro 5:5) (Tala diaka foto.)

¹¹ Petelo bakaka malongi na kumikitisa ya Yesu. Na manima ya kuvutuka ya Yesu na dizulu, Petelo salaka kimangu mosi na kubelusaka bakala mosi yina vuandaka ntengumi banda kubutuka na yandi. (Mis. 1:8, 9; 3:2, 6-8) Bantu mingi monaka kimangu yango mpe bazungaka Petelo. (Mis. 3:11) Kasi Petelo zolaka ve kubenda dikebi ya bantu, atako yandi yundukaka na kisika yina bantu vuandaka na mumeseno ya kukizangula. Kutu, Petelo vuandaka na kumikitisa mpe yandi tubilaka bau bakumisa Yehova mpe Yesu. Yandi tubilaka bau: “Na nzila ya nkumbu ya [Yesu], mpe na nzila ya kiminu na beto na nkumbu na yandi, bakala yayi beno kena kumona mpe beno mezaba mekuma ngolo.” (Mis. 3:12-16) Bampova yina Petelo sadilaka na letre na yandi mosi samu na Baklisto na diambu metadila mfunu ya kukudisa kumikitisa lenda bambula beto mutindu Yesu kangaka sumen na luketo na yandi mpe yandi sukulaka makulu ya bantumua na yandi.​—Tanga 1 Petro 5:5.

12. Yinki mutindu beto lenda tatamana kulonguka kuvuanda na kumikitisa lokola Petelo?

¹² Beto lenda landa kifuani ya Petelo na kulongukaka kuvuanda na kumikitisa. Kuzimbakana ve ti kumikitisa ya kedika suka kaka ve na kutuba bampova ya mbote. Mpova yina Petelo sadilaka samu na kutubila kumikitisa mesangisa mutindu beto kekanisaka samu na beto mosi mpe samu na bantu yankaka. Beto kesadilaka bantu yankaka mambu ya mbote samu beto kezolaka Yehova mpe beto kezolaka bantu, kasi ve samu beto kezolaka ti bantu kumisa beto. Kana beto kena kusadila Yehova na kiese nionso mpe beto kena kusadila bampangi na beto na mitindu nionso yina beto lenda, kondua kusosa ti bantu yankaka mona bangolo na beto, beto kepesa kifuani ya mbote ya kumikitisa.​—Mat. 6:1-4.

VUANDA “NA MAKANISI YA MBOTE”

13. Sasila yinki zola monisa kuvuanda “na makanisi ya mbote.”

¹³ Yinki zola monisa kuvuanda “na makanisi ya mbote”? (1 Pe. 4:7) Muklisto yina kele na makanisi ya mbote kesalaka nionso yina yandi lenda samu yandi baka banzengolo ya mbote yina kemonisaka makanisi ya Yehova. Muklisto ya mutindu yina kezabaka ti diambu mosi ve na luzingu kele na mfunu kuluta nguizani na yandi na Yehova. Yandi kekukitadilaka na bukatikati, na kuzabaka ti yandi kele ve na bamvutu nionso. Mpe yandi kemonisaka ti yandi ketudilaka Yehova ntima na kupusanaka mbala na mbala pene na yandi na kusalaka bisambu ya kumikitisa.b

14. Yinki mutindu Petelo konduaka kutudila Yehova ntima na diluaku mosi?

¹⁴ Na mpipa ya nsuka tekila lufua na yandi, Yesu luengisaka banlonguki na yandi: “Na mpipa yayi, beno nionso beno kebula dibaku samu na mambu yina kekumina munu.” Petelo tubaka na kibakala nionso: “Ata kana bantu yankaka nionso mebula dibaku samu na mambu yina kekumina nge, munu munu kebula dibaku ata fioti ve!” Na mpipa yango Yesu luengisaka ndambu ya banlonguki na yandi ti: “Beno tatamana kukenga mpe kusambila ntangu nionso.” (Mat. 26:31, 33, 41) Kana Petelo landaka nduengoso yango banda na ebandeli, yandi zolaka vuanda na kibakala ya kundima ti yandi vuandaka nlonguki ya Yesu. Kasi, Petelo niongaka ngolo mutindu yandi wanganaka Mfunu na yandi.​—Mat. 26:69-75.

15. Yinki mutindu Yesu taninaka makanisi ya mbote na mpipa ya nsuka tekila yandi kufua?

¹⁵ Yesu vuandaka tudila Yehova ntima ya mvimba. Atako Yesu vuandaka muntu ya kukoka, yandi vuandaka sambila mbala na mbala. Yavuandaka pesa yandi kibakala ya kusala mambu na nguizani na luzolo ya Yehova samu na yandi. (Mat. 26:39, 42, 44; Yoa. 18:4, 5) Kondua ntembe Petelo salaka zimbakana ata fioti ve mumeseno ya Yesu ya kusambila mbala na mbala.

16. Yinki mutindu Petelo monisaka ti yandi kudisaka makanisi ya mbote? (1 Petro 4:7)

¹⁶ Malembemalembe, Petelo longukaka kutudila Yehova ntima mingi na nzila ya kisambu. Yesu yina futumukaka ndimisaka Petelo mpe bantumua na yandi yankaka ti bakebaka mpeve ya nlongo samu bakokisa kiyekua na bau ya kusamuna. Kasi, Yesu lombaka bau bavingila na Yerusaleme tii diambu yango kesalama. (Luka 24:49; Mis. 1:4, 5) Yinki Petelo vuandaka sala ntangu bavuandaka vingila? Petelo mpe bampangi na yandi Baklisto ‘tatamanaka kusambila.’ (Mis. 1:13, 14) Na manima, na letre na yandi ya ntete, Petelo kindisaka bampangi na yandi Baklisto bavuanda na makanisi ya mbote mpe batudila Yehova ntima na nzila ya kisambu. (Tanga 1 Petro 4:7.) Petelo longukaka kutudila Yehova ntima mpe yandi kumaka dikunzi na kimvuka.​—Gal. 2:9.

17. Yinki beto fueti tatamana kusala yavuanda yinki makoki beto lenda vuanda na yau? (Tala diaka foto.)

¹⁷ Samu na kuvuanda na makanisi ya mbote, beto fueti pusanaka mbala na mbala penepene ya Yehova na nzila ya kisambu. Beto mebakusa ti beto fueti tatamana kusambila Yehova yavuanda yinki makoki beto lenda vuanda na yau. Na yau, beto fueti lombaka Yehova lutuadusu mingimingi ntangu yakena kulomba beto baka banzengolo ya mfunu, na kutulaka ntima ti yandi mezaba yina meluta mbote samu na beto.

18. Yinki mutindu beto lenda wizanisa makanisi na beto na ya Yehova?

¹⁸ Beto kele mpenza na butondi mutindu Yehova salaka beto na dikoki ya kulanda bikadulu na yandi. (Eba. 1:26) Ya kedika, beto lenda landa ve bikadulu ya Yehova na mutindu ya kukoka. (Yis. 55:9) Kasi, Mutindu mosi na Petelo, beto lenda tatamana kuwizanisa makanisi na beto na ya Yehova. Bika beto sala yau na kutatamanaka kulanda kifuani ya mutindu ya Nzambi ya kukanisa, na kuvuandaka na kumikitisa, mpe na kuvuandaka na makanisi ya mbote.