Beto bika kukitungisa samu na mambu yina beto zaba ve

1. Yinki makoki Yehova mepesaka beto, mpe samu na yinki?

YEHOVA salaka beto na dikoki ya kukanisa, ya kubaka nzayilu, ya kukudisa mbakusulu, mpe ya kumonisa nduenga. Samu na yinki yandi salaka beto mutindu yina? Samu yandi kezolaka beto baka “nzayilu ya Nzambi” mpe beto sadila yandi na makoki na beto nionso ya kukanisa.​—Mas. 2:1-5; Rom. 12:1.

2. (a) Yinki diambu beto fueti ndima? (Yobo 37:23, 24) (Tala diaka foto.) (b) Yinki mambote beto kebaka kana beto kena kundima na kumikitisa nionso ti beto zaba ve mambu nionso?

² Atako beto kele na makoki ya kulonguka, yakele na mambu mingi yina beto zaba ve. (Tanga Yobo 37:23, 24.) Beto tadila kifuani ya Yobi. Yehova yuvusaka yandi biuvu mingi yina monisaka ti yandi zabaka ve mambu mingi. Yasalaka ti yandi kumikitisa mpe yasadisaka yandi yandi semba makanisi na yandi. (Yobo 42:3-6) Beto diaka beto lenda baka mambote mingi kana beto kena kundima na kumikitisa nionso ti beto zaba ve mambu nionso. Kumikitisa yango ketindaka beto na kutula ntima ti Yehova kemonisa beto mambu yina beto fueti zaba mpenza samu beto baka banzengolo ya mbote.​—Mas. 2:6.

3. Yinki beto ketubila na disolo yayi?

³ Na disolo yayi, beto ketubila mua mambu yina beto zaba ve mpe bampasi yina kukondua kuzaba mambu yango lenda bimisa. Beto ketubila diaka samu na yinki yakele mbote mutindu beto zaba ve mambu yankaka. Kutubila mambu yango kekumisa kiminu na beto ngolo ti Yehova, “Muntu yina kele ya kukoka na nzayilu,” ketubilaka beto mambu yina beto kele mpenza na nsatu ya kuzaba.​—Yobo 37:16.

BETO ZABA VE NTANGU YINA NSUKA KEKUIZA

4. Na kutadila Matai 24:36, yinki kele mosi ya mambu yina beto zaba ve?

⁴ Tanga Matai 24:36. Beto zaba ve yinki ntangu nsuka ya yinza yayi kekuiza. Ata Yesu, ntangu yandi vuandaka na ntoto, yandi zabaka ve “kilumbu yango mpe wola yango.”a Na manima yandi tubilaka bantumua na yandi ti Yehova nde kele na yinsua ya kupona yinki ntangu mambu yankaka fueti salama. (Mis. 1:6, 7) Yehova metulaka deja ntangu yina nsuka ya yinza yayi kekuiza, kasi beto lenda zaba ve na sikisiki ntangu yango.

5. Lokola beto zaba ve ntangu yina nsuka kekuiza, yinki mutindu beto lenda kukimona?

⁵ Na kutadila bampova ya Yesu, beto zaba ve ntangu yikua beto fueti vingila diaka tekila nsuka kuiza. Yalenda sala ti beto lemba kuvingila to beto lemba nzutu, mingimingi kana beto kevingilaka kilumbu ya Yehova banda mua bamvula. To yalenda vuanda mpasi kukanga ntima na kuvueza ya bantu ya dibuta na beto, to ya bantu yankaka. (2 Pe. 3:3, 4) Beto lendaka kanisa ti kana beto zabaka na sikisiki kilumbu nsuka kekuiza, beto zolaka vuanda na ntima yinda mingi kuluta mpe beto zolaka kanga ntima na pete nionso na kuvueza.

6. Samu na yinki yakele mbote mutindu beto zaba ve ntangu yina nsuka kekuiza?

⁶ Lokola Yehova tubila beto ve na sikisiki ntangu yina nsuka kekuiza, beto kele na diluaku ya kumonisa ti beto kesadilaka yandi samu beto kezolaka mpe beto ketudilaka yandi ntima. Beto kevuandaka na nsatu ya kusadila Yehova samu na mvimbamvimba, kasi kaka ve tii nsuka kekuiza. Na kisika ya kutula makanisi na beto ntetentete na ntangu yina “kilumbu ya Yehova” kekuiza, beto ketulaka makanisi na beto na mambu yina kilumbu yango kekokisa. Yakesadisaka beto beto pusana penepene ya Yehova, beto tudila yandi ntima, mpe beto sala nionso yina beto lenda samu na kusepedisa yandi.​—2 Pe. 3:11, 12.

7. Yinki beto mezaba?

⁷ Yakele na mfunu beto tula makanisi na beto na mambu yina beto mezaba​—na kifuani beto mezaba ti bilumbu ya nsuka bandaka na 1914. Na Biblia, Yehova mepesaka beto bambikudulu yina monisa kaka ve ti bilumbu ya nsuka bandaka na mvula yango, kasi yamesasila diaka mambu mingi yina kesalama na yinza kubanda mvula yango. Na yau, beto kendimaka ti “kilumbu ya nene ya Yehova mekuma pene.” (Sef. 1:14) Beto mezaba diaka kisalu yina Yehova zola beto sala. Yandi zola ti beto tubila bantu nionso “nsangu ya mbote . . . ya Kimfumu.” (Mat. 24:14) Nsangu yango kena kusamunua na babuala kana 240 mpe na bandinga kuluta 1 000. Yalomba ve beto zaba ntete “kilumbu . . . mpe wola” samu beto samuna na vema.

BETO ZABA VE MUTINDU YEHOVA LENDA SADILA MAMBU

8. Bampova “kisalu ya Nzambi ya kedika” kena kutubila yinki? (Mosakoli 11:5)

⁸ Beto kezabaka ve ntangu nionso “kisalu ya Nzambi ya kedika.” (Tanga Mosakoli 11:5.) Bampova yango kena kutubila mambu yina Yehova kesalaka to mambu yina yandi kebikaka nzila ti yasalama samu na kukokisa luzolo na yandi. Na bantangu yankaka beto lenda zaba ve samu na yinki Yehova mebika ti diambu mosi salama to yinki diambu ya sikisiki yandi kesala samu na kusadisa beto. (Nz. 37:5) Beto lenda bakusa ve nzayilu yango mutindu kaka bantu ya mayele kebakusaka ve mbotembote mutindu muana kekulaka na kivumu ya mama na yandi.

9. Lokola beto kezabaka ve mutindu Yehova kesadila mambu, yinki yalenda tinda beto na kusala?

⁹ Kukondua kuzaba mutindu Yehova kesadisa beto lenda sala ti beto kakatana samu na kubaka banzengolo yankaka. Beto lenda kakatana na kukiyimina samu na kusala diaka mingi na kisalu ya kusamuna. Na kifuani kukumisa luzingu na beto pepele to kukuenda kisika yina nsatu ya bansamuni ya Kimfumu kele mingi. Diaka, kana beto kena kununga ve kukokisa balukanu na beto ya kimpeve, to beto kena kumona ti bangolo yina beto kena kusala na kisalu ya kusamuna kena kubuta ve mbuma, to beto kena kukutana na mikakatano na proje mosi ya teokrasi, beto lenda kukiyuvusa kana Yehova kena kundima beto kaka.

10. Kukondua kuzaba mutindu Yehova kesala mpenza mambu kesadisaka beto beto kudisa yinki bikadulu ya mfunu?

¹⁰ Kukondua kuzaba mutindu Yehova kesala mpenza mambu kesadisaka beto beto kudisa bikadulu ya mfunu, na kifuani kumikitisa mpe kuzaba bandilu na beto. Beto kezabaka ti makanisi ya Yehova mpe banzila na yandi meluta na ntama yina ya beto. (Yis. 55:8, 9) Beto kelongukaka diaka kutudila Yehova ntima mingi kuluta, na kivuvu ti yandi kenungisa beto. Kana kisalu na beto ya kusamuna to proje mosi ya teokrasi yina beto kena kusala kena kubuta mbuma, beto kepesaka lokumu nionso na Yehova. (Nz. 127:1; 1 Ko. 3:7) Kana mambu kena kutambula ve mutindu beto vuandaka kanisa, beto fueti zimbakana ve ti Yehova mezaba mambu nionso. (Yis. 26:12) Beto sala yina beto lenda, mpe beto tatamana kutula ntima ti Yehova kesala yina mebikana. Beto kukindimisa ti yandi kepesa beto lutuadusu yina beto kele na yau nsatu, ata kana yandi kesala yau ve na nzila ya kimangu mutindu yandi vuandaka sala yau na bantangu yankaka na ntama.​—Mis. 16:6-10.

11. Yinki mambu beto mezaba, yina lenda sadisa beto?

¹¹ Beto mezaba ti Yehova kevuandaka ntangu nionso na nzola, na lunungu, mpe na nduenga. Beto mezaba diaka ti yandi kebakaka na valere mingi mambu yina beto kesalaka samu na yandi mpe samu na bampangi na beto Baklisto. Mpe beto mezaba ti Yehova kesakumunaka ntangu nionso bantu yina kebikanaka ya kukuikama na yandi.​—Ebr. 11:6.

BETO KEZABAKA VE MAMBU YINA KESALAMA MBAZI

12. Na kutadila Yakobo 4:13, 14, yinki diambu beto zaba ve?

¹² Tanga Yakobo 4:13, 14. Beto kezabaka ve mambu yina kekumina beto mbazi. Na yinza yayi, beto kekutanaka na “ntangu mpe mambu yina kanama ve.” (Mos. 9:11) Yakesalaka ti beto zaba ve kana beto kekoka kusala mambu yina beto kanaka kusala to kana beto kevuanda kaka na luzingu samu na kusala yau.

13. Yinki mutindu beto lenda kukimona lokola beto zaba ve mambu nionso yina lenda kumina beto na bilumbu kena kuiza?

¹³ Yalenda vuanda mpasi kukanga ntima samu beto zaba ve mambu yina kekumina beto na bilumbu kena kuiza. Samu na yinki beto metuba mutindu yina? Samu beto lenda kukitungisa samu na mambu yina lenda kumina beto, mpe yalenda manisa kiese na beto. Luzingu na beto lenda soba na mutindu yina beto kanaka ve, to mambu ya mpasi lenda kumina beto na kintulumukina. Yalenda sala ti beto vuanda na kiadi mpe beto kukitungisa. Mpe kana mambu yina beto kanaka kusala kena kukokisama ve, beto lenda lemba nzutu.​—Mas. 13:12.

14. Yinki beto fueti sala mpe beto fueti zaba samu beto vuanda na kiese ya kedika? (Tala diaka bafoto.)

¹⁴ Ntangu beto kekangaka ntima na mambu ya mpasi, beto kemonisaka ti yavuanda yinki mambu beto lenda kutana na yau na luzingu, beto ketatamana kusadila Yehova samu beto kezolaka yandi. Masolo ya Biblia kemonisaka beto ti beto fueti kukivingila ve ti Yehova tanina beto na mambu nionso ya mpasi. Yakemonisaka diaka ti yandi kebongisaka ve na ntuala mambu nionso yina kekuminaka beto na luzingu. Yandi mezaba ti beto lenda vuanda na kiese ata kana beto zaba ve mambu nionso yina kekumina beto. Kutu, beto kevuanda na kiese kana beto kena kutatamana kusosa lutuadusu na yandi mpe beto kena kuzitisa yau. (Yir. 10:23) Kana beto kena kutadila yandi ntangu beto kena kubaka banzengolo, yakevuanda lokola beto kena kutuba: “Kana Yehova mezola, beto kevuanda na luzingu mpe beto kesala diambu playi to playi.”​—Yak. 4:15.

15. Yinki mambu beto mezaba samu na bilumbu kena kuiza?

¹⁵ Atako beto kezabaka ve mambu yina kekuminaka beto konso kilumbu, beto mezaba ti Yehova melaka beto luzingu ya mvula na mvula​—yavuanda na dizulu to na ntoto. Beto mezaba diaka ti yandi lenda vuna ve mpe diambu mosi ve lenda pekisa yandi kukokisa bansilulu na yandi nionso. (Tito 1:2) Kaka yandi nde “ketubaka mutindu mambu kesuka, mpe banda ntama mambu yina salama ntete ve.” Mambu nionso yina yandi tubaka na ntama kokisamaka, mpe mambu nionso yina yandi metuba samu na bilumbu kena kuiza kekokisama. (Yis. 46:10) Beto mezaba mpenza ti diambu mosi ve lenda pekisa Yehova kuzola beto. (Rom. 8:35-39) Yandi kepesa beto nduenga, yandi kebomba beto, mpe yandi kepesa beto kilendo yina mebonga samu beto kanga ntima na bampasi na beto. Beto lenda kukindimisa ti Yehova kesadisa mpe kesakumuna beto.​—Yir. 17:7, 8.

BETO LENDA BAKUSA VE NA MUTINDU YA KUKOKA MUTINDU YEHOVA MEZABA BETO MBOTE

16. Yinki Yehova mezaba samu na beto, mpe yinki mutindu nge kena kukimona na kuzabaka yau? (Nzembo 139:1-6)

¹⁶ Tanga Nzembo 139:1-6. Mvangi na beto mezaba mutindu beto mesalamaka, mpe mutindu nzutu, makanisi, mpe banguilu na beto kele. Yandi ketudilaka beto dikebi ntangu nionso. Yandi mezaba mambu yina beto ketubaka mpe samu na yinki beto ketubaka yau, mambu yina beto kesalaka mpe samu na yinki beto kesalaka yau. Ntinu Davidi tubaka ti Yehova kevuandaka ntangu nionso pene mpe na dikoki ya kusadisa beto. Yakele diambu ya kukamua mutindu N’yadi ya luyalanganu ya mvimba, Mvangi Nkua-Ngolo-Nionso, ketudilaka beto dikebi mingi mutindu yina! Davidi tubaka: “Munu lenda ata fioti ve kubakusa nzayilu ya mutindu yina. Yameluta zulu mingi, munu lenda kuma kuna ve.”​—Nz. 139:6, nyp.

17. Samu na yinki yalenda vuanda mpasi samu beto ndima ti Yehova mezaba beto mbote mpenza?

¹⁷ Mbala yankaka mambu yina mekuminaka dibuta na beto, mimeseno ya buala na beto, to bindimeli na beto ya ntama lenda sala ti yavuanda mpasi samu beto tadila Yehova lokola Tata ya nzola yina ketudilaka beto dikebi. To beto lenda kanisa ti banzimbala na beto ya ntama vuandaka yimbi kuluta, na yau Yehova lenda tudila beto ata fioti ve dikebi mpe yandi kele ntama na beto. Ata Davidi mpe vuandaka na banguilu ya mutindu yina na bantangu yankaka. (Nz. 38:18, 21) To muntu yina kena kusosa kusoba mambu ya luzingu na yandi samu na kuzinga na nguizani na bansikudukusu ya Nzambi lenda kukiyuvusa: ‘Kana Nzambi mezaba munu mpenza samu na yinki yandi kena kulomba munu munu bika ndiatulu yina munu memesanaka na yau?’

18. Yinki mutindu beto kebakaka mambote na kundimaka ti Yehova mezaba beto mbote kuluta mutindu beto mekukizaba? (Tala diaka bafoto.)

¹⁸ Beto lenda longuka kundima ti Yehova mezaba beto mbote kuluta mutindu beto mekukizaba mpe yandi lenda mona mambu ya mbote kati na beto yina beto mosi beto lenda mona ve. Ya kedika, yandi kemonaka banzimbala na beto, kasi yandi mezaba mutindu ya muntu yina beto kezolaka kuvuanda, mpe yandi kezolaka beto. (Rom. 7:15) Kana beto kena kundima ti Yehova kemonaka mambu ya mbote kati na beto, yakepesa beto ngolo ya kusala nionso yina beto lenda samu na kusadila yandi na kukuikama mpe na kiese.

19. Yinki beto mezaba mpenza samu na Yehova?

¹⁹ Beto mezaba ti Yehova kele nzola. Beto kele na ntembe ata fioti ve samu na diambu yango. (1 Yoa. 4:8) Beto mezaba ti bansikudukusu na yandi ya lunungu kemonisaka ti yandi kezolaka beto mpe yandi kezolaka beto vuanda na luzingu yina meluta mbote. Beto mezaba diaka ti Yehova kezolaka ti beto zinga mvula na mvula. Yandi pesaka nkudulu samu beto vuanda na dikoki ya kubaka luzingu yango. Dikabu ya nkudulu kendimisaka beto ti beto lenda sadila Yehova atako beto kesalaka banzimbala. (Rom. 7:24, 25) Mpe beto mezaba ti “Nzambi kele nene kuluta bantima na beto mpe yandi mezaba mambu nionso.” (1 Yoa. 3:19, 20) Yehova kemonaka mambu na beto nionso, mpe yandi kevuandaka na kivuvu ti beto lenda nunga kusala luzolo na yandi.

20. Yinki kesadisa beto samu beto bika kukitungisa samu na mambu yina beto zaba ve?

²⁰ Yehova ketubilaka beto mambu nionso yina beto fueti zaba mpenza. Na yau beto fueti kukitungisa ve samu na mambu yina beto zaba ve. Kasi beto lenda tula makanisi na mambu yina kele mpenza na mfunu. Na kusalaka mutindu yina beto kemonisaka ti beto ketulaka ntima na beto nionso na Yehova, “Muntu yina kele ya kukoka na nzayilu.” (Yobo 36:4) Atako beto lenda bakusa ve mambu yankaka bubu yayi, beto mezaba ti Yehova ketatamana kulonga beto mambu metadila yandi samu na mvimbamvimba.​—Mos. 3:11.