DISOLO YA NDONGOKOLO 23
MUYIMBU 2 Yehova nde nkombo na yo
Nkumbu ya Yehova kele na mfunu mingi samu na beto
“Yehova metuba: ‘Beno kele bambangi na munu.’”—YIS. 43:10.
MAMBU YINA BETO KELONGUKA
Disolo yayi kemonisa kiyekua yina beto kele na yau samu na kusantisa mpe kukotila nkumbu ya Yehova.
1-2. Yinki mutindu beto mezaba ti nkumbu ya Yehova kele na mfunu samu na Yesu?
NKUMBU ya Yehova kele kima yina meluta mfunu samu na Yesu. Yandi kele muntu ya ntete yina kekotilaka nkumbu ya Tata na yandi. Mutindu disolo yayi meluta monisaka yau, Yesu ndimaka kufua samu na nkumbu ya Yehova mpe samu na nionso yina nkumbu yango kemonisaka. (Mrk. 14:36; Ebr. 10:7-9) Mpe na manima ya Luyalu na yandi ya bamvula 1 000, Yesu kendima kuvutula kimfumu nionso samu na kusantisa nkumbu ya Yehova. (1 Ko. 15:26-28) Nzola ya Yesu samu na nkumbu ya Nzambi kemonisaka diaka nguizani ya ngolo yina yandi kele na yau na Tata na yandi. Yakemonisaka puelele ti Yesu kezolaka Muntu yina kele na nkumbu yango.
2 Yesu kuizaka na ntoto na nkumbu ya Tata na yandi. (Yoa. 5:43; 12:13) Yandi tubilaka banlonguki na yandi nkumbu ya Tata na yandi. (Yoa. 17:6, 26) Yandi longaka na nkumbu ya Yehova mpe yandi salaka bimangu na nkumbu yango. (Yoa. 10:25) Ya kedika, Yesu lombaka Yehova yandi tanina banlonguki na yandi “samu na nkumbu na [Yandi].” (Yoa. 17:11) Na yau, kana Yesu kezolaka mingi nkumbu ya Yehova, yinki mutindu muntu yina ketubaka ti yandi kele nlonguki ya kedika ya Klisto lenda kondua kuzaba to kusadila nkumbu yango?
3. Yinki beto ketubila na disolo yayi?
3 Lokola beto kele Baklisto yina kesosaka kulanda kifuani ya Yesu, beto kezolaka mingi nkumbu ya Tata na yandi. (1 Pe. 2:21) Na disolo yayi, beto ketubila samu na yinki Yehova mepesa nkumbu na yandi na bantu yina kesamunaka “nsangu ya mbote ya Kimfumu.” (Mat. 24:14) Beto ketubila diaka mfunu yina nkumbu ya Yehova fueti vuanda na yau samu na mosimosi kati na beto.
“DIKANDA MOSI SAMU NA NKUMBU NA YANDI”
4. (a) Yinki kiyekua Yesu pesaka banlonguki na yandi tekila yandi vutuka na dizulu? (b) Yinki kiuvu kiyekua yango mebimisa?
4 Mua ntangu fioti tekila Yesu vutuka na dizulu, yandi tubilaka banlonguki na yandi: “Beno kebaka kilendo ntangu mpeve ya nlongo kekuiza na zulu na beno, mpe beno kevuanda bambangi na munu na Yerusaleme, mpe na Yudea ya mvimba, mpe na Samaria mpe tii na kisika meluta mpenza ntama na ntoto.” (Mis. 1:8) Na yau, yalombaka nsangu ya mbote samunua kaka ve na bandilu ya Yisaele, kasi yalombaka nsukansuka makanda nionso baka diluaku ya kukuma banlonguki ya Yesu. (Mat. 28:19, 20) Nzokande Yesu tubaka: “Beno kevuanda bambangi na munu.” Yalombaka banlonguki yango ya yimpa zaba nkumbu ya Yehova, to Yalombaka bavuanda kaka bambangi ya Yesu? Mambu yina bametubila na Misala kikapu 15 kesadisa beto beto baka mvutu na kiuvu yango.
5. Yinki mutindu bantumua mpe bankulutu ya Yerusaleme monisaka ti bantu nionso fueti zaba nkumbu ya Yehova? (Tala diaka foto.)
5 Na mvula 49 N.B., bantumua mpe bankulutu ya Yerusaleme kutakanaka samu na kutubila mambu yina Bantu ya makanda yina bazengaka ve masutu fueti sala samu bandimama lokola Baklisto. Na nsuka ya disolo yango, Yakobo, mpangi ya Yesu, tubaka: “[Petelo] metubila mbotembote mutindu Nzambi tulaka dikebi na yandi samu na mbala ya ntete na makanda samu na kubimisa kukatuka na yau dikanda mosi samu na nkumbu na yandi.” Nkumbu ya nani Yakobo vuandaka tubila? Na kuvutukilaka bampova ya mbikudi Amosi, yandi buelaka: “Samu bantu yina mebikana basosa mpenza Yehova, kintuadi na bantu ya makanda nionso, bantu yina mebokulua na nkumbu na munu, Yehova metuba plina.” (Mis. 15:14-18) Banlonguki yango ya yimpa kelonguka kaka ve mambu metadila Yehova, kasi bakebokidila bau diaka ‘na nkumbu na yandi.’ Yazolaka monisa ti bakesamuna nkumbu ya Nzambi mpe bakezaba bau diaka na nkumbu yango.
Na lukutakanu mosi ya kimvuka ya ntuadisi ya siekle ya ntete, babakala yango ya kukuikama bakusaka puelele ti Baklisto fueti vuanda dikanda samu na nkumbu ya Nzambi (Tala paragrafe 5)
6-7. (a) Samu na yinki Yesu kuizaka na ntoto? (b) Yinki vuandaka diambu yina meluta mfunu yina salaka ti Yesu kuiza na ntoto?
6 Nkumbu ya Yesu zola monisa “Yehova kele Luvuluzu,” mpe yandi monisaka ti yandi kele muntu yina Yehova sadilaka samu na kuvukisa bantu yina kena kumonisa kiminu. Yesu kuizaka na ntoto samu na kukipesa samu na mambote ya bantu. (Mat. 20:28) Na kufutaka nkudulu, yandi salaka ti bantu vuanda na dikoki ya kuvuka mpe ya kubaka luzingu ya mvula ya mvula.—Yoa. 3:16.
7 Kasi samu na yinki bantu vuandaka na nsatu ya nkudulu? Yakele samu na mambu yina salamaka na bilanga ya Edeni. Mutindu beto tubilaka yau na disolo meluta, Adamu mpe Eva, bibuti na beto ya ntete, tombokilaka Yehova mpe samu na yau bazimbisaka diluaku ya kuzinga mvula na mvula. (Eba. 3:6, 24) Kasi, Yesu kuizaka na ntoto samu na kusala diambu mosi ya mfunu kuluta luvuluzu ya bantu ya masumu. Satana tubaka luvunu ya ngolo samu na Yehova. (Eba. 3:4, 5) Na yau, luvuluzu ya bana ya Adamu mpe Eva vuandaka na nguizani na diambu mosi ya mfunu kuluta—kusantisa nkumbu ya Yehova. Lokola Yesu vuandaka monisi ya Yehova mpe yandi samunaka nkumbu na Yandi, yandi kokisaka kiyekua mosi ya mfunu samu na kusantisa nkumbu ya Yehova.
Yinki mutindu muntu lenda tuba ti yandi kele nlonguki ya kedika ya Klisto kana yandi zaba ve mpe yandi kesadilaka ve nkumbu ya Tata ya Yesu?
8. Yinki diambu yalombaka banlonguki nionso ya Yesu ndima?
8 Yalombaka na bantu nionso yina kemonisa kiminu na Yesu, yavuanda Bayuda to Bantu ya makanda, bandima Yinto ya luvuluzu na bau, yina kele Tata ya Yesu, Yehova Nzambi. (Yoa. 17:3) Diaka, mutindu mosi na Yesu, yalombaka bazabana na nkumbu ya Yehova. Yalombaka diaka bazaba mfunu ya kusantisa nkumbu yango. Yalombaka basala mambu yango samu bavuka. (Mis. 2:21, 22) Na yau, yalombaka banlonguki nionso ya kuikakama ya Yesu balonguka mambu metadila Yehova mutindu mosi na Yesu. Yau yina Yesu manisaka kisambu na yandi yina kele na Yoane 17 na bampova yayi: “Munu metubila bau nkumbu na nge mpe munu ketubila yau, samu nzola yina nge zolaka munu na yau vuanda na kati na bau mpe munu na bumosi kintuadi na bau.”—Yoa. 17:26.
“BENO KELE BAMBANGI NA MUNU”
9. Yinki mutindu beto lenda monisa ti nkumbu ya Yehova kele na mfunu samu na beto?
9 Banlonguki nionso ya Yesu fueti tula dikebi na kusantisa nkumbu ya Yehova. (Mat. 6:9, 10) Bafueti tadila nkumbu ya Yehova lokola nkumbu yina meluta bankumbu nionso. Bafueti monisa yau na bisalu. Kasi yinki mutindu beto lenda pesa maboko samu na kusantisa nkumbu ya Yehova, to kumonisa ti mambu yina Satana tubaka samu na Yehova kele ya luvunu?
10. Yinki mambu beto ketangaka na Yisaya kikapu 42 tii na kikapu 44? (Yisaya 43:9; 44:7-9) (Tala diaka foto.)
10 Mfunu ya kiyekua na beto samu na kusantisa nkumbu ya Yehova kele na Yisaya kikapu 42 tii na kikapu 44. Na bikapu yango, Yehova kena kuyuvusa bantu yina kesambilaka yandi ve bamonisa kana banzambi na bau kele ya kedika. Yandi mebokila diaka bambangi bakuiza na ntuala na yandi mpe bamonisa kana banzambi yango kele ya kedika. Kasi muntu mosi ve kokaka!—Tanga Yisaya 43:9; 44:7-9.
Beto kepesaka kimbangi samu na Yehova na mitindu mingi (Tala paragrafe 10-11)
11. Yinki mambu Yehova metubila bantu na yandi, mutindu Yisaya 43:10-12 metubila yau?
11 Tanga Yisaya 43:10-12. Yehova metuba samu na bantu na yandi: “Beno kele bambangi na munu, . . . mpe munu kele Nzambi.” Yehova kena kuyuvusa bau kiuvu yayi: “Katula munu, yakele nde na Nzambi yankaka?” (Yis. 44:8) Na yau, beto kele na diluaku ya mbote ya kupesa mvutu na kiuvu yango. Na nzila ya bampova mpe bisalu na beto, beto kemonisaka ti Yehova kele Nzambi ya kedika kaka mosi. Nkumbu na yandi meluta bankumbu nionso yankaka. Beto kemonisaka na mambu ya luzingu na beto ti beto kezolaka mpenza Yehova mpe beto kele ya kukuikama na yandi—yavuanda yinki mbamba Satana kena kutula beto. Na mutindu yango, beto kevuandaka na diluaku ya kupesa maboko samu na kusantisa nkumbu ya Yehova.
12. Yinki mutindu mbikudulu yina kele na Yisaya 40:3, 5 kokisamaka?
12 Ntangu beto kesantisaka nkumbu ya Yehova mpe beto kekotilaka lokumu na Yandi, beto kelandaka kifuani ya Yesu Klisto. Yisaya diaka samunaka ti muntu mosi “kebongisa nzila ya Yehova.” (Yis. 40:3) Yinki mutindu diambu yango kokisamaka? Yoane Mbotiki bongisaka nzila samu na Yesu, yina kuizaka mpe tubaka na nkumbu ya Yehova. (Mat. 3:3; Mrk. 1:2-4; Luka 3:3-6) Mbikudulu yango tubaka diaka: “Nkembo ya Yehova kemonana.” (Yis. 40:5) Yinki mutindu yasalamaka? Ntangu Yesu kuizaka na ntoto, yandi monisaka Yehova na mutindu ya kukoka mpenza, na yau yavuandaka lokola nde Yehova yandi mosi kuizaka na ntoto.—Yoa. 12:45.
13. Yinki mutindu beto lenda landa kifuani ya Yesu?
13 Mutindu mosi na Yesu, beto kele Bambangi ya Yehova. Beto kesamunaka nkumbu ya Yehova mpe beto ketubilaka muntu nionso yina beto mekutana na yandi bisalu ya kukamua ya Yehova. Kasi, samu na kusala yau na mutindu ya mbote, beto fueti tubila diaka bantu kiyekua ya mfunu yina Yesu kele na yau samu na kusantisa nkumbu ya Yehova. (Mis. 1:8) Yesu kele Mbangi ya ntete ya Yehova, mpe beto kelandaka lutuadusu na yandi. (Em. 1:5) Na yinki mutindu yankaka beto kemonisaka ti nkumbu ya Yehova kele na valere samu na beto?
MFUNU YA NKUMBU YA YEHOVA SAMU NA BETO
14. Mutindu Nzembo 105:3 memonisa yau, yinki mutindu beto kekukimonaka samu na nkumbu ya Yehova?
14 Beto kekukikumisaka samu na nkumbu ya Yehova. (Tanga Nzembo 105:3.) Yehova kesepelaka mingi ntangu beto kekukikumisaka samu na nkumbu na yandi. (Yir. 9:23, 24; 1 Ko. 1:31; 2 Ko. 10:17) “Kukikumisa na Yehova” zola monisa kumona yau lokumu ti Yehova kele Nzambi na beto. Beto kemonaka yau lokumu kukumisa nkumbu na yandi mpe kupesa maboko na lokumu na yandi. Beto fueti mona nsoni ata fioti ve kutubila bankundi na beto ya kisalu, ya kalasi, ya kartie, mpe bantu yankaka ti beto kele Bambangi ya Yehova! Diabulu zola ti beto lemba kutubila nkumbu ya Yehova na bantu yankaka. (Yir. 11:21; Em. 12:17) Kutu, Satana mpe bambikudi na yandi ya luvunu zola ti bantu zimbakana nkumbu ya Yehova. (Yir. 23:26, 27) Kasi nzola na beto samu na nkumbu ya Yehova kepesaka beto kiese “kilumbu ya mvimba.”—Nz. 5:11; 89:16.
15. Yinki zola monisa kubelela nkumbu ya Yehova?
15 Beto ketatamanaka kubelela nkumbu ya Yehova. (Yoe. 2:32; Rom. 10:13, 14) Kubelela nkumbu ya Yehova suka kaka ve na kuzaba mpe kusadila nkumbu ya Nzambi. Yazola monisa diaka kulonguka kuzaba Kimuntu ya Nzambi, kutudila yandi ntima, mpe kusosa lusadusu mpe lutuadusu na yandi. (Nz. 20:7; 99:6; 116:4; 145:18) Beto ketubilaka diaka nkumbu mpe bikadulu na yandi na bantu yankaka, na kukindisaka bau babalula ntima mpe basala mambu yina lenda sala ti bandimama diaka na Yehova.—Yis. 12:4; Mis. 2:21, 38.
16. Yinki mutindu beto lenda monisa ti Satana kele muntu ya luvunu?
16 Beto kendimaka kuniokuama samu na nkumbu ya Yehova. (Yak. 5:10, 11) Ntangu beto kebikanaka ya kukuikama na Yehova na bantangu ya mpasi, beto kemonisaka ti Satana kele muntu ya luvunu. Na bilumbu ya Yobi, Satana fundaka bisadi ya Yehova ti: “Muntu kepesa nionso yina yandi kele na yau samu na kutanina luzingu na yandi.” (Yobo 2:4) Satana tubaka ti bantu kesadilaka Yehova kaka na bantangu ya mbote, mpe kana bamekutana na mambu ya mpasi, bakesundola Yehova. Yobi, muntu ya kukuikama, monisaka ti Satana vunaka. Mutindu mosi, beto kele na lokumu ya kumonisa ti yavuanda yinki diambu yina Satana lenda sala beto, beto kesundola Yehova ata fioti ve. Beto lenda kukindimisa mpenza ti Yehova ketatamana kutanina beto samu na nkumbu na yandi.—Yoa. 17:11.
17. Na yinki mutindu yankaka beto lenda pesa nkembo na nkumbu ya Yehova mutindu 1 Petro 2:12 memonisa yau?
17 Beto kemonisaka luzitu samu na nkumbu ya Yehova. (Mas. 30:9; Yir. 7:8-11) Lokola beto kele bamonisi ya Yehova mpe beto kenataka nkumbu na yandi, beto lenda pesa nkumbu na yandi lokumu to kufingisa yau. (Tanga 1 Petro 2:12.) Na yau, beto kevuandaka na nsatu ya kusala nionso yina beto lenda samu na kukumisa Yehova na nzila ya bampova mpe ndiatulu na beto. Na mutindu yango, beto kepesa nkembo na nkumbu na yandi atako beto kele bantu ya kukondua kukoka.
18. Yinki kele mutindu yankaka yina beto lenda monisa ti nkumbu ya Yehova kele na mfunu samu na beto? (Tala diaka noti na yinsi ya paje.)
18 Beto kekukitungisaka mingi samu na lokumu ya nkumbu ya Yehova kuluta samu na lokumu na beto mosi. (Nz. 138:2) Samu na yinki? Samu mbala yankaka nzola na beto samu na nkumbu ya Yehova lenda bebisa nguizani na beto na bafinangani na beto.a Yesu ndimaka kufua lufua mosi ya nsoni lokola muntu ya yimbi, samu na kupesa lokumu na nkumbu ya Yehova. Yandi ‘ndimaka nsoni’ na mutindu ti yandi kukitungisaka ve kuluta ndilu samu na mambu yina bantu yankaka vuandaka kanisa samu na yandi. (Ebr. 12:2-4) Lukanu na yandi vuandaka kusala luzolo ya Nzambi.—Mat. 26:39.
19. Yinki mutindu beto kekukimonaka samu na nkumbu ya Yehova, mpe samu na yinki?
19 Beto kemonaka yau lokumu kusadila Yehova mpe kubokulua Bambangi na Yandi. Samu na yau, beto kevuandaka pene ya kukanga ntima na konso diambu ya kuvueza yina beto lenda kutana na yau. Nkumbu ya Yehova kele na mfunu mingi samu na beto kuluta ata lokumu na beto mosi. Na yau, bika beto vuanda na nzengolo ya kutatamana kukumisa nkumbu ya Yehova yavuanda yinki diambu Satana lenda sala samu na kulembisa beto. Na mutindu yango, beto kemonisa ti nkumbu ya Yehova kele na mfunu mingi samu na beto, mutindu yavuandaka samu na Yesu Klisto.
MUYIMBU 10 Tópesa Yehova Nzambe na biso nkembo!
a Ata Yobi, muntu ya kukuikama, kukitungisaka ntangu bankundi na yandi tatu vuezaka lokumu na yandi. Na ebandeli, ntangu yandi zimbisaka bana na yandi mpe bima na yandi nionso, “Yobi salaka disumu ve mpe yandi fundaka Nzambi ata na diambu mosi ve ya yimbi.” (Yobo 1:22; 2:10) Kasi, ntangu babandaka kupesa Yobi foti, yandi bandaka kukikotila mpe “kutubatuba mpamba.” Yandi vuandaka kotila ntetentete lokumu na yandi mosi na kisika ya kusantisa to kupesa nkumbu ya Nzambi lokumu.—Yobo 6:3; 13:4, 5; 32:2; 34:5.