Mutindu Yehova kena kundimisa beto ti yandi kekumisa ntoto Paradiso

1. Yinki vuandaka nsangu ya mbikudi Yezaya samu na bampangi na yandi Bayisaele?

MBIKUDI Yezaya monisaka Yehova lokola ‘Nzambi ya kedika.’ Mpova yina bamebangula na “kedika” zola monisa “amen.” (Yez. 65:16, nyp.) “Amen” zola monisa “yavuanda mutindu yina,” to “ya kedika.” Kana bamesadila mpova “amen” na Biblia samu na kutubila Yehova to Yesu, yakevuandaka ndanga samu na kumonisa ti diambu yango kele kedika. Na yau, nsangu ya Yezaya samu na bampangi na yandi Bayisaele vuandaka puelele: Mambu yina Yehova kesamunaka kesalamaka ntangu nionso. Na yau Yehova kokisaka ntangu nionso bansilulu na yandi.

2. Samu na yinki beto lenda tula ntima na bansilulu ya Yehova yina metadila luzingu na beto na bilumbu kena kuiza, mpe yinki biuvu beto ketadila?

² Beto diaka beto lenda tula ntima ti bansilulu ya Yehova samu na luzingu na beto na bilumbu kena kuiza kekokisama. Pene na bamvula 800 na manima ya ntangu ya Yezaya, ntumua Paulo sasilaka samu na yinki beto fueti tudila ntangu nionso bansilulu ya Nzambi ntima. Paulo tubaka: ‘Nzambi lenda vuna ve.’ (Ebr. 6:18) Mutindu kaka yinto ya maza lenda bimisa ve mbala mosi maza ya mbote mpe maza ya mungua, Yehova, yina kele Yinto ya kedika, lenda vuna ve. Na yau, beto lenda tudila konso diambu yina Yehova ketubaka ntima, ata mpe bansilulu na yandi ya luzingu na beto samu na bilumbu kena kuiza. Na disolo yayi, beto ketadila biuvu yayi: Yinki Yehova melaka kupesa beto na bilumbu kena kuiza? Mpe yinki mutindu Yehova kena kundimisa beto ti nsilulu na yandi kekokisama?

YINKI NSILULU YEHOVA PESAKA?

3. (a) Yinki nsilulu bisadi ya Nzambi kesepelaka na yau? (Kusonga 21:3, 4) (b) Yinki bantu yankaka kesalaka ntangu beto kena kutubila bau nsilulu yango?

³ Nsilulu yayi beto ketubila kele na valere samu na bisadi nionso ya Nzambi na yinza ya mvimba. (Tanga Kusonga 21:3, 4.) Yehova pesaka nsilulu ya ntangu yina ‘lufua kevuanda diaka ve, kiadi, bidilu mpe mpasi kevuanda diaka ve.’ Mingi kati na beto kesadilaka baverse yayi samu na kubomba bantu yina beto kesamuninaka mpe samu na kumonisa bau mutindu luzingu kevuanda na Paradiso. Yinki bantu mingi kesalaka ntangu beto ketubilaka bau nsilulu yango? Balenda tuba, “Yalenda salama ve.”

4. (a) Ntangu Yehova pesaka nsilulu ya Paradiso, yinki yandi zabaka? (b) Katula kupesa nsilulu, yinki diaka Yehova salaka?

⁴ Ya kedika, ntangu Yandi tubilaka ntumua Yoane na nzila ya mpeve ya nlongo na kusonika nsilulu yayi ya luzingu na Paradiso, Yehova zabaka ti bubu yayi beto fueti tubila kivuvu yango na bantu yankaka ntangu beto kena kusamuna nsangu ya Kimfumu. Yehova zabaka diaka ti yakevuanda mpasi samu na bantu mingi na kundima ti bansobolo yango kesalama na bilumbu kena kuiza. (Yez. 42:9; 60:2; 2 Bk. 4:3, 4) Na yau yinki mutindu beto lenda ndimisa bantu yankaka​—mpe kukindimisa beto mosi—​ti balusakumunu yina kele na Kusonga 21:3, 4 kekokisama? Yehova sukaka kaka ve na kupesa nsilulu yango ya kukindisa, kasi yandi pesaka diaka bamfunu ya kundimisa, yina kesadisa beto beto tudila yau ntima. Yinki bamfunu yandi pesaka?

YEHOVA KENA KUNDIMISA BETO TI NSILULU NA YANDI KEKOKISAMA

5. Yinki bamfunu beto kele na yau ya kutudila nsilulu ya Paradiso ya Nzambi ntima, mpe yinki kisika beto lenda mona yau?

⁵ Beto kemonaka bamfunu ya kutudila nsilulu ya Yehova ya Paradiso ntima na baverse yayi melanda. Kuna beto ketangaka: “Muntu yina mevuanda na kiti ya kimfumu tubaka ti: ‘Tala! Munu kena kusala bima nionso ya yimpa.’ Yandi tubaka diaka ti: ‘Sonika, samu mambu yayi kele ya kukuikama mpe ya kedika.’”​—Kus. 21:5, 6a.

6. Samu na yinki bampova ya kukindisa yina kele na Kusonga 21:5, 6 kesalaka ti beto tudila nsilulu ya Nzambi ntima ya ngolo?

⁶ Samu na yinki bampova ya baverse yayi kena kusala ti beto tula ntima ya ngolo na nsilulu ya Nzambi? Mukanda Emoniseli—Kokokana na yango monene ebelemi! metuba mambu yayi melanda samu na baverse yango: “Yakele lokola Yehova yandi mosi metula siniatire na mukanda samu na kupesa yau na bantu ya kukuikama, mukanda yina kepesa bau yinsua samu na kubaka balusakumunu yina kena kuiza.”b Yau yina na Kusonga 21:3, 4 beto ketangaka mambu yina Nzambi mepesa nsilulu ti yandi kesala. Kasi na verse 5 mpe 6, yandi mebuela siniatire na yandi, samu na kundimisa beto ti mambu yina yandi pesilaka nsilulu kekokisama mpenza. Beto tadila mbotembote bampova yina Yehova mesadila samu na kundimisa beto.

7. Nani mebanda kutuba na verse 5, mpe samu na yinki yakele spesiale?

⁷ Verse 5 mebanda mutindu yayi: ‘Muntu yina mevuanda na kiti ya kimfumu tubaka.’ (Kus. 21:5a) Bampova yango kele spesiale samu yakele mosi ya mbala kaka tatu yina yandi mosi Yehova kena kutuba na mukanda ya Kusonga. Na yau bampova yango ya kundimisa katuka ve na mbasi mosi ya kilendo, yakatuka mpe ve na Yesu yina futumukaka, kasi na Yehova yandi mosi! Diambu yango kena kundimisa ti beto lenda tula mpenza ntima na mambu yina yandi tubaka na manima. Samu na yinki beto metuba mutindu yina? Samu Yehova ‘lenda vuna ve.’ (Tito 1:2) Na yau bampova yina beto ketangaka na Kusonga 21:5, 6 kekokisama mpenza.

‘TALA! MUNU KENA KUSALA BIMA NIONSO YA YIMPA’

8. Yinki Yehova tubaka samu na kundimisa ti nsilulu na yandi kekokisama? (Yezaya 46:10)

⁸ Ntangu yayi beto tadila mpova “Tala!” (Kus. 21:5) Mpova ya Greki yina bamebangula na “tala!” mesadulua mbala mingi na mukanda ya Kusonga. Mukanda mosi metuba ti bampova yina bamesadila kele mutindu ya kutubila muntu yina kena kutanga ti “yandi tula dikebi na mambu yina metubama na manima.” Yinki Nzambi metuba na manima? Yandi metuba: ‘Munu kena kusala bima nionso ya yimpa.’ Ya kedika, Yehova kena kutubila bansobolo yina kesalama na bilumbu kena kuiza, kasi lokola yandi mezaba ti yandi kekokisa mpenza nsilulu yango, yau yina yandi kena kutubila bansobolo yango lokola yau mesalamaka deja.​—Tanga Yezaya 46:10.

9. (a) Yinki kele bisalu zole ya Yehova yina bampova ‘kusala bima nionso ya yimpa’ kena kumonisa? (b) Yinki kekumina ‘dizulu’ mpe “ntoto” ya bubu yayi?

⁹ Beto tadila fraze yina melanda, yina kele na Kusonga 21:5: ‘Kusala bima nionso ya yimpa.’ Na kikapu yango ya Biblia, fraze yango kena kumonisa bisalu zole ya Yehova. Ya ntete Yehova kebebisa yinza yayi ya yimbi. Ya zole, yandi ketula yinza ya yimpa. Na Kusonga 21:1, beto ketangaka: ‘Dizulu ya ntama mpe ntoto ya ntama lutaka.’ ‘Dizulu ya ntama’ kena kumonisa baguvernema ya politiki yina Satana mpe bademo na yandi kena kutuadisa. (Mat. 4:8, 9; 1 Yn. 5:19) Mutindu Biblia mesadila yau, “ntoto” lenda monisa bantu yina kezingaka na ntoto. (Kuy. 11:1; Nk. 96:1) Na yau, “ntoto ya ntama” kena kumonisa bantu ya yimbi yina beto kena kumona bubu yayi. Yehova kesuka kaka ve na kubongisa ‘dizulu’ mpe “ntoto” ya bubu yayi, kasi yandi kebebisa yau. Na kisika ya dizulu mpe ntoto ya bubu yayi, yandi ketula ‘dizulu ya yimpa mpe ntoto ya yimpa’​—yina kele guvernema ya yimpa mpe bantu ya yimpa.

10. Yinki Yehova kesala ya yimpa?

¹⁰ Na Kusonga 21:5, beto ketangaka diaka mambu yina Yehova metuba samu na bima yina yandi kekumisa ya yimpa. Simba ti Yehova tubaka ve ti, “Munu kena kusala bima ya yimpa nionso.” Yandi tubaka: ‘Munu kena kusala bima nionso ya yimpa.’ Na yau, Yehova kekumisa ntoto mpe bantu lokola ya yimpa, na kukumisaka bantu mpe ntoto ya kukoka. Mutindu Yezaya samunaka yau, Yehova kekumisa ntoto ya mvimba kisika mosi ya kitoko lokola​—bilanga ya Edeni. Mpe yandi kekumisa beto ya yimpa na kubelusaka mosimosi kati na beto na mambu nionso. Bantu kele na kieta na makulu, bantu ya meso ya kufua, mababa, kebeluka ata mpe bantu ya kufua kevutuka na luzingu.​—Yez. 25:8; 35:1-7.

‘MAMBU YAYI KELE YA KUKUIKAMA MPE YA KEDIKA. . . . YAMEKOKISAMA!’

11. Yinki ntumu Yehova pesaka Yoane mpe samu na yinki?

¹¹ Yinki diambu yankaka Nzambi metuba samu na kundimisa beto ti beto lenda tudila yandi ntima? Yehova tubilaka Yoane: ‘Sonika, samu mambu yayi kele ya kukuikama mpe ya kedika.’ (Kus. 21:5) Yehova sukaka kaka ve na kupesa ntumu ti “sonika.” Yandi pesaka diaka mfunu na yau. Yandi tubaka: ‘Samu mambu yayi kele ya kukuikama mpe ya kedika’​—yazola monisa ti, yamebonga kutudila bampova ya Nzambi ntima mpe yakele sikisiki. Beto kele na butondi mutindu Yoane zitisaka ntumu yango, “sonika.” Yau mesala ti beto vuanda na dikoki ya kutanga nsilulu ya Nzambi ya Paradiso mpe kuyindula na mpinda na zulu ya balusakumunu ya kitoko yina beto kena kuvingila.

12. Samu na yinki Yehova tubaka: ‘Yamekokisama!’

¹² Yinki Nzambi metuba na manima? ‘Yamekokisama!’ (Kus. 21:6) Ntangu yayi Yehova kena kutuba lokola kaka nionso yina yandi metubaka samu na nsilulu ya Paradiso mesalama deja. Yandi kele na yinsua ya kutuba plina samu diambu mosi ve lenda pekisa yandi kukokisa lukanu na yandi. Mpe Yehova metuba diambu yankaka yina kena kundimisa beto ti nsukansuka nsilulu na yandi kekokisama. Yinki yandi metuba?

‘MUNU KELE ALFA MPE OMEGA’

13. Samu na yinki Yehova tubaka: ‘Munu kele Alfa mpe Omega’?

¹³ Mutindu beto monaka yau na ebandeli, Yehova yandi mosi tubaka mbala tatu na bavizion yina Yoane monaka. (Kus. 1:8; 21:5, 6; 22:13) Na mosimosi ya maluaku yango, Yehova mevutukila bampova: ‘Munu kele Alfa mpe Omega.’ Alfa kele letre ya ntete na alfabe ya Greki mpe Omega kele letre ya nsuka. Na kusadilaka bampova ‘Alfa mpe Omega,’ Yehova zolaka monisa ti kana yandi mebanda diambu mosi, Yandi kekumisa yau tii na nsuka.

14. (a) Pesa kifuani ya ntangu yina Yehova tubaka mpenza, “Alfa” mpe ya ntangu yina yandi ketuba “Omega.” (b) Yinki ndanga beto kekuta na Kuyantika 2:1-3?

¹⁴ Na manima ya kusala Adamu mpe Eva Yehova monisaka lukanu na Yandi ya ebandeli samu na bantu mpe ntoto. Biblia metuba: “Nzambi sakumunaka bau, mpe yandi tubilaka bau ti: ‘Beno buta mingi mpe beno kuma mingi, beno fulusa ntoto mpe beno yala yau.’” (Kuy. 1:28) Ntangu Yehova tubaka bampova yango, kondua ntembe yavuandaka lokola yandi metuba “Alfa.” Ntangu yina kekuiza, bana ya kukoka mpe ya luzitu ya Adamu mpe Eva kefulusa ntoto mpe kekumisa yau Paradiso. Na ntangu yango yina kena kuiza, yakevuanda kaka lokola Yehova metuba “Omega.” Ntangu Yehova manisaka kusala ‘dizulu, ntoto, mpe bima nionso yina kele na kati na yau,’ yandi tubaka diambu mosi samu na kumonisa ti lukanu na yandi kekokisama mpenza. Yakele na Kuyantika 2:1-3. (Tanga.) Yehova tubaka ti kilumbu ya 7 kele nlongo samu na yandi. Yinki yazola monisa? Yehova pesaka ndanga ti yandi kekokisa mpenza lukanu na yandi samu na bantu mpe ntoto. Yakekokisama na mvimba na yau na nsuka ya kilumbu yango ya 7.

15. Samu na yinki yamonanaka ti lokola Satana salaka ti lukanu ya Nzambi samu na bantu bika kokisama?

¹⁵ Na manima ya butomboki ya Adamu mpe Eva, bakumaka bantu ya masumu mpe batambikisaka disumu mpe lufua na bana na bau. (Bar. 5:12) Mbala yankaka yamonanaka ti bantu ya kukoka yina kezitisaka Yehova lenda fulusa ntoto ve. Yavuandaka kaka lokola Satana salaka ti Yehova bika vuanda na dikoki ya kutuba “Omega.” Mbala yankaka Satana kanisaka ti Yehova lendaka kokisa nsilulu na yandi ve. Yandi lendaka kanisa Yehova kekufua Adamu mpe Eva mpe yandi kesala bankuelani yankaka ya kukoka samu na kukokisa lukanu na Yandi samu na bantu. Kasi kana Nzambi salaka plina, Diabulu zolaka funda Nzambi ti Yandi kele muntu ya luvunu. Samu na yinki? Samu, mutindu Kuyantika 1:28 memonisa yau, Yehova tubilaka Adamu mpe Eva ti bana na bau kefulusa ntoto.

16. Samu na yinki Satana lendaka kanisa ti yandi lenda funda Yehova ti yandi kele muntu yina kenungaka ve?

¹⁶ Yinki nzengolo yankaka Satana kanisaka ti Nzambi kebaka? Mbala yankaka Satana kanisaka ti Yehova kebika Adamu mpe Eva na kubuta bana ya kukondua kukoka yina kekuma na dikoki ve ya kukuma bantu ya kukoka. (Lon. 7:20; Bar. 3:23) Kondua ntembe, yazolaka sala ti Diabulu tuba ti Yehova nunga ve. Samu na yinki? Samu yazolaka kokisa ve lukanu ya Nzambi ya kufulusa Paradiso na bana ya kukoka mpe ya luzitu ya Adamu mpe Eva.

17. Yinki solision Yehova bakaka samu na butomboki ya Satana mpe ya bantu ya ntete, mpe yinki kesalama na nsuka? (Tala diaka foto.)

¹⁷ Yehova bakaka solision na butomboki ya Satana mpe bantu ya ntete na mutindu mosi yina Satana salaka kanisa ve. (Nk. 92:5) Na kisika Yehova monisa ti yandi kele muntu ya luvunu, yandi monisaka ti yandi kele muntu ya kedika na kubikaka Adamu mpe Eva babuta bana. Mpe na kisika ya kumonisa ti yandi kele muntu yina kenungaka ve, Yehova monisaka ti yandi kele muntu yina kenungaka kaka. Yandi salaka ti lukanu na yandi kokisama kaka na kupesaka ‘nkuna’ yina kevukisa bana ya luzitu ya Adamu mpe Eva. (Kuy. 3:15; 22:18) Kondua ntembe Satana sutukaka na nkubukulu ya Yehova ya nkudulu! Samu na yinki? Samu yakele nkubukulu yina simbamaka na nzola mosi yina mekondua muyimi. (Mat. 20:28; Yoa. 3:16) Satana kele ve na kikadulu yango, yandi kele muntu ya muyimi. Na yau, yinki kesalama lokola Nzambi bakaka nkubukulu ya nkudulu? Na nsuka ya Luyalu ya bamvula 1 000 bana ya kukoka ya Adamu mpe Eva kezinga na ntoto ya kukoka yina kekuma Paradiso​—mutindu Yehova kanaka yau na ebandeli. Na ntangu yango yakevuanda lokola Yehova ketuba na bampova yankaka, “Omega.”

MUTINDU BETO LENDA TUDILA NSILULU YA YEHOVA YA PARADISO NTIMA YA NGOLO

18. Yinki kele mambu tatu ya kundimisa yina Nzambi mepesa beto? (Tala ankadre “Bamfunu tatu ya kutudila nsilulu ya Yehova ntima.”)

¹⁸ Na kutadila mambu yayi beto metadila, yinki mambu ya kundimisa beto lenda tubila na bantu yina kendimaka ve ti nsilulu ya Paradiso ya Nzambi kekokisama? Ya ntete, Yehova yandi mosi mepesa nsilulu. Mukanda ya Kusonga metuba: “Muntu yina mevuanda na kiti ya kimfumu tubaka ti: ‘Tala! Munu kena kusala bima nionso ya yimpa.’” Yandi kele na nduenga, kilendo, mpe nsatu ya kukokisa nsilulu na yandi. Ya zole, kukokisama ya nsilulu na yandi kele diambu ya kedika, samu mutindu ya Yehova ya kutadila mambu kele lokola yamekokisamaka deja. Yau yina yandi tubaka: ‘Mambu yayi kele ya kukuikama mpe ya kedika. . . . Yamekokisama!’ Ya tatu, Diambu mosi ve lenda pekisa Yehova na kumanisa diambu yina yandi bandaka. Yau yina yandi tubaka: ‘Munu kele Alfa mpe Omega.’ Yehova kemonisa ti Satana kele muntu ya luvunu mpe yina kenungaka ve.

19. Kana bantu kena tula ntembe na nsilulu ya Nzambi ya Paradiso, yinki nge lenda sala?

¹⁹ Zaba ti ntangu nionso yina nge ketubilaka bantu mambu yina Yehova tubaka samu na kundimisa beto ti bansilulu na yandi kekokisama, yakesalaka ti nge tudila yandi ntima ya ngolo. Na yau mbala kekuiza ntangu nge ketanga nsilulu ya kukindisa ya Paradiso yina kekuiza, mutindu Kusonga 21:4 memonisa yau mpe muntu mosi metubila nge ti, “yakekokisama ve,” yinki nge kesala? Samu na yinki ve kutanga mpe kusasila yandi verse 5 mpe 6? Monisa mutindu Yehova ndimisaka nsilulu na yandi na kutulaka yau siniatire na yandi mosi.​—Yez. 65:16.