Maria Magdala vandá Nani?
Mvutu ya Biblia
Maria Magdala vandá kiladi mosi ya kwikama ya Yesu kristo. Ya lenda vanda ti nkumbu ya yandi ya Magdala katuká na mbanza ya Magdala, (ntangu ya nkaka Magadan), yina vandá pene-pene na nzadi ya mungua ya Galilea. Ya lenda vanda ti Maria vandá zingá kuna.
Maria Magdala vandá mosi ya bakento mingi yina vandá salá banzyetolo na Yesu na biladi ya yandi, mpe yandi vandá kipeke bawu na kupesá bawu mwa bima ya fioti-fioti yina ba vandá na yawu nsatu. (Luke 8:1-3) Ba kufwá Yesu na meso ya yandi, mpe yandi vandá na kati ya bantu ya ntete yina talá Yesu na manima ya kuvumbuka ya yandi na lufwa.—Marke 15:40; Yoane 20:11-18.
Maria Magdala vandá kwandi nketo ya ndumba?
Biblia ke zonzá ve ti Maria Magdala vandá kento ya ndumba. Nyonso yina Biblia ke zonzá na yina me tadila luzingu ya yandi, ni disolo yina Yesu bingisá bampeve sambwadi ya yimbi na nzutu ya yandi.—Luke 8:2.
Samu na yinki bantu mingi vandá kwikilá ti yandi vandá kento ya ndumba tekila yandi kuma kiladi ya Yesu? Bamvula mingi na manima ya lufwa ya Maria Magdala, bantu ya nkaka zonzá ti ni yandi vandá kento yina Biblia ke pesá ve nkumbu, (ya lenda vanda Kento ya ndumba) yina sukulá makulu ya Yesu na masangasa mpe kusuná yawu na bansuki ya yandi. (Luke 7:36-38) Kasi ata verse mosi ve ya biblia ke zonzá mambu yayi.
Maria Magdala vandá kwandi “ntumwa ya bantumwa”?
Ve. Dibuundu ya catholique ke bokilá Maria “Santu Maria Magdala” mpe “ntumwa ya bantumwa” samu ti yandi vandá muntu ya ntete ya kuzonza na bantumwa ti ba me vumbula Yesu na lufwa. (Yoane 20:18) Kasi nsangu yayi yandi natá, kumisá ve yandi ntumwa. Mpe ata kisaka na Biblia ba ke bokilak’ yandi ntumwa.—Luke 6:12-16.
Ba manisá kusonika Biblia pene-pene ya nsuka ya siècle ya ntete N.B. Bamvula mingi na manima, bamfumu ya dibuundu baká lukanu ya kubokila Maria Magdala “santu”. Mikanda yina ba soniká na mvula 100 tii na mvula 300, ke lakisá ti bilandi ya nkaka ya Yesu bandá kusala Maria Magdala kibanda. Kasi mikanda yango ke ve na kati ya mikanda ya Biblia. Masolo yayi ya luvunu me katuka ve na Biblia.
Maria Magdala vandá kwandi Kento ya Yesu?
Ve. Biblia ke lakisá beto pwelele ti Yesu kwelá ve.a