Wapi mfumu nge ke soola?—Yinki Biblia ke zonzaka?

Na mwa bilumbu fioti, na babwala mingi na yinza bantu ke soola bantu yina ke twadisa bawu. Ba ke baka mikanu ya mfunu na yina me tadila nani ke vanda bamfumu ya bawu.

Yinki Biblia ke zonzaka?

Ya ke na bamambu yina bamfumu ya yinza lenda kulungisa ve

Biblia ke lakisá ndilu yina bamfumu nyonso ya yinza ke na yawu.

• ‘Beno tula ve ntima na bamfumu to na mwana ya muntu, yina lenda vuukisa ve. Mpema ya yandi ke basikaka, yandi ke vutukaka na ntoto, kaka na kilumbu yina mabanza ya yandi ke zimbanaka.’—Nkunga 146:3, 4, nyp.

Ata bamfumu yina ke na makoki ya kulungisa bamambu mingi ke kufwaka. Ata ti ba me sala bamambu ya mbote, ya ke ve na kima yina ba lenda sala samu ba yina ke kwiza na manima ya bawu sala faso bawu.—Longi 2:18, 19.

Biblia ke lakisá ti Nzambi salá ve bantu samu bawu mosi twadisa luzingu ya bawu.

• ‘Muntu yina ke tambulaka kele ve na lutumu ya kutwadisa kitambi ya yandi.’—Yeremia 10:23.

Ya ke kwandi na mfumu yina lenda yala na mutindu ya mbote na ntangu ya beto?

Mfumu yina Nzambi me ndima

Biblia ke lakisá ti Nzambi me tula mfumu yina ke na makoki mpe yina beto lenda tudila ntima: Yesu Kristo. (Nkunga 2:6) Yesu ke mfumu ya Kimfumu ya Nzambi, kimfumu mosi yina ke na mazulu.—Matayi 6:10.

Nge ke soola kwandi Yesu mutindu mfumu? Biblia ke lakisá samu na yinki kyuvu yayi ke mfunu:

• ‘Beno pesa mwana [Yesu Kristo] lukumu, kana ve Nzambi ke zwa nkele mpe beno ke fwa ntama na nzila, samu nkele ya yandi ke kwizaka na mbangu. Kyese na bantu nyonso yina ke bumbanaka na yandi.’—Nkunga 2:12.

Yayi ke ni ntangu samu na nge na kubaka mukanu. Bambikudulu ya Biblia ke lakisá ti Yesu bandá kuyala na mvula 1914, mpe na mwa ntangu fioti Kimfumu ya Nzambi ke baka kisika ya bimfumu nyonso ya bantu.—Danyele 2:44.

Na kuzaba dyaka mingi na yina me tadila bamambu yina nge lenda sala samu na kulakisa ti nge me soola Yesu mutindu mfumu, tanga disolo “Choisissez de soutenir le royaume de Dieu dès maintenant!”