Yinki Biblia ke zonzá na yina me tadila kento na bakala yina ke vandá yinzo mosi kasi ba me kwelana ve?

Mvutu ya Biblia

Biblia ke zonzá ti Nzambi zola ti bantu “sala ve kindumba.” (1 Batesalonika 4:3) Na Biblia, na kati ya mot “kindumba” ke na kinsuza, kuvukisa nzutu babakala na babakala to bakento na bakento, mpe kuvukisa nzutu kento na bakala yina ke ve ya kukwela.

• Samu na yinki Nzambi ke zolá ti kento na bakala fwana kukwelana samu ba vanda yinzo mosi?

• Yinki beto lenda zonza samu na kento na bakala yina me soola kuvanda yinzo mosi tekila ba kwelana, samu na kutala kana ba ke wisana?

• Yinki kento na bakala fwana kusala samu dikwela ya bawu vanda ngolo?

Samu na yinki Nzambi ke zolá ti kento na bakala fwana kukwelana samu na kuvanda yinzo mosi?

• Dikwela me katuka na Nzambi. Ni Nzambi muntu kwelisaka bakala na kento ya ntete. (Kubanda 2:22-24) Yandi zonzá ata fioti ve ti kento na bakala lenda zinga yinzo mosi ata ba ke ve ya kukwelana.

• Nzambi me zaba yina ke mbote samu na bantu. Yandi zola ti kento na bakala yina me kwelana zinga ntangu nyonso yinzo mosi, samu na bambote ya dikanda nyonso. Beto baka kifwani: Muntu yina me yidika kima mosi, ke tulá mukanda samu na kuzonza faso ya kusadila kima yango na mutindu ya mbote. Mutindu mosi mpe, Nzambi ke lakisá beto yinki kusala samu dikwela ya beto vanda ngolo. Bantu yina ke landá misiku ya Nzambi ke kuzwá bambote mingi.—Izaya 48:17, 18.

  

• Kana bantu zole me vukisa nzutu kasi ba ke ve ya kukwelana ya lenda nata bawu bampasi mingi. Na kifwani, kento lenda kuzwa kivumu yina yandi me zola ve, ba lenda kuzwa maladi yina ba ke kuzwaka na kuvukisa nzutu, mpe ba lenda nyokwama mingi.a

• Kuvukisa nzutu kele dikabu yina Yehova pesá na kento na bakala samu ba buta bana. Luzingu ke mfunu mingi na meso ya Nzambi, mpe makoki ya kubuta bana ke dikabu ya kitoko yina me katuka na yandi. Nzambi zola ti beto zitisa dikabu yayi yandi me pesa beto na kuzitisá musiku na yina me tadila makwela.—Baebre 13:4.

Yinki beto lenda zonza samu na kento na bakala yina me soola kuvanda yinzo mosi tekila ba kwelana, samu na kutala kana ba ke wisana?

Samu na kuvanda na dikwela ya mbote beto ke ve na nsatu ya “kumeka ntete” kuvanda kintwadi samu na kutala kana beto lenda kwelana. Kasi, kindiku ya bantu zole lenda kuma ngolo kaka kana bawu nyonso zole sala kintwadi samu na kununga bampasi yina lenda kumina bawu.b Dikwela ke kima yina ke kumisá ngolo luzolo na kati ya bantu zole.—Matayi 19:6.

Yinki kento na bakala fwana kusala samu dikwela ya bawu vanda ngolo?

Dikwela ya kulunga kele ve. Kasi na kusadilá malongi ya Biblia, bantu yina ke ya kukwelana lenda kumisa ngolo dikwela ya bawu. Tala mwa misiku yina lenda sadisa bawu:

• Tula bansatu ya bakala to kento ya nge na mantwala tekila bansatu ya nge mosi.—1 Bakorinto 7:3-5; Bafilipi 2:3, 4.

• Lakisa luzolo mpe buzitu na kento to bakala ya nge.—Baefeze 5:25, 33.

• Zonzila mpangi bamambu ya mbote.—Bingana 12:18.

• Vanda na ntima ya yinda mpe lemvokila.—Bakolose 3:13, 14.