Satana ke wa’ faso?

Mvutu ya Biblia

Satana ke na nzutu ya kimpeve. Na yawu, ya me sosa kuzonza ti beto lenda tala ve yandi.—Baefeze 6:11, 12.

Bantu mingi ke kanisaka ti Dyabulu kele mutindu nkombo yina ke na bampoka, mukila, mpe ke ya kusimba mousona ya nene (fourche) na maboko. Bantu ya nkaka ke zonzaka ti, ba yina fwanikisaka Satana mutindu yina zingaka bamvula mingi, mpe bantu yango landaka masolo ya yimbi mpe ya luvunu ya ntangu ya ntama.

Wapi mutindu Biblia ke zonzilaka Satana?

Samu na kuzonzila Satana, Biblia ke sadilaka bifwani mingi. Bifwani yango ke sadisaka beto na kuzaba wapi kimuntu ke na yandi kasi ve faso yina yandi kele. Beto tala ndambu ya bifwani yango:

Mbazi ya nsemo. Yandi ke vunaka bantu, na kulakisaka bawu bima ya kitoko samu na kunata bawu na kulanda malongi ya yandi na kisika ya kulanda malongi ya Nzambi.—2 Bakorinto 11:14.
Nkosi yina ke na nsatu. Yandi ke nwanisaka na ngolo bisadi ya Nzambi.—1 Piere 5:8.
Dragoni. Yandi ke pesaka boma, yandi ke na ngolo, mpe yandi ke bebisaka bantu.—Luzabusu 12:9.

Baverse ya Biblia yina ke zonzilaka Satana

2 Bakorinto 11:14: “Satana yandi mosi ke kitukaka ntangu nyonso mutindu mbazi ya nsemo.”

Ya zola zonza: Satana ke talanaka mutindu muntu ya mbote samu na kunata bantu na kulanda malongi ya yandi na kisika ya kulanda malongi ya Nzambi.
Baefeze 6:11: “Beno lwata binwanunu nyonso yina Nzambi ke pesaka samu beno lenda kuvanda ya kukubama na mantwala ya mayela ya yimbi ya Dyabulu.”

Ya zola zonza: Satana ke sadilaka luvunu mpe mayela ya yimbi, samu na kunata bantu na kutumama ve na Nzambi.
Zaki 4:7: “Beno tumama na Nzambi. Beno tatamana na kumanga Satana, mpe yandi ke kima ntama na beno.”

Ya zola zonza: Beto lenda nunga Satana, kana beto tumama na Nzambi kasi na yandi ve.
1 Piere 5:8: “Mutantu ya beno, Satana, kele mutindu nkosi yina ke na nsatu, mpe ke na kutambula bisika nyonso samu na kusosa muntu yina yandi ke kudya.”

Ya zola zonza: Satana ke yiinaka ba yina ke tumamaka na Nzambi mpe yandi ke na nsatu ya kubebisa kidinku ya bawu na Nzambi.