Na nkubukulu ya beto, beto kele ve na bamfumu ya dibundu yina kefutamaka samu na kisalu na bau. Mutindu yavuandilaka na baklisto ya ntete, bankengidi yina melungisa mambu kelombamaka na Biblia ketulamaka samu na ‘kukengidila kimvuka ya Nzambi.’ (Bisalu 20:28) Bampangi yango bau kele babakala yina kele na nguisani ya ngolo na Yehova; baketuadisaka kimvuka mpe bakekengidilaka yau ‘na luzolo na bau mosi, kansi na kingolo-ngolo ve, samu na kubaka mbongo ve kansi na luzolo na kiese.’ (1 Piere 5:1-3) Wapi bisalu bau kesadilaka beto?

Bau kebakisaka mpe bau ke kengidilaka beto. Bakuluntu ketuadisaka mpe kekengidilaka kimvuka samu yavuanda na nguisani ya mbote na Yehova. Mutindu bakuluntu mezaba ti ni Nzambi muntu kepesaka bau kiyekua yina ya mfunu mingi, bau keyadilaka ve beto bisadi ya Nzambi, kansi bakesadisaka beto samu beto kuvuanda mbote na kiese. (2 Bakorinto 1:24) Mutindu nsungi ya bameme kesalaka ngolo yandi kipe dimeme mosimosi, bakuluntu mpe bakesalaka ngolo na kuzaba mpangi mosimosi na kimvuka.​—Bingana 27:23.

Bau kelongaka beto mutindu ya kusala luzolo ya Nzambi. Sabala na sabala, bakuluntu ketuadisaka balukutakanu ya kimvuka, yina kesadisaka beto kuma na kiminu ya ngolo. (Bisalu 15:32) Babakala yango ya luvema baketuadisaka diaka kisalu ya kusamuna nsangu ya mbote. Bau kesamunaka kintuadi na beto mpe bakelakisaka beto mutindu nyonso ya kusamuna.

Bau kekindisaka mosimosi na beto. Samu na kusadisa beto na kuvuanda na kinkundi ya mbote na Yehova, bakuluntu balenda kuiza tala beto na yinzo ya beto to na Yinzo ya Kimfumu, mpe kupesa beto lusalusu mpe lukindusu yina mekatuka na Biblia.​—Zaki 5:14, 15.

Katula biyekua ya bau na kimvuka, bakuluntu mingi kekuendaka na kisalu, mpe bakele na biyekua ya dibuta yina bafuana lungisa. Yamebonga beto zitisa mbotembote bampangi yango yina kesalaka kisalu ya ngolo.​—1 Batesalonika 5:12, 13.

• Wapi kiyekua bakuluntu kesalaka na kimvuka?

• Wapi mutindu baketudilaka mosimosi na beto dikebi?

Biblia metubila bimvuka zole ya bampangi ya babakala yina kevuandaka na biyekua na kati ya kimvuka: “bakuluntu na basadisi na kisalu.” (Bafilipi 1:1, NW) Mbala mingi, kimvuka mosimosi kevuandaka na bakuluntu na basadisi na kisalu mingi. Wapi bisalu basadisi na kisalu kesalaka samu na mambote ya beto?

Bau kesadisaka bakuluntu. Basadisi na kisalu nyonso, yavuanda bantuenia to bambuta, bau kevuandaka na nguisani ya mbote na Yehova, bantu ya kutudila ntima, mpe bakesalaka bisalu na ntima mosi. Bau kesalaka bisalu ya mutindu na mutindu mpe ya mfunu mbala na mbala samu mambu tambula mbote na kimvuka. Yau kesadisaka bakuluntu bakukipesa na kiyekua na bau ya kulonga mpe kukengidila bampangi ya kimvuka.

Bau kesalaka bisalu yina kesadisaka beto. Basadisi na kisalu ya nkaka kebakaka biyekua ya kuyamba bantu nyonso yina mekuiza na lukutakanu ya kimvuka. Bayankaka ketadilaka mambu ya mikro mpe miziki, ya kukabula mikanda, ya kubumba mbongo ya kimvuka, ya kupesa bampangi terituare ya kusamunina. Bau kepesaka diaka maboko samu na kukengidila Yinzo ya Kimfumu yau vuanda na bunkete. Bakuluntu lenda lomba bau basadisa bampangi yina mekuma biboba. Bisadisi na kisalu kendimaka na ntima mosi kusala kisalu nyonso yina bamepesa bau. Yau yina bampangi nyonso ya kimvuka kezitisaka bau.​—1 Timote 3:13.

Bau kele kifuani ya mbote ya kulanda. Basadisi na kisalu kesolamaka samu bau kele na nguisani ya mbote na Nzambi. Bau kekindisaka kiminu na beto ntangu bau kesalaka masolo na balukutakanu. Kifuani ya bau na kisalu ya kusamuna kekindisaka beto na kusamuna na luvema. Mutindu bau kesalaka na bumosi na bakuluntu, yau kesalaka ti kimvuka ya mvimba vuanda na kiese mpe na bumosi. (Baefeze 4:16) Nsukansuka, bau diaka bakekokisaka mambu yina kelombamaka samu bakuma bakuluntu.

• Wapi binkadulu basadisi na kisalu kevuandaka na yau?

• Yinki bau kesalaka samu mambu tambula mbote na kimvuka?

Masonukua ya Greki ya buklisto ketubilaka mbala na mbala Barnabasi na ntumua Paulo. Babakala yango bavuandaka bankengidi batambundi, yazola tuba bavuandaka sala bavuayaje samu na kutala bimvuka ya ntete. Samu na yinki? Samu bavuandaka kukibanza mingi samu na mambote ya bampangi ya bau baklisto. Paulo tubaka ti yandi vuandaka na nsatu ya ‘kuvutuka samu na kwenda kutala’ bampangi samu na kutala mutindu bakele. Yandi vuandaka ndima kusala bavuayaje ya bankama ya bakilometre samu na kukuenda kindisa bampangi. (Bisalu 15:36) Bubu yayi mpe, bankengidi batambudi ya beto kesalaka mutindu yina.

Bau kekuizaka samu na kukindisa beto. Nkengidi ya kizungidila mosimosi ketalaka bimvuka kana 20 mpe yandi kelutisaka sabala mosi na kimvuka mosimosi mbala zole na mvula. Kifuani ya bau mpe ya banketo ya bau, kana bau kele ya kukuela, lenda kindisa beto mingi. Bankengidi batambudi na banketo ya bau bakesalaka ngolo bazaba bampangi nyonso, yavuanda bantuenia to bambuta, mpe bau keyangalalaka kubasika kintuadi na beto na kisalu ya kusamuna mpe ya kulonguka Biblia na bantu. Bankengidi yango, kintuadi na bakuluntu, bakekuendaka tala bampangi samu na kukindisa bau. Bakesalaka diaka badiskur ya kukindisa na balukutakanu ya bimvuka mpe na balukutakanu ya nene.​—Bisalu 15:35.

Bau ketudilaka muntu nyonso dikebi. Bankengedi ya kizungidila bakesosaka mbotembote kuzaba kana kimvuka mosimosi kele na nguisani ya mbote na Nzambi. Bau kekutakanaka na bakuluntu mpe basadisi na kisalu samu na kutala mutindu kimvuka kena kudiatila, mpe kupesa bau malongi yina mefuana samu balungisa biyekua na bau mbote. Bau kesadisaka bampasudi-nzila samu basala kisalu ya bau ya kusamuna mbote, mpe bau keyangalalaka kuzabana na bantu ya malumalu mpe kuwa mutindu kiminu ya bau kena kukudila. Nkengidi mosimosi kekukipesaka ya tsyeleka samu yandi vuanda muntu yina kesala kintuadi na beto ‘samu na mambote ya beto.’ (2 Bakorinto 8:23) Beto fuana landa kiminu ya bau mpe luvema ya bau na kisalu ya Nzambi.​—Baebre 13:7.

• Samu na yinki bankengidi ya kizungidila kekuendaka tala bimvuka?

• Wapi mutindu nguizulu ya bau na kimvuka lenda sadisa nge?

Ntangu mambu ya mpasi mekubua, Bambangi ya Yehova kekubikaka mbala mosi lusalusu samu na kusadisa bampangi ya bau yina mebuila mpasi. Kusala mutindu yina kelakisaka ti bakezolanaka mingi. (Yoane 13:34, 35; 1 Yoane 3:17, 18) Wapi mutindu beto kepesaka lusalusu yango?

Beto kepesaka makabu ya mbongo. Ntangu nsatu mosi ya ngolo builaka bampangi ya Yudea, baklisto ya Antiokia fidisaka bau mbongo. (Bisalu 11:27-30) Mutindu mosi mpe, ntangu beto kekuwaka ti bampangi ya beto ya buala mosi bakele na mpasi, beto kefidisaka makabu ya mbongo na nzila ya kimvuka samu na kusadisa bayina kele na nsatu ya lusalusu.​—2 Bakorinto 8:13-15.

Beto kepesaka lusalusu yina mefuana. Bakuluntu yina kele kisika mambu ya mpasi mesalamina bakesosaka kuzaba kisika mpangi mosimosi ya kimvuka kele mpe wapi mutindu yandi kele. Komite ya lusalusu lenda tuadisa kisalu ya kukabula madia, maza ya kuvedila samu na kunua, bilele, bisika ya kulala, mpe lusalusu ya munganga. Bambangi mingi yina mezaba bisalu ya mutindu na mutindu bakefutaka bau mosi tike samu na kukuenda na bisika yango, samu na kusadisa bampangi yina mezua mpasi, to kubongisa bayinzo mpe Bayinzo ya Kimfumu yina mebeba. Mutindu beto kevuandaka na bumosi mpe beto memesanaka kusala kintuadi, yau kesadisaka beto na kubongisa bima ya kupesa lusalusu mbangumbangu. Ata beto kesadisaka ntetentete ‘bampangi ya beto na kati ya kiminu,’ beto kesadisaka diaka bantu ya nkaka, yavuanda wapi dibundu, kana diluaku kele.​—Bagalate 6:10.

Beto kekindisaka bantu na nzila ya Biblia. Bantu yina mambu ya mpasi mebuila bakevuandaka mingimingi na nsatu ya lukindusu. Na ntangu ya mutindu yina, beto kebakaka ngolo na Yehova, ‘Nzambi ya lukindusu nyonso.’ (2 Bakorinto 1:3, 4) Beto keyangalalaka mingi kuzabisa bantu yina kele na mpasi bivuvu yina Biblia mepesa, mpe diaka ti Kimfumu ya Nzambi kemanisa mambu nyonso yina kena kusala bantu mpasi.​—Luzabusu 21:4.

• Samu na yinki Bambangi kezingilaka ve na kupesa lusalusu ntangu mambu ya mpasi mekubua?

• Wapi mutindu beto kesadilaka Biblia samu na kukindisa bayina mevuka na mambu ya mpasi?

Ntangu fioti tekila Yesu kufua, yandi sololaka na balongoki na yandi yiya: Petelo, Yakobi, Yoane na Andele, na kisika yina bau vuandaka kaka bau mosi. Ntangu Yesu vuandaka kuzabisa bau kidimbu ya kuvuanda na yandi na bilumbu ya nsuka, yandi yuvusaka kiuvu yayi ya mfunu mingi: “Nani ya tsyeleka kele mumbu ya kukuikama mpe ya mayele yina mfumu na yandi metula yandi kengidila bisadi ya yinzo na yandi, samu na kupesa bau madia na bau na ntangu yina mefuana?” (Matayi 24:3, 45; Marke 13:3, 4, NW) Yesu zolaka balongoki na yandi bazaba ti yandi, “mfumu” na bau, ketula bantu yina ketatamana kupesa bau madia ya kimpeve, yazola tuba nzayilu ya Nzambi, na ntangu ya nsuka. Nani zolaka vuanda mumbu yango?

Bau kele balongoki ya kedikakedika ya Yesu yina metulama mafuta na kimpeve. “Mumbu” yango kepesaka basambidi ya nkaka ya Yehova madia ya kimpeve na ntangu mefuana. Beto ketulaka ntima na mumbu yango ya kukuikama samu na kubaka “ndambu ya madia na beto na ntangu yina mefuana.”​—Luke 12:42.

Bau ketuadisaka yinzo ya Nzambi. (1 Timote 3:15) Yesu pesaka mumbu yango kiyekua ya nene ya kutuadisa kisalu ya kitini ya nkubukulu ya Yehova awa na ntoto; yazola tuba kukengidila bima na yau nyonso, kutuadisa kisalu ya kusamuna, mpe kulonga beto na nzila ya bimvuka na beto. Yau yina, samu yandi pesaka beto yina beto mefuana na yau na ntangu mefuana, “mumbu ya kukuikama mpe ya mayele” kena kukabula madia ya kimpeve na nzila ya mikanda yina beto kesadilaka na kisalu ya kusamuna, mpe na nzila ya malongi yina beto kebakaka na balukutakanu ya kimvuka mpe balukutakanu ya nene.

Mumbu yango yandi kele ya kukuikama na malongi ya kedika ya Biblia mpe na kiyekua bapesaka yandi ya kusamuna nsangu ya mbote. Yandi kele diaka na mayele na mutindu yandi kengidilaka na nduenga nyonso bima ya Klisto awa na ntoto. (Bisalu 10:42) Yehova kena kusakumuna kisalu ya mumbu yango samu bantu mingi kena kuma Bambangi mpe yandi kena kutatamana kubasisa madia ya kimpeve mingi.​—Izaya 60:22; 65:13.

• Nani Yesu tulaka samu yandi pesaka balongoki na yandi madia ya kimpeve?

• Na wapi mutindu mumbu kele ya kukuikama mpe ya mayele?

Na ntangu ya baklisto ya ntete, mua kimvuka, ‘bantumua na bambuta na Yerusaleme,’ bavuandaka kimvuka ya bantuadisi samu na kubaka banzengolo ya mfunu samu na kimvuka nyonso ya baklisto yina metulama mafuta. (Bisalu 15:2) Samu na kubaka nzengolo yina bau nyonso kendima, bavuandaka tadila yina Masonukua metuba mpe kubika mpeve ya Nzambi tuadisa bau. (Bisalu 15:25) Bubu yayi mpe, yau kesalamaka mutindu yina.

Nzambi kena kusadila yau samu na kulungisa luzolo na yandi. Bampangi ya babakala yina metulua mafuta na kimpeve bayina kesalaka na Kimvuka ya Bantuadisi kezolaka mingi Mpova ya Nzambi mpe bamemesanaka kubaka banzengolo na mambu metala nsambudulu mpe kisalu na beto. Bau kesalaka lukutakanu sabala na sabala samu na kutadila nsatu ya bampangi ya yinza mvimba. Mutindu kaka yavuandaka na ntangu ya baklisto ya ntete, bimvuka kebakaka malongi yina mekatuka na Bibila na nzila ya mikanda to ya bankengidi batambudi to na nzila ya bampangi ya nkaka. Yau kesalaka ti dibuta ya Nzambi vuanda na bumosi. (Bisalu 16:4, 5) Kimvuka ya Bantuadisi ketuadisaka kisalu ya kukubika madia ya kimpeve, kekindisaka beto nyonso, mpe ketuadisaka mambu yina metala kusolama ya bampangi ya babakala yina lenda baka biyekua.

Yau kelandaka lutuadusu ya mpeve ya Nzambi. Kimvuka ya Bantuadisi ketadilaka Yehova, Mfumu Yina Meluta Nyonso na luyalanganu ya mvimba , mpe Yesu, Mfumu ya Kimvuka, samu na kubaka lutuadusu. (1 Bakorinto 11:3; Baefeze 5:23) Bampangi yango bakekukitalaka ve mutindu bamfumu ya bisadi ya Nzambi. Kansi, kintuadi na baklisto ya nkaka yina metulua mafuta na kimpeve, bau kena ‘kutatamana kulanda Muana-Dimeme kisika nyonso yina yandi kena kuenda.’ (Luzabusu 14:4) Kimvuka ya Bantuadisi kezolaka beto sambilaka samu na bau.

• Banani vuandaka na kimvuka ya bantuadisi na baklisto ya ntete?

• Wapi mutindu Kimvuka ya Bantuadisi kesosaka lutuadusu ya Nzambi bubu yayi?

Nkumbu Betele yamekatuka na ndinga Ebreo, mpe yau zola tuba “Yinzo ya Nzambi.” (Kubanda 28:17, 19) Nkumbu yango mefuana mbotembote samu na kuzonzila bayinzo yina Bambangi ya Yehova mekubikaka na babuala mingi, bisika bau ketuadisaka mpe bau kebongisaka kisalu ya kusamuna. Kimvuka ya Bantuadisi kesalaka na biro ya nene ya Bambangi ya Yehova yina kele na kizunga ya New York, na États-Unis, mpe banda kuna yau ketuadisaka bisalu ya bafiliale nyonso yina kele na bayinsi mingi. Bayina kesalaka na bisika yango mebokudulua bau nyonso dibuta ya Betele. Mutindu yina yau kevuandilaka na dibuta, bampangi ya dibuta ya Betele kevuandaka mpe kesalaka kisika mosi, kekudiaka kisika mosi, kelongukaka Biblia kintuadi na bumosi.​—Nkunga 133:1.

Kisika mosi ya mfunu mingi yina bampangi kekukipesaka na ntima mosi. Na Babetele nyonso, bampangi ya babakala mpe ya banketo kekukipesaka ntangu nyonso samu na kusala luzolo ya Nzambi mpe samu na mambu metadila Kimfumu ya Nzambi. (Matayi 6:33) Bau kefutamaka ve, kansi bakepesaka bau nyonso kisika ya kuvuanda, madia mpe mua mbongo samu na bansatu na bau ya fiotifioti. Konso muntu na Betele kele na kisalu yina bamepesaka yandi, yalenda vuanda na biro, na kisika ya kulambila, to na kisika bakekudiaka. Bayankaka kesalaka na kisika ya kubasisa to ya kukubika mikanda na masini; bayankaka ketulaka bunkete na bachambre, kesukulaka bilele, kebongisaka bamasini, to mambu ya nkaka.

Kisika kisalu kesalamaka ngolo samu na kusadisa kisalu ya kusamuna Kimfumu kuenda na ntuala. Mfunu ya ntetentete ya Betele yau kele ti kedika ya Biblia kumina bantu mingi kulutila. Na kifuani, mua mukanda yayi nge mesimba yau kena kusadisa bantu mingi bazaba kedika. Yasonamaka na lutuadusu ya Kimvuka ya Bantuadisi, mpe yau tindamaka na nzila ya Internet na bankama ya baekipi ya bambangudi yina kele na yinza ya mvimba. Yau basisamaka na bamasini yina kebasisaka mikanda mingi na ntangu ya fioti, yina kele na Babetele ya nkaka. Na manima, yau tindamaka na bimvuka kuluta 110 000. Dibuta ya Betele kepesaka maboko na bisalu nyonso yina, mpe yau kena kusala ti kisalu ya kusamuna nsangu ya mbote yina fuana salama mbangumbangu lungama.​—Marke 13:10.

• Banani kesalaka na Betele, mpe yinki mebongisama samu na bau?

• Wapi kisalu yina fuana salama mbangumbangu bampangi ya Betele mosimosi kepesaka maboko?

Bampangi ya Betele kepesaka maboko na badepartema mutindu na mutindu, mpe kisalu ya bau kesimbaka kisalu ya kusamuna na buala mosi to mingi. Balenda sala na baekipi ya kubangula mikanda, kubasisa bazulunale na masini, kukubika mikanda, kutinda mikanda na bisika ya nkaka, kubasisa ba CD to bavideo, to kusala mambu ya nkaka.

Komite ya filiale ketuadisaka kisalu. Kimvuka ya Bantuadisi ketulaka Komite ya filiale yina kele na bakuluntu tatu to kuluta, yina mefuanana, samu batuadisa biro ya filiale. Bampangi yango kezabisaka Kimvuka ya Bantuadisi mutindu mambu kena kutambudila mpe mambu ya mpasi nyonso yina kebasikaka na buala yina bau kena kutuadisila kisalu. Yau kesadisaka Kimvuka ya Bantuadisi basola mambu yina bau ketubila na mikanda yina kebasika mpe na balukutakanu ya kimvuka mpe na balukutakanu ya nene. Mbala na mbala, Kimvuka ya Bantuadisi kefidisaka bantalani na yau samu na kutala babiro ya filiale mpe kupesa bampangi ya bakomite ya filiale malongi samu na kulungisa biyekua na bau. (Bingana 11:14) Na lukutakanu mosi ya nene, ntalani yango kepesaka diskur samu na kukindisa bampangi ya yinsi yina.

Yau kesadisaka bimvuka ya yinsi yango. Bampangi ya babakala ya nkaka na biro ya filiale kele na kiyekua ya kundima ti bimvuka ya malumalu zibuka mpe bau ketadilaka kusolama ya bakuluntu na basadisi na kisalu. Yakele diaka na bampangi yina ketadilaka kisalu ya bampasudi-nzila, ya bamisionere, ya bankengidi batambudi yina kena sala na terituare ya filiale yango. Bakekubikaka balukutakanu ya fioti mpe ya nene, baketuadisaka bisalu ya kutunga Bayinzo ya Kimfumu ya malumalu, mpe bau kesalaka nyonso samu mikanda kumina bimvuka na kulanda bansatu na bau. Nyonso yina kesalamaka na biro ya filiale kele samu kisalu ya kusamuna salama na kudedama.​—1 Bakorinto 14:33, 40.

• Wapi mutindu Komite ya filiale kesadisaka Kimvuka ya Bantuadisi?

• Wapi mambu kesalamaka na biro ya filiale?

Samu “nsangu ya mbote” samunua na mutindu mebonga na ‘bantu ya makanda nyonso, ti ya bandinga nyonso, ti ya bayinsi nyonso,’ beto kena kubasisa mikanda na bandinga kuluta 750. (Luzabusu 14:6) Wapi mutindu beto kesalaka kisalu ya nene mutindu yina? Beto kesalaka yau na lusalusu ya bansoniki yina kele na bayinsi mutindu na mutindu mpe na ba kinkuku ya bambangudi​—bau nyonso bakele Bambangi ya Yehova.

Yau kesonamaka ntete na Kingelesi. Bampangi ya Kimvuka ya Bantuadisi ketuadisaka kisalu ya Departema ya Bansoniki na biro ya nene ya Bambangi ya Yehova. Departema yango ketadilaka kisalu ya bansoniki yina kele na Biro ya nene mpe babiro ya bafiliale ya nkaka. Mutindu bansoniki ya beto kele bantu ya babuala ya mutindu na mutindu, baketubilaka mimesano ya mutindu na mutindu, mpe yau kesalaka ti mikanda na beto pesa kilengi na bantu ya yinza mvimba.

Na manima, bakefidisaka yau na bambangudi. Na manima ya kusonika disolo mosi, bau kebongisaka yau diaka mpe, kana yamendimama, bakefidisaka yau na baekipi ya bambangudi ya yinza ya mvimba na nzila ya Internet. Bampangi yina kebangulaka disolo yango ketalaka na dikebi nyonso kana bangindu yango mebangulua mbote, mpe na nsuka, bau ketangaka yau samu na kutala kana yau mewisana mbote na bansiku ya ndinga. Bambangudi yango kesalaka nyonso basola ‘bampova ya sikisiki ya kedika’ samu babasisa mbotembote ngindu ya mvimba ya Lingelesi na ndinga yina bau kena kubangula.​—Longi 12:10.

Baordinatere kesadisaka samu kisalu kuenda mbangu. Ordinatere lenda baka ve kisika ya bansoniki to ya bambangudi. Kansi, kisalu ya bau lenda salama mbangu kana bau kena kusadila badiksionere, bima ya kusosasosa mpe bima ya kusadila ya nkaka yina kele na ordinatere. Bambangi ya Yehova mebasisaka programi mosi ya ordinatere bamebokila MEPS (Système électronique d’édition multilingue), yina kesadisaka samu na kubongisa masonukua mpe bizizi na bandinga mingi samu yau basisama na imprimerie.

Samu na yinki beto kesalaka ngolo mutindu yina, ata samu na bandinga yina ketubamaka kaka na bantu fioti? Samu luzolo ya Yehova kele ti “bantu ya mutindu nyonso bavuka mpe bazua nzayilu ya sikisiki ya kedika.”​—1 Timote 2:3, 4, NW.

• Wapi mutindu mikanda ya beto kesonamaka?

• Samu na yinki beto kebangulaka mikanda ya beto na bandinga mingi mutindu yayi?

Mvula na mvula, nkubukulu ya beto kebasisaka bamilio ya Bablia na mikanda ya nkaka, mpe beto kekabulaka yau ofele. Beto ketungaka Bayinzo ya Kimfumu, babiro ya filiale, mpe beto kekengidilaka yau. Beto kesadisaka mafunda ya bampangi ya dibuta ya Betele na bamisionere, mpe beto kesadisaka bantu na ntangu ya mambu ya mpasi. Ntembe kele ve, nge lenda kuyuvusa: ‘Wapi kekatukaka mbongo nyonso yina?’

Beto kelombaka dime ve, mpe beto kesalaka bansisani ve. Ata ti kisalu ya beto ya kusamuna nsangu ya mbote kelombaka mbongo mingi, beto kelombaka bantu mbongo ve. Yameluta bamvula nkama mosi, nimero ya zole ya zulunale Nzozulu ya Nkengi tubaka ti beto mendima ti Yehova muntu kena sadisa beto, mpe ti beto “lenda ve kulomba to kusosa mbongo na bantu samu na kusadisa beto,” mpe beto melombaka mbongo ata kilumbu mosi ve!​—Matayi 10:8.

Kisalu ya beto mesimbama na makabu yina bantu kepesaka na luzolo ya bau mosi. Bantu mingi ketalaka kilengi na kisalu na beto ya kulonga Biblia, mpe bakepesaka makabu samu na yau. Bambangi bau mosi mpe ketalaka kilengi na kupesa na kiese ntangu na bau, ngolo na bau, mbongo na bau mpe bima na bau ya nkaka samu luzolo ya Nzambi salama na ntoto ya mvimba. (1 Bansangu 29:9) Na Yinzo ya Kimfumu, beto kele na bakesi ya makabu kisika yina bantu yina zola tula makabu lenda tula yau. To makabu lenda salama na site ya beto, jw.org. Mbongo mingi kekatukaka na bantu kena mbongo mingi ve, bayina mefuanana na nkento yina ya mputu mefuilaka bakala, yina Yesu kumisaka samu yandi tulaka mbongo ya bisengo zole na kesi ya makabu na tempelo. (Luke 21:1-4) Yau yina, muntu na muntu lenda “katula ndambu ya mbongo na yandi” samu na kupesa “mutindu yandi [mekanisa] kupesa.”​—1 Bakorinto 16:2; 2 Bakorinto 9:7.

Beto mendima ti Yehova ketatamana kusimba bantima ya bayina mezola kukumisa yandi na ‘bima na bau ya mfunu’ samu na kupesa maboko na kisalu ya Kimfumu, samu luzolo na yandi lungama.​—Bingana 3:9.

• Yinki kesuasikisaka nkubukulu ya beto na mabundu ya nkaka?

• Wapi mutindu mbongo ya makabu kesadiluaka?

Mutindu nkumbu Yinzo ya Kimfumu melakisa yau, malongi ya Biblia yina kelongamaka kuna metala ntetentete Kimfumu ya Nzambi, yina vuandaka yintu ya diambu yina​—Yesu tubilaka mingi na malongi na yandi.​—Luke 8:1.

Yau kele bisika ya nsambudulu ya kedika na buala to na kartye. Bayinzo ya Kimfumu yakele bisika yina Bambangi ya Yehova kebongisaka kisalu ya kusamuna nsangu ya mbote ya Kimfumu ya Nzambi. (Matayi 24:14) Bayinzo ya Kimfumu nyonso kevuandaka mutindu mosi ve, kansi nyonso kevuandaka na bima mingi mingi ve, mpe na bisika mingi, bimvuka mingi kesadilaka Yinzo ya Kimfumu kaka mosi. Na bamvula meluta, beto metunga mafunda ya Bayinzo ya Kimfumu ya malumalu, (beto lenda zonza ti kilumbu na kilumbu Bayinzo ya Kimfumu tanu ketungamaka) samu bimvuka kena kubuelama kaka. Yau kesalamaka wapi mutindu?​—Matayi 19:26.

Yau ketungamaka na mbongo ya makabu yina mekatuka na yinza ya mvimba. Makabu yango kefidisamaka na biro ya filiale samu bimvuka lenda kusadila yawu samu na kutunga to kubongisa Yinzo ya Kimfumu.

Yau ketungamaka na bampangi mutindu na mutindu, mpe bakefutaka bau ve. Na bayinsi mingi, Bimvuka ya kutunga Bayinzo ya Kimfumu mebongisama. Bimvuka ya bantungi mpe ya bampangi yina kepesaka bau maboko bau kekuendaka tunga Bayinzo ya Kimfumu na babuala mpe na bisika ya nkaka ya ntama. Bau ketuadisaka kisalu ya kutunga mpe bakelakisaka bampangi ya bisika yango mutindu ya kusala kisalu. Na babuala ya nkaka, Bakomite ya kutunga ya Kizunga ketulamaka samu na kutuadisa kisalu ya kutunga mpe kubongisa Bayinzo ya Kimfumu ya kizunga mosi bamepesa bau. Bakuluntu yina mezaba kisalu ya kutunga mbote bau kesadisaka bimvuka banda na mbandukulu tii na nsuka ya ntungulu, mpe bampangi ya nkaka yina mezaba kisalu bakepesaka bimvuka maboko. Kisika nyonso yina bau kena kutunga, kisalu ya ngolo kesalamaka ni na bampangi ya kimvuka kisika kisalu kena kusalama. Mpeve ya Yehova mpe bangolo yina bampangi kesalaka na ntima mosi ni yau kesalaka ti kisalu yango salama.​—Nkunga 127:1; Bakolose 3:23.

• Samu na yinki bakebokilaka bisika na beto ya nsambudulu Yinzo ya Kimfumu?

• Yinki kesalaka ti Bayinzo ya Kimfumu tungama na yinza ya mvimba?

Yinzo ya Kimfumu nyonso ya Bambangi ya Yehova yakele na nkumbu ya santu ya Nzambi. Yau yina, beto ketalaka ti kupesa maboko samu na kukengidila yau yavuanda bunkete, kitoko mpe mbote yau kele diambu ya lukumu mpe ya mfunu mingi na nsambudulu na beto. Beto nyonso lenda pesa maboko.

Pesa maboko samu na kutula bunkete na manima ya lukutakanu. Na manima ya lukutakanu nyonso, bampangi ya babakala mpe ya banketo bakevuandaka na kiese ya kutula mua bunkete na Yinzo ya Kimfumu. Mbala mosi na sabala, beto ketulaka bunkete mingi kuluta na Yinzo ya Kimfumu ya mvimba. Kuluntu mosi to kisadi na bisalu mosi ketuadisaka bisalu yango. Mbala mingi, yandi ketadilaka liste ya mambu yina fuana salama. Kana yau mefuana, bampangi ya nkaka kekikupesaka samu na kukombola yau, kusukula yau, kukusuna bameza, bakiti, to bisika ya nkaka ya kuvuanda, kubongisa bakiti, kusukula bafenetre mpe bitalatala, kulosa mvindu na kisika na yau, mpe kusala bunkete na nganda mpe na kati ya lupangu. Beto kesolaka mpe kilumbu mosi na mvula samu na kutula bunkete mbotembote kuluta na Yinzo ya Kimfumu. Beto kepesaka diaka bana na beto mua bisalu ya kusala samu na kulonga bau bazitisa kisika na beto ya nsambudulu.​—Longi 5:1.

Pesa maboko kana yamelomba kubongisa kima mosi yina mebeba. Mvula na mvula, beto ketalaka mbotembote Yinzo ya Kimfumu ya beto, yavuanda na kati to na nganda. Yau kesadisaka beto na kubongisa yau mbala na mbala samu yavuanda ntangu nyonso mbote, mpe samu beto bebisa mbongo mpambampamba ve. (2 Bansangu 24:13; 34:10) Yinzo ya Kimfumu yina kele ya kuvedila mpe yina bakekengidila mbote kele kisika yina mefuana samu na kusambila Nzambi ya beto. Kana beto kena kupesa maboko na kisalu yango, beto kelakisa ti beto kezolaka mingi Yehova mpe kisika ya beto ya nsambudulu. (Nkunga 122:1) Yau kesala diaka ti bantu kumisa nsambudulu ya beto.​—2 Bakorinto 6:3.

• Samu na yinki beto fuana baka na kusakana ve diambu metadila kutula bunkete na kisika ya beto ya nsambudulu?

• Yinki kele bankubukulu samu na kukengidila Yinzo ya Kimfumu ya beto?

Nge kesepela kusosasosa samu na kubuela nzayilu na nge ya Biblia? Nge kele na nsatu ya kubakula verse mosi ya Biblia, to kuzaba muntu mosi to kisika mosi yina Biblia metubila? To nge mekukiyuvusaka kana Mpova ya Nzambi lenda sadisa nge na diambu mosi yina kena kutungisa nge? Kana yau kele mutindu yina, kuenda sosa na biblioteke ya Yinzo ya Kimfumu.

Yau kele na mikanda mpe bima ya nkaka samu na kusosasosa. Ntembe ve, nge kele ve na mikanda nyonso ya Bambangi ya Yehova yina ketubilaka Biblia, yina mebasikaka na ndinga ya nge. Kansi na biblioteke ya Yinzo ya Kimfumu, yakele na mikanda mingi yina mekatuka kubasika. Yau lenda vuanda na bambangudulu ya nkaka ya Biblia, diksionere mosi ya mbote, mpe mikanda ya nkaka samu na kusosasosa. Nge lenda sadila bima nyonso yina kele na biblioteke tekila mpe na manima ya lukutakanu. Kana ordinatere kele, yau lenda vuanda na Watchtower Library. Yau kele biblioteke ya elektroniki yina kele na mikanda na beto mingi mpe yina kele pete samu na kusosasosa diambu, mpova to verse mosi.

Bana ya Lukolo ke sadilaka yawu na lukutakanu ya Luzingu mpe Kisalu. Nge lenda sadila mikanda ya biblioteke ya Yinzo ya Kimfumu ntangu nge kena bongisa masolo ya nge. Nkengidi ya lukutakanu ya Luzingu mpe Kisalu kele na kiyekua ya biblioteke yango. Yandi kele diaka na kiyekua ya kubuela mikanda nyonso mekatuka basika mpe kutula mikanda na mulongo. Yandi to mpangi yina kelongukaka na nge Biblia balenda lakisa nge muntindu nge lenda tala diambu nge kena kusosa. Kansi, muntu mosi ve fuana baka mukanda ya biblioteke ya Yinzo ya Kimfutu mpe kunata yau. Beto fuana kusadila mikanda yango na mayele mpe kusonika na kati ve.

Biblia metuba ti samu na kubaka ‘mbotembote nzayilu ya Nzambi,’ beto fuana sosasosa mutindu ‘bima ya mfunu yina mesuekama.’ (Bingana 2:1-5) Biblioteke ya Yinzo ya Kimfumu lenda sadisa nge samu nge banda kusosa nzayilu yango.

• Na Yinzo ya Kimfumu, wapi bima lenda sadisa samu na kusosasosa?

• Nani lenda sadisa nge samu nge zaba kusadila biblioteke mbote?

Yesu Klisto tubilaka balongoki na yandi ti “mwinda na beno fuana pela na meso ya bantu. Mpilina bau ketala mambu ya mbote yina beno kesalaka, na mutindu yina bau kepesa lukumu na Tata na beno kele na zulu.” (Matayi 5:16) Yau yina beto kena kusadila mbote mayele mutindu na mutindu ya bilumbu yayi, yavuanda mpe Internet. Site ya beto, jw.org kele site officiel ya Bambangi ya Yehova, kisika nge lenda tala mambu yina bau kendimaka mpe bisalu na bau. Wapi mambu nge kekuta na site yango?

Nge kekuta bamvutu ya Biblia samu na biuvu yina keyuvusamaka mingi. Nge lenda baka bamvutu samu na biuvu ya mfunu mingi yina bantu keyuvusaka. Na kifuani, batrakte Kilumbu kele yina bampasi ke zimbana? mpe Bantu ya kufwa lenda ya matsyeleka kuzinga dyaka? kele na Internet na bandinga kuluta 600. Nge ketala diaka Biblia Mbalula ya Nsi-Ntoto ya Mpa na bandinga kuluta 130, mpe mikanda yankaka yina ketubilaka Biblia. Yalenda vuanda mukanda Inki Biblia Kelongaka Mpenza? mpe bazulunale Nzozulu ya Nkengi [La Tour de Garde] na Telema! [Réveillez-vous !] mebasika malumalu. Nge lenda tanga mingi ya mikanda yango to kuwa yau na Internet, to nge lenda kubasisa yawu na mutindu ya MP3, PDF, to EPUB. Nge lenda kubasisa mpe masolo ya nkaka na papye samu nge pesa muntu na ndinga na yandi! Yakele na mikanda ya nkaka yina bametula na video na bandinga ya mutindu na mutindu ya mababa. Nge lenda baka badrame ya kutanga Biblia to ya nkaka, mpe miziki ya kitoko yina nge lenda kuwa na ntangu yina nge mezola.

Nge kekuta diaka mambu ya nkaka yina metadila Bambangi ya Yehova. Nge kekuta kuna bansangu ya malumalu mpe bavideo yina metala kisalu ya beto na yinza ya mvimba, mpe mambu yina mekumina Bambangi ya Yehova, mpe lusalusu yina beto pesaka bampangi yina mebuila mambu ya mpasi. Nge lenda baka diaka bansangu yina metala balukutakanu ya beto yina kena kuiza, mpe baadresi na banimero ya telefone ya babiro ya bafiliale.

Nyonso yina kena kusadisa beto beto lemisa kedika ya Biblia tii na nsuka ya ntoto. Yau kena sadisa bantu ya bayinsi nyonso, yavuanda na babuala ya madidi ya ngolo mutindu Antarctique. Beto kena kusambila ti mpova ya Yehova ‘yamwangana kaka nswalu-nswalu’ na yinza ya mvimba, samu na nkembo ya Nzambi.​—2 Batesalonika 3:1.

• Wapi mutindu site officiel ya beto jw.org kena sadisa bantu mingi kuluta balonguka kedika ya Biblia?

• Wapi mambu nge kesepela kusosa na site ya beto ya Internet?