Buke zokuhova zoVahompa
1 Hompa Ndafita kwa kurupire unene ntani nampili ngomu ngava mu kudumike nonguwo, age simpe nga zuvhu mufu. 2 Vakareli vendi tava mu tantere asi: “Hompa, ninka tu ku paparere ko mukadona ogu ga dira kuligwanekera rumwe panyama nomugara. Age nga ku ruganena nokukupakera mbili ntani nga rara pepi nove, yipo ngo dire kuzuvha mufu.” 3 Makura tava papara mosirongo nasinye saIsraeli mukadona gomuwa unene mosipa dogoro tava gwana Abisaga gomoSunemu, tava mu twara kwahompa. 4 Mukadona ogo kwa kere muwa unene mosipa ntani nga ruganene hompa nokumupakera mbili, nye hompa kapi ga ligwanekerere nage panyama.
5 Posiruwo oso, Adoniya munaHagiti kwa here kupangera, ta tanta asi: “Nyame ngani kara hompa!” Age kwa ninkire vantu va mu ruganene etemba ntani kwa paparere varondi wononkambe novagara 50 ngava pite komeho zendi. 6 Nye oguhwe kapi va mu pulire* eyi ga yi ruganenene. Adoniya nage muwa unene ga kere ntani yige ga kweme Abisaromo mezimo lyawo. 7 Age kwa uyungire naJowabu munaSeruya ntani nomupristeli Abiyatara. Awo kwa vaterere Adoniya ntani kwa mu kwatesere ko. 8 Nye mupristeli Sadoko naBenaya munaJehoyada, nomuporofete Natana naSimeyi naReyi ntani novakwayita vaNdafita wononkondo, kapi va kwatesere ko Adoniya.
9 Konyima, Adoniya kwa zembe nonzwi, nongombe ntani yimuna yokuneta pepi nemanya lyaSohereti eli lya kara pepi naEni-rogeli. Age kwa zigidire vana vahompa navenye wovagara novagara navenye womorudi rwaJuda ava ngava ruganene hompa. 10 Nye age kapi ga zigidire muporofete Natana naBenaya novakwayita vaNdafita wononkondo ndi mumbyendi Saromo. 11 Makura Natana ta pura Bateseba, ozina vaSaromo asi: “Ngoso kapi ono yi zuvhu asi Adoniya munaHagiti ana kara hompa, ano hompa gwetu Ndafita kwato eyi ana diva ko? 12 Yipo nye, nina kanderere wiza ni ya kutantere eyi no rugana, yipo o popere mwenyo goge nogu gwamunoge Saromo. 13 Zende kwahompa Ndafita o ka mu pure asi: ‘Hompa gwange, nani kapisi nyove wa tumbwidilire nge ame mukareli goge asi munange Saromo nga ku kwama mouhompa ntani yige nga hingira posipundi soge souhompa ndi? Morwasinke nye Adoniya ana karere hompa?’ 14 Apa no ka uyunga nahompa, ame nani ka wiza ni ya kwatese ko eyi no ka uyunga.”
15 Makura Bateseba ta zi kwahompa, ogu ga kere monzugo zendi. Hompa kwa kurupire unene ano Abisaga gomoSunemu kwa pakerere mbili hompa. 16 Bateseba ta linyongamene komeho zahompa, ano hompa ta mu pura asi: “Yisinke ono hara ni ku ruganene?” 17 Bateseba ta tanta asi: “Hompa, ove kwa tumbwidira nge ame mukareli goge medina lyaJehova Karunga goge asi munange Saromo nga ku kwama mouhompa ntani yige nga hingira posipundi soge souhompa. 18 Nye Adoniya yige ana kara hompa ntani ove hompa gwange kwato eyi ono diva ko. 19 Age kuna zamba nongombe, yimuna yokuneta ntani nononzwi dononzi. Age kuna zigida vana vahompa wovagara navenye nomupristeli Abiyatara naJowabu mukurona govakwayita, nye age kapi ana zigida mukareli goge Saromo. 20 Hompa gwange, ngesi Vaisraeli navenye nyove vana kundindira o va tantere ogu nga ku kwama mouhompa a hingire posipundi soge souhompa. 21 Nsene kapi no yi rugana, konyima zapa ngo fa ngwendi onyokokuru, name namunange Saromo ngava tu tekura ngwendi varwanesi.”
22 Apa ga uyungire Bateseba nahompa, muporofete Natana ta wiza. 23 Makura hompa tava mu tantere asi: “Muporofete Natana ana ya siki!” Natana ta zi komeho zahompa makura ta ka linyongamena. 24 Natana ta pura asi: “Hompa gwange, nani ove kwa tanta asi Adoniya nga ku kwama mouhompa ntani yige nga hingira posipundi soge souhompa ndi? 25 Yeeyi age naina kuna zi a ka zambe nongombe, yimuna yokuneta nononzwi dononzi ntani age kuna zigida vana vahompa wovagara navenye, vapitisili wovakwayita nomupristeli Abiyatara. Awo kuna kulya nokunwa kumwe nage ntani kuna kutanta asi: ‘Hompa Adoniya a kare nomwenyo gomure!’ 26 Nye age kapi ana zigida nge ame mukareli goge nomupristeli Sadoko naBenaya munaJehoyada ntani mukareli goge Saromo. 27 Hompa gwange, nyove ono va pulisire va yi rugane wa hana kutantera mukareli goge asi yilye nga ku kwama mouhompa a hingire posipundi soge ndi?”
28 Hompa ta tanta asi: “Zigidira nge Bateseba.” Makura Bateseba ta wiza ta ya sikama komeho zahompa. 29 Makura hompa ta tanta asi: “Tani gana kwaJehova Karunga goMunamwenyo ogu ga popera nge momaudigu gange nagenye asi 30 neina ame tani rugana eyi na ku tumbwidilire medina lyaJehova Karunga goVaisraeli asi: ‘Munoge Saromo yige nga kwama nge mouhompa ntani yige nga hingira posipundi sange souhompa.’” 31 Makura Bateseba ta linyongamene komeho zahompa ntani ta tanta asi: “Hompa gwange Ndafita ngano a kare nomwenyo gomure!”
32 Poopo ngoso, hompa Ndafita ta tanta asi: “Zigidira nge mupristeli Sadoko nomuporofete Natana ntani naBenaya munaJehoyada.” Makura tava wiza kwahompa. 33 Hompa ta va tantere asi: “Zendeni kumwe novakareli vange ntani ka rondekeni munange Saromo ponsino zange,* mu ze nage koGihoni. 34 Mupristeli Sadoko nomuporofete Natana yiwo nava ka mu gwaveka kevango olyo, a kare hompa goVaisraeli, konyima ka fudeni ruvinga mu ka tante asi: ‘Hompa Saromo a kare nomwenyo gomure!’ 35 Makura ka tengureni kumwe nage, ano age nga ya hingira posipundi sange souhompa ntani yige nga kwama nge mouhompa. Ame ngani mu tura a kare mupitisili goVaisraeli norudi rwaJuda.” 36 Makura Benaya munaJehoyada ta tantere hompa asi: “Amen! Ngano Jehova Karunga ogu a karere hompa gwange a yi kwatese ko. 37 Ngano Jehova a kare naSaromo ngwendi moomu ga kere nahompa gwange ntani ngano a ninke upangeli wendi u kare nononkondo kupitakana wahompa gwange Ndafita.”
38 Makura mupristeli Sadoko, muporofete Natana, Benaya munaJehoyada ntani Vakereti noVapereti, tava zi tava ka rondeka Saromo ponsino zahompa Ndafita, makura tava mu twara koGihoni. 39 Mupristeli Sadoko ta gusa ruvinga romagadi oru rwa kere motende, ta gwaveke Saromo. Awo tava fudu ruvinga, ano vantu navenye tava zigire asi: “Hompa Saromo a kare nomwenyo gomure!” 40 Konyima vantu navenye tava mu kwama va kanduke, tava sivi nonsiva ntani awo kwa hefe unene dogoro evhu tali gaguka, morwa ezogerero lyawo.
41 Apa ga mene kulya Adoniya kumwe novantu ava ga zigidire, tava yi zuvhu. Jowabu apa ga zuvhire muhagaro goruvinga, ta tanta asi: “Morwasinke mositata muna karere ezogerero?” 42 Age Jowabu simpe kuna kuuyunga, Jonatana muna gomupristeli Abiyatara ta ya siki. Makura Adoniya ta tanta asi: “Wiza, yeeyi ove mugara gomuwa* ntani nampo ono kara nombudi zongwa.” 43 Nye Jonatana ta limburura Adoniya asi: “Hawe, hompa gwetu Ndafita ana tura Saromo a kare hompa. 44 Hompa kuna mu ninki a ze kumwe nomupristeli Sadoko nomuporofete Natana naBenaya munaJehoyada ntani noVakereti noVapereti, ano awo kuna mu ninki a ronde ponsino zahompa. 45 Makura mupristeli Sadoko nomuporofete Natana, yiyo vana mu gwaveke moGihoni a kare hompa. Konyima yiyo vana wiza awo vana hafa, eyi yiyo mositata muna karere ezogerero eli muna zuvhu. 46 Ano Saromo ana hingire posipundi sahompa. 47 Ntani hena, vakareli vahompa kuna wiza va ya hafese ko hompa gwetu Ndafita. Awo kuna mu tantere asi ngano Karunga gwendi a ninke edina lyaSaromo li divikwe kupitakana lyendi ntani ngano a ninke upangeli waSaromo u pitakane wendi. Makura hompa yiyo ana linyongamene age pombete. 48 Ano hompa nage kuna tanta asi Jehova Karunga goVaisraeli va mu hamberere, morwa age neina ana pulisire muntu a hingire posipundi sendi age kuna kuyimona!”
49 Makura vantu ava ga zigidire Adoniya tava tukuka, ano navenye tava katuka, nkenye ogu ta zi nonzira zendi. 50 Adoniya nage kwa tukukire morwa Saromo, makura ta katuka ta zi ta ka kwata konombinga dosizambero. 51 Saromo tava mu tantere asi: “Adoniya kuna kutjira hompa Saromo. Age ana kwata konombinga dokosizambero ntani kuna kutanta asi kapi na tunda ko dogoro hompa Saromo a tumbwidire mukareli gwendi asi kapi na mu dipaga norufuro.” 52 Makura Saromo ta tanta asi: “Nsene na likida nkareso zongwa, ame kapi nani pulisira nampili ruhuki rwendi rumwe ru gwire pevhu, nye nsene na rugana yininke yoyidona, ngava mu dipaga.” 53 Hompa Saromo ta tumu vantu va ka mu guse ko kosizambero. Konyima, Adoniya ta wiza ta ya linyongamene komeho zahompa Saromo, ano Saromo ta mu tantere asi: “Zende kembo lyoge.”