Buke zokuhova zoVahompa

6 Saromo kwa tamekere kudika nzugo zaJehova* konyima zapa da pitire po nomvhura 480 kutunda apa va tundire Vaisraeli* moEgipite. Azo kwa kere mvhura zaune zepangero lyaSaromo moIsraeli, mokwedi kwaSifu* (kutanta asi kwedi kwauvali). 2 Ntembeli zaJehova ezi ga tungire hompa Saromo, monaure kwa kere nometa 27,* monompatji nometa ntane,* ano momusika nometa 13.* 3 Nzugo zokuhwililira ezi za kere komeho zonzugo zokupongoka,* monompatji kwa kere nometa ntane ngwendi nometa domonompatji dontembeli. Kutunda pevero lyazo dogoro pevero lyontembeli kwa kere nometa ne noharufa.*

4 Age kwa tulire kontembeli makende* 5 ntani kwa tungire hena ekuma limwe pepi nekuma lyontembeli. Alyo kwa likundurukire kekuma lyevango lyokupongoka* ntani kevango lyokupongokerera.* Kekuma nalinye olyo kwa tulire ko nonkondwa. 6 Nonkondwa depevhu monompatji dado kwa kere nometa mbali noharufa,* nonkondwa dopokatji monompatji kwa kere nometa ntatu,* ano nonkondwa dekeguru monompatji kwa kere nometa ntatu noharufa.* Saromo kwa tulire yininke kekuma nalinye lyokontembeli pwankenye rugorongwa, yipo va kambeke po nongundi ntani va dire kutjokora makero mekuma lyontembeli.

7 Nzugo ozo kwa zi dikire nomamanya aga va sima aga va wapaikire nare. Yipo nye, apa va zi dikire, vantu kapi va zuvhire muhagaro gonohamara ndi gomakuva ndi goyiruganeso yoyivera. 8 Evero lyokononkondwa depevhu kwa kere koMbindakano* zontembeli ntani kwa kere ko sirondero esi sa zire konkondwa zopokatji dogoro konkondwa zekeguru. 9 Saromo kwa twikilire kudika ntembeli dogoro ta zi mana. Age kwa tulire keguru lyontembeli yitji yosedeli noyipirangi yosedeli. 10 Age kwa dikire nonkondwa edi da kundurukidire ntembeli. Nkenye nkondwa kwa kere nometa mbali noharufa momusika ntani ado kwa di gwanekedesere kontembeli noyitji yosedeli.

11 Posiruwo oso, Jehova ta tumu mbudi kwaSaromo asi: 12 “Nsene ngo sikisa mo noveta nonompangera dange ntani noyipango yange, ame ngani sikisa mo eyi na tumbwidilire oguho Ndafita kuhamena nzugo ezi ono kudika. 13 Ame ngani tunga mokatji koVaisraeli ntani kapi ngani siga vantu vange, Vaisraeli.”

14 Saromo kwa twikilire kutunga nzugo dogoro ta zi mana. 15 Age kwa tulire yipirangi yosedeli monda zontembeli monompatji, kutundilira pevhu dogoro keguru. Age kwa tulire hena porugorongwa yipirangi yapeke.* 16 Konyima zontembeli kwa tungire ko nkondwa zonometa ntane monaure noyitji yosedeli kutundilira pevhu dogoro keguru ntani nkondwa ozo yizo za kere evango lyokupongokerera. 17 Nkondwa zomontembeli ezi za kere komeho, yizo za kere evango lyokupongoka.* Alyo kwa kere nometa 18* monaure. 18 Poyipirangi yosedeli eyi ya kere monda zontembeli kwa fanekere po marupotera nonombya dokutemuna. Kekuma nalinye kwa tulire ko yipirangi yosedeli, ano ekuma kapi lya monekere.

19 Age kwa wapaikire evango lyokupongokerera monda zontembeli yipo a ture mo sikesa saJehova segwanekero. 20 Evango lyokupongokerera monaure kwa kere nometa ntane, monompatji nometa ntane, ano momusika nometa ntane ntani age kwa kwitire evango olyo ngorodo. Ano kosizambero kwa tulire ko yipirangi yosedeli. 21 Saromo kwa kwitire monda zontembeli ngorodo zene-zene ntani age kwa tulire mauketanga gongorodo komeho zevango lyokupongokerera eli va kwitire ngorodo. 22 Age kwa kwitire ntembeli nazinye ngorodo dogoro ntembeli nazinye tazi gwaneke. Age kwa kwitire hena ngorodo kosizambero nasinye esi sa kere pepi nevango lyokupongokerera.

23 Age ta rugana vakerubi vavali noyitji yoyire* ava ga tulire mevango lyokupongokerera. Vakerubi owo kwa kere nometa ne noharufa momusika. 24 Evava limwe lyomukerubi kwa hulire ponometa mbali noharufa, ano evava ekwawo nalyo kwa hulire ponometa mbali noharufa. Kutunda kouhura wevava lyomukerubi gumwe dogoro kouhura wevava ekwawo kwa kere nometa ne noharufa. 25 Mukerubi gwauvali nage kwa kere nometa ne noharufa. Ano vakerubi navenye vavali kwa hetakanene. 26 Vakerubi navenye kwa kere nometa ne noharufa momusika. 27 Makura Saromo ta tura vakerubi owo vavali mevango lyokupongokerera ntani awo kwa zenze mavava gawo. Evava lyomukerubi gumwe kwa gumine kekuma limwe ano evava lyomukerubi mukwawo kwa ka gumine kekuma ekwawo. Mavava gawo gamwe kwa ga zenze ntani ago kwa ligwanekere pokatji konzugo. 28 Age kwa kwitire vakerubi owo nongorodo.

29 Komakuma nagenye gomontembeli mevango lyokupongoka ntani mevango lyokupongokerera kwa fanekere ko vakerubi, yitji yonongone ntani nombya dokutemuna. 30 Age kwa kwitire ngorodo porugorongwa rontembeli mevango lyokupongoka ntani mevango lyokupongokerera. 31 Ano kevero lyekevango lyokupongokerera kwa ruganene ko mavero goyitji yoyire, nongundi ntani yikuravero ngoruha rwautano.* 32 Mavero ogo gavali kwa ga rugene noyitji yoyire ntani kwa fanekere po vakerubi, yitji yonongone ntani nombya dokutemuna. Age kwa ga kwitire ngorodo, ano vakerubi noyitji yonongone kwa yi kwitire ngorodo. 33 Age kwa rugene yikuravero yoyitji yoyire yekevero lyevango lyokupongoka* monkedi zokulifana ntani ayo kwa hamenene koruha rwaune.* 34 Age kwa rugene hena mavero gavali goyitji yapeke. Nkenye evero kwa kere ko mavero gavali aga ngaga ligonyo ntani konhi zomavero ogo kwa kere ko yininke* eyi ngayi ga ninkisa ga piruke. 35 Apo kwa fanekere po vakerubi, yitji yonongone nonombya dokutemuna ntani ta yi kwita ngorodo.

36 Age kwa dikire ekuma lyekeharango lyomonda nonomukweyo ntatu domamanya aga va teta ntani mukweyo gumwe goyitji yosedeli.

37 Mokwedi kwaSifu,* momvhura zaune, etateko lyonzugo zaJehova tava mana kulidika. 38 Ano mokwedi kwaBuli* momvhura 11 (kutanta asi kwedi kwauntantatu), nzugo tava mana kuzidika kuliza nomauzera gazo ntani nomu va zi fanekere. Saromo kwa mu gusire nomvhura ntambali mokumana kuzidika.