Vahompa vauvali
1 Konyima zapa ga fire Ahaba, Vamowaba kwa rwanesere Vaisraeli.
2 Ezuva limwe, Ahasiya kwa gwire keguru lyonzugo zendi, ta pitire pekende* eli lya vindama keguru lyonzugo zendi moSamaliya, ta remana. Makura ta tumu vantu, ta va tantere asi: “Zendeni mu ka pure Bara-sebubu karunga govantu womoEkironi nsene ngani veruka ndi hawe.” 3 Nye muengeli gwaJehova ta tantere Eliya* gomoTisibe asi: “Katuka o ze o ka gwane vantu ava ana tumu hompa gwaSamaliya, ka va tantere asi: ‘Ove kuna kuza o ka pure Bara-sebubu karunga govantu womoEkironi morwa moIsraeli mwato Karunga ndi? 4 Yipo nye, Jehova kuna kutanta asi: “Ove kapi ngo tunda pombete ezi ono rara, ove ngo fa.”’” Makura Eliya ta ka za ko.
5 Apa va ka tengwire vantu ava ga tumine, ta va pura asi: “Morwasinke muna ka tengwira usimbu?” 6 Awo tava mu limburura asi: “Ose kuna ligwanekere nomugara ogu ana tu tantere asi: ‘Tengureni kwahompa ogu ana mu tumu mu ka mu tantere asi: “Jehova kuna kutanta asi: ‘Ove kuna kuza o ka pure Bara-sebubu karunga govantu womoEkironi morwa moIsraeli mwato Karunga ndi? Yipo nye, ove kapi ngo tunda pombete ezi ono rara, ove ngo fa.’”’” 7 Makura age tava pura asi: “Ngapi omu ga fana mugara ogu muna gwanekere nage, ogu ana mu tantere nonkango odo?” 8 Awo tava mu limburura asi: “Age kuna dwara erwakani lyonohuki doyikorama ntani kuna limanga liva rosipapa mombunda zendi.” Poopo ngoso, hompa ta tanta asi: “Age kuna kara Eliya gomoTisibe.”
9 Makura hompa ta tumu mugara ogu nga pitisire vakwayita 50 kumwe novantu vendi 50 a ze kwaEliya. Age kwa ka gwene Eliya ana hingire keguru lyondundu, ta mu tantere asi: “Ove mukareli gwaKarunga gousili, hompa kuna hara o ze kwendi.” 10 Nye Eliya ta limburura mugara ogu nga pitisire vakwayita 50 asi: “Nsene asi ame mukareli gwaKarunga gousili, mundiro ngano gu tunde meguru gu ku hwike kumwe novantu woge 50.” Makura mundiro tagu tundu meguru, tagu mu hwike kumwe novantu vendi 50.
11 Makura hompa ta tumu hena mugara gumwe ogu nga pitisire vakwayita 50 kumwe novantu vendi 50 a ze kwaEliya. Age ta ka mu tantera asi: “Ove mukareli gwaKarunga gousili, hompa kuna hara o ze kwendi usimbu.” 12 Nye Eliya ta va limburura asi: “Nsene asi ame mukareli gwaKarunga gousili, mundiro ngano gu tunde meguru gu ku hwike kumwe novantu woge 50.” Makura mundiro tagu tundu meguru, tagu mu hwike kumwe novantu vendi 50.
13 Konyima hompa ta tumu hena mugara gwautatu ogu nga pitisire vakwayita 50 kumwe novantu vendi 50. Nye apa ga zire, ta ka tongamena komeho zaEliya ntani ta mu likwambere pokutanta asi: “Ove mukareli gwaKarunga gousili, na kanderere fira nge nkenda kumwe novakareli woge ava 50. 14 Mundiro ogu ka gu tundire meguru ka gu hwikire vagara vavali ava ava pitisire vakwayita 50 kumwe novantu vawo 50. Yipo nye, fira nge nkenda.”
15 Makura muengeli gwaJehova ta tantere Eliya asi: “Zende kumwe nage, kapisi omu tjire.” Makura age ta katuka, ta zi kumwe nage kwahompa. 16 Eliya ta tantere hompa asi: “Jehova kuna tanta asi: ‘Ove kwa tuma vantu va ka pure Bara-sebubu karunga govantu womoEkironi. Ove kwa yi rugana eyi morwa moIsraeli mwato Karunga ndi? Morwasinke wa dililire kumupura? Yipo nye, ove kapi ngo tunda pombete ezi ono rara, ove ngo fa.’” 17 Makura hompa ta fu ngwendi moomu ga yi tente Jehova kupitira mwaEliya. Mokumona asi age kapi ga kere nomuna gomugara, Jehoramu* ta mu kwama mouhompa. Age kwa tamekere kupangera momvhura zauvali zepangero lyaJehoramu munaJehosafata hompa gorudi rwaJuda.
18 Ano yininke yimwe eyi ga rugene Ahasiya, kwa yi tjanga mobuke zehistoli lyovahompa woVaisraeli.