Vahompa vauvali
20 Konyima, Hisikiya kwa verere dogoro ta hara kufa. Muporofete Jesaya munaAmosi ta zi kwendi, ta ka mu tantera asi: “Jehova kuna tanta asi: ‘Rekera vemepata lyoge yeeyi ntaantani o fe; ove kapi ngo veruka.’” 2 Makura Hisikiya ta pirukire kekuma, ta kanderere kwaJehova asi: 3 “Na kanderere Jehova, diworoka omu na kukarera noulimburukwi nomutjima gwange nagunye ntani ame kwa rugana yininke yoyiwa kosipara soge.” Makura Hisikiya ta lili unene.
4 Komeho Jesaya a ze pokatji keharango lyomombara, Jehova ta mu tantere asi: 5 “Tengura o ka tantere Hisikiya mupitisili govantu vange asi: ‘Jehova Karunga gonyokokuru Ndafita kuna tanta asi: “Ame nina zuvhu ekanderero lyoge ntani nina mono mahodi goge. Ame ngesi tani kuverura. Mezuva lyautatu ove ngo za konzugo zaJehova. 6 Ame tani kugwederere ko nomvhura 15 keparu lyoge ntani ngani kupopera kumwe nositata esi mokuwoko kwahompa gwaAsiliya. Ame ngani popera sitata esi, morwa edina lyange ntani morwa eyi na tumbwidira mukareli gwange Ndafita.”’”
7 Makura Jesaya ta tanta asi: “Reteni sikuki sekuzu lyekukutu.” Makura tava si reta, age ta si tura pesina, ano mwa za siruwo Hisikiya ta veruka.
8 Hisikiya kwa pulire Jesaya asi: “Ngapi omu nani yi diva asi Jehova na verura nge ntani asi mezuva lyautatu ngani za konzugo zaJehova?” 9 Jesaya ta mu limburura asi: “Eyi yiyo nga rugana Jehova mokulikida asi Jehova nga sikisa mo eyi ana uyunga: Ono hara mundunduma goyininke yokurondera* gu pite komeho yikando murongo ndi gu tengure konyima yikando murongo?” 10 Hisikiya ta tanta asi: “Ayo ureru komundunduma gu pite komeho yikando murongo, nye kapisi gu tengure konyima yikando murongo.” 11 Makura muporofete Jesaya ta kanderere kwaJehova, ano Karunga ta ninki mundunduma goyininke yokurondera yaAhasi gu tengure konyima yikando murongo.
12 Posiruwo oso, Berodaki-baradana hompa gwaBabironi munaBaradana ta tumu nombilive nouhwi kwaHisikiya, yeeyi age kwa zuvhire asi Hisikiya kwa verere. 13 Makura Hisikiya ta tambura* vantu ava ga tumine hompa ntani ta va likida nzugopungwiro zendi. Amo kwa kere mo siliveli nongorodo nomagadi goBalisemu nomagadi gamwe gondiro noyirwiso yendi ntani nanayinye eyi ya kere mononzugopungwiro dendi. Hisikiya kwa va likidire nayinye eyi ya kere mombara zendi ntani mosirongo nasinye esi ga pangerere.
14 Konyima, muporofete Jesaya ta zi kwahompa Hisikiya, ta ka mu pura asi: “Yisinke vana kutantere vagara ava ntani kupi vana tundu?” Makura Hisikiya ta mu limburura asi: “Awo kuna tundu kosirongo sokoure saBabironi.” 15 Jesaya ta mu pura hena asi: “Yisinke ono va likida mombara zoge?” Hisikiya ta limburura asi: “Ame kuna va likida nayinye eyi ya kara mombara zange. Kwato eyi nina dili kuvalikida eyi ya kara mononzugopungwiro dange.”
16 Makura Jesaya ta tantere Hisikiya asi: “Purakena eyi ana kutanta Jehova. 17 Jehova kuna kutanta asi: ‘Siruwo kuna kuwiza apa yininke nayinye yomombara zoge ntani yininke nayinye eyi va pungura onyokokuru ngava yi twara koBabironi, kwato eyi ngayi hupa po. 18 Ano vana woge vamwe wovagara ngava va twara kounkwate ntani ngava kara marenga mombara zahompa gwaBabironi.’”
19 Makura Hisikiya ta tantere Jesaya asi: “Eyi ana tanta Jehova yiwa.” Age kwa tente hena asi: “Ame ngani yi hafera nsene mosirongo ngamu kara mbili nompora* posiruwo sange.”*
20 Ano yininke yimwe eyi ga rugene Hisikiya nononkondo edi ga kere nado ntani nomu ga rugene ediva nomukanko ntani nomu ga twere mema mositata, kwa yi tjanga mobuke zehistoli lyovahompa worudi rwaJuda. 21 Konyima, Hisikiya ta fu ngwendi ozinakuru, ano munendi Manase ta mu kwama mouhompa.