Vahompa vauvali
23 Makura hompa ta tumu mbudi ntani awo tava ninki masimbi gomoJerusarema naga gomoyitata yapeke yomoJuda ga ponge. 2 Konyima zoyo, hompa ta zi konzugo zaJehova kumwe novagara navenye womorudi rwaJuda novantu navenye ava va tungire moJerusarema, kukwatera mo vapristeli novaporofete novantu navenye ntani vanona novakondi. Makura ta va resere nonkango nadinye domobuke zegwanekero* ezi va gwene monzugo zaJehova. 3 Hompa ta sikama pepi nongundi, ta tulisa po egwanekero* naJehova asi nga limburukwa Jehova nokusikisa mo nompangera dendi nomavyukiso gendi nonoveta dendi nomutjima gwendi nagunye ntani nomwenyo* gwendi nagunye pokusikisa mo nonkango nadinye edi va tjanga mobuke ozo, ano vantu navenye tava kwatesa ko egwanekero olyo.
4 Makura hompa ta tantere mupristeli gomunene Hilikiya novapristeli vamwe novantu ava ngava rugana pevero va pwagese montembeli zaJehova yiruganeso nayinye yaBara neyi ngava ruganesa kongundi zokupongoka* ntani neyi ngava ruganesa mokukarera nombungururu. Hompa ta ka yi hwikira ponze zaJerusarema momapya gaKidironi, ano enoto lyayo ta li twara koBeteli. 5 Age kwa tjidire mo vapristeli woyikarunga yoyimpempa ava va horowere vahompa womorudi rwaJuda, yipo va gave nonzambo* komavango gokonondundu gokukarera yikarunga yoyimpempa, aga ga kere moyitata yorudi rwaJuda ntani aga ga kundurukidire Jerusarema. Age kwa tjidire mo vapristeli ava ngava zambere Bara nezuva nokwedi ntani nombungururu dokulisiga-siga. 6 Age kwa gusire monzugo zaJehova ngundi zokupongoka,* ta zi twara ponze zositata saJerusarema, ta ka zi hwikira moMuramba gwaKidironi, ta zi konko, ano enoto lyazo ta ka li tjisira ponontoko dovantu woruhepo. 7 Age hena kwa zonagwire po nonzugo dovagara ava va kere nohondedi dokontembeli. Nonzugo odo kwa kere monzugo zaJehova, ano vakadi yimo ngava tungire tunzugo tongundi zokupongoka.*
8 Konyima ta tjida vapristeli navenye moyitata yorudi rwaJuda ntani age kwa nyatekere mavango gokukarera yikarunga yoyimpempa gokonondundu oku ngava zambere vapristeli, kutundilira koGeba dogoro koBere-seba. Age kwa zonagwire po hena mavango gokonondundu gokukarera yikarunga yoyimpempa aga ga kere perungavero lyaJosuwa mukurona gositata. Ago kwa kere korumoho romarungavero gositata. 9 Vapristeli wokomavango gokukarera yikarunga yoyimpempa gokonondundu, kapi ngava rugana kosizambero saJehova moJerusarema, nye awo ngava li mboroto zokudira yihaheso kumwe novakwawo. 10 Age hena kwa nyatekere Tofeti, evango eli ngava gavere nonzambo eli lya kere moMuramba gwaHinomu,* yipo vantu va dire kuzamba vana vawo wovakadi ndi wovagara kwaMoreki. 11 Age hena kapi ga pulisilire nonkambe edi va geve vahompa worudi rwaJuda kosikarunga sezuva, di pite mevango eli lya kere momukara omu nga lire Natana-mereki erenga lyomombara yipo di ze konzugo zaJehova. Age hena kwa hwikire matemba aga va geve kosikarunga sezuva. 12 Hompa kwa zonagwire po hena yizambero eyi va dikire vahompa worudi rwaJuda keguru lyonzugo zeguru zaAhasi ntani noyizambero eyi ga dikire Manase momaharango gavali gokonzugo zaJehova. Age kwa yi konkere, ano enoto lyayo ta ka li tjisira moMuramba gwaKidironi. 13 Hompa kwa nyatekere mavango gokonondundu gokukarera yikarunga yoyimpempa, aga ga kere komeho zaJerusarema koMbindakano* zoNdundu zoMauzwe.* Saromo hompa goVaisraeli kwa dikilire mavango ogo Asitarete sikarunga sosikadi sokunyata soVasidoni naKemosi sikarunga sokunyata soVamowaba ntani naMilikomu sikarunga sokunyata soVaamoni. 14 Age kwa zonagwire po mamanya gokupongoka nonongundi dokupongoka* ntani kwa tulire yisupa yovantu pomavega gayo. 15 Age hena kwa zonagwire po sizambero esi sa kere moBeteli nevango lyokukarera yikarunga yoyimpempa lyokondundu eli ga rugene Jerobiyamu munaNebata eli lya ninkisire Vaisraeli va zone. Konyima zokuzonagura sizambero nevango lyokukarera yikarunga yoyimpempa kondundu, age ta hwike evango olyo, ta li konko ntani ta hwike ngundi zokupongoka.*
16 Apa ga pirukire Josiya, ta mono nontoko kondundu makura ta gusa yisupa eyi ya kere monontoko, ta yi hwike posizambero. Ta nyateke sizambero oso ngwendi moomu ga yi tente Jehova kupitira momuporofete gwendi asi yininke eyi ngayi horoka. 17 Makura Josiya ta pura asi: “Ntoko zalye zina nina kumona?” Makura vagara womositata tava mu limburura asi: “Azo ntoko zomuporofete gwaKarunga gousili gokoJuda, ogu ga pumbire asi yininke eyi ono rugana ngayi horokera sizambero somoBeteli.” 18 Makura age ta tanta asi: “Mu sigeni a pwizumuke, mwa ha gumagura yisupa yendi.” Makura awo tava sigi yisupa yendi noyisupa yomuporofete ogu ga tundire koSamaliya.
19 Josiya kwa zonagwire po hena nonzugo dokukarera yikarunga yoyimpempa dokonondundu edi da kere moyitata yaSamaliya, edi va dikire vahompa woVaisraeli va handukise Karunga. Age kwa zonagwire po nonzugo odo ngwendi moomu ga zonagwire po mavango gokoBeteli. 20 Age kwa dipagerere poyizambero oyo vapristeli ava ngava rugana komavango ogo gokukarera yikarunga yoyimpempa gokonondundu ntani kwa hwikilire po yisupa yovantu. Konyima ta tengura koJerusarema.
21 Hompa ta pangere vantu navenye asi: “Daneneni Karunga gweni Jehova sipito soPaska ngwendi moomu va yi tjanga mobuke zegwanekero.” 22 Kutunda apa ngava pangere vapanguli moIsraeli noposiruwo esi ngava pangere vahompa woVaisraeli novahompa womorudi rwaJuda, moIsraeli kapi va dene mo sipito soPaska sokufana ngwendi sesi. 23 Nye momvhura 18 zepangero lyahompa Josiya, vantu kwa danenene Jehova sipito soPaska moJerusarema.
24 Josiya kwa gusire hena mosirongo vantu ava ngava uyunga novafe novantu ava ngava pumbu noyikarunga* noyikarunga yokunyata ntani noyininke nayinye yokunyata eyi ya kere mositata saJerusarema nomoyitata yapeke yomoJuda, yipo a sikise mo nonkango edi va tjenge mobuke zoVeta ezi ga gwene mupristeli Hilikiya monzugo zaJehova. 25 Kwato hompa ogu ga tengwire kwaJehova nomutjima gwendi nagunye nomwenyo* gwendi nagunye ntani nononkondo dendi nadinye kuliza noVeta zaMosesa, yi kare asi komeho zendi ndi konyima zendi.
26 Nye nampili ngoso, Jehova kwa handukilire simpe vantu womorudi rwaJuda morwa yininke yoyidona eyi ga rugene Manase a mu handukise. 27 Jehova kwa tente asi: “Ame ngani gusa vantu womorudi rwaJuda komeho zange ngwendi moomu na gusa Vaisraeli komeho zange ntani ame ngani nyoka sitata saJerusarema esi na horowora nonzugo ezi na tente asi: ‘Yimo ngava fumadekera edina lyange.’”
28 Ano yininke yimwe eyi ga rugene Josiya, kwa yi tjanga mobuke zehistoli lyovahompa worudi rwaJuda. 29 Posiruwo esi nga pangere hompa Josiya, Farawo Neko hompa gwaEgipite kwa zire a ka gwane hompa gwaAsiliya pepi nomukuro gwaEufurata. Ano hompa Josiya ta zi a ka rwise Neko, nye apa ga mu mwene Neko, ta mu dipaga moMegido. 30 Makura vakareli vendi tava rondeke simpu sendi metemba va tunde koMegido va mu tware koJerusarema, tava ka mu horeka montoko zendi. Makura vantu womosirongo tava gusa Jehoyahasi munaJosiya, tava mu gwaveke a kare hompa, yipo a pinganene po oguhwe.
31 Jehoyahasi kwa kere nonomvhura 23 apa ga kere hompa ntani age kwa pangerere moJerusarema makwedi gatatu. Edina lyozina kwa kere Hamutali munaJeremiya gomoLibuna. 32 Age kwa rugene yininke yoyidona kosipara saJehova ngwendi moomu ngava yi rugana ozinakuru. 33 Farawo Neko kwa tulire Jehoyahasi modorongo moLibura mosirongo saHamati, yipo a dire kupangera moJerusarema ntani kwa ninkire vantu womosirongo va fute yisiliveli yonokilograma 3 400* ntani nongorodo zonokilograma 34,2.* 34 Farawo Neko kwa tulire hena Eliyakimu munaJosiya a kare hompa, yipo a pinganene po oguhwe ntani age kwa tjindjire edina lyendi li kare Jehoyakimu, nye age kwa twere Jehoyahasi koEgipite oku ga ka fililire. 35 Jehoyakimu kwa geve sisiliveli nongorodo kwaFarawo, nye age kwa pulire vantu womosirongo va fute mutero, yipo a gave sisiliveli esi ga mu pulire Farawo. Age kwa pangerere vantu womosirongo va gave siliveli nongorodo kwaFarawo Neko.
36 Jehoyakimu kwa kere nonomvhura 25 apa ga kere hompa ntani age kwa pangerere moJerusarema nomvhura 11. Edina lyozina kwa kere Sebida munaPedaya gomoRuma. 37 Age kwa twikilire kurugana yininke yoyidona kosipara saJehova ngwendi moomu ngava yi rugana ozinakuru.