Vahompa vauvali
3 Jehoramu munaAhaba kwa tamekere kupangera Vaisraeli moSamaliya momvhura 18 zepangero lyaJehosafata hompa gorudi rwaJuda ntani age kwa pangerere nomvhura 12. 2 Age kwa twikilire kurugana yininke yoyidona kosipara saJehova, nye kapisi ngwendi moomu va yi rugene oguhwe nozina, yeeyi age kwa zonagwire po emanya lyokupongoka lyaBara eli va rugene oguhwe. 3 Age kwa honenene yirugana yoyidona eyi ga rugene Jerobiyamu munaNebata, ogu ga ninkisire Vaisraeli va zone. Age kapi ga hagekere kuyirugana.
4 Mesa hompa gwaMowaba kwa wekere nonzwi. Age nga futu nonzwigona 100 000 ntani nonzwi donongara 100 000 edi va dira kukurura, ngomutero* kwahompa gwaIsraeli. 5 Apa ga fire Ahaba, hompa gwaMowaba ta tameke kurwanesa hompa gwaIsraeli. 6 Makura hompa Jehoramu ta tundu moSamaliya mezuva olyo, a ka pongaike Vaisraeli navenye. 7 Age kwa tumine hena vantu kwaJehosafata hompa gorudi rwaJuda, va ka mu tantere asi: “Hompa goVamowaba kuna kurwanesa nge. Kuvhura o ze kumwe name tu ka rwise Vamowaba ndi?” Jehosafata ta ka limburura asi: “Ame nani za kumwe nove. Ose vantu vamwe tupu. Ame ngani za kumwe novantu vange ntani nononkambe dange.” 8 Makura age* ta pura asi: “Nzira musinke ngatu pita?” Age* ta mu limburura asi: “Ngatu pita nzira ezi za pita momburundu zaEdomu.”
9 Makura hompa gwaIsraeli ta katuka a ze kumwe nahompa gorudi rwaJuda ntani nahompa goVaedomu. Konyima zokugenda mazuva ntambali, mema gawo gokunwa mokamba naga goyimuna eyi va zire nayo, taga pu. 10 Ano hompa gwaIsraeli ta tanta asi: “Aso sininke sosidona sili! Jehova kuna tu zigida ose vahompa vatatu yipo a ya tu gave momawoko goVamowaba!” 11 Makura Jehosafata ta pura asi: “Mwato muporofete gwaJehova omu, yipo a tu pulire ko kwaJehova ndi?” Mukareli gumwe gwahompa goVaisraeli ta mu limburura asi: “Pweli Elisa, munaSafati. Age kwa kere mukareli gwaEliya.”* 12 Jehosafata ta tanta asi: “Jehova kuuyunga kupitira mwendi.” Makura hompa gwaIsraeli naJehosafata ntani hompa goVaedomu, tava zi kwaElisa.
13 Elisa ta tantere hompa gwaIsraeli asi: “Morwasinke ono wizire kwange?* Zende kovaporofete woguho nonyoko.” Nye hompa gwaIsraeli ta mu limburura asi: “Hawe, Jehova yige ana tu zigida ose vahompa vatatu a ya tu gave koVamowaba.” 14 Elisa ta tanta asi: “Ame tani gana kwaJehova Karunga goMunamwenyo ntani Mupitisili govakwayita vemeguru ogu ani karere* asi ngano kapi na fumadeka Jehosafata hompa gorudi rwaJuda, ngano kapi nina ku tara ndi ni ku pakere mbili. 15 Yipo nye, retereni nge musiki gosiumba.” Musiki ogo apa ga tamekere kusika siumba, mpepo* zaJehova ta zi gwana Elisa. 16 Makura ta tanta asi: “Jehova kuna tanta asi: ‘Simeni nomukanko momuramba ogu, 17 morwa ame Jehova kuna kutanta asi one kapi ngomu mona mpepo ndi mu mone mvhura, nye momuramba ogu ngamu zura mema. None noyimuna yeni nayinye ngomu nwa mema gamo.’ 18 Nye esi kuna kara sininke soureru po kwaJehova ntani age nga gava hena Vamowaba momawoko geni. 19 Mwa hepa kuzonagura yitata nayinye eyi va kundurukida makuma nokuzonagura yitata nayinye yoyiwa nokuteta yitji nayinye yoyiwa ntani ngomu fofere marunone nagenye. One hena ngomu zugumine mamanya komavega nagenye gomawa, yipo ngava dire kulima mo vantu.”
20 Ano kongurangura posiruwo esi ava gava nzambo zombuto, hararasi mema taga tundu koyiha yaEdomu, makura muramba nagunye tagu zura mema.
21 Vamowaba navenye kwa zuvhire asi vahompa kuna wiza va ya va rwise, makura tava zigida vagara navenye wokuvhura kurwa, tava zi va ka sikame pomurudi gosirongo sawo. 22 Apa Vamowaba va pindukire ngurangura zonene, ezuva kwa minikilire pomema. Ano Vamowaba ava va kere mesinya mwina lyomuramba, kwa mwene mema ogo ngwendi honde. 23 Awo tava tanta asi: “Ezi kuna kara honde. Vahompa vana lidipaga vene-navene norufuro. Yipo nye, one Vamowaba, zendeni mu ka guse emona!” 24 Apa va ka sikire mokamba zoVaisraeli, Vaisraeli tava katuka va rwise Vamowaba, awo makura tava duka. Awo kwa zire moMowaba ntani kwa dipagere Vamowaba monzira nazinye. 25 Awo kwa zonagwire yitata ntani nkenye mugara kwa zugumine mamanya komavega gomawa yipo va zwide mo mamanya. Awo kwa foferere marunone nagenye gomema ntani kwa tetere yitji nayinye yoyiwa. Makuma gositata saKire-hereseti yigo gelike ga hupire po. Ano vakwayita tava si kundurukida nokusizuguma mamanya dogoro tava si zonagura po.
26 Apa ga mwene hompa gwaMowaba asi vana va fundu moyita, ta gusa vagara 700 ava va kere nonomfuro yipo va pitire koruha oru ga kere hompa goVaedomu, nye kapi ya va tompokere. 27 Makura ta gusa munendi gombeli gomugara ogu ngano ga mu kweme mouhompa, ta mu gava ngonzambo zeswakerero kekuma. Ano vantu* tava handukire unene Vaisraeli, tava hageke kurwisa hompa goVamowaba makura tava tengura kosirongo sawo.