Ehistoli lyokuhova
10 Vafilisiti kwa rwire yita noVaisraeli, makura Vaisraeli tava duka ntani sinzi sawo kwa va dipagere koNdundu zaGiliboa. 2 Vafilisiti tava sikura Sauru novana vendi makura tava dipaga Jonatana naAbinadaba ntani naMalikisuwa, vana vaSauru. 3 Awo kwa rwire unene naSauru, ano vaponyi tava mu mono, tava mu ponyo, ta remana. 4 Makura Sauru ta tantere ogu ga mu simbilire yirwiso yendi asi: “Gusa mo rufuro roge oru twe nge, yipo vagara ava va dira kurugana yovamba va dire kuyahepeka nge.” Nye ogu ga mu simbilire yirwiso yendi kapi ga here kuyirugana morwa kwa tjilire. Makura Sauru ta gusa rufuro, ta ligandere ko. 5 Mugara ogu ga mu simbilire yirwiso apa ga mwene asi Sauru ana fu, makura nage ta ligandere korufuro rwendi, ta fu. 6 Yipo nye, Sauru novana vendi vatatu kwa fire kukwatera mo novantu navenye vemembo lyendi ava ga kere nawo. 7 Vaisraeli navenye ava va kere momuramba apa va mwene asi vantu navenye vana duka ntani Sauru novana vendi vana fu, tava tundu moyitata yawo va duke, makura Vafilisiti tava wiza va ya tunge moyitata oyo.
8 Ezuva lyokukwama ko apa va wizire Vafilisiti va ya guse yininke yovakwayita ava va dipagere, tava gwana koNdundu zaGiliboa Sauru novana vendi vana fu. 9 Makura tava gusa yirwiso yendi noyininke yendi ntani tava tete ko mutwe gwendi, makura tava tumu mbudi mosirongo nasinye soVafilisiti yipo va yi divise koyikarunga yawo ntani kovantu vawo. 10 Awo kwa tulire yirwiso yendi montembeli zosikarunga sawo ntani tava kulike ekora lyendi kontembeli zaDagoni.
11 Apa va zuvhire vantu navenye womodoropa zaJabesi momukunda gwaGiliyata yininke nayinye eyi va rugene Vafilisiti Sauru, 12 vakwayita navenye tava zi va ka guse simpu saSauru noyimpu yovana vendi. Tava yi reta moJabesi, makura tava vhumbike yisupa yawo mositji sosinene moJabesi, tava dilire mazuva ntambali.
13 Yipo nye, Sauru kwa fire morwa kwa zonene kwaJehova, yeeyi age kapi ga limburukwire Jehova ntani kwa zire a ka uyunge nomuntu ogu a uyunga novafe, 14 mevango lyokupura magano kwaJehova. Makura Karunga ta mu dipaga ntani ta gava uhompa kwaNdafita munalsayi.