Ehistoli lyokuhova

12 Pwa kere vagara ava va zire kwaNdafita koSikiragi apa ga tjwayukire morwa Sauru munaKisi. Awo vamwe wovakwayita wononkondo ava va mu vaterere moyita. 2 Awo kwa kere nomauta gonkanza ntani ngava ruganesa kuwoko kwawo kokorulyo noku kokorumoho, va zugume mamanya ndi va ponye yikutji nouta wonkanza. Awo kwa kere ekoro lyaSauru womoruvharo rwaMbenyameni. 3 Awo kwa va pitisilire Ahiyeseli naJowasi vana wovagara vaSema gomoGibeya. Vagara owo kwa kere: Jesiyeli naPereti vana vaAsimavete wovagara, Beraka, Jehu gomoAnatoti, 4 Isimaya gomoNgibiyoni (gumwe govakwayita wononkondo 30 ntani yige nga va pitisire) naJeremiya, Jahasiyeli, Johanani, Josabadi gomoGedera, 5 Erusai, Jelimoti, Beyaliya, Semaliya, Sefatiya gomoHalifu, 6 Elikana, Isisiya, Asareli, Joesere, Jasobeyamu womoruvharo rwaKora; 7 ntani Joera naSebadiya vana wovagara vaJerohamu gomoGedoro.

8 Vagara vamwe womorudi rwaGada kwa zire oku ga vende Ndafita momburundu. Awo kwa kere vakwayita wononkondo ava va divire kurwa yita nokuruganesa yilikandwiso yoyinene nomagonga. Yipara yawo kwa fene ngwendi yovanyime ntani awo ngava genderere kuduka ngwendi moomu a di genderere kuduka nompara konondundu. 9 Mukurona gwawo kwa kere Esere, kukwama ko Obadja, Eliyaba, 10 Misimana, Jeremiya, 11 Atayi, Eliyeli, 12 Johanani, Elisabadi, 13 Jeremiya naMakebanayi. 14 Awo kwa kere womorudi rwaGada ntani ngava pitisire vakwayita. Mukwayita gwawo gokudira po nonkondo kwa kere nononkondo dokuhetakana novakwayita 100, ano mukwayita gwawo gononkondo po kwa kere nononkondo dokuhetakana povakwayita 1 000. 15 Vagara ava yiwo va rutire mukuro gwaJorodana mokwedi kokuhova apa gwa henze ntani awo kwa ka tjidire mo navenye ava va tungire momuramba koUpumezuva nokoUtokero.

16 Vagara vamwe womorudi rwaMbenyameni noru rwaJuda nawo kwa zire oku ga vende Ndafita. 17 Makura Ndafita ta zi kwawo, ta ka va tantera asi: “Nsene kuna wiza mombili mu ya vatere nge, ame tani mu tambura. Nye nsene kuna wiza mu ya gave nge kononkore dange siruwo oso ame kwato eyi na zona, ngano Karunga gozinyakurwetu a yi mone ntani a rugane ko yuma.” 18 Makura mpepo zaKarunga ta zi gwana Amasayi ogu nga pitisire vakwayita 30, ta tanta asi:

“Ose kuna kukukwatesa ko ove Ndafita ntani koge tuna hama ove munalsayi.

Makura Ndafita tava tambura ntani tava tura nawo va kare vapitisili wovakwayita.

19 Vantu vamwe womorudi rwaManase nawo kwa zire kwaNdafita apa ga zire noVafilisiti a ka rwise Sauru. Nye kapi ga ka vaterere Vafilisiti, yeeyi awo kwa mu tengwidire morwa apa va liyongere vahompa woVafilisiti, awo kwa tente asi: “Age na tengura kwahompa gwendi Sauru, makura va ya tu dipage.” 20 Ava yiwo vagara womorudi rwaManase ava va zire kwaNdafita apa ga zire koSikiragi: Adina, Josabadi, Jediyayeli, Mikayera, Josabadi, Elihu naSiretayi. Awo kwa kere vapitisili wovakwayita mayovi womorudi rwaManase. 21 Awo kwa vaterere Ndafita a rwise vanamahaka, yeeyi awo navenye kwa kere vakwayita wononkondo wouradi ntani awo kwa ya kere vapitisili wovakwayita. 22 Nkenye ezuva vantu ngava wiza kwaNdafita va ya mu vatere, dogoro vakwayita vendi tava kara wovanzi ngwendi vakwayita vaKarunga.

23 Vagara ava va liwapaikilire yita kwa zire kwaNdafita koHeburoni, va ka mu pe uhompa waSauru ngwendi moomu ga yi tente Jehova. Esi kuna kara sivaro sawo: 24 Vagara womorudi rwaJuda ava va simbire yilikandwiso yoyinene nomagonga, ava va liwapaikilire yita kwa kere 6 800. 25 Vagara womorudi rwaSimiyoni ava va kere vakwayita wononkondo wouradi kwa kere 7 100.

26 Vagara womorudi rwaRevhi kwa kere 4 600. 27 Jehoyada ogu nga pitisire vana vaArona wovagara kwa zire novagara 3 700, 28 kumwe naSadoko mukwayita gononkondo gouradi ogu ga kere kumwe nomasimbi 22 gemezimo lyawo.

29 Vagara womorudi rwaMbenyameni ekoro lyaSauru kwa kere 3 000. Sinzi sawo ngava kwatesa ko nare epata lyaSauru. 30 Vagara womorudi rwaEfurayimi kwa kere 20 800. Awo kwa kere vakwayita wononkondo wouradi ava va divikwire mezimo lyawo.

31 Movantu vamwe womorudi rwaManase kwa horowere mo vagara 18 000, va ze va ka ture Ndafita a kare hompa. 32 Vagara womorudi rwaIsasikali ava va kwete egano yininke eyi yina kuhoroka neyi nava rugana Vaisraeli kwa kere 200. Awo kwa kere masimbi ntani yiwo ngava pitisire vantu womorudi rwawo. 33 Vagara womorudi rwaSeburoni kwa kere 50 000. Awo kwa liwapaikilire kuza koyita ntani kwa kere noyirwiso yokulisiga-siga. Awo kwa kwatesere ko Ndafita nomutjima gwawo nagunye.* 34 Vagara womorudi rwaNafitali ava va kere vapitisili kwa kere 1 000 ntani awo kwa zire novagara 37 000, ava va kere noyilikandwiso yoyinene nomagonga. 35 Vagara womorudi rwaDana ava va liwapaikilire kuza koyita kwa kere 28 600. 36 Vagara womorudi rwaAseli ava va liwapaikilire kuza koyita kwa kere 40 000.

37 Ano vagara womorudi rwaRubena noru rwaGada novantu vamwe womorudi rwaManase, ava va tungire mesinya mwina lyomukuro gwaJorodana kwa kere vakwayita 120 000 ava va kere noyirwiso yokulisiga-siga. 38 Vagara navenye ava kwa kere vakwayita ava va liwapaikilire kurwa yita. Awo kwa tokomenene kuwiza koHeburoni va ya ture Ndafita a kare hompa goVaisraeli ntani Vaisraeli navenye kwa va kwatesere ko va ture Ndafita a kare hompa. 39 Awo kwa kere kooko kumwe naNdafita mazuva gatatu. Awo kwa lire ntani nokunwa yininke va va wapaikilire vakwawo. 40 Vantu ava va kere pepi nawo ntani nava wokoure ngwendi womorudi rwaIsasikali, rwaSeburoni noru rwaNafitali, kwa va reterere nondya poyindongi, ponongameru, pononsino ntani ponongombe. Awo kwa va reterere hena usura, yikuki yekuzu nomandjembere, vhinyu, magadi, nongombe ntani nononzwi dononzi, yeeyi Vaisraeli kwa hefe unene.