Ehistoli lyokuhova
15 Ndafita kwa twikilire kulitungira nonzugo moSitata saNdafita ntani age kwa wapaikire evango lyosikesa saKarunga gousili makura ta si dikire tende. 2 Ndafita makura ta tanta asi: “Varevhi yiwo velike ngava simba sikesa saKarunga gousili, yeeyi Jehova kwa va horowora va simbe sikesa saJehova ntani va mu ruganene.” 3 Ndafita ta tantere Vaisraeli navenye va ponge moJerusarema, yipo va ka rete sikesa saJehova kevango eli ga si wapaikilire.
4 Ndafita kwa pongaikire womoruvharo rwaArona ntani noVarevhi ava: 5 Uliyeli gomoruvharo rwaKohati, ogu ga kere esimbi novakwawo 120; 6 Asaya gomoruvharo rwaMerali, ogu ga kere esimbi novakwawo 220; 7 Jowera gomoruvharo rwaGeresomu, ogu ga kere esimbi novakwawo 130; 8 Semaya gomoruvharo rwaElisafani, ogu ga kere esimbi novakwawo 200; 9 Eliyeli gomoruvharo rwaHeburoni, ogu ga kere esimbi novakwawo 80; 10 Aminadabu gomoruvharo rwaUsiyeli, ogu ga kere esimbi novakwawo 112. 11 Ndafita kwa zigidire hena mupristeli Sadoko naAbiyatara noVarevhi ava: Uliyeli naAsaya naJowera naSemaya naEliyeli ntani naAminadabu. 12 Ndafita ta va tantere asi: “One nyone masimbi gemezimo lyoVarevhi, likuhureni kumwe novakweni, mu ka simbe sikesa saJehova Karunga goVaisraeli makura mu ka si rete kevango eli na si wapaikira. 13 Mokumona asi kapisi nyone mwa ka si simbire pomuhowo, Karunga gwetu Jehova kwa tu handukilire morwa ose kapi twa kweme mavyukiso aga ga kara po.” 14 Makura vapristeli noVarevhi tava likuhura, yipo va ka simbe sikesa saJehova Karunga goVaisraeli.
15 Varevhi tava ka simba sikesa saKarunga gousili. Awo kwa likambekere yitji yako yokusidamwisa pomapepe gawo, ngwendi moomu Jehova ga va pangerere kupitira mwaMosesa. 16 Makura Ndafita ta tantere masimbi goVarevhi ga horowore vakwawo ava ngava dimbi, va dimbe noruhafo noyisikiso eyi: yiumba, nonkonkweso ntani nayimwe.
17 Makura Varevhi tava horowora morudi rwawo, Hemani munaJowera gomugara naAsafa munaBerekiya gomugara ntani Etani munaKusaya gomugara gemezimo lyaMerali. 18 Awo kwa horowere hena mbunga zauvali morudi rwawo. Awo kuna kara: Sakaliya naBeni naJasiyeli naSemiramoto naJehiyeli naUni naEliyaba naBenaya naMaseya naMatitiya naEliferehu naMikineya ntani naObedi-edomu naJeyiyeli, ava va kere vanomeni. 19 Hemani naAsafa ntani naEtani ava ngava dimbi, kwa va horowere va sike nonkonkweso dongoporo; 20 Sakaliya naJasiyeli naSemiramoto naJehiyeli naUni naEliyaba naMaseya ntani naBenaya, kwa va horowere va sike yisikiso yimwe yomazwi gokuzeruka;* 21 Matitiya naEliferehu naMikineya naObedi-edomu naJeyiyeli ntani naAsasiya, kwa va horowere va sike yiumba yomazwi gomanunu* ntani va pitisire ava va dimbire. 22 Kenaniya esimbi lyomorudi roVarevhi kwa pitisilire vantu ava va simbire sikesa, yeeyi age kwa divire nawa sirugana sendi, 23 ano Berekiya naElikana kwa takamesere sikesa. 24 Mupristeli Sebaniya naJosafata naNetaneli naAmasayi naSakaliya naBenaya ntani naEliyesere kwa fudire nombendo komeho zosikesa saKarunga gousili. Ano Obedi-edomu naJehiya nawo kwa takamesere sikesa.
25 Makura Ndafita nomasimbi goVaisraeli ntani novagara ava ngava pitisire vantu mayovi nawo tava zi awo vana hafa, va ka simbe sikesa saJehova segwanekero kembo lyaObedi-edomu. 26 Mokumona asi Karunga gousili kwa vaterere Varevhi ava va simbire sikesa saJehova segwanekero, awo kwa zembe nontwedugona ntambali ntani nononzwi donongara ntambali. 27 Ndafita kwa dwere sikoverero somawoko gomasupi esi va honza nekehe lyewa, kukwatera mo Varevhi navenye ava va simbire sikesa nava va dimbire naKenaniya, ogu ga pitisilire vantu ava va simbire sikesa novantu ava va dimbire. Ndafita kwa dwere hena sikoverero sopomapepe. 28 Vaisraeli navenye kwa ka simbire sikesa saJehova segwanekero awo vana hafa oku tava fudu ruvinga nonombendo ntani awo kwa sikire nonkonkweso noyiumba ntani nayimwe yokusikisa.
29 Nye apa sa ka sikire sikesa saJehova segwanekero moSitata saNdafita, Mikali munaSauru ta tara pekende, ta mono hompa Ndafita kuna kuvatauka oku ta dana; makura Mikali ta mu handukire momutjima.