Ehistoli lyauvali
1 Uhompa waSaromo munaNdafita kwa twikilire kunkondopara, ano Karunga gwendi Jehova kwa kere kumwe nage ntani kwa mu ninkire a kare nononkondo dononene.
2 Saromo kwa zigidire Vaisraeli navenye, masimbi aga ngaga pitisire vantu mayovi naga ngaga pitisire vantu mafere, vapanguli ntani masimbi gomomazimo goVaisraeli. 3 Makura Saromo nombunga zovantu navenye, tava zi kondundu koNgibiyoni, yeeyi yiko za kere nkongoronzugo* zaKarunga gousili ezi ga rugene Mosesa mukareli gwaJehova momburundu. 4 Nye Ndafita ta ka simba sikesa saKarunga gousili koKiliyata-jeyalimu, a si tware motende ezi ga dikire moJerusarema. 5 Ano sizambero songoporo esi ga rugene Besareli munaUli mutekurwaHuru, kwa si tulire komeho zonkongoronzugo zaJehova. Saromo nombunga zovantu ngava kanderere komeho zaso. 6 Saromo kwa zamberere po nonzambo komeho zaJehova ntani age kwa geve nonzambo deswakerero 1 000 posizambero songoporo konkongoronzugo.
7 Masiku, Karunga ta monekere Saromo, ta mu tantere asi: “Hundira nge nkenye eyi ono hara ni ku pe.” 8 Makura Saromo ta tantere Karunga asi: “Ove kwa likida otate Ndafita eharo lyanarunye ntani kwa ninka nge ni va pinganene po mouhompa. 9 Yipo nye Jehova, ngano o sikise mo eyi wa tumbwidira otate Ndafita, yeeyi vantu ava wa ninka nge ni pangere vanzi unene ngwendi evhu. 10 Pe nge ko unongo nonondunge yipo ni pitisire vantu ava, yeeyi yilye gokuvhura kupangura vantu woge ava wovanzi ngesi?”
11 Makura Karunga ta tantere Saromo asi: “Mokumona asi ove kuna hundire nge unongo nonondunge yipo o pangure vantu vange ava na ku pa o pangere, nye kapi ono hundire ni ku pe emona noungawo nefumano ndi ni dipage vantu ava va kunyenga ndi ni ku pe mwenyo gomure,* 12 ame tani ku pe unongo nonondunge ntani tani ku pe hena emona noungawo nefumano eli va dilire kukara nalyo vahompa ava ngava pangere nare nava ngava pangera konyima zoge.”
13 Makura Saromo ta tundu konkongoronzugo ezi za kere kondundu moNgibiyoni, ta zi koJerusarema oku ga ka pangerere Vaisraeli. 14 Saromo kwa twikilire kulipongaikira matemba nononkambe.* Age kwa kere nomatemba 1 400 nononkambe* 12 000. Age kwa di tulire moyitata omu nga pungwire matemba, pepi nahompa moJerusarema. 15 Hompa Saromo kwa pongaikire siliveli nongorodo zonzi moJerusarema ngwendi mamanya ntani noyitji yosedeli yoyinzi ngwendi yitji* eyi ya kara moSefera. 16 Nonkambe daSaromo kwa ka di simbire koEgipite, ano varandi vahompa yiwo ngava randa nonkambe edi* kuliza nomukoso ogu va tura po. 17 Nkenye etemba ngava li randa koEgipite noyisiliveli 600, ano nkenye nkambe ngava zi randa yisiliveli 150, konyima ngava ya yi randesa kovahompa woVaheti ntani kovahompa vaSiliya.