Ehistoli lyauvali
10 Rehoboyamu kwa zire koSikemu, yeeyi Vaisraeli navenye kwa zire koSikemu va ka mu ture a kare hompa. 2 Ano Jerobiyamu munaNebata ta yi zuvhu (age kwa kere simpe moEgipite morwa kwa tjwayukire hompa Saromo), makura ta tengura a tunde koEgipite, 3 konyima tava tumu vantu va ka mu zigide. Ano Jerobiyamu ta zi kwa Rehoboyamu kumwe noVaisraeli navenye va ka mu tantere asi: 4 “Oguho kwa digopekere eparu lyetu. Nye nsene kapi no tu pura tu rugane yoyinzi ngwendi moomu va yi rugene oguho, o dire kudigopeka eparu lyetu, ose ngatu kuruganena.”
5 Makura age ta va tantere asi: “Ngomu ka tengure konyima zomazuva gatatu.” Makura awo tava zi. 6 Konyima, hompa Rehoboyamu ta zi a ka pure masimbi* aga ngaga ruganene oguhwe apa va kere vazuni. Age kwa va pulire asi: “Ngapi omu nani limburura vantu ava?” 7 Masimbi ogo taga mu limburura asi: “Nsene o tekura vantu ava nawa ntani o rugane eyi vana hara nokuvalimburura monkedi zongwa, awo ngava twikira kukara vakareli woge.”
8 Nye age kapi ga purakenene eyi ga mu tanterere masimbi,* ta zi a ka pure vadinkantu vakwawo ava ga kura nawo, ava ga tulire va kare vakareli vendi. 9 Age kwa va pulire asi: “Ngapi omu nani limburura vantu ava vana pura nge ni dire kudigopeka eparu lyawo ngwendi moomu va yi rugene otate?” 10 Vadinkantu ava ga kura nawo tava mu tantere asi: “Ka tantere vantu ava vana kupura o dire kudigopeka eparu lyawo ngwendi moomu va yi rugene oguho asi: ‘Ame ngani mu tekura nonyanya kupitakana omu va mu tekwire otate.* 11 Otate kwa digopekere eparu lyeni, nye ame ngani li digopeka unene. Otate ngava mu sopora nonongora, nye ame ngani mu sopora nonongora edi va tura yininke youtwe.’”
12 Konyima zomazuva gatatu, Jerobiyamu ta zi kumwe noVaisraeli kwaRehoboyamu ngwendi moomu ga va tanterere hompa Rehoboyamu asi ngava ka tengure konyima zomazuva gatatu. 13 Nye hompa ta va limburura monkedi zonyanya. Hompa Rehoboyamu kapi ga kweme eyi ga mu tanterere masimbi.* 14 Age kwa va tanterere eyi va mu tanterere vadinkantu vakwawo asi: “Ame ngani digopeka eparu lyeni unene. Otate ngava mu sopora nonongora, nye ame ngani mu sopora nonongora edi va tura yininke youtwe.” 15 Yipo nye, hompa kapi ga purakenene kovantu, yeeyi Karunga gousili yige ga yi ninkisire yi horoke yipo di sike mo nonkango daJehova, edi ga tanterere Jerobiyamu munaNebata kupitira mwaAhiya gomoSiro.
16 Ano Vaisraeli navenye apa va mwene asi hompa kapi ana kuvapurakena, tava mu tantere asi: “Ndafita kapisi ekoro lyetu ntani ogo munalsayi kapi nga tu pa yuma. Zendeni mu ka karere yikarunga yeni, one Vaisraeli. Ano one epata lyaNdafita lipangereni nye nyamweni!” Makura Vaisraeli tava tengura komambo gawo.*
17 Nye Rehoboyamu kwa twikilire kupangera Vaisraeli ava va tungire moyitata yorudi rwaJuda.
18 Makura hompa Rehoboyamu ta tumu Hadoramu ogu nga pitisire vantu ava ngava ruganene hompa a ze koVaisraeli, nye Vaisraeli tava ka mu dipaga nomamanya. Ano hompa Rehoboyamu ta rondo metemba lyendi a tjwayukire koJerusarema. 19 Kutunda opo, Vaisraeli kapi va kwatesere ko epata lyaNdafita dogoro naina.