Ehistoli lyauvali
13 Momvhura 18 zepangero lyahompa Jerobiyamu, Abiya ta kara hompa gorudi rwaJuda. 2 Abiya kwa pangerere moJerusarema nomvhura ntatu. Edina lyozina kwa kere Mikaya munaUliyeli gomoGibeya. Ano Abiya naJerobiyamu kwa lirwisire.
3 Abiya kwa zire koyita kumwe novakwayita vendi wononkondo 400 000 ava va deura,* ano Jerobiyamu novakwayita vendi wononkondo 800 000 ava va deura,* kwa zire va ka rwise Abiya. 4 Makura Abiya ta sikama keguru lyoNdundu zaSemarayimu ezi za kara momukunda gonondundu gwaEfurayimi, ta zigire Jerobiyamu noVaisraeli navenye asi: “Purakeneni nge. 5 Ngoso kapi mwa yi diva asi Jehova Karunga goVaisraeli kwa ninka Ndafita novana vendi va pangere Vaisraeli dogoro narunye kupitira megwanekero lyomungwa* ndi? 6 Nye Jerobiyamu munaNebata mukareli gwaSaromo munaNdafita, kwa rwanesa hekurwendi. 7 Ano vagara wovadona wokudira yirugana kwa lipakerere kumwe nage makura yiyo va rwanesere Rehoboyamu munaSaromo, apa ga kere simpe mudinkantu ntani age simpe woma. Ano age kapi ga vhulire kuvarwisa.
8 “One kuna kugazara asi muna kara nononkondo dokurwisa upangeli waJehova ou ga gava momawoko govana vaNdafita, yeeyi muna kara nombunga zonene ntani nonontana dongorodo edi ga rugana Jerobiyamu mu di karere ndi? 9 One kwa tjida mo vapristeli vaJehova womoruvharo rwaArona ntani noVarevhi, makura yiyo mwa horowora vapristeli vanyamweni ngwendi vantu womoyirongo yapeke. Ano nkenye ogu nga wiza nontwedugona nononzwi ntambali donongara ngomu mu ninki a kare mupristeli goyikarunga yeni yoyimpempa. 10 Nye ose kukarera Karunga gwetu Jehova ntani kapi twa mu siga, ano vapristeli vetu womoruvharo rwaArona kuruganena Jehova kumwe noVarevhi ava ava va vatere. 11 Awo kugava nonzambo deswakerero kwaJehova nkenye ngurangura nongurova kumwe noyitutumikidiso yedumba lyewa. Awo hena kutura nomboroto delikido positafura songorodo zene-zene nokuhwameka noramba edi da kara kouzweko woramba wongorodo, yipo tu sikise mo situmbukira esi ga tu pa Karunga gwetu Jehova, nye one kwa mu siga. 12 Yipo nye, Karunga gousili nose ana kara ntani kuna kutupitisira kumwe novapristeli vendi ava vana liwapaikire kufuda nombendo yipo tu tameke kumurwisa. Yipo nye, one Vaisraeli, mwa ha lipepekera kurwisa Jehova Karunga gozinyakurweni, yeeyi ayo kapi nayi mu tompoka.”
13 Nye Jerobiyamu ta tantere vakwayita vendi va ka va homokere kutundilira konyima. Jerobiyamu kwa kere komeho zorudi rwaJuda, ano vakwayita vendi kwa kere konyima zawo. 14 Apa va pirukire vagara womorudi rwaJuda, tava dimburura asi awo kuna kuvahomokera komeho ntani konyima, makura tava likwambere kwaJehova a va vatere; awo vapristeli kuna kufuda unene nombendo. 15 Makura vagara womorudi rwaJuda tava zigire, ano Karunga gousili ta fundu Jerobiyamu noVaisraeli navenye komeho zaAbiya novantu womorudi rwaJuda. 16 Karunga kwa geve Vaisraeli momawoko govantu womorudi rwaJuda, makura awo tava duka va tjwayuke. 17 Abiya novantu vendi kwa dipagere Vaisraeli wovanzi, ano sivaro sovagara woVaisraeli ava va dipagere kwa kere vagara 500 000 ava va deura.* 18 Yipo nye, Vaisraeli kwa va fundire ntani kwa va fisire nomuga, ano vagara womorudi rwaJuda kwa fundire, yeeyi awo kwa huguvarere Jehova Karunga gozinyakurwawo. 19 Abiya kwa tjidire Jerobiyamu dogoro ta ka kwata yitata yendi. Age kwa ka kwete sitata saBeteli nonodoropa edi da si kundurukida, sitata saJesana nonodoropa edi da si kundurukida ntani sitata saEfuroni nonodoropa edi da si kundurukida. 20 Kutunda opo, Jerobiyamu kapi ga kere hena nononkondo ngwendi Abiya. Konyima, Jehova ta dipaga Jerobiyamu.
21 Nye Abiya kwa nkondoparere. Konyima, ta ya kwara vakadi 14 ntani ta ya reta vana wovagara 22 novana wovakadi 16. 22 Ano yininke yimwe eyi ga rugene Abiya ntani neyi ga uyungire, kuyigwana moyininke eyi ga tjenge muporofete Ido.