Ehistoli lyauvali
16 Momvhura 36 zepangero lyaAsa, Basa hompa gwaIsraeli ta homokere vantu womorudi rwaJuda ntani ta tungu* sitata saRama, yipo a kondere vantu va dire kuza ndi va tunde kwaAsa* hompa gorudi rwaJuda. 2 Makura Asa ta gusa siliveli nongorodo eyi ya kere mononzugo omu ngava pungwire yininke yaJehova yomulyo ntani mononzugopungwiro dahompa, ta yi tumu kwaBeni-hadadi hompa gwaSiliya, ogu ga tungire moDamasikusi. Age kwa tente asi: 3 “Name nove kwa tura po egwanekero* ntani vaguhya vetu kwa rugene yokulifana. Ame kuna kukutumina siliveli nongorodo yipo o wize, o ya teze po egwanekero eli wa tulire po naBasa hompa goVaisraeli, a tunde mo mosirongo sange.”
4 Beni-hadadi kwa purakenene kwahompa Asa, makura ta tumu vapitisili wovakwayita vendi va ze va ka rwise yitata yomoIsraeli. Awo kwa ka kwete sitata saIyoni, Dana, Abeli-maimu ntani nononzugopungwiro nadinye edi da kere moyitata yorudi rwaNafitali. 5 Apa ga yi zuvhire Basa, ta hageke kutunga* sitata saRama, makura ta zumbu sirugana oso. 6 Makura hompa Asa ta tantere vantu navenye womorudi rwaJuda va ka simbe mamanya noyitji eyi ga ruganesere Basa a tunge sitata saRama. Ano age ta yi ruganesa a tunge* sitata saGeba ntani sitata saMisipa.
7 Posiruwo oso, Hanani ogu nga pumbu ta wiza kwaAsa hompa gorudi rwaJuda, ta mu tantere asi: “Ngano kuna huguvara Karunga goge Jehova o dire kuhuguvara hompa gwaSiliya, ngano ono fundu vakwayita vahompa gwaSiliya. 8 Vakwayita woVaetiyopiya noValibiya kwa kere wovanzi ntani awo kwa kere nomatemba gomanzi novarondi wononkambe. Nye mokumona asi ove kwa huguvarere Jehova, age kwa va geve momawoko goge. 9 Yeeyi Jehova kupapara mouzuni mudima vantu ava va mu hara nomutjima nagunye, yipo a likide nonkondo dendi pokuvavatera. Ove kwa rugana ugova, ano kutunda apa ove ngo kara nkenye apa moyita.”
10 Nye Asa kwa handukilire Hanani makura ta mu tura modorongo,* morwa eyi ga uyungire kwa mu handukisire. Asa kwa tamekere hena kutekura vantu momudona. 11 Ano yininke yimwe eyi ga rugene Asa kutunda ketamekero dogoro kehagero, kwa yi tjanga mobuke zovahompa worudi rwaJuda novahompa woVaisraeli.
12 Momvhura 39 zepangero lyendi, Asa tau mu gwana uvera wounene konompadi. Nampili ngomu ga verere, age kwa paparere evatero koyimbanda nye kapisi kwaJehova. 13 Konyima, Asa ta fu ngwendi ozinakuru momvhura 41 zepangero lyendi. 14 Makura tava mu horeke montoko zonene ezi ga litjokwerere mwene moSitata saNdafita. Age kwa mu tulire mosikesa omu va tulire magadi goBalisemu noyitoveseso eyi va vhonga nomagadi gedumba lyewa. Vantu kwa hwamekere hena mundiro gomunene ponomfa dendi.*