Ehistoli lyauvali
3 Makura Saromo ta tameke kudika nzugo zaJehova moJerusarema koNdundu zaMoliya, oku ga monekerere Jehova oguhwe Ndafita, pevango eli ga wapaikire Ndafita porupare rwaOrunani goMujebusi. 2 Saromo kwa tamekere kudika nzugo ozo mezuva lyauvali lyokwedi kwauvali momvhura zaune zepangero lyendi. 3 Etateko lyonzugo zaKarunga gousili eli ga tungire Saromo, monaure kwa kere nometa 27,* ano monompatji nometa ntane,* kuliza noyimeteso eyi ngava ruganesa nare.* 4 Nzugo zokuhwililira montembeli, monompatji kwa kere nometa ntane ngwendi nometa domonompatji dontembeli. Musika gwazo kwa kere nometa ntane* ntani monda kwa kwitire mo ngorodo zene-zene. 5 Age kwa tulire yitji yapeke* konzugo zonene,* konyima ta zi kwita ngorodo zene-zene ntani ta zi wapeke pokufaneka po yitji yonongone nomauketanga. 6 Age kwa tulire ko hena mamanya gondiro ntani kwa ruganesere ngorodo zokoParavaimu. 7 Ano nzugo noyipirangi nomakuma gazo ntani nomavero gako kwa yi kwitire ngorodo ntani kwa fanekere vakerubi komakuma gazo.
8 Age kwa rugene evango* lyokupongokerera, unene walyo kwa kere nometa ntane ntani alyo kwa hulire pounene wonompatji donzugo. Ano monompatji dalyo kwa kere nometa ntane. Evango olyo kwa li kwitire ngorodo zene-zene zonokilograma 20 520.* 9 Mukumo gongorodo ezi ga ruganesere nombohwa kwa kere nograma 570* ntani kwa kwitire nonzugo dekeguru nongorodo.
10 Age kwa ruganene vakerubi vavali mevango* lyokupongokerera, makura ta va kwita ngorodo. 11 Mavava nagenye govakerubi pokugatura kumwe kwa hulire ponometa ntane. Evava lyomukerubi gokuhova kwa hulire ponometa 2,25* monaure ntani kwa ka sikire kekuma lyonzugo. Ano evava lyendi limwe nalyo kwa hulire ponometa 2,25 monaure ntani kwa ka sikire kevava lyomukerubi gwauvali. 12 Evava lyomukerubi gwauvali kwa hulire ponometa 2,25 monaure ntani kwa ka sikire kekuma lyonzugo. Ano evava lyendi ekwawo nalyo kwa hulire ponometa 2,25 monaure ntani kwa ka sikire kevava lyomukerubi gokuhova. 13 Mavava govakerubi kwa ga zanzere ntani kwa hulire ponometa ntane; awo kwa va sikamekere ntani kwa pirukilire monda.*
14 Age hena kwa rugene ekehe lyonongodi dosineguru nowanda wopurupuli nonongodi donongeha ntani nekehe lyewa. Pekehe olyo kwa fanekere po vakerubi.
15 Ntani komeho zonzugo kwa tulire ko nongundi mbali, monaure ado kwa sikire ponometa 16* ntani kwankenye ngundi kwa tulire ko mutwe gonometa 2,25. 16 Age kwa rugene hena mauketanga gokufana ngwendi maurenga gokudwara monsingo, ta ga tura keguru lyonongundi ntani ta rugana yininke 100 yokufana ngwendi pomegaranate, ta yi tura komauketanga. 17 Age kwa tulire nongundi odo komeho zontembeli. Ngundi zimwe kwa zi tulire koMbindakano,* ano ezi zimwe koMuzogo.* Ngundi ezi ga tulire koMbindakano kwa zi rukire Jakini,* ano ngundi ezi ga tulire koMuzogo kwa zi rukire Bowasa.*